زمهرير الاوجاع الفصل التاسع وثلاثون 39 - بقلم قدر ال هاشم

زمهرير الاوجاع

حفصه الهاشم..

ــــــــــــــــــــ

رجعت كعدت بمكاني احتراماً لرغبة عمو سعدون

كعد هوه وظل يحجي لدقايق ويه عمو سعدون شلونكم ما لونكم
وعيونه تسرق النظرات عليه

ملامحه ما متغيره هوايه بس طاك الشيب براسه
نزلت راسي وكمت اطكطك بأصابيعي من التوتر

سعدون// ابويه هاي انته كدامها وهيه كدامك ان تراضيتوا ورضت سهند ازفها بيدي الك وان ما رضت ما اجبرها وليدي

باوعلي وهوه مبتسم وجاوب عمو
لالا ابو يوسف ان شاء الله ترضه

سيف// سهند يولوو الانسان يغلط وسبحان المايغلط انه دفعت ثمن تهوري بهالعمر الراح وما كضيته يمج
يولو اشوفج من بعيد واتكرضم عليج النهار كله ذاب نفسي بهالشغل تا انساج والليل حاير شلون اردنج الي

نزلت راسي وما جاوبته حسيت على عمو كام وطلع ..
هسه ليش ديطلع ويعوفني ويا ما ادري.؟

سيف// ابويه انتي احجيلج شي جلمه تا اسمع رنة صوتج

بلعت ريكي بتوتر وجاوبته
اني اريد اربي بنتي وابقى عليها ما اريد اتزوج وادخل بتجارب فاشله.

قلص عيونه عليه بشك وسألني
تحبي يولي.؟

باوعت لعيونه بنظرات عميقه وهوه دينتظر جوابي رجعتله السؤال بسؤال ثاني
وانته تحبها.؟

فرك وجهه وباوعلي
يولو انتي تحجين من كل عكلج .؟انه ماكو وحده عاله هالكلب غيرج
يولو لاتكسرين بيه غلطه وانكضه عليها عمر اريد اخليج بعصمتي وام بيتي..

سهند//سيف انته عندك ام بيت ومكون عا..

قاطعني بسرعه
يشهد الله لاحاسبها مرتي ولاهم يحزنون يولو هيه مره وحده واتدنيت الها ولهسع لا اكابلها ولاتكابلني

نزلت راسي ماجاوبته وهوه هم سكت بس احس بنظراته عليه
شويه وفات عمو سعدون

//ها يابه شتفقتوا.؟

سهند//عمو اريد افكر.

تنهد بتعب وكام
فكري فكري بس لااطولين عليه يومين واجي اخذ ردج عدل بويه

سعدون//الله كريم ابني ابقه على الغده

قاطعه وهوه يلف سبحته على ايده
لا ابو يوسف تسلم غداك واصل الحجيه تنطرني .

طلع عمو وصله للباب ورجع واني بعدني كاعده بالاتسقبال
فاات عمو كعد بصفي لبس النظرات الطبيه وكام يشتغل على تيلفونه

ساعه يباوعلي من جوه النظرات ويرجع بيباوع على التيلفون
سعدون// ها بنيتي شكلتي على هالموضوع.؟

فركت اصابيعي وجاوبته//والله ما ادري عمو .اكول لو ابقى على بنتي احسن

نزع نظاراته وباوعلي
سهند بنيتي انتي جبيره وفاهمه باجر عكبه تكبر بنتج وانتي تكبرين تريدين اليعينج
واحنه مادايميلج عمو ..البنت تزوج وتروح لعيالها وين تظلين انتي
عمار ومات الله يرحمه وانتي بعدج صغيره تزوجي جيبي اليعينج بكرتج

سهند//عمو يعني تريدني اتزوجه.؟

سعدون//لا بنتي اني اذا ما راضيه ما ازوجج اله اقصد عليهِ وعلى غيره

كمت حضنته وبسته من راسه
شكراً عمو

طبطب على ايدي وابتسم
يوولي على شنو تشكريني هههه

ضحكت عليهِ عود ديقلد سيف من يحجي..

كمت صعدت فوك وافكاري عامي شامي
متوتره من هذا الموضوع حيل

ورا يوم خابرتني الحجيه وخطيه ظلت تقنع بيه
وبالاخير تكول مو لان ابني والله بس انه اشوفه هاويج

وره يومين بالضبط عود باجر لازم نرجعلهم خبر
واني الى الان ما مقرره شي

بالليل كاعدين بالمشتمل مال يوسف
وهذا هم من عرف ما ضغط عليه
بس كل شويه ويكول سيف خوش سيف ترا

كاعدين مسالمين دنشوف فلم هندي
ما حسينه غير الاعصار يفوت علينه هايج

اوس// وينهاا هااي الرعننه وينهاا..؟

كام يوسف مفزوع واحنه هم عبالنه صاير شي
يوسف// يااستار خير شصاير .؟

باوعلي اوس معصب تجاهل يوسف واجه وكف كدامي ويدفع بكتفي
انتتي غببيه خووما وافقتي على هذااك الاررعن .. جااوبي ولج خووما قبلتي بي.؟

سحبه يوسف وهوه يحجي عليه
يمعود يبو الغيره عبالنه بيك شي ثول

دفع يوسف بعصبيه احسه بركان مو انسان
ولك كوواد لاتسحبني خل اشوف هالزماله المهجره شمسويه

عاف يوسف ورجع باوعلي
ولج قنندره وافقتي مو اشوفج سااكته ..؟

كعدت على القنفه وضرب ايده ابعضهن بعصبيه وهوه يباوعلي
ااخخ بس لو اعرف هاي الكره شحاطه بعقلها اني ارتاح زمااله زمااله
باوعلي بخزره وكمل كلامه..راح ترجعيله مو.؟بربوك نسيتي شسوا بيج

صاح عليه يوسف//وولك اووس الزم لساانك عااد ..ترجعله ماترجعله انته شكو.؟

باوعله بطرف عينه وسحب الجاي مالته
زعجك لساني مو.؟لاتخليني اكعد اقسملك هسه..
شريد منها قابل بس هاي زماله رايدلها واحد يرجعها لطريقها كل ماتنحرف

سحب يوسف الجاي منه وجاوبه
هوه انته ابو الانحراف لاترجع ولاتقدم

ظلوا يتناكرون بيناتهم وكل شويه يباوعلي ويهز براسه
زماله مهجره زماله

واني ماجاوبته التزمت الصمت
خبالات اوس صارت معروفه بعد

...............

بقيت الليل كله افكر بقراري
كلام عمو صحيح اني اذا اكبر من الي يعيني ويوكف ويايه
هم صح البنيه تزوج وتروح لبيت زوجها

ومن جهه سيف و وضعه
ثنينه دفعنه الثمن

اني دفعت ثمن ثقتي الزايده بالعالم
وهوه دفع ثمن تهوره

اباوع على بنتي شلون نايمه وفاتحه حلكها..
كبرانه وطولانه شويه

زين اذا تزوجته راح يتقبلها لبنتي لو لا.؟

هواي افكار ادور براسي

........

ثاني يوم جان جاي هوه وجايب ويا ابو وعمامه
توترت كولش حسيته ديخليني امام الامر الواقع

فاتوا للمضيف وظلوا يحجون ماعرف بشنو

شويه واجه ساهر اخذ جنات وراح همزين جنت مسبحتها
صاحني عمو على صفحه وسألني على قراري

بعد معركه داميه بين كلبي وعقلي
وافقت بس بشروط

وكفت ورا الباب واسمعه يكوللهم يابه ماخذها هيه وشرطوها
سألني ابو سنو اريد

كتله اول شي بنتي ما اعوفها اريدها يمي
وهوه نط من يمه لالا منو كال نعوف هالكمر ناخذها بويه وناخذ امها هم

جاوبه ابو قبلي
ول يمثبور خنفتهم من البت شثبرتنه..اي بنتي وبعد

،،عمو ما اريده يحطني بنفس البيت البي مرته الثانيه

لحظات صمت سكتوا ثنينهم ..شويه جان يجاوبني
تم بويه الج التردي

ماقبل سيف يرجع الا ابو يعقدلنه
وصدوك عقدولنه بدون حفله هوه احنه شستفادينه من الحفلات قبل هالمر

رجعوا همه لطريقهم واني هم صعدت لغرفتي
بعد ماعمو باركلي والنسوان

ميقات حسيتها ضاجت يجوز لان راح تفاركني
بعد ويه منو تتناكر ههه

وعمه جليله بس تهلهل وتصفك
خلتني شويه ابتعد عن التوتر بسوالفها الحلوه

..........

بالليل خابرني سيف
وتوقعت منه هالشي

ماجاوبته ماعندي الجرأه اواجهه هسه
لفيت راسي ونمت وهوه هم بعد ما اتصل

مرت يومين ثلاث ايام
وهوه يريد العرس بنهايه الاسبوع شلحك بنهاية الاسبوع؟

عمو كاله خليها على لاسبوع الجاي بالكوه يلا اقتنع
اول ما سد عمو الخط منه خابرني

جاوبته رأساً حجه بنرفزه
ول ياابه سهند ليش تأجلين بالعرس يولو بس لا ما راضيه.؟

جاوبته بتهجم على عكس عادتي
// لا راضيه ترا محد يكدر يجبرني عليك بس ما الحك اسوي شي اذا تخلي بنهاية الاسبوع

جاوبني هوه بهدوء بس حسيت عليهِ انصدم من نبرة صوتي ويا
يابه تعاليلي بطرك ملابسج هنانه نجهز اني وياج ابويه

سهند//لا مايعجبني هيج ما ايد.

تنهد بتعب وجاوبني
هاهيه خالي على راحتج بس ستعجلي يرحم ابيج

ابتسم نص ابتسامه وجاوبته
ههه اشو يرحم ابيي ليش منو اجاني يستهزء بوفاته.؟

حسيته انصدم من كلامي..
والصراحه اني هم انصدمت ما اعرف شلون اجه هذا الموضوع ابالي.

سيف//يولوو شجاي تلغين انتيي.؟هاي بعدج شايله بكلبج عليه سهنند.؟

غمضت عيوني ..شذكرني بهالموضوع هسه
صحيح ضجت من نفسي لان جاوبته هيج واني ناويه افتح ويا صفحه جديده
بس بالرغم من هيج ما جاوبته بعذر

رديت عليهِ بصوت بي قساوه
//اشو عصبت ما اتوقع حجيت شي غلط لو الحقيقه توجع.؟

جاوبني بحده//لاا الظااهر انتي عقلج ضاارب رووحي ارتاحي وشيلي هاي الافكار من عكللج في امان الله

سد التيلفون بدون ما اجاوبه حتى..
ومن هاي المخابره والمخابرات والوراها عرفت اكو حاجز انبنا بيناتنه

ماعرف شلون راح نعيش
ماكو اتصال اذا ماتعاركنه وهوه والله يتحمل خبالاتي ببس اني ما اعرف
داصنع المشاكل ويا كوه كوه.

يجوز اريد اشوفه يبقى متمسك بيه لو هم يعوفني مثل قبل.؟

مبقالي شي على العرس
وبس عمتي جليله وميقات يطلعن للسوك مرات اطلع وياهن
ومرات ما اطلع اكوللهن انتوا اخذوا على ذوقكم

ملتهيه بين بنتي والبنات يجن غصباً عليه يسون هالماسكات والماعرف شنو

.............

للمره الثانيه البس البدله البيضه
اني ما ردت زفه جبيره وعرس وطبل وزماره

من خابرته وكتله ميحتاج نسويها بيناتنه عصب وكام يغلط ويسب
لا انتي تا تعاقبيني ابرودج هذا انتي ليش تسوين هيج هذا مو اسلوبج وين لهفتج الي .؟
وين حبج .؟

هواي سوالف وعود عناد بيه سوه زفه وحفله جبيره
على كولته اعزم اهالي الرمادي وتكريت من كل صوب اجيبهم

وصدوك البيت انترس اوادم
نسوان والزلم برا

اجذب ما اكول ما فرحانه
لا اكو فرح بس التوتر والخوف اكبر

اخاف استعجلت بقراري..واخاف من القادم

سلمني عمو بيد سيف ويوصي عليه
تذكرت ابويه شلون جان قافل على الموضوع نهائياً

تذكرت نظراته المو راضيه عليه بسبب سيف
وشلون يتوسل بيه علمود ارفضه

عفت ايد سيف بنتره وشمرت نفسي بحضن عمو
ما اهتميت للمكياج والساح على وجهي

ولا لنظرات سيف المصدومه من تصرفي.
عمو هم بادلني الحضن ويهدأ بيه بضحكه

............

طول الزفه هوه لازم ايدي ويبوس بيها
واني اسحبها ويرجع ياخذها بحده

الغريبه اخو مجان موجود بالعرس ولا لمحته
ولد عمامه كولهم موجودين حتى اخوان تقوى بس سرمد ماكو.

زفونه بين الهلاهل والصلوات
كعدت بالغرفه متوتره..هاهيه بعد وكع الفاس على الراس مابيها رجعه

فات عليه بزيه العربي الابتسامه ماليه وجهه
بقيت كاعده على الجربايه وهوه كعد بصفي ولزم ايدي

سيف//يلا ابويه كومي غسلي وتوضي تانصلي

صدك هم كمت دا اروح للحمام

سحبني من ايدي وكعت بحضنه
ظهري على صدره وراسه يم ركبتي

قشعرت ركبتي من لحيته ميلت راسي بأنزعاج عليهِ
سيف موو كلت دنصللي.؟

جاوبني بخدران وهوه يحرك راسه على ركبتي
اي اي ابويه خل افتحلج السحاب

فتح السحاب وكل شويه احس ببوساته على جسمي
اول مافتحها ركضت للحمام..

ما انكر حبي اله..بس ما اكدر ابينلهيا مثل قبل.

غيرت البدله ولبست الرب شديته شد
خطيه لو عنده لسان جان كال كطعتيني لان الملابس الجوا فاضحه بس الروب طويل

طلعت وهوه جان كاعد على الجربايه وينشف بشعر
باوعت عليهِ واخذتني الصفنه لتفاصيله شلون يحرك راسه وصافن على نقطه محدده
بشنو ديفكر.؟

رفع راسه وعيونه مشت على طولي
سيف بأبتسامه// نعيماً حبيبي.

رمشت عدة مرات بتوتر ورحت لبست حرام الصلاه
الله ينعم عليك.

وكفنه صلينه
صوته..نفس مؤذن الجامع.

هوه طلع نفس المؤذن..ههه ابويه جان يمدح بالمؤذن هوايه.

نزلت دموعي واني بالصلاة..
كل ما اباوع عليه اتذكر ابويه وتأنيب الضمير يدمرني.

كملنه صلاة وهوه رفع ايده وحطها على راسي
وكام يدعي ماعرف شيسوي يجوز ديكول طلاسم علمود يسحرني.

كمل ونفخ عليه

تعشينه يادوب اكلت شي تحت نظراته المانزلت عني

كملنه عشه واجه كعد يمي
شال ايدي وباسها..
//يولوو نصيبي لو تفرين العالم كلو ترجعين لحضيني

باوعتله بأبتسامه خبيثه وجاوبته
لو نصيبك جان حضنك ما انقسم نصين نص الي ونص لغيري.

فتح عيونه بصدمه وهوه يباوعلي
يولوو اشو صايره وكيحه حيل ..ما الحك اكول جلمه الا غلبتيني بالعشره

نزلت راسي وسكتت..
سحبني لحضنه وهوه يبوس بشعري
يولي هذا بس الج صدكي بالله ما ادنيت الها غير مره وحده حابس نفسي على خيالج..

كامت ايده تتجرأ على جسمي شويه شويه..
تجاوبت ويا مرا ادفعه ومرا ابادله..

حسيته يطلع قهر السنين كلها بيه.
هادى على عصبي مختلط الامر عليه..

............

حطني على صدره وهوه يمشي ايده على ايدي
يولو صرتي حلالي الي..

حسيت من نبرة صوته ما مصدك صرت مرته.
ابتسمت وسكتت ماجاوبته

رجع هوه التزم الكلام
بويه لو تعرفين شكثر تمنيت هاللحظه هذي كل ليله اتخيلج بديني ..

باس راسي ورجع ابتسم
تذكرني من جنت اكلج مانعرس الا ابيج يودع هههه

رفعت راسي اله وخزرته بعصبيه..
هاا كوول اخذتني بس علمود ترضي غروررك..

كمت من حضنه واني اخزره
هوه انصدم من ردة فعلي مسح على وجهه وجاوبني

//يولي انتي شلون تفكرين.؟تا اكلج هيج بس للذكرى اخذج ارضي بيج غروري شنو.؟

سحبني من ايدي ورجعني لحظنه
يولي سهند لا كلشي انطكو يروح بالج للماضي لاتعبينه وتعبين نفسج ابويه انتي

سكتت ما جاوبته..

ظل هوه طول الليل يتغزل لو يتحارش بيه
واني اسوي نفسي نعسانه عود ما اريد انام بحضنه وكل شويه دافعه نفسي عليهِ

...........

ورا الزواج التزم بوعوده الي
خله بيت الي والحجيه عايشه ويانه او بالاحرى احنه عايشين وياهم
كعدت ويه اهله اني وامه وابو هم

سرمد متزوج وطالع بيت وحده
والاثنين ما يحجون ويه بعض

اما مرته الثانيه كاعده ابيت قريب على بيت اهلها وهند وياها
ولده كبار صاروا يعني شباب سن المراهقه هيج شي

بس والله حبابين
واحد منهم عاقل حيل وثكيل والثاني شقاوجي اني اميز بيناتهم من الشخصيه
من يجي الشقاوجي اعرفه من شقا وضحكه
والثاني النونه معكوده اربعه وعشرين ساعه.

اما امهم ما التقيت وياها من العرس الى الان
هاي صارلي اسبوعين من تزوجته..

مرات اكعد احجيله على عمار يكولي تحبي واحسه يضوج
بس يسكت علمودي دائما اكوله احس نفسي ضلمته ويايه وماعيشته مرتاح

وهوه يكولي ادعيلو لاتحجين هيج و انتي ظروفج تختلف وماعرف شنو

بهاي الاسبوعين ما راح يم تقوى او نام برا البيت
كله يمي وهذا الشي نوعا ما مريحني

بس الصبح يروح يشوفهن شمحتاجات ما محتاجات
ومن يروح ابقه اتصل عليهِ اني هيج ويا بطبعي اغار حيل

ومن يرجع من يمهن لازم اسوي ويا مشكله وهوه يتحمل

اتذكر مره الحجيه راادت تروح تبات يمهن
وراحت عليهن من الصبح..وهوه وصلها

طول على غير العاده مالته كل مره مايطول نص ساعه ويجي
هالمره عبرت الساعتين

الغده جاهز اباوع على الطباخ وارجع اباوع على الباب
بس لايتغده يمهن..

بقيت اكل بأظافيري واروح منا واجي منا..
الى ان سمعت صوت السياره

وكغت متخصره يم باب المطبخ متجهزتله..

هوه فات وشمر مفاتيح السياره على الميز وتقدم باسني من خدي وكاتم ضحكته
هاي الحركه دائما يسويها من يشوفني متجهزتله علمود استلمه ليش تأخر يمها.

سيف// مريتي شلونها.؟.

جاوبته بعصبيه واحس وجهي كام يطلع نار
// مووزينه ويينك اشو تأخرت يمهاا تغديت يمها مو تغديت ,
.,والله سيف اذا متغدي يمها هسه اشيل الاكل واذبه كوله بالشارع افتح حلكك خلي اشوف افتح افتح

اني مشتعله بنار وهوه كاعد على الكرسي يضحك عليه
ههه يولي شفتح منه تعالي ابوسج وشوفي اذا بي شي

ضربت رجلي بالارض بغضب وخزرته
سييف مدا اشااقه ليش تأخرت ..؟

سحبني من ايدي وكعدني بحضنه..
يولي يغبره امي رادت مسواك رحت جبتلها هاي هيج الغيره عاميتج عمي

دفن راسه بركبتي وكام يحرك براسه وهوه يصيح
//خااااالي اموت انه على اليغار

ضربته بعكسي على بطنه
اي انته ماعندك غير سالفة الموت

سيف// ههه عجل شسويلج من تغارين اجيب طاري الموت عاد تهدئين تصيرين بزون عاقل

بوقتها صبيتله غده يكمل وارجع اترس الماعون داشوفه
اذا يشبع يعني ماكل يمها واذا لا يعني ما ماكل.

وهوه خربان ضحك عليه.
خلي يضحك اهمشي اتأكد

هيه صحيح مرته والها حق بس هوه بعد محرمها عليه

فراهد تزوج جيرانهم بنيه تطلع بالثلاثين
صراحة مناسبه اله لان هوه عمره طخ الاربعين وبعده لازواج ولااطفال

هسه الدور لساهر المستهتر هههه كاضيها من وحده لوحده
ومن احجي ويا يكولي ولج هنه يذبن نفسهن عليه

هوه وجاسم اخويه حيل اصدقاء
بس جاسم دائما ارزله من يحجي ويه بنات ويكولي لا لا اني بطلت هالسوالف
واعرف بي جذاب

سيف..
عايشه حياتي ويا مثل الديج والدجاجه هههه

ساعه مناكر وساعه لا
بس ابد ما عدت الزعله اكثر من يوم..

تقوى حالتها نفس ماهيه عايشه هيه و ولدها يجوز هذا عقابها من رب العالمين
وهند زوجها الى الان ما لكو وهيه ما تكدر تزوج لان متزوجها شرعي ومهزوم
وابنها هم خطيه بدون لاجنسيه ولا اوراق رسميه

سيف حاول يساعدها وكاللها اسجله بأسمي ميصير الولد هيج يبقى
وهوه صار شاب جبير مو صغير يعني

وعكس امه متعلق بخاله سيف
واربعه وعشرين ساعه ويا وصدوك سيف راح وسجله بأسمه

وامه تخبلت وتعاركت ويه سيف
انته بسببك تزوجت هذا السافل وانته الدمرت حياتي الله يدمرك ..

وشكد دعت عليهِ وهوه التزم الصمت ما جاوبها
بس الحجيه نزلت بيها رزايل

انتي الدكيتي رجلج الا اخذ ابن بغداد هاج اخذتي شجرالج اهي فالج
(اهي مثل الاهمداج)

والولد اتسجل بأسم سيف وهيه بقت معلكه
اني صرت حامل والامه كلها تخبلت مو بس سيف

من تقوى وعلياء وجروا ايدكم

بس فرحة سيف جانت مختلفه بالنسبه الي
طول فترة الحمل مداريني اكثر من نفسه

تصرفاته ويايه كلها بحنيه ختى من اعصب عليهِ
واني لساني زفر على اوس طالعه..بس هوه دائماً يسكت وينتظرني اكمل عصبيتي
بعدين يستلمني

اتذكر مره حيل لحيت عليهِ على موضوع تقوى
وليش يتأخر يمها

وهوه هم صار عصبي عافني ويريد يطلع من البيت
عاد اني تخبلت عليهِ لزمته من ايده وخزرته
وين طاالع حضررتك راايحلها مو رايحلهاا

نتر ايدي منه وصاح بوجهي
تراا مو حاله هذي سهنند اجي تكوليلي روحلها اروح تكوليلي ابقه والتالي

كتفت ايدي بعصبيه وجاوبته
التاالي ربه عاالي متطلع من الببيت تبقه هنا اليوم حتى للمحل متروح يلاا امشي ويايه

سحبت ايده وصعدته ويايه للغرفه وادردم عليهِ
خوش والله طلع معصب ويريد يروحلها

كعدته على الجربايه واني اخزر بي// غير اذا تروحلها سيف اروح احرك البيت عليك وعليها جرب وشوف ديلا

كتفت ايدي وتنفست بتعب
كل هذا وهوه كاتم ضحكته على خبالي..بعده مشايف شي.

بوقتها اخذت المقسوم منه وطلع..

..........

ورا خمس اشهر من زواجي سمعت زوج علياء متوفي

هطيه انقهرت عليهِ حيل
هوه ملازم بالبيشمركه ما اعرف تفاصيل وفاته لان ما اتواصل وياها او اسأل عنها

مرت سنوات واني ما راده الها السلام
من توفى زوجها رجعت لبيت اهلها مكسوره نظرات الندم بعيونها

انقهرت مو عليها لا والله
بس لان اعرف هذا الشعور وماره بي.

ما رحت للفاتحه ولا وصلت يمهم
سيف يكولي عيب روحي وهذا واجب بس اني نهيت الموضوع بلا قاطعه

خلصت الفاتحه ومرت اشهر على عدتها
مره جنت راجعه من بيت عمو سعدون كعدت بتعب هسه اني بشهر السادس
كعدت شويه واسمع صوتها من المطبخ

سييف// تفضلي من هين.

كمت بسرعه الا شويه وردت اعثر بألعاب جنات
فتت للمطبخ وهيه صارت كدامي

باوعت عليها بغضب ورجعت انظاري لسيف ويوسف
سهند// سييف شدتسووي هااي هنا

علياء// سهند حبابه بس خلي احجي وياج

دفعتها من جتفها بعصبيه
//ماااريد اشووفهاابيتيي منوو فوتها سييف

يوسف// ولج سهند بنت عمج محتاجه وكفتج بهيج وكت

سهند// مووبنت عميي والله اذا ماطلعت هسه اهجم البيت فوك راسها

سيف//يولي اهدي موزين عليج هسع تطلع بس لا تعصبين لايصيرلج شي .

باوعت عليها النذله شلون تباوع عليهِ ذرة عقل مابقت براسي
سحبته من ايده بعصبيه وهوه ثكيل اجر بي جر

امشي لاتوكف كدامهاا يووسف ختوولي ماا ايد اشووفها

اخذها يوسف وهيه تتبجبج
باوعلي سيف ومقلص عيونه

//يولي منيلج هاي الكسوه.

خرزته بحده //لااا ادافعلهاا تريدني اخذها بالاحضان يعنني بسببها ابويه مات مااراضي عني
ماايحجي وياايه حقيرره

حضني سيف وظل يحجي عليه
عوفيها هسه ليش حاركه اعصابج..

بس هاي علياء اني اعرفها حقيره الله اليعلم بشنو دتفكر هسه

...........

بحملي الثاني هم جبت بنيه
سيف فرحان بيها كولش هوايه..

واخوتها ولد تقوى هم تعاملهم وياها زين مو حقودين

علياء من اخر موقف كطعت فرد مره وياها
وهيه كاعده يم اهلها ماعرف اخبارها اكثر من هيج

قدر واوس الله يحفظهم
عدهم اربع اطفال ولازال العدد في تصاعد ههه

وهباوي ويوسف هم ما شالله ماقاصرين

فراهد هم صار عنده ولد وبنيه على كبر

اما اني عندي بنوتي جنات
وبنتين من سيف و ولد واحد

سيف علاقته بأخو سرمد..على كد السلام وبس وهذاك شايل خشمه من سيف

صراحه حقه لانو شك بأخو وكل هذا بسبب النسوان

سيف كبر وكبرنه والشيب طك بينه
بس بعده نفسه بحنيته بهدوئه ويايه من اعصب

سبحان الله شكد مرت سنوات واحنه ننتظر نكون لبعض
وشكد يأسنه انو بعد مابيها مجال نتزوج

بس قدر رب العالمين جان مكتوب النه غير

كمت ما اخاف من شي اريده يصير او شي ما اريده
لان صرت متيقنه الكاتبه الله الي يجيني لو يدور عليهِ الحول مثل ميكولون

المسامح كريم صحيح سيف غلط ويجوز بعضكم يكول ماعدها كرامه
بس هوه دفع ثمن تهوره واني دفعت ثمن اغلاطي وثقتي الزايده بالعالم

ـــــــــــــــــــــــ

الى هنا وتنتهي قصة الحلوه سهند وسيف

اتمنى تكون عجبتكم كولش تنوست بكتابتها اكثر من قصة رغماً عني
واتمنى ايضاً تكونون ماخذين عبره من القصه مو بس روايه اقراها واعبر

هواي اكو من امثال علياء تاخذ صور غيرها وتنسبها لنفسها وادزلها لكل من هب ودب
لذلك شويه احتفظ بصوري لنفسي لا ادزها للاقارب والله هاي صديقتي وهاي بنت عمي وماعرف منو
اتمنى تاخذون عبره

احبكم كووومه شلون ما راح انزل الكم بعد ما اعرف ههههه
احبكم جثيررر

انتظروني بقصتي الجديده منعطف واحد..

احبكم مره ثانيه ههههه

دمتم سالمين عسلاياتي
حفصه الهاشم