زمهرير الاوجاع الفصل الثامن وثلاثون 38 - بقلم قدر ال هاشم

زمهرير الاوجاع

حفصه الهاشم..
صلوا على النبي ويلا نبلش

ـــــــــــــــــــــــــــــــ

كابري وتكبري على من في هواكي مغرمُ..
وفالتهوي البعد ..وسأهوى الانتظارِ المؤلمُ..

بقلمي حفصه الهاشم

ـــــــــــــــــــــــــــــ

سيف/// ول ابويه هان عليج تروحين لحضن غيري.!؟

ما استغربت اتصاله
جنت متوقعه راح يحاول يحجي ويايه بأي طريقه

بقيت ساكته وحاطه السماعه على أذني وهوه يتنهد بتعب وهم
سكت ثواني ورجع كال

سهند ابويه انتي ليش هيج تضيعينه لات..

قاطعته قبل مايكمل ببرود
سيف انته الضيعتنه بتهورك مو اني ماكو قسمه بيني وبينك

جاوبي بهيام واضح على صوته
والله نفسي بيج سهند اذا يصيرلي شي كله من ورراج سهند انطينه فرصه ثانيه اني متهور سرسري بس لاتعوفيني سندي..

ماتحملت كلامه..
احسه يرجعني لايام تكريت
سديت الخط رأساً حتلى بدون ما اجاوبه

اكدر اجاوبه وارزله لو اعاتبه بس اريد تنتهي علاقتنه على شي حلو
ما اريد المشاكل تزيد والكلام الموزين يكبر بيناتنه

............

يوم الخطوبه مالبست اسود جليله وميقات توحدوا عليه
لبست لون وردي فاتح وفتحت شعري مقبلت اروح صالون

اني اصلاً ما الي نفس بالخطوبه كلها
هوه خوش رجال ادري

بس اني مشاعري من ناحية الخطوبه والزواج ماتت

تم العقد وصرت زوجة لعمار بالشرع
اجه لبسني الذهب وامه موجوده خوش مره ذابتها على الصامت بس تبتسم

عمار مستهتر
يتغزل بيه كدام الكل عيني عينك
شنو هذا الكيك عمي ليش البدله هيج جان لبستيلج عبايه

ظل طول العقد بس يعيب على البدله
يريدها شلح بلح الافندي

ما جاوبته ابد بس اهز براسي ومن يتماده اخزره بس بدون جواب
وهوه هم ما لح عليه ليش ضايجه لو شبيج مدلغمه

عدت الحفله على خير
ماجانت حيل هوسه ..لا حفله بسيطه وخفيفه وهيج احسن الي

بقيت بالفستان لان هوه اصلا مستور
ردانه طوال مو قصيره والدلعه مابي عاديه بس منفوش وبي كيبور هواي

فات عمو والولد وكاموا يباركولي
اجه عمو باس راسي وكام يبجي ..ادري بي يتذكر ابويه

اني هم ماكلت على عينك حاجب حضنته وكمت ابجي ويا

ماعرف على شنو ابجي بالبضبط
على ابويه لو القهره البداخلي

ظلوا الولد يهوسون ويسوولي اجواء عود
لان واضح على شكلي الانزعاج والضوجه

يوسف يباوعلي وعيونه ضايجه على ضوجتي
هز راسه بعدم قبول وطلع من الاستقبال.

كلعت ورا كاعد بالحديقه وصافن
كعدت بصفه وسكتت

يوسف// سهند اخيتي لازم تكملين حياتج ترا الدنيا ماتوكف على احد

هزيتله براسي وسكتت
يوسف// لعد ليش هاي الضوجه بيج اضحكي غيري جو هاي خطوبتج.. وترا عمار خوش رجال وكلبه طيب

رجعت هزيتله براسي وسكتت
هوه هم ماحجه شي بعد بقينه كاعدين هيج صافنين على الفراغ

الى ان كام هوه وراح لبيته بعد ماسلم عليه

بقيت كاعده بالطرمه وصافنه على النجوم
ما اريد افكر بأي شي اريد عقلي يصفه شويه

........

ثاني يوم عمو صاحني للأستقبال
رحت عليهِ وجانت ام فراهد مرة عمو كاعده يمه ومنزله راسها

اول ماشفتها ردت اطلع لان اني من يوم عرفت بسوالفها وسوالف بنتها قطعت علاقتي بيهم
رجعني صوت عمو سعدون وهوه يطلب مني ارجع

سعدون// بنيتي سهنند لخاطاري تعاي كعدي موضوع صغير نحجي بي وبعدين روحي

رحت كعدت بصفه وماباوعت لام فراهد
شويه وكام يحجي عمو

انتوا اهل وهاي المشاكل تصير بكل بيت والانسان مو معصوم من الغلط بنت عمج تبقى من لحمج ودمج
والبنيه ندمانه حيل وتريد السموحه منج

ما جاوبته بشي
أيدته ام فراهد وهيه تكولي

//يمه انتن جنتن مثل الخوات سامحيها وخلي الكلوب تصافه

ماباوعت الها ولا جاوبتها التفتت على عمو وجاوبته

// عمو اني كتلك هذا الموضوع ينسد نهائياً وعلياء ما احجي وياها وابقه ادعي عليها ليوم الدين
واذا تريدني اسامحها فبهاي الحاله افصخ الخطوبه من عمار وارجع لسيف

باوعلي عمو مصدوم من جوابي
سهند بنتي هاي شلها دخل بهاي.!؟

// لاعمو الها هواي دخل ذنب سيف اخف من بنت عمي المصونه أذا اسامحها على الشي الي بسببه دمرت حياتي على شنو ما اسامح سيف وهوه ماسوه الي سوته هيه.

ام فراهد// يمه والله البنيه ندمانه وليل ونهار تاكل بنفسها علمودج.

سعدون// ام فراهد اني ما اضغط على سهند تريد تسامحها ما عندي اعتراض ماتريد تسامحها هم ما اضغط عليها

كمت على حيلي وجاوبته
واني علياء لساني ميطخ لسانها طول ما اني عايشه.

هزلي براسه عمو وهاي ام فراهد ظلت تتوسل وماعرف شنو
عفتهم وطلعت .. انوب ارجع لعلياء الا اذا غبيه

مر اسبوع وعمار متكرضم يريد يخابرني
وكل ما يخابر اني اطلع مليون حجه

ام فراهد ما ملت كل يوم تجي وتريدني احجي ويه بنتها
لو تخابرها علمود تفتح سبيكر وهذيج تكعد تتوسل

بس اني قافله من نايحتها واغلب المرات ما اطلع من تجي ام فراهد علينه
وكلهم مستغربين من قساوتي وياها..

عقدنه محكمه اني وعمار
صدوك مستهتر بس حنون

لاحظت عليهِ ابد ميحب يجبرني على شي اني ما اريده
لو يضغط عليه بالكلام

واني هم ما اعرف شبيه صايره حقيره حيل
حتى الابتسامه بالمجامله ما اطلعها

قررت افاتح عمار واحجيله عن الماضي مالتي ويه سيف
وهاي اول خطوه اسويها علمود تنبني الثقه والصراحه بالعلاقه

وصدوك يوم من الايام خابرته وهوه طبعا استغرب اتصالي
وكعدله ساعه هاي الشمس اليوم منوين طالعه والكمر منورني

حجيتله عن سيف وعن كل شي صار ويايه
جاوبني بجديه تامه عكس طبعه الشقاوجي

عامر// واني جنت منتظرج تجين تحجيلي تدرين لو لا.؟

سكتت جاوبته شي اكيد الفضول يصير عنده
لان هوه شاف سيف اكثر من مره كدام بيتنه

شويه ورجع كمل كلامه
// زين سهند بعدج تحبي .؟

صفنت بسؤاله ... تفكيري راح لعقلي بعدني احبه لو لا.!؟

معقوله حب هاي السنين كولها يموت..؟
ما اتصور

حاولت قدر الامكان ما اجاوبه واغير الموضوع
بس عمار محتال ظل يكرر بالسؤال وما نزل من لسانه

جاوبته بمراوغه واني اقنع نفسي بجوابي
عمار الحب مو كلشي شنو الفائده احبه ويحبني وثقه بيناتنه ماكو .. الحب اله اساسيات علمود يستمر
وهاي الاسسيات مالكيتها بسيف ..

عمار// لكيتي يمي هاي الاساسيات.؟

حكيت خشمي بتوتر وجاوبته
/ يعني ما اعرف اني بعدني ما اعرفك ترا.

عمار // جنج على المعرفه العمر كدامنه عود عرفيني على كيفج

..........

مرت الايام وعمار ديلح على عمو علمود يسوي العرس بأقرب وقت
بس اني دا أأجل بي ليش ما اعرف

مرات احس نفسي استعجلت
واكول جنت اكدر اسامح سيف وانطي فرصه ثانيه كل انسان يغلط

ومرات اكول لا السويته هوه الصحيح
وعمار هوه نصيبي .

.........

واكفه بفساتي الابيض والهلاهل تارسه البيت
هاي التركص وهذيج التصلي على النبي

بعد صراع طويل بيني وبينهم
همه النتصروا عليه وقربوا موعد العرس

اهل عمار هوايه عماته وعمامه هواي ماينحسبون
وكلهم كلوبهم بيها حنيه عماته وبنات اقاربه

من شفتهم هوايه كلت هاي اربعه وعشرين ساعه يتمالخون
بس الواقع عكس خيالي

لزمني عمار من ايدي وطلعنه للسياره ما اشوف شي غير الارض
البركع على راسي والحر جاينه من جهنم

صعدنه بالسياره وعمار ماقبل كال بس اني ويااها بالسياره
اخوانه يريدون همه يسوقون بس هوه مقبل

صعدنه بس اني ويا بالسياره شغل اغاني وكام يغني وياها
والشباك مفتوح ساعه يغني وساعه يتمالخون وهوه واصدقائه بالكلام
ما صارت زفه سووها مسابقه بينه وبين ولد عمه واصدقائه

خلصت الزفه ووالعرس هم
العالم كل واحد راح لاهله جنت متردده من بقائي ويه وعمار وحدنه
وخايفه حيل اكول لو باقيه مامتزوجه وعايشه يم عمي احسن

اباوعله بتوتر وهوه يطمني بأبتسامته الحنونه
ابد ما ضغط عليه ظل كاعد بصفي وشويه شويه يقنع بيه عبالك طفله

عمار// ها هسه ماناويه تبدلين

جاوبته واني اطكطك اصابيعي
اي

كمت داروح للحمام وهوه رجع لزمني
انتظري يابه خلي افتحلج القيطان ايدج متوصل

تجمدت بمكاني من الخجل والتوتر
وهوه يفتح بالقيطان بعده ما كمل ابتعدت عنه وركضت للحمام

....

صلينه وطلع الاخ يعرف يصلي
هههه على عيونه الزايغه كلت هذا حتى صورة الفاتحه ميعرفها

تعشينه وهوه بس يتحارش
واني مدنكه راسي واكل بصمت ولا كأنو هوه موجود

..........

قابلته بالبرود بس هوه قابلني بالحنيه والحب
جنت جافه ويا حيل كلمه حلوه ماسمعته

وهوه على العكس تماماً يحاول ينتشلني من برودي ويا بكلماته الحنونه

........................

مر شهر كامل على زواجي من عمار
صدوك مثل ما مدحوليا خوش رجال

وشكد ما اني ازعل عليهِ وادور مشاكل
هوه ابد ميضوج ودائما يطيب خاطري

العصريه جان طالع للشغل واحنه بيتنه وحد
بيت صغير على كدنه لان بيت اهله مليان وهمه متعودين ولدهم من يتزوجون يطلعون وحد

خابرتني الحجيه تباركلي كل هالفتره ماحاجيه وياها
ملتهيه بالعرس وهوسته

الحجيه// شلونج يمه بالمبارك بنيتي سمعت عرستي.

//اي خاله الحمدلله على كل حال شلونج شلون صحتج.؟

سحبت نفس يهم وجاوبتني
والله يمه عايشين والحمدلله جثير مشتاكتلج والله

بعدني ممجاوبتها واسمع صوته يرعد بالبيت
تقوووى قسماً بااالله اليووم جناازتج على ايدييي....

بعده ما كمل كلامه وسدته الحجيه وهيه تصيح عليهم

اخذني الفضول اعرف شبيها مرته
وليش هيج ديصيح عليها..

استغفرت الله وكمت دا اسوي الغده عمار على جيه هسه

..........

مرت الايام و الاشهر وحياتي ويه عمار تحله اكثر
بديت اتعلق بي يجوز الحب يجي ورا هاي المرحله

انسان كولش خلوق وحنون حييل
بيوم من الايام حسيت على نفسي صحتي مدهوره لعبان نفس
والشهريه فايتتني هم

رحت لهبه ومناك رحت احلل
وطلع شكي بمحله حامل ببدايه شهر الثانيه

فرحتي مجانت تنوصف
وفرحة عمار جانت واضحه ومبينه اكبر من فرحتي..

من صدوك حمدت الله على نعمته الي
شكد تعبت بالاخير حصلت الراحه

مرت الاشهر بسرعه
ماجان شي مميز بيهن بطني بدت تكبر وصلت الشهر السابعه

امي تخابرني تظل تعلم بيه ونصائح للحمل وماعررف شنو
ولاحظت ميقات تغار من امي تخابرني ههه

علمود هاي بطلت اخابرها كدام ميقات
قدر جابت ولد سمو بكر

مدنفش وخدوده تجنن
واوس بعده نفسه نفسه ههههه الحقنه مالتنه متتغير
بس ويه قدر يتغير 180 درجه

بيوم السبت العصر الساعه 5
خابرت الحجيه دائما تسأل عني وعن اخباري ابد ماقطعت بيه

ومن بين كلامنه لزمني الفضول علمود اسألها عن صياح سيف بذاك اليوم
سألته بشكل غير مباشر شلون تقوى وهند وابنها تنهدت وجاوبتني

// والله يمه شكلج..؟ الله من راد يغضب علينه شمرلنه هالتقوى

سهند// ليش شبيها خاله مبينه فقيره.؟

حسيتها مرتبكه بجوابها
والله يسهند مستحيه منج جثير

//حبيبتي خاله انتي مثل امي مابينه هالسوالف

سكتت شويه ورجعت حجت// يمه سيف مايحاجي اخو من يوم السالفه الصارت لهسع
احنه عبالنه سرمد محاجيج وعينه عليج وهوه الرجال يحلف انه لا محاجيها ولا مدتني صوبها
وسيف متخبل عليهِ الى ان تخاربوا الاخوه

تنهدت بتعب وسكتت
نفس الموضوع ما اريد افتحه واجاوبها لان من صدوك يفتح جروح بكلبي دا احاول اسدها

سهند//خاله وتقوى شدخلها.؟

//يمه تالي سيف ماخذ هند ومدري وين ولوا من راجع صاعد على مرته وكاتلها بعدين طلعت السالفه
تقوى ماخذه تيلفون سرمد ومحاجيه هند علمود يحجون وياج شايفين حسابج وحاجين وياج من حساب سرمد عادينه بعدين عرفنه هذا الحساب مو الج لبنت عمج والله يمه سيف لهسع يتكرضم عليج هيانها مرته لا هيه مطلكه ولاهي مرته معلكه لا للسما ولا للكاع

سكتت شويه دا احاول استوعب حجم الحقاره
يعني بس علمود تزوجه تخرب الاخ على اخو وتطعن بشرفي ..

استأذنت منها وسديت التيلفون
بقيت كاعده بالمطبخ ومصدومه منهن مو بنات هذني غضب

الله اليستر منهن حياتي كلها خربت من وراهن
تقوى شايفتها كم مره بس ما مبين عليها الحقاره

لو مبين بس اني ثوله الرايح والجاي اصادقه.!؟

بطني ثكيله كولش
كل ساع واحس سجاجين عبالك بيها ..

خابرت على عمار مديجاوب لو يطلع مشغول

عفته وخابرت على يوسف الالم بعد مدا اكدر اتحمله
ما طول دقايق واجه يوسف

اخذني للمستشفى وطلع عندي ولاده مبكره
الخوف تلبنسي فجأه شكد جنت منتظره اليوم الي اجيب بي واشيل الطفل بأيدي بس من وصلت لهليوم الخوف تلبسني

فوتتني الممرضات للغرفه وبدن يجهزن بيه
ويوسف خابر على عمار علمود يجي

انطاني التيلفون والخط مفتوح

عمار// الو ها حبيبي اسف والله جانوا زلم يمي وما كدرت اجاوب

جاوبته بتعب بالكوه الصوت يطلع مني // ماصار شي عمار بس تعال مو تتأخر كولش خايفه.

عمار// لا يعمري لاتخافين هسه راح اسد المكتب واجيج صيري سباعيه مو تخافين

سهند// اي ان شاء الله انتظرك.

سديت التيلفون منه ..
ظلت الممرضه تمشيني بالصاله هيه كالت عندي ولاده بس متعصيه الضاهر

ورا ربع ساعه تقريبا انرجت المستشفى بصياحي
يجوز حتى المايعرفني عرفني من ورا الصوت

جبت بنوتي بشلعان الكلب
هواي جانوا يكولولي اول ولاده تكون سهله وبسرعه تصير
بس اشو اني صار عندي العكس

نقلوني لغير غرفه ومرت ساعات واهلي كلهم يمي
تمنيت لو ابويه ويايه جان شلون صارت ردة فعله

اهل عمار يمي واهلي هم
والبنوته بعدها صغيره وهذا اوس مجلب بيها وحاط راسه بحضنها ويبوس بيها

عبالك ماعنده طفلين
وساهر يصيح عليهِ انطينياها وانطينياها

ما سمينه البنوته ننتظر عمار يجي علمود نسميها
ولو هوه جان حاطلها اسم قبل ما تجي للدنيا

جان دائما يكلي اذا ولد نسمي عمر
واذا بنيه نسميها جنات.

بس اني هم بقيت ساكته فرحته هوه من يكول الاسم احلا
بقينه لليل وعامر ماكو

يخابر عليه اخوانه بس ماكو..

واني التعب كلتني انام وارجع اكعد
..........

مرت ثلث ايام واني بالمستشفى
عمار الى الان ماكو ما اجه عليه

اخابر عليهِ ميجاوب

وامه يمي دقيقه وعشر ساعات مو يمي
ميقات وامي ثنينهن يمي

وثنينهن عيونهن بيهن حقد وحده على الثانيه
هبه تروح وتجي

اجه يوسف يريد يطلعني من المستشفى
سوينه الاجرائات وطلعنه

وكل هذا اني شايله على عمار بس اشوفه الا اتعارك ويا
صارلي شكد من جبت والى الان هوه ماكو حتة الحمدلله على السلامه ما كالي

رجعوني لبيت عمو سعدون بالكوه لان جنت ناويه ارجع ويه عمتي ام عمار
بس بعد عمو سعدون كلمته غاليه عليه

اول ما فتنه اخذوا البنوته مني وصاحني عمو للأستقبال
كعدت بصفه والجو متوتر

اباوع على وجوهم مصفره
وعمو مدنك راسه ميباوعلي

// عمو شكو شصاير.؟

باوعلي وعيونه حمر.. طبطب على رجلي وسكت
رجعت سألته بخوف وكلبي احسه يرجف مو جسمي

// عمو شبيك..؟ عمار بي شي.؟

كام اوس وطلع من الاستقبال بضوجه
باوعت عليهم بأستغراب ثواني وحسيته تشجع علمود يصارحني

حضني من جتفي وهوه يحجي
ابويه انتي احنه كلنه نعيش نعيش ونهايتنه الموت

دفعته من صدره وابتعدت عنه فاتحه عيوني بغضب
عموو شبيك على شنو هالحجي هذاا هسه ..؟ عماار وين .؟

رجع حضني واحس كتوفه تتحرك من البجي ..؟
معقوله..!؟

دفعته و وكفت على حيلي واني اهز راسي بمعنى لا
لاا عمو مستتحيل عماار وييين عمو قبل كم يوم جاان يحجيي ويااايه زووجي وووين..؟

كام يوسف لزمني يحاول يهدأ حركاتي الماكمت اسيطر عليهن من الصدمه
هوه لازمني واني اصيح وادفر بي بغضب من عماار

سهند لااا ميعووفني هووه ميعوفنني مثلهمم يوووسف وخر عنني

يوسف// كولي يا الله سهند حرام عليج هيج تسووين تعذبي

جذااب جذااب بنتته تنتظره يسميهاا عموو ودوني عليهِ جذاابين

انهارت اعصابي فرد مره
الدنيه غوشت بعيني ما حسيت على
نفسي شوكت تخربطت وشلون وكعت

فتحت عيني بالمستشفى وميقات يمي
غمضت عيني ورجعت فتحتها حلم هذا لو شنو.؟

باوعت لميقات فوك راسي ماعرف شتحجي
فاتت الدكتوره وظلت تفحص بيه وماما باعي هنا وباعي هناك

طلعوني من المستشفى رأساً للبيت
البيت كله هادئ صوت الابره تنسمع

الولد كلهم ببيت ابو عمار..
اكدر اسمع صوت بجي امه وخواته من ورا الحيطان البيناتنه

غطيت راسي وكمت ابجي
شلون هيجي يموت ليش بسرعه رااح.؟

معقوله اني هيج فكر لا حبيب صار من نصيبي ولا النصيب استمر ويايه.

مرت ايام الفاتحه
وكل يوم الحزن يتجدد

صح ماطولت ويا يجوز سنه اقل السنه بس ترك اثر حلو بحياتي
جان صعب عليه فراك انسان مثل عمار

انسان ابد ما كسرني ولا بجاني
طول فترة زواجنه ما رفع صوته عليه ابد

ما اتذكر كالي ولج تعالي ..
كلامه ويايه كله حبيبي وحياتي

شلون ما احزن على هيج انسان
يجوز اني ما بادلته بالحب الي هوه جان منتظره مني
بس الاحترام بيناتنه موجود وما مات ابد

عمار توفى بحادث سياره من جان ديجيني للمستشفى
مرات افكر يجوز من حماسه علمود يشوف الطفل سوه الحادث

هواي أأنب بنفسي على اللحظات الي ما فرحته بيها
وعلى البرود الجنت بي ويا مجان يستاهلني ابد

......

علياء اجتني بالفاتحه ماحسيتها اجتي تعزني حسيت بيها جايه تتشفه بحزني
واني بوسط النسوان ما اعرف شلون كمزت عليها وضربتها

هيه جوه ايدي يجوز طلعت حركة موتة عمار بيها
فاككونه النسوان وهيه تباوعلي بحقد
بعدها نظرات الغيره بعيونها

على شنو تغار ماتكولي اشو ارمله وبركبتي طفله
على شنو تغار على صخام الوجه

.....................

مرت ايام تيلفوني غالقته نهائياً
حابسه روحي بالغرفه حتى بنتي ما اجيها

ميقات تفوت وتطلع ترزل بيه
بنتج على الاقل رضعيها

ما اعرف ليش محملتها مسؤلية موت ابوها
دائما اكول يجوز تحمس علمودها وسوه الحادث وهاي الافكار تخليني مااطيقها

مرت اشهر واني بالعده
وجنات عايشه على المميات

تعلقت بميقات اكثر مني
مرات اسمع صوتها احس نفسي انكلب وحش عليها

وعمو يرزل بيه كافي تسوين بنفسج هيج
ولا تظلمين البنيه

احس نفسي ظلمت عمار هواي ويايه
ما يستحقني ابد

اوس يروح ويرجع وقدر ويا
احسه مقهور اكثر مني على حالتي

استأذن من عمو علمود ياخذني لبيته واني رافضه
بس هذا اوس ابو راس اليابس

اخذني يمه وجنات هم اخذها ويانه
على اساس يطلعني من الجو الي اني بي

بقيت يمهم فتره لا يوم ولا يومين
شي شهر كامل اكثر اني يمهم

ام عمار دائماً تجي تشوف حفيدتها
اوس خلاني غصب عليه اشيل البنيه

اول ما حطيتها بحضني اتذكرت عمار
الحزن التم عليه من جديد

حضنتها وشميت ريحتها
عيونها عيون عمار الله يرحمه نزلت دموعي وهيه بحضني واني خايفه احضنها حيل وأأذيها

بقت جنات على المميات اتعودت عليهن
تعلقت بيها حيل كل ليله اصلي ركعتين اربعه واظل ادعيله لعمار

الميت ما يوصله الا الدعاء والزكاة والصدقه
ما عندي اله الا الدعاء

رجعت لبيت عمو وحياتي نوعاً ما مستقره
بس دائماً تأنيب الضمير ياكلني على عمار

..............

بعد مرور سنه ونص

مرت سنه ونص على وفاة عمار

الكل حياته مستقره هبه هم صار عدها بنوته
وعمو سعدون تعبان من الضغظ والسكر حالته صارت شويه مو زينه

خايفه لا اخسره لان هذا سندي البقالي بالدنيه
وين اولي اذا صارله شي

اخبار علياء تجيني الى الان ماعدها خلفه
الحجيه مستمره على تواصل وياها وهم مرات تذبلي طراطيش من اخبار سيف

تكول الى الان مو على اتفاق ويه مرته
اطفال ماعنده غير التوم الي صاروا بالغلط على كولته كبروا ولده
بس هوه ميريد اطفال من تقوى

كم مره يحاول يخابرني او يتواصل ويايه من امي لو من الحجيه
بس اني ما احجي ويا يكولون على اساس مرته مبقيها بس لان يتيمه
من يوم الحادثه الصارت هوه حرمها عليهِ

ـــــــــــــــــ

بيوم من الايام كاعدين واجانه ساهر يصيح صوتجنن اجوي الزلم
كمنه سوينالهم جاي وضيافه وطلعوها لهم بالمضيف

منو الزلم منعرف بس شيوخ وماعرف منو جايين من الرمادي

ظلوا شي ساعتين اكثر وراحوا

......

مرت يومين وعمو طلب يحجي ويايه
وصدمني اكثر من كالي سيف راجع طالبج مني للزواج

جاوبته بهدوء
// عمو اني اكلت نصيبي من الزواج والخطوبات وما اعرف شنو
وسيف متزووج واني ويا مابينه قسمه

باوعلي بتأمل وسألني// بس بعدج تحبي.!؟

نزلت راسي ثواني افكر بسؤاله
الحب الحقيقي ميموت بيوم لو يومين بس ايضاً ارجع واكول الحب مو كلشي

طبطب على رجلي وشال تيلفونه وخابر
// اي اي خالي تعال ... لا لا كدامي .. يلا الله وياك

سد التيلفون وظل ساكت
شويه جان يندك الباب

فات علينه وسلم

وكفت على حيلي اباوعله وارجع اباوع على عمو بصدمه
متغير حييل طالع الشيب بلحيته وشعره

بعدهن نظراته نفس ماهنه ماتغيرن
باوعت عليهِ بعمق وافكاري متخربطه

اخذتني الصفنه لعيونه لايده هم شايل سبحه سوده
غير الي انطانياها

هزيت راسي وعقدت حواحجبي بغضب
ودرت وجهي عنه

ثواني وسمعت صوته يحجي ويايه

سيف// سهند شلونج ابويه...؟

ــــــــــــــــــــــــــــــ

شكدد حاولت اخلي هذا البارت هوه البارت الاخير بس ماكدرت
يلا ان شاء الله القادم هوه الاخير ونختم القصه

شنو رأيكم بالاحداث وترحموا لعمار خوش رجال حتى سهند من تحجي عنه
الى الان تكول من اتذكره اكول ما يستاهلني ويستاهل الاحسن

احبكم جثيير
دمتم سالمين احبتي

حفصه الهاشم