تحميل رواية «زين وليل» PDF

رواية زين وليل الفصل الحادي عشر

ايه ده مالك يابنتى

ماتقلقيش ياامى ليل داخت بس شويه انا هطلعها اوضتها ترتاح

ماشى ياابنى طلعها

ايه اللى حصل يافاطمة

اسمى الحاجه فاطمة ياليلى

ليلى اتكلمت بتهكم طيب ياحاجه حصل ايه

مافيش ليل داخت شويه وزين جابها

تكونشى حامل يااختى

ماكملوش أسبوع جواز

وايه يعنى عادى

ياريت ده يبقا المنى

اسأليهم واتأكدى فى الوقت ده نزل زين

زين ياحبيبى ممكن ليل تكون حامل

لا طبعا ياامى

ليلى حست بتوتر زين فى الكلام وشكت ان فيه حاجه

ليه يابنى هو فيه حاجه

لا بس الدكتور كشف عليها فى المكتب عندى لو شك حتى فى حمل كان عرفنى لكن هو قالى هبوط واكلتها ضعيفه جدا

طيب يابنى ربنا يرزقكم بالذرية الصالحة

يارب ياامى

انت سيبت ليل ليه هترجع الشركة

لا مراد هناك هيشوف الشغل هو انا جيت اخد اكل لليل بس علشان تاخد العلاج بعد كده

ربنا يقومها بالسلامه شوية كده لما ترتاح هطلع اشوفها

تمام عن اذنكم

هو فيه حاجه غريبه ياحاجه

حاجه ايه اللى تقصديها

زين اتوتر شويه لما جيبتى سيرة العيال ممكن يكون متفق مع مراته انهم مايخلفوش مثلا

وايه اللى هيخليهم يعملوا كده هو احنا ناقصين فلوس خير ربنا كتير والحمد لله

مش عارفه حسيت كده

لا احساسك غلط وخليكى فى نفسك وبس وحتى لو متفق مع مراته دى حاجه تخصهم لوحدهم وطلعت فوق اوضتها من غير ماتسمع رد ليلى

ليلى بغيظ لنفسها يومك قرب اووى يافاطمة هكسرلك غرورك ده وانك شيفانى برضو بنت الخدامه هبقا ستك وتاج رأسك وكل العز ده هيبقا بتاعى لوحدى

***********أميرة جمال**********

يلا ياليل علشان تأكلى

مش عايزه

ماينفعش انتى سمعتى الدكتور قال ايه ولا يرضيكى يقول انى مجوعك هنا

……….

طيب كلى وخدى علاجك وهنعمل اتفاقيه سلام

ليل ضحكت على طريقة كلامه

ياااه اخيرا شوفت ضحكتك كنت قربت اقلب اراجوز والله

ليل اكتفت باابتسامه

يلا كلى بقا وبعدها هنتفق على كل حاجه بجد ومش هضايقك

ماشى

زين قرب من ليل عللشان يساعدها تقعد كويس كان قريب جدا منها عنيها بتجذبه مش عارف ليه بيبقا ضعيف اووى قدامها قعدها كويس ومسك المعلقه علشان يبدأ يأكلها

انا كويسه اقدر اكل لوحدى

مش انا السبب فى تعبك يبقا أصلح غلطى بقا

ليل للحظة اتمنت يكونوا متجوزين حقيقى وعايشين حياتهم عادى فاقت من تفكيرها وبدأت تأكل من ايد زين

الحمد لله شبعت

الف هنا نتكلم بقا

ليل شاورت برأسها بأنها موافقه ويقدر يتكلم

انا اسف واى اعتذار فى الدنيا مش هيوفيكى حقك بس اوعدك ده كله مش هيتكرر تانى هحترمك وهراعى مشاعرك بالنسبه لنادين هى زى اختى الصغيره وعمى الله يرحمه كان موصينى عليها هى طايشه شويه فمعلش استحمليها حاولى تصاحبيها وتقربيها منك وتنصحيها وتجاهلى تصرفتها لانها طفلة بالنسبه بقا لتاليا واتنهد ورجع تانى يتكلم انا لازم اتجوزها انا وعدتها بده وماينفعش اخلى بيها خالص طبعا انا مش هقبل بده لكن هقولها تتعامل معاكى فى الشركه باحترام وتلتزم حدودها لحد مانتجوز وهبعدها عنى وأكيد مش هكلمها فون فى وجود فى اى حاجه تانى مضيقاكى منى

هزت رأسها بالرفض

تمام بس موضوع الأكل لو مالتزمتيش هأكلك غصب عنك انا بقولك اهو تراعى صحتك كده كويس تمام

ليل بابتسامه ساحرة تمام

غيرى هدومك دى بقا بلبس بيت مريح مافيش حد غريب هنا وانا زى جوزك يعنى انتى شكلك تعبانه هغيرلك انا هدومك

برره يازين

ده انا جوزك والله

يلا اتفضل على تحت وانا هاجى وراك

اسندك طيب

ليل مسكت المخده علشان تضربه بيها وهو طلع يجري على تحت وهو بيضحك

ليل ابتسمت على حنيته واتطمنت جدا لكلامه واتحركت من مكانها علشان تغير هدومها وتنزل تحت تقعد معاهم

أميرة جمال💚

انتى لسه هنا

خضتينى ياطنط فيه ايه

مش قولتلك من بدرى تروحى الشركه يانادين

اه اخدت شاور وكنت بكلم اصحابى

اه تقصدى الشلة الصايعه بتاعتك

ياانطى بقا

بلا انطى بلا زفت هتضيعيلى التخطيط.كله

نعم تخطيط ايه

اقصد يعنى تخطيط انى اجمعك مع زين مش انتى بتحبيه

اوووى ياطنط ليلى ماانتى عارفه

يبقا ماتسيبهوش للى اسمها ليل دى تضحك عليها

هى عملت حاجه تانيه

كتيير يانادين بس مش عايزه اضايقك قالت كلامها بخبث

لا قوليلى ارجوكى

عملت نفسها مغمى عليها فى الشركه وزين جابها البيت من شويه وهى حضناه وماسكه فيه

انا هنزل حالا اهزقها

لالا عايزاكى تقربى منها وتعامليها كويس

لا طبعا

اسمعى بس كده زين هيحبك اكتر ويطمنلك ويوافق انك تشتغلى معاه

وبعدين

تعرفى كل حاجه عن الشغل ونطلعها قدامه طماعه وبتحب الفلوس وهو يسيبها ويتجوزك انتى

طيب هنعمل ده ازاى

سيبى كل حاجه عليا انا دلوقتى انزلى عادى خالص

اوك انا نازلة

ليلى ابتسمت على غباء نادين اللى مساعدها توصل للى هى عايزاه

أميرة جمال 💚

ازيك يا حاجه

الحمد لله يانجاة اتفضلى

اسفه لو بزعجكم كل شويه

ازاى تقولى كده ده بيتك ياحبيبتى كفايه انك من حبايب ليل

الله يعزك يا حاجه فى الوقت ده كانت ليل نازلة من فوق

ازيك يا مرات عمى وحشتينى اووى

انتى اكتر ياحبيبتى اخبارك ايه يابنتى

الحمد لله كويسه

وجوزك عامل ايه

بخير الحمد لله

عايزاكى فى حاجه كده ياليل

خير

عمك جاابر قالى اكلمك انك تقولى لجوزك يوافق يشتغل معاهم فى استيراد شحنة خشب من بره علشان مش معاهم سيولة كافية

لا يامرات عمى انا اخاف على زين منهم

والله يابنتى انا كنت رافضه الموضوع ده بس انتى عارفه زنهم عليا

طالما مصممين يبقا شر وانا مش هسمح لزين يتأذى ابدا قوليلهم هتبقا تقوله وخلاص وشويه وهتصل بيكى اقولك انه رفض

بتحبيه ياليل

ليل سكتت

شكلك وقعتى ياليل

ليل لسه هترد كانت فاطمة رجعت تانى ونجاة استاذنت بعدها

نادين نزلت وعملت زى ماليلى طلبت منها سلمت على ليل واتطمنت عليها وبعدها خرجت مع أصحابها

ليل بتكلم نفسها لو قولت علطول لعمى ان زين رفض هيبقا حرام علشان بكذب وهاخد ذنب وكمان عمى ممكن يكلم زين فى الشركه ويبقا شكلى وحش وعمى مش هيسبنى فى حالى انا هقول لزين وخلاص وان شاء الله هو يرفض

ليل خبطت على الباب ودخلت عند زين فى مكتبه

احم كنت عايزه اتكلم معاك فى حاجه

انا موافق

رواية زين وليل الفصل الثاني عشر

موافق على ايه انا لسه ماتكلمتش

على طلبك

وايه هو بقا طلبى

انى اشتغل مع عمك وابنه كنت خارج وسمعتك وانتى بتتكلمى مع مرات عمك

بس انا يعنى….

انتى ايه

مش عايزاك توافق

ليه قالها واتحرك من مكانه وهو بيتحرك ناحية ليل وهى بترجع بخطوات لورا لحد ماحست انها وصلت للحيط وراها وزين حط ايده وحاصرها هاا ايه السبب

علشان عمى مش كويس وممكن يأذيك

وانتى خايفه انه يأذينى

انا مش عايزاك تتأذى بسببى كفايه انك وقفت جنبى

ده مش تفضل منى انتى تستاهلى كل خير

هتشتغل معاه برضو

اه علشان اعلمهم الأدب

ليه

لأنهم اذوكى وفكروا يأذوكى تانى وانا مش هسمحلهم بده

هتدافع عنى

مش هدافع غير عنك الباب خبط وليل بعدت عن زين وهى مكسوفه وزين كان بيشتم فى سره على اللى خبط دلوقتى

ادخل قالها زين بعصبيه

ازيك يازينو

اسمى زين يانادين قولتلك انا دلوقتى راجل متجوز عيب كده

نادين بدموع انت مش قولت انى زى اختك

ليل بتدخل اه ياحبيبتى اخته صغيرة وبيهتم بيكى جدا ودلعيه ياستى انا مش زعلانه

شكرا قالتها نادين بهدوء وكانت خارجه من المكتب

اوقفها صوت زين كنتى محتاجه حاجه يانادين

لا خلاص

لا قولى يلا وانا اسف ياستى كنت متعصب شوية بس

كنت عايزه اطلب منك طلب

ايه موضوع الطلبات النهارده خلص كلامه وهو بيبتسم لليل

عايزه اشتغل معاك فى الشركه

ليه انتي محتاجه فلوس

لا انت عارف كويس بابى سايبلى فلوس كتير اووى

طيب ايه السبب

حابه انى اشتغل درست فى امريكا كل ده وفى الآخر هاجى اقعد فى البيت كده

تمام هكلم مراد صاحبى يبقا مسؤل عنك فى الفرع التانى

لا عايزه ابقى معاك افرض حد ضايقنى يعنى

زين بتنهيده خلاص يانادين حاضر

تسلملى بكره الصبح ان شاء الله هروح معاك انت وليل

لا ليل تعبانه لازم ترتاح شويه

لا انا الحمد لله كويسه هنزل معاك بكره

ماينفعش الكلام ده ياليل انتى محتاجه اهتمام بصحتك

هنزل وههتم بصحتى

زين بصلها وهو مفتح عينه نص فتحة كده

وعد

موافق لما نشوف وخرجت نادين وليل كل واحده على اوضتها

أميرة جمال💚

عملت زى ماقولتى ياطنط

عملتى ايه يانادين

من الصبح هروح الشركة مع زين وليل

ممتاز جدا عايزاكى بقا تركزى فى كل حاجه فى الشركة

زى ايه كده

يعنى اى صفقات مثلا او عقود تتمضى لو عرفتي حسابات فى البنك كده يعنى عرفينى اول بأول

بس ده مش غلط

لا طبعا ده علشان نعرف كل حاجه عن زين ونشوف ازاى تقدرى تقربى منه ولو حصل مشكلة تقدري تساعديه

اوك ايه تانى

لا كفايه ده دلوقتى بعدين نشوف هنتحرك ازاى

تمام ياطنط وقعدت على الفون تلعب وليلى ابتسمت بشر وخرجت من الاوضه وهى حاسه بانتصار وأنها بدأت تقرب من هدفها

أميرة جمال💚

خير عملتى ايه

استنى لما اخد نفسي

ياولية اخلصى

كلمتها ارتحت

قالتلك ايه

هتكلم جوزها وبكره تعرفنا

الغبيه دى ماكانت بلغتنا النهارده

خلاص بقا يابابا مش هتفرق النهارده من بكره

انت عارف ان اى تأخير مش فى صالحنا

ماتقلقش بكره تبلغنا بالموافقه

ولو رفض

لازم يوافق امال ليل لازمتها ايه

خلاص اهدى ياخبر بفلوس

ابعدوا بقا عن البنت وسيبوها فى حالها انتوا ايه كفرة

ادخلى جوة مش عايز اسمع صوتك

ليك يوم ياجابر وسابته ومشت

ولية فقر بصحيح بتفول عليا ماانتى بومة

أميرة جمال💚

الحقينى ياتاليا مصيبة

تاليا ردت ببرود خير ياندى فى ايه

ندى بدموع مغرقه وشها اانتى عارفه تامر وأنه بيحبنى اتصل بيا وقال انه تعبان جدا ومحتاج علاج جبته وروحتله البيت حطلى منوم فى العصير وماحستش بنفسي غير وانا فى اوضه نومه ضحك عليا ياتاليا انتى عارفه اهلى صعايده دول يقتلونى فيها وتامر الجبان برن عليه قافل تليفونه ومش عارفه اوصله

………………..

ساكته ليه ياتاليا ردى عليا

انا عارفه كل ده وانا اللى قولت لتامر يعمل كده وكمان صورتك معاه بس ايه فيديو قمر

ندى بصدمة انتى ازاى تعملى كده حرام عليكى اذيتك فى ايه

كنتى بتفكري تقولى لزين انى ضربت ليل بالنار وتكشفى كل حاجه وكنتى هتكشفى خطتى الاخيرة بس حتى دى لاغتها او اجلتها شويه جاتلى فكرة تانية تجنن وانتى هتساعدينى فى تنفيذها

حرام عليكى

اخرسي خالص لاما الصور دى هتوصل لأهلك فى البلد

لا ابوس ايدك هيقتلونى

يبقا تهدى كده وتسمعى الكلام اللى هقوله

هتخلى تامر يتجوزنى

دى حاجه ترجعله بقا

ارجوكى كلميه

اوكيه هبقا اشوف الموضوع ده

ركزى معايا بقا فى الله هقوله………………….

كده هتخربى بيته

انا هسرع بس فى الطلاق مش اكتر وبعدين ماطلبتش رأيك انتى تنفذى وبس وطلعت دخان سجايرها بشر

رواية زين وليل الفصل الثالث عشر

الو زين

ايوه ياتاليا خير

تعالى عندى البيت

ايه اللى بتقوليه ده ياتاليا مستحيل طبعا

أرجوك زين عايزه أشوفك

انتى عايشه لوحدك ياتاليا ده مايصحش

انا عارفه انت مش عايزنى

دى مسألة وقت بس ياتاليا وهنبقا مع بعض وطالما وعدتك انى هتجوزك يبقا خلاص

مالهوش لزوم الكلام ده انا هنتحر خلاص عايزه أشوفك بس قبل مااموت

انتى اتجننتى ياتاليا هتموتى كافرة

هموت من حبك يازين

ارجوكى اهدى ياتاليا

كان نفسي تبقا آخر حد أشوفه يازين

ارجوكى ماتعمليش حاجه انا جايلك حالا وطلع يجرى زين بسرعة

ليل سمعت كلام زين مع تاليا وشافته وهو بيجرى وغصب عنها دموعها نزلت وعرفت ان مستحيل زين يحبها وان اللى حسته كان غلط مجرد انه بيشفق عليها طلعت على اوضتها بهدوء عكس النار اللى جواها

أميرة جمال💚

تاليا افتحى ارجوكى

…………

فضل يخبط على الباب وفى الآخر كسر القفل ودخل لقى تاليا فى اوضتها وماسكه ازازة ولسه هتشربها

زين جرى عليها ورمى الازازة فى الأرض وبدأ يتكلم بعصبية

انتى ازاى تعملى كده

علشانك يازين

مافيش حد يستاهل انك تموتى كافرة علشانه

انت تستاهل يازينو وبدأت تعيط

ارجوكى اهدى بقا

حاضر انت هتتجوزنى

اكيد ياتاليا انا مش برجع فى كلمة قولتها

وليل

مالها

هتعمل معاها ايه

هخليها على زمتى

ليه مش قولت هتطلقها

علشان احميها من عمها

انت حبيتها يازين

انا هتجوزك ياتاليا

حبيتها يازين

مش مهم ياتاليا

عايزه اعرف بس

اه حبيتها براءتها وجنونها وحنية قلبها عشقتها كلها

للدرجه دى

واكتر انا اسف انى بقولك كده لكن انتى اللى صممتى تعرفى

طيب اتفضل العصير ده

كنتى هتشربيه قبل ماتنتحرى ولاايه

انت عارف بحب العصير جدا وعلطول بيبقا جنبى

طيب اشربيه انتى

لا مش عايزه خده انت

لا شكرا انا همشى بقا وهكلمك احدد معاكى ميعاد الفرح

طيب علشان خاطرى اشربه بقا

حاضر ياستى هاتى وبدأ يشرب العصير

ابتسمت تاليا على نجاح خطتها وفى لحظه كان زين نام وبدأت تاليا تبعد عنه لبسه وشاورت لندى انها تدخل بالكاميرا وبدأت تاليا تاخد صور مع زين فى أوضاع مش مظبوطة كتير جدا وبعد ماخلصت شاورت لندى انها تخرج ونامت فى حضن زين

بعد نص ساعه بدأ زين يفوق ماكنش عارف هو فين وشاف تاليا جانبه وهى من غير لبس ماكنش فاهم ولاعارف ده حصل امتى آخر حاجه فاكرها انه كان بيشرب العصير قبل مايخرج

تاليا صحيت وبدأت تعيط وزين بيحاول يهديها

تاليا انا مش فاكر حاجه انا كنت بشرب العصير وخارج ومش عارف ايه اللى حصل

بعد ماشربت العصير فجأة بدأت تقرب منى وانا امنعك بس مااقدرتش علشان كنت تعبانه

ازاى ده حصل انا كده خنت ليل

يعنى خايف على ليل وانا مستقبلى اللى ضاع ده عادى

لا طبعا انا هتجوزك مستحيل اخلى بيكى انا همشى دلوقتى وبعدين هكلمك واتحرك بسرعه

تاليا ابتسمت بانتصار على نجاح خطتها

أميرة جمال💚

تعالى ياقمر

……..

هنفسحك مش اكتر ياحلو انت

ابعدوا عنى وبدأت تجرى وفجأة خبطت فى حيطة

مسكها من ايدها ووقفها وراه وبحركة سريعة بدأ يضرب الشباب اللى كانوا بيعكسوها وطلعوا يجروا من قدامه بخوف

شكرا

بصلها باحتقار وماردش

انت بتبصلى كده ليه ماتعرفش انا مين

للاسف عارف

كويس انا نادين هانم تبصلى كده ليه

بصى للبسك وانتى تعرفى

ماله لبسي أحدث موديل

هو مافيش لبس اصلا طبيعي يعاكسوكى

انت ازاى تكلمنى كده

بصوت أشبه بفحيح الأفعى اياك صوتك يعلى عليا فاهمة نادين بخوف هزت رأسها دليل على الموافقه

اركبى هوصلك

مالهوش لزوم

بصلها تانى

احم حاضر

ابتسم من جواه على طفلته…….

رواية زين وليل الفصل الرابع عشر

زين اخد عربيته وساق بسرعه وراح مكان فاضي وهو بيصرخ مش عارف ازاى ده حصل هو كده خان ليل وهى مستحيل تسامحه وكمان لازم يتجوز تاليا فى أقرب وقت مش هينفع يتأخر بعد اللى حصل بس ليل هتتوجع اووى منه هى طلبت منه أنه يأجل جوازه من تاليا لحد مايطلقها ازاى هيفاجئها دلوقتى بده وفى وقت قليل جدا عن الوقت اللى اتفقوا عليه حاسس انه مخنوق لف بعربيته وراح عند صاحب عمره يساعده فى قراره

أميرة جمال💚

حضرتك طلبتينى ياطنط

تعالى ياليل وبعدين مش اتفقنا تقوليلى ماما

حاضر ياماما

اخبارك ايه انت وزين

الحمد لله كويسين

واتفقتوا الطلاق يبقا امتى

ليل بصدمة طلاق ايه بس ياماما فاطمة

يابنتى انا اه واحده كبيرة فى السن بس مش معنى كده انى مااعرفش ايه اللى بيحصل فى بيتي

العفو ياماما بس

ياحبيبتى انا عارفه كل حاجه من قبل ماتكتبوا الكتاب

ايه اللى تعرفيه

انه جواز اتفاق بينكم زين علشان يرضينى وبعد كده يتجوز تاليا الحرباية وانتى علشان تهربى مع عمك وابنه اللى اخدوا حقك بالغصب

ليل بدموع انا اسفه والله كنت عايزه اقولك من وقت ماعرفتك وكان صعبان عليا نضحك عليكى بس علشان خاطر زين هو بيحبك جدا

حبتيه

…………

قولى لوالدتك ها حبتيه وكمان ده جوزك يعنى لاعيب ولاحرام

ليل بدموع مغرقة وشها هزت رأسها بانه ايوه

طيب بتعيطى ليه دلوقتى

لانه مش من حقى هو من حق تاليا

بس يابت هو مش من حق حد غيرك والمفروض تحافظى عليه من الحرباية اللى اسمها تاليا

احافظ عليه من تاليا ولا من نادين ولا من مين بس

ههههه ده انتى بتحبيه اووى

اه وهو حمار لايبالى

الحمار ده يبقا ابنى علفكرة

يعنى انا ظلمته

بصراحة ياحبيبتى ظلمتى الحمار

ليل ضحكت على فكاهة فاطمة قد ايه هى يا طيبه وام حنونة

بصى نادين ماتقلقيش منها هى مش بتحب زين متعلقة بيه بس

بس هى بتتعامل على اساس بتحبه

هى صغيرة لما تكبر وتحب هتفهم فمافيش منها قلق

وتاليا

لا دى حرباية وعقربة وكل حاجه

هعمل ايه قصادها

تحافظي على جوزك منها

ليل بتنهيدة بس هو بيحبها

مابيحبش حد غيرك

ليل بسرعة بجد هو قالك

يابت اتقلى مش كده هو ماقالش حاجه بس ابنى وانا عارفاه كويس هو بيحبك وبقا مبسوط معاكى انا بقا عايزاكى تكملوا جوازكم

احم اعمل ايه يعني

قربى منه واقلعى الاسدال يااختى والبسى حاجات حلوة كده وكاشات

لا طبعا كاشات ايه اتكسف

الطم يابت ده جوزك يا مدهولة خليه يضيع منك

لا خلاص هحاول

اسمها هعمل هو احنا لسه هنحاول يااختى وقربى منه كده وخليه يتعود على وجودك

انا معاه فى البيت والشغل

المهم تكونى حواليه دايما مش معاه وخلاص

حاضر

كفاية كده اعملى ده الأول وبعدين اقولك الخطه الجديدة بس خطوة خطوة

انا بحبك ااووى ياماما

وانا اكتر ياعيونى يلا على أوضتك تعبتينى

ههه حاضر

أميرة جمال💚

حاسس ان فيه لعبه فى الموضوع ده

لعبة ايه بس يامراد دلوقتى

يعني ايه يازين مش فاكر ايه اللى حصل انت لو بتشرب خمور كنت قولت ماشى لكن ازاى ده

مش عارف بقا ده اللى حصل

دى اكيد حاجه من الحرباية تاليا

يعنى هى هتعمل كده فى نفسها وتدمر مستقبلها يامراد

والله ممكن دى علشان فلوس تعمل اي حاجه

اللى حصل حصل وخلاص انا كده لازم اتجوزها

انت بتحب تاليا

مش عارف مابقتش حاسس بيها

مراد بخبث بس حاسس بليل صح

اقتحمت قلبى يامراد

مش قولتلك هتحبها

انا عشقتها بس كده هتضيع من ايدى

ايه اللى هيضيعها بس

جوازى من تاليا

طيب ينفع تستنى شويه وسيبلى الموضوع ده

وتاليا اكيد مش هتسكت

ماتردش عليها ولو زنت اووى قولها بترتب امورك وهتتجوزها

مش هينفع اخلى بيها يامراد وادمرلها حياتها

لما نشوف اصل الموضوع ده وهى اللى حياتها هتتدمر ولا عايزه تدمر حياتك انت

تمام انا همشى دلوقتى

ماشى بس اوعى تقول لحد على اللى حصل

حاضر لما نشوف آخرتها ايه

خير بإذن الله ماتقلقش يلا ياعم روح لمراتك وغمزله

ماهو القر ده اللى جايبنى ورا

هقر لحد مااتجوز

طيب انجز بقا

قريب

شكل فيه حاجه حصلت

لا ابدا بس عندي نية

طيب سلام ياابو نية

هههههه مع السلامه ياصاحبى ومشى زين من عند مراد

مراد لنفسه لما اشوف ايه اللى وراكى ياتاليا الكلب انتى

أميرة جمال💚

زين حمد الله على السلامة اتأخرت ليه

كان عندى شغل

شكلك تعبان اووى اجيبلك دكتور

لا انا عايز انام بس

طيب اجيبلك تتغدى

لاماليش نفس

ايه اللى مضايقك

مش عايز اتكلم بس ليا عندك طلب لو ممكن

اؤمر

ممكن انام فى حضنك

ليل فتحت دراعها وهو راحلها ونام فى حضنها وهو ماسك فيها جامد.كأنه خايف يخسرها

ليل بدأت تمشى ايدها على شعره وتقرأله فى قراءن لحد ماهدى وحست بنفسه أنه انتظم فعرفت أنه راح فى النوم طفت النور ونامت جنبه

أميرة جمال💚

عملت ياهشام

ماتقلقش كل حاجه تمام

البضاعه اتخزنت يعنى

اه

ربنا يستر

انت قلقان من ايه لو حصل حاجه زين اللى هيلبس

هى المشكلة فى مين هيشيل ولا البضاعه اللى بملايين ولو حصل حاجه هنتصفى

……..

اوعى ياهشام علشان تنتقم من زين وليل تضيعنا

لا هنتقم منهم بعدين

المهم شغلنا يبقا فى امان

كله هيبقا تمام المهم نسبتى

20%كالمعتاد

لا المرادى عايز30%

نععععم ليه ده كتيير اووى

مش كتير ولا حاجه انا اللى بخزن البضاعه ولازم أكبر عن زين بيه

حبك لليل عامى عينك

لا ده مفوقنى

رواية زين وليل الفصل الخامس عشر

فى صباح يوم جديد

صباح الخير

صباح النور

الساعه كام

12

وسيبانى نايم لحد دلوقتى ياليل

كان شكلك تعبان اووى ماهانش عليا اصحيك

اممم وانتى اجزتى معايا بقا

اه يعنى اسيبك تعبان وامشى

انتى جميلة اووى ياليل

ليل اتكسفت ومشيت من قدامه قالتله هجهزلك الحمام

(بتكلم نفسها كل ده ياليل علشان قالك جميلة بس امال لو قال بحبك كان حصلى ايه بس )

زين ابتسم على كسوفها واتمنى لو ماكانش قابل غيرها ولا حب حد قبلها رغم حبه لتاليا كان مجرد إعجاب مش اكتر

الحمام جاهز

مراد هيقتلنا بسبب الغياب ده

هو اتصل وانا رديت عليه

وبتردى عليه ليه قالها بغضب

انا اسفة مش همسك تليفونك تانى وعنيها لمعت بالدموع

ماقولتش ماتمسكيش تليفونى كلامى واضح ياليل بتردى على راجل ليه

ليل حست فى كلامه بالغيرة وفرحت من جواها لكن مابينتش ده…هو رن كتير وانا كنت خايفه تصحى وانا تعبان محتاج راحة

زين زفر بضيق طيب ممكن ده مايتكررش تانى

حاضر

هو مراد قالك ايه

سأل عليك قولتله انك جيت امبارح تعبان شوية ونايم ومش هتيجى الشركة النهارده وانا كمان اجازة معاك

تمام انا هبقا اتابع معاه الشغل من هنا

اللى تشوفه

اسف انى اتعصبت عليكى

ولا يهمك وابتسمت

طيب علشان الإبتسامة الحلوة دى مافيش فطار ولاايه

خليه غداء بقا هنتغدى كلنا تحت مع بعض خلص حمامك وانزل

ماشي ياقمر اياك تاكلوا من غيرى

لا طبعا مانقدرش ونزلت على تحت

زين لنفسه بعد ماليل خرجت متجوز بسكويته نواعم ياربى

أميرة جمال💚

ماروحتيش الشركة النهاردة ليه

كنت تعبانه شويه

وبعدين فى الدلع ده يانادين احنا اتفقنا على ايه

خلاص بقا ياطنط ليلى قولت كنت تعبانه

ليلى حست انها ممكن تخسر نادين فلحقت نفسها واتكلمت بحنية مصطنعة مالك ياروحى اجيبلك الدكتور

لا صداع بس ورجعت امبارح متأخر

اه كنت مع الصيع بتوعك

اه ياطنط كنت معاهم دول اصحابى وبحبهم

تمام يانادين خلى زين يفلت من ايدك وليل تضحك عليه

انا هتصل بيه واعتذر انى ماروحتش النهارده

وليه ياحبيبتى ماتروحيله اوضته جنبك

هو ماراحش النهارده الشغل

لا ليل هانم قعدته جنبها وماطلعش من اوضتهم من ساعتها

ممكن يكون حبها

لالا ولا حب ولا بتاع لو فعلا بيحبها ماكنش هيتجوز عليها تاليا

وانتى عرفتى منين كل ده ياطنط

ماتشغليش بالك انا اعرف منين المهم انى بساعدك يانادين انتى بنتى ياحبيبتى ولا عندك شك فى كده

لا طبعا ياطنط مش هنسي ان حضرتك ربتينى بعد وفاة بابا وماما وماعاملتنيش ابدا على انى بنت ضرتك

انتى بنتى ياحبيبتى ومش عايزه غير مصلحتك وانك تبقى مع زين حبيبك

مش حاسه انى بحب زين

انتى بتعشقى زين مش مجرد بتحبيه ولا عايزه ليل تاخده منك

لا طبعا زين ملكى انا

برافو يا نودى يلا اجهزى علشان الغداء جاهز

حاضر هغير هدومى ونازلة حالا ونزلت ليلى بعد ماتاكدت إنها بقت مسيطرة على عقل نادين

نادين فى نفسها بس انا مش حاسه برضو بحبى لزين والغريب اللى انقذنى اامبارح ده مش قادرة انساها ليه عيونه شبه حبات القهوة تخلى الواحد يدوب فيها ياربى هو انا كنت ناقصاك انت كمان اوووف واتحركت من مكانها علشان تجهز وتنزل

أميرة جمال💚

اتجمعوا كلهم على الغداء فيه اللى نظرات الحب باينة فى عنيه زى ليل وزين اللى مشتاق ليها ونادين اللى سرحانة فى منقذها زى ماهى سمته وعيون كلها خبث وحقد وده طبعا فى ليلى وفاطمة اللى من جواها بتدعى لزين وليل انهم يقربوا من بعض اكتر وبتدعيلهم بالسعاده

قطع الهدوء ده صراخ ليل اللى طبق الشوربة اتكب عليها وهو مولع من حركة السفرة فجأة بسبب ليلى

زين بقلق ليل تعالى

مش قادرة يازين الم فظيع

زين شالها بسرعة على اوضتهم ونادين راحت تطلب الدكتور

وبعدين معاكى ياليلى

ايه ياحاجه فاطمة والله غصب عنى

ماتحلفيش باسم الله انتى فاهمة غلطاتك كترت اووى ياليلى ونهايتك على ايدى

كده برضو ياحاجه بتهددينى

اللى يقرب من زين او مراته او نادين امحيه من على وش الدنيا وطلعت تشوف ليل من غير ماتسمع رد ليلى عليها

ليلى بغضب لازم اخلص منك يافاطمة علشان اعرف انفذ خططتى واخدت تليفونها وطلعت بره الجنينه بعيد اللى فى الفيلا علشان ماحدش يسمعها

أميرة جمال💚

ايوه يازفت

اهلا بالهانم

عايزاك فى عملية كده

اؤمرينى ياهانم نوعها ايه

قتل

حلو اوووى ده كله بحسابه

اللى انت عايزه هتاخده

2مليون

تمام موافقه

ومين المرحوم

لا مرحومة

اممم كمان ست شكلها مزعلاكى اوووى

انت مالك هو انت هتصاحبنى

لا العفو ياست الكل تبقا مين هى

فاطمة ام زين

اممم طيب ودي هعملها ازاى وهى اكيد مابتخرجش من البيت

لا بتخرج تعمل تحاليل كده شهرية تطمن على نفسها

ودي ميعادها امتى كده

بكرة وانا هبقا أكد عليك برضو المهم تخلصنى منها

ماتقلقيش اعتبريه حصل سلام ياست الكل

ليلى قفلت الفون وابتسمت براحة إنها هتقدر تخلص اخلص فاطمة علشان تنفذ خطتها

أميرة جمال💚

مبروووك ياكبير

خير ياهشام

البضاعه وصلت والتجار استلموا

بتتكلم جد

طبعا هو انا قليل

ماشي ياعم اتكبر براحتك حقك

المهم نسبتى

مصمم برضو على30%

وممكن تزيد بعد كده

كده يبقا بتستهبل

لازم أعلى لفوق

طيب خلى بالك لتقع على جدور رقبتك

ماتقلقش عامل حسابى

أميرة جمال💚

انا جاية معاكى ياطنط

على فين يابنتى بس انتي تعبانة

لا الحمد لله كويسه المرهم جاب مفعول كويس الحمد لله

جاهزة ياامى

اه ياحبيبى

ماترتاحى انتى ياليل

لا كويسه مش هينفع اسيب طنط فى التحاليل

ربنا يباركلى فيكى ياحبيبتى

ويباركلى فيكى ياطنط

تانى طنط

اسفة ماما

أيوة كده بنتى حبيبتي

وانا اطلع بره يعنى

ده انت نور عينى يازين

تسلميلى ياامى يلا بينا

فجأة صراخ و ضرب نار وزين واقف مصدوم والدم محاوطهم

رواية زين وليل الفصل السادس عشر

زين واقف مصدوم لتانى مره ليل فى الأرض والدم محاوطها وفاطمة بتصرخ وصوت صراخها سمع الفيلا كلها الكل طلع يجرى بسرعة على صراخ فاطمة نادين اتصدمت من اللى شايفاه وليلى مصدومة من ان فاطمة عايشة وليل هى اللى ماتت كان هييجى دورها بعدين لكن مش دلوقتى لان الأساس فاطمة

زين فاق من صدمته وشال ليل وجرى بيها على المستشفى نفس الأحداث بتتكرر رايح جاى مش عارف يقعد من القلق هيموت عليها الاختلاف الوحيد أنه المره دى عارف هو قلقان عليها لأنه بيحبها لا هو اتخطى مرحلة الحب مين اللى عايز ياخدها منه ومش عايزها تفرح ولو لحظه فى حياتها مين مستخسرها فى الحياة بالشكل ده لحظات بتمر عليه كأنها سنين مش قادر يستنى بيسأل اللى طالع واللى داخل عنها نفسه حد يطمنه قاعد على نار عدى 3ساعات ومافيش خبر عنها فاق من سرحانه على صوت والدته

الدكتور خرج يازين

خير يادكتور ليل أخبارها ايه

الحمد لله ربنا نجاها زى المرة اللى فاتت بس محتاجه راحه لفترة كويسه لان العمليتين ورا بعض فى وقت قليل جدا وده مش كويس علشانها

لو محتاجه تسافر بره انا مستعد حالا يادكتور

مافيش داعي احنا عملنا المطلوب هنا ماتقلقش هتكون بخير

شكرا يادكتور

الشكر لله

أميرة جمال💚

مراد

نعم يازين

وصل ماما للبيت خليها ترتاح

لاياابنى انا هقعد من ليل

لاياامى انا اللى هقعد مع مراتى لحد ماتقوم بالسلامه

يابنى مش هتعرف تاخد بالك منها وعلشان شغلك

لا انا اللى هفضل معاها وشغلى مراد موجود معلش هتقل عليك يامراد

عيب ياصاحبى المهم ليل تقوم بالسلامه ونعرف مين اللى عمل كده

اعرفه بس ومش هرحمه يلا امشوا انتوا

حاضر لو احتاجت حاجه اتصل بيا انا صاحى

تسلم ياصاحبى

أميرة جمال💚

ايوه ياحيوان

ياهانم انا

شكلك مابقاش ليك فى الشغلانة

عيب ياهانم انا الراجل بتاعك

مش باين

اول و آخر غلطة هخلصك منها قريب

لااهدى شوية دلوقتى لما الموضوع يهدى كده ويعدى عليه وقت

اللى تشوفيه ياهانم

كفايه عليك نص الفلوس اللى أخدتها لأنك مانفذتش المطلوب

حقك ياست الكل وتشكرى على الأرنب

يلا غور من وشى دلوقتى

حاضر مع السلامه ياستهم

غبييى فوت عليا الفرصة بس ملحوقة يافاطمة هخلص منك قريب مش هتفلتى منى ابدا

أميرة جمال💚

ايوه يامريم

ايه يانودى فينك

فى البيت

ايه ده لسه ماجهزتيش

لا مش هخرج

ليه كده

منا حكيتلك اللى حصل المرة اللى فاتت

وانتى كويسه عادى يعنى وكمان كلنا بنتعاكس

اه بس دول كانوا هيأذونى

بس ماتأذتيش خلاص بقا انزلى نفرفش كده وهبقا اوصلك للفيلا ياستى مش هترجعى لوحدك

نادين كانت لسه بتفكر توافق افتكرت الغريب وهو مروحها (اياكى تروحى مكان زى ده تانى ماحدش عارف كان ممكن يحصلك ايه حافظى على نفسك انتى جميلة وبنت عيلة كتير هيطمع فيكى حافظى على اسم والدك اللى بناه طول حياته يانادين ارجوكى )

نااادين انتى يابنتى روحتى فين

هاااامعاكى

قولتى ايه

مش هقدر النهاردة لان عندنا مشكلة فى البيت ومرات زين فى المستشفى

اوووه هتخلصى منها وتبقى مع حبيب القلب

ايه اللى بتقوليه ده يامريم انا ماتمناش الشر لحد ابدا حتى لو بحب زين

اممم بجد طيب سلام بقا علشان الشلة وصلت هنخرج ونسهر جود باي بيبى

نادين لنفسها ازاى بقا الكل يشوفنى وحشة كده انا امتى بقيت اعمل كل ده وبقيت وحشة فى عيون أقرب الناس ليا انا مش حاسةانى بحب زين الغريب ده دخل قلبى من اول نظرة اه من تعبى منك ياغريب وخرجت للبلكونةعلشان تشم هوا

نادين فاتحة عنيها بصدمة هو الغريب اه هو انا فاكرة شكله كويس غمضت عنيها دقيقة بتتاكد من ملامحه والصورة اللى بقت جوه قلبها فتحت عنيها تانى مالقتش حد واقف زفرت بضيق للدرجة دى اتعلقت بيه وبقت تشوفه فى كل مكان ونزلت تحت تشوف حاجه تأكلها

أميرة جمال💚

ايه ده طنط فاطمة جيتى امتى

دلوقتى حالا يابنتى

فين زين

قعدمع ليل فى المستشفى

هى عاملة ايه دلوقتى

الحمد لله يابنتى ربنا نجاها بس محتاجه راحة

ربنا يقومها بالسلامه

تعالى معايا اوضتى يانادين عايزاكى يابنتى

حاضر ياطنط

تعالى ياحبيبتى اقعدى هنا جنبى

نعم ياطنط

انا عارفه انك متوهمة بحبك لزين لأنك متعودة عليها ومتربيين مع بعض بس صدقينى ياحبيبتى ده حب اخوى وهتتأكدى من ده لما تقابلى فعلا الإنسان اللى يستاهلك

نادين تلقائى افتكرت الغريب ده وقلبها دق جامد

نادين انتى معايا

اه ياطنط

يشهد ربنا انك بنتى وبحبك جدا يا نادين ونفسي نبقى أصحاب وتعاملينى زى والدتك

انا بحبك اووى يا طنط

ماما يا نادو

انا بحب نادو ده اووى

منا عارفه وغمزتلها

ياطنط ده كان ايام زمان

قولنا ايه

ماشى ياماما

كل حاجه ممكن ترجع يانادين المهم انتى اللى ترجعى

بإذن الله ياماما قريب

لو حبيتى تتكلمى انا موجودة دايما

قريب بإذن الله ياماما عن إذنك

اتفضلى يابنتى

اميرة جمال 💚

يادى النيلة ده وقته

ايه ياتاليا

الزفتة ليل اتضربت بالنار تانى

ليه كده ياتاليا مش قولتى هتخليهم يطلقوا وخلاص

انتى هبلة مش انا المرة دى شكلها فيه كتير عايز يخلص منها

كده هتاجلى موضوع الصور ده

اه شوية بس هكلم زين قريب لازم ماينساش

طيب وتامر

مين تامر

ازاى تنسيه مستقبلى هيضيع

بعدين هكلمه

انتى بتتهربى منى ياتاليا

يوووه بقا مش فيقالك انا همشى

انا السبب لازم اصلح كل حاجه حتى لو النتيجة هخسر حياتى

رواية زين وليل الفصل السابع عشر

فى صباح يوم جديد🌞

اه انا فين

ليل انتى كويسه

اه هو ايه اللى حصل

اتضربتى بالنار

تانى

اه تقريبا اللى بيغيروا منك.كتير

على ايه بس

على جمالك ياليل

ليل بكسوف هو انت كنت بايت هنا

اه طبعا

اسفة تعبتك

انتى مراتى ياليل

اه

يعنى انا لازم اكون جنبك

اه واجب يعنى

لا مش واجب

امال ايه

بغمزة هتعرفى بعدين ماتستعجليش على رزقك انتى اللى اتضربتى بالنار بقا

قطع كلامهم دخول الدكتور

اخبارك ايه ياانسة ليل

نعععم ايه يادكتور ده انا جوزها

احم سورى مدام ليل

الحمد لله كويسه

تمام ممكن اطمن على الجرح

اه اتفضل قالتها ليل بخجل

ممكن حضرتك تستنى بره

زين بعصبيه هو ايه اللى مش مفهوم فى كلمة جوزها يعنى

ممكن تكون هى مش عايزاك موجود

زين بغضب شديد ولسه هيرد عليه ليل سبقته واتكلمت

لا طبعا جوزى يبقا موجود يادكتور هو لو ممكن تبقا دكتورة بدل حضرتك هى اللى تكشف على الجرح

زين كان هيطير من السعادة ونظر للدكتور بشماتة والدكتور اتكسف بضيق وخرج من الأوضة

ليل عملتى كده

علشان هو يعنى هو انت اتضايقت من تصرفى

بالعكس مكانتك فى قلبى زادت بس ايه اللى خلاكى تتصرفى كده

مش عارفه حسيته مش كويس وكمان رافض وجودك مش عارفه ليه

اممم طيب مكافئة ليكى بقا هنزل اجيبلك اكل بدل اكل المستشفى اللى يتعب ده

ماشى

ولو الدكتور الرذل ده جه تانى ماتخليهوش يكشف عليكى

حاضر انا هنام شوية

تسلملى اللى بتسمع الكلام المطيعة دى ارتاحى لحد مااجيلك وخرج من الأوضة

ليل لنفسها معقول زين بيغير عليا وكمان قالى مكانتك فى قلبى زادت يعنى انا ليا مكانة عنده فعلا يارب يكون حقيقى ومش بيتهيقلى

اميرة جمال💚

صباح الخير

صباح النور يانادو

عاملة ايه ياطنط

وبعدين

نادين ابتسمت قصدى ياماما

الحمد لله ياروحى بخير انتى نازلة فين بدرى كده

هروح الشركة مانزلتش خالص وكمان زين فى المستشفى

برافو عليكى خدى بالك من الشغل كويس انتى مكان زين

حاضر وانتى جاهزة ليه بدرى كده

هروح لليل المستشفى اطمن عليها

تمام

مش هتيجى تشوفيها

اانا مشغولة النهاردة علشان الشركة

نادين ليل بنت كويسه جدا وطيبة صدقينى بتحبك وومكن تكونوا أصحاب كمان

ان شاء الله ياماما

همشى انا بقا

لا افطرى الأول

افطر فى الشركة

لالا هنا يلا اتفضلى

بابتسامة حاضر وبدأت نادين فى تناول الفطار لحد ماخلصت وراحت على الشركة

ليلى ايه ده خلصتوا فطار

اه انا طلبت فطار لاتنين بس انا ونادين

ليلى بامتعاض وانا

تقدرى تفطرى فى المطبخ هتنسي اصلك ولاايه قالت كلامها فاطمة واتجهت للمستشفى

ليلى بغضب مسكت أحد الأطباق ورمته على الارض كسرته وهى بتتوعد لفاطمة

أميرة جمال💚

نادين وصلت الشركة بهيبة ودخلت على مكتبها

انسة نادين

نعم يا دنيا

فيه اجتماع عاجل لكل المسؤلين

ومين عمل الإجتماع ده زين مش موجود

شريكه

هى الشركة شرك بين زين وحد

اه صاحبه هو المسؤل مستر زين وصاحب الشركة بس صاحبه دراعه اليمين

اه تمام وهيعمل الاجتماع فين بقا

فى غرفه الاجتماعات اللى فى أوضة مستر زين

كمان

اه

الإجتماع امتى

بعد ربع ساعه بالظبط

تمام هحضره

أميرة جمال💚

زين رجع بالاكل لليل اتصدم من اللى شافه وكان الغضب عاميه

رواية زين وليل الفصل الثامن عشر

زين دخل أوضة ليل فى المستشفى لقاها نايمة والدكتور كان واقف جنبها وبيمشى ايده على رأسها وجسمها

زين بغضب وعيون كلها شرار بتعمل ايه ياحيوان

ليل صحت وهى مخضوضه من الصوت فيه ايه يازين

زين من غير كلام اتجه ناحية الدكتور وبدأ يضربه بعنف وكان هيموت فى ايديه لولا الأمن اتدخلوا واخدوا الدكتور من ايديه

ليل بعياط ليه عملت كده يازين

زين بعصبيه وغضب أعمى انتى تخرسي خالص عاجبك اللى عمله يعنى

هو عمل ايه بس

ابدا دخلت لاقيته بيتحرش بيكى وبيمشى ايده على جسمك بس قال كلامه بعصبيه شديدة

شهقه عاليه خرجت من ليل وحطت ايدها على بوقها وهى بتعيط

ايه لسه صعبان عليكى ياهانم

لا انا كنت خايفه عليك انت

كلمتين منها كانوا كفيلين انهم يهدوا بركان الغضب اللى جواه وياخد باله انها مالهاش ذنب فى عصبيته وصعبت عليه دموعها اللى نازلة

انا اسف اهدى

………..

خلاص بقا ياليل انا مااستحملتش المنظر لما شوفته كده

عايزه اخد دش

دلوقتى تتعبى

معلش لازم

ليه لازم

علشان لمساته وبدأت فى البكاء تانى

ليل حاول يهدى نفسه وابتسم وغمزلها طيب مانحوشها بطريقة تانية

ازاى

زين قرب منها واخدها فى حضنه كده يبقا لاغيناه خالص

ليل ابتسمت انت ماجبتش اكل

بالله انتى داخله على طمع

ياعم جعانة

ياعم منك لله ضيعتى اللحظة الرومانسية

يعني انت مش عايز تأكل براحتك

استنى يامفجوعة وبدأوا فى الأكل وسط ضحكات ليل ومشاغبة زين ليها إلى أن انتهوا

زين كنت روحت

ليه

الكنبه مش مريحة مش هتعرف تنام عليها

انا مش هنام عليها

ليل بخضه هتنام على الارض

لا طبعا

طيب فين

زين ماتكلمش اتحرك ناحيتها ونام جنبها على السرير واخدها فى حضنه من غير كلام يلا ننام

ليل استقرت فى حضنه ونامت لأول مرة فى حياتها وهى حاسه بالأمان

أميرة جمال💚

اهلا وسهلا مين حضرتك

انا نادين

اه اهلا بيكى بنت عم زين

بالظبط

انا مراد دراع زين فى الشركة هنا والمدير التنفيذى للشركة

اتشرفت بيك هو انا شوفت حضرتك قبل كده او أعرفك

مش عارف

نعم

مش عارف تعرفينى ولالا وابتسم

ابتسمت بهدوء

اتفضلى علشان الإجتماع

بدأ الإجتماع ونادين مركزة مع مراد بس بتحاول تفتكر شافته فين قبل كده حاسه انها تعرفه من سنين بس مش عارفه فين انتهى الاجتماع ونادين ركزت ان الكل بدأ يخرج

استاذة نادين

نعم

انا عارف انى قمر بس ابقى ركزى بعد كده فى الإجتماع وغمزلها وخرج

نادين اتكسفت ولعنت نفسها على سرحانها وخرجت راحت مكتبها وهى بتدفن نفسها فى الشغل علشان تنسي الموقف ده

أميرة جمال

💚

داخلة بهيبتها اللى الفلوس عملتهالها من فترة قريبة مقارنة بالفقر والذل اللى كانت عايشة فيه ووصلت لكل ده بخبثها وذكائها زى ماهى شايفة نفسها

اهلا مادام ليلى

اتصلت بيا ليه

زى ماقولت لحضرتك فى التليفون كانت بتموت

وايه المشكلة ماتغور فى داهية

لتجيبلنا مصيبة ياهانم

المهم عملت ايه

جبتلها دكتور

انت اتجننت ازاى تعمل كده

ماتقلقيش يا ست الكل ده واحد كده تبعى مايتخافش منه

بعد كده ماتتصرفش من دماغك مفهوم

حاضر ياهانم

هدخل عندها وانت خليك هنا

اللى تؤمرى بيه

اخبارك ايه

……..

ياحرام تصدقى مش صعبانه عليا خالص وابتسمت بشماتة

……..

عارفه انا مخلياكى ليه علشان اشفى غليلى منك رغم انك بتفكرينى بايامى السودة اللى عيشتها زمان بس برضو اتشفى فيكى

………..

تعالى احكيلك بقا مصايبى الجديدة يا يا امى انا مش ناسيه حاجه ولاحتى امى زى ماكنت بقولك زمان قبل مااغدر بيكى وبدأت تضحك ضحكات شريرة ملت المكان كله

رواية زين وليل الفصل التاسع عشر

حضرتك استاذة نادين

ايوه مين حضرتك

انا حازم صاحب شركة….. اللى هتم الصفقه بين الشركتين بكرة بإذن الله

اه اهلا وسهلا بحضرتك اتفضل اى خدمه

انا معجب بيكى اووى

وبعدين

انتى جربتى تعيشى بره وانا كذلك فايه المشكلة نبقا مع بعض

نتصاحب يعنى؟؟

اه ونخرج ونسهر

اطلع بره انت فاكرني ايه

كل الناس عارفه انك بتخرجى وتسهرى وتسكرى فايه المشكلة

انت إنسان زبالة ومش محترم

هتعملى شريفة عليا يعنى

انا شريفة غصب عنك انت او اى حد فى الدنيا ورفعت ايدها علشان تضربه بالقلم وقبل ماتنزل ايدها على وشه كان مسك ايدها وقربها منه وبقوا ملتصقين ببعض

انا بحب اووى النوع المخربش اللى زيك كده وبصراحه عجبتينى اكتر وبقا ماسكها بايده والايد التانية على بوقها وبيقرب منها وقبل مايلمسها كان اخد ضربه فى وشه ووقع على الارض وقبل مايقوم كانت الضربات نزلت عليه وهو مش قادر يقوم

مش محتاج اقولك ان الصفقه اللى بينا اتلغت

هتندم يامراد

ابقى ورينى هتعمل ايه

انا تضربنى علشان واحده شمال زى دى

مراد لكمه بقوة اياك تتكلم عن خطيبتي بالشكل ده

ايه خطيبتك

اه وللاسف مش هعزمك على فرحنا علشان مايشرفناش حضورك يلا بره

ماشى يامراد بس ليا حق ومش هسيبه وهاخده منك وخرج بعصبية

نادين قعدت على الارض وهى منهارة

اهدى يانادين

هو اللى اتهجم عليا والله

انا عارف بس انا كده ليا عندك خدمتين

ازاى

مرة انقذتك وانتى خارجه من الديسكو ومرة دلوقتى يعنى خدماتى مغرقاكى

انت اللى انقذتينى وقتها

اه بس طبعا حضرتك ماكنتيش مركزة علشان تفتكرينى

نادين بصت فى الأرض باحراج

مش قصدى حاجه صدقينى

حتى لو قصدك عندك حق انا بقيت سيرتى على كل لسان

ماحدش يقدر يتكلم عليكى يانادين ده انا ادفنه

الشركة خسرت بسببى صفقه مهمة

فداكى اى حاجة يا نيدو

انت قولت ايه

افتكرتينى دلوقتى

مارو انت مراد صديق طفولتي

أيوة يا نيدو وحشتينى اووى

نادين بعصبيه وهى بتضربه فى صدره وظهرت ليه دلوقتى ماانت زمان قولت ماينفعش عايز ايه تانى منى

ارجوكى اهدى انتى عارفه انى بحبك بس كنت خايف ان مستوايا اقل منك وماتبقيش مرتاحه معايا

كنت راضية باى حاجه

انا مش هرضالك باي حاجه انتى ست البنات كلهم يانادين

عايز منى ايه دلوقتى

عايزك

نادين وقفت وهى بتمسح دموعها بكبرياء والمرة دى انا اللى برفضك يا مراد ومشت وسابته وخرجت من الشركة كلها وركبت عربيتها فى اتجاه الفيلا

مراد بحزن هعوضك يانادين وهرجعك لحضنى من تانى

أميرة جمال💚

زين صحى هو وليل على رنة موبايله

الو

ايوه يازين بيه الحقنى

خير يا زينة فيه ايه

الست فاطمة قاطعة النفس خالص ومافيش حد هنا

انا جاى حالا سلام

فيه ايه يازين

ماما قاطعة النفس ومافيش حد فى البيت

طيب خلى بالك وانت سايق وطمنى بالله عليكى

حاضر خلى بالك من نفسك وهسيبلك واحد على الباب هنا يحرسك علشان الدكتور الحيوان ده سلام ياحبيبتى وجرى بسرعة

ليل بدعاء يارب استرها معانا وحافظ على ماما فاطمة

أميرة جمال💚

ايه يا نادين

مش عارفه وصلت لاقيت ماما فاطمة نفسها ضعيف اتصلت بالاسعاف دلوقتى وزينة قالتلى انها اتصلت بيك

ايه اللى حصل يا زينة

مش عارفه يابشمهندس انا حضرتلها الاكل قالت هتتغدى وتطلع على المستشفى عندكم سيبتها ودخلت المطبخ وبعد شويه سمعت خبط وحاجه وقعت طلعت اجري لاقيت الحاجه فى الأرض

هو فيه حد هنا فى الفيلا

لايابيه نادين هانم لسه راجعه وليلى هانم بره البيت من الصبح

زين الإسعاف وصلت ده كان صوت نادين

اتحرك زين مع رجال الإسعاف وطلب من نادين تفضل فى البيت علشان لو حاجه حصلت وهو طلع على المستشفى

أميرة جمال💚

نادين بتعيط فى اوضتها وهى منهارة على فاطمة اللى تعبت فجأة وهى خايفه تخسرها زى ماخسرت أهلها فى الحادثة اللى ماتوا فيها وبقت وحيدة وبتبكى على حب عمرها اللى رفضها زمان وراجع دلوقتى ليها وهى مش قادرة تسامحه

نادين مالك ياحبيبتى

طنط ليلى ماما فاطمة تعبت وخدوها على المستشفى

ايه امتى ده حصل

من شويه

طيب اهدى ياحبيبتى وانتى ماروحتيش ليه علشان تقفى جنب زين حبيب القلب

انا مش بحب زين غير زى أخويا مش اكتر

ايه اللى بتقوليه ده انتى اتجننتى يانادين

ايه ياطنط مش انتى عايزه سعادتى وانا سعادتى مش مع زين

مع مين بقا

مع مارو صديق طفولتى انا اه ماسامحتهوش بس لسه بحبه وقلبي مش بيدق غير ليه هو وبس

انتى جايه بعد كل اللى عملته ده تقولى كده

يعنى ايه

انا سيبتك عايشه علشان بس رصيدك يزيد لما تتجوزى زين بعد كل ده تقولة مش بحبه

انتى ازاى كده ماكنش باين عليكى الخبث ده كله

لازم تموتى يانادين

ايه اللى بتقوليه ده ياطنط وقبل ماتستوعب كانت ليلى رمتها على السرير وبتكتم نفسها بالمخده ونادين مش قادرة عليها

رواية زين وليل الفصل العشرون

نادين كانت خلاص روحها بتطلع ومش قادرة تقاوم ليلى واستسلمت للامر الواقع لكن فى لحظه قدرت تاخد نفسها ومابقاش فيه حد بيضغط عليها قامت بسرعه شافت مراد وهو ماسك ليلى واتصل على حد من الحراس اللى تحت جه اخدها ونادين بتكح جامد وبتاخد نفسها بالعافيه الحارس نزل تحت وهو معاه ليلى ومراد جرى على نادين وهو باين عليه القلق وبيتفحها بعنيه علشان يطمن عليها

نادين انتى كويسه

كانت بتكح جامد ومش قادرة تتكلم

اهدى ياحبيبتى خدى نفسك كده بالراحه شهيق وزفير يلا معايا

نادين بدأت تعمل زى مامراد قالها وبدأ نفسها يهدى فعلا وينتظم

انتى كويسه دلوقتى

اه الحمد لله

احكيلى بقا اللى حصل

نادين بدأت تحكيله اللى حصل من ساعه ماوصلت باستثناء طبعا انها قالت لليلى انها لسه بتحب مراد لدلوقتى ومش قادرة تنساه

طول عمري مش بستريحلها الست دى وبشوفها شيطان

انا كنت بعتبرها ماما

مافيش حد زى مامتك يا نادين دى كانت بتحبك اووى بس منها لله ليلى بقا اللى خطفت باباكى منها

ازاى ده انا مش فاهمة حاجه

بعدين هتعرفى كل حاجه وماما فاطمة تبقا تحكيلك

انا عايزة اروح اطمن على ماما فاطمة

طيب يلا بينا

هغير هدومى الأول

طيب انتى شكلك تعبانه تحبى أساعدك

مراد اتلم

مش هبص والله هساعدك بأدب

مراد يلا بره وبدأت تزقه بايديها وطلعته بره اوضتها وقفلت الباب

مراد من بره علفكرة بقا المفروض تكافئينى انا انقذتك من الموت

نادين ابتسمت على حبيبها المشاغب وبدأت تبدل لبسها بسرعه علشان تروح تطمن على الحاجه فاطمة

أميرة جمال💚

فى المستشفى🌞

طمنى يادكتور

الحمد لله يا بشمهندس زين كويس انك جبتها فى الوقت ده

ايه اللى حصل يادكتور انا كنت سايبها كويسه الصبح

تسمم

زين بصدمه بتقول ايه يادكتور

ده اللى حصل وكان نسبه عاليه لو كنت اتاخرت دقيقة كمان كان ممكن لقدر الله مانلحقهاش

طيب السم ده جه منين

كان محطوط فى اكل او عصير

مين يعمل كده

حضرتك اللى تجاوب على السؤال ده

متشكر جدا يادكتور

الشكر لله انت ابنى يازين

اكيد يادكتور محسن

عن اذنك

اتفضل يادكتور

زين مصدوم ومش فاهم مين ليه مصلحة يعمل كده مستحيل تكون زينة او حد من اللى شغالين فى الفيلا يعمل كده كلهم معاهم من زمان ومافيش حاجه زى كده حصلت وفى نفس الوقت مافيش حد تانى كان فى الفيلا يقدر يشك فيه كان حاسس بتعب من كتر التفكير وافتكر انه ماطمنش على ليل

(ليل وفاطمة فى نفس المستشفى لكن كل واحد فيهم فى دور )

زين أمر حد بيثق فيه من الحرس وهو صديق ليه فى نفس الوقت اسمه جاسر وأمره ياخد باله من فاطمة ومافيش حد يدخل عندها غير دكتور محسن فقط(كان صديق لوالده وبيعتبر زين زى ابنه وبيعزه جدا وبيتمنى يخدمه لا والد زين ليه افضال كتير عليه )

زين طلع فوق عند اوضه ليل اتصدم انه ماشافش الحارس اللى سابه يحرسها قدام اوضتها وبدأ يجرى بسرعه وهو قلبه بيدق جامد وحاسس بخطر وبيدعى من قلبه يكون إحساسه غلط ولكن للاسف وصل عند اوضتها الباب مفتوح والحارس واقع على الارض مضروب وليل مش على سريرها بدأ يدور عليها فى الأوضة زى المجنون مالقهاش ووقف مكانه مش عارف يتصرف ازاى فى الوقت ده وصلت نادين ومعاها مراد وقفوا قدام زين وهو مانطقش ولا كلمة

زين مالك فى ايه

……….

زين رد عليا ومراد بدأ يهزه علشان يستوعب ويتكلم

ليل

مالها يازين

مش عارف مش هنا

مراد شاف الحارس وهو واقع على الأرض ساب زين وجرى عليه وبدأ يفوقه علشان يفهم منه ايه اللى حصل

بعد فترة قليله الحارس فاق

مراد بيوجه كلامه للحارس انت كويس

الحمد لله يامراد بيه

ايه اللى حصل

انا كنت واقف على باب الاوضه زى ما زين بيه أمرني بعد شويه ليل هانم امرتنى اشوف ممرضه تغيرلها على الجرح لانها رفضت ان الدكتور يدخل عندها روحت جيبتلها الممرضة وغيرتلها على الجرح بعد ربع ساعه تقريبا لاقيت ناس ظهرت فجأة لابسين اسود كلهم وواحد فيهم ضربنى على دماغى حاولت اقاومهم لكن للاسف ماالحقتش كله حصل فى ثوانى ومش عارف ايه اللى حصل بعد كده مااعرفش حاجه لانى مافقتش غير مع حضرتك دلوقتى انا اسف يامراد بيه بس والله خادونى على خوانه

تمام روح انت دلوقتى ارتاح فى بيتك وتعالى بكره

حاضر يابيه عن اتفضل

نادين بصت شافت حاجه واقعه تحت السرير قربت منها وجابت الورقه اللى واقعه

نادين بخضة ايه ده

مراد زين تعالى بسرعه

زين بدأ يستوعب اللى بيحصل واتجه بسرعه لمراد ونادين والورقه ماكنتش غير صورة لزين وهو فى حضن تاليا من غير ملابس تقريبا

زين بعصبيه تاليا الكلب والله ماهرحمك وجرى بسرعه على بره

مراد بسرعه علشان يلحقه وهو بيوجه كلامه لنادين روحى اقعدى عند ماما فاطمة وجاسر فوق معاكم اياك تتحركى من هناك فاهمه

نادين قالتله حاضر وهو نازلة لاوضه فاطمة