رواية أعشق أنانيتك عندما تتمناني لك وحدك الفصل الستون 60 - بقلم nona_A

طالعت الجوال ...منتظرة رده ...بس صدمني صوته وهو ينادي أمه ...
يعني طنش وعده لي.....وجاي يسمعني انه رايح. ...بس انصدمت يوم دخلت وهي زعلانة وتقول : آلحين مين بيجبهن بالله ...رائد وراح يقول عنده شغل وأسامه تعذر بالذبيحه
ي فشلتي من أختي بس

ابتسمت بنتصار ..تنحسب لك أسامه. ...طالعت أسيل الي شكلها فرحت أكثر مني ..أموت وأعرف هالبنت تكره أريج بسبة علاقتها برائد ولا آيش القصه بس معقول تدري بالعلاقة الي بينهم وتكمل حياتها عادي مع رائد لا ماظن أسيل مستحيل تقدر تحمل فيه شي ثاني بينهن ....

ام أسامه بعصبيه : أقول لطيفه أعطيني جوالك جوالي طفى شحنه بدق على أختي أعتذر منها

صيته : على هونتس علينا

ام أسامه بقهر : آلحين ايش قلت انا

صيته : ولا شيء أعطي امتس جوالتس ي لطيفه

لطيفه ناولت أمها الجوال ...وهي تدعي انها ماتبدي هوشة عمتها وامها ...
ريوف
حسيت بفرحه ...أخيراً ..أعتذري ي شيخه وفكينا من بنت أختك
الغثيثه الي رازتها لنا في كل مكان ....طالعت لطيفه وقلت بهس :ياليت نطلع شوي ..أحس بضيق

لطيفه :يالله وطالعت أسيل يالله معنا

أسيل هزت رأسها بالرفض وقالت :والله تعبانه حدي

ريوف بحزن : الله يعينك حاسه فيك فترة الوحم تعب

صيته بقهر :افاا تتعازمن وماتعزموني والله اني رايحتن معكم الله لايعوق بشر
لطيفه : ههههه عآرفة انك بتروحي معنا من غير عزيمه

صيته :أجل ماهو برايحه

لطيفه :ههههه لا حلفت

صيته : عشانتس حلفتي بس وبعد عندي موضوع زين لتس وكاد يخليتس تعزميني كل مرة بعد

لطيفه : مدام به موضوع خلاص مابيك تروحي معنا لأني عآرفة مواضيعك

صيته :وانا بنت أبوي بعد بوجهي تقوليها ...أجل روحوا خلاص وبفككم مني ...
ريوف قربت منها ومسكت يدها : وهذي تجي ي عمه بدونك
ماتصلح الطلعه ...

صيته بابتسامة : عشانتس يمه بروح اما قليلة الخاتمه ذي مالي هرج عليها ..
ريوف
أول ماطلعنا شفت أسامه رافع ثوبه لخصره ومندمج بسلخ الذبيحه ..طالعت جهة الخيمة كان أبوه جالس .. يتقهوى ...
طالعت لطيفه الي همست لي :وش رأيك نجلس عند أبوي القعدة معه ماتنمل

ريوف دايماً اخجل منه ...والي بينا سلام بس ....
ماعمري جلست زسولفت معه قلت بخجل: يالله
مشينا يمه ..وهو رحب فينا على طول ...والله شكله أطيب من مرته ..والحلم صدق ظلمه ...

ابو أسامه : هلا هلا والله بزوجة ولدي ها كيف مرزعتي ان شاءالله أعجبتس بس

ريوف قلت بخجل: حلوة مره

ابو أسامه أشر بيده : المكان هذا بسويه لعيال ابيهم يلعبون فيه يوم يطلعون ان شاءالله ... وربي يتمم عليهم العافية

ريوف : تسلم والله يسمع منك
لطيفه : يبه وين باقي لهم مشوار عشان يقدرن يلعبون ...
آلحين نتف وربي ...

ابو أسامه :المهم انه مخصص لهم

لطيفه بضحكه : حركات والله التوأم مأخذين حقهن وزيادة

صيته بخبث: صدقيني لو جا حفيد منتس بعد أبوك فرحته بتكون أكثر ولا لا ي منصور

ابو اسامه : الله يسعدها مع الي يستاهلها ...

لطيفه بضيق: يبه خلاص أخذت نصيبي

صيته بحده : وش أخذني نصيبتس عادتس بنت وحرام تحرمي حالتس عشان وأحد ماقدر الجوهرة الي عنده

لطيفه زفرت بضيق: مووقته هالحكي ي عمه ..

صيته : هوو متىعاد وقته أقول اسمعي الي بقوله لتس آلحين وقدام أبوك بعد الصقر يبي لطيفه ي منصور وش شورك

لطيفه حسيت بصدمه. ..وفي نفس الوقت بزعل من عمتي كذا بدون مقدمات طالعت ريوف الي شكلها مصدومه أكثر مني ..

أبو اسامه : الشور شور لطيفه ي صيته لو قبلت به والله ي سعدها وإذا رفضت عاد براحتها ...
لطيفه بضيق من هالسالفة عمتها احرجتها حيل كذا خبط لزق :عمه وش تقولين بالله توني طالعة من عدتي مالي غير يومين

صيته : أقول قلتها بنفستس مكمله عدتس وشهوله تنتظري
والصقر لا يطير من يدتس مافي مثله بالرجال
كبري عقلتس وفكري وين مصلحتس ولا باقي منتظرة من قليل المنفعه يجي شيء من صوبه هذاك مافكر في بنت عمه ونطلها بيفكر فيتس ي الغريبة ..

لطيفه قاطعتها وهي متنرفزة : عمه تكفين خلاص سيرة وليد انتهيت وماهو اني برفض ولد أختك يعني أنتظر وليد يحن ويرجعني تراي انا الي طالبة الطلاق

صيته : ي قلبي ابي مصلحتس والله لا تأخذي بخاطرتس علي تعرفيني كلامي دج ومدري وش اهرج
وبيني وبينتس بعد ماودي الصقر يأخذ غيرتس لأنه هالمرة صامل ويبي يتزوج ولو رفضتيه بيدور غيرتس وكاد

لطيفه طالعت ابوها يوم قام وراح يساعد أسامه تحسه مايبي يحرجها يبيها تعطي عمتها رأيها بدون إحراج منه قلت بطولة بال على هالعمه :يدور الله يسعده و يالله بقوم أساعد أمي

صيته بسرعة مسكتها من يدها وجلستها : اجلسي يمه مانتهينا وبعدين انا حالفة ماقوم من هنا غير أخذ الموافقة منتس وابشر قليب الصقر ..ي هو بيفرح يبتس يمه وشاريك
وبنفسها تستغفر على هالكذب لو تدري وش قايل عنها .. بس مافي اعند من رأسه ورأسها وهي الي تبي تجمعهن

لطيفه طالعت ريوف الي ساكته قلت وانا ..أبيها تساعدني بعمتي بس شكل ماعندها شيء تقوله : تكفين ي عمه لا تضغطي علي آلحين. .واوعدك افكر وأعطيك خبر ..

صيته :وانا احتري ردس بس يمه رجيتك ماتكسري قلبه شاريتس ويبيتس بالحلال

لطيفه وقفت وانا اتهرب : يصير خير

طلعت شفت امي بوجهي قلت بضيق: يمه خلاص كلمي ابوي وخلونا نرجع بعد الغداء مباشرة تعرفي ماحب نومة البر أبد

ام أسامه : مين سمعك يقال الحين انا احبها بكلم أبوك أكيد
وبعدين اسكتي لايسمع ويعاند وخلينا ننام بهالمزرعة اليوم

لطيفه ودي الوقت يمر بسرعة وأهرب من عمتي وضغطها علي يآربي هذي الآدمية ماعندها وقت ...و ي خوفي أبوي يرجع بكلمته ويغصبني عليه ...

في الخيمه
صيته قالت بخبث: من أول ماجلستي وانتي عينك ماراحت عن أسامه عذبك ولد الراشد
ريوف قلت بتوتر:آلحين راحت لطيفه بتبدي فيني

صيته ضحكت بصوت عالي : ي حبي لتس بس قولي وش مسوي معك هالمضيع

ريوف ابتسمت على اللقب الجديد لاسامه بس سكت وانا اشوفه جاي يمنا ...جلس قريب مني حسيت بتوتر ...
صيته صبت له فنجان قهوة : خذ يمه انهد حيلك والورع رائد ماساعدك ..والله لو الصقر هنا موجود مايخليك لحالك

أسامه أخذ الفنجان وقال بتعب وهو يحرك يده اليساريحسها بألم فيها :مين قالك اني ابي صقرك يساعدني متعه عندي هالشغله

ريوف بهمس : ي كافي الذبح عندك متعه

أسامه ميل فمه بابتسامة : قمة المتعه

صيته قالت بشماته :أقول بردت خاطري في اريج وامها وش جايبهن بينا كفوو ي وليدي خليتهن ينثبرن مكانهن اسكتوا بالله ي شين سيرتهن لا انذكرت
ريوف والله ماقدرت امسك نفسي ضحكت بصوت عالي آلحين مين جاب سيرتهن ماغيرها طالعت أسامه الي يناظرني بعتب أشرت بيدي انه موذنبي هي السبب ضحكتني ....
اسامه طالع ريوف وقال بجديه: عمه لو أمي تسمعك بتزعل
وأنتي خلاص من هالضحك الي ماله داعي ورفع حاجب يوم زادت بضحكها قال وهو رافع حاجبه: لا ي شيخه

صيته : خليها تضحك وش عليك منها وبعد خلي أمك تزعل ..إلا تحشر أهلها بينا غصب وبعد عارفة حركاتها تبي تحر هالضعيفه وأنت مع الخيل ي شقراء ماغير تمشي وراها مثل الاعمي لما تطب على وجهك هذاك الوقت بتقول حقي برقبتي وهذاك الوقت الزينه ذي قدامي ماراح تعطيك وجههه وقول عمتي ماقالت ...

أسامه وقف وقال بكل ببرود وهو مطنش حكيها :يمه صيته بجيب لك الكبده وسويها مقلقل تكفين أحبها من يدك

صيته بقهر : قلووا رأس والعدو قلبي محروق وانت تبي مقلقل
انقلع عن وجهي

أسامه :افااا يمه تقلعيني وانا ابو عيال

صيته بقهر رفعت الفنجان الي بيده: فارق عن وجهي لا أهفك بهذا بوجهك الجين قال ابو عيال انت فكرت فيهن يالي ماتستحي رايح تعرس وتجهز وعوالك عند الدختر

أسامه ضحك بصوت عالي : دختر ..آه يمه وش اسوي ام عوالي
رافضه تعطيني وجهه وماعندي غير الزواج
صيته بقهر طالعت ريوف: والله وانا أقول علامه الرجال متخبل يبي يعرس وانتي ماهوبمبطي معه اتأري البلى منتس وانا ظالمة ولد أخييي

ريوف طالعتها بصدمه ورجعت طالعت اسامه الي يضحك بطريقة تقهر قلت:آلحين مسرع قلبتي علي ....

أسامه قال وهو يضحك: اجيب الكبده يمه

صيته بقهر: جيبها جيبها وبخلي هالعوبه تسويها بعد لك روح يمه روح ..والله اسنعها لك آلحين واخليها تعرف واجبها يمك ..

اسامه قرب منها وانحنى وسلم فوق رأسها : فديتك والله قلبك كبير وتحبي مصلحة الكل وطالع ريوف وغمز لها بطريقة مستفزة ...

ريوف
بموت من قهري ...عرف يطلع منها أساموه طيب .بس سويت حالي زعلانه وهي تقرقر فوق رأسي ....ان الرجآل عقولهم صغار ..ولازم نعاملهم بطيب ونلبي لهم الي يبونه عشان مايدرونه عند غيرنا ومن هالكلام ....حسيت رأسي افتر ...بس عندي فضول اعرف كيف حياتها مع رجلها : ماشاءالله شكل رجلك ي عمه مرتاح حده معك ومبسوط

صيته بقهر من سيرته : مالعت عليه ابو عين زايغة أبد مايملي
عينه شيء بس ماغير يخطب بس الحمدلله كل مره يفشلونه ويرجع لي مثل ****

ريوف فتحت عيني بصدمه آلحين كل هالنصايح وهذي حياتها مع رجلها قلت : ماله حق والله

صيته :ماعليتس الحين من ضاغن ابو عين زايغه خلينا فيتس أشلون تكسبي رجلك يمه

ريوف بعد ها تنصح يآربي على الثقه الي عندها ..قلت : أسمه ضاغن وانتي صيته صاد وضاد حلووو

صيته : وش الي حلوو فيها ي زين اسمي وي شين اسمه بس

ريوف قلت وانا ابيها تنسى سالفتي مع أسامه : صح اسمك أحلى بكثير

صيته وقفت بسرعة : أقول يمه تسمعي الي أسمعه ...
ريوف
هزيت رأسي بدون صوت ...
وانا احس ... الدم نشف بعروقي يوم ..سمعت الترحيب من ام أسامه وشفت اسامه جاي يمنا ..وقال لنا نرجع خيمة النسوان لأن فهد جاي ...حسيت بقهر وانا اشوفها تتدلع على ام أسامه وتمط بالحكي ...مالت بس ...
بعد السلامات والترحيت ...
ام فهد : يالله كمل فهد شغلته ..وجا فينا اريج بغت تنجن ودها تشوف مرزعة خالها منصور ..

ام أسامه ابتسمت بحب :ي قلبي نورت بجيتها المزرعة والحمدلله بنتغدا جميع ي زينها... من جمعه وهالقمر معنا

أريج قالت بخجل مصطنع:يسلمووا خالتووا

صيته قربت منها تساسرها: يمه لا تعطيها مجال والله ماغير تسحره بالأحمر والاخضرهالي حاطته بوجهاا حسبي الله عليها بأسها قوي

ريوف قلت بمكابرة:حلالها

صيته بقهر: هذا بلى ابوك ي عقاب وقالت بسرعة يوم وقفت اريج :وين وين

أريج : بروح أعيد على خالي منصور واسامه

صيته : اجلسي يمه وكاد حد غريب بيجي هنا

ام أسامه بعناد :مافي حد غريب ورائد ماهو جاي دق علي
تعالي يمه عيدي عليهم ..
صيته بحده: آلحين يقال تعرف السلوم والواجب وهي طالعة بهاللبس قدامهم

ام فهد : هوو وش فيك ي صيته على بنيتي لابسه ومتستره

صيته بقهروهي تطالع البناطل الجنز الي لابسته : آلحين ذا ساتر يالله لطفك وبعد حنا عيب عندنا البنت مملكه تطلع كذآ يوم تكون ببيته تسوي الي تبي

اريج بوقاحة : قلتيها عندكم حنا غير وياليت لاتحشري حالك مدام ماما وخالتوا راضين ..

الجده الي من أول ماهي بجايزة لها هالبنت قالت بحده: وانا بنت ابوي تردي على الي أكبر منتس تسذآ هذي تربيتس ي سعاد

أم فهد : وش مسويه الحين بنتي عشان تهبوا عليها كذا الله يسامحك ي أختي خلتينا نجي وأهل رجلك مايبونا

صيته : آلحين مين قال مايبيتس المكان مكانتس بس طريقة حكي بنتس ماهي جايزة لنا

أريج بقهر من هالصيته :وانتي مين عشان طريقة حكيي تجيز لك
صيته قالت بحده: ان الي ربيت أسامه وصدقيني لو أقوله كلمه بس والله مايخليتس تباتي ليلة على ذمته اعتدلي بهرجتس ازين لتس

لطيفه
كنت اناظرهم والحرب بينهم شابه ...وعارفة عمتي صيته والله ماتهجد دايماً ماتسكت كذا تعطي الواحد بوجهه قلت وانا اشوف امي معصبه ومن حقها تعصب عمتي ماخلت ولا بقت في أختها وبنتها :خلاص ي عمه هدي وانتي اريج تكفين اجلسي عند خالتي وفكينا ...المرادد وأحترمي الي أكبر منك طالعت امي الي شكلها عصب زود اخخ وش قلت شكلي طينت الدنيا زود خليني اسكت أحسن شيء ..

أريج قالت بقهر: حتى انتي ي لطوف تقولي عني مو محترمه ..يمه ابي اروح مابي أجلس كلمي فهد ...
لطيفه : آسفه والله بس ماقلت ماهو محترمه

صيته : خليها يمه شوي وتقولنا كلنا شيء ماقلناه ...

ام أسامه الي ساكته وتحاول تمسك اعصابها عشان زوجها لايفشلها قدامهم تعرفه دايم مع أهله والله ماغير يطلعها غلطانة بس يوم شافت اختها بتكلم ولدهاعشان يطلعون ماتقدر عاد تسكت : اقول ي صيته ياليت تحترمي أهلي مثل مانا احترمك
وياليت تذكري انا المزرعة مزرعة رجلي وقالي اعزمي الي
تبيهم ..
صيته بعصبيه : آلحين يقال تذكرينا ان المزرعة مزرعة رجلك تراه أخوي قبل يأخذك ....وأهلك محدن جا يمهن بس ماغير هالي جايه وهي تتميع لنا وماتحترم لا صغير ولا كبير..وتبيني اسكت والله ماغير اسنعها

أريج بقهر :تسنعي مين ي ماما روحي زين ي المخرفه الي مية جمله في ثانية

صيته بعصبيه : عوذة من عينس ي البوم والحمدلله ربي مطلق لساني ماهو مثلتس ماغير تمدد بالحكي وتلوي فمتس يمين وشمال

ام أسامه عارفة ان الكل بيكون خسران مع لسان صيته قالت بصبر: خلاص ماصار إلا كل خير وخلونا نبدا في طبخ الذبيحه
وننسىالي صار وقبل كل شيء اليوم عيد

أريج وقفت وهي تلبس العباية:مستحيل أجلس دقيقه وحده بعد الإهانات الي جتني منها ..ماما بروح السيارة ..وانتي دقي على فهد ..

أسيل قالت وهي مبسوطه انها بتفارق: الله يستر عليك

أريج طالعتها بعصبيه وكره: حد جاا يمك آلحين

أسيل بدلع ماهو بوقته : ياويلك تجي يمي والله ماغير رودي
يذبحك

أريج حست بدمها يغلي رودي آه هذا اسم الدلع الي كنت ادلعه فيه ...قالت بكره: والله عشان خالتي ولا كان ردي بيكون شيء ثاني عليك ولا هميتيني انتي ولا رودي تبعك

صيته بلقافة: ايه قدريتها عشان خالتك وانا مره كبيره هبيتي علي
ام اسامه بعصبيه : خلاص ي صيته وانتي ي أسيل وش فيك عليها لو بعد متضايقه من وجودها دقي على رجلك وخليه يأخذك
أسيل حست بقهر تطردها عشان هالرمه قالت وهي شوي وتصيح: أكيد بدق عليه ولا أجلس عند اشكال بنت اختك

أريج بقهر قربت منها وهي ودها تسطرها: وش مشكلتك معي

اسيل بسرعة تخبت ورا صيته : يمه ..

صيته بسرعة تدخلت : ي بنت ابعدي عنها في بطنها ورع والله ماغير رجلها المجنون دم عايلتك كلهم ماتكفيه لو صار به شيء

أريج فعلا تعرفه مجنون وتموت كان بجنونه من قهرها انهارت تصيح في حضن امها ....

.
ام فهد بعصبيه: لا ي ام أسامه ماهقيتها منكم هذا وحنا جاين متشوقين نعيد معكم تقوم حماتك ومرة ولدك يهبون علينا كذا
يالله يمه أمشي وخلاص لا تصيحي عشانهن ي قلبي خلاص ..

ام اسامه مصدومه من الي صار ..ولا لها قوه ترد عليهم وتدافع عنهم حسبي الله عليك ي منصور انت وأهلك ...
طلعت معاهم ...وهي زعلانه وضايقه حيل ..

عند أسامه أستغرب ..يوم شافهم طلعووا لسيارة وامه تمشي يمهم
طالع فهد الي وقف ..وراح لهم. ....وثواني وفهد رجع لهم وقال أنهم ماشين قرب من أمه يوم تحركت سيارتهم قال بستفسار :وش فيهم

ام أسامه بقهر :فشلوني مع أهلي

اسامه قال بشك: مين ريوف

ام اسامه وشوي وتبكي عضت شفتها :صيته الله لايبارك فيها وبعد مرة رائد طولت لسانها على أريج مدري وش بلاها عليها

أسامه عقد حواجبه مستغرب:وش فيها زوجة رائد على أريج بعد

ام أسامه بعصبيه: مدري عنها هبت كذا وهي مالها دخل بالسالفة من بدايتها ...دق على أخوك يجي يأخذها ويفكني من وجهاا والله لانت ولا أخوك جبتوو الي ترفع الرأس
أسامه عض شفته مقهور . : آلحين وش ذنب ريوف عشان
تعممي

ام أسامه بغيض: يقال آلحين مين قالب صيته على أهلي غير مرتك بس ملزقة فيها ومخليه نفسها الضعيفه وهذيك ماشاءالله تبي ريحه بس وتطول لسانها حسبي الله على أبوك وعليك الي كبرتوا رأسها علينا

أسامه بضيق : يمه آلحين وش ذنبا تتحسبي علينا انا وأبوي

ام أسامه بقهر:مين معطي هالصيته وجهه غيرك وغير أبوك وسكتت يوم قال ابو أسامه : أقول ي مره ابدن بالغدا وشفيهن بعد أهلك راحوا ماجلسوا يتغدون ...

ام أسامه همست بقهر:بركات أهلك عساهم الحريقة

أسامه ناظر امه بعتاب يوم دعت عليهم. ..

عند ريوف
كنت مصدومة ...من الي صار فجأة ..طالعت لطيفه شكلها بعد مصدومه أكثر مني .شوفوا كيف عمه صيته ولا كأنها سوت شيء جالسة تقهوي أمها ولا على بالها بس حزنت على أسيل
الي شكلها ماسكه صيحتها غصب. ...قربت منها وقلت : حبيبتي لا تزعلي عمتي صيته أعطتها وزود
أسيل :ماتهمني انا وهي من زمان كذآ. .بس الي قاهرني الطردة المحترمه الي جت من ام رجلي ..والله ماهقيت ردها بيكون كذا

ريوف بسخريه : أكيد بتقوم معاهم لاتنسي أهلها

أسيل زفرت بضيق: افف رودي ليه ماترد علي وطالعتها بقلق لايكون فيه شيء من أصله راح من غير مايخبرني هذي أول مرة يسويها ...

ريوف : ي قلبي تطمني ماعليك ثواني ورن جوالها شفت الفرحة بعيونها قلت بهمس :يالله ها انبسطي أكيد هوو

أسيل هزت راسها بفرحة وأول مارد عليها قالت:رودي وينك شغلت بالي عليك والله مية فكرة برأسي ..

رائد حزن عليها ماخبرها بروحته بس يوم دري بجية أريج وبعد خاف لو امه تحرجه وتقول له روح لهم بسرعة انسحب ..وراح
وبعدها دق عليه سامي يبشرة ان الدحمي صحي راح للمستشفى على طول قال وهو يشوف زحمة اخوياه : ساعتين وأكون عندك ان شاءالله
أسيل : لا لا ايش ساعتين بسرعة تعال برجع البيت

رائد بهمس: انا بالمستشفى ومقدر أجي آلحين

أسيل بخوف:ايشش في المستشفى
صيته بسرعة قالت يوم سمعتها: هوو في المشتشفى ي كافي وش فيه الولد يمه ولد اخيي عساه بخير السرعة دمرتهم

رائد بسرعة قال يوم سمع عمته انفتحت مين يسكتها آلحين : خوييي صحي وجاي أطمن عليه وقولي لعمتي صيته تهجد تكفى
ولاتبدا أفلامها

أسيل براحه الحمدلله فزعتني طيب لا تطول تعال بسرعة برجع البيت تعبانه وماحست إلا بالجوال ينسحب منها
اقول وينك فيه هاا مخلي مرتك والعقرب بنت خالتك بغت تهجم عليها زين وانا موجوده والله ماغير راحت فيها مرتك

رائد بقهر: وش مسويه فيها ي عمه

صيته بقهر : آه بس مين يفكني عليها العوبه ترد علي وماتحترمني

رائد قفل عيونه بصبر: عمه خليني منك الحين وقولي وش مسويه في أسيل

صيته بعصبيه :ي قليل الخاتمه ماتهمك عمتك وتفكر بمرتك
صدق مافيك حياا خذيه وطمنيه بنفستس ...

أسيل هزت رأسها هالعمه إزعاج ماودها تقول له كان ...
قالت برقه : هلا رودي
رائد بسرعة: قولي ايش مسويه فيك

أسيل وهي تطمنه: لا مافي شيء لا تقلق بس لو تقدر تعال

رائد : جاي جاي الحين ان شاءالله

اسيل : اوك على مهل رودي ...

صيته ميلت فمها :ي شين الدلع بس خلوني اقوم اسوي الغداء مع حماتي والله انها تكرف الضعيفه لحالها ..ويالله يمه تعالي تقهوي مع ولدك و اطلعي من هالخيمه فكي على روحتس شوي

ريوف
اخخ بعد الي صار كله و لك عين تساعديها الله المستعان مثل عمه صيته مافي .. حاله خاصه وربي طالعت لطيفه الي قالت : مدري وش بلى هالعمه اتوقع انفصام شخصيه وربي ...

ريوف وانا مروقه على الآخر: افف ي هي نتفت اريج تنتيف
لطيفه صغرت عيونها : جت على ماتمنيتي

ريوف ابتسمت لها وانا اضيع السالفة : اممم لطوف قولي وش ردك بيكون

لطيفه عقدت حواجبها وقالت :على وشهوو

ريوف : لا مسويه مو فاهمه عادي بفهمك وبقولك على بلاطه
وش ردك على الصقر ان شاءالله الموافقة أكيد

لطيفه : ريوف
أسيل : وش السالفة

ريوف طالعت لطيفه الي شكلها معصب : السالفة ي قلبي ان الحلوة هذي انخطبت

أسيل بصدمه : صدق مبروك ي قلبوو

لطيفه وقفت بقهر: فاضين وربي آلحين الي يسمعكم يقول موافقه

ريوف بضحكه : تذكري الي تكلم معك عمه صيته والله توافقي وانتي ماتشوفي الدرب من كثر الزن ......

اسيل : قلتي مين الي كلمها

ريوف بخبث : عمه صيته

اسيل: أجل مبروك من آلحين هذي محدن يقدر عليها شفتي كيف نفرت البنت وامها في دقايق وهي تقلد اريج: ويقال جايه تشوف مرزعة خالها فهد ...ي قلبي ماتهنت بشوفتها للمزرعة خلتها تروح وهي ماتشوف الدرب
ريوف ضحكت بصوت عالي : هههههههههه حرام شفقت عليها

لطيفه : مره واضحه شفقتك أمي معاد دخلت يمنا والله زعلانه
الله يسامح عمتي مهما كان الواحد مايرضى على أهله

ريوف
يوم سمعت لطيفه تحكي كذا سكت واشرت لاسيل معاد تتكلم فعلاً الواحد مايرضى في أهله حتى لوفيهم عيوب الدنيا
..
بعد الغداء الكل راح
ابو أسامه طلعت مع امه واخته ورائد أسيل وامه ولطيفه
مابقي غيرنا بالمزرعة صليت العصر وطلعت وانا لابسة العباية .وقلت بطفش : متى ماشين ....

أسامه وهو يسوي شاي على الجمر: وش نمشي الجوو مايتعوض وابوي اليوم طارد العمال من المزرعة يعني الجوو فاضي

ريوف عقدت حواجبي وقلت : يعني

أسامه وهو يأشر لمكان جنبه: تعالي تعالي ذوقي هالشاي ولاحقين على الروحه

ريوف قربت منه وانا متردده وبعد خايفه منه ومن المكان
موحش مره وبذات يوم راح الكل جلست وين مأشر لي وانا اتلفت يمين ويسار ...

أسامه مد لها الشاي وقال برواق: وش رأيك بمزرعة أبوي

ريوف بقلق مديت يدي وأخذت الشاي منه: حلوة ماعليها
متى نروح

أسامه بضيق: الحين أقولك الجوو مايتعوض تقولي متى نروح
خلينا نجلس كذا على رواق لو يوم بس قبل مايطلعون عيالك الإزعاج كله والله ماغير شايلين الحضانه من وقت مادخلوا
التاسع وهم صياح في صياح المرضات يشكن منهم

ريوف قلت بحب لهم: ي قلبي هم ودي يكمل هالاسبوع بسرعة
واشوفهم قدامي ..وطالعتة وقالت : امم تصدق طلوعهم يصادف أسبوع زواجك

أسامه قال بضيق مايبها تفتح هالسالفة بذات هالوقت : لا مين قالك عيالك باقي أقل من أسبوع والزواج بعد أسبوعين

ريوف بسخرية : اوه صح نسيت انه تأجل عشان القاعة
وكل تأجيل فيه خيرة صدقني لا تزعل

أسامه : مين قالك آلحين اني زعلان

ريوف :مشكور لأنك وفيت بالوعد بس جت

أسامه : وفيت بالوعد ي ريوف ومالي ذنب بجيتها ..
.
ريوف : جت ولا راحت مايهمني كنت خايفه لا تضايقني بس عمه صيته مااعطتها مجال هبت عليها

أسامه : ليه وش فيها عمه صيته عليها وبعد انتي في وشهوو تضايقك بالعكس كل مرة تمدحك عندي وتبي العلاقة بينكم تمام وبعد هذا الي أتمناه لأني مال مزاج لصدعة الحريم
ريوف بسخرية :لا ي شيخ شوي وتقولك تحبني بعد

أسامه : والله هذي الحقيقه فعلاً ماترضى فيك بس انتي الله يهديك حاطه عليها وابتسم بخبث: من حقك ومحدن يلومك بس تأكدي ان الغلا لك خاص الأولى بحياتي شيء مميز

ريوف ابتسمت بستهزاء: الأولي لا تكذب انا عارفة وانت عارف مين الي كان بقلبك

اسامة قاطعها بحده: ريوف أكره هالسالفة
وبعد صارت مرة أخوي والله الحين مثلها مثل لطيفه تكفين معاد تجيبي هالسيرة ولو فتحتي هالسيرة مرة ثانية أقسم بالله ردي بيكون شيء يزعلك

ريوف وقفت بضيق يوم بدأ يهدد : يالله نروح

اسامه رفع راسه وطالعها : ارجعي اجلسي عندي حكي واجد بقوله لك

ريوف : مابي اسمع شيء منك أسامه تكفى رجعني البيت والله ضايقة بهالمكان ...

أسامه وقف وقابلها : ليه طيب

ريوف: كذآ وبعدين لا توجع قلبك معي وتعب حالك
أسامة :مين قالك بتعب حالي انا الي ابيه رضاك

ريوف: رضاي لو تبيه خلنا نمشي على الاتفاق الي حكمته قبل
وربي لو مشينا عليه بكون راضيه لأني لا انا لك ولا انت لي
بينا عيال بس ...ولك احترامك ولي احترامي هذا الي أبيه بس

أسامه مسك يدها وقال بهمس: طيب تعالي نمشي شوي
وكاد هذا يهجد شوي وهو يأشر لراسها واعرف اتفاهم معك

ريوف مشيت معه ...وانا ساكته وهو يسولف يقول كيف كان المزرعة يوم ابوه أخذها والحين تغير كل شيء .....
أول مابدا الجو يظلم حسيت بخوف ...قلت : يالله نصلي المغرب ونمشي على طول

أسامة هز رأسه برفض:نروح نصلي والليلة نيتي ابات هنا
وبسوي لك قرص على الجمر يحبه قلبك وبيصير عيدنا غير ومختلف ....
ريوف بصدمه: وشهووووالله مابيت هنا مجنونه
لو طاوعتك ...

أسامه عض شفته بقهر ي حبها لعناده : ليه طيب

ريوف : كذا اخاف

اسامه : افاا تخافي والضابط معك
ريوف : والله لو مين معي مانمت هنا ليت رحت معاهم ..
أسامه بأبتسامه : من جدك ريوف
ريوف : اي والله

اسامه : واهون عليك ي الظالمة ...

ريوف يوم سمعت نباح مسكت فيه بخوف : يمه تسمع الي اسمعه

اسامه بضحكه :اي والله اسمع
ريوف : وتبيني انام هنا عز الله رحت فيها اليوم اسامه تكفى خلنا نرجع والله شوي وقلبي يوقف

أسامه :يالله نكدني علينا بخوفك ذا الي مالة داعي وانا الي مخطط مع وجهي اقضي اليوم كله هنا ...

@
@
@
@
@
بعد أسبوع في الديرة
قالت بقهر من بروده : آلحين علامك ساكت من وقت ماخطبت لك لطيفه

شهاب طالعها بعتب حطته بموقف محرج مع خاله أطر يروح يخطبها وهو ماهو راضي قال بهدوء عكس الي داخله : مافيني شيء
صيته مدت يدها ومسكت يده بحنان : يمه لا يكون زعلان علي والله ابي مصلحتك ومافي ازين من بنت اخوي لك تجبر بخاطرها وهي تجبر بخاطرك

شهاب :عارف ان قلبك علي بس استعجلتي ي عمه
الموضوع هذا يبي له تفكير ومشاور

صيته بحده : وش تفكيره بالله وبعدين خلاص خطبت وانتهينا وجتك الموافقة ...وشهوله تفتح السالفة وتكبرها آلحين

شهاب فتح عينه بصدمه آلحين مين فتح السالفة مو هي الله يصبرني بس قال بتصريفه : صح انتهى الموضوع ومايصلح الحكي فيه مدامه منتهي ...

صيته : آه يمه بسوي لك عرس يحبه قلبك والله ماغير اغيض راعية الجامعة مالت عليها ماغير ابوها مسرحها بالغنم ولا شافت جامعة ولا جت صوبها ...

شهاب بضيق: عمه الله يرضى لي عليتس انتس معاد تفتحي هالسالفة ولا عاد تجيبي طاريها عندي راحت بخيرها وبشرها

صيته : من قهري يمه عليك بس ماعليه آلحين تجي لطوف والله انك بتحب رأسي لليل نهار على هالاختيار الي أخترته لك
ي حبي لبنت أخوي تقول للقمر ابعد وأكون مكانك
شهاب : الله يستر بس من هالقمر الي أخترتيها لي

صيته صغرت عينها بقهر : وش قصدك ي ولد أبوك

شهاب وقف : ماقصدت شيء
ويالله بروح عندي شغل ...وتكفين لا تنسي دواء جدتي ..

صيته :لا توصي ماراح أنساه وايه بعد أنت لا تنسى كلم خالك عشان التحليل. ..عشان يروح بلطيفه...ادري فيها امها والله ماتذكره خبيثه ماتبي حد من صوبنا ...

شهاب ياربي كل مرة تستلم حد قال : والله ماينسى واثق مدام انتي بالسالفة ...وهذا من غير الإتصالات الي اربعه وعشرين ساعة شغالة منك الله يعنيه بس

صيته بقهر: هذا جزاي يمه ابي أفرح فيك روح الله يسامحك

شهاب : ويسامحك بعد على الي سويتيه فيني

صيته فتحت عينها بصدمه من رده : شوفوا الي مايستحي والله قعدت هاليومين مع أهل أبوك اخخ بس

شهاب بسرعة انسحب لا تبدأ بأهل ابوه بعد آلحين ...
::
طالعت جهة المجلس ...غريبة اليوم ماله حس ...معقول كل ذا نوم
رجعت طالعت بنتي وهي جالسة بالأرض ..تلعب ...الاحظ دايم بدرية يوم يكون سامي نايم ولا برا البيت ..تخلي.غرام عندي ...قمت من مكاني وجلست مقابلتها ...ابتسمت لها بحب ...
فزيت من مكاني يوم سمعت صوت الباب ...بس تنهدت براحه يوم شفت بدريه طلعت من غرفتها قلت بدون حس: الله يسامحك افتكرت سآمي

بدريه جلست على الكنبه : افف لها الدرجه سآمي مسوي لك رعب ارتاحي سامي مسافر ...

عقدت حواجبي مستغربه :مسافر وين

بدريه : دوامه مكلفينه بدوره لمدة أسبوع وجاي ان شاءالله

تنهدت براحه ...الحمدلله بنفك شوي ...من القلق الي مسببه لي
ليت بعد تطول دورتك لسنه ...

حسيت بدريه ماهي على بعضها ....عندها حكي. ..تبي تقوله
قلت بشك: فيك شيء احسك ماهو على بعضك

بدريه وقفت وهي تتهرب :مافي شيء
آلحين تأكدت انه عندها شيء ....يالله على راحتها قربت من بنتي وحملتها وانا أقول : اليوم بنرتاح من بابا والنومه عندي ي
قمر ..وياويلك تجلسي تصيحي ..تبي عمتك ...

@
@
@
@
في بيت ابو وليد
قالت بقهر وهي تناظر أمها : يمه قهرتني ام سالم تخطب البنت وهي بالعدة. .
ام وليد قالت بسرعة:اسكتي يمه لا يسمع ابوك والله ماغير ينجن

شوق بقهر :يمه خايفه من ابوي وليد طيب

ام وليد بحسرة : وليد آه من وليد ماغير ساكت ومايحكي من وقت ماجاا من السفر أبوك هاوشه وهذا مانطق بكلمه
ماغير يردد خيرة لي ولها

شوق :يومه لازم يتحرك يسوي شيء قبل تنتهي العدة ولا والله ماهو بشايف عاد ريتآج سكتت وهي تشوفه نازل من الدرج
ويرحب فيها
: هلا هلا الحمدلله على السلامة
شوق قربت سلمت عليه :الله يسلمك ي خوي وانت بعد الحمدلله على سلامتك امي تقول امس واصل وانا آلحين فضيت وجيت
وليد بابتسامه : الله صرنا نروح عند أهل رجلك قبل تجي هنا اخخ عصام مأثر عليك بقوه

شوق ابتسمت بحيا:لا ي خوي ماهو كذا والله خالتي مسويه عزيمه ويالله لحقنا
وليدعقد حواجبه :مسويه عزيمه وانتم بالطيارة باقي

شوق :اي والله كان عندها حريم الحي وحلفت عليهن مايطلعن قبل اجي ...
وليد مد يده وأخذ فنجان ...وده يسأل عن ريتآج وده يأخذ علومها. ..بس كابر ...مثل العادة وقال :ايوه كيف الرحله مع ولد العم

شوق بحيا:تمام

وليد ضحك :آكيد تمام ي المجرمه شهرين غاطه
وش ذا الشهر العسل
ام وليد بزعل : هي غطت وانا مطمنه عليها وعارفة أخبارها ماهو مثلك قلبي أكلني عليك وانت ولا همك حتى ترفع السماعه وقت ماطخيت رجعت ولا كأن شيء صار

وليد وقف وقرب منه وسحب يدها وسلم عليها أكثر من مره : يمه انا فداك ماتشيلي بخاطرك علي والله اني غلطان وعارف بس والله بغيت أجلس مع حالي شوي ...بفكر في حياتي بدون ضغوط

شوق قالت بدقه تبيه يلحق يسوي شيء : هاا ان شاءالله رسيت
على شيء يسعدنا بعد هالمدة بالتفكير ...

وليد طالعها ورجع طالع امه من غير مايرد عليها : تكفين يمه ماتزعلي علي والله اني غلطان حدي ومالي وجهه

ام وليد قالت بحب :يمه ي قليبي والله لوتبي رضاي صدق وتريحني ترجع بنت عمك وتكف عنا المشاكل الي بتحصل

وليد قال بجمود: يمه بنت عمي رافضه العيشه معي وانا أعطيتها مطلبها

ام وليد بحسرة :آه وش يفهم أبوك والله ماغير يحوسنا حوس

وليد قال بضيق: أبوي مقدور عليه

ام وليد بقلق: يمه ابوك امس انت سكت ومارديت عليه عشان كذا طخ وبعد قدر تعبك وجيتك من السفر بس اليوم وش يرده
والله ماغير ينكد علينا جيمع

شوق : والله ابوي صادق خليه يهاوشه وكاد يتحرك شوي

وليد بحده: شوق شيء مالك فيه لا تدخلي حالك

شوق : هذا جزاي ابي مصلحتك والله ي خوي ماتلقى أفضل من
ريتآج احسن لك تحرك قبل ام سالم تطيرها من يدك لولدها الدكتور والله ماراح ينرد
وليد عقد حواجبه مقهور من كلامها: وش ذا الحكي

شوق وقفت وجلست جنبه :والله اني صادقة تخيل امس في العزيمه كذا تتكلم قدامي بدون احترام وتقول متى بنتك ي ام عصام تخلص عدتها ولدي مستعجل يبي يعرس ...

وليد حس بقهرماوده تكمل ناظر امه الي قالت
: ي حسرتي والله على ريتآج تمنيتها لك من زمان بس يوم رفصتها زعلت وضقت بس يوم قال بندر يبيها قلت الحمدلله ماراحت بعيد وأخذت وأحد من عيالي و بندر توفي الله يرحمه وانت طلقتها وبتروح لنصيبها ...الي ينتظرها

وليد وقف وقال بحده: قلتيها يمه بتروح لنصيبها ..
والبنت مطلقه رسمي وصكها عندها تكمل عدتها والله يستر عليها
شوق بقهر منه ماتوقعت رده كذا: بعد طلعت صك متى امداك

وليد بقهر: مالك شغل وأعطاها ظهره بيطلع بس وقف يوم قالت

: غبي ضيعت لطيفه من يدك وهذي اليوم أسيل تقول ان ولد عمتها بيملك عليها هالشهر وآلحين ريتاج بتضيع من يدك
وانت أجلس من طيارة لطيارة

حس بقهر وده يسطرها بكم كف ..يخليها تسكت ...

لف لها وقال بعصبيه : جايه وانتي ناويه تنقلي هالاخبار
شوق وقفت وقربت منه وقالت بقهر : والله من قهري عليك ي خوي حرام تضيع ريتآج من يدك...وسكتت يوم أعطاها ظهره وطنشها من غير مايرد عليها
لفت لأمها الي الزعل والضيق واضح عليها قالت بخوف وندم انها حكت كذا قدام امها وهي عارفة صحتها : يمه وكاد خيره لهم لا تضايقي حالك ..

@
@
@
بيت أبو أسامه
قالت بقهر : يمه آلحين موافقة عليه ومشيتها بس ماتبي عرس ليه

لطيفه
وش اسوي ماعندي غير أوافق وكاد اطلع من الي انا فيه ...
وبعد مابي اكسر خاطر أبوي ...وخاطر عمتي وجدتي
قلت بضيق: هذا شر طي يمه

ام اسامه :والله ودي لك بعرس حرام كذآ

لطيفه بجمود: يمه جربت العرس خلاص وش بستفيد لو انزفيت مره ثانية
ام اسامه : وكاد هو يبي يسوي عرس ويفرح بليلة عمرة ليه تحرميه كذآ

لطيفه ابتسمت بسخرية : يمه لا تنسي انه متزوج ومطلق وأكيد سوى عرس خلاص جرب حظه

ام أسامه بستهزاء : الحين عرسه الي بالديرة القشرا الي سواه مثل هنا يمه هنا غير

لطيفه وقفت بضيق: يمه هذا شرطي وهو وافق

ام اسامه بقهر:أكيد بيوافق مايبي يخسر قروشه ..

لطيفه : يمه يكفي المهر الي أعطاني هوو ماقصر

ام أسامه بسخرية : عشتووو من آلحين ماترضي بولد هيفا ..

لطيفه : يمه ماهو كذا
وتكفين لايكون بخاطرك ... بس والله العرس مالي نفس اسويه

ام أسامه : كيفك والله الي علي سويته معك وكان ودي ازفك مثل مابي ازف أسامه

لطيفه بضيق: يمه يكفي تزفي أسامه بعد أسبوع
ام أسامه :آه ي طول هالاسبوع. ..
الله يهدي أريج لو وافقت على القاعة الي قبل حجزها لها كان الحين تم العرس ..وعنده من مبطي ...بس يالله خيره على قول خالتك

لطيفه : الله يعين ريوف بس والله ان قلبي مشلوع عليها

ام أسامه بعصبيه : يعينها على وشهوو في بيتها مع عيالها ومرتاحه تحمد ربها غيرها ماهو محصل

لطيفه : الله لا يذوقك يمه الضره والله انها تحر وتوجع
اسأليني أنا
ام أسامه : توجع إذا صار ظلم بس مدام فيه عدل ليه اتعب نفسي واحرق قلبي ...وقفت يالله خليني أروح لخالتك اليوم مسويه عزيمه ماتبي تجي معي

لطيفه عقدت حواجبي مستغربه: على وشهوو عزيمه

ام اسامه :على دبش بنتها ...

لطيفه:ي حب الحريم لها لأشياء الفاضية آلحين بالله وش مستفيدة منه

ام اسامه بحده: بتروحي معي حياك لاتجلسي تنتقدي ولا تنسي يوم تجهيزك سويتي أكثر منها .....
وبعدين وش فيك على بنت خالتك ولا كله عشان ريوف
بدل ماتفرحي لبنت خالتك واقفتن مع الغريبه ...

لطيفه
آه يمه والله انكم مخدوعين في اريج بس ماقدر أقول شيء ....رائد محلفني خايف على حياته مع أسيل ...طلعت للحوش اشم شوية هواء جلست وانا أفكر الي سويته صح ولا غلط ..
للحين مو مصدقة اني وافقت ...على شهاب ..كل ماتذكر أسلوبه يوم بالمستشفى اتردد بس وقتها يمكن معه حق ...
وكاد انا غلطانه بعد طالعت لباب المحلق يوم شفت رائد طلع منه وهو حامل اغراض وراه أسيل معصبه ...قلت بطفش منهم : أكيد متهاوشين عشان الشقه يالله متى نخلص من هالموال

رائد جلس مقابلها وقال بعصبيه : المصيبه خلاص أخذتها ودفعت مقدم ونقلت عفشي الي بالملحق وهي بعدها ماهو براضيه

أسيل بعصبيه :ماحبيتها بعيدة مره شوي ونطلع برا الرياض
وكذا ابعد عن ماما وانا اموت لو يمر يوم ماشوف فيه ماما

رائد :شوفيها وهي معصبه بعد مدلعه أمشي بس قال ايش ماما

أسيل حطت يدها على خصرها و يقال عصبت زود :اففف طفشت من هالكلمه كل وقتك مدلعه مدلعه

رائد رفع جوالها وعض شفته : أقول اسكتي لا اهفك بهذا بيدي
لطيفه بقهر: تصدقون الإثنين تقهرون

رائد : افاا ي لطيفه الحين انا والدلوعه هذي نقهر

أسيل ضربت برجلها بالأرض بقهر: اففف كم مره أقولك لا تقول دلوعه

رائد : اقول على هونك لايروح ولدي البطل بسبة دلعك
والله ماغير احوسك ..

لطيفه قلت وانا منزعجه منه ومنها ودي اسطرهم ..هوعشان يسكت وهي عشان دلعها المستفز بذات حركه رجولها الي توو : أسيل آيش مو عاجبك بالشقه

أسيل : ديكورها قديم مره وبعد بعيدة

رائد بعربجه : أقول يا أم ديكور امشي قدامي بس

أسيل رفعت يدها وهي قرفانه: لو سمحت لا تكلمني بهالطريقة ماحب كذا كم مرة أقولك

رائد عض يده بقهر : اخخخ لطوف وش اسوي فيها
اسيل : ماتقدر تسوي شي والله بابا يذبحك ..

رائد قرب منها وضربها على راسها بخفيف : يالله هاا قولي لبابا
..
اسيل بعصبيه : رودي بس

لطيفه فتحت عينها بصدمه:بعدك تدلعينه

رائد :شفتي كيف آه بس وطالع اسيل أمشي قدامي وخلي الهياط عنك

أسيل بعناد قربت من لطيقه وقالت :روح انت مابي أروح معك

رائد قرب وهو يتحلف فيها ماسك أعصابه غصب عليها وهو الي يسويه لمصلحتهم ...وبذات العقرب مابقي شيء على زواجها من أخوه وتشرف هنا ...

لطيفه قالت بقهر منهم :أقول يالله فارقوا عني صدعتوا رأسي

أسيل قالت وهي ناويه تقهر را ئد: خلاص روح اسكن لحالك وانا بجلس اساعد لطيفه لاتنسى ملكتها بعد شهر
لطيفه : قلتها بعد شهر باقي وقت طويل يالله روحي مع رجلك

رائد صحك بصوت عالي :فشلتي عمرك على الفاضي تعالي تعالي معي أفضل لك محدن يبك ماعندك إلا انا

أسيل :جايه جايه معك الله لايعوق بشر
رائد: ليتك من أول ي لطيفه قصفتي الجبهه جابت نتيجه

اسيل رفعت أصبعها بتهديد:هاا والله أهون

رائد بقهر : جالس اعزم عليك مع وجهيي مسك يدها وقال باي وهو يقلد صوت اسيل

لطيفه ضحكت من قلب ...على صوته. .أول ماطلعوا قالت مهما وصل خبث أريج بس مستحيل تهزم رائد واثقه فيه ثقه عميا انه بيقدر يخليها تبعد عنهم يآرب ابعدها عنهم واكشفها لاسامه والله مايستاهلها ...رفعت الجوال ودقت عليه تبيه يجي لها ودها تروح تشوف التوأم. ...فقدتهم حيل...
طالع خويه .وهو باله مشغول في المداهمه الي بكرة قال بقلق: الله يستر لا يصير شيء ويخرب الخطه الي مسوينها له هالمجرم كم مرة فلت منها والمصيبه يتدبس فيها الي يتعاطون معه ي خوفي يغير الاستراحه الي متفقين عليها

: هونها مدام قدرنا نمسك وافي الرأس الكبير نقدر نمسك هالخايس عنده كان طرطور لاتنسى

أسامه بقهر: كان ي علي بس اليوم بدر أكبر مروج وماوصل لها شي إلا مأمن حاله

:
علي وقف وقال بدون مبالاة:أسامه الي يشوف قلقك يقول أول مرة تصير معك مداهمة ماهي هذي شغلتنا

أسامه ضرب الطاولة بالقلم الي بيدة: قلبي ماهو مطمن مدري ليه هالمرة ...

علي بمزح سخيف قرب منه وقال: خايف لا يكون في تبادل طلق نار .تطمن لو رملت زوجتك بأخذها الثانية وبربي عيالك النتف الي سندرت رأسي فيهم ..

اسامه وقف ومسك من بدلته وقال بحده: فيك خير عيد هالحكي ودفه بقهر ليت الرصاص تجي في عقلك الفاهي ذا

علي صلح بدلته :امزح الله يقلعك هالقوة كلها وخايف اتقي الله
بنفسك

اسامه جحده بنظرة وقال : المهم اي تعليمات جديدة عطني خبر وناظرجواله يوم رن كان رقم لطيفه قال بترحيب وهو طالع من مكتبه :ي هلا والله

لطيفه :هلا فيك وينك فيه

اسامه :في دوامي أمري

لطيفه : امم مدام بدوامك خلاص

اسامه : ايش فيه

لطيفه : كنت بروح لريوف وماعندي أحد يوديني قلت ادق عليك توديني لها

أسامه فرح من قلب يبيها تجلس معاها ويكون مطمن عليهم بهاليومين ...
: دقايق وأكون عندك ...وياليت تستأذني من امي عشان ابيك تباتي عندها هاليومين انا مدوام لمدة يومين وراء بعض
مشغول حدي حتى ماقدر أطلع ...اشوفهم ..

لطيفه : تمام انتظرك ...
قفل من عندها وطلع بعد ماعطى خويه خبر يغطي عليه لما يجي..وعلى طول اتجهه لبيت أهله ..حصل لطيفه جاهزة أخذها
ومشى لبيته ..أول ماوقف السيارة ... ...
..دق جواله طالع رقمها قال للطيفه :أدخلي ريوف تنتظرك وانا اكمل مكالمتي وجاي

لطيفه عرفت مين داق عليه من غير مايقول حست بقهر وسيعة وجهه بقوه هالأريج :خذ راحتك

فتح الخط وقال بضيق من كثر طلباتها :هاا آيش فيه بعد

اريج بدلع: افف سوسو وش فيك كذا معصب علي هذا جزاي داقه أخذ بخاطرك ...عشان حسيت انك زعلت مني من آخر مكالمه بينا .... والله مايهون علي زعلك

اسامه دخل البيت ..وسند حاله على الجدار وقال بضيق: أولاً الدلع هذا ماحبه وياليت معاد اسمعه منك وثانياً لو يهمك خاطري ماهو بطالعة لي بكل مرة شيء .لو ماتبيني قولي وبس .

أريج افف ي شينك صدق انك ماهو وجهه دلع قالت وهي ودها تقول اي والله مابيك لأني عرفت إني خسرانه يوم ارتبط فيك وبذات الي ذبحها طلعة رائد من البيت قالت بقهر : ابشر ماراح ادلعك مرة ثانية انت الخسران وخلاص تطمن مافيه شيء عاد ناقص والزواج بيتم في نفس الموعد المحدد

أسامه بحده : احسك متفضله علي بعد ترا عادي لو تأجل ماعندي مشكله
أريج عضت شفتها بقهر علامه ذا اليوم كذا شاب عليها قالت بقهر : اوك يالله مع السلامة ويوم تهدا برجع ادق عليك اوك
أسامه بجمود: هاليومين لا تدقي ماهو فاضي ويالله مع السلامة

في الصالة
ريوف بضحكه : أقول لطوف ترا بعد سمير ولد أخوك

لطيفه رفعت حاجب:وش قصدك

ريوف بخبث:من وقت ماجيتي وانتي ماسكه في شهاب وأتوقع السبب الاسم

لطيفه بقهر :تافهه وربي وبقهر روحي شوفي رجلك طول مع الست أريج نكدي عليهم سوي شيء ماغير حاطه حيلك علي

ريوف بعزة نفس :مايهموني الإثنين وبعدين حرام اغلس عليهم ..وسكتت وهي تشوف أسامه دخل وشكله سمعاها لأنه واضح عليه الزعل وتأكدت انه سمع يوم قال بسخرية : كلك ذوق ماشاءالله

ريوف ابتسمت بستهزاء :أكيد

لطيفه قالت بسرعة: تكفون لا تبدوون ترا توه رأسي دار من أسيل ورائد والله شوي وتصير عندي عقدة منكم
ريوف ابتسمت : سلامتك والله وانتبهي لسمير بعد اوك وهي
تغمز لها دقايق وراجعه وراحت تحضر القهوة والحلا ..
أول ماطلعت من المطبخ وقفت وهي تسمع اسامه يقول: شكل حظي في الحريم شين
قلت بقهر وانا احط الضيافه على الطاولة :وكاد البلى منك

أسامه وقف وراح لغرفته بدون مايرد عليها ...

لطيفه :شكله زعل الله يهديك بس ..

ريوف :وهي تحمل سمير الي يصيح : والله اخوك دق الباب لقي الجواب عضت شفتها بقهر يوم سمعته يناديها وقفت وهي تأخذ شهاب من يد لطيفه وتحط بداله سمير: خذي ي قلبي هذي الي يبي هز وشهاب مصرانه تقلبت من كثر ماهزيتي فيه ..

لطيفه تحسها تتمسخر عليها : روحي بس شوفي ولدك الثالث

ريوف : ولدي الثالث متبريه منه

لطيفه : روحي بس ..

ريوف
رقيت الدرج ودخلت الغرفة شافته جالس على السرير وهو معصب
اسامه أول ماشافها قال بعصبيه: وش ذي الحضانة الي مسويتها
بالغرفة كم مرة قلت لك ماحب شكل الغرفة مكركبه
ريوف طالعت الغرفة نظيفه ماغير المفارش حق عيالها على
السرير قالت بطولة بال: ي كبرها ي اسامه مكركبه مرة وحده ..ايش فيها الغرفة بالله
اسامه أشر على السرير ...
ريوف أول ماشر على طول ..قربت من السرير أخذتهم...
وخليتهم على الاريكه الي بالزاوية ...وقلت بسخرية : يالله انبسط ي شيخ الغرفة تلق وبدون كركبه جيت بطلع حسيت بيده ..وقفتني لفيت له ..وقلت بهمس : ايش فيه

أسامه قال بعتب:تقولي ماهك كذا قدام لطيفه بدون مراعاة لمشاعري

ريوف طالعته وقالت ببرود: قلت الصدق ولا حاب اني أكذب عليك وأعيشك بخدعه يكفي الي عايشه

أسامه عقد حواجبه : ايش قصدك
ريوف سحبت يدي من يده بس رفض : فكني خلني أروح اشوف العيال

أسامه سحبها وجلسها على السرير:خليهم عند لطيفه وهي بتنتبه لهم ..بتكلم معك شوي

ريوف بضيق:وقته أسامه

أسامه زفر بضيق: وش اسوي مصدقت ولطيفه تجي وتأخذ بالها
منهم وانتي تفضي شوي لي ...عشان اتفاهم معك وبعدين كلها ساعة وراجع دوامي ....
ريوف بطفش: من هذاك الزمان وانت بتفاهم معي وبتكلم معي ولا سمعت منك شيء ولا ....
اسامه قاطعها بقهر : كله منك ريوف ماتعطيني فرصه أبد
وآلحين الوضع تطور صايرة تنقصي من قيمتي بعد قدام الكل
وهذا وانا محترم الي طلبتيه مني ومقدرك

ريوف رفعت حاجب : مشكور ماتقصر وأبد مانقصت قيمتك قدام أحد واي فرصة تبيها أسامه واذا قصدك عشان العدل الي تقوله بقولك لاتشغل نفسك فيني خلك لأريج كلك وانا متنازلة عنك والي ابيه بس عيالي وبيتي اماا أنت والله مالك وجود أبد وقفت بتقوم بس رجع وجلسها قالت بقهر :والنهاية
أسامه :حالف اليوم ماتطلعي من الغرفة إلا لما نتفاهم
عندي أمل إني بطلع وانتي راضيه علي ...

ريوف بحده:أسامه موقت انا نتكلم في شي او نتفاهم ..أختك هنا صعب اخليها لحالها الحركه بايخه مره واوعدك بسمعك المرة الثانية ...

أسامه هز رأسه برفض .
.
ريوف زفرت بضيق :أعوذ بالله منك ي بليس

اسامة فتح عينه بصدمه : لا ي شيخه

ريوف بقهر : اسامه مو وقت سماجتك فك يدي
اسامه عض شفته بقهر: من تو تتعوذي والحين سامج
صغر عيونه وقال بقهر مستقويه ريوف عشان جالس ادور رضاك ...

ريوف ضحكت بقهر :مره تعبتك صراحه معاي وانت تدور راضي قربت منه وهمست له قول تدور شيء يقهرني

أسامه فتح عينه بصدمه:آلحين انا ادور شيء يقهرك خافي ربك من هالظلم الي ظالمتني فيه

ريوف وهي مجروحه من الي سواه فيها ياما ذلها وعذبها قفلت فمه بيدها و قالت بغصه: اخر واحد يتكلم عن الظلم ..وراضي والله ماتطوله على الي سويته فيني شافته بيتكلم رجعت حطت يدها على فمه تمنعه لاتقول عذري معي الي سويته كثيرر ي أسامه والحين خلني اروح اشوف عيالي ...
وقفت على طول أول مافتح يدها بس رجع مسكها طالعتة بقهر يوم وقفت وقابلها وقال بهمس:عندي مداهمه بكرة تصدقي لأول مرة اقول اسرار عملي ي ريوف لأحد قبل تنفيد المهمه بس حبيت أقولك لو صار لي شيء أمانة عندك عيالي واثق فيك بقوه بعد أنك بتنتبهي لهم أفضل مني بعد

ريوف عقدت حواجبي وقلت بخوف : ماحب هالطاري اسامه
عندي فوبيا منه ...

اسامه إبتسم بحزن : مدام تخافي من فراقي ليه ماتعطيني فرصه
واوعدك إذا عدت المهمه هذي على خير بعوضك ريوف عن كل شيء ...اوعدك

ريوف فكت يده بعنف: ماخاف من فرقاك خلاص الي كنت خايفة منه انتهى كنت خايفة اتشرد بس الحين مايهمني ميت حي
..
أسامه بوجع : بعد تقوليها بوجهي ريوف

ريوف ..أعطته ظهرها من غير ماترد عليه ..
..نزلت وهي .متضايقه حدها وأكثر شيء يضايقها يوم يجلس يعتذر الي سواه فيها مايجبره اي إعتذاره ...ابتسمت يوم شافت عيالها في يدها وشكلها معصب بعد قالت بابتسامة : ان شاءالله ماتأخرت بس عليك

لطيفه بقهر :لا أبد وبقهر أكثر يعني الحين ماحلت لكم الجلسه إلا يوم اجيت ولا ناوين تخلوني مربيه لعيالكم

ريوف قربت منها وباست خدها :أحلى مربيه والله
هاتي اساعدك بواحد فيهم ...

لطيفه بسخرية : لا ي قلبي حلفت ماتأخذهم اليوم علي

ريوف ضحكت من قلب عليها وقالت : ي قلبي ي لطوف والله
اتونس معك حيل يوم تجي بس بخيله بزيارتك

وابتسمت بخبث وآلحين بتبخلي زود يوم تهجي الديرة مع
الصقر ...إلا على طاري الصقر..عادك صامله على رايك تبي ملكه وبس ...
لطيفه : ايه وهذا بعد اذا صارت الملكه

ريوف عقدت حواجبها مستغربه من ردها:يعني لك نيه ترفضي

لطيفه ببرود: ماهو كذا قصدي

ريوف صغرت عيونها :أجل وشهو قصدك

لطيفه : قصدي لا تنسي التحليل باقي وكاد ماتتطابق

ريوف : لا ي قلبي التحليل ان شاءالله خير

لطيفه عندها أمل في التحليل ...ويكون عذرها قوي للرفض
وماتنحرج من عمتها وابوها ....عجزن وهي توضح لهن انهم ماهو بلايقين على بعض بس مين يسمع .. قالت ببرود : أجل الله يعني على شوفة نفسه

ريوف: ليه تقولي عنه كذا وانتي بعدك ماعاشرتيه
لطيفه هزت رأسها : صح وكاد أكون ظالمته .
@
@
@
@
طالعتها بخبث وقالت : هاا وش رأيك بالي قلته

أريج بقهر : شايف حاله بقوه مدري على وشهوو

ريم بطفش من هالسالفة : أريج خلينا تكفين من الضابط تبعك
واعطيني رأيك الحب منتظر كلمة منك ودق جوالها هاا هذا هو كل وقت يدق علي يطمن يبي أنك وافقتي

أريج ميلت فمها بسخرية : افف من مبطي عنه بعد ماكبر رأسه معاد له حس وآلحين طلع فجأة

ريم قالت بخبث: انجن يوم دري بملكتك وحلف يسوي حفلة عشانك شكله من قهره بس يبي يثبت لك انه ماهمه ..

أريج وهي تحط مناكيرعلى أظافيرها رفعت يدها وهي تناظره : امم يسوي حفلة عشاني قولي مسويها عشان الي معه ي شيخه هذا كل يوم له وحده وحاست فمها بقرف شفتي آخر مرة مين جاب
مسوي بقهرني

ريم : قلتيها عشان يقهرك وآلحين من أسبوع وهو كل وقت يدق علي يبيني اقنعك تجي ..

أريج بخبث:قولي له كم تعطيها لو تجي ولا يحاول يكذب يطلع ذهب من الي يبيعه ...

ريم :لا تكوني ظالمة والله دايم مايقصر معنا
أريج ضحكت بصوت عالي: كم معطيك ريم بسرعة أعترفي

ريم وهي تتهرب :ماعطاني شيء بلى تبلي

أريج : أقول اعترفي وش معطيك عشان تقنعيني ..والي أذكره انك تكرهيه وماتحبي طاريه يوم أجيب سيرته بس يوم بدأ يلعب بالفلوس صايرة تدقي عليه أكثر مني والحين كم أعطاك عشان تقنعيني بهالحفلة ..بسرعة انطقي ...

ريم بسخرية :تخيلي متعبه نفسي وهو عينه منك وشكل الفلوس الي وعدني فيها يوم يشوفك يسحب علي

أريج وقفت بغرور وهي تناظر حالها بالمرايا...
وميلت فمها بطريقة مقرفة :من حقه اخقق تبيه يناظرك انتي وخشمك ذا ..غبيه كم لي وانا أعملك كيف تخدمي الحشرات هذولا ويكون قبلها ضمنتي حقك طالعتها بسخرية وقالت آلحين بتجيك سحبه محترمه يوم يشوف الجمال ...

ريم حست بغيرة منها..وبقهر كل مرة تتريق بشكلها بس ماتقدر تقول شيء لو خلت أريج يروح العز.. أريج خبيثه تقدر تلعب على الشباب بجمالها .ودلعها .... وتأخذ منهم الي تبي والصدق دايم ماتبخل عليها. .وتعطيها الي تبي ....وعشان كذا لازم تتحمل
قالت بضيق: بمشيها لك لأني أحبك بس
أريج ضحكت بصوت عالي : قلتي تحبيني لا ي قلبي قصدك راح
تمشيها لي عشان الفلوس الي بحصلها لو حضرت الحفلة ...

ريم قالت وهي ودها تضايقها وتعرف كيف تخليها تنكتم وتخلي الغرور الي ذابحها : أقول قلتي لي رائد بيطلع من بيتهم وبيأخذ شقه برا تتوقعي شارد منك افف ي اريج الكل يبي رضاك إلا رائد تدري ليه لأنك وضحتي حبك له والباقي دايم ثقيله عليهم شفتي حتى انتي عندك نسبة غباء ...لا تعايبي علي

أريج عضت شفتها بقهر وحقد: مع نفسه ومعاد يهمني أبد ولو ابيه وباقي في بالي والله لا أجيبه وتعرفيني زين ي ريم ....

ريم وقفت وقربت منها بخبث : طالعي عيوني وعيدي الي قلتيه
قال ايش مايهمني والله ميته وراه ولو فيه شيء يرجعه لك راح تسويه لو تبيعي عمرك بس من قلة الحيلة تقولي معاد يهمك ...

أريج ماعندها شي تقوله مكشوفة قدامها وهي فعلاً غبية يوم قالت لها كل شيء بعد يخصها برائد آلحين تتشمت فيها هالحقيرة ابشري بعزك ريوم انتي الي بديتي وتحملي الي يجيك والله ماغير افشلك بهالحفلة ... ..قالت بحقد : خليك مني ودقي عليه وقولي له موافقة تحضر حفلتك.. الفراولة

ريم نطت بفرحه : اوك ي الفراولة بدق عليه وتكفين طلعي لنا شيء يستاهل على المغامرة الي بنغامرها

أريج طالعت المرايا وابتسمت بخبث:لا توصي هذي شغلتي
وبنفسها وبعد بربيك اليوم ي *****(( سبحان الله حتى قلوبهم ماهي على بعض الي يمشي بهالطريق الله يهدي بناتنا وشبابنا جميع ويهدينا يآرب لما يحبه ويرضاه آللهم آمين ))

@
@
@
@
@
@
@
اليوم الثاني ..
في شقة سآمي

كنت بالمطبخ أحضر غداء لي ولبدريه ...ي زين البيت بدون سامي ...مأخذه راحتي على الآخر أخذت سفرة وطلعت بس انصدمت يوم شفت الي دخل وقفت مكاني مصدومه ...

سآمي
طالعها ..وهي واقفه قدامه فاتحه فمها بطريقة غبيه ...جحدها بنظره يبيها تتحرك من قدامه ...رفع حاجب يوم ماتحركت طنشها وقرب من بدريه الي وقفت ترحب فيه سلم عليها وحمل بنته ولف بنظره بيشوفها باقي واقفه أولا ماحصلها ...تنهد براحه وجلس على الكنبه ..
غلا
حسيت حالي غبيه صدق ..واقفه مدري وش أنتظر ويالله قدرت
اتحرك من مكاني يآربي والله مصدومه قايلة لي بيجلس أسبوع وش رجعه طالعت بدريه الي .دخلت المطبخ وهي تستعجلني بتحضير الغداء قلت بقهر : عاد به غداء جية اخوك سدت نفسي

بدريه بتحذير:غلا تكفين سامي لايسمعك والله يبي عليك أشاره بس .

غلا زفرت بقهر : آه بس صدق الدنيا دواره
بدريه وهي تأخذ صحن الرز : يالله بس
غلا أخذت السلطه ولحقتها للصالة ..
ناولت بدرية السلطه ورحت للغرفة بس قفت يوم بدريه قالت
:غلا تعالي تغدي معنا

قلت بسرعة : لا لا عليكم بالعافية

بدريه :حرام انتي الي مسويته وجيعانه كنتي بعد لاتنسي. ..

سآمي ببرود :بدريه خلينا نتغداء على رواق تكفين وطالعها بسخريه واشر بيده للغرفة ..يالله كملي مشوارك

غلا عضيت شفتي بقهر انا الي تعبانه فيه وهذا يجي يأكله وعلى رواق بعد هين قلت بعناد:والله انك صادقه ي بدريه انا الي تعبانه فيه وقربت منه بعناد أكثر وجلست جنبه عناد بعد
سآمي طالعها ورفع حاجب وميل فمه بسخرية
غلا اشرت للصحن الرز:احدر احدر

سامي فتح عينه بصدمه اليوم راجعه لحركاتها السخيفه ...
طنشها ومد يده يأكل ....

طالعته شفته منزل رأسه يأكل ومطنش وجودي قليل الخاتمه جاي من السفر ولا رد السلام علي بعد...مالت عليك ..ي شينه وهو شايف حاله علي
كنت أكل بعناد على ان نفسي انسدت بس مابي أوضح انه منتصر علي ...سآمي مايجي معه الضعف يبي الي يعانده ....
هم كذا الي يهايطون لو سويت الي يبونه استقووى عليك بس عاندهم شوف النتيجه....الي تبرد تسبدك ...حصلت طماطم حذفتها له هو مايحب السلطه قمت وغرفت وكثرت بعد وكنت اقربها منه عناد
بس فزيت من صرخته ..

: أكيد تستهبلي

غلا طالعتة وانا اتمسكن : بسم الله ..على أيش استهبل

سامي بقهر دار بالصحن وغير مكان ماكان يأكل وقال بتهديد:سوي حركه غبيه ثانية وشوفي وش يحصل لك

غلا طالعت بدريه الي تناظرني بعتاب ابتسمت بخبث
وانا امد يدي واسحب صحن البطاطس المسلوق لغرام كذا عناد
فيه والله مايقدر يحرمني بنتي ...
أعطيتها اللقمه الأولى وبعدها الثانية والثالثة ابيه يعلق ماعلق الحمدلله الي برأسه هجد ....

سآمي شرب ماي ووقف ...

بدريه رفعت رأسها:كمل أكلك

سآمي :الحمدلله شبعت وبنام لأحد يزعجني ...
بدريه :نوم العافية حبيبي ...صايرة تشفق عليه بعد موت أمها تحسه ماهو سآمي الأول متغير حيل ...

غلا
يوم بدرية بعد راحت غرفتها ...وقفت وأخذت السفرة ونظفت المكان ..ورجعت لغرام وابتسمت بخبث ..حملتها ومشيت على طرف رجولي فتحت باب المجلس ..على خفيف ونزلت غرام واشرت لها تدخل افف غصب فهمت طلعت روحي ...بغيت ارقض يوم بدت تحبي . متجهه له وفرحانة بعد حلوو .....
بسرعة بعدت عن الباب عشان لو ازعجته مايقوم ويعرف اني الي مرسلتها ...سمعت صوته ينادي باسمي: غلااااااا

رحت لها وانا مسويه دور البريئة : تناديني

سامي :خذيها بنام

غلا طالعت وين مأشر شفت غرام وهي تدور اي شيء
بالمجلس تلعب به بسم عليها عمرها ثمنيه شهور وحركتها كثيرة حيل وخفيفه اي شيء تبيه .. فتحت عيني بتمثيل يقال مصدومه: آيش جاب غرام هنا سبحان الله بنتك طالعة مثلك بس تحوس ..ماتهجد ماطلعت لي أبد

سآمي وهو يطالعها بسخرية: سبحان الله

غلا قلت وانا ناويه ارفع ضغطه زود :أكيد الحين بتزعل وتقوم
تعصب وتسوي فيها ليه قلت لك الحقيقه

سامي صغر عيونه بقهر وقف مسك غرام وحملها وناولها وقال بقهر : خذي بنتك قبل ماعصب عليك آلحين صدق ..

غلا حملتها وهي تضحك :قولي بابا يع

غرام ببراءة وهي تضرب وجهه امها ويالله قدرت تنطق وتكرر وراها : يع

سآمي ابتسم وأخذها منها ورفعها لفوق وهو يبوس فيها : انا يع طيب طيب ورجع رفعها وهي تضحك ببراءة

غلا حاست بوزها ...ماهو هذا الي تبيه ودها يعصب وينزعج مايقلبونها هو بنته حب ...رفعت يدها وقالت :مالت عليك وعليها
سآمي طالعها وهو رافع حاجب
غلا بسخرية : يالله عن اذنكم اخليكم تنبسطوا مع بعض .
:
@
@
@
@
@
.قال وهو معصب بعد ما انتهت المهمه. ..: الزفت الي قدر يشرد اليوم يبات بالسجن عمم البلاغ بسرعة ...

: امرك ان شاءالله اليوم يباب في السجن والحمدلله والرأس الكبير قدرنا عليه وماراح نعجز على وأحد من رجاله ...

أسامه بقرف :البنات الي مسكانهم محتفلين معاهم جيب اسمأهم بسرعة
: ابشر آلحين بنعرف اسمأهم ...ونبدأ تحقيق معاهم .ودق تحيه له وطلع ....

أسامه جلس على مكتبه وهو مقهور...المهمه تمت بس في النهاية
بدا طلق نار ...من داخل الاستراحة. ..وقدر يشرد منهم وأحد من رجاله .....
شاف العسكري الي دخل وقال : ماقدرنا نأخذ منهم غير اسمأهم جالسين يصيحون مافهمنا شيء منهم وبعد فيه وحدة منهم رافضة تعطينا رقم أهلها ...والسجانه عجزت معاها ..جالسة تتهاوش معاها ...

اسامه وقف بقهر وأخذ الورقة وناظر الأسماء وقال بقهر: والله
تبي كم كف يسطرها تسطيرالحين ال**** خايفة من أهلها ليه ماخافت من ربها عض شفته بغيض آه وين أهاليهن عنهم حسبي الله عليهم طالع الورقة وهو قرفان حط نظره على آخر اسم فتح عينه بصدمة وهو يتأكد من الاسم : أريج إبراهيم الباتل ....؛؛اسم العائلة من الخيال "