تحميل رواية «عاشقه السفير» PDF

#عاشقة_السفير41

الكاتبة chra kirkuki

ما دام الفراق هو الوجه الآخر للحب، والخيبة هي الوجه الآخر للعشق، لماذا لا يكون هناك عيد للنسيان يضرب فيه سعاة البريد عن العمل، وتتوقّف فيه الخطوط الهاتفيّة، وتمنع فيه الإذاعات من بثّ الأغاني العاطفيّة ونكفّ فيه عن كتابة شعر الحبّ.

عماد أنت متأكد هالمرة لو لا ترى هالشخص مو عادي يعني اذا غلطت راح نروح بيها

مقداد الملفات والصور كلها كدامك اني اول ماشفته عقلي وكف شنو يستفاد هالشخص هيجي يسوي عنده فلوس ومنصب

الموضوع كلش خطير فكر زين قبل لا تقدم على أي خطوة

المشكلة مدعوم من غير دولة يعني أكيد مو لوحده بس يبقى عندي سؤال شلون أبو زيد سنين وياهم وميعرف حركاتهم والجرائم اللي يسووها

مو سألته وطلع ميعرف شي عماد لاتنسى هسة هو جد جهالنا وابو زوجاتنا مو مثل قبل تحجي وتهدد بكيفك

هم زين احنا بالمزرعه مو بالبيت لايسمعون بناته ونبقى بلا زوجات من وراك

بالنسبة اليه متكدر بدوني وبالنسبة الك فماعرف انت ادرى هههه . حجيتله كلشي وشوفته مو متصور هالشي حقه سنين وياهم ويخدمهم عباله هو ماشي بالطريق الصحيح فجأة يطلع ماشي بوحل .

تعالي عشق حبيبتي نامي متعبتي طول اليوم حركة ولعب

أريد دادي آيه خابري يجي

دادي رايح ويا عمو للمزرعه اذا صرتي حبابه ونمتي احنا هم نروح يمهم ونسوي حفلة لكريم ونتونس

واني هم اريد بارتي آيه سويلي زين

زين ياروح آيه نامي واسويلج احلى بارتي يااحلى أميرة لعبت بشعرها ودغدغتها وهي تضحك تنسيني كل همومي تشبه ابوها اهواية نفس الملامح والعيون

نامت غطيتها وطلعت رحت لغرفتي ردت انام باوعت على جهة عماد دايما موجود كتاب يمه يقراها بالليل مديت ايدي فتحته طلع اجنبي سديته وخليته على صدري اشم ريحته سمعت صوت تليفوني مجاوبته بس فرحت اهواية شفت رسالة منه

اعرفج منايمه ومتجاوبين أحبج ياروحي راح تعذريني بس صبري عليه هالفترة اوعدج مراح اقصر بشي وياج لاتنسين حتى لو جسدي مو يمج روحي وياج حبيبج عماد

جاوبته

عشقي ونبضي احبك للموت بس ماكدر احجي وياك ماتحمل اسمع صوتك وانت قريب مني وبنفس الوقت بعيد ومااوصلك .

كريم روح شوف الغراض بنفسك بعدين لاتكول هذا ناقص وهذا مادري شبيه منا لحد الليل عندك مجال قبل لايوصلون

دادي اليوم مرتين كلتلي هالشي وجاوبتك كلشي تمام وماما بالطريق راح توصل بعد شوية ويا جدو

هههههه صرت عجوز وتنسى يا عماد الله يعين آيه شلون ورطت نفسها وياك ضيعت شبابها بنفسها

الله ياخذك ياسر ماعرف شلون تفر السالفة من الجنوب للشمال دماغي مشغول هالفترة والا ماانسى اما الثاني ادري شنو تقصد ممقصرين بشي احسن منك

مقداد هذا عماد لو مغيريه صاير يحجي بقلة أدب كله من آيه

صوجك انت تسأله وهو يجاوبك خطية آيه شعليها

من زمان مشايفين الوان ازرق بنفسجي على ركبته كلت أكيد متقاعد ورافع الراية البيضة

سيدي ممكن لحظة

يالله عن أذنكم اروح اتمشى ويا حميد شوية ابتعدت عنهم خير صاير شي جديد

شوف الموبايل هاي من يومين محبيت اضوجك وانت جاي اهنا حتى ترتاح

شفت الرسايل كومه تهديدات ومن ارقام مختلفة يعني اللي ببالي صحيح لاترد عليه خلي نشوف ليون يريدون يوصلون

سيدي اخاف لا يراقبون الاهل اذا تحب اروح اجيبهم بنفسي لايصير بيهم شي

هم زين ذكرتني خلي اخابرهم ينتظروك وميجون وحدهم ويالسايق اخذ وياك الحماية اني مااحتاجهم خابرت أم آيه وفهمتها لان آيه تعاند وتريد تعرف شنو السالفة رجعت يم مقداد وياسر كعدت وعيني على كريم وهو يسبح فرحان جاي ويانه صارله 3 ايام يحب يبين نفسه كبران وصاير رجال

كوم عماد نسبح خلي افوز عليك بيها مجال هالمرة مادام صرت شايب

اسبح ويا مقداد اني اروح ارتاح شوية قبل لايجون

اكص ايدي اذا متروح تحضر الغرفة حتى تسوي ليلة رومانسية علمود ترضي آيه مو صح مقداد

اخبارك قديمه عشق متخليهم راح تخرب عليهم

ناس حاسدة حقكم ماعدكم مثل أميرتي آيه دينا 24 ساعه مشغولة بين الدوام والجهال وشهد اسوء منها بعد الدوام متكعد بالبيت تفتر منا ومناك ماعدهم مجال يدلعوكم اصلا ناسيكم مو مثل آيه دايما تنتظرني وتشتاقلي كل لحظة

خليني ساكت لا توصل الكلام لشهد وتحرك الاخضر واليابس واني وياهم

لا اني ودينا راح نسافر بعد باجر جولة سياحية ونعوف الجهال يم خالتهم آيه وعمهم عماد

بالحلم غير وديهم يم بيت جدهم اني ومرتي طلعونه من السالفة

جاهزة بنتي نروح زيد اكل راسي مستعجل

اي ماما جاهزة خلي اجيب غراض عشق ونطلع هذا حميد هم وصل عشق تعالي نروح يم دادي

آيه بنتي لحظة انطي هالظرف لعماد لاتفتحي زين

بابا شنو بيها هالظرف تهددني ماافتحها لو جاي ويانا مو احسن حتى كريم راح يفرح

لاتصيرين فضولية اني خابرت عماد وباركتله على عيد ميلاد كريم لازم اروح يم ابويه صحته شوية تعبانه يالله ديربالكم على نفسكم وخلي عينج على زيد

ركبنا السيارة اني وامي وحميد يسوق وزيد كاعد يمه وعشق اللي مخبلتهم بسوالفها أحس اكو شي بين ابويه وعماد ومو شي عادي الله يستر وصلنا يم البوابة عشق تريد تنزل اضطريت انزل وياها هي تركض واني اروح وراها شفت منال وعماد كاعدين يشربون قهوة بالجهة الخلفية رجلي يمشي وقلبي يكولي لاتروحين يمهم رجعي لداخل البيت خليهم يفتهمون حركتهم محلوة بس عقلي يكولي روحي وسلمي كأنه ميهمج الحساب بعدين ويا عماد ومنال سلمت وعفتهم بس باوعت على منال بنظرات خليتها تخجل من نفسها كعدت بالمرجوحه واني اشوف المكان كلها مزين والأنارات على شكل نجوم الطاولات والبوفييه اشكال والوان الخدم رايحيين جايين يخلون الغراض ويرتبوها وكريم واكف وياهم يتصور وهو فرحان وعشق مسوية جو بحركاتها ردت أكوم حسيت بأيد على ايدي مخلاني اكوم نعم اكو شي

مشتاقين للحلوين اللي سلامهم جان بارد لاحضن لابوس ممقبولة منهم اريد تعويض تعالي ندخل لغرفتنا

فتحت حقيبتي هذا ابويه دزها الك روح للغرفة وحدك وشوف شنو بيها ومن اجي عصب وصيح عليه براحتك ومن تريد تحجي منال موجودة اكعد وياها لاتخلي شي بكلبك وماعليك مني اروح يم بنتي

من يمتى صرتي تعاندين جريتها من ايدها وكفت وشلتها واني اركض نسيت الجماعه واكفين اسمع صوت تصفير كريم

نزلني عيب عليك شنو هالتصرفات هسة صرت مراهق

هسة عيب عليه على الاساس معجبتج السالفة قفلت الباب وكعدتها بحضني فتحت الظرف طلعت الورقة خليتها بأيدها اقريها حتى ترتاحين

شنو هاي اكو بشر بهالشكل عماد صدك اللي مكتوب بهالورقة يعني هيجي يسوون بالناس شلون يكدرون

هاي جزء بسيط اعتبري 1 من 99 اعمالهم حبيبتي اذا قصرت بحقج هالفترة وضوجتج مجان قصدي محبيت احجيلج حتى لاتنقهرين

ماصدك شلون يتاجرون باعضاء الاطفال لو يدخلون مواد فاسدة للبلد ماكو قانون ماكو انسانية وحوش مو بشر اسفة حبيبي عماد انت جنت محتاجني هالفترة واني بدل مااساندك سويتلك مشاكل اكثر حبي شنو جنت تحجي ويا منال لوحدكم دفعني من حضنه وكام اخ ليش هيجي صارلك ساعه حاضني

متوبين انتي تستاهلين أكثر يالله خلي نطلع قبل لا اسوي شي

مثل شنو يعني وراها يصير بيبي لو لا اذا هيجي راضية وين رايح مو نتناقش

خليني اطلع قبل لاتسوين بيا شي واتورط طلعت ردت اسد الباب رجعت فتحتها وبالنسبة للبيبي احلمي ماكو هم زين عرفت نواياج الليلة انام يم امي

مو بكيفك عماد هههههه وين تروح مني وراك وراك واريد بيبي رتبت شعري وطلعت كملنا الحفلة طول الوقت عيني على منال خليت أيدي بايد عماد منطيتها مجال تقترب من عدنا كلما تحجي اني اشغل عماد بسالفة رحت غيرت ملابس عشق ونيمتها غيرت ملابسي كلهم كاعدين يحجون مشغولين وعماد مغير لبسه يريد يروح يلعب رياضه سمعنا صوت طلقات لحظات والسما صارت نار والجهال وصياحهم عماد يصيح عليه ادخل جوا يم عشق وهو يركض قبلي من الخوف ماكدر اتحرك من مكاني رجع شايل سلاح وهو يحجي ويا الحراس يريد يطلع ركضت عليه وين تروح وحدك

تخبلتي فوتي جوا شنو مطلعج برا بهاللبس روحي يم بنتج فوتي بسرعه لا انزل واكسر رجلج طلعنا من البوابه شفت السيارات وهي تمشي بأقصى سرعه لحكناهم المكان بعيد شوية وكلها مزارع بس بعيدين عن بعض ساعه ادخل من مكان واطلع منه اختفو ماكو الهم اثر حتى نسيت تليفوني ضلينا ندور اني بسيارتي والحمايات بسيارة ثانية رجعت علمود اخابر الشرطة متاكد متخبين بأحد المزارع

على كيفج بنتي هسة يرجع ليش تخوفيني اكثر

مو راضية تسكت ام مقداد شنسويلها اخاف تصير بيها شي آيه خلص ماما بنتج خايفة وانتي تبجين بهالشكل

نسيت عشق من الخوف رحت اخذتها من حضن كريم وخليتها بحضني واني اسكتها دخل عماد وراه مقداد وياسر يكولون نتحضر ونروح بسرعه من هالمكان سمعته يكول لامي مخابر أبويه يجي ياخذنا من اهنا باوعتله ماروح منا بدونك راح ابقى وياك

آيه مو وكت عناد هسة روحي بعدين اني اجي اخذكم ديربالج من عشق ومن نفسج لاتطلعين لاي مكان مهما يصير وراح يجي وياكم واحد من الحماية زين بست راسها لاتخافين اني بخير

اجى ابويا وجان ويا مهند يسوق سيارته باوعت على عماد شلون اروح وياهم شفته ساكت عرفت الوضع

مو زين ومضطر يوافق ويسكت مرت يومين وعماد مرجع وتليفونه مشغول لو مقفل يخابر دقيقة ويسده ثالث يوم اجى بنفسه كعد ويا اهلي شوية وبعدين طلع هو وابويه ساعات ورجعو رجعنا للبيت بعدني خايفة رغم طمني ماكو شي مرت أسبوع جان يحضر غراضه يسافر هو يرتب واني مره ابوسه مرة احضنه وهو يوخرني

قديمه حركاتج ماعندي وقت وماكو بيبي وخري خلي اشوف منو يخابر طلعت من الغرفة الرقم غريب واني امشي بالممر جاوبت سمعت شي خلاني ماعرف شلون اتصرف نزلت بسرعه وكلت لحميد يشغل السيارة طلعنا واني ادعي اوصل قبل لايصير شي

تعالي عشق نروح يم بيبي ابوج طفش مني وعافني كعدت احجي ويا امه وهي تشرب قهوتها واني احجي وياها معرفتي عماد وين راح

اصلا مشفته يطلع يمكن طلع من الباب الخلفي احجيلي شمسوية بي هيجي عاف البيت وطلع

ماكو ردت بيبي منه عافني وطلع حتى ملبس ملابس رسمية وماخذ شي وياه هو وتليفونه جان بيده بس ماعرف منو خابره لايكون يخوني خطية متحملت رجعت القهوة شوية وتختنك شربتها مي

راح تموتيني بسوالفج الحلوة الله لايحرمني منكم شنو هاي مقتل الله يستر

باوعت على التلفزيون طلع بالمانشيت مقتل وشفت حميد وهو يدفع بالصحفيين مكدرت اقرا الباقي اكيد عماد عماد مات صيحت بكل صوتي واني الطم وابجي قتلو عماد قبل ساعه جان يمي باوعت على الباب ماكدر اطلع ولا اوصله وكعت واني ماحس بنفسي.

رمضان مبارك عليكم متابعاتي العزيزات ينعاد علينا وعليكم بالصحة والسلامه

#عاشقة_السفير42

الكاتبة chra kirkuki

للحياة دمعتان

دمعة لقاء

ودمعة فراق

فإن لم تجمعنا الأيام

فسوف تجمعنا الأحلام

فإن لم تجمعنا الأحلام

فسوف تجمعنا الذكريات

وروعتها بالأمل واللقاء

فإذا رست سفينتك على شاطئ الذكريات فاجعلني أحد ركابها.

من شفت منظر ابو أيه تذكرت أبويه الناس والصحافة من كل جهة والاسعاف اللي يحاولون يطلعون جثته واني وياهم السيارة مقلوبة الدم يسيل بالشارع حسيت راح افقد واغيب عن الدنيا آيه مراح تتحمل هالصدمه كلها ساعه جنت احجي وياه وهو يوصيني على بيته وعلى زيد من سألته مهددينه جاوبني اني بحماية ربي الانذال ميوصلولي ومن جاني الاتصال يهددوني بقتلي اذا قدمت الاوراق والاثباتات اللي تدينهم للمحكمه رجعت خابرته مجاوبني طلعت من البيت ويا حميد واني اسوق بأقصى سرعه احاول اوصله جان راجع من طريق مزرعه ابوه وصلنا الناس موكفين سيارتهم دخلت بيناتهم واني اسمع هذا السفير مهتميت من شفت السيارة عرفت مستحيل يكون عايش تليفوني يدك شفته مقداد خبرته وكلتله يرجع للبيت يروح يم آيه ودينا .

سيدي ارجع للسيارة الناس تصور اني اهتم بكل شي منكدر نسيطر عليهم وحتى الشرطة طوقت المكان

احس نفسي اني السبب بموته خليني على الاقل اقوم بواجبي وياه

لا سيدي مو انت نعرف منو السبب وحضرتك حذرته بس هو مسمع كلامك

طلعنا الجثة بصعوبة ركبت سيارتي وخليت حميد يروح وياالاسعاف حتى ميخلي احد يصوره خابرت مدير المستشفى حتى ميدخلون الصحافه ولحد مانخلص اجراءات الطب العدلي وناخذه للدفن كومه تليفونات من امي ومن كريم جاوبته عرفت ماخذين آيه للمستشفى كلتله يهتم بيها لحد مااجي بنفسي

مقداد وين موديني مو كلتلك عندي شغل ماكدر اعوفه

دينا ابنج مريض هسة أمج بلغتني علمود هاي جيت اخذج نودي للدكتور مكدرت اكوللها ابوج انقتل بيتهم هوسة الناس جاية ملتمين يمهم وآيه ماخذيها امي وكريم للمستشفى متخربطة امي خافت عبالها عماد بي شي من خابرتني جانت تبجي طمنتها مو هو أبو آيه

مقداد شنو هالسيارات اوكف متحملت نوصل يم باب بيتنا فتحت باب السيارة وركضت ياربي سترك دخلت واني اسمع صوت صياح امي وعماتي واهلنا لحظات وعيوني تدور على أبويه مادري ليش بالذات اجى على بالي اريد اوصل لامي واني احس بالنسوان اللي يبوسوني ويحضنوني كأنما احساسي صح أبويه صاير بي شي بس عقلي ميتقبلها الصبح فطرت وياهم من جبت جهالي يم أمي كلها 5 او 6 ساعات مستحيل غلطانين شفت نانا وهي تدك على راسها وكعت بين النسوان واللي جنت احسه سمعته بأذني ابويه مات .

آيه تسمعيني فتحي عيونج سارا ديربالج عليها خلي اشوف عماد يكدر يجي يمها لو لا

زين منال الله يعينها أبوها والبيبي راحو بنفس اليوم كلش انقهر عليها

متأكدة مجانت تعرف هي حامل خالتي كالت شافت حميد بالتلفزيون ومصيحه عماد مات وكعت جابوها جانت تنزف اني رايحه لغرفتي اذا ردتي شي خابريني

لاتنسين خابري عماد اخاف تكوم وتريده

احس نفسي بصحراء ابويه واكف بجهة وعماد من جهة ثانية اريد اركض اوصل لواحد منهم ماكدر رجليه اباوعله ممربوطة بس ماكدر اتحرك اصرخ وأنادي عليهم احسهم ميسمعون ابويه اختفى انداريت عماد يبين بس صاير بعيد وأسمع صوت همسات بأسمي فتحت عيني سارا واكفه على راسي واني كوة اجر نفسي تعبانه كلش وين اني ايدي مشكلين بيها مغذي وجسمي كلها تأذيني شنو صار عماد تذكرت كوة فتحت حلكي باوعت لسارا وهي تطمني واني ماعرف على شنو كتلها عماد

بعد شوية راح يجي منال راحت تخابره لاتخافين يوم لو يومين تطلعين من اهنا حمدالله على سلامتج اروح اصيح منال تجي تشوفج

ردت احجي راحت وعافتني اريد اكوم مديت ايدي على الجرس جتي الممرضة كتلها تساعدني اكوم واطلع ليش اني لوحدي اهنا وين اهلي لعد اكيد صاير شي بعماد وهي تكذب عليه

ميصير تكومين قبل ساعات فقدتي طفل والدكتورة سوتلج عملية نامي ارتاحي

ياطفل شنو عمليه شيصير اني احلم لو شنو الله عليج ساعديني زوجي بخطر اريد اروحله بجيت يمكن اصلا ميت

ها آيه حمدالله على سلامتج ليش تبجين صدكيني عماد بخير هاج تليفوني احجي وياه حتى تتطمنين

منال شفت بالتلفزيون مكتوب مقتل وحميد جان اهناك يدفع بالناس وراها ماعرف شنو صار وهاي اشرت على الممرضة تكولي فقدتي طفل اني جنت حامل

اهم شي تكومين بالسلامه والطفل بداله عشرة

انطتني التليفون سمعت صوت عماد بجيت وينك انت بخير مابيك شي عماد الله يخليك تعال بسرعه احس نفسي راح اموت حتى البيبي اللي ردته راح عماد شنو هالاصوات والهوسة زين انتظرك قفلت منه كلبي مو مرتاح احس اكو شي مخبين عليه عماد صوته جان حزين وسارا ومنال نظراتهم مال شفقة رجعتلها التليفون ضربوني ابرة حتى ارتاح لان عماد راح يجي متأخر

رجعنا من المقبرة جد آيه كلش متأثر جان يبجي على التراب ويدك على راسه كومته وانطيته مي باوعلي بنظرة اتهام كانه يكولي انت السبب وزيد يبجي بحضن مهند اللي للأسف بهيجي ظروف لازم اتحمله واحجي وياه من خابرتني منال آيه فقدت الطفل روحي طلعت من القهر احس الالم بكلبي مو بيها هي تمنيت اشيل الحزن والالم منها مادري شلون اوصللها الكلام باي طريقة ابوج مات حميد روح قرب السيارة اني رايح للمستشفى ياسر انت ابقى لحد ماارجع مقداد راح يم النسوان يشوف دينا وامها رجعت على بيتنا ملابسي كله تراب ودم خليتها بكيس وكلت للخدامه تحرقها ماريد اشوفها مرة ثانية غسلت ولبست ملابس جديدة ورحت على المستشفى آيه نايمه وجهه أصفر صاير ومبين عليها التعب مسحت بايدي راسها وشعرها بست عيونها وخليت أيدها بأيدي شوية وفتحت عيونها تصيح عماد ياروح وقلب عماد كومي عمري اني يمج

حبيبي احضني اخاف حلم صدك انت يمي هسة شفت شنو صار بيا راح البيبي وين اهلي ماما بابا شلون محد ماكو يمي

راح يجون للبيت من تطلعين مو زين عليج الزيارات حتى لاتتعبين أكثر نامي ارتاحي هسة اني يمج

بعد يومين كملتها بالمستشفى عماد يروح ويجي مشفت غيره وسارا وشهد يمي كمت احضر نفسي دخلت الحمام غسلت وجهي وبدلت ملابسي حتى يجي ياخذني عماد للبيت سمعت الممرضات يحجون

خطية فقدت طفلها وابوها انقتل بنفس اليوم وهي متعرف

اي متعرف وهي قريبة دكتورة منال شفتي زوجها يخبل تمنيت تبقى اكثر حتى نشبع من شوفته

على الاساس هو جان يباوع بوجهج خبله متعرفين هذا منو عماد الجراح السفير كملي اجراءات الخروج وطلعي احلمي على كدج

فتحت الباب باوعولي مصدومين منو ابوها مات جاوبوني بنفس اللحظة عماد فتح الباب همه طلعو بسرعه

حبيبتي جاهزة نطلع جنتي تردين شي من الممرضات

أبويه مات جاوبني لاتغير الموضوع

جانت ترجف لزمتها وخليتها تكعد تدرين اتمنى هسه ميت ولا اكولج هالشي كلش صعب عليه

ليش ليش عماد اللي شفته بالتلفزيون جان ابويه مو واني يومين اهنا ماعرف دفنتو من غير مااشوفى وخر لاتلمسني

انتي جنتي تعبانه ومريضة شلون اكولج هالشي عبالج سهل اصلا ماكدر انطقها

لاتحجي شي لاتبرر اخذني يمه احتمال غلط مو هو ميعوفني يحبني عماد ابويه يحبني ويحب عشق ودينا وجهالها زيد اي زيد جان يوصيني عالفترة عليه امي شتسوي من غيره ليش منو

كافي آيه راح توكعين كعدي ابجي لاتتحركين راح اخذج يمه حتى ترتاحين

وين تاخذني اشوف تراب عماد هسة احس بأحساسك شلون كدرت تتحمل هالشي

آيه ماعرف شعورج لان مات وانتي مشفتي اما اني مات بحضني ملابسي انترست بدمه مكدرت أحجي وياه كلمه ماعدا اخر نظرة رضا شفته بعيونه مادري اني غمضت وفقدت الوعي قبله لو هو راح لربه مسحت دموعي راح نتجاوز هالالم سويا اوعدج

طلعنا من المستشفى عماد شبه حاضني ماكدر امشي وحدي اريد دموعي تنزل ماكو وصلنا شفت المكان مقبرة عائلتنا ركضت على قبره المليان بالزهور مادري كم مرة وكعت وكمت اركض السيارة بعدها مواكفه اني فتحت الباب وركضت عماد ورايه والحماية انتشرو بعيد من عدنا بس اشوف شي أسود ماركز بوجههم

#عاشقة_السفير43

الكاتبةchra kirkuki

أعظم ذنوبي أحبك وأنت سامحني

عن كل ذنبٍ تحملته من أسبابي

يلعن أبو الحب لو الحب مالكني

يلعن أبو الصدق لوهو ساكن أهدابي

وأسألك بالله وش ناوي وريحني ؟

ياأول وآخر وأصدق وأكذب أحبابي

الطريق لبيتنا احسه طويل ميخلص جسمي يرجف عماد حاضني ويسوق بأيد وحدة ويبوس راسي يريدني اهدا ماكدر قبل لانوصل شفت السيارات اللي سادة الشارع كلها من الازدحام صوت القرآن تسمعه من بعيد قبل لاانزل عماد ضغط على أيدي

انا وياج عمري زين خليها ببالج وصيري قوية لخاطر اخوج وامج ولخاطري

الصالة متروسة نسوان كاعدين اول مالفت نظري صورته اللي اني رسمتها اول صورة حتى مجانت حلوة بس بابا كلش حبها وكبرها وعلكها بالصالة حتى يبينلي انه فخور بيا اشكد حاولت انزله وابدله مقبل جان يكول مو مهم طالع حلو لو لا المهم بداخلج انتي ردتي اني اكون اول واحد ترسمينه امي اللي كاعدة وتمسح دموعها من شافتني كامت ويا دينا استقبلوني بالاحضان والبجي امي تمسح على راسي وتبوس وجهي من كل مكان كعدت يمها واني اتذكر طفولتي ويا ابويا وكل ركن من اركان هذا البيت بيها ذكرياتنا صعدت لغرفتي واني ماشوف طريقي من الصداع عمتي وصلتني وكعدت ويايه

الله يرحمه ياريتني رايحه بداله عمت عيوني عليه الله لاينطيهم انشالله

عمه شنو صار بي مافتهم شي

اوف يابعد روحي شكولج عقلي راح يوكف اخويه كل الناس تحلف براسه وطيبت قلبه ناس متخاف الله قتلوه لو تشوفين جسمه كله مزروف من الرصاص الله يعلم اشكد تألم لحد ماطلعت روحه شهيد انشالله

كافي ماريد اسمع شي سديت اذاني اريد حباية راسي راح ينفجر اريد عماد صيحيلي عماد احس عيوني راح تنعمي من الالم

اسم الله عليج حبيبتي هسة اجيبلج وماتصور زوجج يكدر يدخل بين النسوان عيب شيكولون علينا العالم هسة بالليل خلي يجي يمج

تذكرت زيد وينه لازم اشوفه بس ماكدر انزل كوة صعدوني اشكد قرالي قصص اهنا بهالزاوية جان يكعد على الكرسي وهو يقرا واني احلم ويا كل كلمه يكولها جنت دايما اكوله هاي معادة اريد شي جديد وهو يضحك عليه حتى الحليب يشربني بأيده لحد ماخلصت المعهد دللني اهواية دايما جان يشجعني كمت اخذت حبوب من صيدلة حمام غرفة أمي بعدها ريحه ابويه بي حتى السرير والفراش وحتى ملابس النوم مالته مرتبة بمكانه دخلت دينا للغرفة اشرتلها تتقرب نمت بحضنها واحنا الاثنين نتذكر ذكرياتنا

آيه تتذكرين من جنا نسافر ونلعب بالمي جنتي تلبسين ملابس سباحه وماما تحجي عليج وبابا الله يرحمه جان يدافع عنج ويكول عوفيها لخاطري بعدها صغيرة .لو يوم اللي جبتي بيها عشق اوف ياربي اشكد بجى عليج مجان يكدر يسيطر على نفسه

دينا صح جان يحبني ويدللني بس حبه الج يختلف جان يشوفج ابنه الجبير وحزام ظهره معتمد عليج اهواية اما اني طفلته اللي تضحكه وتفرحه

تدرين صعبان عليه زيد اهواية منهار احنا احسن منه على الاقل عدنا حياتنا وجهالنا نرجع ننشغل بس هو بعده بأول طريقه يحتاج بابا

اريد ارجع طفلة دينا ياريت نرجع لأيام زمان ومنعرف للحزن مكان ومنعرف شنو يعني دموع ونخسر اللي نحبهم

حبيبتي آيه الله يعوضج بطفل ثاني بعدج صغيرة نامي ارتاحي اني يمج لاتخافين انتي تعبانه من الحزن نسيناج

مرت شهرين على وفاة أبويه بعدنا بحاله صدمه واني ببيت أهلي يوميا عماد يجي يشوفني ويكعد ويا أمي ويسألنا اذا محتاجين شي لو لا ويروح حاول أكثر من مرة ارجع وياه للبيت واني مقبلت وهو مجان يبقى بالليل يمنا جدي بقى يمنا بحجة زيد حتى غراضه جابه ونقله لبيتنا رغم حسيت امي تضايقت بس محجت شي سكتت عماد جان ببيتنا دخل لغرفتي واني ارتب غراضي

لزمت ايدها واني ابوس اصابيعها حبي اني مضطر أسافر عندي شغل ماكدر اخذ اجازة ليش متجين ويايه وتغيرين جو وناخذ عشق همينه

عماد اني بيا حاله هسة وتحجي على سفره والمفروض تكون ويايه مو تعوفني وتروح

آيه عايف شغلي ومداريج وطلبت ترجعين للبيت مرجعتي ومحجيت شي اختج اسبوع ورجعت لبيتها كلش مشتاقلج المكان محلو بدونج

ماكدر خليني هسة وروح سافر براحتك شوف شغلك اللي اهم مني

براحتج آيه طلعتيني غلطان همينه اريدج تراجعين نفسج شوية تقربت ابوسها بعدت حزت بنفسي حركتها عفتها وطلعت مادري ليش احس كل مايمر يوم آيه تبتعد عني نزلت شفت مهند وياجده كاعدين يشربون قهوة ومخلي رجل على رجل على الاساس هو صاحب البيت سلمت على ام آيه وطلعت بدون مااسلم عليهم قررت اوكفهم عند حدهم ومااسويلهم اعتبار ميستاهلون ناس عقولهم مريضة

شفتي عديم التربية معبرنا وطلع هذا اللي ضيعت بنتج ابوها علموده اني اله بس خلي يجي مرة ثانية الا اربي من جديد

عمي عماد تصرف هيجي من ورا اسلوبكم وموت زوجي هو ماعليه بي لاتخلي هالافكار براس جهالي رجاءا

خالة جدي قصده على عماد انه هو جان يدور على قاتل ابوه وتورط خالي وياه يعني هو السبب

استغفرالله يارب مهند ابني زوجي مات شهيد وانتهينا عن اذنكم اروح اصلي ربي يغفر ذنوبنا

اي روحي هربي من الحقيقة من وراج راح يضيع دم ابني والاخ يجي ويروح براحته واني لازم اسكت مو ربي شلون يغفر ذنوبج وانتي تتسترين على المجرمين اسمعني مهند زيد تكون وياه 24 ساعه متعوفه وحده ماريد يختلط بعماد وابنه

من عيوني ياروح مهند انت اللي فاهم الدنيا صح وبالنسبة للشركه يمتى اروح استلم مكان خالي انت وعدتني مو

خلي نشوف وضع المخبلة فوك شيصير بيها ترجع لعماد لو لا يمتى يجي اليوم اللي اشوف عماد يبوس رجلي يتوسلني أرجعله زوجته واني اطرده مثل الجلب الحقير قاتل ابني الله لاينطي لادنيا ولا اخره

جدو عوف هالموضوع عليه ولايهمك عماد راح اخلي عبرة لغيره نسيت شسويت بي من قبل

لاتكعد تتفلسف براسي غبي جان بيك خير تموته وكتها جنا هسة خلصانين منه وآيه غصبا ماعليها جانت ترضى تبقى وياك يالله مو المهم اللي راح راح هسة نبدي من جديد اريدك تتزوج آيه وتصير ابو هالبيت وتخلف جم جهال حلوين مثلكم يمكن وكتها راح ارتاح

اصلا اني ضربته مال يموت شمدريني حضرة العاشقة تنقذه كافي جدو لاتخليني انجلط باحلامي من الفرحه آيه ترجعلي من جديد وحتى مرتي اللي تزوجتها بسبب امي اطلكها واني الممون

راح تكون ألك انت بس اسمع كلامي وماعليك

كملت شغلي بقيت اسبوعين مسافر خابرت آيه حتى ترجع للبيت مرضت بالبداية عصبت منها مو حالة باقية اهناك وهذا الحقير مهند موجود دايما ببيتهم اخر شي رضت حسبتها مغصوبة ميهم

وصلت للبيت سلمت على ام عماد وكريم اخذت عشق لغرفتها حتى تنام خليت غراضها وكلت للخدامه ترتبها دخلت لغرفتي حسيت نفسي مخنوكه سديت الباب فتحت حقيبتي وطلعت حباية منوم اخذتها وغيرت ملابسي ونمت ماريد انتظر عماد احس نفسي مو مستعدة اواجهة ولا اشوفه

عرفت آيه راجعه للبيت خابرت امي وحجيت وياها راح اوصل بعد ساعه اريد اوصل بسرعه متشوق اشوف آيه اهواية كلما جنت ارجع وادخل للحمام تدخل ويايه وتشرب من المشروب اللي يحضرها اليه الطباخ ومتخليني انام الا واني حاضنها من اكول ايديه تعبت تزعل وترجع تحضني اقوى لو عيونها اللي كلها عشق وغرام مجرد مااخلي عيني بعينها بدون ماتحجي تعبر بيها اتمنى اول ماادخل للبيت اشوف عيونها وصلت واني كلي احلام دخلت لغرفة امي سلمت عليها وبست ايدها وراسها ونفس الشي كريم حضنته وهو صاير رجال ضربته بالمخدة حتى يكوم

دادي اني كريم آيه بغرفتك منتظرة لاتضيع وقت لاتكون نايمه وتروح عليك هالليلة

اسكت بعدك صغير منين تجيب هالحجي عيب ارجع نام صوجي صحيتك خربت شعره وجريته كلش يضوج مثلي من آيه تجر شعري وتخربه اعض ايدها وترجع تشده من جديد تريد عض نام حبيبي حبيت اشوفك قبل لا انام لان احتمال ماطلع من غرفتي اسبوع مرحت يم عشق خفت لاتكوم واتورط وياها دخلت لغرفتنا سديت الباب نايمه وميبين منها شي اول مرة تنام هيجي دايما اللحاف واكع نصه بالارض نزعت الساعه والجاكيت خليتهم بمكانهم طلعت بيجاما حرير دخلت للحمام خابرت المطبخ يسوولي عصير طلعت واني انشف شعري تقربت منها نايمه شلون مسمعتني طول هالوقت سمعت صوت الباب لبست الروب واخذت العصير من ايد الخدامه خليتها يمي كعدت اباوع على آيه متحملت اكثر تقربت منها وخليتها بحضني وبقيت اتأملها

احس بلمسات على شعري فتحت عيوني وجهي على صدر عماد فزيت كعدت تقرب مني وهو يبوس ركبتي

منمت طول الليل حبيت اشوفج من تفتحين عيونج باوعيلي مشتاقلج

بعدت ايده بدون ماباوع بوجهه حمدالله على سلامتك كمت اروح للحمام جرني من ايدي

شنو هالحركات آيه

ياحركات عماد متشوف حالتي اني بيا وضع وانت بيا وضع ليش متقدر نفسيتي تدور على رغباتك على حسابي

شنو هالاسلوب الرخيص اللي تحجين بيها طلبت منج تباوعيلي خليتج بحضني غير هالشي متجاوزت عليج اوكفي احجي وياج

بعد صيح عليه واصرخ سمع العالم كلها هذا انت عماد من تغلط تقلب السالفة على الشخص المقابل

عفت ايدها لبست ملابسي طلعت من الغرفة اذا بقيت يمها اكثر راح اتخبل عشق اول ماشافتني ركضت لحضني شلتها ونزلنا حتى نتغدا امي وكريم كاعدين ينتظرونه كعدت احجي وياهم شوية نزلت آيه همينه مباوعت عليها عشق راحت يمها صرفتها تروح تلعب بالحديقة جاوبتها يا حديقة هسة وكت اكل لو هاي هم ناسيتها

معلقت على كلامه شفت الاكل ضجت مادري ليش طلعت قهري من عماد على الخدامه شمسوية ليش متسألون قبل لو الاكل هم بكيفكم صاير

اكو بشر كاعد ياكل لاتصرخين عليها احجي بطريقة حلوة وهذا اكلنا من زمان شنو تغير

شبعت عن اذنكم كمت واني اغلي

ردت اكوم وراها واجرها من شعرها تحتاج تأديب أمي لزمت ايدي

لخاطري ابني أكعد خليها مجروحه متدري شتكول وشنو تحجي الله يعينها ويصبرها

كل هذا على عيني بس تتجاوز واني كاعد هاي مااسمحلها بي لايكون تتجاوز عليج همينه وتسكتيلها

لا والله ابني كلش تحبني وتحترمني وحتى لو عصبت اني مقدرة واسكت كافي الجهال كاعدين

لا ماما هالشي مستحيل يصير اكص لسانها اذا سوتها كعدت بالمكتب اكمل شغلي شفتها تريد تطلع من البيت خابرت الحارس يقفل الباب الرئيسي خلي اشوف شلون راح تروح من غير أذني مرت ربع ساعه ودخلت للمكتب

شنو هالتصرفات يعني تحبسني بالبيت اريد اروح اشوف امي

طلعي برا ومن تعرفين تحجين وتحترمين نفسج تعالي طلبي اللي ترديه وهسة روحي لغرفتج لحد ماتتأدبين ماكو طلعه من البيت

لاتعاندني عماد اني بايعتها ترى راح اطلع متكدر تحبسني

شنو كلتي عيدي مسمعت زين لاخر مرة اكولج روحي من وجهي

راح اروح صدكني وماارجع لاعبالك ابويا مات يعني ماعندي ظهر وتريد تكسرني

جريتها ودخلتها سديت الباب شنو صايرلج ماعرف انتي منو وينها آيه اللي خلتني امشي وراها وانسى نفسي شبيج ويايه

اتوسل بيك عماد عوفني اطلع راح اختنك اذا تحبني خليني اروح

ماشي آيه اذا هالشي يريحج روحي ارتاحي بالليل اني راح اجي بنفسي ارجعج وراح نطلع نغير جو

زين انتظرك تقربت منه وبسته سامحني عماد مو بيدي

ماعرف ليش هيجي يصير بيا

عمري مازعل منج زعلان عليج مسحي هالدموع الحلوة وكلشي راح ينحل الله لايحرمني منج هاي بوستج تسوى عندي الدنيا كلها ولو من البارحه تلعبين بأعصابي بس خلص راح انسى

طلعت من البيت واني ببالي كومه اشياء اسويها اولها اغير بشكلي وبعدين ألزم مكان ابويه بالشركه واكمل مشواره رغم اعرف راح ادفع ثمن هالشي غالي بس راح ادوس على نفسي .

متابعاتي العزيزات رجاءا تصويت بنجمه وتاك لصديقاتكم اذا تحبون الرواية خلوها توصل للمراتب الاولى

#عاشقة_السفير44

الكاتبةchra kirkuki

حزن يغتالني

وهم يقتلني

وظلم حبيب يعذبني

آه.. ما هذه الحياة

التي كلّها آلام لا تنتهي

وجروح لا تنبري

ودموع من العيون تجري

جرحت خدي

أرقت مضجعي

وسلبت نومي

آه يا قلبي

يا لك من صبور

على الحبيب لا تجور

رغم ظلمه الكثير

وجرحه الكبير

الذي لا يندمل ولا يزول

ما زلت تحبه

رغم كل الشرور ما زلت تعشقه

رغم الجور والفجور

ما زلت تحن إليه

رغم ما فيه من غرور

قلبي.. ويحك قلبي

إلى متى.. إلى متى؟؟

اخبرني بالله عليك إلى متى؟؟

هذا الصبر

وهذا الجلد والتحمل

إلى متى هذا السهر والتأمل؟

إلى متى هذه المعاناة والتذلل؟

كف عن هذا كف

فاكره كما كرهت

واهجر ما هجرت

وعذب كما عذبت

واظلم كما ظلمت

واجرح كما جرحت

فلقد عانيت كثيراً.

افتهمت يازيد اللي كتلك عليه عماد هو قتل ابوك لازم نحاول نحمي اختك منه مثل ماتعرف هي مراح تصدك هو ميحبها راح يموتها

لا عماد يحبنا اهواية ماعرف جدو اني احس بضياع

زيد حبيبي تعرف ليش اشتريتلك سيارة لان انت كبرت ولازم تحمي خواتك وتكون بمكان ابوك

بس

بدون بس انت رجال البيت هسة وكلمتك لازم هي اللي تمشي ماعليك من حجي امك وخواتك همه يريدوك تكون ضعيف الشخصية تشوف هالمكان كله راح تصير ملكك واني بنفسي اخليك الكل بالكل راح أكمل مشوار ابوك ومهند يساعدنا

زين جدو اللي تشوفه اني لازم اصير مثل ماابويه راد واكون مدير هالشركه من بعده

عفية يازيد هسة كبرت بعيني اهم شي آيه لاتنسى

أخذت اوراق من غرفة أبويا ورحت للشركة أستلم مكانه شفت جدي ومهند اهناك منتبهت على زيد سلمت وكعدت جدو اكدر اعرف شنو يصير أهنا

مو عيب تحجين هيجي وياجدج آيه العتب مو عليج على امج هذا مكاني لحد مااخوج يكبر ويستلم الشغل بنفسه

اني متربية ومكلت شي محلو سئلتكم سؤال اشرلي اباوع وراية انداريت شفت زيد كاعد انت شتسوي ليش مو بالمدرسة

على كيفج وياه هو مو صغير اليوم اخذ اجازة حتى يشوف مكانه بالمستقبل ويصير عنده طموح مو زيد

اي صح جدو آيه اريد احجي وياج شوية

كوم روح اكعد بغرفة السكرتيرة زيد اريد احجي وياجدو ومن نرجع للبيت نحجي براحتنا شفته راح اي نرجع لموضوعنا هذا المكان اني استلمه ومن يكبر اخويه هو يجي يكعد عليه وبالنسبة لمهند ماحتاجه خليك بعيد عنا

لحظة ياخاتون على كيفج ويانا مهند اكثر واحد يعرف بشغل ابوج وانتي زوجج المصون يخليج تداومين لو خليني ساكت احسن

لا ليش تسكت كول اللي تريده وماعليكم من زوجي اني وهو نتفاهم

مهند شوفها الموبايل الخاتونه نايمه ورجلها بالشمس

هذا موبايل ابويه شنو جابه يمكم منين جبته مو على الاساس ضاعت

لكيناها مو مهم شلون المهم شوفي اخر مكالمه من منو

باوعت رقم عماد شنو تقصد

متفهمين لو تغشمين نفسج زوجج جان يهدد ابوج وقبل لا يقتله خابره رحنا للشركه حتى نسمع التسجيلات ماكو يعني شنو

وكعت الموبايل من ايدي من الصدمه تذكرت قبل لايموت دايما يحجي ويا عماد ونسمع صوت صياحهم بس مستحيل عماد يسويها

لاتبجين آيه اعرف صعب عليج تفكرين زوجج يكون قاتل ابوج شوفي هالملف قبل اسبوع الشركه جان عدها نقل بضاعه شركه عماد مخلوها توصل للسوق اضطرينا نبيعها بارخص سعر حتى وهو ميت ميرتاح

وبعدين ليش اول واحد وصل لمكان الحادث هو عماد وجان وحده ويا حميد وشايل سلاح هاي الصور اللي التقطها كاميرات الصحافه مبين عماد مسلح ركزي زين بيها

احاول اكذب اللي اشوفه واسمعه بس ماكدر

اذا مو مصدكه كل هالادلة دوري ببيتكم راح تلكين اوراق متهمين بيها ناس شرفاء عماد يريد يكسر بيهم ترى هو يستغل منصبه لشغلات تصفية حساب وينتقم لأبوه عماد بالشغل يختلف عن اللي تعرفيه بالبيت ماعندي شي اكوله بس الله يعينج

مادري شلون كمت من مكاني وطلعت حتى نسيت زيد عفت سيارتي ورجعت بتكسي واني بس ابجي وصلت لبيت اهلي ودخلت لغرفتي وقفلت الباب جنت احجي بيني وبين نفسي عماد ميسويها عماد يحبني عماد مو قاتل مادري نمت فقدت الوعي صحيت الدنيا ليل موبايلي يدك جان عماد كوة سيطرت على روحي وجاوبته

شبيج آيه جنتي تبجين وين جنتي الصبح

لا ماكو شي بس اشتاقيت لبابا نمت محسيت بنفسي جنت ببيت أهلي مطلعت بس مكدرت ارجع للبيت ماريد عشق تشوفني واني بهالحالة

بيا ولا بيج حبيبتي اسبوع واني يمج ميخالف عشق يم امي وهي تهتم بيها اي احجيلي شنو صاير بالشركه

عماد انت تراقبني مو وصلت بيك لهالمرحلة

اكيد اراقبج من تتصرفين بكيفج ومتستأذنين مني اضطر أحميج من بعيد

تحميني من شنو منك مثلا والله عيب عليك

احجي بأدب مرة ثانية لاتكذبين عليه على شنو ناوية انتي لوين تردين توصلين

للمكان اللي انت وصلتله اريد انتقم مثلك واصير مثلك

راح تخسرين نفسج ومتوصلين لشي عيشي حياتج الله ينتقم منهم

وانت شنو خسرت متكولي بالعكس لعبتها صح وصلت للي تريده بسهولة

ماعرف شنو تحجين وتخبصين بكيفج من ارجع نتفاهم روحه للشركه ماكو ومهند موجود بيها اخر تحذير الج

مو كاعدة احجي وياج وين بنتج ايام وانتي اهنا طالعه راجعه بكيفج

ماما متشوفيني اشتغل ومشغولة هي بالبيت ويا جدتها

الله يصبرني وحدة مخبلة واحد صاير بلا تربية شسويت بحياتي هيجي يصير بيا وينك توفيق تشوف ابنك وبنتك شيسوون من بعدك

نزعت مناظري باوعتلها من الأخير كولي شتريدين مني

ادبسز جاوبي بأدب زوجج ميعرف انتي شتسوين ومشغولة بشنو بس يرجع اذا مخليته يربيج فلا اني سهيلة

اني اشتغل بمكان بابا ممسوية شي غلط بدل ماتشكريني تحجين عليه محد يكدر يلمس شعره مني

تشتغلين من وراه طلعات وطبات ويا مهند نسيتي اللي سوا بيج

مو لوحدي ويانا جدو مجبورة اكون وياه حتى اعرف كل صغيرة وكبيرة واخذ معلومات أكثر لاتخافين عليه مراقبني ممقصر

خابري الصايع اخوج ميجاوبني شوفي يمتى حضرته ناوي يرجع للبيت

ماما هو مراهق وهسة بحالة صدمه ليش يوميا تتعاركين وياه

اشوفه يدخن كدامي واسكت وجدج مشتريله سيارة وهو ممكل 15 سنه مسوي رجال البيت وهو ميعرف كل شي بالدنيا لحد العام جان يلعب بالشارع اخوج يضيع وجدج السبب

لا اني مضايع وجدو ماعليه ليش تحجبن هيجي السبب بزوج بنتج اللي خلاني اصير هيجي يتيم شوفي آيه زوجج وين مسافر ويا أبنه واني حتى ابويه حرمني منه المفروض اني هم مثل كريم اسافر

اخيرا رجعت سيد زيد ابني شنو هالحجي عيب عليك بس هذا جان ناقصني يسممون عقلك

اريد افهم انتي ليش مو مصدكه عماد هو السبب آيه احجيلها اخر مكالمه من تليفون بابا منو جان

زيد اسكت مو وكتها كلتلك راح اشوف الموضوع بنفسي

تريدين تسكتيني حتى انسى السالفة واضطر اتقبل الموضوع

يالله انطيني القوة والصبر الله ياخذكم من جهال انتو شنو منين جبت هالحجي وانتي لايكون مصدكه اكاذيب جدج على عماد سمعيني اذا رجع ترجعين لبيتج رجلج اكسرها اذا فكرتي تعوفين بيتج

ماما آيه مراح ترجع لعماد هي وعدتني مو آيه متبيعيني مثل دينا

زيد كافي روح لغرفتك اسمع كلامي

عفية عليج راح تبجين دم وتندمين اذكرج بهاليوم صيري زمالة هسة وامشي ورا جدج ومهند نهايتج مبينه خلي اروح لغرفتي قبل لاأنجلط

جمعت غراضي لازم ارجع للبيت عماد راح يوصل الليلة من السفر حضنت عشق وبستها لعبت وياها شوية حتى لاتشوف عماد وتشتكيني يمه مخليتها تنام غيرت ملابسي وملابسها حتى ننتظر سويا ردت اروح للمكتب الباب مقفل اكيد ماخذه وياه وصل شفت عشق شلون متعلقة بي وتبوسه وتكمز على كريم حسيت اني مو مهم يمهم سلمت عليهم وصعدت لغرفتنا حضرتله الحمام آيه لازم تكشفين الحقيقة ميصير تبقين بهالشكل معلقة دخل للغرفة حضنته وهو بادلني بالحضن

حسيت آيه مو طبيعية عبالك تمثل كانه مو هي اللي قبل ايام تلخبط بالحجي هسة تدور راحتي تحضني وتبوسني لعبت بشعرها

عماد مو ناوي تنام تأخر الوقت اهواية وانت جاي من السفر

اني ماتعب من تكونين بحضني بالعكس ارتاح باجر نطلع نروح للمزرعه وحدنا شتكولين

اكيد موافقة حبيبي سويت نفسي نايمه هو هم نام كمت من حضنه وغيرت لبسي بهدوء نزلت الباب مفتوح قبل لانصعد شفته دخل وبيده حقيبته شغلت الاضوية وبقيت ادور الخزنه مقفله وين ادور المجرات مابيها غير غراض واوراق فارغه شفت ملف جريته خله ايده على ايدي فزيت شوية واموت من الخوف

اخذي وشوفي شنو بي يفيدج لو لا

أي ايدي راح تكسره عماد انت توجعني

ياريت اكدر اوجعج أكثر ياريت تدرين من اول ماوصلت حسيتج مو طبيعيه سويت نفسي مصدكج وكملت وياج لعبتج الغبية وسويت نفسي نايم جنت اتمنى بداخلي اطلع غلطان بس مع الأسف احساسي ابد ميخيب

عماد اريد اعرف انت الك ايد بموت بابا لو لا

ماشالله اتهام بشكل محترم تدرين شنو ابقي اهنا لحد الصبح دوري على الادلة جدج اتهمني معبرته بس وصلت انتي بنفسج تتهميني لهنا وكافي روحي اشتكي عليا شنو منتظرة

كلشي ضدك عماد

راح اخليج تبقين بهالبيت مجرد أم لعشق افتهمتي لحد ماتجين وتعتذرين مني وتطلعين من البيت وحدج ماكو تشتاقين لأمج اخلي الحراس يجيبوها يمج

واني ماريد ابقى اهنا اصلا ميحتاج تتشرط عليا طلقني عماد اني وانت طريقنا اختلف

ردت اطلع واعوفها من كالت طلقني حسيت كلبي شوية ويوكف من الكلمه اللي كالتها متعرف شنو معناه انداريت عليها حسبي جم حايط موجود بهالبيت ضربي راسج بيها طلاق ماكو أفتهمتي طريقنا واحد واني احدد مسارها .

بقيت بالبيت أسابيع هو يحجي قليل ويايه دخلت للمرسم كعدت ارسم كل يوم ارسم جزء ونفسيتي تتعب كملتها من بشاعتها مكدرت الزم نفسي ملخت روحي اذا الصورة هيجي لعد بالحقيقة شلون جانت بابا شلون تحملت الالم حركت المرسم كسرت كل الفرش والالوان واني اباوع على المشهد اللي رسمتها والنار داير مدايري

ست آيه ارجوج طلعي بسرعه لاتنحركين اني ماكدر اجي واطلعج تسمعيني

روح حميد الله ياخذكم كلكم خلوني بحالي انت بالذات لاتقترب مني ياوسخ

آيه لخاطري طلعي عشق ميته خوف عليج مفاد وياها عبالك متسمعنا دخلت لان حميد ميكدر يدخل يشيلها علمود بابا طلعتها غصب المكان بلحظات صارت خرابه شربتها مي وغسلت وجهها مصار شي كافي لاتبجين

كريم عوفني أروح يم ابويا اريد ارتاح اتوسل بيك رجعني لهناك لازم اموت حتى عماد وعشق يرتاحون .

#عاشقة_السفير45

الكاتبةchra kirkuki

كثيرا ما افكر لماذا عاقبتنى بالفراق

هل كان القلب قاسيا ليكون الهجر قدرى

ام انى كنت مظلوما فى بحر الحب وحدى

ايجب ان اموت فى غيابك كل يوم اختناقا

حتى تدرك انك هوائى الذى اتنفسه.

انتقلت لبيت اهلي اخذت عشق ويايه اتفقت ويا عماد من هو موجود تروح يمه ومن يسافر تصير يمي قبل لا اطلع من الغرفة وكف كدامي وطلب مني لأخر مرة مااستعجل بقراري ردت استسلم بس تذكرت زيد راح يضيع أكثر اذا حس اني خذلته باشرت شغلي بالشركه مكدرت اسيطر عليه واجهت اهواية مشاكل احاول احلها حتى ميأثر على الميزانية ويضيع الاول والتالي طلبت من مهند ياخذني للمخازن لازم اشوفها بنفسي ماكدر اعتمد على مهند بشكل كامل طلعنا بسيارتي

والله عيب هسة العمال شيكولون عليه كاعد يمج وانتي تسوقين

ميهمني اللي يكولو اليهم نتجاوز هالمحنه ونخلص صعب اشوف تعب بابا كدامي يختفي

آيه احجي ويا عماد حتى يساعدج همه شركتم ألها مكانه بالسوق راح نستفاد منهم اهواية

مهند انت تضحك على نفسك لو عليه بيا عين اكوله ساعدني رجاءا لاتدخل شغلي ويا عماد

مادري ليش احسج بعدج مو واثقة بيا رغم بينت حسن نيتي وياج اكثر من مرة آيه انتي اختي واني احب اساعدج ماعندي غير قصد وياج

ماريد احجي بالماضي خلينا بهسة ماكدر اعتبرك اخويا وصلنا للمخازن الشغل مبين خربطة وهوسة والبضاعه التلفانه ريحتها تخنك شنو اللي اشوفه مهند كومه فلوس وعمال اصرفهم كل شهر على هالمزبلة صدك جذب انت المسؤول على هالشي باسرع وقت ترتب هالمكان

آيه من نكون وحدنا احجي عليا براحتج بس مو كدام العمال محلوة بحقي واني مجرد اساعدج ماشتغل يمج

رجعنا بالطريق سيارة وكفت كدامنا مادري من يامكان طلعتلي من الهبطة أخذت بريك قوي شوية وراسنا تطلع من الجام رأسا طفيت السيارة

منو هالغبي شلون يكسر علينا لاتنزلين آيه شغلي السيارة خلي نرجع اخاف عصابة ولا شي

شفت عماد نزل من السيارة جان لازم اعرف هالسيارة المضلله والسودة اكيد هو مو غيره ياربي شنو هالورطة شيسوي بينا فتح الباب يم مهند لحظة واختفى احس صوتي ميطلع من الرجفه والخوف

نزلي شنو منتظرة لو تردين انزلج مثل مهند

بلا فضايح روح لايمر احد منا شيكول علينا جنا بالمخزن والله

انتي تدورين على الفضيحه من جوا الكاع نزلي بسرعه وجيبي حقيبتج انتظرج بالسيارة

و

شنو تسألين على شي يمكن قصدج الحشرة اللي نزلتها هسة من سيارتج لاتخافين عليه راح يرجعلكم بالليل

مادري شلون وصلت لسيارته حميد نزل منها وراح ركب سيارتي مكدرت اندار واباوع شيصير يارب سترك شفته ركب وشغل السيارة السرعه اللي يمشي بيها يجلط الواحد من الخوف وين ماخذني

تحجين ويايه باوعتلها من جوا لفوك

رحت للمخزن حتى اشوف البضاعه بس كلشي مخربط

مسألتج وين جنتي اللي يهمني أنتي مرتبطة بأسمي أدنى حركه سمعتي تروح بيها

عيب عليك انت متعرفني شلون تحجي هيجي وين ماخذني هذا طريق المزرعه ديربالك تفكر ترجعني غصب

لخاطر الله سكتي من كل عقلج بعد اللي سويتي افكر بيج لزمتها من ايدها ونزلتها دخلتها جوا راح تبقين اهنا باجر اجي ارجعج الليلة كعدي راجعي نفسج وشوفي اخطائج وين وصلتج

لا عماد ابوس ايدك راح اتخبل وحدي بهالمكان لاتسويها اتوسل بيك سمعت صوت الجلاب صحت من مكاني يمه شنو هذا مو مربوطين يفترون بالحديقة

ليش خايفة من صوتهم وانتي عايشة بين حيوانات المفروض تعودتي راح اكون بالغرفة الثانية وماريد اشوف وجهج منا لحد مايطلع الصبح دبري نفسج اذا جعتي وخري من طريقي هسة طلعت وعفتها شفت سيارتها وحميد نزل مهند أخذته منه هالمرة شتريد اسوي بيك انت بايع روحك لازم

لا والله عماد ماكو شي صدكني ابوس رجلك فاهم الموضوع غلط مجرد اساعدها واصلا اني متزوج ومابدل زوجتي بالدنيا وصرت اب وآيه مجرد اخت لا اكثر

أنت متفهم بالكلام كل مرة تتوسل وتبجي حتى أعوفك ومن تروح تلعب بذيلك حميد أخذه للمخزن وانطيله اكل وشرب باجر اريده مصحصح لان من زمان ملاعب ملاكمه وانت صاير سمين فلوس الحرام مبينه عليك رجعت للداخل فتحت الباب شفتها كاعدة كومي ارجعج لبيتكم اتصور هالساعتين كافي عليج

ماما كل هذا يصير واني اخر من يعلم ليش كلما اخابركم تكولين كلشي تمام

شكولج دينا وانتي اصلا ماخذة ابنج يتعالج ازيد همج بدل مانواسيج ونوكف وياج

وآيه وعماد ماصدك من البارحه وصلت عقلي راح يوكف سمعت سوالف أختي من شهد ليش سمحتيلها هيجي تسوي بنفسها شنو انتقام وشنو عماد قتل ابونا

هاي سوالف جدج الله لايسامحه خرب البنية والولد لو تشوفين زيد وسوالفه الحمدالله رجعتيلي شوية اموت من وراهم اختج تاخذ حبوب منوم ومهدئات خايفة تصير مدمنه

عوفي زيد عليه والله لربي من جديد بكيفه يتصرف مسوي نفسه رجال والست خاتون يمتى تشرف ترجع للبيت الدنيا مغرب متفكر ببنتها عايفتها وحدها والله لو عماد يعرف بنته شلون عايشة يمسح بيها الكاع

المصيبة اليوم اخوج ضاربها خليت على وجهه كريم كوة نومتها خابرتها متجاوبني وخابرت الشركه كالولي من الظهر طالعه ويا مهند

وصلت للبيت طول الطريق محجينا شي جان يخابر بالتليفون شفت دينا يمنا سلمت عليها مبين عليها ناوية على نية يمتى وصلتي ليش منطيتينا خبر

وشنو يفرق عندج اذا انتي متهتمين لبنتج تهتمين لأختج اللي ابنها مريض مكلفتي نفسج تسافرين وتزوريني مرة لو الشركه اهم من كل شي

وصلتي وبديتي عتابج اني ماكدر اسافر عندي ظروف

سمعيني زين تعوذي من الشيطان ورجعي ويايه لبيتج كافي اللي سويتي كل هالفترة ترى عماد مستحملج لان يحبج لاتزيدين السوالف والحركات اذا يزعل تعرفينه اكثر مني منو انتي تنتقمين لموت بابا عايشة بجو الافلام

ماعليج مني خليج ويا زوجج ولاتدخلين بخصوصيات غيرج جان المفروض انتي تعوفين كل شي وتشوفين حال بيتنا ورا بابا اخوج منهار والشركه مكلوبة صح مجنتي مسافرة تتونسين بس لازم يصير عندج موقف مقداد مو اغلى من ابوج واخوج شوفي حالة زيد وانتي تعرفين ليش هيجي سويت

احجي زين ياحيوانه هاي اختج اكبر منج وتريد مصلحتج روحي شوفي بنتج الله يستر وعماد ميجي ياخذها والله لو يموتج ماعليه بيج

خليها ماما تحجي اللي تريده تردين اعوف زوجي وبيتي علمود شنو مجرد حجي ودلائل سخيفة من اختراع جدج لو مهند نسيتي ايام اللي عشتي وياه

هاهية بكيفي انتي لاتدخلين اروح اشوف بنتي احسن شفتها نايمه وجها كله خدوش وايدها بيها اثار عض نزلت ماما منو مسوي هيجي بعشق

أخوج اللي عفتي بيتج علموده روحي احجي وياه شوفي ليش

دينا بنتي عوفيها مو تكول خلوني براحتي وحياتي حرة بيها هاي حياتج شبعي بيها

مع الاسف عليكم انتو شلون اهل ماما لو عماد يشوفها بهالشكل راح يحرمني منها

والله ياريت يحرمج منها حتى تعرفين شنو معنى الامومه اللي ناسيتها

صعدت لغرفة زيد كاعد يحجي بالتليفون ولا كأنه مسوي شي لزمته من قميصه اول واخر مرة تلمس عشق افتهمت اني ضيعت نفسي علمودك وانت هيجي تسوي بيا

آيه عشق ماريد اشوفها بهالبيت والله اذبحها راح اموتها مثل ماابوها موت ابويه

تخبلت عشق بنتي تريدني اتخلى عنها تهددني همينه ياربي شحجي ويا هذا ميفهم شي كعدت وياه حبيبي لخاطري لاتسوي بيها شي ماعندي غيرها حتى بابا جان كلش يحبها

خليها تروح يم ابوها ماكدر اوعدج بشي كلما اشوفها اتمنى اخنكها اريدج انتي ودينا وماما نرجع نعيش سويا مثل قبل بلكي الله يشوفنا متجمعين يرجع بابا نروح نسافر لبعيد وراح اسمع كلامكم واصير زين اني احبج آيه لاتتخلين عني

طلعت من يمه واني امشي كوة خابرت زينه ماعندي احد اشكيله همي غيرها هي الوحيدة تسمعني حتى اختي واكفه ضدي راح اموت زينه مادري شسوي اخويه بجهة عشق بجهة وعماد اخ منه جنت وياه ميفصل بيناتنا شبر وماكدر المسه

آيه رحمي نفسج حبيبتي اتمنى اشوفج مثل قبل وينها آيه اللي جانت تضحك وتضحك اللي حواليها وينها آيه اللي متحب غير الفرح ليش هيجي صرتي فاتحه حضنج للالم والدموع

زينه لحظة اشوف موبايلي جاني رسالة فتحتها مو وكتها لا لا

آيه جاوبيني انتي بخير لاتخوفيني عليج شنو صاير

عماد دازلي صورة اني واكعة عليه وايدي على جرحه وجهي صايرة على جهة قلبه صورة الحادث لما حاول مهند يقتله ماتحمل بعد زينه اني لازم اموت حتى الكل يرتاح

آيه لاتصيرين مخبله فكري بعشق محتاجتلج ياربي متجاوبني خابرت أمها حتى تروح تشوفها

جنت كاعد لوحدي اباوع على صورنا اني وآيه كل صورة بيها ذكرى وكومه أشياء وتفاصيل كاتبتها خلفها آيه تذكرت عندي صورة كلش عزيزة عليه فتحت تليفوني من زمان قافلها لكيتها ودزيتلها بلكي من تشوفها ترجع لعقلها خابرتني أمها وطلبت مني اروحلهم للبيت خفت لان صوتها مجان يطمن سألتها عمها موجود لو لا ماريد اشوفه وصلت صعدتني لغرفة آيه الغراض مكسورة كلها وهي نايمه مو حاسة بالدنيا علب حبوب منتشرة بالمكان شبيها آيه عشق وين

لاتخاف ابني عشق نايمه بغرفتي خابرتك علمود آيه راح تروح من ايدينا عماد سوي شي لخاطري اعرف آيه زودتها وياك بس اني ام ماكدر اشوفها بهالشكل متنام الا تاخذ حبوب الله يلعن اللي جان السبب بيناتكم

راح ابقى يمها ولايهمج أني اخاف عليها اكثر من روحي لاتوصيني عليها اخذي راحتج انتي نمت بصفها خليتها بحضني ليش هيجي صرتي كل ماتغلطين احاول الكيلج عذر خايف لايجي يوم ويخلص الاعذار ونوصل لباب مسدود اتمنى بهاللحظة ارجع لاول مرة شفتج اشكد جنتي جريئة ويايه وعاندتيني خليتيني امشي وياج واصير مثلج خليتي الحب بدربي وصلتيني لسما وبديتي تنزليني لسابع الارض .

لو فيي رجع بايدي الوقت لنو شويي

نفس المكان ونفس هالغنية

وانت وانا كنا باول يوم

مشتاقة كانت عينيك وكلها حنية

تضحك الي والعمر يركض ليي

وبعيد كان بعيد يوم اللوم

وين راحوا لفتاتك الملياني حب وغيري

شو ال غيرك وال كبرك يازغيري

شو ال علمك عالبعد والاحزان

ماارتاحوا عيوني انا من يوم صرت بعيدة

ولاعاد غيرك ايد تمسك ايدي

ولاعاد يذكر حبنا النسيان

لو فيي رجع بايدي العمر لنو مرة

وترجع الي بالليل هاك الغمرة

سكر عليك الوقت غل ونام

لو فيي رد الحكي وقت اللي كنت تقولي

بحبك انا وعيونك يغنولي

احلى قصيدة ورجع الايام

عاشقة_السفير46

الكاتبة chra kirkuki

مزقنى كتمان قهر حبى و تعبت اعاند كل حسادى

ولا ودّي أحد يدري عن حياتي وش جرى فيها

أنا في يوم حبّيتك أحسّه يوم ميلادي

قصايد قلتها لأجلك كتبتك في قوافيها

إذا مات الأمل فيني يظل الشوق بفؤادي

وتبقى لي حروف اسمك قصيدة دوم أغنّيها

حميد اذا تحب عماد لازم تساعدني حتى نكدر احنا الأثنين نساعده سويا انت تعرف كل شي شنو سويتو بمهند

أستاذ مقداد مسوينا بي شي غير جرة اذن بسيطة ولو هو يستاهل الموت

اسبوع جان بالمستشفى تكول جرة أذن انت شلون تسمح لعماد هيجي يسوي

اني مجرد حارس احميه ماكدر اعارضه لو اكوله شتسوي وماتسوي ومهند بس يفتح حلكه اكص لسانه

أني ويا منو احجي هسة عرفت عماد ليش متعلق بيك بهالشكل بيك شبه منه روح حميد انت وعماد محد يفهم عليكم غير نفسكم دخلت للمكتب دورت بين الاوراق ماكو شي على شنو ناوي عماد مو كافي اللي صار ناوي تدمر شنو بعد بيك هاحبيبتي تردين شي

راح اروح يم اهلي كلت انطيك خبر مقداد لازم نرجع آيه وعماد لبعض اكيد اكو شي ماكدر اوكف واتفرج عليها وهي تضيع

عماد هسة مشغول ينقل اوراق كريم للخارج علمود دراسته اعرف مو مرتاح وساكت حتى أمي ميته قهر عليه خابرت صديقي علمود سالفة الاتصال فعلا السجل بيها تليفونات من عماد بس التسجيل الصوتي ممسوح اكو واحد جبير ورا هالموضوع وعماد يدور عليه اني متأكد

خوفتني مقداد يعني شنو منرتاح احتمال عماد هم يصير بي شي استر يارب لحد يمتى نتحمل هالوضع

عماد ميسفر كريم وهو بأخر مرحلة من دراسته لأوروبا من الصبح ادور على ورقة ملف يفهمني السالفة ملكيت شي وحميد كالعادة يسوي نفسه ميعرف شي

كملت الاجتماع بقيت وحدي احس بدوخه وراسي توجعني اهواية تذكرت من تعبت كعدت بعد الظهر شميت ريحه عطر بالغرفة بقيت اشم الفراش اي هذا مال عماد شجابه بفراشي معقولة جان نايم يمي حسيت بنشاط مو طبيعي ولو جو وشكل الغرفة ميساعد على شي نزلت سئلت امي كالت لا ماكو هيجي انتي تحلمين حسيت لهفتي انكسرت شفت جدي دخل وبيده اوراق رماها على الميز كدامي

شوفي غبائج لوين وصلنا اني اعرف نهاية هالشركه راح تكون على أيدج

شنو صاير هالاوراق شبي

طبعا متعرفين شي خسرنا المشروع اللي قدمنا عليه خلي عماد افندي يفيدج بعد شهرين اذا هالشركة متعلن افلاسها اني ماعرف شي بالدنيا

اني ماتذكرت قدمت على مشروع اصلا بس الاوراق عليها توقيعي لعد مهند وين

مهند اليوم يفك الجبس عن رجله راح للمستشفى يعني شنو مزور مو توقيعج اذا متكدرين تسيطرين على عواطفج كدام عدوج انسحبي احسن لاتضيعينا وراج

مهند لحد الان معرف منو ضربه بسيارة صار اشكد على هالموضوع

ياسيارة عماد ضاربه هو محب يحجيلج غير السالفة حتى لاتنقهرين بنتي احنا اهلج مهمتنا نحميج ونحافظ عليج عماد مجرد وحش دموي لابس ثوب الملاك

شنو الحل هسة ترى اني دخت اصلح شي يطلعلي شي ثاني

روحيله خلي يتنازل عن المشروع مو يحبج بهالشكل نكدر نحمي الشركه من الافلاس بعد انتي بكيفج اللي عليه نصحتج انتي سيدة اعمال الف واحد يتمناج ويتمنى يشاركج بس عماد واكف بطريقج تفتهميني اذا تمشين بطريق وتعثرتي بسبب حجارة كدامج توخري لو تظلين تتعثرين

ماكدر لاتضغط عليه جدو وروح بابا ماكدر

هاج هذا كرت المطعم اللي عماد عزم بيها كل اصدقائه بمناسبة حصوله على المشروع شوفي الرسالة اللي دزها اليه شنو كاتب اللي ميستحي تعيش وتشوف شسوي بيكم

هذا مو رقم عماد جدو يمكن واحد يلعب بينا مو خلي نستفسر

انتي تردين تجلطيني أشكد فطيرة يعني يهددني برقمه الشخصي اكيد يجيب رقم يستعمله لمرة ويكسرها اعرف نهايتي راح تصير مثل ابوج ودمي بركبتج خلي اروح قبل لا يصير بيا شي من وراج

هذا المكان ملك لياسر مطعم جديد وكلش راقي اتذكر عماد جان يكول بس يخلص اخليج اول وحدة تدخليها بس صار اللي صار ونسيت اصلا عماد انت شنو مافهم عليك أخابر دينا أسألها عن الموضوع لا علاقتنا متوترة هالفترة اخابر شهد احتمال تطلعلي من التليفون وتضربني راشدي ام عماد متروح لهالحفلات خابرته مجاوبني

دادي حلوة اني مو بسرعه سرح شعري ماريد بيبي تمشطها اليه

هههه شنو هالكعدة حاطة رجل على رجل ومسوية روحج زعلانه ياروح دادي اميرة الاميرات راح اخلي الناس كلها تحجي بجمالج يالله نكوم نروح مثل مااتفقنا تصيرين عاقلة وحبابه زين عشق

اني عاقلة بس مادري زيد ليش يضربني وميحبني حتى اني هم هسة ماحبه

شنو زيد يضربج

اي دادي وبعد ماريد اروح يمهم خلي آيه تجي لهنا

كوة لزمت نفسي لا اروح هسة ابهذل آيه بنتها تنضرب وهي ماخذة موقف المتفرج يمكن اني رخيت الها الحبل تستغلني اني الج بسيطة

نورتي المكان أميرة عماد شنو هالجمال ولج على منو طالعه هيجي حلوة عماد متزوجها غير لابني

هههه ماكو ياسر لاتحاول بنتي تتزوج اللي هي تختارها

والله اذا طلعت على امها يعني بختها كلش زين

ياسر لا تخجلوني ويا المعازيم اليوم ماريد اي نقص لا بالاكل ولا بالشرب واهم الشي النظافه والترتيب هم زين مقداد وصل بالوقت المناسب

هسة شهد لو تدري دينا جاية تاكل راسي كذبت عليها كتلها حفلة للرجال بس شيخلصني منها

هاياسر بعدك تخاف من شهد عبالي كبرت وصرت متخاف منها بس ابو طبيع ميغير طبعه شلونك عماد مبروك على المشروع شفته بالاخبار قبل لانطلع خطوة حلوة سويتوها

الله يبارك بيك ولو صرفت اهواية فلوس بس اهم شي كدرت اساعد ويا المنظمه اهواية ناس والحكومه هالمرة مقصرت ساعدتنا عن أذنكم اروح يم ضيوفي بين المدعوين جانت اكو وحدة ابوها صاحب نفوذ وهي عارضة أزياء مشهورة اعرفها من زمان دايما تحاول تتقرب مني بس اني جنت أصدها طلبت مني تسكن ببيتنا لحد ماترجع لان متعرف احد اهنا وافقت لان كلما اسافر همه يعزموني يمهم وهي دايما تتبرع للجمعيات الخيرية عشق من شافتها تعلقت بيها اكثر صورة اخذناها سويا .

بقيت أيام انتظر عشق تجي لو عماد يخابرني حجيت ويا أمه طلبت منها تنطي التليفون لعشق كوة حجت ويايه كلمتين كله جانت تكول بعدين آيه هسة مشغولة قررت اروحلهم للبيت لازم اعرف قصة المشروع واتأكد احس جدي يبالغ هالمرة ماريد أظلم عماد لازم استفسر منه

وصلت الحراس فتحولي الباب استقبلتني أم عماد مكدرت اسالها هو موجود لو لا خالة لعد عشق وينها اريد اشوفها

ليش اني اشوف عشق كله ملتهية ويا جيسي هسة اكول للخدامه تجيبها يمكن يسبحون ليش قطعتي الزيارة عني مو كلتي اني بنتج واللي بيني وبين عماد ميأثر على علاقتنا هيجي آيه

حقج عليه انشغلت هالفترة بالشركة وبزيد اكيد عرفتي اخباره من ماما احاول بعد مااقطع عنج

الله يعينها امج خطية يوميا تخابرني وتسأل عليا على الاساس نهاية الاسبوع نروح احنا النسوان للمزرعه نغير جو اكيد مبلغتج حتى تحضرين نفسج

اي بلغتني زينه صديقتي هم تجي واحتمال خالي وزوجته يرجعون هالاسبوع همينه ماما راح تنشغل اكثر أروح اشوف عشق اريد اخذها ويايه للالعاب والمول

روحي بنتي البيت بيتج انتي مو غريبة الله يهديكم وترجعين تنورين مكانج

حسيت بكلماتها مي بارد وتنزل على صدري يعني بعدهم مخليني مكان بيناتهم وصلت للمسبح واني اسمع صوت ضحكات عشق ويا وحدة تسبح وياها مادري بشر لو حورية لااراديا رفعت عيني على جهة قاعة الرياضة الباب الخلفي تطل على المسبح وحتى جهة من شبابيكها هاي منو ماخذة راحتها شايفتها وجها مو غريب بس وين عشق شافتني ركضت عليه حضنتها حبيبتي مشتاقتلج روحي

آيه شوفي جيسي صديقتي وصديقة دادي اني حلوة لو هي

الله ياخذها انشالله طبعا انتي ياعمري روحي غيري ملابسج راح اخذج نطلع نتونس

ناخذ جيسي ويانا هم زين تعالي انتي بدلي ملابسي

نروح اني وانتي حتى نلعب براحتنا دخلت لغرفتها وعيني على غرفتي عشق دادي موجود لو مسافر

دادي موجود

غسلتها وبدلتها حبيبتي ابقي كاعده اهنا هسة اجي نسيت شي جوا لاتطلعين زين حبابة مشيت يم غرفتي أيدي على الباب افتحها لو لا كومه تخيلات واسئلة ببالي هاي وين جانت نايمه لايكون بغرفتي غير أموتها شنو موت يمكن أذبحها شلون اتأكد فتحت الباب جرني من ايدي وقفل الباب خليت ايدي على كلبي من الخوف واني اباوعله واكف كدامي بدون قميص افتح الباب لاتقترب مني ديربالك اصيح وافضحك تخطاني واخذ القميص ولبسه اشكد غبية اني فكرت بغير شي

ليش ساكت

أنتظرج يمتى تفرغين من كلامج أشتاقيتلي لو شنو

لا طبعا جبت هاي ملفات اريد اعرف شنو الموضوع

وينها ماشوف شي بيدج

يمكن نسيتها بغرفة عشق اروح اجيبها

تردين تقنعني جاية علمود شغل زين جنتي تنتظريني انزل جوا ونحجي بالمكتب بس الظاهر جيتج لغرفة النوم بيها معنى ثاني واصلا قصدج واضح وانتي عينج عليه

منو هاي صديقتك وانت ليش مصلخ تفتر بالغرفة

هههههه هاي انتي آيه الغيورة لو هسة اتقرب منج وأبوسج واحضنج منو يلومني رفعي راسج ليش مغمضة ماعض اني

دادي افتح الباب

بسرعة عدلت نفسي وشعري الله ستر اشكد ضعيفة كدام عماد اني هسة اكيد يضحك عليه سبقته وفتحت الباب تعالي ننزل يم بيبي

آيه نروح برا مو يم بيبي

اي نسيت خلي اخذ حقيبتي بغرفتج

لا مجان بيدج حقيبة

فضحتني كدام عماد

عشق روحي يم بيبي اني وآيه نحجي شوية بالمكتب زين حبيبتي فتحت باب المكتب وكعدت تفضلي شنو موضوعج خلصي بسرعه لان مشغول

سبحان المغير الاحوال هسة جنت فوك تتغزل بيا وتبوسني نزلت تغيرت مو مشكله متتغير صوجي هاي المشروع تخص شركتي وانت اخذتها بسببك خسرت اهواية فلوس

بالنسبة للي صار فوك اعتبري غلطة اما هاي الاوراق مزقتها اخذي خلي بالمي وشربي للشخص اللي منطيج أياه

مو قبل اسبوع سويت حفلة وعزمت ناس بمطعم ياسر لو تنكر هاي همينه وبعدين ليش هيجي سويت بيها

اخ راسي ليش ترمي الاوراق عليه وجايب صديقتك تعيش وياك بالبيت كدام بنتك

حتى مخج ينفتح اقري شوفي شنو بيها اني مشارك بمشروع خيري باسم الحكومه والحفلة جانت عبارة عن شكر من سفير بلد الى المشاركين بهالمشروع الخيري يعني شي رسمي مو مثل الاوراق اللي جايبتها المزورة واني ماحتاج ادخل مشاريع متهمني شغلي غير عنكم شغل ولعب بالحرام اختصاص مهند وجدج اما صديقتي تعيش ويايا ميخصج اني رجال حر اسوي اللي اريده وبخصوص بنتج اللي مستحيل اخليج تاخذيها لبيتكم اخوج يضربها ويأذيها وانتي مو يمها ولاتهتمين بيها سكتي لاتجاوبيني ولا تقاطعيني افتهمتي كلش زين تعرفين اي شي يخص جهالي عشق وكريم خط أحمر واللي يتجاوز عليهم اتجاوز عليه اذا تردين تشوفيها بيتنا مفتوح ألج عندج شي بعد

اي عندي مثل ماانت حر وتعيش حياتك اني من حقي اشوف حياتي بعدني صغيرة وبنتي اخذها بالقانون بيناتنا محاكم الظاهر تريد تخوفني واني ماخاف من أحد آيه العاشقة الغبية انتهت اني غير

عفية بمنو مستقوية مهند اللي من نزلته من سيارتج ذبيت جوا رجلي ومكدر يفك نفسه لو جدج اللي انتي اخر اهتماماته رجلج تدوس باب المحكمه انتي تخسرين بنتي اخذها واحرمج منها

متكدر تاخذها مني لا انت ولا غيرك ولا اسمحلك تعيشها ويا عشيقتك

الكلام بينا انتهى لهنا وكافي لزمي حدج اني ماعندي عشيقة هاي بنت ناس محترمه ضيفتي والحمدالله دوم رافعين راسنا الناس تعرفنا ماعدا المريضين امثال اللي تعرفيهم انتي ونصيحه مني من تتركين الحبوب اللي تاخذيها تعالي هدديني بالمحكمه واخذي بنتج

مجاوبته عفته وطلعت ميته من القهر ركبت سيارتي اريد اشوف جدي اطلع اللي سواها عماد بيه بي مراح اسكت صرت أضحوكه يلعب بعقلي دخلت للبيت واني اصيح بأسمه نانا وين جدي

ها آيه شبيج تصيحين موجود بالحديقة الخلفية ويا مهند تردين شي مني اني طالعه

لا ردت ادخل شفتهم يحجون واضح ميردون احد يعرف يتبسبسون بيناتهم ممكن اعرف شنو معنى اللي سويته بيا شفته ارتبك لان دخلت فجأة عليهم

من يمتى انتي اهنا آيه

مو شغلك مهند هذا بيتنا ادخل واطلع وكت اللي اريده مو على الاساس اليوم عدنا حمل ونقل البضاعه شتسوي كاعد اهنا

لسانج شبيج اكلتينا لا ادب ولا احترام الناس تسلم بالاول

جدو ليش هيجي سويت تضحك عليا شنو شايفني طفلة المشروع اني متأكدة مموقعه عليها فهمني شلون عليها توقيعي وبعدين احنا من يمتى نقدم على هيجي مشاريع اصلا اول مرة اشوفها بملفات الشركه حتى بابا مامقدم على هيجي مشروع

لان جان مثلج انسان عاطفي يفكر بقلبه وشنو جان نهايته مات والقاتل حر يجي ويروح كدامنا واحنا لازم نسكت وانتي مثله تدرين هالمشروع اشكد راح نربح منها ونحسن وضع الشركه التعبانه بيها

مشروع سكني باقل تكلفة وبمواد وخامات تقليدية مغشوشة بالمعنى الاصح اسلمها للناس لاسامح الله صار شي وكعت عليهم البنايات منو يتحمل مسؤوليتها اكيد اني

وصلنا للحجي الزين اني فكرت أدخلج بالحزب وتستلمين مكان ابوج راح تكونين محميه اي شي تسويها يطلعوج منها ومحد يكدر يحاسبج على شي

هذا الحجي راح يبقى بيناتنا سر نكملها بالشركه باجر ديربالج احد يعرف .

هاهيجي تلعبون ويانا اني الكم لعد راح تشوفون شسوي بيكم طلعت فوك بسرعه خابرت عماد ممكن اشوفك بمكان خارج البيت اكو موضوع كلش مهم اريد احجي بيها وياك لا ياريت بعد ساعه ميتحمل التأجيل .

ياريت الموضوع يستاهل لان لازم اسافر بعد ساعتين روحي لفلان مكان اكيد تعرفيه انتظرج اهناك مع السلامه شتريد هاي وليش برا البيت تحجي ويايه .

عاشقة_السفير47

الكاتبةchra kirkuki

وسألت نفسي حائرًا .. أنا من أكون ؟!

مالي عشقت السير في طرق الظنون

فإذا جنوني صار بعض تعقلي

وإذا بأفكاري يغلقها الجنون

أنا .. أنا .. أنا من أكون ؟!

ما بال بعض الناس صاروا أبحرًا

يخفون تحت الحب حقد الحاقدين

يتقابلون بأذرع مفتوحة

والكره فيهم قد أطل من العيون

يا ليت بين يدي مرآة ترى

ما في قلوب الناس من أمر دفين

أنا .. أنا .. أنا من أكون ؟!

بيني وبين سعادتي بحر عميق

والناس حالوا بين قلبي والطريق.

متأكدة دينا من كلامج سمعتيهم بأذنج هذا شي خطير مو لعبه اخ يالقهر

عماد اني خايفة على آيه علمود هاي طلبت اشوفك برا اصلا عقلي ميستوعب اللي يصير

كلشي توقعي من هالناس خليتيني بقلق شلون اسافر واعوف آيه

على بختك شنو تسافر اني ماكدر عليها وحدي واصلا متسمع كلامي ولا كلام أمي لاتعوفها حاول تأجل سفرك

ماكدر صدكيني المؤتمر اني مدعو الها ميصير ماروح كومه تساؤولات وقضايا تترتب عليه

شنو تقترح نسوي

دينا اريد منج هالفترة تبقين يم بيت اهلج اكثر فترة ممكنه راقبي جدج وتصرفاته اتصالاته

انشالله عماد حاول بأسرع وقت ترجع ماعندي غيركم انتو ومقداد خطية لو جان اهنا يساعدني بارحه سافر عدهم مشكلة بالبث مال القناة الجديد واصلا هو ضايج من تصرفات آيه وياك عماد صدكني آيه كلش تحبك بس همه استغلو حالتها بعد مامات بابا

اعرف دينا تحبني واني ليش متحمل تصرفاتها واللي قاهرني أكثر تأذي نفسها أهواية اشكد احاول اقسي عليها واحرمها من عشق بس اشوفها وهي بقمة انهيارها ماكدر اتراجع بكلامي

انت شفت الحبوب بغرفتها مو ترى نسبته قليلة متأثر عليها اهواية سألت دكتورة صديقتي ماكو خوف عليها بس هم مو زين بأستمرار

اني لازم اروح هسة نبقى على اتصال دينا اشتري خط جديد ولاتسجلي بأسمج لازم ننتبه لتحركاتنا كلش زين مع السلامه طلعت من يمها وخابرت أم آيه بعد السلام أم زيد سمعيني شكولج ولاتقاطعيني راح أدزلج السايق انطي جواز سفرج انتي وزيد احجزلكم طيارة تسافرو لبنان وتاخذين آيه وياج

عماد ابني لاتخوفني صاير شي ليش نسافر

ماعندي مجال اشرح لج بس تأكدي هاي علمود مصلحتكم انتي ماعندج ثقة بيا لعد خليني اتصرف براحتي المهم متبقون هالليلة اهنا ومترجعين لحد ماابلغج بنفسي حتى لو اضطريتي تاخذين آيه غصب وياج قفلت منها وصيت السايق يروحلها للبيت حميد مراح اخذك ويايه هالمرة اريدك تراقب جد آيه ومهند عينك عليهم ليل نهار

صاير شي جديد سيدي من زمان اتمنى تنطيني اوك حتى اتخلص من مهند

لا اريده عايش حميد باجر ترسل المحامي للشركه انطيك هسة عنوانه راح اكتبله رسالة توصله بيدك اله لازم يداوم يمهم حتى نعرف شنو يسوون داخل الشركه سمعت يدورون على محامي

تحت أمرك سيدي تروح وترجع بالسلامه يعز عليه تسافر بدوني راح احس نفسي يتيم لحد ماترجعلنا سالم

شعور متبادل حميد انت دايما ويايا بس للظروف احكام

شبيك كاعد مطنكر سيد مهند صارلي ساعه احجي وياك متجاوبني

مو على الاساس اني اشغل منصبي خالي بالحزب ليش غيرت رأيك

وهذا الشي اللي مزعلك ياغبي هي اقرب منك مااستغرب ليش كل مرة عماد يلعب بيك طوبة لان انت غبي وعقلك بكد نمله

انت دايما تنطيني وعود آيه ومبين متصير اليه والشركه هي مسيطرة عليها متسمح ادخل بيها واسويلك هيجي وهيجي مشفت منها شي غير اوامر واني انفذها والمقابل عفية عليك ابني ومن مااسويها اصير غبي اني سويت كل اللي ردته مني وهسة لازم توفي بوعودك والا مراح يصير شي زين

نسيت منو طلعك بالسجن جنت راح تخيس لحد الان بيها اشتريتلك بيت انت وامك وزوجتك كاعدين بيها سيارة موديل جديد وفلوس بيدك بعد شتريد

اريد آيه اريدها تحبني مثل ماتحب عماد

مو جانت بيدك ليش فرطت بيها اشكد نصحتك مسمعت كلامي مشيت ورا عقلك الصغير ورا النسوان الرخيصة وضيعتها منك

اللي راح راح اني مو بعيني غيرها هسة اريدها احسد عماد اتمنى يصير بي شي حتى الموت مااخذه كلش محظوظ

طلعت ويازينه تعشينا بمطعم كل سوالفنا جانت على عماد حتى زينه هسة تعاتبني رجعت للبيت شفت عشق كاعدة بحضن أمي استغربت وزيد كاعد بصفها جنط السفر يم باب الصالة اخذتها وخليتها بحضني جنت مشتاقتلها حسيت اني محرومه منها اهواية من شفت جهال زينه بحضن امهم ماما منو جاب عشق

حميد جابها لان طلبت من عماد ناخذها ويان من نسافر يم خالج

اي آيه راح نسافر ونغير جو واني اصلا تصالحت ويا عشق علمودج اوعدج مرة ثانية ماضربها

لحظة زيد خلي افتهم ماما وين نسافر واني اصلا ممحضرة نفسي وباجر عندي كومه شغل بالشركه منين طلعتي بسالفة السفر هسة مو على الاساس همه يجون

علمود اخوج يريد يغير جو واني هم تعبت هالفترة خالج بلغني ميكدر يجي ليان عدها شغل طلب مني احنا نروح يمهم وخصوصا جدج استقر اهناك بعد مبرجعون

آيه حبيبتي كمت حضنتها وبستها لخاطري لاتعارضين حتى عشق تريد تسافر مو هيجي

أي آيه دادي سافر ويا جيسي اني زعلت منهم مااخذوني وياهم انتي اخذيني يمهم

وهالحية متعرف تسافر من غير ابوج وتردين اني بنفسي اخذج يمها

شبيج تصيحين عليها روحي غيري ملابسج ولاتناقشيني بسرعه مظل عدنا وقت والشركه مهند وجدج يهتمون بيها

احسن على عناد عماد راح اسافر واغير جو واصور وادزله خلي اشوف شيسوي زين ياعماد تخوني ويا هالحيوانه اذا مخبلتك فلا اني آيه

عرفت واصلين بالسلامه ارتاحيت شوية كدرت ابعد آيه عن مهند وجدها هالفترة لحد مااوصل لشي اللي ببالي يوميا احجي ويا دينا وام آيه اطمن عليهم لحد الان دينا مكدرت تعرف شي عنهم دورت وفتشت بالبيت كلها المحامي تعين وباشر يشتغل عدهم فتحت تليفوني شفت صورة عشق وياها آيه تريد تلعب بأعصابي على الاساس هي ترسلي صور عشق بس هي وياها بكل صورة خابرت حميد حتى يبدي يسوي اللي عليه لازم من ارجع كلشي يكون جاهز يصير بيدي دليل برائتي كدام آيه

صدك جيسي صديقة عماد شفت صورها بأيباد عشق

اي ويعني شنو ليان منو هاي اصلا

آيه هاي عارضة ازياء مشهورة كلش وابوها هم نفس الشي مشهور بس اني مادري عماد شلون يباوع عليج ويعرف هاي

مادري ليش انتي من اليوم اللي وصلنا يمكم تغثيني بكل كلمه تكوليها كرهتيني بالسفرة

يعني ليش تزعلين احجي الصدوك غير هاي لو خالج بس تسلم عليه يعوفني مسويه حجاب لعماد ميشوف غيرج هههههه

السالفة بايخه مثلج ومتضحك كومي خلينا نطلع شوية قبل لا انفجر تعالي عشق نروح ويا خاله ليان تمشينا بالسيارة واني كل مكان بيها ذكريات ويا عماد متنسي المطاعم اللي زرناها سويا والاسواق محلات الملابس ماريد اتغدا اهنا يعني ملكيتي مكان الا اهنا ماحب اكلهم

الله اكبر اشكد جذابة مو جان مطعمج المفضل واصلا كلش غالي انتي مو وجه نعمه اني عازمه عشق اهنا ماعليه بيج حتى جهالي يحبون هالمكان هادئ وراقي واكلهم طيب

يارب صبرك بعد شنو ناوية تسوين بيا اخر مرة اطلع وياج نذلة

وين جنتو تكعدون ويا عماد صدك هو شنو يحب ياكل حتى اطلب مثله اشوف ذوقه بالاكل مثل حبه الج

ماجاوبج اعرف تردين تحركين اعصابي كعدنا اني بدون ماباوع على المينو طلبت من نفس اللي ياكلها عماد من جابوها عبالك مماكله سنه هجمت عليها كافي تصوريني كعدي اكلي وبعدين طلبي لي وياج نركيله اني اليوم بايعتها

اشوفج جاية من مجاعه حسستيني هالاسبوعين ممنطيج اكل يافضيحتي بين الناس من يمتى بايعتها واو آيه شوفي بسرعه جيسي ناشرة خاتم خطوبة

وكعت الشوكه والسكينه من ايدي شنو اخذت الموبايل منها لايكون عماد متزوجها ورجعلي عشق حتى ياخذ راحته مكدرت ابقى اكثر عفية ليان بسرعه خلي نطلع مابقى دقيقة بعد اذا مكمتي اروح لوحدي طلعت وهي تصيح ورايه انداريت ناسية حقيبتي وعشق تبجي بيدها تليفونها بس بأيدي مادري شلون وصلت يم سيارتها وخليت ايدي على وجهي واني ابجي

آيه كافي اسفة ضايقتج والله جنت اتشاقى وياج متعرفين اشكد احبج انتي مو بس بنت اخت ناجي صديقتي واختي وحبيبتي لخاطري سكتي عشق تبجي وخايفة عليج نروح يم البحر شوية حتى تهدين والجهال يلعبون آيه اهدي حبيبتي منو يكول متزوجه عماد

هالفترة كلها مسأل عني وهاملني شفتها ببيتهم تسبح وماخذة راحتها وصورهم رايحين للمطعم حتى بنتي غاسلين مخها تحبها اهواية ومسافر وياها وهسة عارضة صورة خاتم خطوبتها يعني شنو شلون اهدا راح اموت

لعد ليش تسوين هيجي بي وبنفسج مو حرام عليج ليش بعد كل هالحب اللي عشتوه تدمرينه بسهولة لاتكوليلي حجج الفارغه وعلمود اخوية اخوج باجر يكبر ويتزوج اصلا ينساج وانتي تخسرين حياتج وأبوج انتي متأكدة مية بالمية بداخلج مثل مااحنا متأكدين عماد ماله علاقة بموته اصحي آيه حاولي تلمين الباقي من حبكم اذا اليوم الشغله طلعت مجرد صدفه راح يجي يوم وتصير حقيقة ساعتها شتسوين

خليني وحدي شوية اريد اكعد براحتي اخذي عشق ويا جهالج للبيت اني بعدين ارجع اتوسل بيج لاتحجين اكثر خليني راحو بقيت وحدي الناس تلعب واللي تتمشى واللي ياكلون جذبني صورة بنية صغيرة تشخبط على ورق ذكرتني بنفسي من جنت صغيرة باوعت على ايديه ياترى اكدر ارجع ارسم من جديد اكدر الون حياتي بيج لو صرتي متعرفين تكتبين غير بالحبر الاسود اللي مثل حياتي صايرة تليفوني يدك جدي ماريد اسمع صوته رفضت المكالمه كمت اتمشى واتذكر حياتي من لحظة دخول عماد بيها شنو تغير شلون جنت عايشة وياه بدون ماطلب يسويلي اللي اريده دايما يسبقني ويفاجأني تحملني وماتحملته قسى عليه وضمني لصدره حبيته وحبني أكثر بكل لحظاته اني جنت وياه شاركني احلامه وطموحاته اللي اني جنت جزء منها الطريق جان مفتوح كدامي مشيت بالسراب يمكن هذا الحلم اللي حلمته واني بالمستشفى ابويا راح وعماد بقى بس بعيد كلش

جنت كاعد احضر غراضي علمود ارجع كملت 3 اسابيع بين ندوات ومؤتمرات خابرني المحامي اكيد الشغلة ضرورية والا ميخابرني بهالليل جاوبته

اسف اذا ضايقتك بهالليل عماد ديربالك على زوجتك اللي جنت تخاف منه صحيح افتح أيميلك دزيتلك ملفات فساد واستيراد مواد مسرطنة بأسم أبو آيه كلها وكومه عقود متكررة باسماء اشخاص وهمية وحاليا نفس هاي العقود ماشية بس توقيع آيه عليها

شنو الحل هسة اكو طريقة نكشف منو بيهم يتلاعب بالاوراق اول شخص السكرتيرة منو هي جيبلي معلومات عنها اكيد هي الها ايد نفسها من أيام ابوها لو مغيريها

هم زين نبهتني هي نفسها حسب ماعرفت من اول مافتحو الشركه وتعرف كلشي بالشركه مادري ليش متنطيني وجه اصلا احسها تكرهني

لعد تمام خطوتنا التالية راح تكون هي اني راح ارجع الليلة باجر اشوفك بالمزرعه ساعة 2 بالليل مع السلامه فتحت الايميل قريت شوية من الملفات جاني فكرة بحساب ثاني دخلت على موقع الحزب ورحت لأرشيف الصور دورت ساعه واكثر صور ابو آيه كلها وياه ابوه وخاصة صورة استلامه منصب العميد حسيته من شكله هو فرحان اكثر منه بس رغم هالشي هو ماخذ موقف محايد من الاحزاب لازم اشوف حسابه بالبنك زاد بعد موت أبو آيه لو لا .

رجعت لبيت خالي الكل نايم ماعدا أمي حضنتها ماما اني تعبانه كلش مشتاقة لبابا أذيتج اهواية مو انتي اكثر من عدنا تعذبتي بوفاته

حبيبتي اني لحد الان اشوفج مثل عشق اشكد اتعصب منج بس احبج رغم كلشي من خوفي عليكم نسيت حزني على رفيق دربي ادعي ليل نهار ترتاحون بحياتكم الحمدالله راسي مرفوع بأبوج فخورة بي وبانجازاته واني من اسمع من الناس شلون جان رجال بمعنى الكلمة ارتاح بنتي رجعي لحياتج

ماتصور عماد راح يتقبلني بعد من نرجع راح اخلي يرتاح مني ويعيش حياته عذبته اهواية

عماد يحبج وراح يتقبلج بس انتي اهتمي بنفسج رجعي آيه زمان راح تشوفين كل شي تنحل والحبوب كافي بعد متاخذيها

تدرين ليش اخذها لان ماكدر انام من غير عماد اضطر اخذها حتى انسى عبالكم فرحانه اخذ حبوب منومه صايرة عبالك عجوز وجهي تعبان نفسيتي

رجعتي آيه ظل بالي يمج محبيت اخابرج واضايقج

اشكرج ليان خليتيني اصحى على نفسي بس متأخر

لا ماريد شكر اريدج من باجر نروح اني وانتي لصالون تغيرين شكلج وستايلج ملابسج الكئيبة اخذها واحركها اشتريلج على ذوقي واهم شي لسانج اغيرها وارجعها لايام زمان .

#عاشقة_السفير48

الكاتبةchra kirkuki

في أعماقي أنت حبيبي

في أعماقي سكنت

في أعماقي تتدفأ

بحبي الدافئ

في أعماقي تبحر

في جنة الحب

احبك حبيبي كما

لم أحب من قبل

احبك حبيبي

و كياني لك يتوق

احبك حبيبي

و ظلال الحب تقودني إليك

احبك حبيبي

و مصيري من دونك فاني

احبك يا حبيبي

و قلبي لك يزفني

احبك يا حبيبي

و روحي اسمك تغرد

آهاتي يا حبيبي آهاتي تثقل كاهلي

عذبتني ليالي أسهرتني أمسي و حاضري

علقتني بأحلام الطفولة حيث تنقدني يد الأمير

عافتني من جروح من ندبات و حروق الماضي

آه يا حبيبي يا حياتي يا نور عيني لحضورك أتوق

بإحساسك اتشبت و لدقات قلبك التجأ أيام المآسي.

رجعنا من لبنان عشق أخذها حميد من المطار تمنيت اشوف عماد وياه احس نفسيتي تغيرت واستفاديت من السفرة وزيد بقى يم خالي مقبل نرجعه جان اهواية يحجي وياه وينصحه أمي رجعت علمود لا ابقى بالبيت وحدي اهواية حاولت ويايه ارجع لبيتي ويا حميد مكدرت بعد اكو حاجز بيناتنا مو هسة ارجع لازم اثبت نفسي اول شي واكبر بعينه طول مااني بالطيارة احلم بهواية اشياء اغيرها بحياتي وصلنا للبيت تعبانين عمتي ومهند وزوجته وجدي استقبلونا ومسويين عشا النا كانه هذا بيتهم واحنا جايين ضيوف يمهم امي كلش ضاجت بس محجت شي سألتهم وين نانا مشفتها تستقبلنا مو من عوايدها

قبل يومين رادت مني اجازة تروح تزور كرايبها مادري مريض لو شنو

عمي هاي عشرة عمري كله وياها من سنين هي يمنا ولا يوم راحت يم أحد واصلا كل يوم احجي وياها ومن يومين خابرت البيت ام مهند جاوبتني كالت رايحه للسوك وهسة انت تحجي شكل

صح كلام ماما جدو هي عمرها مراحت يم أحد واني هم مستغربة

يعني شنو أكذب عليكم ولاتحترمون شيباتي عيني عينك تحجون بوجهي واني اللي تارك بيتي وجاي يمكم احميكم وامشي شغل المرحوم ابني اللي دمه راح ويا الهوا علمودكم هسة تحجون عليه

عمي احنا مكلنا شي وسالفة توفيق احنا انتهينا منها وقفلنا الموضوع الحكومه خلي تشوف بنفسها

واني اكول ليش سافرتي واخذتي الجهال وياج حتى تقرين براسهم وانتي آيه عاجبج كلام أمج نسيتي ابوج راضية دمه يروح بلاش مو ابوج ضحى بنفسه علمودكم ماتصورتج هيجي تمشين ورا كلام اللي ميخافون الله ياربي اريدها منك لا ليلي ليل ولا نهاري نهار ربي انتقم لي منهم حتى بالي يرتاح

استأذنت منهم وكمت صعدت لغرفتي ماريد اسمع اكثر مليت من هالسالفة وبكل كلمه يذكرني عماد السبب قفلت الباب وغيرت ملابسي ليش مااخابر عماد بحجة عشق خابرته اكثر من مرة مجاوبني ضجت اهواية شنو قصده يذلني عندي صندوق مخليته جوا السرير طلعته مخليه بيها الهدايا المميزة من طفولتي وقصاصات ورقية اني راسمه عليها اشكال تضحك ورسائل من كملنا الابتدائية والمتوسطة بنهاية السنه كتبناها اني وصديقاتي واول صورة رسمته لعماد بيدي واول صوره اخذتها من كامرتي لعشق احلى شي بيناتهم الريشة اللي جابها ابويا من سافر لأوروبا اول مرة رأسا ضميتها وياها علبة الالوان اللي صايرة مثل الحجر متيبسة الريشة كلش غالية عليه سمعت تليفوني جان عماد من الفرحه كمزت من مكاني وكعت على الارض ايدي على تليفون وايد على ظهري

جمعت معلومات اهواية عن جد آيه اكمل شغلي وارجع أهتم بهالموضوع واجتمع مع حميد والمحامي اللي عينوه بالشركه دينا وأمها مسويله وكالة جد آيه حاول يطرده اهواية بس مكدر دينا واكفه ويا الخوف من آيه لانسوي ويا مشاكل اخاف افهمها الموضوع تكبر السالفة وتكشفنا ونتورط اكثر قبل لا ناخذ حقنا منه شفت مكالمات منها مجاوبتها لحد ماودعتهم رجعت خابرتها حسيت من نبرتها خجل مو نفسها قبل لاتسافر تردين شي آيه

لا بس حبيت اسأل عن عشق نامت لو لا لان جانت تعبانه بالطيارة

هسة اخابر البيت وأسأل وارجع اخابرج

نعم انت مو بالبيت بهالليل وينك وليش اخذته مني مادام طالع تتونس مو عيب عليك هالحركات شنو قصدك بيها

ميخصج اللي اسوي مو قررتي تطلعين من حياتي هسة ماالج اي حق تستفسرين شسوي ولا ماسوي وبنتي متبقى ببيت اعداء ابوها واذا مشتاقتلها ومتكدرين بدونها البيت مفتوح ألج

تريدني ارجعلك لو شنو

رجعي لبنتج اني ماريدج لحد مااخلي برائتي من دم ابوج كدام عينج وعد مني

متكدر عماد انت تتمناني هسة بس مسوي نفسك مو يمك السالفة

مثل ماانتي تتمنيني مو هذا قصدج

اني

شنو

مع السلامه سديته بسرعه وكلبي شوية ويوكف خليت ايدي عليه يدك سريع جاني رسالة انتظرج بعد ساعه كدام الباب اذا جيتي راح افرح اذا لا أفهمها وراح يكون اخر شي بيني وبينج ركضت على دولابي افتحها شنو البس شسوي اروح اغسل اسوي مكياج ارتب شعري كانما اول مرة اشوفه اخابر ليان لو زينه حتى يساعدوني زينه عيب اخاف نايمه ليان عادي خابرتها شوية وتطلع من التليفون فرحانه شنو البس تجاوبني

ملابس النوم لحد يمتى اعلمج خبليه اليوم خلي يموع بيدج

والله انتي خبله اطلع للشارع بملابس النوم

غبية أخذي وياج خلي يحس تردينه ومشتاقتله روحي للمزرعه وعيشو حياتكم

حسيت نفسي رجعت لأيام زمان بس الوضع هسة يختلف قبل آيه تحبني وتعشقني وتنتظر نطلع سويا على أحر من الجمر هسة غير لحظة زينة ولحظات لا شفتها تطلع من بيتهم تقربت من الباب وصعدت مكدرت لا احضنها ولا أمد ايدي وألمس ايدها سلمت وجاوبتها بس

احس بخيبة كبيرة باوعت على حقيبتي خفت لا يكون مفتوح وتبين اللي بداخلها شنو لا حضن لابوس بداخلي لاتستعجلين يمكن من نوصل يبدي وين رايحين

وين تحبين اني راح اخذج ضروري نحجي نروح لمكانه القديم

بكيفك شنو نحجي هسة وكتها صاير بلا ذوق اوف شنو هالاوراق

آيه تعرفين اشكد احبج وأخاف عليج من الهوا فما بالج باللي يحاولون يأذوج هاي التواقيع انتي موقعه عليها وتعرفين شنو مضمون الورقة لو لا

اصلا اول مرة اشوفها شنو هاي عماد منين جبت هالاوراق عليها ختم الشركه

لازم توعديني الموضوع يبقى بيناتنا مو لخاطر حبنا لخاطر عشق الموضوع خطر آيه انتي متورطة بقضايا فساد و

لاتكمل لخاطر الله شنو قضايا فساد راح اتخبل منو اله مصلحه هيجي يسوي بيا

نفسهم اللي قتلو ابوج وهددوني

منو همه عماد انت تعرفهم

لا مع الاسف كلما اوصل الهم تختفي الادلة حجيتي ويا جدج من رجعتي على الشركه .

بعدني مو مستوعبه اللي اشوفه حجالي على المحامي اللي دينا وامي موكلينه باجر راح اطرده مبين يدور مشاكل

انتي شفتي حتى تقررين يدور مشاكل لو لا وبعدين متكدرين امج ودينا همه جايبينه شلون تطردي لاتستعجلين شوفي شغله وكعدي ويا اخذي معلومات مو كل واحد يحجيلج شي رأسا تصدكيه

يمتى راح ارتاح تعبت شنو هالمتاهة اللي عايشته زوج بعيد عني اختي تلعب من ورايه جدي وسوالفه ومهند اللي ماعرف يساعدني بدون مقابل لو لا وأمي اللي قبل لانرجع حضنتني ونصحتني طلعت تلعب ويا اختي كولي عماد اني بيا دور عايشة

اني اقرب الناس الج اقرب من روحج انتي خليتي حاجز بيناتنا حضنتها ماكدر الزم نفسي كافي لاتبجين حاولت ماحضنج مكدرت خنت وعدي راح ينتهي هالالم صعدي خلي نروح للمزرعه نكمل كلامنا

عماد انت وعدتني ترجع حقي وتجيبلي قاتل بابا راح انتظر هاليوم بفارغ الصبر الصبح كمت ادور على عماد ماكو كلت اكيد بالمطبخ تليفوني يدك هذا عماد ليش يخابرني اكيد يريد يلعب ويايه خلي ادور بنفسي رفضته ورجع خابر حبيبي وينك دخت

أسف آيه أضطريت اعوفج عندي شغل ضروري راح ادزلج السايق تسمعيني حبيبتي

لا مستحيل شنو تلعب بيا عايفني وحدي انت احقر انسان شفته بحياتي ماريد السايق مالتك عماد هاي اخر مرة أسمع بيها صوتك بجيت من كل كلبي ضحك عليا الكذاب الحقير صوجي رخصت نفسي اله خابرت سايق الشركه وانطيته العنوان حتى يجي ورايا احس بأهانة

سيدي وصلنا هذا المكان اللي كتلك عليه راح انزل واتأكد عددهم كم واحد وبعدها اخابرك حتى تجي بنفسك وتشوف لاتنسى القناع احتمال منصبين كاميرات مراقبة

صحيت من شرودي على صوت حميد وهو يحجي ويايه بعد ماقفلت تليفوني من آيه متصورت رد فعلها تكون بهالشكل الصبح ساعه 6 حميد بلغني شايف جماعه جد آيه جايبين وحدة مربوطة وميبين وجها للمخزن آيه جانت نايمه محبيت اصحيها بسرعه غسلت وبدلت ورحت للمكان اكيد هالمرة راح نوصل لشي مهم نزلنا حراس اثنين حميد استلمهم بالضرب باوعت على المرة المربوطة احس شايفها تقربت منها هاي نانا بس وجها كله كدمات مبين عليها اثار ضرب كوة تفتح عيونها شوية وتموت بسرعه فكيت ايدها وخليتها على كتافي وطلعت وصلت يم السيارة فتحت الباب وخليتها بي اللي موكفيها بعيد عن المخزن بمسافه جانت تبجي وتون من الالم خابرت دكتور صديقي يجي يشوفها بالمزرعه حتى آيه تتأكد اني رحت علمود شنو مو تفكر بغير اشياء وصلنا جانت رايحه نزلناها ودخلناها جوا انتظرت الدكتور يجي خابرت دينا عرفت جدها مكذب عليهم ياترى شمسوية نانا متعرضه لهالضرب والحبس اكيد اكو شي حالتها متسمح نحجي وياها.

اني مو عاجبني هالشغل احسك تتصرف بكيفك ومتقصد تعاندني

ست آيه شنو اللي مو عاجبج بالشغل اني سويت اللي حضرتج مكدرتي تسويها من سنه والحمدالله كدرنا ننقذ الشركه من الافلاس

لايكون بمجهوداتك مبين تريد تكبر براسي واني مراح أسمحلك هاي شركتنا وكلام بنتي آيه هي اللي تمشي عليك وعلى الموظفين افتهمت ياحضرة المحامي

عوفه جدو خلي يحجي بكيفه السبب دينا وماما مادري منين جايبي

استغفرالله ياربي لو ماعماد ماكعد لحظة كدام هالمخبلة المغرورة ولا كدام هالعجوز صبرني يارب شلون تورطت ويا هذولة .اي براحتج ست آيه اللي تشوفيه انت قرري واحنا ننفذ

أحسك تكولها من غير نفس مو مهم هسة روح شوف شغلك اريد احجي ويا جدو شوية .وين مهند مو بارحه اتفقنا نروح للمعمل اني بس انطي فلوس يمتى اشوف الانتاج

على كيفج شبيج قضيتي على المحامي وهالنوب لفيتي عليه بارود شنو انتي اعصابج

مابي شي اعصابي باردة ماريد لا دينا ولا أمي يحجون ويكولون المحامي هيجي وهيجي وانتي ولا شي دايما ينكرون وجودي وتعبي بالشركه

وعماد شنو وضعه

شبيه هذا هم ماعلينا منه لاتذكره كدامي هو مجرد ابو عشق لا اكثر

أي عفية عليج هاي بنيتي الحبابة اللي تعرف مصلحتها اسمج راح يكون بالصدارة راح أخلي الصحافة تتمنى تاخذ لقاء وياج راح اخليج فوك بالسحاب

بكلبي كلت ياريت حتى ارد كرامتي شوية .

نعم حميد اني هسة مشغول شنو صاير جديد

سيدي المربية نانا حالتها تحسنت تريد تشوفك اللي ببالك طلع صحيح انتظرك تسمعها منها بنفسك

اسبوعين مرت واني انتظرها تكوم بالسلامه وتحجيلي راح اجي بالليل اشوفها اهتمو بيها كلش زين طلعت للبيت عشق كاعدة ضايجه تريد تسافر يم كريم ماما اخذيها وياج باجر من تروحين

لعد امها اخاف تزعل بعدين والله قهرتني من الصبح بس تبجي تريد تجي ويايه تكول مشتاقة لأخوية

عوفي آيه عليه المهم عشق تتونس وتشوف اخوها اني ابدل واطلع عشق اوديج يم ماما الليلة لو تردين تبقين اهنا

دادي خلي آيه تجي تنام يمي ماريد اروح لهناك

زين حبيبتي ماما خابريها تجي تنام يمها كوليلها عماد ميرجع بالليل رحت للمزرعه بست نانا من راسها خطية جانت تبجي كعدت احجي وياها واهديها

نمت يم عشق وهي طول الوكت تحجي متحمسة علمود تروح يم كريم أكيد منال هم تسافر وياهم مردت اكسر فرحتها بس اني الك عماد تسفر بنتي وتخليني على أمر الواقع الصبح قبل لا اطلع مريت على غرفتنا واخذت قميص من دولاب عماد مادري ليش حبيت أغيضه بأي طريقة .

انتظرت فترة حتى تتعافى نانا اخذنا منها المعلومات بقيتها بالمزرعه وياها ممرضة كعدت ويا حميد خططنا للشي الناويين عليها وراح انفذها بنفسي هالمرة ياقاتل يامقتول وآيه أكثر من شهرين مشايفها

روحي بنتي للدكتور هالتعب والخمول مو طبيعي انتي متأكدة مابيج شي

ماما يعني شكو غير تعب الشغل

آيه هاي اعراض حمل لايكون

تذكرت لا مصيبة اذا صارت مو وكتها جاوبتها بضحكه ممزوجه بخوف وقلق ياحمل واني من زمان عايفة زوجي و كدامج 24

كومي نروح يم صديقتي الدكتورة يكتبلج مقويات وفيتامين

رحنا يمها واني كلش خايفة وادعي تطلع النتيجه سلبي حللت وكعدت انتظر النتيجه على نار سمعت يصحون على أسمي باوعت على وجه البنية اللي اخذت مني عينه الدم مبتسمه

مبروك مدام انتي حامل .

صباح الخير وصباح الحب على كل متابعات رواية عاشقة السفير الحمدالله بفضلكم وصلت الرواية للمرتبة الاولى بين 877 قصة مطروحه حبيت اشاركم فرحتي وانشالله باجر راح نوصل للجزء الاخير ونختم الرواية الله لايحرمني منكم .

#عاشقة_السفير49

الكاتبة chra kirkuki

كما ينبت العشب بين مفاصل صخرة

وجدنا غريبين يوماً

وكانت سماء الربيع تؤلف نجماً

ونجماً وكنت أؤلف فقرة حب..

لعينيك.. غنيتها!

أتعلم عيناك أني انتظرت طويلاً

كما انتظر الصيف طائر ونمت.

كنوم المهاجر فعين تنام لتصحو عين..

طويلاً وتبكي على أختها حبيبان نحن،

إلى أن ينام القمر ونعلم أن العناق،

وأن القبل طعام ليالي الغزل

وأن الصباح ينادي خطاي لكي تستمرّ على الدرب

يوما جديداً!

حبيبان نحن، فسيري بقربي كفا بكف

معا نصنع الخبر والأغنيات

لماذا نسائل هذا الطريق ..

لأي مصير يسير بنا؟

ومن أين لملم أقدامنا؟

فحسبي، وحسبك أنا نسير...

معا، للأبد لماذا نفتش عن أغنيات البكاء بديوان شعر قديم؟

ونسأل يا حبنا ! هل تدوم؟

أحبك حب القوافل واحة عشب وماء وحب الفقير الرغيف !

كما ينبت العشب بين مفاصل صخرة وجدنا غريبين يوماً ونبقى حبيبين دوماً.

ماما جاوبيني حبيبتي فدوة اني اسفة معرفت هيجي يصير من الخوف ماعرف شسوي امي من عرفت اني حامل ضغطها ارتفع ومن رجعنا للبيت وكعت ومتجاوبني خابرت دينا لحكيني ماما راح تموت ماعرف شسوي من تجين احجيلج زين هسة انطيها بسرعه تعالي ركضت اجيبلها الدوا من الهبطة نسيت وين مخليتها اروح واجي حتى ماكدر اسوق بعد نص ساعه جتي هي ومقداد شالها واخذناها للمستشفى وهي ظلت تحجي عليه

مجان بيها شي الصبح حجيت وياها انتي شمسوية احجي كل البلاوي من راسج

دينا كافي مو وقتها هسة بالبيت حاسبي اختج باوعت لآيه بزعل

مقداد اني متأكدة هي ورا اللي صار اخ منج مترتاحين لحد ماتموتين واحد بينا مو بيدج تركضين ورا المشاكل

عفتهم وكعدت وحدي ابجي ياربي ليش هيجي يصير بيا شمسوية بحياتي كله دينا منهارة تبجي بحضن مقداد ويواسيها كمت من مكاني اروح اتمشى بالحديقة احس راح اختنك حسيت ايد على كتافي قبل لا التفت عرفته منو اللمسة الي تمنيتها قبل شوية وعطره اللي يسبقه دايما بخطوات غمضت عيوني يمكن هذا حلم شلون يحضني بعد اللي سويته بي والحجي والغلط لاتندارين آيه يكفيج هالاحساس

مكدرت مأجى وامج بالعناية من توكعين وتنهارين ردت اني اكون اللي يشيلج ويحتويج

فتحت عيوني وباوعتله هالعيون اللي اسرتني من اول لحظة والملامح والشعر اللي صار بيها خيوط من الشيب مزيده جمال على جمال الاناقة والترتيب اللي هي من اولوياته حتى لو جان بأصعب ظروف الجسم اللي يوم عن يوم يصر احلى وارتب رغم العمر وأيده اللي مزينها الساعة اللي جبته اله هدية رغم ميسوى شي من اللي عنده الأصابع النظيفة والمقصوصة بترتيب شنو ناقصك شنو بيك محلو غير أني بحياتك

آيه اصحي على نفسج احنا بالمستشفى من نرجع للبيت تأمليني براحتج

شنو صار الدكتور طلع

أي طلع الحمدالله تعب بسيط بعد ساعة نكدر ناخذها للبيت تعالي كعدي اروح اجيبلج عصير لونج صاير اصفر هسة اجي لحظة

راح واني عيني على خطواته وهو يمشي دينا كعدت بصفي مكدرت اباوع بوجها هي صح اني الغلطانة اني اللي خليت أمي تتعب دينا اي شي تكولي مراح ازعل منج استاهل حضنتني وهي تبجي

آيه حبيبتي احنا ماعدنا غير بعض ماريد لا اخسرج ولا اخسر ماما ولا زيد اني كلبي مليان حزن وقهر مكبوت على بابا ردت اكون قوية واحميكم انتي طلعتي قهرج وبجيتي وسويت اهواية اشياء بس اني لا سكتت وبلعت الغصة من شفت ماما انهاريت ردت اموتج حبيبتي سامحيني

انتي سامحيني دينا اتمنى نرجع مثل قبل بس فات الاوان اللي سويته ميتصلح

لا بعد وكت واحنا راح نكون دوم ويا بعض أسندج وتسنديني دايما شفتي عماد اول ماخابره مقداد متركج وحدج حز بكلبي من مقداد حضني وشفتج مكسورة كعدتي وحدج بس من شفت عماد ارتاحيت

اوعدكم راح اتغير راح اسوي اللي تردوه مني شفته جاي وبيده العصير نفسي لعبت مكدرت اتحمل ركضت ادور على الحمامات حتى استفرغ ودينا تركض ورايه لزمتني حتى لا اوكع راح انفضح هسة شكوللها من تسألني

آيه انتي بخير ماكله شي من برا انتي دايما تاكلين اكل الشوارع وتتخربطين بعدين ابد متوبين

ههههه اي شسوي اشتهيتها واصلا احس طعمها اطيب هم زين مراح تفكيرها لغير شي طلعت واني اشوف عماد ومقداد واكفين على باب الغرفة اللي موجودة بيها أمي عيونه كله خوف وقلق سبقتني دينا

لاتخافون ماكو شي هاي كل ماتاكل من اكل الشارع والعربانات هيجي تصير بيها

ارتاحيت شوية من شفتها تبتسم على تعليق مقداد ودينا سمعت صوت تليفوني طلعته من جيبي حميد انطيته رفض وسألتهم بعد اشكد راح اطلعوها افضل تبقى هالليلة اهنا احسن

واني ودينا نفس الشي كلنا نحاول نبقيها الليلة حتى نطمن اكثر

اني لازم اروح وبطريقي اروح يم الحسابات انطيهم اجور مبيت لليلة آيه اذا ردتي شي خابريني ممكن مقداد شوية اخذته بعيد عنهم اريدك تبقيهم الليلة اهنا ضروري ميرجعون لبيتهم

خير شنو ناوي تسوي مفاجأة للحب وتريد وقت تاخذ راحتك اخ منك تستغل كل الظروف حتى تتقرب منها

فهمني غلط ميهم اي شفت شلون انتظر منك خبر يالله مع السلامه طلعت وركبت السيارة بسرعه حميد نروح راح يبقون اهناو

زين سيدي هسة تمام العجوز باقي بالبيت ويا السايق والحراس مشيتهم مثل ماطلبت مني حجيت وياهم باسم أستاذ مقداد

عفية حميد وصلنا وهو فتح الباب دخلنا السيارة الدنيا هدوء الناس نايمه والوقت ساعة 2 بالليل السايق كوة فتح عينه وطلع من غرفته حميد ضربه ودخله جوا فتحت الباب الداخلي ودخلت مريت بالصالة وبعدها ممر طويل الحقير ينام اهناك جناح خاص كامل مستغلة لنفسه فتحت الباب وشغلت الأضوية فز من مكانه رأسا لزمته من ركبته وهو شوية وعيونه تطلع من مكانه ها وين تحب تموت بالمزبلة لو بالمحرقة لو بالمي مال المجاري شبيك متجاوب لا يكون تفكر اخليك تموت بهالغرفة الملكية وعلى هالفراش الناعم لا لا لا مو ميصير عندك 3 خيارات اختار والله يلعنك

عفته وهو يكح

شبيك ابني اني بكد ابوك شوية وتموتني الله ستر شتريد بهالليل

انجب انت متوصل لأبوية ولا اني ابنك يا ابن تقصد اللي متبري منهم لو توفيق اللي قتلته حدد لان انت مشاعرك مختلطة اريد روحك مقابل الارواح اللي ضيعتها انت وامثالك

اني عرفت بيك مريض بس مجنت متوقع الى اخر درجه من الخبال

بعدين نشوف الخبال على اصوله كوم بدون صوت واطلع ويايه ماريد أسمع نفس

ليش تحولت من سفير الى رئيس عصابة عبالك سهل تاخذني وين ماتريد العب على كدك ياروحي

لزمته من ياقته وجريته انت مو مال احترام راح اشوفك السفير من يزعل شيسوي ركبناه السيارة وربطنا ايده وحلكه حميد خلي بالصندوك ماريد يوسخ المقاعد وصلنا للمزرعه جريته وخليته يكعد فتحت حلكه ها شلون جان المشوار حلو مو نفس احساس اللي جنتو تخطفوهم وتاخذون فلوس من أهلهم بعدين ترجعونهم جثث بس اني اريدك حي حتى تشوف سواد وجهك والناس تلعنك نانا تعالي ضيفنا مبين عطشان جيبيله سم يشربه

هاي العجوزة شتسوي يمك انتي ممتي من احتركت المخزن واني اكول هذا ليش لسانه طويل ويحجي بثقة انتي السبب مو الله يلعنج لو ضاربج بنفس الليلة طلقة مجنت انهان بهالشكل

مراح تموت اني انقذتها واني اللي حركت المخزن المتروس بمواد تالفة وسامه توزعها على الفقراء يانذل بعدك مشايف شي حميد جيب الاكياس انثره فوك راسه خلي يكعد يراجع نفسه وجرائمه طول ماهو بضيافتي يوميا اريدك الصبح تسوي بي هيجي وهسة اروح عن اذنك لازم ازيل الاوساخ من ايدي

متخاف على بنتك لو ابنك اذا خلال 24 ساعه ملكوني احسبهم ميتين لو ليش نروح لبعيد آيه موجودة ومهند يتمنى يوصلها بأي شكل ولا أقتل زيد وآيه بنفسها تموتك شلون فلم نهاية حبيبين تطلع

لعبت باعصابه مهند بضيافة المركز خبرت عليه قبل لا اجي اخذك مثل الجرذ الصبح راح يطلع عليكم مغيم راح ايام العز والسلطة هسة وكت دفع الحساب وجهالي متكدر توصللهم حتى بأحلامك اما آيه اذا لمستو شعرة منها

امحيك من وجه الارض وزيد حفيدك اللي جنت تمثل تحبه راح وميرجع

ياحقير مجرم جنت اعرف انت عندك سوالف مكسرة ومو خالي مصرت سفير ببلاش راح تشوف شسوي بيك عماد بسيطة بس خلي اطلع لازم اكطعك وصل بيدي

عفته يحجي براحته كولي نانا تردين شي

اي والله استاذ عماد ماعرف شلون اشكرك لو لاك جنت ميته هسة اذا تسمحلي خليني ارجع للبيت خليني اخدم ست سهيلة بنفسي مترتاح غير بوجودي يمها ومشتاقة لآيه ودينا وزيد اني شفت نفسي وكبرت بهذاك البيت لاتعتبره تقصير منك بالعكس كفيت وفيت لو عندي ابن مجان يسوي اللي انت سويته

استغفرالله انت بمكانه امي مرة ثانية لاتحاولين تبوسين ايدي اني حالي حالج ماكو بينا فرق راح اخذج بنفسي اذا انتي جاهزة لازم اشوف آيه بالليل مجانت وضعها زين اضطريت اعوفها علمود اجيب هالجلب من بيتهم

شربي هالحليب يفيدج ليش ساكته ماما زينه نايمه وانتي نامي ارتاحي طول الليل رايحه وراجعه للحمام الله يهديج مرة ثانية لاتاكلين شي مو زين

مالي نفس وخري من يمي شفتي عماد شلون راح وعافني حتى مخابر بعدها ومقداد طول الليل ظل يمج اكوللكم تغير متصدكوني

هاي شنو دموع الاشتياق لو عتاب متعرفين وضع عماد وشغله لازم تعذريه لو حاسدتني على هالكم ساعه ترى الافندي اللي نايم كبالج صارله شهر مسافر وعايفني

سمعتكم انتو الاثنين يعني لا أني ولا اخوية خلصانين من لسانكم الله يعينا عليكم نكديات مع مرتبة الشرف كومو نرجع للبيت خالة فتحت عينها ومبين تريد ترجع بسرعه

اي والله ابني اريد ارجع للبيت عندي حسابات وشغل اهواية خليت عيني على آيه بعتاب دينا حست اكو شي سكتت علمود مقداد مردت اصغر اخوه كدامه

وصلنا للبيت امي زعلانه مني اول مافتحنا الباب شفت نانا ركضت عليها مو مصدكه عبالي راحت ونستنا بجيت بحضنها وين جنتي ليش رحتي

حبيبتي كافي لاتبجين اني يمج بعدين نحجي حمدالله على سلامتج سهيلة ظل بالي عليج

الله يسلمج عمري البيت نورت بوجودج كلشي تمام ردت اعرف رجوعها يعني عماد خلصنا من العجوز هي فهمت عليا

الحمدالله انتهينا كابوس وراح

شنو هاي الالغاز ماما ونانا آيه انتي فهمتي شي

لا والله

خابري عماد يجي اريد احجي وياه ساعة ويكون اهنا افتهمتي آيه

هالمرة آيه ماما فهموني شنو الموضوع

الموضوع يا دينا كلش بسيط اختج حامل وهي عايفة بيتها من زمان وكاعدة يمنا شتكول علينا الناس اخ منج يا آيه

دخلت وسمعت الحجي ردت اضحك الأفندي حتى وهمه زعلانين يجتمعون سويا وينك ياسر تعال اسمع فضايح عماد وين وصلت شافوني آيه راحت انحرجت دينا مو ناوية تصيرين حامل مثل اختج

تعالي وين رايحه ام البلاوي خطية انحرجت ارجع لبيتكم مقداد خلص أني راح ابقى يم امي زعلانه ومن اصير حامل ارجعلك شتكول

لاتحجون على احبابي آيه وعماد انشالله كلشي تنحل ونرتاح هسة يجي راح يغير ملابسة يريد يشوفكم راح تفرحون بالاخبار اللي تسمعوها

رحت للبنك حتى اسحب فلوس شفت حسابي مجمد ماكدر اسحب ولا فلس سألت على حساب جدي بلغوني ساحبها من اسبوعين انصدمت ليش ممبلغني يريد يلعب من ورايه خابرت سكرتيرة آيه لان تليفونه مقفل شنو صاير

استاذ مهند اني ماعرف شي ياريت الحجي هو يحجي وياك بنفسه اني راح اقدم استقالتي تعبت من الشغل اريد اسافر وارتاح لحظة مهند انت ويايا على الخط الشرطة محاوطين الشركه بسرعه تعال

شنو ليش سمعت صوتهم وهمه يحجون وياها اخذوها وهي تصيح ممسوية شي لايكون انكشف الصفقة الاخيرة رحت بسرعه لبيت خالي لازم اشوف جدي فتحولي الباب الحراس ودخلت شفت عماد وحميد واكفين كانه منتظرين ردت ارجع سدو الباب قفلت باب السيارة وكعدت

مو ناوي تنزل شنو تنتظر افرشلك السجادة الحمرا ماعندي مانع حميد جيب فد حديد اكسر الجام واطلعه منه و اخلي الكاع احمر من دمه انزل بسرعه

فتحت الباب ممسوي شي وداعتك بس جيت اشوف جدي

لزمته ودخلته جوا اكعد نانا روحي صيحي آيه خلي تسمع ابن عمتها اللي محتميه بي ومصدكته شنو من بشر ويا جده

نزلت على اصوات اهلي وعماد شفتهم كاعدين ومهند يرجف عماد واكف على راسه شكو مهند شمسوي هالمرة ومتوتر باوعت على عماد حتى يطمني

آيه كعدي وسمعي لاتنهارين من اللي راح تسمعيه رجعت على مهند من اسألك راح تحجي لو تريد ضرب جسمك يوجعك من زمان مماخذ حصتك اول شي منو قتل أبويه تعرف لو اضربك

ماعرف صدكني

ضربته وكع جريته وكعدته تحجي لو اكمل

جدي خطط وقتله حتى خالي يصير بمكانه

اني ضربته بدل عماد ياكذاب ياحقير تقصد توسخ اسم بابا وهو ميت

وخري آيه ابوج مجان يدري هو جدج راس كل البلاوي هو اللي قتل ابويا وهو اللي

كمل شنو لايكون قتل ابنه همينه جاوبني مهند

اي آيه جان ناوي يقتل عماد بس ابوج من كشفهم قتلوه وجدي جان يدري

لاتكمل ياحيوان انتو شنو وينه هالحقير اللي قتل بابا شنو متخافون من الله

مو اني آيه اصلا ماكدر اقتل

على كيفج حبيبتي كعدي ارتاحي اي متعرف تقتل بس تنصب وتسوي تزوير اسمعني راح ياخذك حميد ويسلمك للشرطة تحجي كل اللي حجيته اهنا واذا حاولت تنكر طلعت من جيبي تسجيل صوتي وقبل لا انسى اسم آيه متجيبها بخير او شر حميد اخذ هالزبالة خلي يروح للمكان اللي يستحقه هو وامثاله

ابوس ايدك عماد ابني صغير خاف الله ارحمني خلوني اروح راح اسافر ومتشوفون وجهي ابد

نعم عيد يا نكرة اعوفك تفلت من العدالة انت متعرفني الظاهر زين لو تموت كدامي ماارحمك هسة فكرت عندك ابن صغير ومن جنت تجيب حليب منتهي صلاحيته تغير تاريخه وتبيعه بالاسواق مفكرت جم طفل مات وجم ام واب كلبهم احترك على طفلهم ليش اني ارحم ابنك هسة

عماد اللي يصير شنو زين جدي لازم اشوفه شلون قتل بابا

حبيبتي راح تشوفي وتحجين ويا بس مو هسة خليني أسلمه للشرطة وبعدين استفسري براحتج اللي عليه سويته وعدتج اجيبلج قاتل ابوج اتصور وفيت بوعدي

احس نفسي اشكد صغيرة كدام عماد وكدام اهلي واخوه اللي طول مايحجي يعبر عن فخره بيه وامي اللي تشكره ودينا اللي متعرف شلون تعبر عن فرحتها بكشف الحقيقة شلون تسلمه للشرطة لازم نموته بأيدنا لازم ننتقم منه

آيه ماكدر اسويها لان أني سفير .

#عاشقة_السفير50 والأخير

الكاتبة chra kirkuki

وَيَبْقـَــى الْحُــــبُ فِي قــَلْبِي

لاَ شَيء عـَنٌهُ بَــدِيل

ولاَ تَسْـَأَلْونى من احِـــبُ

فَأَنَا أُحِبُ ذاك السفير

فَالْحُـــبُ فِـي أَعْــمَاقِي

لاغِــنٌَى عـَـنْهُ وَلاَ سَــبِيل

وَمَهْمَا كَانت الأقْدَار سَيَبْقَى الْحُـبُ

بِقَـلْبِي أَصِـيل

وَمَهْمَا تَغَـــــيًَرُ الزًَمَـانُ وَالْمَـكَانُ

فَـعُمْرِ الْحُـبِ طَوِيِل

لـنْ يــَمُـوت الْحُــبُ يَـوْمَـاً

حَـتًَى وَإِنْ طـَـالَ الرًَحِـيل

فـَقَدْ خُلِقَ الله الْحُـبَ

لِتَحْيَا الْحَيَاه ويَصِيرُ الْكَوْنُ جَــمِيل.

شنو منتظرة نزلي مو ردتي تجين تشوفين بعيونج

ماكدر عماد كلما افكر شسوى بينا واللعبة الحقيرة اللي لعبها علينا شلون اشوفه واني ماكدر اذبحه ياربي صبرني

اني وياج حبي لعد شكول على نفسي سنين واني انتظر هاليوم جنت اكول بس الكي قاتل ابويا أموته بسنوني بس من وصل بيدي مسويتها تدرين ليش ماريد ايدي تتوسخ بهالأشكال ماريد ايدي اللي اخليها على شعرج اللي تنزل على عيونج وتحرمني من شوفتها وارجعها ورا اذنج تتوسخ ماريد جهالنا يجي يوم ويعرفون ابوهم قاتل حتى لو تعددت الاسباب

عماد انت ملاك لو بشر لو وهم لو خيال لو حقيقة شنو انت تفكر بكل شي تضحي بنفسك علمود اللي حواليك

حبيبج اني هالعيون ماريدها تنزل دموع يالله انطيني ايدج خلي نخلص هاليوم واسلمه للشرطة وننتظر العدالة الالهية فتحت الباب جان يزحف يريد يوصل للمي الظاهر عطشان قربت المي منه واني اباوعله بأسف مقبل يشربها رغم كل اللي هو بي بعده يشوف نفسه فوق الناس

اول ماشفته وكعت بمكاني خليت أيدي على بطني خايفة لايصير بي شي واني اصيح ليش ليش علمود شنو فلوس ماعرف شكولج ابويا جان مثل ظلك يسمع كلامك الوحيد اللي بقى وياك من جهالك هاي جزاته تقتله بعد ماورطته بكومه قضايا

عماد جذاب لاتسمعين كلامه يريد يوكع بيناتنا ويرجعج هو مجرم وحقير وشخص مريض بعدي عنه اشكد ماتكدرين

بعدك تحجي وتكول عماد هيجي وهيجي انت المريض مو هو لو غيره جان ذابحك من اول مايسمع انت اللي قتلت ابوه عرفت من مهند حبيبك الشيطان الصغير

حتى مهند ورطته ياعماد انتظر اللي راح يصير بيك

منتظر شعندي اليوم أسلمك للشرطة ومن يخلص التحقيقات والمحكمة تقرر موتك ساعتها اني اسافر بعيد وارتاح وجماعتك بنفسهم يتخلون عنك محد يوكف وياك راح تموت وانت ملعون وحيد والسكرتيرة زوجتك السرية اللي جانت تنطيك معلومات عن تحركات أبنك تنتظرك بالحبس

هههههههه متكدر تدري ليش آيه موقعه على اكثر العقود والصفقات يعني تشتكي عليا هي تروح بيها العب على كدك

عفية يا جدو خوفتني شلون نسيت سالفة آيه زوجة السفير عماد والفضايح اللي راح تنشر وسين وجيم شنو شايفني غبي مثلك مثلا لو مثل مهند الجبان اللي باول ضربة من التحقيق اعترف عليك بكل شي وهسة دورك تعترف بكل شي واني اسمعك وآيه تسجل اعترافاتك حميد جيبلي المسدس خلي نشوف الحجي يتحمل ألم بالصدر لو بالبطن لو بالرجلين يكولون عندك سكري يعني اي جرح بالرجلين يبتروها وتصير بلا حول ولا قوة

آيه ساعدي جدج هذا مخبل وميدري شيسوي اني حميتكم وردت احمي ابوج منه والله حاولت وياه كلتله راح يضيعك لاتقدم ملفات فساد تخص الاشخاص اعضاء الحزب هو ضيع ابوج صدكيني والكمين جان هو يخابر عماد ومن يوصل يقتلوه بس عماد تأخر قتلو ابوج بالغلط

اسكت اسكت كافي تكولها كأنه شي عادي مو ابنك والحزن والبجي بالليل كله كذب وزيد اللي ضيعته لو لا الله ستر عليه زيد اللي مثلت علينا تحبه علمته يدخن ويسوق سيارة حتى يموت وتكون الحادثة طبيعية والرجال اللي اتهمته بقتل ابوه سفره يم ابنه حتى يرجع يدرس على حسابه اني قبل لا اعاتبك اعاتب نفسي شلون كدرت تلعب بعقلي وخليتني ضايعه مثل الغبية ادور حوالين نفسي وهذا اشرت على عماد اللي جنت كل لحظة اموت ببعده عني ومثلت كدامه ماريده حتى ارضيك وارضي اخوية اللي غسلت مخه خليتني أخذ حبوب حتى انام حولت حياتنا الى جحيم الله لاينطيك انشالله اتمنى اموتك بيدي

كومي كافي حبيبتي اخاف يصير بيج شي ميستاهل لاتضوجين نفسج علموده مراح ارتاح لحد مااوصله لجزاته وعد مني

لاتوعدني عماد اني استاهل اللي يصير بيا هاي حوبتك اذيتك وجرحتك بكلامي وافعالي خسرتك اشكد جنت غبية ردت احمي اخويه واهلي طلعت خسرانه حياتي

خليت اصبعي على حلكها واني ابوس بيها انتي متخسرين همه الخسرانين انتي ماكو منج اثنين طيبة القلب ونقية متعرفين بالدنيا عايشين هالنوع من الناس المهم هسة شلون تراضيني

عماد الله عليك اني استاهل فرصة ثانية لو عندي عين اكولك واطلب منك شي احبك يا أول واخر واعز مخلوق عندي بالدنيا

لا هاي مو مقبولة تكوليها اهنا لازم نسوي ترتيبات ونجهز لهالمناسبة الحلوة خلي نطلع ونروح نبدي حياتنا اهواية ضيعنا من ايامنا احس روحي فراشة وتطير

ردت افرحه واكوله اني حامل بس حسيته محلوة بهالطريقة راح اخليها لغير وكت عماد مشتاقة لعشق وزيد وكريم لحد الان ممتخيله شلون اخذت زيد من بيت خالي وديته لبريطانيا يكعد ويا كريم ويسجل بالمدرسة كل هالأمور يمتى لحكت تسويها هو اصلا مكال شي من جنت اخابره

اني وصيته ميحجيلج المهم هسة مستقبله مراح يضيع وبعدين منو عشق وزيد وكريم اني ماعرفهم اني اعرف وحدة هسة بحضني وايدها على زر قميصي تلعب مادري على شنو ناوية

اكولك ومتضحك عليا اوعدني أريد اخذها انيمها يمي بالليل واشمها وانام براحه

واني اكول ليش كل فترة قمصاني يختفون من الدولاب واني اللي جنت هسة فاكر بغير شي خربتي جوي

مو وكتها عماد نفسيتي صفر من ورا جدي ومهند الله ياخذهم

لا تكملين المفروض تفرحين بانت الحقيقة ولو أعرف احساسج اشكد تتألمين صعب اقرب الناس من دمج ولحمج يغدر بيج المهم نرجع لموضوعنا يمتى ناوية تشرفين بيتنا ياحلوة

اشك انتقلت العدوة الك قبل جنت اني اشاكسك هسة انت صرت مثلي علمتك وسبقتني

تدرين شنو احساسي هسة شغلتها اغنية سمعي

يا صوتك اللي ما يفارق مسمعي

هذا الكلام اللي بغيتك تسمعه

في قمة احساس الوعي واللاوعي

اهوى غرامك واعشقه واستمتعه

الله عليك ياعماد صرت عاشق وشاعر بأمتياز حبيبي الله لايحرمني منك وين رايحين هذا مو طريق بيتكم

شنو غيرتي رايج مو على الاساس مترجعين هسة

وانت بعد اللي كلته واللي سمعتني اياه اكدر اروح لبيت اهلي اريد اكون جنبك بكل لحظة وكل ثانية وكل رمشة عين

سلمت الحجي بنفسي للشرطة مع كل الاثباتات والدلائل مرت شهرين على هالسالفة تحاكم هو مهند انتظر نتيجة الحكم على أحر من الجمر اخذت آيه وسافرنا يم الجهال رجعت حليمه لعادتها القديمه تتعارك ويا عشق ويا كريم علمود اكون الها لوحدها

دادي اشك آيه حامل لان نفس حركاتها من جانت حامل بعشق صح لو لا

صرت رجال وتحجي سوالف مال الكبار ميخالف دكتور انت ادرى بعد هاي تصير من اختصاصك

لا انشالله اطلع جراح دادي اول سنة طبية لاتخليني اعوف الكلية واتنازل اني من اشوف آيه هيجي ماخلي زوجتي تحمل ابد

هههه اخ ياكريم ياقطعة من روحي يمتى كبرت لحد الان اشوفك ذاك الطفل اللي جان يلعب بحضن ابويا الله يرحمه هسة صرت تفكر بالزواج أي حامل بس مكالتلي عبالها ماعرف الله يستر شلون تريد تفاجأني

ترى سمعتك استاذ عماد تريد تتزوج مو عبالك اخليك هيجي بكل سهولة وانت كريم مع الاسف حسبتك مثل ابني كاعد تسمعه وساكت متدافع عني

شنو مثل ابنج آيه حسستيني مرضعتني ترى كل اللي بيناتنا 12 سنة لاتمثلين دور الام ترى ميلوكلج رجعي لطبيعتج من تشوفيني حاضن دادي لو ابوسه تاخذي يمج

هههههه يازواج وانتي مطلعه عيني خلي اكدر عليج بعدين احلم بالثانية كملت الرسمه لو بعد ترى عندج منا لحد الليل اذا مكملتيها مراح اخذها منج اعتبري هديتج ملغية وممقبولة

مو بكيفك تاخذها وتعزمني بأرقى مطعم موجود اهنا واروح قبلها للصالون وتشتريلي فستان سهرة من اللي شفته على صديقتك جيسي اللي شفتها وشوية وعيونك تطلع من مكانها

شنو كل هالأفتراءات الله ميقبلها جيسي 15 سنة اعرفها ولا يوم باوعتلها بنظرة مو زينه اصلا ماباوع غير عليج بنظرات مو زينة وانتي علمتيني هالشي حتى سألي اهلي كوليلهم عماد منو خربه كلهم يكولون آيه

عفتهم واني اضحك من كل كلبي كلشي رجع مثل قبل واحسن وصرت ادلل على عماد بكيفي وماخليه يسافر وحده قفلت الباب وكمت المس الفرشة بيدي حتى اكمل اللوحه اللي حلفني عماد ماجيبله هدية بعيد ميلاده غير لوحه ارسمها بايديه حتى اشترالي كل الغراض بس الفرشة هاي اللي جنت ضامتها من سنين هدية بابا ردت يكون اول شي أستعمله يكون من ريحته وذكرياتي وياه والون بيها حياتي من جديد عماد عباله راح ارسمه بس اني رسمت نفسي واني كاعدة مخليه ايدي من جوة وحاضنه بطني بداخلها طفل حتى يكون فرحتنا فرحتين عيد ميلاده وولادة طفل جديد بعائلتنا باقي شويةواكملها حتى اروح اتحضر لحفلته خابرت دينا اللي هسة صايرة مديرة شركتنا واني مرات اروح اساعدها ومرات اتكاسل ابقى بالبيت ويا عماد اتحارش بي من يشتغل يكوم ويطلعني برا المكتب دينا حجزيلي فندق يكون راقي لمدة يومين اريد استفرد بعماد لوحدي

عبالي صايرلج شي فوك الشغل والمسؤوليات بدل ماتساعديني بكل عين تخابرين تقهريني تردين فندق تروحين بيها ويا عماد متكولين اختي خطية

بكيفنا عيني بعدنا شباب ليش الحسد ياناس

الله يهنيكم ترى اني اصغر من عماد اذا تقصدين كلمة شباب متشمله هو واخوه اللي ماشوفه بس بالليل

لا حبي هذا زوجج اللي صاير شايب عماد فدوة لروحه وقلبه بعده شاب

استغفرالله خلصيني شتريدين بعد يازوجه الشاب لو بيج خير من تروحين للفندق كوليله شيلني ودخلني للغرفة شوفي شلون الشاب يقلب لشايب يالله مع السلامه قفلته منها واني اضحك على خبالها الحمدالله رجعت مثل قبل سمعت صوت الباب بدون ماارفع عيوني جاوبت ادخل

مديرتي الحلوة اتسمحين بشرب فنجان من القهوة وانا اتأمل عيناكي اللوزيتان وألمس شعركي المنسدل على ظهركي كخيوط حرير

تشرب القهوة وتباوع بعيوني فهمناها عادي بس من تلمس شعري لا لهنا واكفة احنا بالشغل ميصير شيل هاللمسات والأشعار الغزلية للبيت مو تجي بالليل وتنام ماسمع غير شخيرك

اني يادينا اشخر منو ينومج بشعر ويكعدج بقصيدة مقداد مثلا

لا حبيبي وروحي وزوجي وكلبي وابو اولادي يااعز الناس

كومي نروح نتونس ونتغدا بمطعم ونمشي بالبارك واني اسمعج احلى الكلام والاشعار الله لايحرمني منج يارب

نانا شفتي البيت خالي بقينا وحدنا الجهال كبرو وراحو وتوفيق الله يرحمه راح قبل اوانه

الله يرحمه مو كلتي اخوج وزوجته وابوج راح يرجعون يستقرون اهنا ويانا يعني منبقى وحدنا

اي هو كل فترة يكولي تعالي لو احنا نجي ماكدر اعوف هالبيت كلتله همه يجون اريد عائلتي تكبر والبيت ينور بيهم واسمع صوت صراخ ولعب وضحكاتهم همه وجهالهم

انشالله زيد يرجع وينور هالبيت كلش مشتاقتله بارحة دزلي صورته معرفته كبران شلون يحجي بأدب ويكولي فدوة لريحتج نانا مشتاقلج عبالك مو زيد الوكيح اللي طول اليوم اركض وراه واني اكوله تعال اغسل تعال اكل تعال نام وهو ميسمع كلامي

اي والله كلش فادته وجوده ويا كريم الله يحفظهم رغم فارق العمر بيناتهم بس احسهم متفاهمين اهواية راح يرجع بعد أيام ويا آيه

سويتلج كل اللي ردتيه يالله بسرعه طلعي هديتي من حقيبتج طفيت الشموع واتعشينا واكلتي الكيك اللي غصبتيني حتى اكل منها هسة دوري اتدلل عليج

لا حبيبي هديتي انطيك اياه من نوصل للفندق اللي حجزته نبقى يومين بي

شنو وبنتج اللي عايفتها ويا المربية يا فندق يمتى لحكتي تسوين هالشي تردين تفترسيني واني وحدي لاحول ولا قوة

اي طبعا مو اني النمر وانت الغزال دايما يالله بسرعه نروح قبل لاأغير رائي واسويها اسبوع افتراس

من هسة اكولج تنطيني وعد بدون اثار جانبية وطبعات حمرة وخضرة عندي مؤتمر بعد فترة شكو تباوعيلي برفعه حاجب هالنظرة ميطمن هههههه وصلنا للفندق وهسه ليش واكفه دخلي

يعني متفهم شيلني ودخلني بنفسك لان متراهنة عليك اذا متسويها يعني صرت شايب واذا سويتها يعني انت اسدي وشاب

الله لاينطيها اللي متراهنه وياها شنو هالدكه الناقصة اشيلج وامري لله شلتها وهي تصور فرحانة وتحجي فهمت متراهنة ويا دينا اني الج دينا اذا مخليت اخويا يطلب منج تشيلي فلا اني عماد

غمض بسرعه حبيبي فتحت حقيبتي وطلعت الصورة ترررررا شلونها المفاجأة ليش ساكت

أحبج أحبج أحبج لأخر يوم بعمري وهاي أحلى هدية بعد عشق

عماد احسك تعرف مو لان تعبيرات وجهك مو مال واحد متفاجأ اوف من يمتى تعرف وساكت

من شفتج بالمستشفى امج جانت تعبانه متحملتي ريحه العصير عرفت لان جنتي بعشق هيجي ردتج تكولين بنفسج معرفت تنتظرين عيد ميلادي حتى تسوين المناسبة مناسبتين

دايما انت كاشفني مادري ليش علمود تحبني وتعشقني مو

من هسة اكولج مو معناته عرفتج حامل تكومين تستغلين هالشي ماريد افز بالليل من صياحج وعماد الحكني راح اجيب كل حركاتج السابقة حفظتها

قصدك تريد حركات جديدة حصريا ولأول مرة ولا يهمك غالي والطلب رخيص مو احجي وياك ليش نمت

رجعنا سجلنا عشق بالمدرسة اول يوم رحنا وياعماد سويا وصلناها تذكرت قبل من جان عماد ومنال يوصلون كريم جنت اموت من الغيرة واضطر اسكت مرات مجنت اتحمل احجي ولاكأنه يسمعني كأنما احجي ويا نفسي شفتها هي وزوجها ويا جهالها عشق راحت يمهم باوعت على عماد

اللي على لسانج خلي لنفسج اتصور كبرنا على هالحركات مو سلمت على منال وزوجها ورجعنا للبيت طول الطريق متحجي ويايا لزمتها من ايدها ودخلتها للمكتب اريد اعرف تغارين على شنو اني احبج وهي تحب زوجها

مكدرت الزم نفسي ضحكت يعني لازم اسوي نفسي زعلانه حتى تكولي احبج بخيل

اني الج تضحكين عليه منا لحد اسبوع نامي لوحدج من هالساعة راح ابدي احسب

متكدر اوك بيبي رايحه انام وارتاح خليك بالمكتب اشبع بالكتب واني اتمدد واخذ راحتي ماريد بعد ربع ساعة لمسات واحضان

نصابة تسوين اغراءات ميهمني روحي اني طالع معزوم على الغدا ويا اصدقائي الوعد من ارجع

بديت ارسم من جديد فتحت معرض صغير واشتريت محل انتيكات ضفتلها لمساتي واعرض بيها صوري وعماد يشجعني اهواية حبيت شغلتي اهواية بيت اهلي بالاسبوع ثلاثة مرات اروحلهم ومرة انام يمهم عشق ودلالها بعدها تضوجني واحس بغيرة وخصوصا من ترجع من المدرسة تكول لابوها المس تسلم عليك اكوم ارزلها وعماد يأشرلي اسكت واني ماهتم اله

اليوم عندي حفلة تكريم الصبح كله جنت مشغول باللقاءات واستقبلت الصحفيين ببيتنا اضطريت اغير لبسي اكثر من مرة صار الدنيا ليل آيه واصله لشهرها مردنا نعرف شنو جنس الطفل حبينا يكون مفاجأة جانت تجي وتروح تحضني واني اوخرها ملابسي ديربالج لا تعلق بيها عطرج

ليش مو عاجبتك مو انت جبتها اليه وخر زعلت منك

فديت الخشم المنفوخ صاير بكد البطاطه عيونج رايحات اذا تعبانه ارتاحي بعدين تمشي وتحركي

لو ياخذوني لصالة الولادة اعرف راح تكوللهم ولدوها وهي تمشي لاتخلوها تكعد

مو لهدرجه حبي علمودج غير اريدج متتعبين بالولادة اني طالع ديربالج على روحج نزلي كعدي يم أمي لاتبقين وحدج فوك

عماد الله يحميك حبيبي ودعته ونزلت كعدت ويا امه واحنا نشوفه بالتلفزيون يحجي كمنا نبجي من الفرحه فخورين بي وبأنجازاته ماخذين راحتنا حسيت بمغص قوي يروح ويجي كلت اسكت واتحمل رحت اشرب مي بالمطبخ صيحت ام عماد جتي تركض عليا منكدر نخابر عماد ومقداد وياسر وياه أخذتني ويالسايق للمستشفى الخاص مالت منال ياربي كلما اريد ابتعد عنها القسمة والظروف تجيبني يمها دخلوني للصالة واني اصيح عليهم اريد عماد

كملت الحفلة كرموني رجعنا بالسيارة فكرت وقررت راح اعوف الشغل واقدم استقالتي اريد ارتاح واعيش بين جهالي الحمدالله مناقصني شي بعد ماعرفت قرار المحكمة جد آيه حكمو عليه بالسجن المؤبد ومهند 15 سنة الدنيا دوارة اشكد ماتظلم الناس يجي يوم وتوكع بشر اعمالك أمي خابرتني آيه ولدت مصدكت الحمدالله ياربي اليوم كرموني واليوم صرت أب للمرة الثالثة وصلت للمستشفى آيه نايمه وابني بصفها امي تكول

حتى هذا يشبهك من وانت صغير سبحان الله هسة تأكدت آيه مو بس تحبك تموت عليك

أخ بطني جيبولي عماد خلي يشوفني

حبيبتي كومي شوفي القمر اللي نايم بصفج مسحت جبينها ورتبت شعرها واحجي وياها واجابتها عكس سؤالي

عماد حلوة جانت الحفلة بيها نسوان وبنات اهواية

لا حبيبتي كلهم رياجيل ومحلوين ماكو وحدة احلى منج ياروحي انتي كومي بالسلامه وماريد غيرج

اني بخير بس ماكدر افتح عيوني اريد انام احضني

باوعت على امي وهي تضحك على سوالف آيه هم زين انتي موجودة مو غيرج

طلعت من المستشفى للبيت عماد مسوي حفلة وموزع ثواب على سلامتنا كل ماباوع على ابني وأقارنها بصور عماد من هو وصغير نفس الشبه حتى عشق باختلاف هي بنية فرحني بقرار استقالته راح نرتاح اخيرا علمني عماد ان الحياة مثل ماتنطي تاخذ ولازم نحمدالله دائما اخذ مني بابا عوضني بعماد وبنتي وابني وعلمني اللي يجتهد عمره ميخسر هو الرابح دايما علمني الظلم ميدوم لأحد كبرني على أيده بعد ماجنت تحت جناح أبويا واهلي طفلة بريئة بجسد انثى حضنته واني ادور بين ضلوعه الحضن اللي حاربت وتعبت ونكسرت وضعفت لحد مااستقريت بي أحبك

منو أنتي هسة

اني هسة ودوم ودايما عاشقة السفير .

ومن فرط عشقى لك ..

اعتنقت حبك " مذهبآ " ..

وفى محراب عيناك " أقمت صلاتى " ..

وجعلت شفتاك " كتابى المقدس " ..

وبين يداك " أكملت دينى ".

دمتم على خير متابعيني الاعزاء وصلنا لختام رواية عاشقة السفير اتمنى تكون نالت أعجابكم تحياتي الكم