تحميل رواية «عايز حضن» PDF

بعدما كنت خلاص...

علي وشك اني اتحبس

بتهمة الشروع في القتل

و لبست الكلبشات في ايديا فعلا....

فجاءة ...

ظهر الي انقذني من الورطة

الي انا فيها دي

وده حصل ..

لما سمعت صوت

كنت اول مره اسمعة

وصاحب الصوت...

كان بيخاطب كريم بيه

وبيقولة..

متخليهمش ياخدوها يا كريم

البنت دي بريئة

في اللحظة دي

اتجهت عيون الجميع باتجاه الصوت

واتفاجئنا بان صاحبةالصوت

هي...(الست ثريا )

وفي اللحظة دي

كريم بية فضل متنح شوية

و مكنش مصدق نفسة

وبسرعة جري علي الست ثريا

وفضل يبوس ايديها ..وراسها ويقولها..

انتي بتتكلمي... وبتتحركي كمان

يعني خفيتي؟

حمد لله علي سلامتك يا امي

فا بصتلة امة

وقالتلة...

الله يسلمك يا حبيبي

انا بيتهيالي ان ربنا شفاني بس

عشان انقذ البنت المظلومة دي

(ادارة مجرمة والبنت بريئة)

انا كنت سامعة وشايفة كل حاجة

لكن مش قادرة انطق

وبمجرد ما شعرت برغبة في اني ابرئ عفاف

فجاءة..

لقيت نفسي بتكلم وبتحرك معرفش ازاي

في اللحظة دي

اقترب ظابط المباحث

من الست ثريا

وسالها..

وقال..

طالما قدرتي تتكلمي يا حاجة ثريا

يبقي لازم ناخد اقوالك

فا ردت الست ثريا بحماس

وقالت..

ايوه انا عايزاك تاخد اقوالي...

وانا هحكيلك علي الحقيقة كلها

وفعلا..

الست ثريا سردت الحقيقة كلها.. للضابط

وقالت علي كل الي شافتة وسمعتة

وشرحت للضابط

الطريقة الي خدعتني بيها ادارة

عشان تغصبني علي قتلها

فا بصلها الضابط

وقال..

يعني انتي بتشهدي

ان المتهمة

بريئة من محاولة قتلك؟

والي حاول يقتلك هي..مديرة منزلك

زكية...الشهيرة ب ادارة ؟

قالت...ايوه اشهد بكدة طبعا

فا اخد الضابط اقوالها...

وبعدها ..

بدء يوجه ل.. ادارة

الاتهام المنسوب اليها؟

وبدل ما ادارة تعترف علي عمة كريم...وتفتش المستور

بصت في الارض

وقالت..ايوه حصل..

انا طلبت من الجليسة عفاف انها تقتل الست ثريا

مقابل ٢ مليون جنية

وعفاف رفضت فعلا

فرجع الضابط يسالها تاني

وقال..ومين الي طلب منك تعملي كده؟

وبرضوا بدل ما تراجع نفسها

وتحاول تتبرء من التهمة

وتقول ان عمة كريم هي السبب

اصرت علي الاعتراف...

بانها هي الي...

اقدمت علي ارتكاب الجريمة بمفردها

لانها انها كانت بتكره الست ثريا

واعترفت علي نفسها فقط

فا امر الضابط يفك الكلبش عن ايدي

ووضعة في يد ادارة.. والطباخ ..والسواق

و كل الي اتورطوا مع ادارة وشهدوا زور ..

راحوا معاها

في اللحظة دي

انا بصراحة ...كنت عايزة اشهد علي عمتة

واقول..ان كل الي حصل ده كان بتحريض منها

لكن...التزمت الصمت..

لما لاحظت ان الست ثريا اتسترت عليها

فا قلت..يمكن تكون خايفة علي سمعة العيلة

فا متكلمتش انا كمان

المهم...

بعدما انصرف رجال الشرطة

اتصل كريم بالطبيب الخاص بالست ثريا

وطلب منه يجي فورا

عشان في اخبار سعيدة

وبعدها...

بدء كريم يحتفل و يهنيئ امة علي شفائها

وفي اللخظة دي

قربت العقربة عمتة

عملت نفسها فرحانة بشفاء الست ثريا

وقالتلها...الف حمد لله علي سلامتك يا غالية

يعلم ربنا اني كنت ديما بصلي وادعيلك ان ربنا يشفيكي

فا رمقتها الست ثريا بنظرة مليئة بالكره

وقالت..صادقة طبعا

اكيد شفائي

كان بسبب بركات دعاكي

وانا اوعدك...

اني هردلك الجميل قريب

وفضلت الست ثريا مثبتة عنيها في عين عمتة ..

وبصوا لبعض بصة مخيفة

بدون ما يقولوا اي كلام

وفي الاخر

اتكلم كريم بية

عشان يقطع لحظات الصمت دي

ووجه كلامة لامة

وقال....

احنا لازم نحتفل بالمناسبة العظيمة دي يا امي

فا ردت الست ثريا

وقالت..

ايوه بس الاول..

احنا لازم نكافئي عفاف

الي رفضت الرشوة ...

و اتعرضت للظلم ...والبهدلة عشان تنقذ حياتي

فا بصلي كريم بية

وقال..

سيبي مكافئة عفاف عليا

انا اصلا محضرلها مفاجئة

وقبل ما يكمل جملتة

ويقول ايه هي المفاجئة

لقينا الطبيب داخل

ولما عرف بشفاء الست ثريا

طلب انه ينفرد بيها عشان يكشف عليها

وفعلا..خرجنا كلنا من غرفة الست ثريا

عشان الدكتور يشوف شغلة

وبعدما خرجنا للصالون

لاحظت ان عمة كريم بية كان وشها مخطوف..

ومش علي بعضها

وفهمت ساعتها طبعا

انها خايفة

لا ادارة تجيب سيرتها في التحقيقات

والي زود من سؤ حالتها النفسية

اكتر ..

انها كانت ملاحظة اهتمام كريم بية بيا ...

وافتكرت انه معجب بيا

من خلال كلامة الكتير عني

وانبهارة بموقفي...مع امة

لما رفضت الملايين وانقذتها

وانا طبعا كنت فاهمة حقيقة اهتمامة

وكنت عارفة

ان شعورة ناحيتي...

مش اكتر من شعور بالامتنان

عشان كده

مكنتش متعشمة في اهتمامة اوي

ولا كنت بحلم انه يفكر فيا اصلا

المهم..

بعدما خرج الدكتور من عند الست ثريا

قال..

ان سبب شفائها

هو...

..الضغط العصبي الي اتعرضتلة

لما شافت شخص بيتعرض للخطر

ساعتها جسمها رفض يستسلم للعجز

وخصوصا..

ان الشخص ده كان بيتعرض للخطر بسببها

وفعلا جسمها اتحرك...

وعقدة لسانها اتفكت ....واتكلمت

يعني باختصار

رب ضرة نافعة

المهم

بعدما الدكتور

بارك لكريم بية...

والست ثريا علي الشفاء

حذر الجميع .. من تعرضها لاي انفعال

مهما كان بسيط

عشان كدة

منع اختلاطها باي حد

لمدة شهر علي الاقل

لان وارد انها تتعب تاني

و ممكن كمان يحصل لها انتكاسة

وقال كمان...

ان من الافضل

ان محدش يدخل عندها

غير ابنها ...

كريم بية... فقط

ومعني كده ..

اني انا كمان مش هدخل عندها

وممكن يستغنوا عني

وخصوصا ان الست ثريا اصبحت سليمة وتقدر تخدم نفسها

ولما عمة كريم بية

عرفت اني مبقاش ليا لازمة

نادت عليا

وقالنلي...

دلوقتي الست ثريا ربنا شفاها

يعني انتي خلاص مبقاش ليكي لازمة هنا

فا ا تفضلي بالسلامة

في التوقيت ده

انا فعلا كنت قررت اني امشي

لكن...

كنت عايزة انتظر

لغاية...

ما انفرد بكريم بية ...

وافهمة حقيقة عمتة

عشان ياخد بالة علي نفسة منها

ويخلي بالة من امة كمان

فا اضطريت اني اترجاها

تديني مهلة يومين

علي ما الاقي شغل تاني

فا وافقت بشرط

اني اشتغل بدل الطباخ...

لمدة يومين فقط

وفي اليومين دول..

افضل في المطبخ طول النهار

ومخرجش منه غير علي النوم

فا وافقت علي طلبها طبعا..

و فعلا روحت علي المطبخ

وانا بدعي اني اقابل كريم بية

قبل اليومين ما يعدوا

المهم..

بعدما اخدت شغلانة الطباخ الجديدة

وا ثناء ما كنت واقفة في المطبخ

لقيت عمتة داخلة عندي

وهي بتكلم شخص في الموبيل

وبتقولة..

مش هوصيك بقي

انا اخترت المكان عندكم

لان الحفلة الي كريم عايز يعملها...

لازم تكون علي مستوي عالي من الرقي

اصل كريم هيعلن فيها عن خطوبتة لميرهان بنتي

وانا مصدقت ان ايام الحزن غارت ...

وعايزين نفرح بقي

وفي اللحظة دي

فهمت ان السبب الي كان مانع كريم بية من الارتباط

هو مرض امة

ودلوقتي خلاص...

هي خفت

و هو كده بدء يجهز لحفلة

بمناسبة شفاء امة

وهيعلن فيها بالمرة..

عن خطوبتة ببنت عمتة

ايوه ..امال انا كنت فاكرة اية؟

مهو لازم يتجوز واحده مناسبة له

ومش عارفة ليه

حسيت اني اتخنقت

لمجرد اني تخيلت انه هيخطب

وقلت..

يارتني ما كنت...

سمعت المكالمة بتاعة عمتة

وفي عز ما كنت مخنوقة

لقيت عمتة بتطلب مني

اني اسيب الي في ايدي

واروح اكوي طقم لمريهان بنتها عشان تخرح بيه

وطلبها ده زادني اصرار علي المغادرة.... وحالا

ولقيت نفسي غصب عني بعيط

فا قررت منتظرش يومين

وروحت ادور علي كريم بية

عشان احذرة وامشي

وبمجرد ما خرجت من المطبخ

لمحت كريم بية خارج

بالصدفة

من غرفة والدتة

فا روحتلة بسرعة

وقلتلة..عايزة حضرتك في موضوع مهم

فا لقيتة ..بيقولي

انا كنت جاي ادور عليكي اصلا

عشان موضوع مهم بردوا

وسالني...

وقالي

لية مردتيش عليا لما رنيت عليكي الجرس

الي في اوضتك ؟

قلت..اصل عمة حضرتك نبهت عليا..

اني اشتغل في المطبخ طول النهار ...

ومخرجش منة غير علي النوم

فا اتعصب كريم بيه

وقالي..

طيب اسمعي بقي الي هقولهولك ده

انا مش عايزك تقفي في المطبخ تاني

ولا تخدمي حد ابدا

ولا تاخدي اوامر من اي حد هنا

قلت.. ايوه بس عمة حضرتك هي الي...

وقبل ما اكمل

اخدني كريم بيه من ايدي

وقالي..تعالي معايا

ولما خرجت معاه

راح بيا لعمتة وبناتها ووقفني ادامهم..

وقالهم..

بعد الي عملتة عفاف مع امي..

انا وامي بقينا بنعتبرها واحدة مننا

با اختصار...

عفاف اصبحت جزء من العيلة

يعني خلاص

مبقتش هتقف في المطبخ...

ولا هتخدم حد هنا

وبص لعمتة

ووجهلها الكلام

وقال..

مش عايز اعيد الكلام ده تاني

وياريت يا عمتي تخلي بناتك يخدموا نفسهم

لغاية متجيبوا طباخ ومديرة منزل

بدل المجرمة (ادارة)

الي غارت من هنا

وخلوا بالكم

لو كلامي متنفذش

هضطر اقولكم

اتفضلوا ارجعوا بيتكم

فا رمقتة عمتة بنظرة غل

وردت علي كريم بية

وقالتلة.. ..

نخدم نفسنا و مالة

ولو تحب كمان...

اننا نشتغل كلنا عند البرنسيسة مفيش مانع

فا تجاهل كريم سخريتها

واخدني ودخلنا علي البلكونة

وقعدني جنبة

وهو بيقولي..

متديقيش من عمتي

هي (طيبة) لكن...

بعدما سمعت وصفة لعمتة بالطيبة

بصراحة استفزني الوصف

فا قلتلة..لا

عمتك مش طيبة

انت شايفها كده بس عشان هي عمتك...و انت بتحب بنتها

لكن.. الحقيقة ان عمتك مش طيبة

قال..بنتها مين الي بحبها؟

قلت..ميرهان

قال....لا

انا مش بحب ميرهان

قلت...امال لية عايز تتجوزها؟

قال... وهتجوزها كمان؟

مين قال الكلام ده؟

قلت...عمتك

وعموما مش ده الموضوع الي كنت عايزاك فيه

قال..امال كنتي عايزاني في اية

قلت..كنت عايزة استاذن حضرتك

و اقولك..

اني ..هسيب الفيلا وامشي

فسالني

قال..لية؟

قلت...

عشان ...

خلاص مبقاش ليا لازمة هنا ولازم امشي

فسالني سؤال مفاجئ

وقالي..

انتي بتغيري عليا؟

فا اتوترت

وقلتلة ..

ايه الي حضرتك بتقولة ده؟

فا قرب مني

ورفع وجهي ناحيتة

عشان ابصلة

وسالني

وقالي..طب عيني في عينك كده؟

انتي زعلتي لما عرفتي اني هتجوز؟ صح؟

فا ارتبكت

وقلتلة..

لا طبعا ...وايه الي هيزعلني من جوازك؟

انا بس اتدايقت لما سمعتك بتوصف عمتك... بالطيبة

وعمتك مش طيبة نهائي

ولازم تخلي بالك منها

فا اتعجب من كلامي

وسالني

وقالي..

ايه الي بيخليكي تقولي..

ان عمتي مش طيبة؟

قلت..اسمعني لو سمحت

انا خلاص همشي من هنا

وقبل ما امشي

لازم اقولك الحقيقة

الي انت متعرفهاش عن عمتك

لازم تعرف ان عمتك هي السبب في كل الي بيحصل لكم

عمتك لجأت للسحر...

واتسببت في مرض الست ثريا...

وكل ده

عشان تجوزك لواحدة من بناتها

فا بصلي كريم بية ...

بدهشة

وقالي..

ايه الكلام الي انتي بتقولية ده يا عفاف ؟

سحر ايه؟ واعمال ايه؟ وتخاريف اية؟

ازاي واحدة متعلمة زيك تؤمن بالكلام ده؟

قلت..صدقني ده مش كلام فارغ

السحر مذكور في القران

والاعمال ياما اذت ناس ..

وخربت بيوت عمرانة

وهنروح بعيد لية ؟

ما عمتك استعانت

ب (ام غراب )

الساحرة

واذتكم كلكم فعلا

فارد كريم بية

وسالني

وقالي...

ايه الي اكدلك ان ام غراب ساحرة فعلا؟

ما يمكن دجالة ؟

وبتبيع شوية كلام مش اكتر

قلت..لا استني

انا عندي دليل

ان ام غراب ساحرة فعلا واذت ناس كتير

قال..دليل ايه؟

قلت..من فترة

دندوشة قالتلي...

ان التربي او (حارس المقابر) فتح المقابر

الخاصة ب ام غراب...

ولقي فيها اعمال... وسحر اسود

لناس كتير

وكلهم اتاذوا فعلا

والحمد لله

التربي صور كل الكلام ده

فيديوا

ونشرة علي النت

يعني...

تقدر تجيب الفيديوا الي نشرة التربي

وتتاكد من الكلام ده بنفسك

فا بصلي كريم بية

وقالي...

انا عايز اشوف الفيديوا ده

وفعلا فتح موبيلة

وعمل بحث وبعدما وصل

للفيديوا

مبفاش مصدق الي هو شايفة

وفجاءة..

اتسعت حدقة عيناة

ولقيتة اتاخد

وقال بصوت عالي

دي صور امي هنا فعلا؟

ودي صورة المرحومة مراتي؟

وامها ...واخواتها البنات كمان؟ ....

كل الصور مرسوم عليهم رموز

وكلام مش مفهوم

صور اهل امي كلهم

موجودة

في الفيديوا بتاع التربي لية؟

قلت...جالك كلامي؟

تفتكر مين بقي الي كان لة مصلحة

انه يزيح مراتك من طريقة؟

فا فضل كريم

بية يبصلي شوية وهو سرحان

وبعدها قالي...

انا مش عايز حد يعرف

اني عرفت حاجة

عن الكلام ده

وخصوصا..عمتي

قلت..متخفش

انا في كل الاحوال مكنتش هقولها حاجة

ده غير اني كنت ناوية امشي

واسيب الفيلا

بس كان لازم احذرك الاول

عشان تاخد حذرك منها

وتخلي بالك علي نفسك....

وعلي الست والدتك

في اللحظة دي

وبدون اي مقدمات

سالني كريم بيه

سؤال مفاجئ

وقالي..تتجوزيني ؟

بعدما سمعت سؤالة

حسيت ان الدنيا وقفت من حواليا

فا رجعت لورا وبصيتلة كويس

عشان اتأكد

هو فعلا اتكلم دلوقتي؟....

وطلب مني... الطلب ده ؟

ولا انا كان بيتهيالي؟

فا لقيتة عاد عليا الطلب تاني

وقالي..

بقولك تتجوزيني يا عفاف؟

فا رديت

وقلت..انا مش هرد علي طلبك

غير لما اعرفك بنفسي الاول

وانا كنت متاكدة

انه بعدما يعرفني..

ويعرف قصتي ...

هيسحب طلبة تاني

المهم..

فعلا..سردتلة حكايتي كلها

من يوم ما اتقدملي غراب ... واتجوزتة

لغاية وقتنا هذا

وطبعا حكيتلة عن العفريت حضن

الي بيساومني دلوقتي

وبيحاول يجبرني اني اقتل الست ثريا...

يا اما هيخفي بنتي

وبعدما كريم بية

سمع حكايتي

لقبتة سرح شوية

وبعدها

قالي..

غريب اوي موضوع

الشخص الي اسمة حضن ده؟

انتي متاكدة انه شبهي؟

قلت...اولا مسمهوش شخص

اسمة (العفريت حضن)

وايوه فعلا يشبهك تماما

وتقدر تقول...

صورة طبق الاصل منك

فا شرد كريم بذهنة شوية

ورجع سالني تاني

وقالي ...

انتي متاكدة انك شوفتي حضن ده

هنا في الفيلا؟

قلت..ايوه

وشوفتة في غرفة الست ثريا تحديدا

فسالني

وقالي..اخر مرة ظهرلك امتي؟

قلت..من ثلاثة ايام تقريبا

ويومها حضن زعل لما شافني بتكلم معاك..

و طلب مني اني اقتل

الست ثريا

والا هيخفي بنتي للابد

واعطاني مهلة سبع ايام

فات منهم ثلاثة

وهو طبعا يقدر يخفي بنتي

زي ما قدر يخفي ام غراب ...وابنها

وهنا وقفني كريم بية

وسالني

وقالي...هو محدش دور علي غراب وامة؟

يعني مثلا مسالتوش في اقسام الشرطة..

او المستشفيات؟

قلت..لا ...

لان سحر ماتت..

وانا كنت عارفة...

ان العفريت هو الي خفاهم

فا هسال عليهم لية؟...

و ازاي؟

فا بصلي كريم بية

وقالي ...

طيب اديني اسم ام غراب

.. وابنها

بس يكون الاسم رباعي

وبعدما اخد الاسماء

عمل اكتر من مكالمة

واتصل بمعارفة الواصلين ...

الي في ايديهم انهم

يساعدوة

علي العثور علي ام غراب... وابنها

وبعدما خلص اتصالاتة

بصلي

وقالي..اسمعي يا عفاف

انا متاكد ان حضن ده شخص نصاب

استغل الشبة الي بيني وبينة..

او حتي لبس ماسك يخلية شبهي

عشان يعمل مصلحة معينة في دماغة

واكيد بعدما خدعك ...

وخلاكي تقتلي ام غراب ..

وابنها

سهاكي وغفلك

واخد الجثتين

وخرجهم من البيت

بدون ما انتي تشعري

واكيد كمان

هو له اعوان هنا في الفيلا

ولما جابك هنا..

هما الي ساعدوه علي انه يدخل ويخرج براحتة

وانا هثبتلك الكلام ده حالا

واخدني كريم بية

وقعدني جنبة علي الكمبيوتر بتاعة

وقالي..

انا هفرغ كاميرات الفيلا كلها

وانا متاكد انه هيظهر فيها...

وهيظهر معاه الناس الي كانت بتساعدة كمان

فا سالتة

وقلت..بس حضرتك ركبت كاميرات

في غرفة الست ثريا النهاردة

الصبح فقط

وحضن كان هنا من ثلاث ايام

يعني اكيد مش هتلاقية في الكاميرات

فا رد كريم بية

وقالي..

الي انتي متعرفيهوش

ان الفيلا كلها فيها كاميرات من فترة كبيرة

ما عدا غرفة امي فقط

وده كان بناء علي رغبتها هي

لكن بعدما امي تعبت..

انا صممت اني اركب كاميرة

في اوضتها

عشان اطمن عليها في كل وقت

وانا بعيد عنها

فسالتة

وقلت..

تقصد تقول..

ان حضن هيظهر في الكاميرات الي بره؟

قال..ده لازم يظهر في الكاميرات الي بره..

لانه عشان يوصل لغرفة امي

لازم هيعدي علي الكاميرات كلها

قلت..تمام

فرغ الكاميرات

وفعلا..

فرغ كريم بية الكاميرات

كلها

وفضلنا نتابع الكاميرات بدقة

لكن...للاسف

مشوفناش في الكاميرات اي حد غريب

داخل ...او ...

خارج من الفيلا نهائي

فا عاد كريم بية تاني مشاهدة الكاميرات

وبرضوا ملقناش حاجة

فا استغرب كريم بية

وقالي...غريبة؟

فسالتة

وقلت..جالك كلامي؟

حضن مش موجود في الكاميرات خالص

تفتكر معناه ايه الكلام ده؟

وقبل ما يجاوب عليا..

سمعنا صوت الموبيل بتاعة

بيرن

فا فتح الخط

ولقيتة بيقول..

ايه ده ؟ فعلا ؟

طيب كويس اوي

انتظرني عندك وانا هجيلك

وبعدما ما كريم بية خلص مكالمتة

لقيتة بيقولي..

في خبر مش هتصدقية

قلت...خير خبر اية؟

قال..عرفوا مكان ام غراب... وابنها

قلت...بجد؟

يعني ام غراب وابنها لسة عايشين؟

وحضن طلع نصاب ومقتلهمش؟

فا رد كريم بية

وقالي...

ايوه حضن نصاب

واكيد هو الي عطل الكاميرات

او عمل حيلة معينة

عشان ميظهرش في الكاميرات

لكن في كل الاحوال

حضن هيطلع بني ادم ونصاب وكداب كمان

وفي اللحظة دي

سمعت صوت جاي من ركن

في الاوضة

بيقولي...

اديني جيت يا عفاف

عشان تتاكدي اني مش

كداب

وطبعا انتوا دلوقتي عرفتوا ده صوت مين.....؟

الفصل الثاني عشر من هنا

لقراءه باقي الفصول من هنا

بعدما اتعصب عليا كريم بية

وقالي..

مش عايز اسمعك بتقولي ان حضن عفريت ..

لان مفبش حاجة اسمها عفاريت

و حضن ده

مجرد بني ادم نصاب..

(وكداب)

وفي اللحظة دي

سمعت صوت جاي من احد اركان الغرفة ...

والصوت كان..ل...( حضن)

وسمعتة بيقولي..

انا جيت اهوة يا عفاف

عشان اثبتلك اني مش كداب

فا بصيتلة بزهول

وقلت..حضن؟

انت هنا من امتي؟

فا بصلي كريم بية بزهول

وسالني

وقالي..انتي بتكلمي مين؟

فشاورتلة علي حضن

وقلت..بكلم حضن

مهو واقف ادامك اهوه

فا بصلي كريم بية بتعجب

وسالني

وقالي..واقف فين؟

قلت..اهوة

واقف بيبصلنا احنا الاتنين

انت ازاي مش شايفة؟

فا رد كريم بية

و قالي..اهدي يا عفاف

يظهر ان اعصابك تعبانة بسبب الي عملتة عمتي معاكي

قلت..انا مش مريضة نفسيا ...

ولا بيتهيالي

اقسملك ان حضن واقف ادامك دلوقتي

في اللخظة دي

بصلي حضن

وقالي..

قولتلك قبل كده

ان مفيش حد هيشوفني غيرك

وسالني حضن بغضب

وقالي...

انتي لية مصممة تعصي اوامري؟

قلت..اوامر ايه الي انا عصيتها؟

قال

انا طلبت منك تبعدي عن كريم

واديكي دلوقتي قاعدة معاه وبتحذرية من عمتة

عشان خايفة علية

ده غير اني طلبت منك تقتلي

(ثريا امة)

وبدل ما تقتليها..انقذتيها

من الموت

وزي ما انتي خالفتي اوامري

انا كمان هنسي امر المهلة

الي اديتهالك

وهنفذ تهديدي

ومش هتشوفي بنتك تاني

فا صرخت فيه

وقلت...لا

.. ارجوك بنتي لا يا حضن

فا رد حضن

وقالي..

انا اصدرت اوامري للخادم

بتاعي

وبنتك كده اختفت خلاص...

ومش تشوفيها تاني

فا فضلت اعيط واترجاه

واقولة..لا

ارجوك يا حضن بنتي لا..

ارجوك بنتي لا

اعمل اي حاجة فيا انا بس

بنتي لا

وبدل ما حضن

يترفق بحالي ..

بعد التوسلات دي كلها

لقيتة سابني و اختفي

وده معاناه..

ان بنتي كده راحت

فا فضلت الطم واصوت

وانا بقول..

بنتي راحت مني

وفي اللحظة دي

حاول كريم بية يهديني

فسالني و

قالي..

اهدي يا عفاف وفهميني انتي منهارة كدة لية؟

فا رديت علية

وقلت..

حضن اخد بنتي مني...

وخلاص مش هشوفها تاني

وسيبتة وطلعت اجري وخرجت من الفيلا

وفضلت اجري في الشارع زي المجنونة

فا خرج كريم بية ورايا

وقرب مني بالعربية بتاعتة

وقالي اركبي يا عفاف

فا صرخت فية

وقلت..

لا مش هركب

انا هروح اشوف بنتي الي ضيعتها بايدي

فا نزل كريم بية من العربية

وجه جنبي

وقالي..

لا مش هسيبك ..انتي دلوقتي مش لوحدك

وانا هرجعلك بنتك

فا بصيتلة بكسرة

وقلتلة..

انا لازم اروح لامي

واشوف هرجع بنتي ازاي؟

فا رد كريم بية

وقالي..

طيب تعالي وانا هوصلك لبيت والدتك

وفعلا..

ركبت معاه العربية

واول ما وصلت عند امي

سالتها بلهفة

وقلت

بنتي فين يا امي؟

فا ردت امي

وقالتلي..

عفاف؟

انتي كنتي مختفية فين الفترة دي كلها؟

قلت..سيبك مني دلوقتي

فين بنتي

فا بصتلي امي بتعجب

وقالتلي..

وايه الي فكرك بالمرحومة دلوقتي؟

فا صرخت وسالتها

وقلت..مرحومة...بنتي بقت مرحومة؟

وفي اللحظة دي

اتدخل كريم بية

واخد امي بعيد عني....

واتكلم معاها شوية علي انفراد

وبعدها رجعلي كريم بية

ولقيتة بيبصلي بحزن

وسابني ومشي

وفي اللخظة دي

بقيت مستغربة

هو كريم مشي ليه بعدما اتكلم مع امي؟

وياتري امي قالتلة اية؟

وبدل ما اسال امي

واقولها..انتي قولتي ايه لكريم خلاه مشي؟

تجاهلت موقف كريم

وسالت امي

وقلت..بنتي فين يا امي؟

فا ردت امي وهي بتعيط

وقالتلي

لا حول ولا قوة الا بالله

قلت..

قوليلي يا ماما انتي ليه بتقولي علي بنتي كدة؟

فا ردت امي بحزن

وقالتلي

بنتك ماتت من سنين يا عفاف

فا بصتلها بذهول

وقلت..

بنتي ماتت من سنتين ازاي

دنا سيباها عندك

من كام يوم؟

فا ردت امي

وقالتلي..

ربنا يعوض عليكي يا قلب امك

فوقي لنفسك يا بنتي..

وحاولي تصدقي ان بنتك ماتت؟

فا صرخت بمجرد ما سمعت كلام امي

وفضلت الطم

لغاية ما غيبت عن الدنيا

واثناء ما كنت في الغيبوبة

حلمت بحضن

وشوفتة وهو بيتعذب وبيسلخ جلدة بايدة

وهو بيبصلي

وبيقولي......كفاية

وفي اللحظة دي

لقيتني بفوق وبرجع للدنيا

لكن بفوق وانا حاسة...

ب الالام غير محتملة

في جسمي كلة

وفي نفس الوقت

وداني كانت سامعة صوت قرأن

فا فتحت عنيا ببطء

وشوفت ادامي كريم

بية..

واخويا ..وامي.... ودندوشة

ومعاهم راجل ملتحي...

ولابس عباية بيضاء

وباين علي وجهة السماحة

المهم...

اني لاحظت ساعتها ...

انهم كلهم كانوا واقفين حوالين السرير

الي انا نايمة عليه

والوحيد الي

قاعد جنبي مباشرة علي السرير

هو الراجل الملتحي..

ودي كانت اول مرة كنت اشوف الراجل ده بصراحة

وعرفت بعدها

انة مش راجل عادي

ده كان..

شيخ يعني .... (رجل دين)

و الشيخ ده

كان حاطط ايدة علي راسي...

وبيقراء ايات من القران الكريم

فا بدء جسمي ينتفض....

بعدما سمع القران

وبدء الالم يزيد

فا قعدت اصرخ... اصرخ

وكل ما كنت بصرخ كان الشيخ يعلي صوتة

يعني كان بيتعمد...

ان طبقة صوتة تكون اعلي ..

من طبقة صوتي وانا بصرخ

بس صوتة كان بيعلي با ايات من القران الكريم

وبمجرد ما كنت بسمع القران

كنت ببقي عايزة اسد وداني

وبحاول اهرب من صوت التلاوة

وكل ما كان الشيخ يزيد في تلاوة القران

كل ما كان

جسمي بيتقطع من الالم اكتر

وفضلت علي كدة

لغاية زاد الالم وبقي لا يحتمل

وفي اللحظة دي

غيبت عن الوعي تاني

وبعدما فترة من الزمن

سمعت صوت بينادي عليا

وبيقولي..

فوقي يا عفاف واذكري اسم الله

فا فنحت عنيا

وقلت...لا اله الا الله

وفي اللحظة دي

لقيت نفسي عرقانة

وجسمي مهدود... وكأني كنت واقعة من علي جبل

وفي اللخظة دي

لاحظت ان الشيخ انتهي من قراءة القران

وبيستعد عشان يقوم

لكن..قبل ما يمشي

بصلي الشيخ وابتسم

وقالي..

حمدا لله علي سلامتك يا بنتي

وحذرني

وقالي...

من النهاردة حذاري

تبعدي عن ذكر الله ابدا

ولازم تواظبي علي الصلاة

لانك طول منتي قريبة من ربنا

هتبقي في حما الله وحفظة

وبعدما الشيخ خلص مهمتة

راح اخويا معاه عشان بوصلة

وخرجت امي ودندوشة

وفضل جنبي كريم بية

فا بصيت لكريم بية

وسالتة..

قلت..هو في ايه؟

والشيخ ده كان بيعمل ايه هنا؟

فا رد كريم

وقالي..

انتي كنتي تعبانة والشيخ ده كان بيعالجك

قلت..تعبانة من ايه؟

قال..

هشرحلك كل حاجة...

بس حاولي تفهميني

قلت ..اتفضل

لما امك قالت ادامي...

ان بنتك ماتت من سنين

سالتك امك

عشان اعرف هي ليه بتقول كده؟

فا فهمتني ...ان هي دي الحقيقة..

وانتي تعبانة نفسيا بسبب موت بنتك

فاشكيت انك تكوني بتعاني من حالة نفسية

وعشان كدة بتقولي علي عمتي كلام محصلش

لكن..عشان كنت عايز اتاكد برضوا

فا روحت لدندوشة وواجهتها

فااعترفتلي بكل حاجة

وعرفت ام غراب استعملت معاكي السحر

ودمرت حياتك..

.زي ما عمتي استعانت بالسحر...

وواتسببت في وفاة مراتي... واهلها

وفي اللحظة دي

كان لازم الاقي طريقة

عشان ..

اساعدك بيها

فا لجأت للشيخ الي انتي شوفيتية من شوية

والشيخ قالي..

ان في احتمال..

ان تكون ام غراب

استعملت معاكي اقوي انواع السحر

ووراد كمان يكون حصلك مس من الجن

وللاسف..

الشيخ اكتشف...

انك ...كان معمولك اكتر من عمل

عمل بالتكتيف والسلسلة...

وعمل تاني( اشد خطورة)

فسالتة

وقلت ...

العمل التاني كان باية

قال...

العمل التاني كان... (بالجنون)

قلت..هو في حاجة اسمها عمل بالجنون؟

قال..

ايوه...زي ما في عمل بالفرقة

بين الزوجين..

وعمل بالدمار ...والخراب

وعمل..

بالربط و....و...

في برضوا عمل بالجنون

قلت..بس انا كنت بتصرف

بمنتهي العقل

يعني مثلا ..

مكنتش بنكش شعري واجري

في الشوارع

فا رد كريم

وقالي..

مش لازم تبان عليكي اعراض الجنان المتعارف عليها

عشان يتقال انك مصابة بالجنون

الشيخ بيقول..

ان العمل الي من النوع ده

بيذهب عقل صاحبة

وبيخلية عايش في دنية خاصة بية

وهو منفصل عن الواقع

عشان كده ...

انتي كنتي بتشوفي... وتسمعي حاجات مكنتش موجودة اصلا

في اللخظة دي

اتخنق صوتي بالبكاء

لما افتكرت بنتي

وقلت...ايوه فعلا انا بنتي ماتت من سنين

لكن...

كنت بتعامل

ان بنتي مازالت عايشة وانا سيبتها عند امي...

يعني انا كنت بتوهم ان امي كانت بترد عليا

وبتقولي....

بنتك موجودة جنبي وزي الفل

وانوقفت فجاءة

لما افتكرت حضن

وسالتة

وقلتلة..

يعني حضن كمان كان تهيؤات؟

وكان عرض

لحالة الجنان الي كنت فيها؟

فا توقف كريم في الكلام شوية

وقالي..ممكن ....وممكن

قلت..مش فاهمة

يعني اية ممكن .....وممكن؟

قال...

انتي اتحبستي في الحمام في الضلمة ليلة كاملة واتعملك سحر من ساحرة متعرفش ربنا

يعني ممكن ...يكون حضن عفريت فعلا

وممكن ...يكون الي حصلك تهيؤات

بسبب (العمل بالجنون)

وممكن.....يكون الاحتمالين السابقين

حصلوا مع بعض

يعني كان في عمل بالجنون ...

وفي كمان

جن بيظهرلك في صورتي انا

عموما...الشيخ

قال..

انه قدر يفك السحر بالقران الحمد لله

يعني انتي دلوقتي تعافيتي

و بقيتي زي الفل

بدليل انك بداتي ترجعي للواقع تاني

واقتنعتي بان بنتك اتوفت

فعلا من سنين

قلت...انت بتقول ان السحر اتفك بالقران

يعني انت بقيت تؤمن بالسحر؟

فا رد كريم

وقالي..

انا قبل كده...

قولتلك عن السحر...والمس .. والاعمال

كلام فارغ... وتخاريف

لكن دلوقتي..

انا بقولك مفيش حاجة مستبعدة

وكل الاحتمالات واردة

قلت.. ايه كمية الشر الي في قلوب البشر دي

يعني ام غراب مكتفتش بانها تعملي عمل بسلب الاردة وتسلسلني بية

لا دي كمان عملتلي عمل بالجنون

ده غير الي عملتة في غيري من الناس الي اتدمروا بسببها

هي وغيرها من السحرة والناس الي بتلجئ لهم

فا رد كريم

وقالي

السحرة دول بني ادمين بينافسوا الشياطين في شرهم

عشان كده الرسول صلي الله عليه وسلم قال

من اتي كاهنا او عرافا فقد كفر بالله

فابصتلة بتعجب

وقلت

بس انا مش فاهمة

هو انت مش كنت رافض تصدق

في السحر ...و والمس... الاعمال...

ايه الي خلاك فجاءة اقتنعت ؟

فا رد كريم بية

وقالي..

اصلي عرفت حقايق بشعة

عمري ما كنت اتوقعها

قلت ..حقايق ايه

قال...

لما قولتيلي ان عمتي كانت هي السبب

في الي حصل للمرحومة

مراتي واهلها...

وهي الي طلبت من ام غراب تعمل لاهل امي سحر

مقطنعتش بكلامك

غير لما روحت لدندشة ...

وواجهتها

وفعلا...

اعترفتلي دندوشة بالحقيقة

وقالتلي...

انها هي الي عرفت عمتي علي ام غراب ...

ومش كده وبس..

لا...دي كانت وسيط بين عمتي وام غراب كمان

لان هي الي كانت بتوصل الاطر والفلوس

الي هيتعمل بيها العمل لام غراب

وبتوصل لعمتي الاعمال

و التعليمات الي هتعملها عشان

العمل يتم بنجاح

لغاية ما العمل بان اثرة فعلا

وعيلة امي كلها اتدمرت

بما فيهم امي الي اصابها المرض

وطبعا الامور كانت ماشية زي ما عمتي مخططة لها

لغاية ما حصل شيئ مكنش متوقع

وهو ...

لما اتوفي احد الاشخاص

وراحوا يدفنوه في المقابر الخاصة بام غراب

وبالصدفة وهما بيفتحوا المقبرة

عثروا

علي كمية كبيرة من الاعمال... والسحر الاسود

مدفونة في المقابر

ويومها التربي صور الحاجات دي

ونزل الفيديوا علي النت

وفي نفس التوقيت ده

شافت عمتي الفيديوا بتاع التربي

وعرفت ان المستور انكشف

وكانت متاكدة ان اصحاب الاعمال

هيهجموا علي ام غراب

وهيستجوبوها غصب عنها

وساعتها عمتي كانت متاكدة انهم لو ضغطوا علي ام غراب

هتفضح السر...

في اللحظة دي

كان لازم عمتي..

تخرج نفسها ....من الورطة الي دخلت نفسها فيها

بانها تخلص من ام غراب

لكن...

ازاي عمتي...

هتخلص من كتلة الشر دي؟

في اللخظة دي

اتبعت عمتي المثل

الي بيقول

لا يفل الحديد الا الحديد

بمعني..

انها عشان تخلص من ام غراب وعفارتها...

فا لازم تلجئ لساحر تاني اقوي من ام غراب

عشان يخلصها بسحرة منها

وفعلا

عمتي طلبت من دندوشة

انها تشوفلها ساحر تاني اقوي

من ام غراب واشرس

وعشان دندوشة مكنش بيفرق

معاها غير الفلوس

قبضت من عمتي

اوخدتها ...

ل ساحر كافر

وميتخيرش عن ام غراب

وطلبت عمتى منة انة يسخرلها الجن

عشان...

يخلصها من ام غراب

وذريتها كلها...

وطلبت منه كمان...

انه يقضي علي اخت جوزها بالمرة

(الست ثريا)

وفعلا سخر الساحر جن

وبعدها بحاجة بسيطة...

اختفت ام غراب هي و وابنها

وهنا استوقفتة عن الكلام

وسالت كريم بية

اه صحيح..

انت كنت قولتلي...

انك وصلت لام غراب وعرفت طريقها

فا رد كريم بية

وقالي..ده حقيقي

الناس الي كلفتهم بالبحث عنها هي وابنها

قالوا ...

انهم لقيوها هي وابنها

في مستشفي

قلت...وبيعملوا ايه في المستشفي؟

تعبانين يعني؟

قال..

ادارة المستشفي بتقول...

ان عربية اااسعاف نقلت ام غراب وابنها.. للمستشفي

بعدما اتعرض المبني الي هما كانوا متواجدين فيه

لماس كهربائي

والغريبة...

ان محدش قدر يحدد سبب تواجدهم في المبني ساعتها

ولا حد يعرف هما كانوا رايحين لمين هناك

المهم..انهم علي ما وصلوا للمستشفي

كان غراب فارق الحياة

لكن...

ام غراب ما زالت علي قيد الحياة

فسالته

وقلت..يعني ام غراب لسة عايشة؟

فا رد كريم بيه

وقالي..

ايوه...

مازالت عايشة... وفيها الروح

لكن...بتتمني الموت

قلت..لية؟

قال... من العذاب والالم

الي هي بتعانية

اصل النار سيحت جلد جسمها بالكامل

لدرجة انهم مش لاقيين مكان في جسمها

عشان.. يحقنوها بحقنة مسكنة

وده مخليها مش بتعرف تنام

لا ليل...

ولا نهار

من شدة الالم

قلت...منها لله بقي

الي بيحصلها ده بسبب اعمالها

فا رد كريم بية

وقال

ده عقاب صغير في الدنيا ...

ولسة العقاب الاكبر...

لما تروح عند ربنا ويبدء حسابها

في اللحظة دي

حسيت اني شوفت خيال

مر من جنبي

فا ارتبكت

وسالت كريم

وقولتلة...

في سؤال محيرني

قال ...

اسالي

قلت...انا حاسة فعلا ان ربنا شفاني من العمل بالجنون

لكن....

وقبل ما اكمل سؤالي

سمعت صوت رنين الموبيل الخاص بكريم بية

ولقيتة بيسال المتصل

و بيقولة..

معقولة..........؟

...امتي حصل ده........؟

الفصل الثالث عشر والاخير من هنا

لقراءه باقي الفصول من هنا

بعدما عرفت من كريم بية...

ان كان معمولي عمل (بالجنان)

فهمت ساعتها ان العمل ده كان هو السبب

في التهيؤات الي كنت بشوفها...

وانا ساعتها كنت مقتنعة انها حقيقة

وكنت هوجة لكريم بية

سؤال جديد

لكن...

لمحت شيئ اتحرك بسرعة من جنبي..

بدون ما اعرف الشيئ

ده اية؟

وكنت هقول لكريم بية

علي الي شوفتة ده

لكن..كريم بيه جالة تليفون..

وسمعتة بيقول...

معقولة؟

حصل امتي الكلام ده؟

وبعدما خلص المكالمة

لقيتة واقف مندهش

وبيقولي...

تعالي معايا

قلت..اجي معاك فين؟

قال..

لازم نرجع الفيلا حالا

قلت ...لية؟

قال..البواب

بيقول..

انهم دخلوا علي بنات عمتي الاربعة

لقوهم قاطعين النفس

ومحدش عارف السبب في

الي حصلهم ده

عشان كدة

لازم نرجع علي الفيلا

و نشوف ايه الحكاية

فا ردت امي

وقالت...

معلش يبني

اتفضل انت لوحدك

بنتي مش هينفع تيجي معاك

فا بصلها كريم بية

وقالها..

طيب انا هروح اشوف في اية

وهرجع لحضرتك

عشان في موضوع عايز اكلمك فيه

فا ردت امي

وقالت...

روح يبني اطمن علي عيلتك

وانا هستناك

ربنا يطمنك يارب

وفعلا..

سابني كريم بية ومشي

وانا فضلت اتعجب

واسال نفسي

موضوع اية الي كريم بية عايز امي فيه؟

يكونش هيطلب ايدي منها فعلا؟

ورجعت افكر تاني

واقول...

ياتري ايه الي حصل لبنات عمتة؟

وفي اللحظة دي

لقيت امي جاية

تقولي..

الحقي يا عفاف

قلت...في ايه؟

قالت..

في مهندس جاي من الحي

بيقول..انه عايزك

قلت..مهندس من الحي؟

وعاوزني انا؟.... لية؟

قالت معرفش..

تعالي شوفي هو عايزك في ايه؟

قلت..ماشي

وفعلا..خرجتلة

وسالتة

قلت..اي خدمة

قال..

صدر قرار من الحي بهدم

بيت ام غراب

وعايزين حد من اصحاب البيت يفضي لنا البيت

وللاسف ...ام غراب ماتت

قلت...هي ام غراب ماتت؟

قال..ايوه

وبما انك انتي الوحيدة الي موجودة من عيلتها

فا كنا عايزينك تيجي تفضي البيت

فا بصتلة بتعجب

وقلتلة... وانا مالي

انا مليش دعوة ببيت ام غراب ولا بعفشها

انا هاجي بس اخد حاجتي

واتصرفوا انتوا في حاجتها

فا رد المهندس

وقالي..تمام

زي ما تحبي

اتفضلي معايا

وفعلا...

روحت مع المهندس علي بيت ام غراب

وفتحت الباب...

ودخلت

عشان الم حاجتي من اوضتي

واثناء ما كنت مشغولة في اوضة نومي

سمعت صوت المهندس قريب من وداني

وهو بيقولي..

اول مرة شوفتك فيها

كانت هنا

فا اتفزعت من جراءة المهندس

وسالتة وانا مرعوبة

قلت..

انت ايه الي دخلك هنا؟

فا قعد علي الكرسي

وهو بيبتسم

وقالي...

دي كانت اوضتنا انا... وانتي

يعني مش اول مرة نبقي لوحدنا

قلت..انت مين؟

قال..انا حضن

قلت..لا

حضن شكلة مكنش كدة

حضن كان صورة طبق الاصل من كريم بية

فا اتعصب حضن عليا

وقالي..

متذكريش اسم كريم تاني ادامي

انا كرهت اسمة

.. وكرهت صورتة

وبسببة غيرت صورتي لشخص تاني غيرة

قلت...

يعني انت عملت الحيلة بتاعة المهندس دي

عشان تستدرجني لغاية هنا؟

قال..ايوه

قلت.. طيب ممكن اعرف انت عايز مني ايه دلوقتي؟

فا بصلي حضن

وقالي...

وعايزك ترجعيلي

وعلي استعداد اعيش معاكي في اي مكان يريحك

يعني لو مش عايزة تعيشي معايا تحت الارض

انا ممكن اعيش معاكي في البيت هنا

بعدما البيت بقي مهجور

وخصوصا بعدما ام غراب ماتت

قلت...

ازاي عايزني اعيش لوحدي في بيت مهجور؟

قال..

لو عايزة تتونسي بستات البلد

انا ممكن اخليهم

يجوا عندك هنا بمشاكلهم

عشان تحليها لهم..

زي ام غراب ما كانت بتعمل

وممكن كمان اسخرلك اتباعي من الجن

ب اختصار..

تقدري تاخدي مكان ام غراب

وساعتها هتبقي اغني واحدة

في الدنيا كلها

ارجوكي وافقي

وانا اوعدك

اني ...هعمل المستحيل عشان اسعدك...

ارجوكي وافقي يا عفاف

وفي اللحظة دي

بصتلة وقلتلة

لا....

مش موافقة

قالي لية؟

قلت..عشان

انت قاتل ...

وورطتني معاك في جريمتين قتل

ام غراب... وابنها

يعني اجبرتني اني ارتكب اكتر من ذنب

من الكبائر

وانا عمري ماهسامحك ولا هسامح نفسي

علي الذنوب دي

فا اعترفلي حضن با اول اعتراف

وقالي..

انتي مقتلتيش حد ...

ولا انا اقدر اقتل حد

قلت..يعني ايه؟

قال..انا مليش سلطة اني اقتل انسان

قلت...ازاي الكلام ده؟

امال مين

الي اداني المية الي فيها السم ؟

وخلاني قتلت ام غراب وابنها

فارد حضن

وقالي...

المية مكنش فيها سم ولا كان فيها اي حاجة

الي حصل اني وهمتك بانك قتلتي

عشان تسمعي كلامي

قلت..مش فاهمة حاجة

قال...استني هحكيلك من الاول عشان تفهمي

با اختصاار

ان عمة كريم يأست من الساحر الي سخرني

لما لقيتة معملهاش الي هي عايزاه

ومخلصهاش منك ولا من الست ثريا

فا بلغت عن الساحر

وقالت... انه دجال

والبوليس قبض علي الساحر فعلا

وقررت عمة كريم بية

انها تخلص من ام غراب وابنها بنفسها

فا دبرت لهم جريمة قتل

وخطتها كانت ..

انها ...

تخدر ام كريم وابنها

وبعدها ...تخطفهم

وبعدما تخطفهم...

تاخدهم علي بيت قديم كانت ناوية تشعل فيه النار

فا بدات بتنفيذ الخطة

وبعتت لواحدة من معارف ام غراب

الي بتروح تطبخلها ..

وطلبت منها تحط منوم في الطبيخ الي هي طبختة

ومتمشيش من بيت ام غراب...

غير لما تتاكد

ان ام غراب اكلت من

الطبيخ

هي ...وابنها... وبنتها

وكل الي في البيت

في اليوم ده

انا قررت انقذك ...واتجوزك

لاني كنت حبيتك

وعشان ...

مكنش ينفع اني اصارحك بالحقيقة

قررت اوهمك انك انتي الي قتلتي ام غراب وابنها

وفعلا..

قدرت اشتت تركيزك

لغاية ...

ما عمة كريم كملت خطتها... وبعتت ناس خطفوا ام غراب

وابنها...

بدون ما حد يشوفهم

وبمجرد ما عمتة خطفتهم

واخدتهم

وهما متخدرين

علي البيت ...

الي كانت مجهزاه للحريق

ولعت في البيت

والجيران كلهم اعتقدوا ان الحريق تم بفعل الماس الكهربائي

وفعلا..الخطة نجحت

وغراب مات قبل ما يوصل للمستشفي

وام غراب حصلتة

قلت...ايوة يعني انت شريك عمة كريم في القتل

قال...

انا ساعدت عمة كربم

من بعيد لبعيد

يعني..

بدون ما امسك الة واقتل حد

يعني بعيد تماما عن الذنب

قلت...لا

انت ساعدت عمة كريم علي تنفيذ جرايمها

يعني انت مجرم زيها

فا رد حضن

وقالي..

منا كان لازم اساعدها

لان ...

الساحر كان عامل بيني وبينها ميثاق

وده كان زي اتفاق

وهو...اني اساعدها في تنفيذ خطتها

مقابل اني اخد منها المقابل

والساحر اتعمد...

انه ميحددش المقابل الي انا هاخدة منها

غير بعدما ينتهي من السحر الي عملهولها

قلت...

وليه الساحر وضع الشرط ده؟

قال...

عشان يأئمن من شر

عمة كريم

لانة خاف من غدر عمة كريم

لا تغدر زي ما غدرت با ام غراب

وعشان كدة

قيدها بميثاق

وثمن لازم تدفعة في مقابل خدماتنا ليها

قلت..

وانتوا هتدفعوها المقابل ده امتي؟

قال...هي دفعت المقابل فعلا

قلت...دفعتة ازاي

قال...من يوم ما عمة كريم بلغت عن الساحر واذتة

سخرني الساحر عشان اقلب عليها السحر

والنهاردة بس عمتة دفعت الثمن

قلت...

واية هو الثمن الي دفعتة عمة كريم؟

قال...

الثمن كان ..

(حياة بناتها الاربعة)

قلت.. يلهوي...

هو.انت قتلتهم؟

قال...

قلتلك اني مقدرش اقتل بني ادم

ومعنديش القدرة ولا السلطان.. اني اقتل حد

قلت..امال ماتوا ازاي ؟

قال...

انا اتجسدت في صورة عمة كريم

وروحت لدندوشة ودفعتلها فلوس

عشان تدخل الفيلا باليل...

اثناء ما بنات عمة كريم يكونوا نايمين

(وتفتح صمام الغاز)

وتسيبة مفتوح وتمشي

و فعلا

دندوشة قبضت الفلوس

ونفذت

الي طلبتة منها

وهي فاكرة اني انا عمة كريم

وطبعا دندوشة نفذت المهمة..

بدون ما تسال عن السبب

ولا طلبت مبررات للي هي هتعملة

قلت.. يلهوي

يعني الست ثريا ....وعمتة

ماتوا مع بناتها؟

قال..لا

في الليلة دي

عمة كريم... كانت بايت مع الست ثريا

في المستشفي

لان ام كريم كانت تعبانة جدا

وتتحجزت هناك وعمة كريم كانت مرافقة لها

قلت.. اه فهمت

انت استعنت بدنوشة...

عشان ضعيفة ادام الفلوس

فا رد حضن

وقال...ضعف البني ادم

ادام نزواتة

وبعده عن ربنا

بتسهل لنا السيطرة علية

وبتكون بمثابة الثغرة

الي بندخلة منها

قلت...يعني انت تقدر

تخدع.. وتوهم ..

وتوسوس للنفوس الضعيفة

لكن...

متقدرش تقتل بني ادم

بايدك؟

قال...لا طبعا

لاني مليش سلطان علي البني ادميبن

فا قربت منه

وقلت..

طيب اسمعني بقي

انا مش عايزة اعيش في بيت مهجور

و مش عايزة اخد مكان

ام غراب

ولا عايزة اغتني وابقي ثرية

انا مش عايزة ..

غير حاجة واحدة بس

قال...عايزة ايه؟

قلت..

عايزاك تختفي من حياتي نهائي

فا بصلي حضن بمنتهي الحزن

وقالي...

لكن...

انا بحبك وعايز ابقي معاكي

قلت...الي بتقولة ده انا مش مسؤلة عنة

وانت مش هقدر تجبرني

اني احبك ...

و اعاشرك بالعافية

لاني هقاومك بكل قوتي

و هستعين بكتاب الله عليك

في اللحظة دي

بصلي حضن بحزن

وقالي...لا يا عفاف

انا مش عايز اغصبك

انا عايزك تبقي معايا برضاكي

قلت...لا...لا...لا

طلبك مرفوض نهائي

واتفضل اختفي من حياتي حالا

فا اتحرك حضن من ادامي

وقالي..

حاضر...

انا هختفي من ادامك

لكن..هفضل ديما معاكي وحواليكي..

ومش هقرب منك تاني

غير لما انتي الي تطلبي مساعدتي

قلت... برضوا ...لا

انا مش عايزة اشوفك ...

ولا افتكرك تاني اصلا

فا رد حضن بالم

وقالي..

انا حاولت ابعد ومقدرتش

ومش هقدر ابعد عنك

يعني الحل عندك انتي

وقرب مني واتوسلي

وقالي

ارجوكي ابعديني عنك

قلت..ازاي

قال...ابعدي عني انتي

قلت..برضوا ازاي

قال..(قربي من ربنا)

وساعتها انا مش هقدر اوصلك

قلت...بس كده؟

يعني انت ممكن تختفي بالقران

قال...ايوه

فا بدات اقراء

اية الكرسي في السر

وفي اللحظة دي

لقيتة بيبعد عني وهو بيقولي

انا مش هنتظر لغاية

ما تحرقيني

وفي ثانية اختفي حضن

بعدما اداني الحل بايده

وفي اللحظة دي

خرجت بسرعة وروحت علي الفيلا

عشان اتاكد

ان كان كلام حضن حقيقي

ولا لا؟

واتاكدت فعلا من صحة كلام حضن

بمجرد ما وصلت للفيلا

لاني شوفت لمة...

وناس كتير...

وعربيات اسعاف... وبوليس

والدنيا كانت مقلوبة

واول ما دخلت للفيلا

شوفت رجال المباحث

ومعاهم دندوشة

الي...كانت واقفة مرعوبة...

وهما بيوجهولها التهمة

وللاسف...

التهمة كانت ثابتة عليها

بالكاميرات

الي صورتها وهي بتفتح صمام الغاز

فا اعترفت دندوشة علي (عمة كريم بية )

وقالت...

ان عمة كريم هي الي طلبت منها تفتح صمام الغاز

وهي نفذت طلبها مقابل مبلغ كبير من المال

وفعلا...

الكاميرات رصدت عمتة

او (حضن

وهو متجسد في صورة عمتة)

وظهرت عمتة في الكاميرة

وهي

بتدفع فلوس لدندوشة

مقابل فتح الغاز

يعني كده عمة كريم بقت متهمة

بانها شريكة اصلية

وهي الي دفعت فلوس لدندوشة

مقابل انها تفتح صمام الغاز

ولما بحثت بعيني عن عمة كريم

شوفتها.. وهي قاعدة في الارض...

وفي ايدها الكلبشات

وامامها اربع جثث ...

ملفوفين في ملايات

وطبعا جميع الجثث كانت ل بناتها

بس الغرببة ان عمة كريم كانت بتبص لبناتها

وهي بتكلمهم

وكانت بتقولهم...

قوموا يا بنات

بلاش تناموا كده ادام الخدامين

لانهم هيتكلموا عليكم

وكده كريم مش هيتجوز حد فيكم

وفضلت..تكلمهم طول ما هي قاعدة

وكأنها اتجننت او ...رافضة تصدق

ان بناتها راحوا منها خلاص

وفي اللحظة دي

اتاكدت ان ده عقاب ربنا

والجزاء كان من جنس العمل

وزي ما عمة كريم...

اتسببت في موت عيلة الست ثريا كلها

دلوقتي.. عمة كريم

بتتعاقب بعقاب اصعب من الموت نفسة

لان موت بناتها الاربعة مرة واحدة

كان ضربة قاضية ليها

ده غير انها هتتحبس بتهمة القتل...

المهم ...

اني وقفت اتفرج

واقول

سبحانك يارب

مهما الظلم طال ...

والشر زاد

لابد من يوم تترد فيه المظالم

سواء في الدنيا او الاخرة

وفي اثناء ما كنت واقفة بشاهد في صمت

سمعت حد بيقولي..

ربنا عادل يا عفاف

كللامك كلة طلع صح

و عمتي اخدت جزاء شرها ...

فا بصيت جنبي

ولقيتة كريم بية

فا قلتلة...

انا اسفة للي بيحصلك ده كلة

وقولت اسيب كريم في اللي هو فيه وامشي

فا قلت

انا همشي خد بالك من نفسك

سلام

فا رد كريم

وقالي

ارجوكي...استني

وخليكي معايا يا عفاف

انا محتاجلك

بصراحة اتعجبت من توسلاتة

وقلت..

ايوه بس ...

انا هستني هنا علي اي اساس ؟

وهتقول ايه للست ثريا؟

تفتكر هي هتوافق عليا اصلا؟

وفي اللحظة دي

شعرت بايد شخص علي كتفي

فا بصيت جنبي

واتفاجئت..

ان الي ايده علي كتفي

هي... الست ثريا

ولقيتها بتقولي..

انتي كنتي فين؟

قلت...كنت في بيتي

فا ردت الست ثريا

وقالتلي..

اوعي تمشي تاني

من النهاردة ده بيتك يا عفاف

قلت...حضرتك بتقولي ايه؟

وقبل ما الست ثريا تكرر

الي قالتة

سمعت صوت كريم

وهو بيقولي...

انا قلت لامي كل حاجة

وعرفتها اني عايز ارتبط بيكي

فا ابتسمت الست ثريا

وقالتلي..

اقبلي طلبة عشان خاطري

وفعلا

قبلت..

واتجوزت من كريم الي زي القمر

( الاصلي)

و فرحت فرحة عمري

الي معشتهاش قبل كده

وطبعا..

عيشت في الفيلا

مع كريم... ووالدتة

(الست ثريا)

الي بقت بمثابة ام ليا

بتحبني زي بنتها...

وبتتقي ربنا فيا هي ...وابنها

باختصار

اخيرا لقيت الراحة... والامان الي كنت بحلم بيهم

و حذفت من ذاكرتي

سنين عمري الي فاتت

بعدما اتحررت

من سلاسل ام غراب

كده الرواية خلصت

بس قبل ما اختم الرواية

عايزة اقولكم...

اني فات عليا وقت

مكنتش بعتقد في السحر.. والاعمال.. والكلام ده

لغاية ما شوفت بنفسي قصة حقيقية

لاسرة كاملة

اتاذوا من الاعمال والسحر

لدرجة انهم اتدمروا حرفيا

وطبعا السحر مذكور في القران

وللاسف

السحرة...الي بيعملوا السحر ناس ميعرفوش ربنا

ولازم الساحر عشان يسخر الجن يعمل حاجات تغضب ربنا

با اختصار

لازم الساحر يكف..&ر عشان يقدر يسخر الجن

وللاسف برضوا

في ناس كتير

معندهمش ضمير

بيلجؤا للسحر... والسحرة

عشان ياذوا غيرهم...ويدمروهم

بالسحر والاعمال

متجاهلين ان ربنا نهانا

عن اللجؤ للساحر... والكاهن... والعراف

و الي بيذهب لاي منهم

بيكون وصل لل..&كفر

والعياذ بالله

و بيتلعن دنيا واخرة

لقراءه باقي الفصول من هنا