رفع مالك السلسلتين قصادها - بتدوري على دي.
بصت باستغراب لإيده وفي لحظة كانت بتزعق بفرحة - ماااالك.
ابتسم وهو بيمد ايده - ازيك يا صغنن.
سلمت عليه وهي بتقول بإحراج من اندفاعها - بخير، جيت امتى.
- هنا بقالي شهرين.
- نورت بلدك والله.
كلامهم كان هادي، مش باين فيه الإشتياق، كل واحد منهم جواه إشتياق كبير للتاني، أصدقاء الطفولة زي ما بنقول، بس محدش بيِّن دا، وكل واحد احتفظ بمشاعره وحنينه لنفسه.
شاورت على السلسلة في إيده - ممكن أخدها.
- أكيد.
اخدت السلسلة وقالت - طيب همشي أنا دلوقتي، سلام.
مشت وهو فضل باصص لمكانها وهو بيردد - سلام، سلام، سلام....
- مشت يا حنين بقالها ساعة.
بص لأخوه بقرف - عيل فصيل، غور قدامي.
- مالك دا يستي صديق الطفولة، من واحنا عيال قد كده، كنا جران وكدا.
- جيران بس، بس بس يعني.
- اه يا ظريفة بس.
- ملك يا سيدي صديقة الطفولة، عشنا مع بعض 10 سنين بحالها، من بعد ولادتها واحنا مع بعض في كل حاجة وكل مناسبة.
- صديقة يعني بس.
- في الظاهر اه، لكن بيني وبينك تقدر تقول أنها اكتر من حبيبتي.
- يا سيدي يا سيدي، ودا من امتى.
اخد نفسه - يعني مثلًا من وقت ما بقيت مراهق، يعني من وقت ما بقيت 13 سنة، تصحيحًا لما سبتها، مفرقتش بالي، ولما كبرت فهمت أنه.....
قرب أحمد منه وقال بهمس - إنه إيه !!
بصله وابتسم - حُب مثلًا.
في اليوم التاني، الساعة 8 بليل تحديدًا، وقف بعربيته قدام عمارة بيته القديم ومعاه أهله، نزل وفضل واقف قدامها شوية وهو بيسترجع ذكرياته فيها، طلع على السلم، ومع كل سلمة في ذكرى بتجدد في دماغه.
لحد ما وقف في النص، ما بين بيته وبيتها، بص لمامته اللي طلعت معاه وشاور على بيتها - فاكرة يا ماما، فاكرة.
ضحكت على ابنها اللي حست أنه رجع طفل من جديد وقالت - فاكرة، واعقل كدا ها.
اتحمحم وبعدين مسك بلونات كتير في ايده، غطى بيها وشه ورن جرس البيت، فتحتله ست كبيرة فضلت واقفة شوية لحد ما شال البلونات وقال بصوت عالي - زوباااااااا.
ضحكت وهي بتحضنه - واد يا مالك، وحشتني يا واد.
دخلوا كلهم جوة وهو بعينه بدء يدور عليها، مال أحمد عليه وقال بصوت واطي - اتهد يابن المفضوح.
اتعدل بسرعة وبص قدامه والتاني بيكتم ضحكته على شكله، فضل يفكر هي فين ! ولي مطلعتش ! لحد ما مامته سألت - ملوكة فين، وحشتني القردة.
- نزلت هي ومنة صاحبتها من شوية يا نونا، على الشارع تحت بيتمشوا.
وقف من مكانه - لا دانا انزل افاجئها بقا.
ومن غير ما يسمع كلامهم جري على باب الشقة ونزل يشوفها، لمحها من بعيد بتضحك مع صاحبتها، قد اي وحشته وقد اي ضحكتها جميلة، وقد اي هي حلوة !!!
قرب منهم وقال بصوت عالي - ملـــــك.
اتخضت - يخربيتك......
- عاملة اي.
بخجل - بخير والله....
سكتت بعدين كملت - أنت بتعمل اي هنا.
- جيت انا والعيلة شوية كدا.
- نورت.
سكتوا وفضلوا ماشيين سوا وفجأة لاحظت غياب صاحبتها لفت بسرعة - منة.
ضحك - مشت من شوية، يا متهولة.
- مـ مخدتش بالي بس.
- مالك يابنتي.
- مالي !!
- اتغيرتِ
- كبرت متغيرتش.
- وحشتيني.
بصدمة بصتله - ايه !
اخد نفس - يلا نطلع ليهم.
- يلا.
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!