على كتف القبطان حمامة الفصل العاشر 10 - بقلم رُسُل فَهد

متابعة الحساب و التصويت لُطفاً
على كتف القبطان حمامة
- رُسل فَهد
...

عليك أفترن شچم سوگ ؟
رَدن فارغات الايد
گالن مَا لگن منك
جمالك صَفن الصوبين
يَـ حنة بچف الحديثات
فنهَ الما يباوعلك
شما يمشي العُمر تغلى
بَشر من صنف الانتيكات
نباوعاك و ما نشبع نرد النوب
"مرايه بچف المعرسات"
-رُسل فَهد
...

جوهرة
على الوجه الي استبعدت اشوفه مره ثانيه
صرخت و هو مقدم المسدس بأتجاه امي و نويره
جوهرة : مُراد ؟؟؟؟؟؟؟

مُراد : هسة أذبحچن كلچن و أطلع
نويره : شتريد
مُراد : أعقد على رحاب

بعده يحچي و دفعته نويره وگع يم البرده صار الصوت عالي مال الصراخ
نويره بسرعة صارت اقوى منه و سحبت المسدس و شمرته علينه ردت
اعيط كالت اشششششش
نويره : ولك تطب بيتي ولك بعدك ما تعرف منو نويره السماچه
نويره : صيحي ابو داوود على السريع
ابو داوود جيرانه رجال شريف وكل المنطقة تحبه ركضت اصيحله
اجه وياي يركض هو و أبنه

و نويره خانگه مُراد ما تخلي يتحرك حركه و امي موجهه المسدس گباله
و هو و لاكأنو نفسه ذاك الشخص الي نافخ نفسه صاير مثل الطفل بيد نويره من الخوف
مُراد : بس خل توخر المسدس ترى ساحب اقسام

طب الرجال ابو داوود انصدم و ابنه يردون يفهمون السالفة
اجه ابنه بدون تفاهم جَره
- شمسوي خاله گولي

نويره : ابو داوود أسترنا نسوان بلايه والي
ابو داوود : كولي خويه هذا منو شبي
نويره : يا خويه هذا واحد ادبسز بلايه اخلاق مره آرمله گافه على بتها و گاعدة
تعاي الا اعقد عليج و اتزوجج

ابو داوود : وهو شيعودلها
نويره : الله وكيلك غريب لا معروف اصله و لا فَصله
كعد ابو داوود و نويره حچتله سالفته و الاشياء الي گتلها ما اريد يطلعن شافت الهن غير درب و كذبت بيهن

داوود ضربه بوكس
و لَن مُراد يبچي
مُراد : لا تسجنوني اختي وحدها عفتها

لزمه داوود نَهى و هو ولا حرف ولا حتى قاوم الضرب بهذيچ الحاله و رغم كل الي سوا بيه بعدت داوود گتله خطية
اخذه ابو داوود لبيته و كال لنويره افتهم منه السالفه و اخذو المسدس
و اسلمه للشرطه هو گام يرجف

سدينه الباب و الرجفه مال اللحظة الاولى لسه ما راحت مني
نويره : النوب عليه العاشگين يربي وينك ما تحاچيني
چا شبيه انا ما لزمو عليه اسلحه حتى اقبل بيهم

جوهرة : هذا شجابه شوكت وصل ومنين طب
نويره : والله هو واحد يحچي الاله و العليه الرجال طب من الباب ما يحب
الشبابيج

جوهرة : ادري شلون فهمني ؟؟
رحاب : دك الباب قبل لا تجين بشويه عبالي انتِ كلت منو ما جاوب بس فتحته گلت يجوز انتِ صاير وياج شيء و مطنگره اول ما فتحته طب علينه
چنه مسودن

جوهرة : ما صرختن ما لميتن الجوارين
رحاب : نويره ما خلتني
نويره : لا والله وصدگ ؟ و تالي هذا العمر و الستر كله افضح روحي بيوم و لليله
يا شبيه تخبلت ولجن هسة الوادم لو طبت يصدكون فلمنه الهندي ؟

هي الوادم بلايه شيء تموت على الفضايح و تريدلها شيء تحجي
و تألف بي مو النوب بيت بي بس نسوان و يطبون يلكون واحد لازم مسدس
علينه حتى ما يخلون قُصة و تهمة ما يحطوها بينه

جوهرة : صدك ؟ اي يمه صحيح
نويره : ياع چا ولج هسة اول ما يكولون نويره فاتحه بيتها للدعاره
و ذني ينطنها فلوس يا يا يا فشلة الفشلة تالي العمر

رحاب : الله ينتقم منه ما شفت هيج بحياتي لزگة و غثة
نويره : شبي لان يحبج صدگ هي هاي الگلوب الطايح حظها
ما تريد اليهواها و تركض ورا الما يگلبها

جوهرة : شو انتن عاديات و اني ايدي لسه ترجف
نويره : خطية المكرود شو من بچه كسر خاطري طاح حضج رحاب ما اخذتي
بس عمي شيخلصج و وراج هاي الجنيه چنها شرطي

رحاب : لا و عابت بالله لو يحطون السچينة على رگبتي
نويره : يمه انا شلون باليتعيقلن و نويره المكروده عرفته مستقتل عليها من انطاها الاسم الاول بالسلفة

جوهرة : ضلن ضلن ما عدچن موضوع غير الزلم
نويره : حچت الما تتحاچه
- عليمن شو هو ابو سلمان اذا راد يتغزل بيج يجيبلج سمجة جبيرة
- يا وخفت و بلت هاي الشوفه والله لاتزوجه و اكسر عينج و عين مرته

رحاب : ههههههه دكعدي لا يهدن عليج اخواتها
من الخوف بدلت ملابس و نمت يمهن بغرفة نويره

كعدت الصبح نويره راحت و امي نايمه مثل الحلمانه صعدت اركض لغراضنه
طلعت هداياهم و نزعت التراچي بأيدي ابوس بيهن
- يحَبيب روحي انتَ حبيب روحي
وين صفه بيك الوكت

ولك ما انسى من چنت تبيع طوبتك و الدُعابل لجهال المنطقة
حتى اشتري دوه الروماتيز بدون ما يدري ابوك

و لا انسى من انيمك و تگلي اذا سألوني بيوم القيامه منو امك اكوللهم اسمها جوهرة لان انتِ امي ، نزلت دموعي عليهن و مسحتهن
كون عمري الجاي ادفعه لخاطركم
اشتريكم بي

امي بدلت و راحت رحت وياها انصدمت بتعامل العجوز وياها
مو مثل ما تعاملت وياي باوعتلي خزرتني
- شو هاي حلوة بس ما جنها بنتج انتِ گطن و بنتج سمره
رحاب : بعد هي البطن تحير شتحوي اشكال و الوان
اهم شيء حلوة على امها

خابرت نويره امي جاوبتها و صوتها وصل لاذني من كد ما عالي
رحاب : تريد فلوس متعاركة وي سماج علمود الدين ابقي هنا خلي اروح
جوهرة : لا جيبي اني اروح

ما قبلت بالبدايه بس كلتلها والله ما ابقى يم هاي العجوز لا تطيقني و لا اطيقها
اخذت الفلوس و رجعت للبيت لسبيت فستان لان الي لابستهن يخزن قديمات مو مال مكان عام لبست الربطه و طلعت للشارع أأجر تكسي
و التليفون بأيدي

اجرت و كعدت و نويره كل شويه تتصل اجاوبها دكول صارت سالفتي بيدج
عدلت ربطتي شعري طالع منها بسبب الاستعجال
جانت اللفه المُعتاده الم شعري و الف الربطه بدون دمبوس
كانت اللفه الوحيده الي تلوگلي

نزلت و من بعيد واكفه نويره تفور تروح و ترجع من شافتني اجت عليه انطيتها الفلوس و راحت لهناك يم الصيادين بعصبيه ركضت وراها قدمت الفلوس بوجهه
نويره : احنه لا شلنه و لا شردنه وهاي عملتك احاسبك عليها بعدين
موش انا الينرفع صوتك عليها انا نويره عمر كامل جبته راسي و خشمي مرفوع مو انت التقلل مني

الرجال صار وجهه اصفر و اخذ الفلوس
و الباقين كلها دكوللها والله انتِ علم ما عاش اليقلل منج
و نويره نقطة ضعفها واحد يمدحها گبل تحولت العصبية لـ أبتسامه

قبل لا ندير وجهنه اجت عيني على السُفن و مكان البحر من بعيد
ردت اشوفه موجود لا ، ما لمحته رجعنه و نويره حتى للسوك ما راحت
طبينه للبيت و هي تعد و تصُف عليه
نويره : لا يكولون لابو سلمان و شكد فشلة و عيب

الظهر اندك الباب كالت منو سمعنا صوت ابو داوود بسرعة فتحت الباب كعد بالاستقبال و ضيفنا ب
ابو داوود : خويه انا امس للصبح كاعد ويا احنه
فطر گلبي و هو ينوح مثل الجهال يگول احبها صار فوگ السبع سنين

گعدنا نحجي ويا و نفهمه طلع ابن اوادم النوب كام
ينوح على اخته عايفهة هناك و جاي وحده كل عقلة يعقد و ياخذها
نويره : جا هو انا ليش ما خفت منه عرفته يهوبز وهو فارغ

ابو داوود : راح يرجعو الولد منين ما اجه ما نكدر نسلمه للشرطة و ندخله برگابنه مصيبه الولد من كعد يسولف سالفته والله فطر الحيطان
اكله متزوجة و بتها بطولها يكول عسى ما بيها اخطر مرض بالدنيا

نويره : خل يتوكل يم اخته احسن من ما يخيس بالسجون
ابو داوود : بس انتِ شيخة هاي لو غير مره جان صاحت و لمت الدنيا
نويره : انا اختك يا ابو داوود و داعت عيونك الما يحلوها الزلم اني احلها
و لا تهون عيونك

ابو داوود : والله عمي انتِ صيتج سابقج ما يحتاج نحجي
ترخص و راح و اليوم نويره محد يحاچيها منين ما تميل تغرف

بـ نفس كشختي طلعت ادور شغل هم ما لكيت رجعت و رحت للمحل
باوعت للبنات الي يباوعن الي بأرتباك اليوم كانن اثنين ويَ الي اطلع وياها بالليل الي اطلع وياها هادئة بس هذني الاثنين لا ابد ما حابات وجودي

كنت العصر واكفة وحده منهن جانت لازمه ساعة بأيدها
طلبت مني البسها اجيت البسها كالت اختنكت اطلعي منا

طلعت و وكفت بصف الرف الي جنت واكفه ورا و العطور بصفنه
بحركة سريعه أتحركت و طيحت عطر وصار عطر يوكع على الثاني طاحن بالارض عطرين هي بسرعة ابتعدت و خلت ايدها على حلگها

جانن من اغلى العطور الموجوده احنه مخليها بالرف بالواجهه
دخل ابو المحل و اجت صديقتها عليه
- عزه غير تنتبهين شبيج النوب العطور الغاليه كلش

درت وجهي لأبو المحل
جوهرة : عمو دخيلك والله مو عن قصد
ما حچه و هو عصبي و ضايج طلع من المحل

اني اعرف صار الخطأ منهن بس اهم شيء ما انطرد من الشغل لان طول الوقت اني متوقعه نظراتهن وراها شيء
نزلت الم بالگزاز و احس داخلي مخنوگ وجهي احتقن

ذبيت الگزاز و اجه العامل الفلبيني يمسح
خلي ايدي على الميز لاحظت اصبعي الابهام مجروح و الدم عدم أيدي
خليته على ثوبي و ضغطت عليه حتى يوگف
و حتى الجرح عاند وياي

صار الوقت شطوله و هذني الي سون هالجريمه راحن بقينه
اني و البنيه و مُجبر انتَ حتى بأقوى حالات الحزن لازم تتظاهر مابيك شيء
علمود الشغل لان الزبائن يردون الي يطول خلگ وياهم

جعت و حسيت راح يُغمى عليه لان بدون اكل ترخصت
من ابو المحل ورحت للاسواق ورجعت بيدي العصير و الكيكه منتظره اوصل
حتى اكلهن وصلت لگيت هوسة بالباب مال المحل

دعبول : عُبرت الشط على مودك خليتك على راسي
رفعت راسي لگيته نفس الشخص و هم لابس المناظر فضولي القاتل ذابحني
حتى اعرف منو هذا الشخص
دخلت بس غرگت بثوبي من الخجل و اني احس بنظرات تلاحقني
لحد ما كعدت على الكرسي و هو نظَره عليه

بعدها صار يتناقش ويَ ابو المحل كل نظري عليهم
شفته جوه من ياخة قَميصة وهدده و هُم يضحكون

اكلت الكيكه و دخل دعبول كلت يا ربي صبرني بعد ما بيه حيل
دعبول : عبرت الشط على مودج خليتج على راسي
جوهرة : شُكراً
- محد حاچي وياج اني جاي اغني

هزيت ايدي كلت جوهرة هو انتِ حظج ويَ العاقلين ما كعد تردي يكعد
ويَ المجانين ضل واكف ويدندن و البنيه كاعده بمكانها تلعب بالجهاز
تذكرت موضوع مُراد اتصلت على نويره اشوف شكو ماكو
كالت ماكو و امج اجتي هاي تطمنت و صار الجو هدوء بدينا نجهز نفسنا حتى نطلع

هم واكفين بره طلعنه من المحل حتى هو يقفل كالت البنيه مع السلامه
ابو المحل جاوب الله وياجن و بعدها الي لابس لِثام ضربه بكتفه
حچه وهو مبتسم
- و انتِ جوهرة لا تضوجين يمعوده العطور فدوه الج واذا الواحد بورقتين

جوهرة : اذا تريد اكطعهن من كل راتب واحد
اشرلي الملثم بأيده عود روحي و ابو المحل كال لا يابه روحي
فدوه الج

رجعت و امي اجتي انطتني راتبها اكثر من راتبي
رحاب : كثري فلوس الولد بالشهر خلي نخلص منهن
ما جاوبتها من ينفتح هيج موضوع تجيني لحظة ادراك
لعد و الموضوع الجازفت بروحي. عليه ؟

كعدت من الصبح قبل لا تكعد امي و اني من الاساس من كد التفكير ما نمت غير ساعتين شافتني
رحاب : شكو شبيج وجهج ما يبشر بخير
جوهرة : راح اروح لبيت اهلج اسأل خو ما اضل كاعده

رحاب : و ليش متعبه نفسج هسة هم يجوج و يكلولج همزين لكيناج صار هواي ندور عليج
جوهرة : مو وكت هاي سوالفج ترى ادور على اخواني مو انطي تعبي للكلاب
ما جاوبتني و راحت

كعدت نويره و احس كل الدنيا خانگتني كلتلها خلي اروح وياج
ما رفضت بسبب شكلي الي مبين عليه القهر و التعب
بدلت و اخذت الفلوس الي انطتهم الي امي اذا لكيت تُراب حتى انطيهن اله
و اذا ما لگيته اتصل بي حتى يجي

هو مو الموعد بس حتى اخلص لا اضل طول العمر شايله حملة على ظهري
طلعت وياها وهي دگلي شبيج ما اجاوبها وصلنا و راحت هي بأتجاه و اني مشيت بأتجاه البحر ما صاحتني و لا گالت وين

مشيت يم البحر و عبرت السياج و بديت انزل
لو اشرب هذا المي كله ابقى عطشانه على شوفتكم

نزلت رجليه بالمي اجه صوت من وراي باوعت واحد من الشرطة
- شنزلج هنا شبساع طبيتي امشي طلعي
جوهرة : عمو مخنوگة ما تعوفني بحالي

- شبيج بعدج بأول الشباب
جوهرة : تعرف واحد هنا اسمه تُراب ؟
- اي منو ميعرفه ؟ شتردين منه

- گله جوهرة تريدك
- عيني جوهرة دطلعي هسة لا ينزل بيه انذار
طلعت و ضليت واكفه انتظر من بعيد شفت واحد وكف على حافة السفينه
يباوع و الي جان يمي يأشر عليه

نويره ادور عليه رحت يمها كلتلها روحي للسوك اني راح انطي للرجال فلوسه و ارجع للبيت كالت بس ديري بالج اجه و شكله معصب
لابس الزي الابيض و ضاغط على عيونه

وصل يمي
تُراب : شجابج جوهرة صدك تحچين

ما جاوبته مديت ايدي طلعت الفلوس
جوهرة : هاك هاي فلوسك اكثر من كل شهر و بعد كل شهر اجيبك هلگد
تُراب : انعل ابو الفلوس ليش اجيتي ما خابرتيني

جوهرة : هسة بعد اجيت يالله مع السلامه
درت وجهي حتى امشي مشى وراي
تُراب : جوهرااا

جوهرة : ها تُراب ؟
- شبيچ ؟

ضغطت على عيني تنبيه الها حتى ما تبچي
گلت مَابيه شيء و دَمعت عيوني
مو بيه حُباً ما بعت
بس انتَ أناني و حَسبت ،شرايني انا هوايه
خُفة عيوني بغيبتك ذلتني ذل
مو بس الاغاني تهزها لا ، كامت تهزها حچايه

فتح باب السياج و گال انزلي اني هنا واكفلج غسلي وجهج وتعالي
نزلت وكعدت على صخره المي القريب بارد سحبته و اخلي على عيوني حتى اهدأ صارت الشهگة اقوى و احچي بيني وبين نفسي كافي جوهرة كافي
لا تبينين حزنج لاحد

صرت اشيل و اشمر مَي على وجهي
درت وجهي ما لگيته اخذت راحتي بالبچي احس حتى الدنيا بدت تضحك على احلامي و اني وحدي واكفة بالوسط و حامله السيف

سمعت صوت شيء قادم مثل صوت السياره شويه و صار گبالي
و هو صاعد بعبارة صغيره تقرب عليه وگفها و فتح الباب
تُراب : اصعدي
جوهرة : لا شُكراً

تُراب : دصعدي بالگوه اخذتها اريد احجي وياج بموضوع صعدت
كعدت وهو يبحر كان صوت الماطور عالي حتى لو يحجي ما اسمعه
مديت ايدي على المي و هو سَريع كان شعور حلو
لا ارادياً ابتسمت لگيته يباوعلي

وگفها على الضفه الثانيه اندار عليه
تُراب : تبچين على فلوسكم ؟ مَابقى شيء و ألزمه
كاعد اتحايل عليه لان ما عندكم دليل انتو

جوهرة : بعد راحن لا تتعب نفسك واني لا ما ابچي عليهن والله
تُراب : چـا شبيج ؟

جوهرة : أخواني
- منين ؟ وينهم ؟

جَوهرة : عندي اخوان ثلاثة اثنين بنات و وَلد واحد
- اي ؟
- باعتهم مَرت ابو امي و احنه شردنا رادو يذبحون امي خوالي
و هي كالت اني بعدين ادز جهالج وراج رحنه و بعد ما دزتهم
لا وصلتنه اخبارهم بعد و لا احنه رجعنه

تُراب : و وين راح تلگيهم بعد ؟
جوهرة : لا عفية مو حتى انتَ تأيسني اني گلبي يگلي تلگيهم

تُراب : و أبوچ وين ؟
جوهرة : ابويه !!
- اي چـا منين اجيتو

جوهرة : امي تزوجت ابويه و جابتني وراها ابويه زوجها بأيده لصديقه حتى يخلص من الدين مال القمار رادت تشرد امي بس علمودي ما شردت بيت جدي ما يدرون بس بيبتي و ما حچت لاحد ولا كالتلهم

بعدين ابويه و رجل امي اختلفو راح ابويه كال لخوالي امي متزوجه واحد غيره
و هي على ذمته و لازم تذبحوها رجل امي من عرف دَز جماعة كتلو ابويه

و خوالي كتلوه رجل امي و اجوي حتى يذبحون امي لان ما گالت

اخذتها مرت ابوي ضمتنه عند وحده اسمها سعديه
و شردتنه من العراق كله بس اخذت اخواني ثلاثتهم

تُراب : شنو من مَره هاي ماتت لو بعدها عايشه
جوهرة : ما ادري و اتمناها عايشه حتى اكتلها بأثنين ايدي

تُراب : تحبين ابوج لو رجل امج ؟
جوهرة : و لا واحد ابويه بس هيج اكول هاي الكلمه حتى تفرق بيناتهم
اما هو لا عشت ويا شعور الابوة و لا ويَ غيره و زوجها بَعد اضرب من ابويه

تُراب : خلي نروح و بعدين نكمل
بوقت صابني الندم لان حچيت اله و خوفي من شعوري المبالغ
و اني اكول اكو كثير أسئلة لازم تنسأل حتى تتوضح الامور

اختفى هالشعور و هوَ سحب قلم صغير من جيبه
تُراب : أكتبي التردي على المي راح ينزل و يتحقق

اخذت القلم و بديت أكتب و اني أكول و اخيراً شخص مثلي يأمن و يحب هاي السوالف كملت انطيته القلم
تُراب : عاشت ايدچ راح تنزل بقاع الهامور و الاسفنجه و جماعته
ما يقصرون

باوعتله و أبتسمت لان ماكو اي ردة فعل اتصرفها اتجاه تصرفاته
رجعنه و سلم السويج للرجال المنتظره
وگفنا على الشارع العام
تُراب : كل ما تحسين روحج ضايجة اتصلي بيه افرچ
و لا تضوجين كل الترديهن يصيرن

اجرلي تكسي و دفع حسابه و رجعت كلت بداخلي الحمدلله دفعه لان لمن فتحت الجنطة مابيها و هسة نويره ما موجوده بالبيت لازم اخذ الرجال لبيت الي تشتغل يمها امي

مو كم يوم و استلمت الراتب
لمن امي اشتغلت حسيت روحي مسيطرة على الوضع اكثر
كاعده بالمحل أهز برجلي و أفكر لو ردت اروح للمحافظة الي هم بيها
ينراد شكد اخذ اجازه و خاف يطردني

صارت هوسه بالمحل وگفت امشي بالزبائن و اجاوب اسألتهم
وگف يمي شاب مرتب يعجز على العقل يفكر بيوم هو راح يخطي خطوة غير صحيحة

جنت واكفة اجاوبه على العطور سألني على عطر وراي عالي
اجيت الوحه ما كدرت ردت اصيح الفلبيني گال لا اني الوحه بس صيري على صفحة مَد ايده اخذة و ابتعد اشتمه كال لا مو طيب

اجتي عيني على الباب لگيت ابو اللثام واگف بس ميباوعلي يباوع البنات الي ما يحبني و مركز عليهن گلت بگلبي حتى انت صدگ الزلم مابيهم واحد
ميحب جميع الانواع

قطع تفكيري صوت الزبون گال عادي اخذ الثاني هذا ما عجبني گتله براحتك
تقرب حتى ياخذه ابتعد بسرعه وبين التوتر و الارتباك الي واضح على وجهه
رفع ايده بالتهديد
- مع الاسف هيج مكان محترم يشغل ناس ما محترمين و ايدهم طويله

جوهرة : أني ؟؟؟؟

ما اعرف من بين الهوسه شلون دخل الشخص الملثم و ابو المحل ورا
رفع اللثام و شمر النَظارات بالارض و ضرب الولد بوكس
ضليت محتاره تحت صدمة الموقف
لو صدمة الشخص هذا !!!!!
...

آلماس
ويَ دموعي حسيت بخطوات على الدرج باوعت امي الاء !!
سويت نَفسي نايمه بسرعه لان احس عقلي ميستوعب قساوة كلامها

رفعت الغطاء من يمي
الاء : لو عندج ذرة كرامه و حياء تطلعين من البيت كافي تعبنا عليج كل هاي السنين و ربيناج ردي الجميل و طلعي و كوني خفيفة ظل

ما جاوبتها و لا فتحت عيوني رغم هي تعرف اني كاعدة
رجعت گالت
الاء : هسة عرفتي ليش افرقج لان انتِ من الاساس مو بنتي لذلك اني ما مجبوره بيج و لا تتسبعين بـ عَبد العزيز ترى بحچايه مني يطردچ

عفتها تحجي لحد ما تعبت و راحت
فكرة انتَ شخص ما عندك اهل صعبة و فكرة انُ محد راح يستقبلك اصعب
قمر ما داومت طلعنه اني و أبونه عبد العزيز
ردنه نعبر الشارع خله ايده على راسي و عُبرنه

جانت صديقتي واكفة تنتظرني حتى ندخل سوه
هو مَد ايده بجيبه انطاني مَصرف
عبد العزيز : ديري بالج على نفسج

صديقتي انمار سلمت عليها و طبينه
انمار : للابد اني احب ابوج و شخصيته ما يريد مره لان امج عايفته
الماس : طلگها و رجعها
انمار : يا ؟؟؟ تدرين الصراحة شو هو مبين كلش صغير يعني امج تبين اكبر منه
و انتن هم كبار ورقاء و انتِ تدرين اخويه الجبير بكد ابوج لسه ما متزوج

الماس : هو متزوج من عمره ١٦ و تخيلي
انمار : عزا
الماس : اي والله هو مره سولف النا جان ابوهم اول ما يشبون يزوجهم حتى ما ينجرفون للخطأ و امهم تروح تخطب الهم هُم حتى ميدرون

انمار : عزا بس والله هيبة من يمشي
شنو شعورج و انتِ بنته ؟ ولو هو شويه مفرق بس حباب هواي

الماس : متبنيني مو أبويه الحقيقي و لا امي الحقيقية
من الصدمه انمار عثرت بالزرع و وگعت على وجهه

رفعتها و انكت بملابسها و هي تضرب روحها راشديات
انمار : عزا بعينج انمار صخام بوجهج الماس
هذا مقلب مو ؟
الماس : لا والله حقيقة ولا دكولين ليش ضميتي ترى هذا الشهر عرفت

إنمار : عزا انتِ تدرين يعني هسة يصير يتزوجج
ضربتها راشدي من الصدمه
وهي استوعبت كلامها اجتي تعتذر
انمار : والله طلعت بدون قصد وداعتج

انتهى الدوام و رحت اخذت الواجب لقمر من صديقتها
انتظرته تأخر الوقت و ما اجه رجعنه اني و إنمار دخلت للبيت و هي
راحت لبيتهم لگيت السيد بالاستقبال يقرا و امي الاء واكفه

سلمت و صعدت انطيت الواجب لقمر صاحوني على الغده گلت الهم ما اريد
بعدني أرتب بجنطتي سمعت خطوات على الدرج لمحته هَو
حطيت الحجاب على راسي هو قبل لا يوصل صدر صوت حتى انتبه

عبد العزيز : السلام عليكم
الماس : أهلاً
- ليش ما تنزلين يابه
- ما إشتهي والله

عبد العزيز : و اذا احلفچ بمعزتي تنزلين ؟
الماس : اكلو بالعافيه اني والله لو اريد جان نزلت

ما جاوبني نزل و صار ضميري يأنبني بقوه
ما گدرت اقاوم عدلت حجابي و نزلت
هو و ورقاء إبتسمو عكس قمر و امي

سوتلي ورقاء مكان يمها كعدت اكلت شويه و صعدت
بالليل يالله نزلت و كان كأن تنبيه اللهي حتى انزل وصلت لغرفة اخواتي
جانت مردوده ردت انزل استوقفني صوت
قمر : لا يمه انكشف والله و ابويه يذبحني

الاء : ماكو غير هاي الطريقة نطردها من البيت خالج الصغير
يريد يجي يرتاح يمنه و ابوج ما يقبل يكول ست الحسن و الجمال تتضايق

قمر : يمه ترى اني اراقبها هي مو مثل ما انتِ تفكرين
سمعت الصوت يتقرب نزلت بسرعه ختلت بالمطبخ هي نزلت و دخلت للغرفه
فتحت الثلاجة حتى اشرب مي سمعت صوت ابونه

عبد العزيز : أني ماشي وياچ الى أن توگفين گدام طريق مسدود ساعتها راح ترضين بالامر الواقع لان انتِ انسانه مُقصره من جميع الجهات
الاء : والله هذا الموجود

بعد ما جاوبها و اني صعدت ضلت تدور براسي شنو الشغلة الي تريد الاء تسويها الي و اني غافلة عنها ثاني يوم الصبح گلت لـ ورقاء على الي سمعته
البارحة انصدمت

اخذنه ابويه للدوام و من طلعت ما لگيته و حتى قمر ماكو رجعت للبيت
لگيته واكف يتوضى و قَمر مبدله ردت اكوللها ليش اجيتي وعفتيني
بس گلت لا الماس اسكتي

اول ما صعدت الدرج كمل وضوء
عبد العزيز : لعد ليش تأخرتي يابه
الماس : غير انتظرك و قمر ما موجوده تالي أيست و اجيت وحدي

باوع لقمر
عبد العزيز : مو گلتي رجعت ويَ صديقتها
قمر : ها يابة والله ما ادري عبالي رجعت لان ما لگيتها
خزرها وما حچه شيء

صعدت و گلت بداخلي هي هاي الناوياتها عليه ؟
بدينه نحظر بجهاز ورقاء و فكرة بُعدها عن البيت تعقدني
على الاقل اكو من احس يمه بالامان

بنُص الليل نزلت فتحت باب الغرفة ما لگيتها نزلت لگيتها بالمطبخ تنظف سنادين الكراج و تنظف السور القرأنيه اجيت يمها گرصت خدي و باسته
آلماس : ورقاء أريد أبچي

لزمت ايدي و طلعت بالكراج بعتبة باب المطبخ
كعدت و كعدت وياها لزمت وجهي بأثنين ايدها
ورقاء : ليش يا حلوة الوجه و الروح حزينه ؟

بدون مقدمات ضميت وجهي بحضنها و صارت دموعي تتسابق
منو تنزل قبل الثانيه
ورقاء : يا روحي يا عُمري اسم الله على گلبچ أبچي هذا الحزن وين ضامته

باچر الدنيا تضحكلچ و تكونين مو الماس الضعيفة هسة
باجر كلشي يتغير و شخصيتج تتغير و يدگ الحُب گلبج و راح تحبين
الدنيا كلها الله دخلج هذا الامتحان من الصُغر لان هو واثق
انتِ شگد قويه و راح تعدي

رفعت راسي من حضنها
الماس :ما اريد كلشي من هاي الدُنيا بس اريد اموت بس هناك ارتاح
ورقاء : اش اسم الله عليج عابت يعني متردين تصيرين خاله ؟

الماس : هو انتِ الي تحبيني راح تروحين منو يبقالي
تريد تجاوب و دَگ التليفون مال امها قبل لا تجاوب أبتسمت
رجعت راسي بحضنها و دارت وجهها تتفقد الاجواء و جاوبت

- الو .. ههههه هلو بيك .. الحمدلله انتَ شلونك ؟
هزت كتفي و فتحت السماعة كاللها
ان شاء الله الاسبوع الجاي راح تكونين بجانبي ما احتاج أتصل

ورقاء : لا مراح اجي أختي الماس تبچي و اني ما اكدر عليها
علي : اويلي هو اني غير شايل هم ابوچ بيوم العقد يباوعلي و يبلعم
گلت لو ما عيب اكله عمي اجي اعيش وياكم عادي راح يصير بيك سكر من القهر

ورقاء : حبيبي اسم الله عليه اي هم ميكدرون بدوني
علي : هو انتِ منو يگدر بدونج ؟
ابتسمت وسكتت

علي : و لا تشيلين هم اختج عادي هي هاي الحلوة غير ؟
يالله ناخذها لفَضل و تبقى يمج
ورقاء : هههههه يالله راح اروح
علي : الله وياج حبيبتي
سدته و لطمت على خدها بأبتسامه

الصُبح ابونه اخذنه و طول الطريق يدقق محد تتحرك بدوني
بالليل على العشة الاء كالت رجعي نامي ويَ البنات بنَتره
الماس : لا مرتاحه

ما اعرف شنو من غل يوصل الانسان حتى يكدر يضبط كل هالمشاهد
بالليل و اني اريد انام انتبهت باب السطح بي المفتاح
عكس كل يوم ما اشوفه !
....

لَو ماتَ قَلبُك لا تخدشّ كرامتُكَ
للبائعين عقاب الهَجرِ مكتوباً
بَعض العتاب مَذلةً يا سامعي
إدخل لسانك ماء الوجه مطلوباً
- رُسل فَهد

تابعو الحساب و قناة التلي بالبايو 🤎😞