على كتف القبطان حمامة الفصل السادس وأربعون 46 - بقلم رُسُل فَهد

التَصويت و المُتابعة لُطفاً
عَلى كتِف القُبطان حَمامة
- رُسل فَهد
...

فصيحاً :
لو قُمت بوضع عباءة رأس أمي على قلوبكم
لن تشعروا بالحياء مرة على ما فعلتم بيّ

شعبياً :
تالي ذيچ العشرة تگضي ؟
و هيج زيناتي الـ مَتنعَد أنمحن ؟
ما أعاتب
هنَ الگلوب الـ يغدرن بـ اليحبهن
لو تلبسهن عِبي ما يستحن
- رُسل فَهد
....

جوهرة
- هاااا ؟
تُراب : اي جوهرة خليها تتزوج ترى انتو كلكم مستقرين الا هيَ
و اليوم حتى ابو راكان حاچاني اخو اصغر واحد هذا الاجة وياهم واكف بعيد عن السيارة تتذكري
- اي ؟
- يريدها على سنة الله و رسوله

انتفضت و كعدت عدل كبالة
جوهرة : شتحجي انتَ تُراب شبيك والله عيب عليك
ترى امي راح تصير بيبي و هذا الساقط والله اكول شبي صافن
تُراب : هي امج حلوة ما تتفوت
حجاها و أبتسم و كعد عدل

من جهة فرحانه لان ابتسم و بنفس الوقت متنرفزة منه
جوهرة : عوف امي تُراب خلينا اصدقاء
تُراب : احنه متزوجين ابو الجواهر مو اصدقاء
بس هي امج حلوة يعني محد ينكر هذا الشيء

جوهرة : ادري امي حلوة بس لا دكول بهاي الطريقة عبالك معجب بيها
تُراب : هو انتِ واكفة بطريقي جان من زمان نسيتها حمودي
بس اني انسحلت برموشج ما انتبهت لوجه رحاب جان ماعت روحي
جريت الوسادة و ضربها بوجها و رفعت اصبع للتهديد
جوهرة : لا تستفزني

تُراب : هههههه اشاقة وياج تعاي نامي ، لا والله يعني اني
اكول تستقر و تعيش باقي حياتها على الاقل مرتاحة
مو دكولين انتِ شكد تعذبت

بقيت ساكته و رفعت نظري للسقف و اني حاضنه رجلي
جوهرة : شافت اشكال المصايب جان جبار الي عود ابوية
يدزها للجيران تطلب النه اكل منها

و جان يخليها تطلع تجدي و تجيبله فلوس و تخاف منه خوف
مووو طبيعي شايف اذا طبك الباب و دخل امي اباوع الها
تصير صفره و تتلفت اني من الخوف يعيط بيه كبل اغطي راسي و أنام

جان يجيب اصدقائة الديانة و يطلعها الهم حتى من يشوفوها
يطولون بالكلام وياها و يرحون مايجيبون طاري فلوس
و ياما و ياما يجون اكو منهم يجون علمودها و يكولولها
الفلوس طايحة و من تجي منهارة تبجي هو عنده كلش عادي

جنت ابجي من الجوع توكلني اي شيء موجود و انام و هي تبقى
جوعانة تمرضت بالكلى و تتداين من الجارات حتى تشتري دواها
و تتأخر ما تطيهن الدين اكو شكد يسون عركة بـ باب البيت
علمود الفلوس

جان لمن يجي سكران وهي تلعب نفسها من ريحته
يكطعها بحجة شنو تلعب نفسج مني بوقتها امي جنت اكعد بالليل
الكاها تبجي و لازمه صورة شخص الي هو احمد هسة
جانت تحبة من هي ببيت جدو و اني اكول هذا شايفته بس ما ادري وين

مره من المرات خنگها و شمرها بالكاع عبالي ماتت
وجهها لون ازرق و اثار ايده على ركبتها و اني لازمه ايدها و ابجي
لحد ما حركت ايدها و حضنتني و الروماتيز جان يموتني
بالشتاء و اني صغيرة رجلي تأذيني
تاخذني وحدة من جاراتنه مرات للمستشفى و ينطوني دوه

و غرفتنه باردة المطر ينزل علينه من السكف و اني اصيح من الوجع
و امي مغطيتني بـ ثلاث بطانيات حتى ادفى و يخف الوجع
و اذا هو موجود كون ما ابجي لان يريد الغُرفة هدوء ..
اضل عاضة اصابيعي من الوجع لان اذا ابجي فوك الوجع يضربني

لح ما امي تزوجت عمار وهي جانت تتمنى شوكت تتطلق من ابوي
حتى احمد يتزوجها جان ممتزوج و عمار دلل امي ما اكلك قصر وياها يعني فلوس و لارقى الاطباء ياخذها حتى تطيب
من كلياتها بس امي ما حبته ابد يمكن بسبب الطريقة
الاتزوجها بيها

او .. يمكن لو باقي عايش جان حبته بس من مات هي رجعت لذكريات
احمد كلها وللان هي ماحبت و لا ردات غيره بس هو ما يحبها مبين
بس يقضي وياها وقت ومستمتع بحبها ووفائها اله
تُراب : يعني اذا تقدملها حتى هسة بعد كلشي توافق
جوهرة : والله توافق امي و اعرفها

تُراب : كملي
جوهرة : جان عمار ما يضرب امي ابد رُغم هي كبال عينه دكله اكرهك
يلزمني اني يضربني لحد ما تبوس ايده يعوفني
و اذا راد منها شيء و ما سوته يعوفني بالكراج بالبرد
و يسد الباب و يخلي كل جسمي يصل عليه و علاج ماكو
تالي تنجبر تقبل و يفتحلي الباب

تُراب : خوالج شكد عارات
جوهرة : اي سُمية امي كالت حشتهم تحشي بحيث يموتون من امي
و تخيل هم من عرفو امي بعلاقة وي عمار يردون يذبحوها
و عمار من سمع اجه يركض خاف يذبحوها
وهم هاي السنين كلها وجهها ما شايفي و لا يدرون بأحوالها
بس سُمية تتردد علينه

اجتي سُمية كالت اله اني اضمها لا تخاف هي و جهالك
وهو متحلف الا يكتل ابوية شلون كاللهم هذا عشيقها
و خاينته ويا ليش ما كال الهم رجلها و اني بعتها اله
وصار كلشي سولفت الك عليه و سمعنا عمار الي كتل ابوية
و خوالي كتلوه عمار و سُمية تعرف بالقصة كلها بس ما حجت
و برأت امي بكل بساطة

تُراب : تصفن العقل قُصة رحاب هي اكثر وحدة بيكم تأذت
جوهرة : لذلك امي من شافت روحها خسرت كلشي قررت
تنسى كل الماضي و تعيش حياتها و نست كلشي الا احمد
جنت اشوفها مراتٍ تخلص الليل تبجي
و مَرات من فرحتها تحُضني و تبوسني رغم البرود الي صابها
وصارت اقصى امنياتي تعاملني مثل الامهات

تُراب : و ما تزوجها العار
جوهرة : لا هو تزوج و عنده اطفال و كل مره مرته تكشفه و ينهي العلاقة بس امي متمسكة بي هواي و يرجع الها
وهاي بنفس الدوامه احنه كل هاي السنين
تعرف مُراد الله يرحمة ؟
تُراب : اخو اميرة مو ؟ سولفتيلي

جوهرة : هذا جان يموت يموت يموت على امي بحيث خاطر
بنفسة واجه العراق علمودها و جان هو بكل مره نريد نرجع بيها يخرب كلشي في سبيل منرجع و يخسر امي و هم ما حبته

تُراب : انتِ شوفيها بهذا اخو ابو راكان عنده ولد و بنية
و مرته متوفية و يريد يتزوج يجوز تقبل
جوهرة : حتى لو تقبل تُراب اني ما اقبل خليها هيج
يمنه احسن حتى لو تزوجت هي ببالها احمد ماكو غيرة

تُراب : تعاي رجعي نامي عدل خلي انيمج
جوهرة : طفلة اني طفلة
تُراب : شلون طفلة مملوحة هاي
ضربته على صدره
- دشوف ايدك و وجه السود

تُراب : غير زِلم خشنه صاگعتنا الشموس
ضرب زَندة وباوعلي
- شوفي الگيمر غير امي متنسيه بحليب
جوهرة : عود تريد تصير دلوع

تُراب : دلوع منو هذا اكلة لو شربت
جوهرة : يعني هيج تصير دلوع مايع
احجي و اني احرك بأيدي حركات الدلوعين
تُراب : هاي مو حركات الدلوعين حبيبتي هاي حركات فد ناسسس

جوهرة : شنو من ناس
تُراب : هيك لا تخلي على بالك مانو كتير الموضوع مهم
فتحت حلكي بصَدمة
جوهرة : هسة حتى اني انسه و انتَ تذكرني

تُراب : لااا يعني متردين تتذكريهم مو
جوهرة : يوووه شبيك شكد تكبر المواضيع يعني والله و لا مفكرة اني
بهذا الموضوع بس انتَ شايل همه
تُراب : و تتمضحكين عادي عندج بالله طيبة التفاحة

جوهرة : الصراحة اي طيبة ليش الجذب يعني هي طعم تفاح
صار وجهه قريب على وجهي واني اضحك مُلص اذاني
بقوه و اني اصيح و اضحك
تُراب : المَلحة تدور مايعين

المَلحة : شحصلنه من الزلم الخشنة
عدل وجهي بأيده عبالي يبوسني بقيت ثابته لحد ما
عض خدي بقوة قريب على شفتي و اني من الصدمه
ارافس بأيدي و رجلي حتى ما صرخت بس ابجي من الوجع
تُراب : شو صايرة فد مرة

دفعته و كمت بعصبية
للمرايا امسح بمكان العضة صاير احمر ضربت رجلي بالارض
جوهرة : شبيك تخبلت تخبلت تُراب

اجه صار وراي و غرس كف ايده بـ بطني و يقرقرني
و اني اضحك بصوت عالي بس اريدك يوخر لان النفس صرت كوه اجره لحد ما صارت انفاسه السريعة قريب اذني
طُبع بوسة برقبتي خفيفة
جوهرة : كافي كافي تُراب بطني موتتني من الضحك تخبلت
تُراب : مشتااااااق ..

ثاني يوم الصبح هوستنه و احنه نتجهز و تُراب واكف يعدل ملابس
دعبول و يخليله عُطر اجتي نويرة جايبة ملابس لدعبول جديدة تُراب موصيها ودعناهن و امي حضنتها بقوة و اني راسي يرن
بكلام تُراب

اتصلت بـ الماس ودعتها و هي طول المكالمة تسولفلي شكد تدعيلي
يصير عندي اطفال راكان اجه هو و عَمه ابو صفنه حتى يودعنا
بستهم كلهم و كلي امل بهاي العملية و بنفس الوقت خايفه

كنت اول مرة اجرب السفر بالطائرة واحلى تجربه
دعبول نعاملة مثل ابنه وهو متقمص الدور جداً من يوم الي صار زين
كاعدة بصف تُراب و اختاريت الا مكان الشباك اريد اشوف الطيارة من تطير اباوع واني مبتسمه و الابتسامة مرسومه على وجهي
حسيت ايد تُراب صارت على ايدي

غَمضت عيوني براحة
جوهرة : تُراب انتَ ماكو منك
تُراب : وين ما تردين أوديچ لو لاخر محطة بالدنيا
حتى يم الله أوديچ اذا ضوجتيني فد يوم
ضربته واني اضحك
جوهرة : فَـد احبككك ، يا احلى وكح بالدنيا

حَك شواربة و باوعلي
تُراب : آه ؟ يعني اني وكح
جوهرة : اي يعني حركاتك و سوالفك هاي مو مال عُقال
تُراب : أدبيني
جوهرة : لا هو اني احبك وكح

گرص خصري و اني صرخت كبل خله ايده على
حلكي و كفخني راشدي
تُراب : شبيها المَلحة صايرة ما تتحمل
جوهرة : عوفني يالله اي ما اتحمل
- اي اي متتحملين صحيح صحيح

لحد ما وصلنه گوه لازم نفسة دعبول منبهر بالجمال و احنه مثله
من ثاني يوم اخذني لعنوان الدكتورة و كالت نفس كلام الدكتوره
بالعراق و العملية كل ما كانت اقرب كانت احسن
اني بس اريد اسويها ما مفكرة بالوجع و لا بذرة

و كان كلامها راحة نفسية انطت اجرائات و تحاليل يكملها حتى
تحدد موعد العملية و بعد ثلاث اشهر يالله تبين النتيجة
و ست اشهر اذا ما صار حمل واجب الرجوع الها
رحت ازور و وياي عمتي رافعة ايدها و تدعي
الله يترس حُضن تُراب اطفال و يعوضوه خساراته

باليوم الثالث من سفرنا خبرها تُراب عن وضعنا و حددت موعد العملية
لبعد يومين امي على اتصال هي وراكان ويانه
كأن امي من شافتهم رجع كلبها يحن علينه و بديت
اعيش الي جنت محرومه منه ،، حنانها

تُراب كل شوية ماخذ دعبول يتونسون و مرات هو و عمي
اني اخذت خالة و طلعنا نفتر و نتونس وحدنه لكيت عمي واكف
النه بـ باب الشقة
ابو تُراب : والله تخوفن انتن شعدجن طالعات وحدجن
جوهرة : قابل وَحد عنكم عمو انتو كل شوية طالعين

بـ الليلة الي بيها باجر اسوي العملية ابين لتُراب اني ما خايفة بس حتى يطمئن لان هو يمشي ويگلي والله ما الها داعي خليها على الله
تمددت بصفة مبتسمة خله ايده على خدي و يحرك اصابيعة عليه
تُراب : والله خايف عليج انتِ وين بيج حيل عمليات
مَد ايده قريب رجلي اثر ثقب عملية القسطرة

جوهرة : اني اريد يصير عندي اطفال تُراب و انتَ ابوهم
اريد اشتري الهم ملابس و انيمهم اني احب الاطفال و احب
كلمة ماما انتَ متكيف يجيك طفل يكلك بابا اريد العاب
لو بابا اني احبك
تُراب : اكيف اكيد بس عندي انتِ اهم شنو اشوفج تتوجعين
علمود الخلق الزفرة هاي

جوهرة : هاي بعدهم ما جايين وقاسي عليهم الا الاطفال تُراب
تُراب : والله اني ما عندي لحية مسرحةَ الما يجر عدل انعل سلفَ سلفاه
جوهرة : عليمن يطلعون ع ابوهم اكيد
تُراب : ليش تمثلين ما خايفة و انتِ الخوف محتلج ؟

كعدت و بعدت ايده بعصبية
جوهرة: يوووه تُراب عاد شبيك لا تعرض خليني اسويها و اخلص
حُضني بقوة وهو يلعب بشعري
تُراب : اخاف عليج والله المَلحة بس لا تخافين هي مو جراحية
كلش ثلاث فتحات ويدخلون كاميره و جهاز المنظار

جوهرة : انتَ خايف و ما تريدني اخاف ، يمه خاف ينسون الكاميرا
ببطني ؟؟؟
تُراب : لا ما ينسوها الكادر وي الدكتورة لبناني
هسة يدارنچ

لحد الصبح عمي و خاله كاعدين قبلنه من القلق
رحت وي تُراب و أحتاجها امي بوقتها كلش دخلت صالة العمليات
و اني اردد بكل الادعية الي علمتني خاله عليهن
غَمضت عيوني بالبنج و اني اتخيل شلون يزرفون بطني

كعدت على وجع ببطني فتحت عيوني تُراب فوگ راسي
و اني اشرحلة الالم شكاعد يسوي بيه
ايام و بديت اتحسن يوم واحد بالمستشفى و طلعت
عمي و خالة خلوني بعيونهم و حتى دعبول يجيبلي كلاص المي و يشربني
دعبول : لان من جنت مريض انتِ هيج تشربيني

منها و حسيت ماكو شيء بالشط
كل زين سويته وي النَاس رجعلي و حتى لو الزين بـ فئة وي الناس
ميغزر راح ينعكس على ناس ثانية و يكونون هُم العوض
كل شيء اثر بهاي الدنيا

لو سويت زين راح يرجع الك زين ممكن مو الا الاشخاص نفسهم
بس رب العالمين يشوف ويعوض الانسان على كد تعبه
خالتي الي جنت اني ابدل و اغسل الها صارت هي تغسلي و تبدلي
و عمي الي ما تعاجزت منه بيوم كل شوية طالع جايب الي فاكهة
او شيء شايفة الي و عاجبة

ابتسمت لمن اجاني بأيده كاسة الشوربة
ابو تُراب : مو بس انتِ حايرة بطبخنا هم الج حق نحتار بيج
و هذا رجلج الساقط بالشوارع يشرب جكاير عبالة ما ادري بي
سُعاد : غير يخاف ويستحي منك و يحترمك والله احتار بيك
هالولد المكرود

ابو تُراب: ضلي انتِ ضلي دافعي طبعاً احفادي محد يربيهم غيري
سُعاد : جا شفايتلهم على ابوهم وين يلكون مثلة شبي متربي مرتين
ابو تُراب : لا خمس مرات هذا ابنج ابو الفشار المستهتر
سُعاد : ديالله هسة سُبحان الما يفشر شلك غرض
عوفة هو وصحبانه
ابو تُراب : ولج لسه ما مستوعب شلون يحجي
وين ومنين جايب هاي الحجايات

انفتح الباب و دخل اني و خالة مبتسمين و دعبول بيده تليفوني يلعب لعبة و عمي صفك ايده
ابو تُراب : هاي سَير رجال البيت شربلة شجم جكارة و اجه
تُراب : هسة يالله يابة جكاير و لا عرگ

ابو تُراب: وحق هو علي اذا متجر عدل احرمك من مرتك و اخليك تدور و ما تندل مكانها وين انا ماعندي هيج تربية منحرفة باجر تصير عندك جهال شلون تربيهم و انتَ روحك ما مربيها
تُراب : يابة شبيك هو كتلة هيج من خواتك كال لا خواتك
كتلة ما عندي خوات

ابو تُراب: لك اني عمري ستين سنه
و ما الفظ هيج حجي انت شلون تكدر تحجي بابا اتعب نفسي
بالحجي وياك انتَ منو مربيك
تُراب : تربيتك اني حبيبي

بقو يتعاركون لحد ما اجه تُراب يبوس بـ ابو و يحضنه يالله تصالحو
بالليل و اني متمددة أون من الوجع
اجه تُراب ينطيني علاج
تُراب : خلصت ما بقى شيء راح الهواي و بقى الـ شوية
حتى نرجع شابع عقوبات لخاطر المَلحة

لحد ما كمت علي حيلي و رجعت للدكتورة كالت كل الوضع تمام
و العملية مُمتازة ان شاء الله منلتقي بعد و تتواصلون وياي
دكولون حامل

اخذ ايدي تُراب و طلعنا نتونس لان بعد يومين و نرجع
اشتريت لالماس و ابنها ملابس و اني فرحانه اخذت ابيض لان ماعرف بنية جانت لو ولد و اشتريت لحبيباتي الثلاثة و راكان
و اخواته شكد ما يسولفلي يحبنهَ و يسترن اله لمن يروح لالماس

بالليل نريد ننام و الشقة هدوء
دخل مبتسم و الجكارة بيدة
جوهرة : يعني انتَ متتوب لو يشوفك عمي يكلب الدنيا
تُراب : لج اني ادري زعطوط طايحلي دك رزايل كدامج
جوهرة : ههههههه يالله ابوك شتسوي

تُراب : كومي نطلع
جوهرة : هسة بهالليل ؟
- دكووومي تونسي المَلحة شكد تنامين

بدلت و شديت الربطة لكيته صافن عليه
تُراب : والله حلوة من تشدين الربطة تشبهين كارتون مدري لعبة شايفها بالتليفون
مخلي ايده على كتفي و نمشي و هو يسولفلي
على ابو راكان كاعد يجهز بالبيت راح يكعدون يمنه

مرينه بطريق كله ورد ما جبت طاري اذكره شكد اني احب الورد
و اتمنى يصير عندي محل ورد لان احسة يكول شنو
أبتليت بيج اني
تُراب : شايفة هذا الورد شكد حلو ؟
جوهرة : اي يجنن
- يتمنى يوصل لجمالج

نسيت كلشي و احنه وين و بوسط الشارع حضنته
كان الشارع فارغ و بس صوت السيارات بعيد واضح رفعني من الارض و باسني و نزلني

رجعنه ثاني يوم و دعبول يبجي ما يقبل يصعد بالطيارة
بالكوة يالله صعد وصلنه و استقبلنه راكان باسني و حُضني
و تُراب لازم ايده يكله منا العالم وخر لا امدك بالكاع

خمس ايام يالله طلعنه من مود السفر و رجعنه طبيعييين
تُراب بالدوام اول ما اجينه نزلت جوه و اخذت التليفون من دعبول اتصلت عليه اروح لحبيباتي كال بس لا تتأخرين

كشخت وطلعت رحت الهن و عيني على بيت راكان
اميرة : كل الي يسون عمليات هيج يصيرن حلوات
نويرة : لا هو السفر يحلي ولجن ليش ما نسافر شناقصنه
رحاب : خلي نسافر
جوهرة : وعلي الـ تطلع باب الشارع اكسر رجلها
خوش النوب عليه سفر وحدهن هو اني بالعراق ما لازمتجن

نويرة : يا هنيالي اذا انتِ تتحكمين بينه روحي ذاك رجلج
نامي بحُضنه تركضين وراها عليمن
جوهرة : وينه رجلي من اجيت لسة ما شايفته المكرود
بدل و راح للدوام

رحاب : تلكين الحبايب مشتاقاتله منو يكول للدوام
نويرة : طبعاً و ما يكدر على فراكهن يجوز زعلانات عليه
يحجن و يضحكن و اني تخوصرت الهن
جوهرة : لا تحاولن اني ماليه عيونه

رحاب : املي حاجبة بالاول النوب عيونة
اميرة : يتشاقن يردن يضوجنج عوفنها يالله
نويرة : اليوم اجتني وحدة تتعارك دكلي رجلي ميت يطلبج ميتين
كتلها هو انا من يوم الـ فتحت ما بايعة بـ ميتين
طلعت مفترة علة الوادم ياهو الشافته دكلة رجلي يطلبك

اخير شيء كالتلي الا اجيبلج الشرطة
كتلها يا نوع منهم البحرية لو البرية حتى اشوف واسطاتي
كالت طبعن انتن تموتن ع الزلم
جوهرة : عزه و ما كتلتيها
نويرة : لا كلت الها شعدنا غير الزلم

مر واحد يگول للگمر غيب و انا بمكانك
كال تروحلج فدوه الزلم تعاي دتعاي انطينه سمجة
جوهرة : هو انتِ رايحة تصيدين حلوين و تبيعين سمج

ضحكنا و طلعت منهن اريد افوت للبيت بس رجلي اخذتني لبيت
راكان دكيت الباب فتحت الباب امه استقبلتني
و دخلت للاستقبال بيتهم ما شاء الله رُغم مو كامل بس
الاثاث يجنن اجن بنات حلوات اثنين صغار
يباوعن الي مبتسمات

- انتِ جوهرة اخت راكان ؟
- اي
وحدة منهن تحجي و تتلفت و تگرص بأيد الثانية
انتبهت الها وكفت عدل
....

الماس
نبأ : بشري دكتورة
- الجنس ولد و ما شاء الله الله كل اوضاعة تمام

ابتسمت لا أرادي و اني متحمسة لردة فعل السيد و فرحته اذا عُرف
نبأ انرسمت الابتسامة على وجهها
طلعنه و اني اسولفلها شكد مخلية اسماء ببالي
عمي فرح اكثر من عندنا و نزلني بالباب
و اني اشاور بـ نبأ اكوللها لا تخلي يگله

دخلت للبيت السيد ما موجود شوية و بعد يأذن و احس الوقت ما يمشي شوكت يأذن و يجي سويت الغداء و اروح منا و اجي منا
توضيت و صليت وبأيدي القرآن اقرا حتى الوقت يمشي

سديت القرآن و بسته من سمعت فَتحة الباب طلعت امشي سريع
و الابتسامة مرسومة على وجهي هو فتح الباب شكله عادي
و جايب بأيده كتكوت صغير

نسيت الاريد اكولة و اباوع للكتكوت لونه اصفر يخبل
اخذته من ايدهزبسرعة و هو ابتسم
الماس : الله صدقة لله يمه فدوه فدوه اروح
عبد العزيز : ههههه ولج تروحين فدوه لكتكوت

لزمته بأثنين ايدي مبتسمة
عبد العزيز : تعالي فوتي شكالتلج الطبيبة
شهگت و خليت ايدي على صدري شلون نسيت اكله
الماس : بيه ولد يعني سيدنا الصغير

عبد العزيز : هههههههه ما شاء الله تبارك الله
الماس : صارو عندي جهال اثنين الكتكوت و السيد
عبد العزيز : لا دكولين سيد اتيه بيني وبينه
الماس : خاف تغار سيدنا
- هههههههههههه

صبيت الغداء و كل ساعة الكتكوت رايح لمكان اروح اجيبه
تالي اجه اخذه و كال صبي اني لازمه ميصير تركضين انتِ عاقلة
اصب وعيني عليه
عبد العزيز : ركبتج راحت ترى ما نبوگة

كعدنا ناكل
الماس : هو منيلك سيد
عبد العزيز : هسة و اني طالع جابه الي واحد من الطلاب
كال اخذه لجهالك سيد
بقيت صافنه بوجهه و اللكمة بحلكي

عبد العزيز : يعني مو انتِ جاهلة هو اني جايبة لابنجً
بس مدام انتِ تلعبين هو يلعب وياج
الماس : صحيح اقتنعت

عبد العزيز : ديري بالج على نفسج مو تضلين مستهانة بروحج
الماس : ها ترى البنات بدن يعرفن اني حامل شوف بطني شكبرها
و حتى الصدرية تخنكني
- باجر اروحلج للسوك اجيب الج وحدة
انتبهي بالمدرسة هم

الماس : و يعني شنو شوكت يتحرك شو لسه خاف مشلول
عبد العزيز : شنو ؟؟؟ اسم الله اسكتي الماس

الماس : خاف اديه مگطومة ؟ لا جان تحرك برجلة
عبد العزيز : انتِ نعستي بابا كومي نامي
متمددة و اني اباوع للسكف اتخيل من راح يجي ابني
و اجه السيد للغرفة

الماس : شنو نسمي سيد
عبد العزيز : قال الامام الصادق (ع)
( سموّا بأسمائنا و أحترموها)
من زمان عاجبني إسم المُنتظر
إلماس: الله حلو

هو اجه تمدد و اني اردد
- المُنتظر عبد العزيز ، المُنتظر عبد العزيز
ترى ظلم سَيد غير اسمه المُنتظر الماس لان اني راح اجيبه

عبد العزيز : الماس حبيبتي نامي
سحبت ايده و خليت راسي عليها و رفعت راسي بسرعة
حتى هو استغرب
الماس : نسيت الكتكوت لا يطلع بالشارع

طلعت سريع وهو يستغفر لكيته يفتر بالكراج يريد يطلع
بس الباب ما بي فتحة من جوه شلته و دخلت للغرفة
الماس : كلبي حس والله جان طلع بالشارع
عبد العزيز : اي گلب والدة

اجيت تمددت و خليته بوسطنا
عبد العزيز : هذا بس لا تردين تخلي هنا للعصر
الماس : اي خطية لعد وين ينام
- دكومي شوفيله مكان كومي بس ايدي تصير عليه يموت

كمت و ضليت محتارة وين اخلي اقتربت البيت كله و ماكو مكان
فتحت الباب ضايجة جان هستوه غافي و فَز
الماس : سَيد ماكو مكان
عبد العزيز : نريد نـنام الماسسس
الماس : بس شوفله مكان بداعت ابنك

ابتسم و كام متظاهر العصبية يمشي و يدور شيء
صعد فوك و نزل بأيدة كارتون نخزن بي اشياء
و خله بداخله غطه و كاسه مي
عبد العزيز : يالله امشي نامي كملنه

تركه بالصالة و راح للغرفة دخلت للغرفة و الكارتون بيدي
هو رفع راسة بصدمه
الماس : خطية يخاف وحده خليه هنا عيني عليه
خله ايده على عيونه وهو يضحك

رجعت لمكاني و كل شويه ارفع راسي اباوع للكارتون
تالي خله راسي على ايده و بأيده الثانية حاوطني
عبد العزيز : نامي بدون حركة

ثاني يوم كعدت الصبح نضفت البيت و غسلت للكتكوت بالمي الدافي
و هو بايدي على السنك رحت للحمام اجيب الشامبو
واني عفته على السنك لكيته واكع بالكاع و يريد يتحرك ميكدر

شلته و هو بأيدي رجله عبالك عوجة
الماس : ليش تطفر حبيبي مو كتلك هسة اجي شبيك بس تركض
سبحته صار يخوف ضعيف نشفته و خليته جوه الشمس احرك بريشه
يالله صار يرجع زين

رحت جبت قطعة قماش صغيرة و لفيت رجله خليته بالكاع ميكدر يركض رجعته للكارتونه مالته و اطبخ و اني بالي يمه ضجت عليه
اجه السيد بدون ما احجي عرفني ضايجة
الماس : سَيد الكتكوت رجله توجعه ميكدر يمشي
عبد العزيز : يا طلابة الكتكوت الما تخلص

اجه شافه و حركه بقة مصدوم
عبد العزيز : ليش هذا التعنيف هذا شصاير بي
الماس : عود سبحته
- كاسرتها رجله انتِ بابا

عافه و اني التهيت بالغداء و اجيت اسوي جاي كلت خلي اشوفه
لكيته نايم الحمدلله رد الدم بوجهي هسة يكعد صاير زين
السيد ابد ما فتح موضوعه وياي و نمت كعدت بعده نايم السَيد راح للجاامع لحد ما اجه وهو نايم

اخذت العباية من ايده
الماس : خطية هذا الكتكوت شكد تعبان من رحت لسة نايم
عبد العزيز : نايم ؟ وين اكو كتكوت ينام هلكد

اجه يتفقده و اني ورا بيدي العباية اباوع شاله و حركه منا و منا
عبد العزيز : الماس هذا ميت
- لاااا
- اي والله ميت
غطيت روحي بالعباية و كمت ابجي افرفح
بعدني حتى ما تهنيت بي و مات اني بسببي وكعته

عَبد العزيز: الماس هي هاي الكتاكيت ما تطول قابل انتِ متعمده تكتلي يالله كولي يا الله و كافي بجي
و لـ نص الليل اني افرفح لحد ما حلف باجر يجيبلي ثاني
يالله سكتت

وصدك ثاني يوم جابلي واحد و اني اكلة كول لاخوك مو اني سبب بكتله والله ردت اسبحة بس هو طفر و انكسرت رجلة ما اتحمل و مات
و هذا اداري مثل روحي حتى صار نص وقتي اله
عبالك ابني

داومت و طلعت ناجحة و درجات تجنن حتى بالعربي
لان السيد درسني بي و رجعنا لنفس روتين الدراسة
الخميس كاعدة من الصبح متحمسة لان اليوم يجون هُمام و مَلك
مشتاقة الها

داومت و رجعت الظهر راح يجيبهم السَيد من المطار و اجوي احنه نضحك و متونسين و اجوي بيت عمي ضُرغام و صار بيتنه
يخبل من الهوسة المغرب دَزيت بنت نبأ تشوف الكتكوت وين

تالي كالت بنت ملك من چنه فاتحين الباب طلع و ركضت ورا ما كدرت الزمه خاف اركض و اتيه البيت بس هم ما اكدر اكذب و اكول
ما شفته كلهم اخذو الموضوع عادي و اني هم تظاهرت عادي
بس السيد يباوعلي يدري بيه كذابه

لحد الليل راحو بيت عمي ضرغام و بقوا بيت عمي هُمام
كملت الهوسة و اني انتظر شوكت يجي الليل حتى ابجي على الكتكوت براحتي طفيت الاضوية و دخل السيد و عمي هُمام
من بره رتبت الغرفة و تمددت بمكاني راسي على الحايط و ابجي بصوت ناصي

حسيت بالسيد من دخل سكتت وبقيت حابسة البچي بداخلي
غَمضت عيوني بقوة لحد ما انسحبت و صار راسي على ايدة
عبد العزيز : لو اني اموت ما تبجين عليه بگد الكتاكيت

بقيت ساكته و اتخيل اذا هو مات فتحت عيوني من الرعُب
عبد العزيز : ساكته يعني صدك الكتاكيت اعز
حضنته بسرعة بـ أثنين ايدي
الماس : لا يُمة اسم الله يرحولك فدوة الكتاكيت

حُضني بـ اقوى و لما خانه التعبير صار يطبع بوسات عشوائية
بوجهي و هو مبتسم
عبد العزيز : الماس يا الماس انتِ صدگ الماسه
الماس : ماعندي حظ بيهن شلون يتحمل الانسان شخص يحبة
يموت اني كتكوت و ما تحملت
اختي زهراء ما اتذكرها و ابجي عليها اكول خطية
همزين ما اتذكرها كلش جان متت

عبد العزيز : الموت صعب على الاحياء اما الاموات يرتاحون
الامام علي (ع) كالو اله ما هو الشيء الذي اشد من الموت ؟
قال فراق الاحبة ..

يعني امواتنا يرتاحون بس احنه شيصبرنا عليهم ؟
الموت راحة و حَق و الاكثر حظ هُم الي يموتون قبل وقتهم
يعني بـ ريعانة الشباب هذولة رب العالمين ميريد يلوثهم
بمُغريات الدنيا قبل لتلطخهم سحبهم حتى يصعدون نظيفين

الماس : يعني انتَ متخاف من الموت و يوم القيامة
عبد العزيز : بالعكس وين اكو احسن من يوم رب العالمين
من دون البشر يصيح بـ اسمي و يكول الهم جيبوا اريدة
لو اني صالح ما اخاف مثل الشاطر الدارس
و اذا عاصي اكيد اخاف مثل الي ما محضر امتحان واجتي الاسئلة

اما عن يوم القيامة فـ الامام جعفر الصادق (ع)
يقول القيامة عِرس المُتقين تخيلي يوم القيامة الي الكُل ترتعب من اسمه
وللان محد كدر بوصفة هو للصالحين عرس لان ما عندهم شيء
يخافون منه

الماس : بس شوف سيد افهمني افهمني
عبد العزيز : افهمج حبيبتي
الماس : مثلاً اني احب شخص كلش هواي هو طبعاً انتَ اكثر واحد احبة بس اسم الله عليك و تموت اكيد انتَ بالجنة و مرتاح
رب العالمين مينقهر عليه ؟

عبد العزيز : شوفي يا عزيزة الروح
الماس : طبعاً هذا الموضوع مو سهل حتى نجاوب عليه بمختصر
- هههههههه
- حافظتك حافظتك

عبد العزيز : رب العالمين من كد ما يحبنه و يشوفنه متعلقين بشخص
نحبنه اكثر من رب العالمين ياخذه من عندنا حتى نعرف احنه غير رب العالمين ما عندنا و نرجع اله بالنهاية
فـ هو يخبرنا بـ احبابنه و اعز ما نملك يشوفنه
گد الاختبار ؟ و راح نبتعد لو نقترب

الماس : يعني هو ميقبل نتعلق بغيره ؟ يريدنه بس اله
عبد العزيز : نعم و لو كل الناس تعيش تحت هذا المبدأ
جان ما صار و لا ذنب على الارض

الماس : و يبقى ينتظر شوكت يموت حتى يشوف حبيبة المات ؟
عبد العزيز : اي و اكو بالجنه مكان لمن شخص يموت و احد يعرفة
صديقة او اقاربة موجود بالجنه ينتظرونه بالباب
ينفتح باب الجنه و يدخل هو يلكى كل الي يحبهم الاموات
واكفين يستقبلونه
- الله شكد حلو

عبد العزيز : كل شيء رب العالمين محضره النه حلو و ما ينوصف
حتى بالخيال بس احنه ناس صلفه و مستمرين مفضلين
النار على الجنه
الماس : حتى صرت اتمنى اموت علمود اشوف يوم القيامة
عبد العزيز : كل بشر يموت بيومه بالساعة و الدقيقة و الثانية

نمت و من كد ما الكلام آثر بيه نسيت حتى الكتكوت
ملك ما تخليني اشتغل بحجة حامل و هي ما تدري
اذا ما اشتغل يوكع الطفل من كد ما احب الشغل

مَلك : ولج والله موضوعنه بيج اني و نبأ كل ما نكعد
تسولفلي عليج و على سوالفج لحد ما نموت من الضحك
الماس : و هاي اني المضحكة مالتجن شُكراً شكرًا
هي الطعنة تجي من اقرب الاشخاص

بالليل رادوا يرحون لبيت عمي ضُرغام و بعدها عمي اجلها
طلعوا بره يسولفون ما اكدر اطلع اتصنت خاف يشوفوني
لزمت وحده من بنات ملك و كلت الها اطلعي
سمعيهم شيحجون اذا تحبيني حتى انطيج لعابة جبيرة

ملك : يا ولج شيحجون قابل هي مواضيعهم دينية معروفة
الماس : لا مو انتِ ما تدرين كعدت اسولف الها على الهدية
ملك : سمعت ولج بس عبالي ما تدرين
يا يا حظج يا الماس صارلها الاء سنين ويا محد انطاه هدية
لعد شكد مرزوقة خية انتِ

الماس : خلي انفكر عمي اني فگر
بقينه كاعدين نسولف و طبت بتها تلطم على خدها
مثل سوالف امها نُسخة
- ابشرج غير عمي راح يتزوج عليج والله حتى ابوي
يكله ياخذولها بيت وحدها وفضو السالفة
خو ما تبقى هيج

ملك سدت حلگها و اني بقيت مصدومة و الف قصة خيالية انرسمت براسي و كلت حتى عمي هُمام اجه حتى يحضرون بعرسه
اخذت تليفوني وسديت الباب و اني ابجي
خابرت امي
الماس : ماما تعاليلي تعاي
رحاب : شبيج حبيبتي شبيج تزوج مو

الماس : يمه يريد ياخذ الها بيت وحدها خاف اني اعرف
ما خايف عليه خايف على الولد
رحاب : يا عشتو والله اخلي يحلم يشوفج و يشوف الولد
باجر اجيج الصبح اني

الماس : تاخذيني ؟
رحاب : اي اخذج هم عوز تبقين يمه والله
الماس : و المدرسة
رحاب : انعل ابو المدرسة اني اخلي رجل جوهرة ياخذلج
اجازة باجر باجر جاية

سديته منها و كلبي يرجف
من الخوف فتحت القفل و غطيت راسي و نمت حتى بدون ما انتظر السيد كعدت الصبح على هوسة السيد بالغرفة
عبد العزيز : راح اخذ هُمام و عائلته وياي لبيت ضُرغام
يعني اليوم ارتاحي

ما جاوبت بس هزيت راسي
عبد العزيز : امج دكت عليج نامي مبينه نعسانة اذا ما كدرتي
تسوين غداء لا تسوين مو لازم اني اجيب
راحوا و اني احس النار تاكل بگلبي اكل و الخوف وياها
دكيت على امي كالت راح اوصل من الفجر طالعة

احس بطني صارت توجعني بقوة
بقيت كاعدة بمكاني مرت اكثر من ساعة و نُص واندك الباب
دخلت امي و وياها مره اكبر منها بس حلوة
رحاب : يالله امشي يالله
الماس : و اذا عرف يمه شلون
رحاب : امشي اني اريده يعرف
النوب جديدة هاي عليه مال هدايا وين عايشين بيا عصر

الماس : خلي اخذ ملابس
رحاب : حتى ملابس متاخذين
نويرة : هو وين يشتغل امشي نروحلة
رحاب : و لا نروحلة هو يجينا ، يالله الرجال واكف

لبست عباتي و طلعت و بس التليفون بأيدي صعدت وياهن
و كل ما تبتعد السيارة اخاف اكثر و يصير الم بـ بطني من القلق
...

أعرفك و أعرف بـ كلشي
الـ يضحكك هَم و الـ يبچيك
من أكول شبيك ؟ جاوبني
لـتچذب ع المرَبيك
- رُسل فَهد

صارت اكثر فقرة احبها
شنو الموقف الصعب الي تمنيتوا الموت و لا صايرين بي
؟ 🫶🏻🥺
و تخلصتوا منه او لا !!