على كتف القبطان حمامة الفصل الخامس وأربعون 45 - بقلم رُسُل فَهد

التَصويت و المُتابعة لُطفاً
عَلى كتِف القُبطان حَمامة
- رُسل فَهد
...

ايضاً من الارشيف عام ٢٠١٩ م
هاي اني من زمان احب الشوراب طلعت السالفة فطرة 😂

- هل الشارب يا جدتي رمزاً للرجولة ؟
- سَالفة ينقاس زلمتنه بِشوارب لا بعد بيتي
الحَچي هذا خُرافة
احنه زلمتنه نقيسة من الحچاها
و من يذب حچايته تنگط صَلافة
- و ما هو رَمز الانوثة ؟ اذن !
- هَيبة النِثية التَرافة
- رُسل فَهد
...

الماس
ويَ رجفة ايدي انفتح باب الشارع و طاح الجهاز من ايدي
بقيت خايفة و محتارة ابرر لو انزل اشيل الجهاز
بقيت واكفة مثل الصنم حتى وحدة من ايدي من دخل
بقيتها على صدري لحد ما وصل يمي اني مبقيتها ثابته
ما حركتها

نزل اخذ الجهاز و اتفحص الشاشة و اني الكلمات ترن بأذني
الماس : سَيد
عبد العزيز : ها حبيبتي
خاني التعبير و بقيت ساكته اباوع بعيونة

عبد العزيز : لا تخافين ادري مو متقصدة تفتشين و اذا فتشتي
فـ هو حقج لان نحنُ داخلين في شراكة دائمة مثل ما الي الحق اتدخل بكل خطوة تخطيها انتِ هم الج بالمِثل و اذا عن الكلمات الي تمت قرائتهم فـ انتِ بعينج شفتي اني شكد رافض الموضوع
و حتى كذبت لخاطرج

الماس : و هم ليش هيج يلحون و انتَ متريد يعني واحد يكول ما اريد
شنو يغصبونه يعني هو الانسان ما ينجبر على شيء ما يريدة
هو براسة عقل و يفهم و يختار
عبد العزيز : والله صحيح كلامج عمي صايرة مرة
- قابل اني جنت رجال سَيد ؟

عبد العزيز : و التالي وياج ؟
الماس : كلت الهم مرتي مريضة ؟ اي خلي اتمرض عادي
عبد العزيز : اسم الله عليج من المرض طبعاً
صاحب هاي الرسائل انسان حقود و حسود الى ابعد حد
اني دائماً مبتعد عنه و لمن حاجيت الشيخ عن الرفض
من وحده انتفض و كال ميصير النبي محمد (ص) ما رجع الهدية
كتله الله و النبي يهديك

الماس : و هو شعليه حارك روحه
عبد العزيز : من زمان هذا مو هسة ما يهضمني ابداً خطية رُغم شكد حاولت اقربة و اكسر حاجز الكره الي بداخلة اتجاهي
لكن ما يفيد بأي موقف يغتنم الفرصة حتى يخَجلني
الماس : سَيد فهمني شغلة سَيد

عبد العزيز : كولي عيني
الماس : العالم تنطي هدايا فلوس سيارات بيوت
اجهزة مال بيت لو عطر بس مو نسوان
عبد العزيز : على حظ الماسة هاي بعد صارت

الماس : ابقى مسويني مريضة و معليك لحد ما تنتهي
ضحك بصوت عالي و باسني و طلع
امشي بالبيت و اتحسب على الي مكبر هاي السالفة كلها

كاعدة بالصالة و باب المطبخ مفتوح و الهوى بارد يدخل للبيت
كتابي بصفي ،مديت ايدي على بطني مبتسمة
الماس : كاعد لو نايم حبيبي حتى لو نايم اكعد شنو عايف امك وحدها
ضربت راسي بخفة ايدي .. ولج الماس هو شمعرفة

على كعدتي بقيت للمغرب وَ وي كل صيحة الله اكبر من الاذان ارفع ايدي ادعي لجوهرة يصير عندها اطفال و تفرح و اني احجي
رجعت ايدي على بطني
الماس : ادعي لخالة يصيرون عندها اطفال لان انتَ ما تدري اني شكد احبها و هي شكد تحبني و تعبت علمودنا اني و خالو راكان

بالليل كاعدين هو يقرا كتاب و اني اقر احياء الفرق بينا هو ما مجبور يحفظ و اني غصباً عني احفظ اباوعلة و مدري شصار بيه
احس روحي مشتاقة و اني بداخلي اكول الماسة الثكل حلو الثكل حلو
تقربت و كعدت يمه و بدون سابق انذار طُبعت بوسة على خده
هو بسرعة سَد الكتاب

مَد ايدة على ظهري و قربني اله مبتسم
عبد العزيز : شلون وكحة حلوة هاي
الماس : يعني مو وكحة بس هيج يعني عادي انتَ مو تبوسني ؟
عبد العزيز : اكيد عادي يعني و بكل وقت
هزيت راسي بـ نعم

عبد العزيز : هذا ابني مشتاقلي
الماس : يايمة النوب عليه ابنك
- يعني هو هم ابنج
- لا انَت ابونة و هو ابنك و اني بنتك و انتَ ابونه
و احنه كلنه جهالك و انتَ الاب
ضحك بصوت عالي

عبد العزيز : يعني تعترفين انتِ طفلة ؟
الماس : لا اني جبيرة بس احب ابقى طفلة حتى ابقى دلوعة
هسة بس اصير جبيرة بعد تعتمدون عليه
و اني روحي ما طايقتها
عبد العزيز : شنو هالاعترافات الخطيرة هاي

الماس : صار كومه اسئلة براسي و اني ما سائلتك
عبد العزيز : يا الله
الماس : سَيد يعني اذا اجه الليل و نمت و الطفل
كعد بنص الليل منو يرجع نومته ؟
لو هو يبقى نايم اذا اني نايمة

عبد العزيز : يبقى نايم و اذا كعد مو مشكلة اني ارجع انيمه
الماس : بعدهم يلحون بهذا الموضوع ؟ اني ما اريد اتذكرة
بس اتذكره مدري شيصير بيه
- ههههههه سلامتج عيني
- و انتَ شدعوة هلكد بارد جنك مكيف ؟

عبد العزيز : ههههههه هيج ما عندي احساس و افرح و اني أإذيج
الماس : صدك سيد تريد اصدمك ؟
- صدميني حبيبتي هو انتِ معودتني على الصدمات
ضحكت و خليت ايدي حلگي بقى يتأمل بوجهي

الماس : من جنت صغيرة يعني جان عبالي المرة تحمل تجيب بنات و الرجال يحمل يجيب ولد و لان احنه بس بنات جان عبالي انتَ متخلف

بقى فاتح عيونه بصَدمة و كل معاني الاستغراب واضحة بوجهه
اني مبتسمه و كاعدة كباله لم شفته لداخل حلكه
عبد العزيز : الماس كومي نامي كومي

دخلت انام و اني اضحك
ثاني يوم الظهر اجه عمي ضُرغام وويا نبأ و بناتهم
فرحت و طِرت بيهم كعدو بالاستقبال و اني اذن تسمع
لنبأ و اذن تتصنت الهم

نبأ : ولج حرام التصنت عوفيهم يعني شيحجون
الماس : الله حبيبي يسامحني ما يدخلني النار علمود خطأ صغير
اذا ما اتصنت ممكن ينهجم بيتي الصغير
نبأ : ولج لا السيد يخاف على مشاعرج ، بس شايفة ذني التايهات
انا كلت لضرغام اذا اصير وياك اخذ بناتي و اهج
و اصخم راسك و راس الخلفوني

الماس : اني كتله انتحر
شهكت و خلت ايدها على صدرها بفَزع
نبأ : ولج عابت الج على هذا التفكير تخسرين روحج العزيزة
علمود الراح يرتاحون بموتج
- اني قررت بعد

اباوع الها أرتبكت و صار وجهه ينطي الوان اخير شيءٍ جرتني
للغرفة و ايدها على حلگها
نبأ : ولج انتِ ما تدرين هم ليش هيج ضايجين و محتارين
غير الاء تزوجت بلاية ما يدرون اخوتها
و خلتها كلها صافنة و محتارة حتى بناتها قاطعنها

الماس : عزه هذا اليوم شفناها بالسوك و بناتها ما سلمن عليها
نبأ : اي و أخوتها اجوي للسيد يشوف الهم صورة حل
كال الهم شسويلها اجتني تريد ارجعها
مثلاً ازوجها بيدي و ارجعها هي مو تعرف بَعد تحرمت عليه

الماس : يمه خاف تريد السيد
نبأ : انتِ حافظي على رجلج و خل يخلص من سالفة هاي الهدية
و شوفيلج صورة حَـل ويا كلها عرست وي عرسج
صار عزيز و كلها تريدة
الماس : و هسة شراح يسوون
- والله ما ادري

عفتها و طلعت للصالة قربت راسي على باب الاستقبال و البنات يلعبن
كنت اريد اسمع شيء بخصوص هذا الموضوع
و بقيت صافنة لمن عرفت اني موضوعهم اصلاً
عبد العزيز : انتَ شتحجي ضُرغام أكلك آلماسة تموت من اكلك تموت
مو يعني من القهر لا من صدگ تموت اني هستوني ماصدكت
اشوفها مرتاحة وياي اجي احطمها مره ثانية ليش

و هي ما مقصرة وياي والله لو اجيب الي عمرها ثلاثين سنة ما راح تهتم بأمري مثلها هيَ مثل الشريان مجرد ما يصير بيها شيء
كل جسمي ينتهي و اني انتهي لان هي هدية و امانة امي
شلون افرط بيها

ضُرغام : والله سيدنا و أحتلت گلبك
عبد العزيز : والله أحتلت الگلب و سيطرت على العقل
مره حلمت هي الخضار الي يدخل حياتي و فعلاً اني من يوم
الي صارت تحت جناحي كُل يوم احمد رب العالمين
على الراحة الي اني بيها رغم جنت طول ذيج السنين اطلبها منه

هواي لِمت امي بداخلي على كل الي سوته و شلون زرعت هاي الفكرة
براس الماس لكن بمرور الايام ادركت امي شكد جانت شايلة همي و تعرف راحتي حتى من ماتت و اذا احجيلك عن سوالفها ضُرغام
امي امي حباية و مفصولة سبحان الله نفس الاطباع
و نفس الحنية و الندارة رُغم هي ما عاشرتها هواي

ضُرغام : الماس يا الماس دير بالك منها بالعصبية
لان تعرف امي سجانت تسوي بينه اذا زعلت
عبد العزيز : الصمت العقابي
ضحكوا بـ غِصة كأنها محملة بهواي ذكريات

انسحبت ايدي بقوة
نبأ : شتسمعين و هيج مبتسمة ولج لا ينفتح الباب
الماس : السيد شكد يحبني
نبأ : طبعاً يحبج وين يلكة مثلج ان شاء الله يبعد عنكم
الما محسبيلهن

ما جانت كلمات نَستني كل شيء مضوجني
رحت للمطبخ كبل سويت الهم كيكة
نبأ : هو شلون تعرف الماس ضايجة لو فرحانه من تسوي كيك
الماس : هههههه وشرط اذا ضايجة اطلع اطيب من اذا
فرحانة

العَصر راحو و راح السَيد وياهم هم طالعين برا و منتظرين السيد
يكمل تبديل و يجيهم صاح الي وهو بالغرفة
اجيته مبتسمة و احس روحي فراشة طايرة
باوعلي مبتسم
عَبد العزيز : اهلاً اهلاً شكد حلوة هاي الفرحة ليش حارمتنه منها

الماس : كول ليش حارمتك شنو حارمتنه ليش تحجي بصيغة الجمع
عبد العزيز : من هسة حاسب حساب السيد الصغير
ضحكت بصوت عالي و هو انصدم خليت ايدي على حلكي

حَك خَشمة و ابتسم
عبد العزيز : اليوم اكيد اكو شيء
الماس : ماكو بس مرتاحة احس روحي فراشة
عبد العزيز : تحسين ؟ تأكدي انتِ فراشة البَيت

الماس : احم احم سيد اريد وردة لون وردي وريحتها طيبة كون
جان يخلي عُطر و تركة على الميز باوعلي بقلة صَبر و فاتح ايده
عبد العزيز : لا دكوليلي تاكليها
الماس : بس شوية سَيد دورت بالسنادين الي بره ماكو
ما بيهن ريحة قوية

عبد العزيز : الماس حبيبتي حاولي تجيبين بسرعة لان
اذا انطيج مجال بعد تاكليني
الماس : لا بعدني ما تنسيت بالكيك

هو جان مبتسم اختفت ابتسامته و تحولت كل معاني وجهه لـ صدمه
رمش اكثر من مره و مسح لحيته
عبد العزيز : ما اريد احلف بس صدگيني هذا ابنج يتحكم بيج
باس خدي و هو يضحك و لسة مستغرب
طلعت ورا سديت الباب

و انتبهت على نفسي صدك هاي ليش هيج صرت جريئة
و كل حواجز الخجل الي بيني و بين السَيد بدن يختفن
بديت اتذكر كل كلامة بـ لليلة الزواج
و صوت بداخلي يكول والله ما تستحين
و الثاني يكول عادي زوجج

ايام مَرن اكثر من يوم و اني تحت تأثير كلامه الحلو
بدت امتحانات نصف السنه و اليوم اخر امتحان
لمن اجه اخذني السيد كال البنات بالبيت
رجعت لكيلتهن يسون غداء و اني عصبت عليهن شلون يتعبن نفسهن
قمر : بس لا تعيشين دور الام رجاءً ترى جنتي المكفخة مالتي
الماس : لعد يالله ثرمي لا اكول لابوج يكتلج

سولفت الهن على سالفة الهدية
ورقاء : ما حچينه عبالنه متدرين
قمر : يالله مو زين وحدة تساعدج بالبيت تربيلج الجهال
الماس : والله اذا ما تسكتين هسة اطلع حرگة گلبي بيج

ورقاء : لا كال علي ابوي ما قبل ابد بس هذا سليم قمر تتذكري
الجان يتعارك ويَ ابوية لان يأذن بالجامع
قمر : يااا لسه لعد شكد يكرهه
الماس : شو اني ما اعرفة
ورقاء : مو انتِ جنتي متكعدين هواي ويانه مُنعزلة بعد عيني
قمر : لان ضامنة حصة الاسد

الماس : هيو لا تحجن وياي هيج اتحسس
ورقاء : اش يالله اسمعي لج هذا يغار من ابوية يعني كلش
فـ مره تعارك شنو بس ابوي يأذن ابوي كاله تعال انتَ ما عندي اي مانع و صار يأذن ما يعرف يجيد النبرة حتى العالم اجتي
كالت هذا ماعندكم غيره الي يأذن
ليش السَيد عبد العزيز ما يقرأ

رجع ابوي يأذن و هذاك حقده يزيد كل مره ابوي يسولفلي عن شيء يسوي و اكله يابة ليش متوگفه عند حده
يكول بابا مريض بالغيرة و ما على المريض حَرج
و هسة من ابوي رفض هم حاولو يسدون الموضوع
بس هو يمشي و ينبش

الماس : الحمدلله و الشكر يا اللهي عود صدك يحجي
و هذا الشيخ يعني عاف السَادة كلها الا ابوجن على حظي
قمر : الشيخ يدور خوش نسابة لبناته ابوي ما يتفوت
الماس : قمر خاف تردين كتله
ورقاء : شاهد اخر الاخبار ام اب تعنف بنات زوجها

الماس : اسويلجن كيكة ؟
قمر : جلبتي ادري جلبتي هذا ابوي يمكن حتى غداه كيك
- لا والله الكيك من علامات الندارة خلي يكون بعلمج
- و اني اصير نادرة حتى عمتي دكلي عفية
ولج اني هسة بس اسوي كيك تسوي عركة دكول
انتِ مخلصة الغاز و الطحين

الماس : و راح تبقن هيج ؟
ورقاء : لا علي و فَضل جامعين فلوس و سوو سلفة كبيرة
من يطلع اسمهم راح نشتري ذاك البيت ابو الشجره براس الشارع
بس مو دكولين كالو اسكتن يعني
الماس : الله و نصير جيران ؟
قمر : اي حتى نخلص الكيك مالتج بعد شتردين

الماس : و عمتجن منو يكول تقبل تطلعن
ورقاء : ولج هي ما تريدنه تريد تزوج ابنها بنت اختها
و من هسة تتغزل ببنت اختها لعد اذا جابتها للبيت شتسوي
همزين ما عندنا غرف الا لو يبنون لو واحد يطلع
الماس : يالله تعالن هنا احسن

الظهر لمن اجه السيد كالت اله ورقاء
قمر : انتِ ضلي بشري الدُنيا كلها تالي ما يشترون
باوعلها السَيد يضحك
عبد العزيز : اي مو كلنا كبرتي و صرتي حبابة
انجح خطوة ممكن يسووها بحياتهم و اني موجود اساعدهم
بكل نقص يصير بالمبلغ

ورقاء : لا بابا متقصر
عبد العزيز : انتن بناتي و هم الولد احبهم و يستاهلون
زين و خالجن و زوجته يدرون ؟ مو تصيرن انتن بوجه مشاكل الاهل
لو الولد عندهم مشاكل وي اباؤهم ابداً محد تتدخل لان لو مهما كان
وصار هم ابنائهم و مجبورين يتحملونهم
اما انتن فـ ما راح يتحملكم احد غيري يعني لما تخطأون
راح يجيبوكم الي ليش ؟ لان بس الاهل يتحملون ابنائهم
ورقاء : لا يابة تربيتك احنه
- لذلك مطمئن

راح للغرفة و بقينه كاعدات نسولف و دكيت على امي كدامهن
انعجبن بصوتها رحت اخذت تليفون السيد وهو نايم طلعت الهن
الصور وشوفتها الهن
قمر : هاي شنو ما توقعت امج تجنن انتِ نسخة منها
ورقاء : الله هاي شنو رموش اختج شتستخدم
الماس : كلشي متستخدم والله هنَ هيج من جنه صغار

قمر : اخوج شوية عبالك مو عراقي دلوع
الماس : هو شنو دلوع لا والله رجال شايفه صوته شكد خشن
ورقاء : لا مبين خوش ولد يعني بس عدهم فلوس وهاي
قمر : شقصدج صوته خشن يعني هو رجال يعني اني هسة رجال

الماس : ههههه لج لا يعني صوته يخوف وهاي ورقاء اي صحيح هو ابو
يصير صديق السيد كلش زنكيل بس متشدد يعني بناته
حارمهن من الطلعة حتى راكان لو ما يطلع بالختلة ما يخلي
ورقاء : يا ليش شنو هاي

قمر : ما دريتي صدك خل اسولفلج ورقاء تدري
عمتي عندها ابن اخ يموت على بنتها و عمتي شكد تحب اخوها بس ما تقبل تنطي و حماتي بس تبجي فنج طلع ليش
- ليش ؟

قمر : عمتي مرضعته من جان صغير و خالي ما يدري
الماس : اذا اقل من اربعين يوم عادي بس هي ليش مدكول لرجلها
انفتح باب الغُرفة و كلنا سكتنه
عبد العزيز : التليفون الماس
انطيته اله و راح للمطبخ اخذ كلاص مي
الماس : جان كتلي اني اجيبلك
- ابقن كاعدات

ورقاء : يابة هو مو الرضاعة من غير ام اذا اقل من اربعين يوم عادي يحل على بنات الي رضعته
عبد العزيز : نعم لكن الرضاعة بيها هواي شروط اولها لازم تكون بعلم
الزوج لان اللبن الي بصدر الام يعود لابناء الاب فقط
فـ الا هو يسمح الها ترضع يالله ترضع و غيرها حرام
و ثانياً واجب التشهير بيها يعني لما ترضع الام شخص غير ابنها لازم كلها تعرف حتى ما تكون مستقبلاً علاقات مُحرمة

ورقاء : يابه زين و اذا ما يعرفون ؟
عبد العزيز : الساكتين يتحملون ذنبهم
أنا خلقنا الالسنه للنَطقِ
لا تصمتوا عن غلطةٌ تَهزُ عرشَ الخالقِ
اكو احد القصص الي مرت عليه امرأة و زوجها متزوجين
و ابنائهم على وشك زواج و اجت امرأة اقاربهم من بعيد
سامعة بعد كل هالسنوات هالشخصين متزوجين
كالت الهم انتو اخوان بالرضاعة

ما صدقوا و راحو يسألون حتى جيران البيوت الي كانو ساكنين بيها و تأكدوا صحة الكلام وجب عليهم الانفصال و انفصلوا و بقو الابناء
بحالة صدمة و كله يتحملوه الي سكتو لذلك الرضاعة من غير الام صعبة جداً و بيها كثير اشكالات

الماس : عزه شلون هيج ؟
عبد العزيز : كثير من القصص الي تمر تنافس الخَيال
ندعي من رب العالمين يستُرنا الى يوم سِتر الجسد بقطعة قماش ابيض
تركنا و راح للغرفة و احنه بقينه نتسائل عن هاي القصة
من كد غرابتها

راحن البنات بالليل و السيد جان ما موجود
و اني فرحانة من الامتحانات خلصتها
اتصلت على امي و بعدها جوهرة راكان راد يجي و لان
عرف اكو بنات ما اجه

ظُفرت شعري و خليت مكياج خفيف على الي يصير بأيدي اخلي
كنت لابسة قصير لانِ صايرة وقت النوم اختنك
حسب معلومات نبأ هاي المره اذا رحت اعرف جنس الطفل
خليت عُطر و اني مُعجبة بنفسي

سمعت الباب أنطبگ شكل بطني مضحك جداً
طلعت من الغرفة وهو بأيده المسواگ و بأيدة وردة
و أستغربت حيل صار شگد من تنسيت عليها وحتى نسيتها

لمن شافني أبتسم و صَغر عيونه
عبد العزيز : منين هاي الفراشة ؟
الماس : من گلبك سيدنا
خلى الورده و المسواگ على الكاونتر
عبد العزيز : لااااااا اكيد انتِ تعبانة و ابنج يحجي بمكانج

ابتسمت
الماس : سيد والله احتاريت وياك
عبد العزيز : اسم الله عليج من الحيرة شلون ما چنتي اني مرتاح
-زين سَيد و اذاطلعت بنية ؟
عبد العزيز : علوية و منج شنريد اكثر بعد

الماس : يعني متضوج ؟
عبد العزيز : الاولاد نِعم و البنات حسنات
الحنسة تُشكر عليها و النعمة تُحاسب عليها فـ شوفي شكد رب العالمين رافع منزلة البنات منو اني و اجي اتعاجز منها
الماس : ارووح باجر وي نبأ للدكتورة ؟
- بكيفج

كعدت ثاني يوم من الصبح متوترة بدون سبب
و كل ما اشوف السَيد اكله ولد لو بنيه شدكول
اخير شيء كال بس روحي و فضيني
اخذته عمي ضُرغام و گلبي يدك سريع
دخلت الدكتوره تسويلي سونار و واني اباوع لمعاني وجهه ..
نبأ : بشري دكتورة
-
......

جَوهرة
و هاي اول مرة فضولي يسحب ايدة و ما يريد يشوف
من جهةٍ ثانية اسمع صياح تُراب و ما ادري شوكت رجلي اخذتني و نزلت من الدرج اركض لمن وصلت للكراج يالله انتبهت على رجلي
ضاغطة على كزازة و الدم يتبع اثري

اباوع لتُراب بحُضنه دعبول و دعبول من كثر التعذيب ما ينشاف شكله
خالة تخربطت و عمي واكف صافن ما بدرت منه اي ردة فعل من الصدمة دعبول يون و تُراب من تأنيب الضمير محتار شيسوي
شاله و دخله للبيت وفتح قَميصة و ركض للمطبخ اخذ
القطن و الديتول و يعقم و الجهاز بأيدة يتصل على احد يجي بسرعة
و انعاد عليه مشهد نصورة لمن اجتنه معذبيها و ماتت

وكعت بالكاع لان حيل بعد للوكفة ما بية عمي محتار بـ خالة
و تُراب طلع بالسيارة سريع صوت دعبول يخترق حتى الدماغ و يفشلة من القهر اجه تُراب بسرعة كال كومي بالغرفة
باوع للدم برجلي بقى مستغرب اجه شالني و خلاني على سرير اهلة

باب الغُرفة مفتوح و اختنكت اكثر لمن شفته نفسة الي خيط جرح نصورة اجه لدعبول يعالج الجروح و دعبول يصرخ و تُراب يبوس بي و يهدئه ابتسمت بقهر من سمعته يكول بصوت منتهي لتُراب
دعبول : اصير زين و المَلحة تسويلي اندومي

جريت رجلي و شفت الكزازة مبينة ردت اسحبها بس ما كدرت
صرخت بصوت و الدم ينفض اجه عمي و صار يصيح لتُراب
تعال طلع الگزازة من رجِل مرتك تنزف

اجه و عين عليه و باله يم دعبول لزم رجلي و اني اسحب بيها و ابجي بصوت عالي سحب رجلي بقوة و ظغط عليها و سحب الكزازة
احس مو بس شاغت روحي لا احس هي روحي طلعت
وي الصرخة اجتي خالة يمي و عمي يشد برجلي
انجمعن الم الروماتيز و الجرح سوه

و حالي من الوجع مثل الي اريد تولد
اسمع صياح تُراب بالبيت و هو يسولف لامه و ابو
تُراب : يمهههه اخوتج شيردون مني يمههه
كتلو ناسي واحد واحد

دازيلي رسالة هذا هدية و الوراه مرتك
يمة جوهرااا جوهرااا اذا تقربولها اخوتج اكتلهم كلهم بشرفي افوت للسجن اكتلهم و اكتل نَفسي
سُعاد : لا دكول اخوتج لا تهيني و تحرك كلبي من دكول اخوتج

ابو تُراب: هم مو بالسجن
تُراب : يابة عصابة هم يلزمهم سجن لزمت جودت و دخلته سجن
و كلت راح اعيش وياكم بسلام و جوهرة جبتها بس الظاهر
نسابتك ما ناويها على خير يردون اكتلهم كلهم وحق هو علي اكتلهم

طلعت من الغرفة و اني امشي عرجة اباوع الهم
خالة اجتي لزمت ايده تبوسها
سُعاد : لا يمه اروحلك فدوة يمة تضيع شبابك و تنسجن
و نبقى احنه نتنطر نوالات الغربة شعدنا غيرك احنه هاي مرتك
المكرودة الما تهنت

تُراب : جا شتردين يمة ابقى كاعد لحد ما ياخذون مرتي
و يدزون جثتها الي يمه ذولة وحوش تعرفين الفلوس شلون سوتهم وحوش هسة انتِ اختهم و مستعدين دمج يشربونه
سُعاد : خل يشربون دمي الا انتَ ما اريد مكروه يصيبك

دعبول كعد يون و تُراب مكابله و كاعد
بقينه عايشين بقلق و خوف عكس تُراب الي نار العصبية واضحة
من عيونه اجيت يم دعبول و دموعي تجري
اباوع لشكله لزمت المرهم و اخلي على جروحة و هو يصرخ و اني بكل
صرخة اضغط على عيوني

اثار حرگ و ضرب بسوط حتى اثار تجريح بشَفرة
شَعرة بالسكين مقطعي تُراب يباوعله و حتى ايده من العصبية
ترجف اتصالاته مستمره و أخذ صور لدعبول
كتله شبيك صرخ بوجهي و اشر على حلگة اششش

انهضمت حيل بوكتها بس ما ردت ابين لان كل وضعته متوتر
اتصلت بأمي و سولفت الها بقت خايفة و مصدومة
لحد الفجر و اني و تُراب كاعدين
ما ادري شوكت نمت بس حسيت بصوت زِلم و تُراب يحجي
بصوت ناصي
تُراب : شنومني اني شنومني و المَلحة الا تنام كبال العين انعل ابوكم
لابو ساعة السودة

فتحت عيوني اني نايمة بالارض بغرفة اهله
عمي عبر من فوكاي و طلع و لحد الـ ١١ و اني وخالة محبوسين
تالي عمي سوالنه ريوك و جابه

الظهر و راحو و تُراب مستمر بالاتصالات
النوب صار كل شوية يروح لمكان و اني و خالة گلبنه يبقى بي النار من يروح الى ان يجي و دعبول تُراب مشغول عنه بقيت اني محتارة
بي و اني اعالجة يسولفلي شسووه بي و تبقى دموعي تجري

كل شويه اسويله اكله و اكعده ياكل النوب صارت روحة بيه
يون من الوجع ويصيح المَلحة تعاليلي
تُراب نار و ما يتحاجة ابد و اني من يوم الي صيح عليه
ما احجي ويا امي و نويرة ما عافونه ابد على طول هاي الايام هن يسون النه الغداء

بالليل سهرانه على دعبول و طلباته و كل ما اغفى يكعدني صوته انفتح باب الشارع دِخل تُراب خاله الا اسمع صوته بالليل يالله
تنام دخل وكعد على القنفة بدون كلام
دعبول : اريد مي بارد
كمت اجيبلة و رجلي لحد الان تأذيني و مورمه
احس بعد بيها كزازة بس اخاف احجي

شربته مي و انطيته دوه
دعبول : راح اطيب
جوهرة : اكيد اصلاً طبت بقت بس شوية جروح صغار
حتى من تمشي ميوجعنك
- طلعتي انتِ حبابة كمت احبج عادي اخذي تُراب
ابتسمت و مسحت جبينه

تُراب : ليش لسه رجلج ما طابت
اشرتله ما اعرف بدون كلام هو هم بقى ساكت غطيت دعبول
و اجيت على القنفة تمددت و تغطيت حتى راسي
شويه و حسيت الغطى ينرفع من رجلي
كعدت مستنفرة
جوهرة : رجاءً وخر

ما جاوبني بس ضغط على رجلي خوفاً لا اسحبها و من فتح قطعة القماش باوعلي بصدمه
تُراب : لج هاي شنو شلون متحملتها
جوهرة : عادي تحملت الاكبر منها

قربني اله الى ان صرت على صدرة
شالني و صَعدني فوك و رجلي كل ما تطخ بالحايط تأذيني
و تشوغ روحي نزلني على السرير و فتح الكنتور اخذ وحده من ربطاتي يريد يشد بيها ايدي
جوهرة : وخر تُراب تخبلت شنو
تُراب : رجلج مخزنه يعني اكو كزازة ناعمة خلي اطلعها احسن
من ما اخذج للمستشفى يفتحوها

جوهرة : لا توخرها و لا أروح للمستشفى وخر تُراب
اني اسحب نفسي منه و هو ضاغط على ايدي يشدها
تُراب : اش اش لتصيرين جاهلة الناس كلها نايمة
جوهرة : تُراب لا تخبلني شبيك وخر رجلي تأذيني والله
- ادري والله

مَد ايدة على رجلي و اني اباوعلة مصدومة منه شلون يكدر يأذيني
جوهرة : شلون تكدر تُراب اني حبيبتك
تُراب : ادري حبيبتي بس اسكتي شوية صيري قوية

فتح المجر و اجه بأيده ملقط و فاتح ضوء الجهاز و خلى رجلي بحُضنه
و اني ارفس مثل السمجة و واصرخ و اني عاضة اصابيعي
بكل برود انطاني الكوشة
تُراب : خليها بحلگج هسة ثواني

صار يضغط على رجلي و هُو يحُفر بيها و اني روحي راحت
اهمش بأيدي و اجر النفس بقوه و احس اني مختنكة راح اموت
و هو يا جبل ما يهزك ريح و لا متأثر بالعاصفة الي ورا
و اكول بكلبي هذا تُراب شكد كلبه قاسي معقولة نفسة الي يحبني ؟

لحد ما هَد رجلي و دار وجهه عليه
تُراب : يالله خلصنه هد رجلي و طلع و اني اون من الوجع
بصوت ناصي والهج بـ اسمه ليش تُراب ليش

رجع دخل للغرفة و صارت بيه خوفة لا هم يرجع يلزمها
فَزيت بكد ما باقي بيه حيل و ارجع شعري ليوره
جوهرة : تُراب لا عوف رجلي بروح اخواتك تُراب وخر
تُراب : اشدها شبيج حتى تطيب
- لالا

اجه و بأيده قطعة قماش منگعة بالمي الحار يمسح بيها رجلي و اني
كل جسمي رجف عَقمها و شَدها بـ شاش و كل ما اصابيعة تطخ الجرح تشوغ روحي كمل من شَدها و مَددها عدل و اني
أشهك من البجي
جوهرة : رجلي ليش هيج سويت بيها
ما جاوبني مَد ايده على عيوني وبـ أبهامه مسح رموشي من الدموع
تُراب : نامي يالله

جوهرة : اطلع اطلع و انام بس اطلع تُراب رجلي راح تموتني
تمدد بصفي و هو ساند نفسة بـ تاج الجرباية
سحب ايدي و خله راسي على صَدرة
و سحب وحده من ايديه خلاها قريب كتفه
تُراب : مرات نتأذى حتى نرتاح

جوهرة : بس مو هيج تُراب مو هيج ليش
تطلع حرگة كلبك بيه
تُراب : انجبي حبيبتي المَلحة و نامي جا اعوفج متأذيه احسن
ايده تلعب بشعري و اني اتنفس سريع
بوسات كثيرة انطبعت بشعري لحد ما نِمت

الصبح كعدت على صوت دعبول يصبح بأسمي
نزلت اله و اني كوه امشي اشوفه شيريد
مر اسبوع علينه و احنه كلنه داخلين انذار من عصبية تُراب
جنت بالمطبخ اسوي لدعبول عصير سمعت صوته يبجي
لكيت تُراب مخلي بحُضنه و يبوسَة
و هو يسولفله

دعبول : يكلولي هذا هذا الـ تحبة الا نذبحك و نوديلة راسك
يضربوني و يكولون اغلط عليه و نعوفبالبداية ما قبلت اغلط و ضربوني قوي تالي غلطت و جذابين ما عافوني ضحكوا عليه
تُراب : اذا ما طيحت حظهم الك واحد واحد و انتَ واكف تضحك عليهم
ما اوكف بين الزلم و لا ابن سُعاد اني

جبت اله عصير باوعولي و سكتوا
دعبول : المَلحة كمت احبها
تُراب : لا ابقى اكرهه لان اخذتني منك محد عاتب عليك تحبها

جوهرة : شراح تسوي
تُراب : لزمتهم الي جابو دعبول و هسة كاعد يخبرون على الي وياهم كلهم و محمد لگوه شانق روحة
فتحت عيوني من الصدمة
تُراب : هي هيج لو هيج هم اعدام بس غير الدوله تنفذ الحكم
تخليهم مخمرين على شنو ما ادري
لان طلعوا كشف على كل الجثث الي بالبستان و كلها
عوائلها تبحث عنها
جوهرة : الله ينتقم منهم شلون هيج

راكان ويانة على اتصال خايف خاف ابو يغير رأيه و ميجي لهنا
لان زعلان على اخوانه بعد ما كايلين اله احنه احق بأملاك مو هذا الي متبني هسة ياخذ الفلوس ويعوفكم
و راكان كايله اني اصلا ما اريد شيء من املاكك اني اكمل كلية
و اتعين و اكون نفسي

طول هاي الفترة و تُراب بكل اتصال يطلع برا
و خبرنا نجهز نفسنا نروح لايران كلنه و حتى دعبول
يمشي بمعاملته و يريد يطلع اله جواز
جوهرة : دعبول شعجب تاخذة ؟
تُراب : أعوضة الي شافه مني مو شوية اريده يتونس

جوهرة : اتمنى اعرف قصته
تُراب : تبجين خليها على غير مره
امي و نويرة و اميرة جانن اكثر ثلاثة مهونات علينه هاي الشدة
و تُراب بكل الايام قلق لحد اليوم الي دخل بي يضحك
و اني و عمي مكيفين لان عصبيته عيشتنا حرگ اعصاب

الا خالة ، سُعاد
جانت بهذا اليوم حالتها غير عن كل يوم
لا اكلت ويانه و لا طلعت و عمي مستغرب وضعها
و يسأل تُراب ميجاوب

فتحت باب الغُرفة عليها لگيتها تبجي و تعاتب
كلمات جنوبية بحِت
يمه تعاي و شوفي بيه أخوتيّ شعملوا
يمه گتلو بناتي و إعله ابني رَدوّا
يمه خوان يوسف اشوه منهم
يمه الكاتل اخوتي انا ابن اختهم

بقيت فاتحة حلكي على اخر كلام كالته و صعدت اركض
للغرفة و مية الف جواب اختار لسؤالي قبل لا اوصل
فتحت الباب بقوة
جوهرة : تُراب تُراب امك شبيها ؟
تُراب : خوالي انعدموا اليوم

رغم كلشي جرى و صار بس بقيت متصمنة من هذا الخبر
و كأن صاب جسمي صعقة شلتني عن الحركة
دموع صابتني على حالة خالة بمثل هيج موقف
مرت ايام علينه كأن الحزن خلانه نتنافر

و كلمن بجهة صافن حتى تُراب الي دخل بأول يوم مبتسم
كانت ابتسامة مزيفة حتى يخفي كلشي بداخلة
جنت اوكف باب الغُرفة اسمعة يضرب الحايط بكل قوته
و يعاتب نفسة
تُراب : جبرتني هيج اسوي جبرتني حكمت شلون تذبح بنات اختك
شلوووون شلون تريد تسطي على عرضي
لو ما تنعدم و تموت عندك استعداد تاخذ مرتي و تحرگ گلبي بيها
لان متعود تلزمنه من ايدنه التوجعنا

لك كله علمود فلوس فلوسسس هيج سويت بأختك
و صوت الضرب يكزبر الجسم افتح الباب حتى يبطل
و الكة ايده تصُب دَم و ياخذ وحدة من ربطاتي يشد ايده بيها
عدم اكثر الالوان بالدم بس مخليته على راحته
أيده ترجف و هو يشد بيها
و يكعد صوت انفاسة السريع يحرك البيبان من قوته

اجه ابو راكان يختار بيت و ما حصل غير بيت بنهاية الشارع
و طلعلة تُراب عمال يرممون بي من جديد
تكتمنه عن هذا الموضوع و حتى لراكان ما كلت
رُغم هو يسأل طول الوقت ليش ضايجين و رجلج شبي

رجلي راح كل ذاك المها و ورمها بعد ايام من الي سوا بيه
و خلصت من كل وجعها الي جان مقيدني وعرفت
صحة العبارة الي كالها الي و فعلاً مرات مجبورين
نتأذه بكمية قوية لفترة حتى نرتاح باقي عمرنا
و نفس الشيء وضع بيتنا حالياً

جان عمي هو الضماد لروح خالتي و اقل شخص تأثيراً
و كل ما يشوف تُراب صافن يخلي ايده على كتفة
ابو تُراب : انتَ سويت الي لازم يصير

راح للدوام و رُغم كل البرود الي صابه اني بعدني نفس ما اني جوهرة
الي ما ممكن بيوم تصير مشاعرها قديمة بعدني انتظر
ايامنه تصير احلى و بعدني انتظر الطفل الي راح يحلي ايامي
دعبول رغُم كل عُمرة بعد ما تحسن صار يحسب نفسه كأن ابني

و حتى اني صارت مُعاملتي اله بمثل هذا النطاق
ما صدكت بيوم يرجع يصحى لان لو صاير بي شيء
و روح بدون ذنب هم تكون ضحية تُراب و خواله
جان متت بوقتها

ابو تُراب : يالله كعدو من النوم تُراب جاي باجر نسافر
نزلت سريع أتأكد من صحة الكلام انرسمت الابتسامة على وجهي
اجه العصر تُراب و يحجي شوكت راح نطلع و شوكت نجي
رُغم صار النه شكد فاقدين صوته ويانه

بالليل نزلت اسبح جوه لان المي ما صعد فوك
سويت عصير لدعبول و انطيت لعمي و خالة و صعدت واحد وياي
على امل ياخذة و يرجع مثل قبل لـ سوالفة الي امثل ما احبهن
و اني ادري بنفسي اكثر شخص مُغرم بشخصيته و جرائته بالكلام

دخلت و الجو زين مو بارد هو كاعد يلعب بالجهاز
وكفت كباله و انطيته الكلاص
جوهرة : تشرب ؟
تُراب : الوضعية مال عرگ جوهراا

جوهرة : المَلحة اني مو جوهرة
باوعلي رافع حاجبة
تُراب : هاي من شوكت
جوهرة : أهم شيء ترجع زين مثل قبل

خله العصير على الكومدي و سَد الجهاز و فتح ايده
تُراب : تعاي
تمددت يمه مبتسمة بِست خده
تُراب : گولي مشتاقة عليمن هاي الحركات

جوهرة : هو اكيد طبعاً مشتاقتلك
تُراب : اويلي
- لا هسة يعني صدك رجعت زين

تُراب : المَلحة
- هاا گول
- خلي امج تتزوج حبييتي المن هاي الانانية
بلعت ريگي و باوعتلة
جوهرة : ها ؟
....

يا حَبيبي الماكو مِنه
بيك أتعب من اسولف
من ظلام الدُنيا صارت انتَ جيت الها گُمر
انتَ يـالـ تسوه أنتظاري
و لو بَعد عُمرين لأجلك أنتظر
كون بس اني أعرفك
اي شخص ما يدري عنك
مثل سري الما أگولة لأي بَشر
- رُسل فَهد

حلوة فقرة الامنيات و قريت كل أمنياتكم
فضفضولي مَره ثانية
الخطأ الي أرتكبتوا بحق نفسكم او بحق غير بشر
قابل للتصحيح لو فآت آلاوان ؟ ..🤎