رواية على وطايا الخيل الفصل الأربعون 40 - بقلم روايات تثريـب

،

الجزء الثامـن والثلاثـون

كان يمشي في ممر المستشفى وهو يشعر بقلق شديد

فقد وصله اتصال من طبيبة سوادة تطلب منه الحضور ولقائها بشكل مباشر

حاول أن يستشفي الأمر، ولكنه لم يستطع

لم تعطه أي تلميح عن موضوعها المهم

خشي عليهم

سوادة، والطفلين

لم يهنئ بهم بعد، وليس مستعدًّا لأي مصيبة أخرى

طرق الباب ودخل ما أن أذنت له

استقبلته بابتسامة هادئة ووقفت ترحّب به وتؤشر له بالجلوس

رفعت السماعة وهي تنظر إليه: تشرب كبتشينو؟

وضع يده على صدره بامتنان: تسلمين.. خلينا نرمس في الموضوع أحسن

هزت رأسها وهي تحادثه: عيل خلاص.. الو اثنين كتبشينو لو سمحت.. طلبته واغلقت السماعة

قرواش: دكتورة اتمنى تدخلين في الموضوع على طول "ابتسم" قلبي قابضني من يوم وصلني الاتصال

دكتورة: بنتكلم ان شاء الله بس اشرب قهوتك اول

ما أن وصلت القهوة حتى مدت له إناء به تشكيلة شوكولاتة: تفضل واسمحلنا ما ضيفناك عدل

يريد إنهاء الأمر وحسب.. التقط أول نوع أكله وارتشف من القهوة: ماقصرتي الله يبيض ويهج

قالت وهي تعبث بأصابعها: والله مب عارفة كيف افتح وياك الموضوع

رفع عينه بتركيز، بدون أن يضعها في عينها مباشرة

أردفت الطبيبة بتردد بالغ: بحثت في المسألة وأغلب العلماء اجازوها

قرواش: دكتورة تراني مب فاهم شي

الطبيبة: اجازوا إن المرأة تعرض نفسها للزواج، باحترام وعفة إذا كانت تشوف الرجل صالح

وأنا أشوف فيك زوج صالح يا قرواش

شعر ببرودة في أطرافه.. "هذي شو تقول؟"

لم يستطع الرد أو التحدث، كان مصدومًا

مالذي عليه قوله من الأساس؟

لم يتعرض إلى موقف مشابه، بل لم يسمع بهذا من قبل حتى

قالت: أنا شفت فيك الرجل الصالح ماشاءالله محافظ على صلواتك، وتبر بزوجتك وعيالك

وحتى أمك يوم تمر تحاظيها وتداريها

أنا أرملة وعندي ولد وأخاف عليه.. ابغي حد يربيه وياي يساعدني وينصحه ويرشده

صمت.. لا يعلم كيف عليه الرد

الطبيبة: أنا مابغي منك وايد.. افهم إنك ريال متزوج يعني براعيك وايد من هالناحية

إذا الله كتب نصيب

أنا بس أبغي الاستقرار.. حياة الحرمة بدون ريال صعبة وخصوصًا إذا عندها طفل يتيم

قرواش: مشكورة على المدح.. والله يعينج على التربية

لكن للأسف أهلي مستحيل يرضون اتزوج من برع العايلة

الطبيبة: بس أنا بكون زوجة ثانية! ما اعتقد بيمانعون

قرواش: لو زوجة عاشرة، بوالخيول مايرضون الا ببنت بوالخيول

قالت بعد تفكير: اممم مب مشكلة في البداية ممكن يكون بالسر، لين تقنعهم وعقب نشهر الزواج

أغمض عيونه بضيق.. لقد توقّع بأن العذر ذلك يكفي لأن تغلق الموضوع المزعج

وإن تغاضى عن كونها أكبر منه، وأرملة، ولديها طفل.. جرأتها بطرح الموضوع بهذه الطريقة لا تناسبه مبادئه أبدًا

لا يعلم إن كان بالفعل جائز كما تدّعي.. ولكنّه غير مناسب في عرفهم

ولكنّه في النهاية رجل مؤدب.. لا يستطيع أن يكون وقحًا كفاية ليصارحها بما في جوفه

وأسلوبها هذا جعله يشعر وكأنها تضعه في الأمر الواقع

فكر كثيرًا.. كيف عليه الرد.. ولم يجد طريقة مثلى ولذلك نهض فجأة

قال: ماقدر.. السموحة

نهضت معه الطبيبة: اتفهم هالشي.. لكن انصحك تستخير وتفكر في الموضوع

.

،

قال وهو ينظر إليها بإعجاب شديد: اويلي على الزين.. والله انج مووووتٍ حمر

ابتسمت بخجل: يسلمو حبيبي

قال وهو يتأملها: تحيدين حفلة السفارة؟ مال اليوم الوطني.. كنتي لابسة مثل هاللون

ااااخ يا ريان والله مادري كيف مسكت عمري عنج

صدق كنتي عذااب

ضحكت ريان: مجنون.. كنت تعرف اني زوجتك؟

غديّر: شو كان ذابحني الا اني اعرف انج حلال.. عاد بالبرقع.. صدق كنتي مووووت

ريّان: هههههههههه اي موت وانا الويه كأني جاية من سوريا وعاملة مواطنة

غديّر: ههههههههههههههه والله ايام.. أحسها عشر سنين مب سنة وشوي

كيف دخلتي حياتي ولعبتي فيها لعب؟

ريّان: أنت بعد لعبت بحياتي.. أول ماعندي هموم.. كل تفكيري الآوت فت اللي بختاره للجامعة

غديّر: يهالاوتفتات.. الحمدلله يوم عقلتي وقمتي تسمعين الكلام

ريّان: لا يا حبييبي.. انته شرطك البس طويل مو شرطك ما انسق الاوت فت

غديّر: يا ليل.. بعد شرطي انه مايكون ملفت وايد

بدون شي تراج ملفتة بهالبياض ماشاءالله

ريّان قالت بغرور: شو اسوي اي شي البسه يطلع ملفت علي

غديّر: هذي اللي تباني اخليها تلبس عباة فلندن

ريّان: ههههههههههه لا لا دخيلك.. خلص بلبس شي واسع ومو ملفت.. راضي هيك؟

غديّر: شاطرة

ريّان: ايام صدق.. كنت دائمًا اجرب رياضة جديدة بوكسنق وخيول وماراثون وجري وهاي الاشياء

الحين صرت البس مخور وذهب واقعد مع الحريم.. لو حد يقوللي قبل مستحيل اصدق

غديّر: يبالج تردين للرياضة حبيبي اشوف غزج (خدج) قام يكبر

ريّان رفعت حاجبها: لا والله.. مرة متزوجة اكيد بمتن

غديّر: اسميكن انتن الحريم تدورن اي سبب للوزن

باجر بتحملين واتيبين عيال بتقولين خلاص متنت لاني أم

ريّان: ايوا صح هههههههه اذا الله كتب لنا

قال بابتسامة وثقة تامة: الله بيكتبلنا حبيبي.. وبنسوي عزيمة أكبر عن هذي

بإذن الله سبحانه

اقتربت منه لتقبله: يالله طيب بنزل

دفعها تلقائيًا: يا ويلج

عقدت حاجبيها: شو فيك.. روجي مطفي ما يطبع

غديّر: يلا يلاا انزلي وعن الحركات.. مب وقتج الحين

دخلت قسم النساء وهي تسمع أصواتًا عالية.. ونقاشات مختلفة

ضحك وجدال وغيره.. أدام الله هذه النعمة العظيمة على بوالخيول

فلم تشعر بها من قبل، ولم تستشعر اهمية العائلة والجمعات العائلية هذه الا مؤخرًا

دخلت وسلمت.. ثم اتجهت الى البنات بابتسامتها الواسعة: هااااااااي

رحّب بها الجميع، وجلست باستغراب وهي تسمع جدال وضحى وسوادة

فإن عيار المزح كان ثقيلًا جدًّا.. على غير عادة الفتيات

قالت وضحى وهي تنظر إلى حياب ابن سوادة: الاسم حياب والويه قرواش.. حرام والله مادري كيف خاله للحين ما قاضاكم

أخذته منها سوادة وهي تقبله بحب: خليه الويه قرواش.. حلاته ريلي فديته عايبني ومالي عيوني

وضحى: هيه قصي على عمرج

سوادة: وبعدين من زين ريلج هالشيبة يوم انج تحطين على ريلي؟

على الاقل ريلي أنا شباب وكشيخ ومرتب

مب ريلج الدهري (كبير السن)

عنبوه اذا مستخسر يدفع على الصبغ في الحلاق اقل شي يشتريه من الجمعية ترا ينباع بعشرين درهم

ضحكت وضحى: ههههههههههههههه كلي تبن يالمعفنة.. شو عرفج انتي بالشيب والموضة

الحين الرياييل يصبغون ابيض متعمدين عشان هاللوك.. واهم شي انه عااايبني

مسكت صغيرة رأسها: ااااخ انتوا ليش تصالحتوا؟؟؟ كنا مرتاحين من هالصداع

ضربتها وضحى: اذكري الله يالسبالة

صغيرة: انا تحريت سوادة عقلت والله هداها

بس طلعت تترياج انتي تخرشينها (تحمسينها)

اعوذ بالله منكن

كانت ستكمل ثرثرتها لو لا أنها رأت والدتها بمفردها.. نهضت مباشرة ولحقت بها

تناديها: اماااايه

التفتت عليها: ها أمي

صغيرة: اممم من متى أبا أيلس وياج.. حشى ما خلوج هالحريم

أم سلطان: تراني على بعد خطوتين منج.. چان ييتي يلستي عدالي يوم انج متولهة علي

صغيرة: لا امايه مابغي ايلس وياهن

أم سلطان نظرت إليها بتفحص: تبين شي شكلج

قالت صغيرة بارتباك: امممم شسمه... حياب شو كان يبا منج البارحة؟

عقدت حاجبيها: ليش؟

صغيرة: بس.. أبغي اعرف

أم سلطان: الحين انتي هادة بنات عمج ولاحقتني عشان تسألين عن هالموضوع.. مستوي شي؟

صغيرة: لا استغربت بس

أم سلطان: ياي يسلم علي

صغيرة: امايه طوّل عندنا شو هالسلام؟

أم سلطان: اساليه مب ريلج هو؟

شعرت بارتباك شديد.. قالت فجأة: امممم بسير عند البنات

وهربت مرة أخرى وسط أنظار والدتها، وشفتيها التي لا تنفك تدعو لها

.

،

ليلًا

شاهدته يعبث بهاتفه كالعادة، يلعب الورقة الالكترونية

استلقت على سريرها بجانبه وهي تقرأ أذكار النوم

وصلها صوته الهادئ بعد مدة: واعية عذرا ولا رقدتي؟

التفتت عليه، وهي تختم المعوذات ثم قالت: لا بعدني.. آمر

قال بعد مدة: ظنج إنه رد خلاص؟

أم سلطان: ان شاء الله إنه رد يا بو سلطان.. الحمدلله

قال بنبرة عدم تصديق: الله أكبر.. كيف رد عقب هالقطيعة؟

أم سلطان: أمر الله سبحانه.. الحمدلله

بو سلطان: الحمدلله والشكر لك يارب.. الحمدلله

بعد الله هذي وديمة.. اوصيج عليها يا عذرا

أم سلطان: وديمة في عيوني.. مرة لا تحاتي

قال وهو يتذكر دعوة زوجته في الزفاف: ثرها الغيمة سقتنا كلنا يا أم سلطان، مب بس سلطان

أم سلطان: الحمدلله رب العالمين.. الله يخليهم لبعض ويحفظهم

بو سلطان تنهد: هييييه يا بنت سعيد.. جميلها علينا كبير

ما ظنيت إني بزوّج ولدي من برع العايلة.. لكن وديمة غير

ولو يرد بي الزمن ما اختار الا هي

الله يبارك

أم سلطان: الحمدلله.. والله يديم المحبة والراحة بيننا وبينهم يارب

.

،

فتحت حسابه بعد مدة طويلة من الانقطاع، وجدت صورة وحيدة جديدة

كانت صورة أحد شوارع الدانة

التاريخ تحديدًا يوم العيد.. بعد أن شاهدها في المستشفى

ومعها قصيدة

..

اتضايق لين ما ألقاني على أطراف المدينة

ما لسمعي غير غصّات النسم بين المحاني

رحت مثل اليائس اللي تكتم أنفاسه يدينه

لين ما مرت علي أحداث عمري في ثواني

عشت يا صوتٍ يعود الليل ذكراه وحنينه

قالوا العالم نساك، وقلت والله ما نساني

والله إن قلبه جريح، والله إن نفسه حزينة

والله إنه مثل ما اعاني من الفرقى يعاني

لو نسى وجه الفجر صبح، يصبّر ساهرينه

ما نسيتك يا أول أحبك نطق فيها لساني

كيف ينسى من غفى وجهك على راحة يمينه؟

كيف ينسى من تفاصيله بقربك عمر ثاني

كيف أبنسى وأنت ما ينساك أحد مريت عينه

كيف أبنسى وأنت للحين وأنت أكثر زماني

الليالي دون ضحكاتك نسايمها غبينة

كلها صارت تذكرني بصوتك لا دعاني

-للشاعر ناصر مناحي-

دمعت عيونها وهي تقرأ.. كانت الأبيات وكأنها حديث موجه إليها شخصيًا

هو الذي رحل يائسًا غضبان.. وهي التي لم تنساه

هي التي تشاركه معاناة الفراق والجروح

هي أول "أحبك" نطق بها حياب

هي التي غفت بين يديه.. وهي التي شاركته الضحكات والمشاكسات

هي المقصودة بكل حرف..

القصيدة وصفت ما بينهما تمامًا، ولولا علمها بأنه ليس بشاعر، لشكت بأنه من كتبها شخصيًا

ندمت كثيرًا لأنها فتحت الحساب.. لو لم تفتحه

لما شعرت بالغصة القوية، والتي تحكم الوثاق على حلقها

لما شعرت بالتعاطف الشديد هذا معه.. وكأنه يتعمد أن يخبرها بأنه يعاني معها

وكأنه يخبرها، بأن كل ليالي العذاب لم تقضيها لوحدها

كتمت شهقاتها.. ولكنها لم تستطع كتم فعلها

علّقت على الصورة "شو قصدك بهالكلام؟ تبغي تعذب منو؟"

مسح تعليقها مباشرة، ورد على الخاص

حياب: منو قال إني أبغي اعذب حد؟ مابغي اعذب الناس

صغيرة: عيل ليش كاتب هالكلام؟

حياب: هالقصيدة توصف اللي في قلبي، وعشان چي حطيتها

زادت ببكائها: چذاب

حياب: اذا تبيني امسحها بمسحها

صغيرة: احلف انك ماتبا تعذبني؟

ابتسم وهو يقرأ كلامها: والله

أما هي فكانت منهمرة في البكاء.. كتبت له: أنا صغور

حياب: ادري

صغيرة: بس تسوي عمرك تعرف كل شي

حياب: ادري ومن زمان، وحتى لو ما كنت ادري صدقيني قلبي بيدري وبيدلني عليج

كانت تقرأ الكلام.. وهي تشعر برجفة في قلبها.. كل ما فيها يريده

ولكنه لا يريدها

حظرته مباشرة.. تشعر بأنها لو زادت بحرفين

ستبدأ ترجوه أن يعيدها إلى ذمته.. بعد أن فعل بها ما فعل

الحظر ورمي الهاتف هو أسلوبها الدفاعي الوحيد عن كرامتها

فهي ضعيفة جدًا فيما يخصه.. تحبه.. ولا تستطيع مقاومته أبدًا

.

،

على بعد امتار بسيطة، وبجلسة أكثر راحة وحميمية

احتضنها وهو يضع رأسها على صدره: تحسينه رضى علي؟

وديمة: امممم والله مادري.. مافهمت شي منه بس أحسه متقبل

عمي انسان غامض يبغيله تركيز وتراجع حركاته كم مرة عشان تفهمها

سلطان: أنا بعد ينقال عني نفس الكلام متخيلة؟

نظرت إليه بمكر: مادري يمكن عند الناس.. عندي أنا كتاب مفتوح

سلطان ابتسم لها: حط ايده على ايدي.. اظن إنه رضى، او فيه بوادر تقبل مثل ما قلتي

وديمة: الأشخاص الكتومين أصعب شخصيات في الحياة

مستحيل تعرف باللي يدور في راسهم.. الا بعد عشرة عمر وانتباه كبير

تدري شو؟ نش باچر الصبح تريّق (افطر) وياه اسأله عن اي شي في الشغل، وتتيسر ان شاء الله السوالف بتسحب بعض

قاطعها صوت بكاء عذبة الذي علا فجأة

فنهض سلطان بشوق: ابوووووووي انتي فديت هالصوت

وديمة بغيظ: بس سمع حسها فرني (رماني) وقام يركض.. انزين بتعقني! توني طالعة من ولادة انا

سلطان: هههههههههههههه يالغيورة.. هذي ياهل تصيح.. حرام

وديمة بزعل: كل اليهال يصيحون.. بس الأبهات ما يدزون حريمهم چذي عشان يسكتونهم

حمل عذبة وعاد إليها.. اقترب وهو يجلس على السرير، يمسك بعذبة باليسرى وأحاط بوديمة بيمناه وهو يقبلها

قال بحب: آسف.. ما حسيت بعمري

تعورتي؟

وديمة: من الحين چذي.. يوم بترمس وتتدلع عليك شو بتسوي؟

سلطان بمزح: افر الدنيا كلها عشانها

وديمة ابتعدت بزعل وتغطت لتنام: اوكي تهنّى!

ولكنه سحبها إليه: لا تزعلين يا عيني اليمين من عيني اليسار

كل وحدة أغلى من الثانية

تعالى بكاء عذبة مرة ثانية وهو يحاول تهدأتها

قال باستغراب: بلاها من احطها في فراشها تنش

وديمة: مب أنته تقول خلوها تتعوّد؟ تستاهل.. الحين البنت تبا تتم على صدرك

ركز نظراته عليها: ايواا مثل امها يعني

ضحكت وديمة: هههههههه عيب عليك

حادث ابنته التي تبكي: شو هالمزاج اليوم؟ مابتخلين ابوج يرقد؟

وديمة: اكيد مابترقد ففراشها وانته 24 ساعة شالنها

كان يربت على ظهرها ويقبلها: فديت هالويه.. فديت هالحس يالعذبة

بسم الله عليج.. تبين حضن بابا؟ يا قلب ابوج انتي

اقتربت منه وديمة: هاتها عنك.. يمكن يوعانة

سلطان مدها: يوعانة ولا أمها تغار؟

وديمة: خلاص غسلت ايدي ماقمت اغار.. بييب ولد ان شاء الله بيحضنني بدالك

سلطان: عشان اعلقه في الاسطبل، حرمتي لي انا بس

قالت تؤنبه: اناني.. تبانا كلنا حقك

سلطان: اكيد!

قالت بعد أن هدأت ابنتها: بسم الله عليج ماماتي

قال سلطان بصدمة: سكتت!!.. وأنا متّرت الحجرة ساير راد عشان اسكتها ما طاعت

ضحكت وديمة: شفت.. عشان تعرف إن محد يغني عن الأم

سلطان: ماعليه.. الحين عندج سلاح قوي يعلقها فيج.. بتكبر وبتحبني أنا أكثر ان شاءالله.. اصبري علي

وديمة: صدق انك مب صاحي.. بس ترا صدق مب زينة هالعادة حبيبي

فاهمين انك تحبها، كلنا نحبها.. تراها اول بنت لي بعد

بس في شي اسمه منطق.. تتطبعها بهالطبع بتمصخ البنت

عقب مابتطيع تيلس على الارض كله تبا شل

سلطان بعناد: برايها.. بشلها انا

وديمة: بتشلها لين متى؟ ما بتطفر؟ مابتسير شغلك؟ ابسط مثال الحين تبا ترقد وهي تبا تتم على صدرك

سلطان: عادي اذا سرت شغلي بشلها وياي شو المشكلة.. الحمدلله مب موظف ولا عندي مدير

شغلي كله في الاسطبل بربيها هناك في بوكسات الخيول

وديمة عقدت حاجبيها برفض

سلطان: دكتورة ترا البنت هذي يتني عقب ٣٦ سنة.. خليني افرح بها

.

،

.

*

قال وهو ينظر إليها بحب: اتريا ترد لج عافيتج 100٪ عشان تدلعيني مثل اول

تسكرين عقم (أزرار) كندورتي وتدخنيني.. اشتقت لهذيج الأيام

سوادة بمزح: ما قال أباج تردين عشان تكونين بخير.. يباني اتعافى عشانه بس

تمدد بكسل: تعودت على الدلع.. ليش تدلعيني؟ مشكلتج هذي

ابتسمت له: فديت قلبك.. ان شاء الله يارب.. الحمدلله الحين أحس عمري أحسن بوايد ربي لك الحمد

بفضل الله وعقبه انته حبيبي.. مول ماقصرت وياي

احتضنها وهو يمسح على رأسها: واجبي هذا

عاد نحن نجابلج وأنتي تعبانة

أنتي مجابلتنا ونحن صاحين ما بلانا شي

تستاهلين يا أم حياب ومب قدرج

ابتسمت وهي تقبله: تصدق.. بعدني ما تعودت على الاسم

قرواش قهقه: ولا انا والله

وضع يده على مخباه: اكيد هذا هو يتصل.. هذا مرة لا تطرين اسمه عفريت

يحس او يوصله اشعار مادريبه

سوادة: ههههههههههههه حليله حياب

قرواش: يالله سويلي درب عشان اطلع

سوادة: عادي اطلع.. مافي حد.. اهل البيت مايمرون صوب الميلس هذا

قرواش: مب مشكلة بعد قومي احتياط.. خلينا نغلط في اي بيت الا بيت اهل اخوج المعقد هذا.. مافينا

سوادة: ههههههههه حرام عليك

قرواش: والله ناشب لي على الدخلة والطلعة اكثر عن عمي محمد

ليش ساير وتأخرت.. وسيراتك زايدة وهالكلام الفاضي

ابتسمت سوادة: حليله أخوي غيور زيادة عن اللزوم، شو نسوي بعد

قرواش: يالله استعيلي (استعجلي) حطي شيلتج واطّالعي الدرب

قبّلت موضع قلبه، ثم وضعت يدها عليه: استودعت الله عيونك وقلبك وروحك وكل جوارحك

شعر بنغزة في قلبه: فيج شي؟

سوادة: لا.. استودعك الله بس.. عشان ما تتطالع مني ولا منّاك

ضحك بتوتر: ماروم اطالع مكان وانتي في عيوني "مد لها يده" يالله حبيبي

خرجت إلى حياب الذي هرع إليها يمسك بيدها.. وقبلها يحييها: حي الله أم حياب

سوادة: الله يحييك الغالي شحالك

حياب: الحمدلله رب العالمين.. علومج انتي؟ شو صحتج؟ تحسين عمرج أحسن

سوادة: هييه الحمدلله رب العالمين، ماتشوفني امشي شوي

ماتقصر ام سلطان تمسحني كل يوم

حياب: يزاها الله خير.. يالله عيل نحن مروحين بنصيع شوي وبنرد ان شاءالله

صغرت عيونها وهي تنظر إليه: لا والله؟

حياب: عن نفسي عزابي وعادي ما يخصني بغيري

قال قرواش بسرعة: انته ايه لا تسويلنا مشاكل "همس لسوادة" يسولف الغالية ماعليج منه

رفعت حاجبها: ماعليه.. بنشوف.. يالله ربي يحفظكم.. وتحمّلوا حياب عن السرعة والخبال في السواقة

حياب: على هالخشم

ركبا.. وما أن اغلق الباب حتى بدأ قرواش يأنب حياب بلهجة شديدة

حياب: ياخوي ذليتنا خلاص تراها تعرف إني أسولف.. لو بسير اصيع وياك اكيد مابقول جدامها لا تستوي غبي انته بعد

قرواش: سوالفك الخايسة هاي خلها حقك.. ماتعرف الحريم كيف شكاكات؟ الحين بتتم تفكر بالحرف وتألّف قصص

حياب بنذالة: وأنته ليش زايغ هالكثر.. ليكون رديت على علومك؟

ضربه قرواش على زنده: تهبي يالكلب.. شو تشوفني بخون حرمتي يعني؟

ضحك حياب وبالغ بضحكته: ههههههههههههههههههه تعرف شو أحلى منظر عندي؟ شكل الخروف وهو زايغ من حرمته

قال قرواش بغيظ: كل تبن

لم يأبه به حياب، بل أطال على صوت المسجل وهو طربااان.. فقد حادثته صغّور وهو مشتاق لها.. ولا محسّن لمزاجه افضل منها

وإن انتهت المحادثة بـ "بلوك" كما يُقال إلا أن الحرف منها يكفيه!

قال قرواش وهو يقصر على المسجل: ليتني ما ناسبتك ياخي

رفع حاجبيه باستنكار: اعقققب يالهرم.. صدقني هالكلام بيوصل أم حياب

بخليها تروغك (تطردك) صدق

قال قرواش بعدم اهتمام: عندي موضوع.. بس ماقدر أقوله وأنا نسيبك

حياب نظر إليه بطرف عينه: لا تحاتي أكثر شي بسويه إني بكسر لك خشمك إن سويت شي بأختي.. ما بزيد

استند قرواش على المقعد: عندي مشكلة

قال حياب بسخرية: قوللي يا ولدي.. أدريبك ياهل توك تطلع من البيضة

اعتبرني مثل أخوك العود

تجاهله قرواش وهو يستفسر: تحيد دكتورتها؟

حياب: دكتورة منو؟ سوادة؟ هي أحيدها

"أردف بتوجس" ليكون شي بلاها سوادة؟

قرواش: أنا ظنيت چي بعد يوم طلبت أسير لها.. بس طلع موضوع ثاني

حياب: شو انزين؟ أرمس وعليك الأمان

قرواش: تباني اتزوجها

فز حياب: انااا وبعدني! والله مب هينة العيوز.. شو تبا بك هذي وأنته كبر ولدها

زفر بضيق من مبالغات حياب: شدراني بها.. اونها أرملة وعندها ولد تبا تربيه وتدور الستر

الله حق الحرمة كانت محترمة لا ترمس عنها بالشين

تقول يجوز في الدين الحرمة تخطب لعمرها

حياب بحواجب معقودة: تدور الستر تسير تطلب من واحد اصغر عنها ب15 سنة يتزوجها؟؟ عجيب والله

قرواش: شو أسوي؟ وأختك أحسها حاسة بشي ياخي

مع إني مرة ما قلت شي ولا لمحت

حياب: الحريم يعرفن كل شي.. كيفك عاد أنته

قرواش: والله أنا اشهد.. عنباهن.. كيف يعرفن كل شي مادري

ضحك حياب: هههههههههههه بس اسميها هالعيوز.. شو قلتلها عاد؟

قرواش: قلتلها إن أهلي مايطيعون ناخذ من برع العايلة

قالت برايه اولها بالسر وعقب بنعلن

حياب: انااا وبعدني!!!.. وحدة تدور الستر والاستقرار تقولك خذني الثانية وبالسر بعد.. الله يستر على أهلنا.. ما ابغي اتكلم خلني ساكت بس

قرواش: والله صدقك.. الله يستر علينا بس

شو اقوللها؟

حياب: تزول (تنقلع).. بلّكها.. شو بعد تقول لها

قرواش: بالله عليك؟ ما أرد؟ عيب ياخي الحرمة رمستني باحترام

حياب: يا ريال طز.. ألبسها (تجاهلها)

هالأشكال إن عطيتهن ويه بتمصخها وبتطلع لك مليون سبب غيره عشان توهقك وتاخذها

"أردف بمكر" الا اذا متوله على أيامك

غضب قرواش بصدق هذه المرة: بلاك أنته مريض؟ تراني ريال معرس وعندي عيال.. استح على ويهك

ضحك حياب: ههههههههههههه ما قلت شي انزين.. هذا الصدق وهذا ماضيك

قرواش: كل تبن مسوي فيها الريال الزين يعني

حياب: الحمدلله سويت كل شي غلط فهالدنيا بس ما رمست بنات

قرواش: ما رمستهن لأنك خقاق وخايس مب لأنك شريف

انجلع بس وسكر حلجك.. كل شوي تطري نفس السالفة شو مشكلتك؟ تدور مشاكل؟

حياب يرفع ضغطه: هي

قرواش: مريض والله.. ما الومها بنت عمي تسحب على زلفك

حياب: ايييه ايه.. تحمّل.. بدفنك إن طريت هالموضوع

قرواش: تطري موضوعي اطري موضوعك.. اصطلب بالزين

ضحك حياب: ههههههههااي خلاااص بنسكت لا تصيح علينا

.

،

كانت جالسة لوحدها في الحديقة.. متغطية بشال خفيف.. فقد بدأت الاجواء تتحسن

تفكّر بحياتها.. سيعودون إلى لندن بعد أيام.. ليبدأ العام الدراسي الجديد

تتذكر كل المشاكل التي مرّت بها مع غديّر.. وتشعر بأنها لاشيء أمام ما تمر به الآن

غديّر يكبر في العمر.. قد بلغ الواحد والثلاثون عامًا منذ مدة بسيطة

كم سيصبر بعد بدون ابناء؟

خصوصًا وهي تعلم بلهفته الشديدة ليصبح أبًا

منذ بداية علاقتهم الزوجية وهو يتحدّث عن الأمر.. يخبرها عن أحلامه.. عن رغبته الشديدة بأن يكون له الكثير من الابناء

أول ابن ذكر له سيسمّيه بنفس اسم والده المتوفّى رحمه الله

والبقية لم يفكر بهم.. وترك لها حرية الاختيار..بشرط أن تكون اسماءً تناسب بوالخيول

يخبرها عن رغبته بأن تكون تربيتهم منظّمة.. متوسّطين

لا كثيري الشدة، ولا هم من المرخّين

ولكن كل شيء تلاشى مع خبر الطبيبة

يسمّونها صعوبات بالحمل.. ولكن هل هي صعوبات بالفعل؟ أم هو تلطيف لعدم القدرة على الإنجاب

كانت الافكار الشيطانية تلهو بها لهوًا

وكما اخبرها غديّر.. فإن الشيطان استغل الباب المفتوح وعثا به فسادًا

سقطت دمعة من عينها بدون أن تشعر

تريد والدتها

تريد أن ترمي بنفسها في حضنها وتبكي وحسب.. تريد أن تبقى معها ولو لمدة بسيطة

تحتاج هدنة بعيدًا عن غديّر الذي يضغط عليها لكي تتفائل

التفاؤل مطلب.. لا تنكر ذلك.. ولكنها تريد أن تستسلم للحزن قليلًا.. تريد أن يشاركها أحدٌ هذا الألم

تريد أن تبكي إلى أن تتعب.. بدون أن تحصل على سيل من المواعظ والنصائح

غديّر خير داعمٍ لها.. ولكنه محالٌ أن يشعر بها

شعورها سيء جدًّا.. من بداية انتقالها معه بشكل رسمي وهي تشعر بأنه تحمّل مسؤوليتها رغمًا عنه، لنقل بأنها كانت مسؤولية غير مخطط لها

وتضاعف الأمر الآن.. بعد أن علمت بأنها لا تستطيع الإنجاب.. وهو مصرّ على التمسك بها

شعرت بيد تربّت عليها

مسحت دمعتها مباشرة ورفعت عيونها لليد النسائية.. كانت والدة غديّر المبتسمة لها

قالت ريّان بصوت متحشرج، وابتسامة مزيفة: عمتو

جلست أم غديّر على الكرسي المقابل: ليش تصيحين يا أمي؟ متزاعلة ويا غديّر؟

ريّان: لا عمتو.. تذكرت ماما الله يرحمها

أم غديّر: الله يرحمها ويصبر قلبج يا بنتي.. والله فقد الأم صعب علينا نحن الكبار.. فما بالج بكم انتوا الصغار.. الله يهون عليج يا بنتي ويربط على قلبج

ريّان: آمين

أم غديّر: أدري إن الأم ما لها عوض.. لكن اعتبريني مثل أمج يا ريان.. متى ما بغيتي شي مرة انسي إني أم ريلج

أنتي مثل بنتي

زادت دموع ريّان وهي تسمعها.. بينما اقتربت منها أم غديّر تحتضنها

أم غديّر: ليش امي.. شو بلاج؟ خبريني.. يمكن اقدر اساعدج

قالت ريّان ببكاء: عمتو انا ماقدر اييب عيال

انصدمت أم غديّر: شووو؟ ماتقدرين تحملين يعني؟ منو قالج؟ بعدج انتي صغيرة شو هالخرابيط

ريّان: الدكتورة.. رحنا نراجع أنا وغديّر وهاللي قالته.. عندي صعوبات في الحمل

شعرت أم غديّر بقبضة في قلبها: لا حول ولا قوة الا بالله.. ومن متى هالكلام؟

ريّان: قريب رحنا

أم غديّر: الله يستر ياربي.. وغديّر شو قالج؟

ريّان: قال عادي.. بتتعالجين وتيبين عيال ان شاءالله

هزت أم غديّر رأسها بتفهم: عين العقل.. الله ييسر أموركم يارب

.

،

انتهت رحلتهم في أحد المجالس حيث كانوا يلعبون الورقة إلى أن تأخر الوقت كثيرًا

كان غاطًّا في نوم عميق عندما شعر بهزة عنيفة على كتفه وصوت يكرر: بوالخيول انهض انهض.. بوالخيول

فز حياب من نومه وصرخ بغضب ما أن شاهده: يالـ******

قرواش: هههههههههههههههههههههههه لا تسب يالكلب

حياب: الله يغربلك وقفت قلبي تحريتني رديت المعسكر الله ياخذه من معسكر

ضحك كل الموجودين: ههههههههههههههههههه

قال ابن عمهم: هههههههههههههه ايااام والله.. مشتاقيلك عاد هم

يتريونك تخلص دراستك عشان ينعنشونك

حياب بضيق: يعلني ما اتخرج عيل قبل الثلاثين

شافه هزاع باستنكار: امممف.. صدق ماتوا الرياييل

هالكثر تخاف من الخدمة العسكرية

حياب: ياعمي اذا المريلة (المرجلة) في العسكرية بس خليتها لكم.. عنبوووه كابوس

اكثر واحد يتدبّل (يعاقب) في المعسكر انا.. اكثر واحد ينحجز وياكل تبن انا

شو السالفة ماعندهم غيري

هذا وانا مضبّط عمري ومأخرنها عشان ادخل وياكم قلت بستانس ويا عيال العم

ضحك هزاع: ههههههههههههههه لانك حمار.. حاط راسك براس كل المدربين تتحرا عمرك مادري منو

قرواش: المشكلة عقب كل هذا ولا تاب.. مصر يعاند وينجلد

تحيد يوم تدوخ (تدخن) في الخندق ويشوفك القايد

حياب: ههههههههههههههههه عاد انا قلتله ان المدرب عاطني.. دام باكل تبن بناكله كلنا رباعة (مع بعض)

هزاع: لأنك غبي.. من يومها كل المدربين كرهوك زيادة

قرواش: بس صدق انته ما تداني الدواخة.. شو ياك هذاك اليوم؟

حياب: مادانيها لانها تخيّس الريحة وتخرب الضروس

بس هاك اليوم كنت يالس ويا دوّيخة (مدخنين).. حر وكارهين حياتنا قلت امزمز شوي

قرواش: عاد ان شاء الله مزمزت عدل في الحبس

حياب: يوم اقولك حظي نحس.. ما مر القايد الا يوم حطيت الصلب (الدخان) في حلجي

وعاد هالحمير ردوا كل شي علي اونه لأنك قوم بوالخيول اكيد بتطلع منها

ابن عمهم: ههههههههههه تراك دقيت الصدر وقلتلهم لا تحاتون الموضوع عندي

حياب: شدراني أنا يوم شفت موضوعي عند ربيع ابوي قلت خلااااص سهالات

مادريت إن الوالد ناوي علي نية.. اونه قاله لا ترحمه مول

شو عندك من عقوبات تبا تجربها؟ تدور فيران تجارب.. عندك حياب

لا تحاتي ما بنشتكي لا عند حقوق انسان ولا حيوان

ماتوا الشباب ضحك: هههههههههههههههههههههههه

حياب: الله يغربله هالثاني.. عنبوه هالمعسكر مافيه آدمي سنع

هزاع: أنت متغربل في حياتك من كثر ما تدعّي على الناس.. كم مرة نقولك مب زين تراها ترد عليك

قهقه حياب: والله صدقك.. استغفر الله

قرواش: والله هذيج الايام اول مرة يكسر خاطري.. نحن نتعشى وسايرين نرقد وحياب يركض في الميدان

عقد حياب حاجبيه وهو يتثائب: اياااام الله لا يعيدها.. يالله يالله ابوي انا مدوخ على الاخير برد أرقد.. انتوا برايكم

**ملاحظة: في الامارات هنالك خدمة وطنية عسكرية للشباب المواطنين بعد بلوغ 18 سنة ولفترة زمنية محددة

*

،

في اليوم التالي.. نهض متأخرًا وهو يشعر بشوق فضيع تجاهها

محادثتها وإن قصرت.. إلا أنها فعلت به ما لم تفعله الأيام الماضيات كلها

اتصل بها يسألها: انتوا في المزرعة ويا امايه صغيرة؟

سوادة: هي

حياب: حد غريب وياكم؟

سوادة: لا، ليش تسأل؟

حياب: بي برمسها

سوادة: انزين بخبرها

حياب: لا سوادة.. لا تقوليلها عن شي.. بتشرد تعرفينها

سوادة: لا والله؟ وتباني أخليك ترمسها چذي عشان تزعل مني

حياب: شو يخصج أنتي؟ أنا ساير مزرعة يدتي.. اسكتي انتي ولا چنج تعرفين شي

سوادة: لا حياب والله أخاف تعرف وتزعل

لا تدخلني بينكم.. ماقدر احطها فهالموقف

حياب: انتي لا تتدخلين وخلاص.. اذا كلمتج قولي ماكنت ادري.. انا ياي في الدرب أصلًا

سوادة: والله مادري شو تبا تسوي انته.. الله يستر منك بس

وصل بعد دقائق ولقي سوادة جالسة على الكرسي وابنائها في العربة

اقترب يسلم عليها وعليهم.. وهو ينظر إلى صغيرة على الخيل

قال وهو ينظر إليها بافتتان: فرس والله

سوادة: هههههههههههه الله يستر عليك عن تدوسك هالفرس

غمز لها وهو يتجه إلى صغيرة: لعبتي ترويض الأفراس

اتكئ على السياج وهو يشاهدها: ليش راكبة هالخيل ما تخافين؟ انزلي بسرعة

تعترف بأن قلبها خفق خفق خفق.. لسماع صوته

وزادت خفقاته وهي تراه بهذه الوسامة

متكئًا على السياج بنظارات شمسية وكاب يغطي شعره

فهو لا يحب الخروج بدون شيء على رأسه أبدًا

تجاهلته، ولكنه كرر سؤاله بوغادته المعتادة وأضاف عليه: ماتسمعين شو؟

عقدت حاجبيها وهي تستمع إليه

غريب هذا الرجل.. غريب جدًا

فمن مر بكل هذه المشاكل غالبًا سيكون لطيفًا، حزينًا

ولكن حياب يأبى إلا وأن يكون حياب الذي لا يستلذ بحياته بدون أن يستفزها

دخل من بين فراغات السياج واتجه إليها

حياب: يعني لازم نعيد الموقف كل مرة واوقّف الخيل غصبًا عنج؟

ركزت بالخيل أي أوقفته على رجلين أمام صدر حياب مباشرة

والذي فزع لفعلها: ايييييه مينونة انتي!! بتدوسيني

ردت بكلمة واحدة: انجلع (انقلع)

ضحك وهو يشعر بلذة كبيرة.. اشتاق حتى لهذه الكلمات منها

سحب السوط الواقع على طرف السياج وهو يهددها: اذا ما نزلتي بخوفه.. بخلّيه هو يعقج (يرميك)

شاهدته باحتقار: مب كفو تعقني

حياب: هالخيل تراه حار.. إن شاف السوط بيكسرج.. اعقلي وانزلي

صغيرة قالت ببطء: ما يـ خـ صك

كتم ابتسامته: لا تستقوين وايد.. تراج دلوعة بتطيحين وبتفچين لغبج (تفتحين فمك=تبكين)

انزلي بالزين

بروحج مافيج وزن بتتكسرين بسرعة

قالت باستنقاص: يمكن تطيح انته إذا خاف الخيل.. بس انا مابطيح باذن الله

لا ينكر بأنه مستمتع بالتحدي.. وضع السوط في مرأى الخيل، الذي فزع واضطربت حركته

بدأ بتحريك رأسه وزيادة سرعته

كان حياب يوزع نظره بتركيز ما بينها وبين الخيل.. خوفًا عليها ومن أي حركة مفاجأة من الخيل

ولكنّها كانت هادئة تمامًا.. ومركّزة على عملها

لم يعجبه هذا الهدوء.. فكر بأن يزيد الجرعة قليلًا وبحذر

ضرب الخيل على فخذه بخفه.. والذي فزع أكثر وبدأ يرفس الهواء

كانت ثابتة ولكنها صرخت على الخيل تزجره.. ليتأدب ويمشي كما تأمره

حين انفجر حياب من الضحك: ههههههههههههههههههههه لو أنا خيل واسمع هالصوت بموت ضحك مول ما بخاف

شاهدته بحقد شديد.. وهي تشتمه في قلبها

الخايس.. المعفن.. ضرب الخيل بدون لا يخاف علي يعقني

ذهبت بعيدًا بحقد شديد وعادت بسرعة عالية باتجاه حياب وكأنها تود دهسه

والذي ارتاع وعاد بضع خطوات للخلف: اييه انتي مينونة.. تبين تذبحيني؟ تراني ريلج

قالت بقهر: تخسي

حياب: افاا بس.. يلا حبيبي انزلي ابغيج بموضوع مهم والله

صرخت بغضب تفاقم مع كلمته: لااا تقول هالكلمة!!!

كتم ابتسامته: آسف.. والله طلعت بالغلط.. لا ارادي

تعالي صغيرة ابغيج بكلمة راس

صغيرة: مابغي اتكلم وياك

أردف بجدية: أدري ما تبين تكلميني.. بس عندي موضوع مهم

ما بنطول.. مب مطلوب منج تقولين شي بس اسمعيني

صغيرة: ماتستاهل اسمعك

وضع عينه في عينها، والتي أبعدتها بعيدًا: عطيني فرصة "ثم سكت لثواني" إذا ما تبيني اقول هذيج الكلمة.. تراها مصرّة تطلع من أول ما كلمتج شو أسوي؟

كلام القلب هذا مب كلامي

صغيرة: كل تبن أنت وقلبك.. أنا مخطوبة لو سمحت.. وخطيبي مايرضى تكلمني بهالأسلوب

رفع حاجبيه باستغراب، وحبس ضحكته غصب: لا والله

صغيرة: عادي اضحك ليش ماسك عمرك.. لا تحاتي بنعزمك على العرس بس لا تصيح علينا وتكسر القاعة

حياب: هههههههههههه بس أنتي مالي أنا.. محد بياخذج مني

صغيرة: هههاااي.. ده كان زمان يا حلو.. تتوقع ان محد بيخطبني لاني ضعيفة ومب حلوة بس توقعك غلط

الحمدلله من عرفوا اني تطلقت صفوا طابور عند بيتنا

قال بتلذذ تام وهو يمتع عيونه بها: اولًا أنتي قمر وأجمل ما رأت عيني

وثاني شي مب انتي تقولين عني مينون ومب صاحي؟ منو بيخطب حرمة واحد مينون

صرخت مرة ثانية: انا مب حرمتك

حياب: عادي بتزوجج مرة ثانية

بتتزوجيني؟

قفزت من الخيل بقهر شديد.. كيف يكون بهذا البرود ويمازحها بهذه الطريقة بعد فعلته الشنيعة

وكأنها لعبة بين يديه.. وكأنه بريء من كل الأمر

والذي يزيد بقهرها.. أن قلبها التافه مصرٌّ أن ينبض له

ويشدّها إليه

صرخت بتوجع عندما شعرت بأن رجلها علقت في الركاب "موضع الركوب"

فز إليها يمسك بها من خصرها وينزلها ولكنها دفعته وسقطت على وجهها على الرمل: ااااه يالخايس كله منك

أمسك بها مرة اخرى: سلمتي يالعنود.. تعورتي؟

رمته بالرمل وضربته وهربت: ما يخصك

ابتعدت وهي تصرخ: لو تكون آخر ريال فهالدنيا ماتزوجتك مرة ثانية

ركضت بعيدًا تتحامل على وجع رجلها وهي تنفض ثيابها

ابتسم لرؤيتها، وهو يتنفس بعمق

مرت فترة طويلة منذ أن شعر بهذا الهواء النقي في صدره

لحق بها مباشرة.. يعشق المطاردات خصوصًا إن كانت معها

دخل المنزل بعد أن استأذن

وجدها تشتكي لجدتهم، التي ما أن شاهدته حتى رفعت عصاتها إليه تهدده

رفع حياب يديه باستسلام: السلام عليكم.. داخلين نبحث عن السلام

مشاكل وضرب ما نبا

قالت صغيرة بصوت باكي وهي مستلقية في حضن جدتها: قوليله يطلع برع ما ابغي اشوفه

الجدة: برع بسرعة.. ما نبا نشوف رقعة ويهك

اقترب حياب وهو يقبل راسها: افاااا صغور العودة بعد ما تباني

ضربته بالعصا: عنبو هالشيفة (الوجه) اللي لك.. اذلف

قال بتوجع: اححححح حشى.. ضاربتني من الخاطر

كررت الضربة مرتين وثلاث إلى أن أمسك بيدها يمنعها

حياب بحواجب معقودة: امايه شو فيج

قالت الجدة بغضب: هدها عنبو هالشيفة اللي لك يا حياب.. هدها لا بارك الله بشياطينك

حياب: الله لا يبارك فيهم بس شو يخصه ينبي كسرتيني حشى.. تبين تكسرين العصا علي ولا شو السالفة

الجدة: تاكل تبن مسود الويه.. ولك عين بعد تلحق بنتي.. اذلف ما بتشوف حتى زولها (هيئتها)

حياب: اعوووذ بالله شو بلاكم ركبكم ابليس.. تعوذوا

"كلم صغيرة" انتي تشوفينها تشيط ريلج بهالعصا ما كسرت خاطرج حشى.. شو هالقلب اللي لج؟

صغيرة: ليتها كسرتها.. طلبتج امايه لا تخلينها فخاطري

رفعت الجدة عصاتها تعيد ضربه ولكنه امسك بها ورمى العصاة بعيدًا

الجدة: والله انك اسود ويه ومضيع المذهب.. بس هاللي ناقص تسحب عصاتي وتفرها

حياب: امايه شو ياج؟ انا يوم صغير ما ضربتيني هالكثر

تراها تعور والله

عنبوه عصاه هالمتن! انسان انا مب تمساح

الجدة: لو اني كسرتها على ظهرك وأنت صغير چان ماسويت هالعلوم

حياب: لا إله إلا الله.. اذكري الله صغور

قالت تتجاهله: هالبنت في ذمتك.. كسرة قلبها في ذمتك

أنا الغلطانة.. دافعت عنك وغلّطتها.. بس طلعت ما تسوى ولا تستاهل

حياب: لا حول ولا قوة الا بالله.. صغور بنت مصبح صلي على النبي

الجدة: اذلف من جدامي اشوف

حياب: صلي على النبي اول

الجدة: اللهم صل وسلم عليه.. والحين اطلع مانبا تشوف شيفتك

حياب ابتسم: حاضر بطلع.. مقبولة منج ومسامحنج كسرتي ينبي (جنبي)

المشكلة انا قلبي يزعل على الدنيا كلها، الا ثنتين

صغيرة بنت مصبح وصغيرة بنت محمد

بس ماعليه طال الزمن ولا قصر.. بنتج هذي ما بياخذها غيري باذن الله

وصلي لها هالكلام

نهاية الجزء الثامـن والثلاثـون

.