رواية على صراط امي الفصل الخامس عشر 15 - بقلم Shaqraa

مساء المحبة

على صراط امي
الجزء الخامس عشر

شوفي وطن اول واهم درس عندي هي الخصوصية..
الشي البينا مايطلع ولا تسولفينه لاحد
اموت من لغوة النسوان وثرثرتهن..
اولا انة مو ثرثارة وثانيا طبعا مااحجي..
شنو اولا وثانيا جنج ما عاجبج!
لا بس اوضحلك الامور..
هاا..زين شلون ماتحجين كدام احد وردتي تخابرين
يم اختج؟
اي اختي نايمة وحتى لو كاعدة مراح تتصنت علينا ..
ماتتصنت بس ماتسد ذاناتها
كتلج الشي اليخصنا يبقى بينا...
اوكي..حجيتها وانة طالعه روحي منه..

اي عفية بيج مريتي ..والدرس الثاني والمهم ..ليش
تخجلين مني هلكد؟
يعني ماتعرفين المخطوبين يصير بينهم كلشي؟
اعرف بس مو بهالسرعة ..
مو غريب انة حتى بسرعة اهل احنا وانة من شفتج بعرس
طارق قبل سنتين ردتج ..

ومن عرس علاء شفتج انسطرت ودزيت ابوي حاجه
جدج..
بس كله بعدها ابوها ماينطيها وهي تدرس خل تخلص
ومرتين رجع حاجاه ابوي
كله هي الكم اعتبرها محجوزة ..
والشهر الفات دز ع ابوي وكله تكدرون تجون...
بس انت شتعرفين بلة شيصير بين المخطوبين..؟

من حجه هيج انصدمت يعني خاطبني قبل وجدو
رافضه؟
لعد ليش هسه قبل بي وشنو الخلاه يرفضه قبل؟
حتى لو رايد يزوجني حتى يخلص من ..اااه مااكدر الفظ اسمه..
سالت خالد بتوتر ..
يعني انت شعجب طلبتني من جدو مو امك اجت لبيتنا؟
بعد الاعرفه جدج اهم شي هو يرضى عن الرجال يلا
اهلكم يقتنعون
والحمدلله تسهلت بعدين الامور ومشت وصرتي
الي..

اي..
اي سولفيلي شتعرفين بلة؟
اوه خالد عفية شبيك..
لسانج ولج اوه شنو؟لا تعيديها بعد...
لسانج يرادله غسل وصخ..
تعرفين شون ينغسل؟
اي اتمضمض وينظف..مشكور للاطراء..حجيتها باستهزاء...

اوووف منج اوووف شلعتي كلبي شكد بلاد..
يعني شنو؟
يعني بعدج زيرو..
مافهمت!
يعني طلعتي ***** الزواج ماتعرفينه ..
مصيبة عليه هذا شلون هيج يحجي..سكتت ماكدرت اجاوب
بلة هسه هاي حجاية..
سالني بضحكة..شبيك سكتي هههه انخلستي من حجايتي
ترى متعود عليها بكلشي اكولها ...
بقيت ساكته ماجاوبته...

راح تخلصيها سكتة علينا؟
ها لا ..
اي زين سمعنا صوتج ههه..بلة احجيلي عنج خليني
اعرف اتعامل وياج
لان طبعج محير..
يعني كيفك شتريد تعرف؟
مثلا شنو اطباعج شنو تردين مني ..حتى نفهم بعضنا
ونوفر علينا سوء الفهم..
اريد احجي وسمعت طوط طوط رفعته من اذني
شفت حر يخابر

يبوو هسه شسوي ..
رجعت حجيت وي خالد وهو كلساع يدك
ثالث مرة دك ..كلت لخالد نعست كلش..
بس بعد وكت وطن هو شفهمت منج نصها سكته..
ها بس نعست..
كلش نعست..
شبيج تفلتين بالحجي هلكد نعسانة..
اي حيل ..
ديلا روحي نامي وارتاحي ومن تكعدين الصبح
خابريني اول كعدتج..
اي اوكي..

سديته منه برعب لان لاحظ ارتباكي وخفت يشك..
رجع حر دك وماجاوبت..
دز رسالة..مشغول وياه مو؟ولج ينطيج كلبج تحاجين
غيري وتغفين ع صوته؟
نزلت دموعي وذبيت الفون ع جهة..رجع خابر
سويت وضع الطيران حتى مايدك بعد..
بقيت بمكاني واجتلي نوبة بجي فرغت شوية من قهري
ونمت بمكاني بلا مااحس..

كعدت الفجر ع صوت امي تكعدني..
كتلها جنت اخابر وغفيت هنا ..ابتسمت وكالت ..
روحي لجربايتج اريحلج القنفة تكسر بالنوم..
كمت صليت ورحت للغرفة نمت..
كعدت بالعشرة تقريبا..كمت غسلت وتريكت
وساعدت امي بالبيت
الكل بالدوام بس انة وياها..

وانة بالمطبخ تذكرت خالد كلي خابريني
وانة مسويته طيران من البارحة شيخلصني منه هذا
اوووف ..
رحت دورت عليه طلع جوا المخدة ..لغيت وضع
الطيران ثواني ودك ..
فتحت خط واجاني صياحه..

انة شنو كتلج؟؟؟
وليش غالقته من امس لليوم؟؟؟
اكو وحدة مخطوبة تغلق جهازها مادري شلون ابرر
تصرفاتج مدري مهملة لو عندج مادري..
دحجي نطقي شبيج انخرستي؟؟؟؟
انقهرت كلش من تعامله اسلوبه مو حلو ومامتعودة
ع هالاسلوب ابد..
كتله بصوت منزعج ..جان مطفي مابي شحن...
وليش ماشاحنته وين جنتي؟
كعدت متاخرة من النوم والتهيت اساعد ماما،.
عود انة وصيتج بس تكعدين خابري..
اي بس نسيت ..
هه نست..يضحك باستهزاء...

ع العموم انة هالاسبوع مشغول ..الاسبوع الجاي
نروح نكمل تحاليل ونعقد محكمة ..
بس بابا كال م...قاطعني قبل لا اكمل..
هاي حياتنا مايمشيها لا بابا ولا ماما وطن فهمي عاد...
هنا طكت روحي ماكدرت اتحمله اكثر..
خالد لهنا وكافي ترى هم اهلي وبعدنا ماتزوجنا...
شنو لهنا وكافي جاي تحاجين اخوج الصغير؟
لو ساكته لو من تحجين اسلوب ماعندج ..
هو صوجي انطيتج مجال
روحي تعلمي احجي وخابريني عود...
وسدة بوجهي...

صدك تضايقت منه ومن تصرفاته هذا صارلنا
يومين مخطوبين وهيج يتصرف
اذا مر شهر شهرين اذا تزوجنا شيسوي
شنو هالورطة الحطيت نفسي بيها..
بقيت متمددة بغرفتي وابجي ..احس حطيت نفسي
بطريق مسدود وكله مني ...

شوية وانفتح الباب ودخلت امي ونظرات استغراب
بعيونها من شافت دموعي..
اجت كعدت يمي وتهز براسها وتسالني...
ليش تبجين ؟شبي خالد وياج؟
مسحت دموعي وكتلها شون عرفتي؟
تنهدت وكالت سمعتج تحاجي..
نزلت دموعي وهي جرتني لصدرها وحطت ايدها ورا ظهري..
احجيلي شبيكم ..ترى بالبداية صعبة
بعدين يلا تتعودين ..
بقيت اشهك واحجي..هسه دست ع قلبي وكلت اعود نفسي عليه
بس هو من اول يوم مدري شبي
هسه حتى لو طبعه هيج مو يصدمني بي من اول مرة...
شبي شنو؟

حجيتلها الصار بينا من امس من اجه وعن مكالمته..
كعدت عدل ومسحت دموعي وصارت كدامي..
ماما الظاهر طبعه هيج بس مو معناها مو زين
يمكن انت تتحسسين من كلشي يكوله
صح مايصير يلغي دور ابوج طول مانت يمه
عيب عليه يكلج لا تطلعين حتى وي ابوج
هالموضوع خلي يمي
بس انت هم شوي خففي وياه مايصير تعاقبي بشي
هو ماله ذنب بي ولا يعرفه...

بعد مو بيدي قابل امثل عليه؟
لا بس لا تكرهينه بيج من اولها مدامه رايدج وخوش ولد
واحنا وياج وبظهرج مانخلي يستقوي عليج
ابوج ليله ماينامه ويفكر بيج ..صيري سبعة وعرفي
شلون تكسبي...
انشالله يصير خير ماما...

ومر اليوم كله وهو ماخابر ولا سال واصلا كلت
بعد احسن..
بالليل خابر حر ومالكاه مشغول ..مرتين وبعد ماخابر..
وخالد ابد ولا خابر ولا راسل..
يوم ثاني صار مهر مرتجي بس مايقبلون اروح
يكولون موزين لان ماهرة جديد
خرافات وكلاوات مالها داعي ولازكين بيها
وضجت وانقهرت لان مايصير اروح..
بس هو حاجاني وكال معليج امشي ذني كلهن كلاوات
بس ماردت تصير مشكلة وضيجة خلك..
كتله ماروح اعوضها بالعرس
ماردته يضوج وتخرب فرحته ...

خابرني خالد ويحجي من ورا خشمه بالاول ويبسمر
ليش ماخابرتي كول مات عاش
بداخلي اكله ياريت ..بس جاوبته..
خليتك براحتك تهدأ لان ماريد تصير مشكلة..
ههه لا طلعتي عاقلة..
بس مشتاقلج هواي ماجنه يوم واحد عبالك سنة
وين انت؟

بالطارمة طلعت لان جوا جاي نتناقش ع المهر..
اي صدك امي كالت مايصير تروح مو زين عليها..
اي كلولي اهلي ماراح اروح..
اي ووين تبقين؟
بالبيت بعد ابقى..
وحدج؟
اي عادي ..
شنو عادي بنية ووحدج ببيت شكبره وشكده
وين الامان وانت تبقين وحدج..

هسه اخابر ابوج واجيبج لبيتنا..
لااا شعندي ..ا قصدي مايصير مااريد..
لا يصير ..
كالها وسد الخط بوجهي شبي هذا ماعنده اسلوب يا...
شوية ورجع خابرني ..
استأذنت من ابوج وكال عادي بعد احسن..
حضري روحج ورا الغدا اجي..
يلا اوكي..

ورا الغدا تحضروا الكل وراحو ومناك البقية
تطلع من بيت جدي
وانة مقهورة لان ماراح احضر خطوبة اخوي..
اجه عليه خالد وطلعنا ..بالطريق يسولف وعنده واهس
وانة فاصلة..

وصلنا واستقبلتنا امه ونسوان اخوانه ثنين
وحدة منهم حامل اسمها ضحى..
اصلا متزوجين العام مصارلهم هواي..
كعدو يمنا بالاستقبال وسوالف  والظاهر كلهم اجتماعيين حتى
جناتهم ..
شوية واشوفها بقت تعيط ولازمة بطنها وتبجي
بس الخوف الصار بيه ماينوصف
احي دمي يبس بعروكي
منظرها وهي تعيط والكل انخبص وزوجها مو هنا
اخذوها خالد وابوه وخالتي..

وبقيت يم جنتهم الثانية وهي تهدي بيه وتضحك
علي
تكلي جنج انت راح تجيبين مو هي وجهج اصفر
كعدي خل اجيبلج شي تشربي..
وراحت سوتلي شربت وجابتلي برتقال وكعدت يمي
هي وبتها صغيرة
صدك انهيطت وخفت بس بعد العصير ردت روحي
شوية..
بقيت يمها وسوالفها حلوة وماحسستني بضوجة
كالت امشي شوفي غرفتج
كتلها لا يجي خالد يلا اشوفها وهي تضحك تكلي
يالوتيه تنتظري مو..

ولحد المغرب خالد خابرني ويعتذر وضايج..
كال ماصدكت اجيتي انوب خربتها ضحى ..
يلا خطية بعد قابل بيدها..
اي خطية الله يسهلها ويوم الج ياجبانة
شفتي وجهج شلون صار هههه...
اي بعد هي الولادة مابيها شجاعة شي صعب هذا...
اوف اوف امبينة راح تشبعين نوح وبجي..
بعد هو اليتأذى شيسوي غير يبجي..
اي احلى انة اريده يبجي..نصه صوته كلش وحجه...
ها اروح اصلي اذن..
هههه روحي روحي ...

رحت وي جنتهم توضيت وانطتني احرام صليت
بس خلصت خابرني بابا..
كتله ع الصار كال جايلج..
خابرت خالد انطي خبر وضاج بس سكت..
ورا شوية اجاني بابا وسالني عن مرت اخو كتله بعدها
ماجابت خطية وراحو من مساع..
كال امشي لبيت جدج لان الكل هناك ..
رحت وهناك الكل موجود ومن ضمنهم بيت خالو سلام...

اول ماشفت سبأ سلمت عليها حضنتها حيل
هي هم حضنتني وبقت تطبطب ع ظهري..
علاء ماسلم عليه ولا صار كدامي..
كعدت يم سبا وبقينا نسولف وعاتبتها لان مااجت..
كالت علاء ماقبل لان حر كلش مقهور وتعارك هو وعلاء
لان يكله لا تجيب سيرتها هاي عرضي
وهي قسمة وماصارت..
وحر يكله عافتني وغدرت بيه ومتكامشين ثنينهم
ورايح شارب ومن عرف بي علاء
رايح وراه ومرجعه للبيت ومهدئه شوية..

بقيت ابجي واتلفت اخاف احد يشوفني
بس حجيتلها وضعي وي خالد ..سالتني ..
ليش قبلتي بسهولة وانت
تحبين حر ومن كشفج اخوج تمسكتي بي اكثر وماتركتي
ماجنت متوقعه بسهولة تعوفي..
بصراحة سبأ ..لخاطر بابا ..

جبرج؟؟
لا بالعكس هو اكثر شخص ماصار ضدي..
بس مااريده يتصادف وي ابو حر وينجبر يكعد وياه
بديوان بسببي ...
بس هذا ماضي؟
اي بس بابا ماناسي والدليل كلامه وي حر واهله
ماانسى شلون حاجاهم وكطع املهم لان هو ووياهم
مايتراهمون...

يعني مو لان عبالج حر ينتقم منج؟
نزلت دمعتي ومسحتها بسرعة..تكدرين تكولين هذا السبب شجعني
او يمكن خليت روحي اصدك هالسبب
حتى اتغلب ع مشاعري واسيطر عليها..
بس دمرتي نفسج ودمرتي حر..
اعرف اعرف بس سبأ احلفج باغلى ماعندج
حر صدك حبني؟
اي وانة اعرف هالشي من بدايته ..وطن حر يموت عليج
ولا عبالج من اخطبتي سكت ورضخ..
ترى هو ناوي يخرب خطوبتج ومايخلي زواجج يتم..

شيسوي يعني؟
مادري امس انة احجي وياه واكله انساها صارت بذمة غيرك
كال بس صبريلي وتجيج الاخبار
مااخليها تكمل وتتزوج لو يكلفني هالشي حياتي ..
صفنت وحجيت بيأس ..
الله يستر...

بعدها رجعنا للبيت ويسولفون بالمهر وفرحانين
كال مرتجى يمامة شوفي وطون الصور..
كعدنا انة ويمامة نباوع ..بس شمسوين بالعروس
مكياجها دسم وكلش مو حلو
ولابسة بدلة خضرا حشيشي ومالايكلها
شكله قهرني كلش يعني ليش هيج تخلي نفسها محط انتقاد
كال مرتجى ها عيونج تزرزر ؟
باوعتله ومطيت شفايفي..تريد الصراحة ..
لا بدلة ولا مكياج لايكات ترى...

ضحك كال بس انت صريحة ههه ..امج واختج يكولن
مرتبة حلوة من عيبت عليها..
لا هي واحد مو يعيب عليها خطية بس يكلها الشي اذا
حلو او مو حلو..
اي كتلها بدلتج ومكياجج مخربطات يرادلج دورة مال
ترتيب..
خطية هي لان ماتختلط ماتعرف كلش للموديلات
اذا تريد حاجيها خاف تعتبره تدخل
انت كلها اذا تريد احنا نطلع وياها تجهز ونوديها لصالون
مضبوط
هي بالحواجب غير الصدك جانت جنها خطر ههه
بس من حفت لا بس مخربها المكياج..
هههههههه خرب يومج مو اكلج صريحة...

ومرت ٣ اسابيع على خطوبتي وكملنا التحاليل
وقررنا باجر نعقد محكمة ..
رغم خالد اسلوبه وتشدده زاد واهلي عدهم علم
بالموضوع
بس بابا كال لا تتسرعين وعندج وقت هواي
والخطوبة طويلة وراح تعرفينه عدل
واذا عرفتي طبعه الشك بكلشي تركي
وماما مأيدتني اكثر منه ..
لان تصرفات خالد خلال هالمدة القصيرة
بينتلهم شخصيته
يعني يريد حجايته فوك الكل حتى مايحسب حساب
لا امي ولا ابوي ولا حتى اخواني...

عدا هالشي يفتش بفوني تفتيش من اجه مرتين النا
بس هالمرتين كلت لامي لا تتركوني وحدي يمه..
وتبقى امي لو ابوي يمنا لو عابد
ماينفرد بيه ابد...

العصر واحنا كاعدين سوا مثل يومية
اجه خالد ..
دخله مختار بالاستقبال واجه كال وكامو اهلي يستقبلو
وانة حضرت الضيافة واخذتها..
من دخلت طكني خزرة يبستني رغم وجود اهلي..
كعدت شوية وكلهم من رخصتكم
عندي موضوع وي وطن مدة نص ساعة واروح..
بابا ضاج وكام وماما كذلك
لان جان اسلوبه كلش مو حلو...

بس كامو طلعو هو كام مد راسه وراهم و
رجعلي لزمني من راسي حيل الحجاب اجه بيده..
حجه بعيون تتجادج نار..
تلعبين من ورااااي مو؟؟؟؟؟؟

للحكاية بقية
بقلم شقراء(قمر كانون)