رواية على صراط امي الفصل السادس والعشرون 26 - بقلم Shaqraa

مساء الورد

على صراط امي
الجزء الرابع والعشرون

صفنت بوجه شهد وحجيت..بربج بعد ماتحمل كولي شرايد
اذا خربها هسه
اطلع نفسي جوا سيارة وارتاح..
انجبي وكومي اصلا امبين جاي يباركلج..
باوعتلها صفح وحجيت بقهر..
قصدج جاي يخرب فرحتي ..

طلعت من غرفتي واحس الخطوة ثكيلة ومابية امشي
خايفة كلش
انة واثقة ببابا ومراح يثني احد من قرر
بس الخايفة منه الحظ
اذا عاكس وياي شلون..
دخلت والكل كاعدين..باوعلي بابا حجي بضوجة
واشرلي بيدي تعاي..
تقربت منه واتفحص الوجوه يمكن هنا دمي نشف بعروكي
كعدت ونظراتي كلها استفسار..

حط ايده ع كتفي وكال..شلونها العروسة فرحانة؟
بقيت اباوع بوجه بابا
احس نظراته بيها ابتسامة..
ارتاحيت وتطمنت..جاوبت جدو..
الحمدلله بابا..
هو حط ايده بالارض وكام..
مدام العروس فرحانة انة بعد اترخص..

كمنا ويا كلنا وبابا كله بعد وكت وابقى ..
هو جاوبه بس يحجي بقهر..
لا المهم تطمنت عليها
مانطاني كلبي تمهر وانة ماشايفها
رفع راسه وفرك سبحته بيديه..
شوفي بوية احجيها كدام الحاضرين..
انت معزتج بمعزة امج
وغير عن كل بزر ولدي وحتى عن اخوانج
وماهان علي تمهرين وتفرحين وانة مجافيج..

انة راح اكعد بمهرج بس لخاطرج وحتى احطلج مهر يسوا
بس صدكي ماراضي
وكلبي ماراضي ع هالقسمة
بس بعد شنكول زمان اول تحول..
يلا اودعناكم..
راد يطلع وحضنته وبست ايده
وهو هم باسني بس احسه كوة متحمل ع اعصابه..

من طلع ماما انقهرت وبابا هم بس ماحسسوني
وكالو لان بالبداية
بعدين يتقبل ويتفهم الامور..
والحمدلله انزاح الهم وكعدت احسب الساعات لباجر
وحتى حر ماكدرت احاجيه
ماخلوني البنات ونيموني من وكت حتى ارتاح لباجر..

اليوم الخميس..الساعة ال٤ العصر..كاعدة بالصالة مالتنا
والبيت مملي بالمعازيم
فستاني الزيتوني الرشيق ..والاختاريته مستور حيل
فقط الردانات شفافة..
اخذتني ماما للغرفة وكعدت
وانتظر الشيخ يردد كلمات العقد
ماما فوك راسي تقرا المعوذات
بس هي وياي بالغرفة..
بعد ماكمل العقد وانختم اسمي باسمي حبيبي..
صرت وطن لحر وصار الحر لوطن..

وي الهلاهل نزلت دموعي ودموع ماما ..
حضنتني حيل حيل حيل
اول مرة بحياتها هيجي تحضني
احسها تريد تضمني بقلبها
وكامت وبصوت عالي حيل هلهلت..
وانة الفرحة البية مااوصفها ابدا
خفت اموت من الفرحة
يعني كمية السعادة البيه خفت تقتلني..
حتى ماعرف اتصرف..

اخذتني ماما وحاضنتتي وياها وبس انفتح الباب علت
الهلاهل
والكل بدا يركص ويصفك ..
اهل حر كاعدين اغلبهم بس امه وخالته واكفين
ويصفكون
وانة رتبو كعدتي البنات وكعدوني عيوني مغوشة
انوب زاد اكثر
حاجيت يمامة تجيبلي النظارة لان كلش ماكدر..
جابتها واجت تركض..
هاج ام اربع عيون راح يدخل رجلج خل اروح انستر..
وراحت وانة ايدي ترجف
اريد اثبت النظارة ماكو..

سمعت الهوسات ارتفعت واجو بنات عمي يعدلون
بيه ..وج دخل دخل حر..
ابتسمت برجفة وغمضت عيوني..
سمعت صوته اليأسرني بهدوئه..
وهو يسلم على امي ويحاجيها..
رفعت عيوني عليه..
كمية الاناقة والنزاكة شي خرافي..ياابيض
يااشقر هذا اليوصلك حبيبي..

كعد يمي وتنهد ..اووووف هسه ارتاحيت..
انداريت عليه بسرعه ورجعت
عدل كعدته وصار شبه صفح حتى يكدر يباوعلي
وحجه بهمس..
دوري عليه دلوعتي خليني اتمعن بيج عدل
واذا مادرتي هسه اخذج وانهزم بيج..
باوعتله من جوا عيوني..حتى لو تخطف عادي حلالك..
ضرب كصته خفيف ..اخ بوية تعال الحك
انوب حجاية حلالك خبلتني ازيد..

قاطعتنا امه وهي تحاجي..عيوني حر عوف السوالف
بالاول لبسها النيشان..
ابتسملها واخذ الذهب منها ولبسني
توترت من قربه الزايد
بس جاهدت حتى مايبين عليه وماريد اخرب فرحتي..
بعدها طلع والبنات ماقصرو بالركص..

وانة احس راسي وعيوني خدرانات من الوجع
رادو يكوموني اركص
بس كتلهم ماكدرت اخاف اطيح..ماما تباوعلي
لونها انخطف
بس حاولت ابينلها يعني من التعب ومابيه شي
بس هي احتارت وبقت تلوب..

اهل حر راحو وهو رجع سلم عليه وباسني
براسي وراح ..
بس طلعو ساعدوني البنات بدلت وجايولي عشا
بس اكلت قليل ورحت صليت
كل ركعة وسجدة احس راسي يثكل اكثر
بالكوة يلا خلصت صلاتي..

والاقارب كلهم راحو بقت بس يمامة عدنا
تمددت بفراشي وماما تدلكلي راسي
بس كل ماتضغط الوجع يكثر..
اجه بابا وبابا حجي وشكلهم خايف من شافوني هيجي
كال بابا..
امشي نروح للمستشفى بلكي ينطوج مسكن اي شي..
لا بابا شدعوة هو الم الشقيقة هذا..
بابا حجي قافل ويفرك بسبحته وماحجه شي
انة كتلهم ترى خوفتوني
حسستوني راح اموت هسه!
فزو وبقو يسمون بسم الله ويكلولي خبلة اكو عروس
هيجي تحجي..

بس مادرت اخوفهم عليه سويت الموضوع بسيط
وشقى
رغم صدك الم راسي ماتحمله بعد وعيوني مثل اليباوع
من ورا جامة وسخة
هيج الرؤية عندي..
دك فوني وجابته الي يمامةكالت حر يخابر..
بابا حجي كام طلع
وبابا هم والولد كامو وكال بابا ..
الصبح نروح للدكتور
هسه نامي ولا تطولين بالسهر زين بابا..
انشالله بابا حبيبي..

بعدها طلعو وبقيت بس انة بالغرفة
لزمت الفون اريد اخابر
كوة اشوف عمياوي اباوع بس كدرت ادك عليه..
جاوبني ويمه هوسه..
لحظة بس اطلع ..
ياهلااا ومية هلا كيف الحال..
امم الحمدلله ههه..
شوف الخجل يابة اخ اخ هههه ..شبي صوتج نعسانة؟
اي كلش مسطورة هم..
الم راسي زاد عليه وعيوني:.
مو كتلج راجعي من جديد الم راسج مو شقيقة اعراضه
الشقيقة ماتعمي العيون فجأة
صح تاثر عن النظر بس مو بهالطريقة...

اي بابا كال باجر نروح للدكتور مدام جمعة الصبح يكعدون..
باجر انة اجي واروح ويا نوديج..
يا شسالفة ..
وج شبيج جنج شاربة روحي تمددي وغمضي حتى لو
مانعسانة حتى ترتاحين
وانة هسه اخابر ابوج واتفق وياه ع باجر..
اوكي براحتك..
دربالج على نفسج وسوي مثل ماكتلج لا تسهرين..
اوكي حياتي باي...

سديته منه وغمضت عيوني وحاولت اوقف عقلي عن
التفكير..
صدك شوية وغفيت وماحسيت باي شي من التعب ووجع الراس
كعدتني امي تندهني..
وج وطن الساعة ثمانية وثلث يمته تكومين..
امم ماما عفية حيلي مهدود مابيه اكوم خليني غير يوم اروح..
ها زين يعني نكل لحر ارجع ؟
كعدت ع حيلي ..حر وين شلون يمته..
هههه ياشيطانة دكومي الولد برا ينتظر وانت نايمة..
اي اي يلا كمت ..
ابتسمتلي وطلعت..

كمت ركض اخذتلي ملابس والخاولي وطفرت للحمام
سبحت ومشطت بالحمام وبدلت
وجهزت نفسي ..
طلعت اتلفت سمعت صوت الولد وبابا..
وصلت يم الاستقبال مديت راسي..كاعد بابا وعابد
ومرتجى ..
دخلت مدنكة وسلمت..
ماباوعتله استحي من اخواني..
كعدت يمهم كال بابا..ها اذا جاهزة حتى نروح
يحتاجون فحوصات وتحاليل..
اي بابا جاهزة..حجيت بصوت ناصي...

كمنا كلنا وبابا طلع وحر وراه..
التفتلي عابد..
منين هالفقيرة مايطلع صوتها..تخليني اشهرج يم خطيبج هسه
اكله تضربني جلاليق من تخسر...
ضحكت واشرتله اوش ولك فضيحة انت..
دمشي يلا لا نحصل رزالة من ابوج..
ليش تجي ويانا..
اي خاف يردون يضربوج ابرة كل واحد يلزمله طرف..
هههه عابت..

طلعنا انة وعابد ..صعدنا وي بابا وحر كدامنا بالسيارة..
باوعلي بابا وكال..
روحي صعدي وي خطيبج عيب تخلي وحده..
انة سكتت مستحية ..
عابد كال..دروحي صعدي بالكمارو الخبصتينا بيها خبص
روحي هسه ودج تركضين بس عود ثكيلة...
بابا غص من الضحك ورزله..
لا تصير قليل ادب واحترم اختك لك..
نزل فتحلي الباب وكال تفضلي انسة ونعتذر..
نزلت وطكيتها ضحكة عليه ورحت لحر الواكف ينتظر...

هو تفاجأ وابتسم من شافني..نزل بسرعة قبل لا افتح الباب
صار يمي وباوعلي بنظرات حلوة..
فتحلي الباب وكال تفضلي حرم حر المصون..
ابتسمت وكعدت بالسيارة كدام وهو سد الباب..
سيارة بابا طلعت كدامنا
وحر صعد ومشى وراهم..

شنو هالخجل هذا ام لسان ..
ضحكت ودنكت لان متوترة وخايفة..
ابوج كلج روحي مو ؟
اي طبعا استحي اجي لوحدي..
مد ايده لزم ايدي فزيت ردت اوخرها ما خلاني ..
عصرها حيل انقبضت روحي
تذكرت خالد نفس الحركة سواها بالبداية..

درت وجهي عليه تلاكت نظراتنا ..بعدت نظراتي عن
عيونه وحجيت..
عفية حر اترك ايدي احسن..
ليش كلنا خجل بس مو هيج..
مو خجل اتضايق احسك تضغط عليها
اتركها كافي ..حجيت بنبرة انزعاج..
ترك ايدي وخله ايده ع الستيرن..
حسيته ضاج بس مابين..

شلونه راسج هسه ؟
احسن من البارحة بس بعده الالم..
يلا انشالله مابيج غير العافية انة هذا الدكتور اعرفه مضبوط
يصير عم صاحبي ابو مرته..
اي حتى بابا كال جراح شاطر..

وصلنا وفتنا جوا..عابد يباوعلي ولازمته ضحكة مو بيده
سفيه..
كعدنا بالانتظار وانة ارتجيت ع الكرسي..
بابا بقى واكف واباوعله وجهه اصفر
سودة عليه شكد متعبته ..
همس حر يم اذني..باوعي الناس شلون صافنين علينا..
يا ليش شبينا احنا قابل..
هسه دباوعي وشوفي..
وجهت نظراتي ع الناس صدك ..خصوصا هذا رجال
يعني وسطة عمر
يباوع بانزعاج ويتفحصنا ثنينا ضحكني..
حاجيته بصوت ناصي..
الظاهر ملو من الانتظار بقى يلتهون بينا ههه...

وصاحو اسمي وكمت..اجه بابا بسرعة الي كال يلا بابا
ودخلو وياي هو وحر ..
سلم عليه وهم يعرفون بعض باركله بالخطوبة وباركلي
ورحب ببابا..
وبعدها فحص راسي وعيوني ..بقى يضغط ع الجوانب
طلب مني انزع الحجاب
وتمازح وي حر وبابا كلهم ها تقبلون لو افحص وانة
مغمض ..
بابا كله لا حياء في العلم وحر كله حجي اي حركة اكتب
بيك تقرير يم دكتورة  فائزة يقصد مرته..

وفتحت الحجاب بقى يتلمس راسي كال المكان الاضغطه
ويوجعج كولي لا تستحين
وكل مايوجعج اكثر بيني حتى اعرف ..
صدك بدا يضغط واصرخ من الوجع ..
اخر شي ضغط بيده مو قوي بس انة انسطرت
وفقدت الوعي..

فتحت عيوني ممديني وريحة دوا اشم ..
ثلاثتهم فوك راسي
من شافوني فتحت بابا بقى يردد الحمدلله وحر
وجهه مايتفسر
كعدني الدكتور وكال..
شبيكم خايفين غير بطلة هي
كتلها صرخي من يوجعج المكان حتى اغماء صار عدها
خوش تستجيب ترى مطيعة..
حجاها وباوع لحر وحر ابتسم ابتسامة باهتة..
حسيته عرف شنو بيه..

كعدوني ع الكرسي وعدلي حجابي..
كال الدكتور..
تقريبا حالتها واضحة بس لازم اتاكد بالمفراس
جاوبه بابا ..اي شنو حالتها دكتور الله يخليك
مو سوينا مفراس احنا وكالو مابيها شي..
يعني موجوة النتيجة عدكم بعدها؟
اي بعدها طبعا تحتاجها نجيبها هسه مو مشكلة..
الافضل تجيبها هسه ..

رجع عابد للبيت يجيبها واحنا كال انتظرو على
ماامشي المراجعين..
كعدنا برا وحر مابقى يمنا كال هسه اجي..
بابا بصفي ساكت ماينطق بس تنفسه عالي
وكانه كوة يحر النفس..

ورا شوية اجه عابد وجاب الاشعة والتحاليل والاوراق
كلهم القديمات
حر جان برا ودخل كال..ابقي هنا احنا
نشوف شيكول الدكتور انت تعبانة..
عرفت مايريد اعرف شنو بيه..
كمت وكفت كتله..
حتى لو بيه مرض مميت اول وتالي راع اعرف
لان انة الراح اموت..
بابا كال اسم الله شبيج تفاولين امشي تعاي
ودخلنا..

اطلع الدكتور ع الاوراق وبقى يقرا والاشعة
نزع النظارة حطها ع الميز..
باوعلنا..
استاذ عيسى..حر ابني..وطن بنتي
انتو مثقفين الحمدلله وواعين اتمنى تفهمون الي اكوله..
بنتي خطيبج فهم حالتج ..
وماعرف ليش خايف لان تحتاجين عملية وترجعين
احسن من قبل..
سال بابا بخوف..دكتور شنو حالتها هسه وليش العملية؟
عدها ورم براسها
جان كلش صغير بس للاسف انتو متاخرين ماجان
كبر هالكد
الورم يضغط ع العصب ومسبب الها خلل الرؤية
لازم نستأصله وترجع تمام
وحتى نظرها يرجع اوكي..

من سمعت كلام الدكتور خوف ورعشة تملكت اطرافي
ماريد اموت هسه
لا لا ماريد اندفن وحدي وظلمة القبر تخوف
شلون شلون اتحمل ..
بابا لزم ايدي حيل وباوعلي..
لا تخافين بابا شوفيها سهلة يكول..

كال الدكتور تردون نبلش بالاجراءات حتى نسوي العملية..
جاوبه بابا اكيد دكتور من هسه
بس فهمني شسوي..
كتب الدكتور بورقة تحاليل وكال لبابا بالاول نسوي هاي
التحاليل
كمنا وترخص بابا اباوع لحر كاعد وايديه ع راسه
طول الكعدة مانطق ..
حاجاه بابا..كوم ابني كول ياالله..
ماجاوب بقى مدنك ولا رفع راسه..
كال الدكتور..
خلي يمي اريده شويه..

اخذني من ايدي بابا وطلعنا عابد يباوعلي بخوف ..
رحنا لمختبر سوينا
كم تحليل
ولازم باجر نرجع
كملنا وبابا كال خل نرجع للبيت
لان حر خابرني كال عندي شغل اخلصه وامرلكم للبيت..

رجعنا للبيت ب٢ لكينا الكل منتظر ووجههم مالي الخوف
بسامي ماموجودة..
مرت مرتجى كالت روحي لعمتي ترى بس تبجي وماقبلت
حتى تطلع من الغرفة
رضا يبجي كتلته وذبته عليه كالت اخذي هذا الفكر راح
يكسح اخته..
راح بابا ركض للغرفة وانة كعدت بمكاني من الخوف
معقولة صدك راح اموت..

اندك الباب وراح حسين فتحه وحر وراه..
سلم عليهم وكعد وانة كومتني مرت مرتجى وياها..
دخلنا للمطبخ شبكتني وكالت لتخافين كلهم يكولون سهلة
وباستني بكصتي وكالت كعدي ارتاحي..

بقيت امسح بدموعي كتلها اخاف اموت ومامتزوجة حر..
اسم الله فال الله ولا فالج..
عفية ماريد انحرم من هالشي شلون..حجيتها وانة
اكل باظافري وابجي..
دخل مرتجى واجه يمي من شافني ابجي..
كومي بعد اخوج سالفتج سهلة كومي ..
وحط ايده ورا ظهري واخذني للصالة
دخلت وبابا وماما طلعو من الغرفة...
اجتلي ماما وبوستني بس عيونها مورمة وخشمها احمر
بابا كال حضرو الغدا جعنا
ويحجي مثل اليريد يخفف الضغط ويلطف الجو...

تغدينا وكعدنا نشرب جاي كلنا..
حر كال..عمي انة حاجيت الدكتور واذا كملنا التحاليل
وطلعت تمام
تكون العملية مو هذا السبت الوراه ..
احسن من التاجيل حتى نخلص ونرتاح كلنا..
اي انشالله بابا هو الدكتور كال بسيطة وبسرعة
تخلص..

باوعت لبابا وحجيت..بابا عندي طلب منك انت وحر..
باوعلي باستفهام وثنينهم كالو..طبعا تامرين..
ابتسمت وحجيت..بابا اريد اتزوج والبس بدلة
عرس واركص
قبل لا اسوي العملية..
شنو انتو متفقين من ورانا ولكم ههه..حجاها بابا بضحكة..
كال حر..لا عمي بس هذا الحل الانسب
اريد ابقى وياها بهيج وضع مو مال بعيد عنها..
زين وين تلحكون وعدكم بس هالاسبوع؟
لا عمي نلحك كلشي يلحك..
براحتكم يابة سوو اليريحكم..

قررت اتزوج قبل العملية حتى لو متت انة محققة
هالامنية
وحر اصلا جان مفاتح باباا قبلي بالسالفة..
بس البيت مالتنا بعده ماكامل تجهيز
كال حر نكعد وي اهله فترة شهرين لحد مايخلص..
بدينا انة ويا نختار وانة ماكدر اطلع لان كمت كلش
اتعب
لهذا يصورلي ويجيب الصور واختار الشي اليعجبني..

اهلي بحالة استنفار واحسهم يباوعولي مثل القنبلة
الموقوتة
يمكن يتصورلهم باي لحظة اموت...
طبعا حر كل يومية يجي ونكعد سوا هواي ومحد يمنا
بس ماحاول يلمسني غير مرة وحذة..
جنت كاعدة ويا بالاستقبال وهو نفس القنفة وياي
جاي يشوفني كاونتر للمطبخ
وانة اباوع بالفون وجاي اكل تفاح ..حسيت انفاسه
قريبة من وجهي..

طاح الفون من ايدي ودرت عليه ..باوعلي بنظرات مخجلة
وهو يتفحص شفافي
خليت ايدي ع صدره ودفعته..
حر عفيه وخر لا تسوي هيج..
وخر ايدي من صدره ولزمها..وطن ترى تحملت
المحد يتحمله
يعني مرتي لحد الان ماضايك شفتها..
يحجي ويقرب شفته ع شفتي ..من لمسها دفعته حيل وكمت..
ماريد ماريد ..

بنفس اللحظة كام اخذ فونه وطلع ..
بقيت كاعدة بالاستقبال وابجي ..حقه يسوي هيج
اصلا زين وصابر عليه
سبأ ويمامة وكلهم يكولون بالخطوبة تصير هواي تقارب
ورومانسيات
وانة منشفتها عليه..بس ابد مو بيدي ماكدر..
ومن هالمرة ماعادها ابد...

تحدد عرسنا الخميس وانة عمليتي السبت..
وكلشي صار بسرعة ومختصر بالتحضيرات..
اليوم الزفة وانة اول وحدة تطلع زفتي من بيتنا
كل البنات والاولاد
زفتهم تطلع من بيت بابا حجي..
بس انة ماقبلت بابا يسويها هناك..
من سمعت بابا حجي يكول _هذا العبد وجهه نحس عليها
واذا صار بيها شي احركه هو واهله_
حزت بيه كلش حجايته وحتى بيوم عرسي مااجه ودعني
وماما انقهرت منه
كلتله لا تعرضلها مو زين ..

وانة جاي اركص وي البنات وفرحانة حيل
رغم التعب والوجع
بس ماريد استسلم واريد اشبع من الفرحة اليوم
سمعنا الهورنات وكالو اجت الزفة...
كعدوني ولبست البرنص وترتبت..
اجه بابا يمي وحط ايده ورا ظهري
ودخل حر وابوه وعمه
وراهم الشباب وهوسات وركص..

سلمني بابا لحر وووصاه وطلعت وويانا بابا
بالباب وانة طبعا ماشوف لان مغطى وجهي..
سمعت صوت بابا حجي..
حر حط ايده ورا ظهري حسيته بهاللحظة خاف
ياخذني منه بابا حجي..
بس هو نزع عبايته وحطها ع ظهري ..
وكال لحر..
انطيتك شذرة لو سمعت بيوم صادعها اصدك
كلبك وكلب اهلك بيك...

جاوبه حر بصوت هادئ..بالحفظ والصون حجي ..
وودعني وحظني حيل..
وانة حظنت بابا وبقيت ابجي
اكثر شي صعب عليه فراقه ..بس حر كلي كل يوميه اجيبج
وهالشي طمني..
ومشينا للسيارة..
كعدوني ويمامة عدلت بدلتي ..
وهو اندار صعد..
اول ماصعد بقى يدك هورن للكدامه..
وانة سويتلي شباك حتى اباوع...

اندار عليه مبتسم..طبعا من شفت جدج كلت راح يخمط
مرتي
زين بس رزلني ماسوا شي...
ههه انة خفت تدري كلت الله يستر من جيته..
لا اجه غطاج وراح صاحب واجب
جيبي عبايته نسويله بيها سحر حتى يفك ياخه منا..
ههههههههه اي اي عفيه...

وبقينا نسولف وانة توتري مو كلش قوي
لان اتفقت وي حر مايقربلي
وهو تفهم وكال مثل ماتردين..
يمكن شوي ارتاحيت..

وصلنا للبيت مالتهم وكعدت شوية ويمي اهلي وقريباتي
وبس كمل العشا كالو تحضرو راح نروح للفندق..
ساعدوني البنات وتحظرت..
امي حظنتني وبقينا نبجي انة وياها
يمامة كلتلها تعاي يومية النا وشبعي منها
خاف تروحين لبيت فخري وتفلكج عديلة..
ضحكتنا وشوية تغير المزاج..

بعدها دخل حر وورا كومة شباب وركص
وعلاء يركص بعرسي المايستحي
طلعنا للفندق ورانا كومة سيارات واصوات الهورنات
احس متونسة كلش
همزين طلعتها من نفسي اخاف اموت وماشفت
هيج اجواء..

وصلنا للفندق وبس احنا واصدقائه شوية سووله
ركصة وراحو..
وصلنا للغرفة مالتنا وفتنا..
هو قفل الباب وانة كعدت ع الجرباية..
استغربت حتى الم راسي راح
هيج تسوي الفرحة ههه ..
ذبيت الطرحة وهو كال انة داخل للحمام ابدل
انت خلصي براحتج..
زين افنحلي الخيط الورا ماانوشه..
اي صار..

فتحه وراح دخل للحمام..وانة طلعت السيت الابيض من
الجنطة..
بلشت انزع البدلة وخليتها بالارض
لبست السيت واريد امشي دخت..
شلت البدلة اريد اعلكها..
تشوشت الرؤية وبعد ماحسيت...

للحكاية بقية
بقلم شقراء(قمر كانون)

طبعا كلش اسفة للخلل الصار..الحساب صارت بي محاولة
تهكير
وساعدتني صديقتي وزوجها مشكورة منج جمانة حبيبي كلش
هواي ومشكور زوجج اخوي ماقصر...

اما بالنسبة للي ماقدر الظرف فما متوقفة عليه..
الحمدلله الاغلبيه عذروني لان نشرت بالانستا وكتلكم الحساب ما
ينفتح
واكو الي عذرني
واكو اي كال نلغي المتابعة ومنقرا بعد..بصراحة مو طبعي
ادقق بهيج تعليقات لان يكولون الاصدقاء يبينون عند المحك
يعني الي يمل بهالسرعة هذا مو متابع محب انما يريد الزلة
فبراحته اليريد يلغي يعني مو شي ضروري
اليحبوني واليقدروني هوايه...

يعني شفت متابعة جديدة مصارلها هواي شكد عاذرتني وشفت متابعات قديمات بقو يتمللون..
انتو تعرفون عندي حالة وفاة بس كملت القصة ماتوقفت
يعني التقصير مو مني من الحساب..
وماعرف سبب الابلاغات عني شنو الداعي
ولو عادي يروح هالحساب اسوي عشرة غيرة بسيطة...

واقدم جزيل الشكر لفروحة كل يوم تسال عني بفترة انقطاعي
ورغم انشغالي ومجاوبتها بس رجعت راسلتني

farah-f

وهالمتابعة رغم جديدة تعليقها انطاني طاقة بالاضافة الى تعليقات
حبيباتي البقية الي عذروني وراسلوني افتقدوني
مشكورة منكم كلكم..