رواية على صراط امي الفصل السابع عشر 17 - بقلم Shaqraa

مساء الخير

على صراط امي
الجزء السابع عشر

بقى يدك هواي يلا جاوبت ..الو؟
الو كيف الحال..
زينين ..
ههه بعدج زعلانة يا حبيبتي ..
لا مازعلانة بس انت لاغي دوري..
لا ماعاش اليلغيج بس يا وطونة هاي امي وماكدر
اكسر بخاطرها
وانت تحملي هن ساعتين ثلاثة ونرجع لبيتنا يعني روحتج
لخاطري بس
اعرف شادة وياج وشايف اسلوبها بس هي امي يعني
اكلها لا تشدين وي مرتي
ساعتها تسويني صاير وياج ضدها واكيد ماتقبليها عليه انت..
اي طبعا ..

هسه شكلتي؟
لا متحضرين نجي حتى ماما سوت جرك كالت اخذي
وياج عيب ايدج فارغة ترحين..
عاشت ايدها الله يحفظها..
يلا شوي واجي انة..
انتظرك..
بس؟بس انتظرك حاف..بلا حبيبي بلا حياتي
لا مو حاف بالجبنة على كولة اللمبي...
ههههههه اخ منج مو مرة بلوة..يلا سلميلي..
هههه الله يسلمك...

سديت الخط وماما تباوعلي بنص عين..
باوعتلها بضوجة ..ها ؟
وجعا ولج ماعاجبج..
ههه لا عاجبني عيني خصوصا من تتفقين انت ونسيبج عليه
اللهم ياكافي من اجتماعكم..
اكوم احضر جنطتي هسه يجي ويخبصني..بس عينكم
ع ميار لا يسفون هو ورضا لمكان..
جاوبوني ثنينهم بضحكة..روحي لايبقى بالج..

رحت جمعت اغراضي وفتت سبحت ع السريع
شعري شسورته وانة امس كاصته وصابغته
وومكيجت ولبست تراك ابيض وبي علامة Nike حمرة
ورحت للصالة يم بابا
لكيت ميار بحضنه نايم..
كعدت يمه وحجيت بصوت ناصي..ها نام الزلزلة..
التفتلي مبتسم ويحجي همس..اي خطية بابا لا تفزين
بوكاحته لا يتمرض..
ههه شكله اخذ معزتي عندك..
ماسامعة اعز من الولد ولد الولد بس محد ياخذ معزتج..
نمت ع كتفه وبسته من خده..واجت امي جابت جرك وجاي

واحنا ناكل اندك الباب وحط بابا ميار ع القنفة وراح
فتحه ودخله للصاله..
كمت بس ماباوعتله مقهورة منه..هو سلم وجاوبنه بصوت
ناصي
ودنك باس ميار وكعد يمه ..بقى بابا يسولف ويا وانة
كمت جبت عصير وماي واجيت
اول ماكعدت صارت عيني بعينه ابتسم وغمز..
عضيتله شفه وابتسمت..
هو حركلي نظراته بمعنى متحلف وصارت بوجه بابا
بس ضرب كصته بسرعة
وبابا بقى يضحك كال ..كومو ولو لبيتكم وتهامزو هناك
كاعدين كدامي وتتغامزون..

وبقو يضحكون علينا وانة رحت جبت الجنطة وهو وداها
للسيارة ورجع شال ميار
وسلمنا عليهم وطلعنا..اخذت ميار نيمته بحضني وصعدنا
التفت عليه وابتسم ابتسامة مخفية وانة درت وجهي..
مشى وسكتنا شوية وتحمحم وكال..
لون شعرج يخبببل .
امم شكرا..
ضحك بهدوء..ههه يعجبني الثكيل..

وصلنا لبيت اهله ونزلنا وكعد ميار يتنعوص بس
شاف ابوه ضحك وذب روحه عليه
واخذه ودخلنا جوا ..تلكتنا مرت اخوه ورحبت بينا
وامه سلمت عليه من بعيد بلا ماتقرب
انة هم سلمت عليها عادي وماهتميت للصار
هي مو حقودة اصلا اعرفها
بس تندفع بسرعه والدليل بالبداية ماحانت هيج
وحتى هسه مرات تصير زينة

واجت اخذت ميار من حضن ابوه وبوسته وع الصوت طلع
ابوه
اول ماشافني ابتسملي ورحتله بسته براسه وسلمت عليه
وكعدنا شوية
بقينا للمغرب يمهم ووي الاذان كال خل نرجع
وانة ماصدك بسرعة كمت وامه لابستني
وحتى ماكالت ابقو للعشا
بس ابوه ومرت اخو لزمو بينا بس ماقبل كللهم
غير مرة..

وبطريقنا للبيت تذكرت نسيت انطيهم الجرك باوعت
للعلاكة وابتسمت..
اندار هو وهم مبتسم ووواحد سأال الثاني
شبيك..؟شبيج..؟
انة شفت الجرك وتذكرت ماانطيته الهم هسه
عبالك متعمدة ههه..
لا ادري بيج مو خبيثة ..حجاها وغمزلي..
امم وانت ع شنو تضحك؟
ذيج المرة صارت ورانا من وكفنا بالتقاطع
نظراتها مال صدمة
بقت تباوعلي وتمد راسها عليج ..

انوب تباوع لميار وترجع تباوع بوجهي زين
ماانجلطت ههه
مستغربة تكول سامطها بسحر ومخليها تقبل بي
ماكو شگرا عاقلة تاخذ مصنهر
لا وتخلف منه اسمر كناكره صفر مثل هذا
حجه وكرص خد ميار وباسه..

حاجيته بثكل..وانت شدعوة هيج مركز وياها ؟
هههههه اكلها حطت وجهها بوجهي وباوعت
يلا نزلي لا يرتفع ضغطج
ترى بكد بيبيتج المرة ..
واخذ ميار ونزل طلع مفتاح البيت وانة نزلت
وادردم..

فتح الباب ودنزل ميار الي اول مادخلنا راح يركض
لغرفته والباب مسدود
فتحه اله حر ودخله بغرفته وانة رحت توضيت
وانة جاي البس الاحرام اريد اصلي سمعت صوته
قريب للغرفة
ركضت بسرعة وبلشت صلاة قبل لا يحاجيني
وهو يباوعلي ويهز بيده
وحاصرته ضحكة

وانة عود اريد اكمل صلاة ومامهتمتله وجاي اركع
اجه باتجاهي بصراحة خفت
بس طلعت انة مصلية بصف السجادة مو عليها
هو جرها حطها كدامي وراح
بعد ماحطيت بالي ويا طلع وكملت صلاتي وطلعت
ادور ع ميار
لكيت حر يصلي يمه بالغرفة وهو يباوع كارتون ..

عفتهم ورحت اسوي عشا سويت شوربة جاهزة
وفاتحة الفريز اريد اطلع شي اسوي..
تقرب وصار بظهري فزيت من طخني وكلش مشتاقتله
حركت روحي اريد اوخر وهو يتحرك وي حركتي
درت وجهي عليه بزعل..وخر عاد لا يجي الطفل
ويشوفنا مايصير..
حجه وباوع لشفايفي ..مايجي ملتهي يلعب ..
وحط راسه بركبتي وفرك شفايفه حيل بيها وانة هالحركة
تنهي قوتي كلها..

شهكت وذبيت نفسي بحضنه ودارني كعدني ع الفريز
واخذ شفتي بكل شوق ولهفة
بس سمعنا صوت ميار يصيح دفعته واندفع بسرعة ..
كافي بعدين لا نغفل عن ميار وكيح عفية..حجيتها وانة
اتنفس بسرعة..
بقى يباوعلي بكل مكان بيه وكال بقلة صبر..
يلا بسرعة خلصي حتى يتعشى وينام وانة رايح يمه
صبيله شنو عندج حتى يتعشى قبلنا..
هزيتله راسي مبتسمة ورجعت لشغلي ..

شوية وصبيتله شوربة وقليت بركر وسويتله
لفة ووديته لحر وميار
اخذه وبقى يوكله وانة رجعت كملت العشا
وحضرت الاكل وصحت ع حر
اجه وجاب صينية ميار كال شبع وغسلتله وفرشت اسنانه
ووديته لفراشه ..

خليني اكل ميت جوع مامتغدي ..
اممم ليش..حجيتها وانة مدنكة اخوط الجاي..
مالي شهية انت مو وياي ولج شكد خبلة وشالعة كلبي
بس ماكدر بدونج وبدون هذا ابو كناكر ..

رفعتله عيوني بابتسامة ونزلتها اكمل اكل وهو ياكل
بشهية وامبين جوعان صدك
وهو طبيعته من ياكل مايحجي ومنا جوعان فصل عن
العالم كلش
وانة خلصت كمت نظفت الكاونتر وهو خلص وبقى
ينقل الصحون
اخر شي جابلي كوب الجاي وكال عاشت ايدج حبيبتي
بس استعجلي وانة اروح اشوف ميار..

كملت المطبخ ورحت للغرفة بسرعة اخذت ثوب نوم
ابيض وفتت للحمام سبحت وبدلت وخليت لوشن
ولفيت نفسي بالروب ورجعت للغرفة هو ماكو الظاهر ميار
اخذه رهينة يمه
رتبت شعري وتعدلت وخليت شريط مثل البوند هو يعجبه
من البسه ..
رحت طليت من باب للغرفة لكيته متمدد يم ميار
بسريره ومطفين الضوة
ويسولف وياه ويلعب بشعره
سالفة ميار مطولة لان نام مساع وانة مااخلي ينام العصر
لان يسهر بليل
يلا خلي يمه احسن وانة اجي اكمل كتابة...

رجعت للغرفة وطلعت السجل وقلبت الاوراق
مااتذكر وين وصلت
يلا همزين طابكة الورقة..اي هاي لكيتها ..
اممم وصلت لحد ما خالد العلة هدد يفضحني وبابا احتار
وماحجه كدام اخواني لان خاف من المشاكل...

****************************

كال بابا راح اتركه فتره لان هو جاي يعاند وصح حقه
بس مو معناها يهدد وينسى القرابة البينا
وحتى بابا حجي زعل وماقبل بالصار ودز ع خالد وحاجاه
بس خالد كله اريدها ومااطلكها..

وانة نفذت كلام بابا وكلت خليها بيده وهو يعرف شيسوي..
وخالد كل يوم يخابرني يعارك ويغلط ويسده
وبقى كل يوم يسوي علاقة وتوصلي الاخبار وشهد
تنصحني ولج خطيه ورجعيله
وجاي يثبت لنفسه هو كفو والبنات تريده وتحبه ومن هالكلام
بس وضحتلها السبب واقتنعت ..

اما حر ابدا ما خابر ولا ابد اله خبر بس مرات سبأ
تخابرني وبمحور الحديث اسمع عنه زين وعايش ...
ورجعت علاقتنا ببيت خالو سلام احسن وكثرت جياتهم..

بيومها يمامة رجعت من الدوام من وكت ومرتبكة
اول مادخلت جنت بالصالة يمهم كاعدة
من سلمت وودخلت اشرتلي بعيونها ورحت وراها ..
ها ولج شبيج وجهج مخطوف؟
غطت وجهها بيدها وكالت..لا تنصبين عليه
اليوم فقار راح يجي يخطبني..
تقربت منها ووخرت ايديها من وجهها بابتسامة..

اللهم صل على محمد وال محمد
ياخانسين واخيرا هههه ..
لا تخجليني بس تعرفين بيه مترددة بسبب الماضي..
طز بالماضي يروحلج فدوات مو فدوة وحدة..
سدي السيرة وطن مايستاهل اذكره اصلا..
ايي فديت اختي هسه صرتي مثلنا طبيعية ..
ههه لج قبل خبلة شنو؟هههه...

طبعا يمامة عانت هواي قبل وانصدمت ببداية حياتها..
اول ماداومت جامعة تعرفت على معيد عدهم بالقسم
وحبته كلش تعلقت بي وطبعا ماما تعرف
وهو الولد حالته مو شي وراد يخطبها بس متردد بسبب
وضعه المادي..
وهي ماضغطت عليه وبقو علاقة فترة طويلة
الى ان خطبها رسمي وعقدو بس عقد سيخ

لحد ماتتخرج ويتزوجون وهو يكدرون يلتقون براحتهم
وهو جان طاير بيها هو واهله
بس بعدين بدا يبعد عنها وكال يريد يكمل دراسته بالخارج
وهي حبت الفكرة وشجعته كلش
وبدا يحضر لطلعته على بداية السنة الجديدة
وبالفعل طلع وبقى متواصل وياها
وهناك اشتغل وكلها نتزوج عن قريب ..

بس فجأة انكطعت اخباره ومايخابرها ولا يراسلها ع الايميل
ومن تسال اهله يكلولها حتى احنا
بالفترة انجنت ماعرفت شتتصرف وشتسال
بقى تقريبا شهر ع هالوضع ..ورا الشهر عرفت من صديقتها
وياها بالكلية..
خطيبها متزوج هناك وحتى اهله يدرون بس ماكالو
ومايريد يرجع يستقر هناك بعد
وعن طريق مرته ياخذ الجنسية الي اصلا متعرف عليها
هناك وعنده علاقة وياها

من عرفت يمامة انهارت وتخابره مايجاوبها وغير ارقامه
ودخلت يمامة بمرحلة كآبة
او اكدر اسمي جنون..عانت هواااي وتعذبت وصارت
كلش شرسة وي الكل
بالبيت بابا وماما احتارو شلون يرجعوها مثل قبل
سفر وطلعات وحتى اطباء
بس هي صارت حالة نفسية عدها حتى من كلمة زواج
اذا واحد جابها كدامها تعيط...

ومرت فترة طويلة يلا شوية استعادت نفسها
بس بقى عدها هاجس الماضي
الي كالت بدا يتلاشى عدها من شافت فقار وحبته
والي شجعها تخطي هالخطوة
وتثق الحب موجود والرياجيل مو كلهم سوا
هو حر..اصرار حر وارادته رغم كل الظروف
خله يمامة تتشجع بمشاعرها تجاه فقار ..

واليوم اجو بالليل بيت خالو وحجو بموضوع يمامة
وبابا عنده علم من العصر
ويعرف بيمامة موافقة..
صار الحجي والاتفاق بينهم وطبعا من بعد ما
محاجين بابا حجي
بس حالف مايطب بيتنا وزعلان رغم يرحون ماما
وبابا ويشوفوه
بس هو بسبب موضوعي زعلان..
وتقررت خطوبة يمامة بعد عشر ايام لحد ما يكملون
تجهيزات الخطوبة...

بلشنا نطلع انة وماما وهي ونجهز يومية
صارلنا ثلث ايام نطلع العصر ..
اليوم وانة بالسوك خابر خالد..
ها ولج وين انت؟؟؟
شتريد خالد ؟من حجيتها التفتت امي ويمامة باستغراب..
احجي عدل لا اجي افرك حلكج
شلون تطلعين بلا ماتكليلي ترى بعدج بذمتي والشي التسوي
يوصلي
واذا نزلتي راسي بحجاية لو تصرف اجي اشك
حلكج وحلك الخلفج...

رجاءا لتغلط ع اهلي وهسه انة بالسوك عيب امشي
واخابر
اي خوش تمشي بالسوك وتخابر فالحة دولي يلااا...
وسدة بوجهي كالعادة..سالتني امي كتلها نفس الشي وسكتت..
وبقينا نمشي بس انة قفلت وضجت كلش
يعني لا راضي يعتقني ويطلكني ولا اسلوبه وتعامله بي
خير
اعرف نفسي غلطانة بس شي سابق ومو بيدي
ولو هو هذا طبعه من قبل لا يعرف بالماضي...

دخلنا بمحل البدلات ورجع خابر ماجاوبت
دك ثلث مرات اخر شي ماما كالت جاوبي
رديت حجه بهدوء!!
معقولة غلست ثلث مرات وماخابر يغلط ويعيط
كال..وينج هسه؟؟
بالسوك ليش؟
اي وين بالضبط؟؟
ها مادري ليش يعني..انة احجي وامي ويمامة
عيونهن طلعت عليه وياشرن شنو..

انطيني اسم المحل انة بالسوك هسه..
شنو!
بسرعة يلا احجي ..
انطيته اسم المحل وسده..
كالت ماما جاي مو؟
اي يكول جايلج..
تنهدت بانزعاج وكالت يلا نشوف بلة..

وشوية واجه فات للمحل وسلم ع الولد واجه يمنا
باوعلي بنظرات تخوف
خزرة ع توعد ماعرف نظراته تحمل هواي معاني
وهو عيونه كبار وسود تصير نظرتهن حادة..
سلم ع امي ويمامة وانة ماسلم عليه..
كل لامي ..
من رخصتج اريد احاجي وطن..

بس تعرف ابوها رافض هالشي وانت كتله وماقبل..
ام حسين مالكم حق ترفضون
ترى شرعا مرتي هي وماراح اكلها هي حجايتين نتفاهم
وبعدها ارجعها ..
اخابر ابوها واترخص منه بالاول..
لا تخابري لان يرفض وانة اريد احط حد للمشكلة
لازم نكعد ونتفاهم
هو يحجي وانة اباوع لماما بتوسل كون ماتقبل..

رجع كال ..
راح اخذها هنا ع الكورنيش مو بعيد حجايتين ونرجع..
اوكي بس لا تتاخرون ..حجت ماما وانة بهتت ونشف الدم
بعروكي ..
كالت روحي ماما تفاهمو وحلو مشكلتكم احسن
واشرتلي بعيونها..

هو لزم ايدي وااخذني بس سحلني سحل كوة امشي
طلعنا من المحل كال دنكي
وصلنا للسيارة بس صعدت قفل الابواب
التفتتله بخوف وين رايحين؟؟
حجه باستهزاء..هه مانطول بسرعة نرجع..
خالد عفية وين؟؟
انت مو تردين تطلكين؟؟
اي..
اي ماخذج اخذ حقي حتى اطلكج وانة شافي غليلي

رجعني خالد لا تندم..
هههه ضحكتيني ليش اندم؟؟
صدك جيبي ..مد ايده جر جنطتي وشمرها ورا ..ورجع حجه..
اعرف سوالفج لا تخابرين سوبر مان ويجينا..
بقيت ارجف واكل باظافري شسوي هذا شناويلي
رجعت حاجيته زمخ بيه حيل..

الى ان وصلنا لبيت وكف السيارة ونزل فتح الباب
حاولت انزل بس قفلها عليه..
رحع صعد ودخلها للكراج ونزل يسد الباب
وانة نزلت ركض بس مالحكته لان سده..
لزمني من ذراي قوي وجرني ..
اريد اشفي جرووحي بيج يا...

للحكاية بقية
بقلم شقراء(قمر كانون)

طبعا اسفة مانشرت امس بس فوني عطل وصلحته..

انتو نبهتوني عليها ولا ادري😂😂كاتبة شسوار

عميلة خائنة تحب خالد جنت حاسة بيج من الاول

قلبج محروك ههههه

هنا الاخت يمكن ايرون مان لان تبجي زنجار🤭