رواية على صراط امي الفصل السابع والعشرون 27 - بقلم Shaqraa

مساء الخير

على صراط امي
الجزء الخامس والعشرون

ماعرف المدة الفاتت شكد وانة فاقدة الوعي..
بس من فتحت جان نظري مشوش
وتفكيري مشوش اكثر..
بقيت اعصر عيوني حيل وارمش
بس اريد اركز ماكو..
حطيت ايدي ع عيوني وفتحتهم بقيت اباوع
لايدي
الظلام الصار بسبب ايدي شوية خلاني اركز
ومن بعدها وضحت وكدرت اباوع
صح مو عدل بس اسمي اكدر اشوف...

باوعت للغرفة فارغة وانة بيدي مغذي
اسمع صوت برا
شبسرعة جايوني للمستشفى معقولة الطريق
كله وماكعدت!..
ورا شوية دخلت امي وتمشي بهدوء عبالها بعدني
ماكاعدة
اباوعلها كاتمة بجيتها بكلينسة ع حلكها وعيونها تصب..
من شافتني فتحت عيونها حيل
واجتلي بسرعة..

ها يمه ها وطن شلونج شتحسين كولي..
لا زينة ماما بس شوية دوخة
شبيه ليش جبتوني هنا..
مابيج شي بس تعبتي اليوم وماتحملتي..تحجي وكوة
تنطق من عبرتها...
زين بابا وينه وحر ؟
موجودين برا كلهم برا حتى اخوانج ..
سودة عليه بعدج مامبدلة واجيتي اكيد حر خرعكم
متفاجأ عباله اول مرة اطيح..

اباوعلها دموعها ماتوكف ..شسالفة ماما كافي
تبجين ترى انة زينة
شوفيني كدامج هسه بس يشوفني الدكتور يطلعني
علواه تصيحيهم ايدي وجعتني
من الابرة ليش قبلتي يضربوني مو تدرين اتعور...

بلا ماتحجي شي غطت وجهها بايديها وطلعت
تشهك..
بقيت صافنة عليها ..يااا ماما وين رحتي؟؟؟
ثواني ودخل بابا ..
وين راحت ماما وليش هيجي تبجي؟
شبيكم وجوهكم مصفرة ومصدومين؟
بابا شييه انة عفية راح اموت مو؟؟؟
حجيتها وبقيت ابجي..

تقرب واخذني لحضنه ويهدئ بيه..
يومي كبل يومج يابعد كل ناسي واهلي
كلشي مابيج جنج ورد
بس تعبتي مالازم تجهدين نفسج..
وقرر الدكتور تبقين لباجر وتسوين العملية ..
بس عمليتي مو باجر؟شنو قدمها؟
رجعت ظهري ع السرير وحجيت..

مسح بابا وجهه وكعد ..لا بابا انت من البارحة نايمة
اليوم جمعة هسه بستة ونص الصبح...
شنو؟يعني من البارحة هنا انة زين ليش
ليش هلكد طولت ماكعدت؟
لا كعدتي بس تعبانة وتهلوسين وحتى احنا
ماعرفتينا
انطوج مسكن ونمتي..
كال الدكتور ماتطلع بعد خليها لباجر افضل
هم جسمج يرتاح وهم ينظمون
تغذيتج وموعد الامساك قبل العملية..

اوف زين حر وينه ليش ماموجود؟
لا برا كاعد خطية منتظر كتله ارجع ارتاح لان
البارحة تعب بس هوسة العرس كافي
بس ماقبل يروح برا كاعد..
لعد ليش مايدخل اشوفه بابا..
تنهد وفرك وجهه..بابا الولد منهار خلي براحته هو
يدخل
لا تحرجي كدامنا وهو كلش متأثر...

جاي يحاجيني بابا وفات حسين..
ها وطونة الحمدلله ع سلامة شلونج هسه..
الحمدلله احسن شنو وين ماما ؟
باوع لبابا كال..ماما رجعها مرتجى للبيت لان رضا
يبجي مايقبل يسكت وراحت ..
بابا يحتاجوك برا الدكتور ..حاجه بابا هيجي وبابا باوعله وطلع
ماعرف شنو بينهم مافهمت النظرات...

طلع بابا وبقى حسين يمي..وشوية ودخل حر..
بس شافه حسين كام
ويم الباب كله دربالك عليها واحنا هنا برا ..
فرحت من شفت حر دخل بس مدنك ومايباوع بوجهي..
تقدم يمي ورفع راسه وفرك وجهه..
نزل راسه واجت عيني بعينه ورجف قلبي..
ابتسملي بوجع واضح..
شلونها عروستي؟
قلبت شفايفي بزعل..مو زينة حبيبي مقهورة كلش...
تقرب وكعد كدامي ع السرير وصار مقابيلي ..

ليش شنو القاهرج..طبعا من يحجي احس حروفه تطلع كوة
احسه كاتم قهره وحزنه بس مايكدر لان واضح..
ضايجة علينا يعني المفروض اليوم احنا سوا وبالبيت
مو اول يوم النا بالمستشفى...
اوه بسيطة هانت ..جسر حسرة وكال..
باجر كلشي يخلص وترتاحين ونرجع لبيتنا ونشبع
واحد من الثاني...

واذا مارجعت عدلة ..يمكن اموت؟
قرب وجهه من وجهي..وفتح عيونها حيل وشفت الدمعة
تلمع بيها ..
لا تكوليين هيج..راح تعيشين وراح نرجع لبيتنا ونعيش
احلى حياة فاهمة؟؟؟؟
هزيت راسي وانة اباوع لعيونه..ومديت ايدي مشيتها
من بداية كصته لعيونه ..تعمدت هالشي حتى ميبين بجه كدامي
لان اعرفه مايريدني اضعف ..
وصلت ايدي لحد شفافه..
باس اصابعي وهن على شفافه ويباوع بعيوني..
ضربت شفته خفيف باصابعي وبعدته..

لا تصير استغلالي كاعد تبوس مو عيب ماتحترم بنات الناس..
هز راسه وهو يضحك..
اخ منج مسوية علي حصار وتقشف وفوكها تحسابيني ..
تدرين خالتي عبالها نمتي مستشفى بسببي..
ياا ليش انت شنو علاقتك؟فتحت عيوني وسالت باستغراب...
جاوب وهو يلعب بنظراته الي..
عبالها مرتكب بيج جريمة ..تدري بيه ماارحم..
عزااا ..رفعت راسي وصحت بابا حسين لحكوو..
قبل لا اكمل سد حلكي بيده...
شهرتينا خرررب ماشايف هيج بشر انة ...
انوب لزمته ضحكة ويباوعلي ويضحك اخر شي
نزلت دموعه وهو يضحك..

مسح وجهه بيديه ورفع راسه بقى يباوع بالسقف
بعدين باوعلي وكال..
احبج وطن احب كلشي بيج...
ابتسمتله وملت رقبتي..انة اعشقك...

ومر هذا اليوم وحسيته اطول يوم بحياتي
كل شوية واحد جاي يشوفني
اهل حر واهلي كل شوية واحد جاي ورغم كم مرة يمنعوهم
بس ينطون فلوس ويدخلون
الكل اجه الا بابا حجي..شكد انقهرت هو ماكو..
وماما لحد المغرب يلا اجتلي
بس واضح عليها تعبانة ..
وجهها كله مورم وعيونها صاير بياضهم كله احمر
حسيتها منهارة
وحر مثلها واخواني اكثر واكثر عدا عابد وبابا
يمكن هم الوحيدين الانطوني امل..
من شفت الكل منهار خفت..

صار يوم ثاني وحضروني للعملية ..قبل لا
ينقلوني جان الكل يمي بالغرفة..
نزعتني يمامة ذهبي كله
والحلقة ماقبلت انزعها..كال بابا ..نزعيها بعد ابوج
لان بصالة العمليات
اذا شافوها بيدج ينزعوها الج ويذبوها ساعتها ماتلكيها حرامات..
اجه حر هو نزعني وكال..
بس تطلعين من العملية البسج وابتسملي بحزن..

باوعتلهم كلهم ونزلت دموعي...انة راح ادخل بس اذا ماطلعت
امانة عليكم تعرفوني اخاف وجبانة
من اموت حطو بقبري ضوا ولا تطفو
اموت من الظلمة واخاف وحدي
باتو يمي بس اول ايام بس ..بعدني مامكملة ماما طلعت ولحكها حسين ..
فدوة عفية لا تعوفوني من اموت اخااف
حر وبابا بنفس اللحظة حضنوني
والبقية التفو عليهم وبس الشهكات اسمعها...

ماكدرت اباوع بوجه احد ..ماريد اشوف احد يبجي ...
بعدها دخلوني للعمليات
ودقايق وخلولي البنج ..استسلمت وسلمت امري لربي..
اخر كلمة رددتها..انة طامعة بكرمك ربي..

ماعرف شكدوقت  مر وشنو صار..
بس كعدت فتحت عيوني بصعوبة بالاول..اسمع اصوات حجي
يمي..
بس شوية شوية توضحت الصورة..
كامت يمامة وهي مبتسمة حيل جانت تخابر  وسدت
الفون  وتصلي على محمد وال محمد...
باوعتلي ومسحت كصتي..حسيت بوجع اووي..
وطونة سلامات خطاج السوء...
حجيت بونة وعصرت وجهي من الوجع..
الله يسلمج..وينهم اريدهم حجيت بصورة متقطعة..
هسه يجون هسه بس مايصير نتكوم يمج ممنوع..
رفعتلي ايدي..باوعي حر لبسج حلقتج بس طلعوج...
ابتسمت واشتاقيت بس اريد اشوفه...

خابرتهم يمامه..ثواني وبابا دخل..وطلعت هي
ممنوع بس واحد يبقى..
سودة علية شصاير بي وجهه ذبلان ..باسني بيدي
وهو يحمد الله ويشكره..
بابا وين ماما..
هسه تجي بنيتي بس مايصير ندخل سوا
هي وحر ينتظرون
بس ماكدرت الا ادخل قبلهم واگر عيني بشوفتج..
بعد عمري انت
ياربي مايحرمني منك...
يلا هسه اطلع ويجوج زين بعد ابوج؟
ايي..

احجي كوة احس الم راسي يصل يعني شعور
مايتوصف
احس راسي رطب وبارد شعور مزعج وموجع وينرفز...
طلع بابا ودخلت ماما..
بس عبالك كبرت عشر سنوات بهاليوم
ماما تجنن بطولها جنها خيزران..رشيقة وطويلة
وبييضا شقرا ووجها يضوي
بس من دخلت انقهرت عليها اكثر من وجعي..
وجهها مورم وازرق رموشها يابسة من البجي
وماتكدر توكف عدل
كوة ساندة نفسها..
بس من شافتني ابتسمتلها رغم وجعي ماهان عليه قهرها..

ماماتي تعاي شوفي بتج رجعت زينة ..
تقربت كعدت يم السرير بالارض ولزمت ايدي
بقت تبوس بيها وهي مدنكة
مارفعت راسها ابد
واحس ايدي تبللت..
بس ماحسسستها ..حاجيتها بنبرة زينة ومابينت وجعي..
ماما حبيبتي خو ماصوروني وانة اهلوس بالبنج..
مسحت وجهها وعيونها
رفعتلي راسها مبتسمة..
منو الكدر يذكر شي من دخلتي غير ذكر الله والدعاء
والتوسل والشفاعة من اهل البيت عليهم السلام..
صدك فديتكم اكول طلعت زينة ..
ليش شعدنا اغلى منج انت وبس يابعد كل اهلي...

كامت وهي تمسح بوجهها..انة راح اطلع رجلج ينتظر
خطية صارله شكد..
ابتسمتلها وحركت نظراتي بمعنى اوكي..
طلعت هي ورا شوي ودخل حر..
نسيت حتى الالم وانة اشوفه..
تقربلي بابتسامة ممزوجة بوجع..
بطلة مرتي بطلة رجعت واقوى من قبل..
امم خفت مارجع
حتى لو مارجعت ماخليك تتزوج غيري اسكن احلامك..
اي بشرفج تعاي بالحلم وارجعج حامل
حجاها وغمز..
ضحكت وتوجعت...

وبعدها مر وقت شوية وانطوني علاج ورجعت نمت
ومر ثلث ايام يلا طلعت من المستشفى..
فترة حساسة ومرهقة جداً
وجع والتزام بعلاج
الكل متناوب بالاهتمام بيه..
اهل حر كل يوم يجون وحتى الاحظ اهلي وياهم
نسو كلشي وصرت انة الاهم
من كل الخلافات..
اباوع لماما من اجو وهي كاعدة وتسولف ورضا بحضنها
فعلا تاكدت ماما نست الماضي..
لو انة مكانها ماكدر اكعد ويا نفس المكان
وابني بحضني يلعب وانة مندمجة ويا والاعبه..

ريحني هالشي لان حسيت مااذيت بابا
ولو هو عمو فخري اكيد يتاذى
بس مو دائما يلتقون واكيد مو مثل بابا...

طبعا طول المدة جانو يتجنبون اباوع لمراية
يكولون مو زين ع نظرج لهذا لازكيهن كلهم بجلاد..
وانة جنت مصدكة هالشي..
بس بعدين من شالو الضماد
وشفت شعري شلون مكصوص انقهرت حيل
محلقين مكان العملية..
بقيت ابجي بقهر حسيت شكلي خرب
واكول لحر اتركني صرت مو حلوة
وهو يخفف عني يكلي احسن حتى يرجع
اقوى من قبل ومايتساقط..

ورا شهرين تقريبا تحسنت وحتى نفسيتي صارت احسن بهواي
وبيومها اخذوني للدكتور
فحصت الحمدلله
العملية نجحت وماكو اثار جانبية
وبس رجعنا للبيت..
تقريبا المغرب ..اجه حر وجايب وياه كيكة على شكل حرفي
وومرتبه بالزينة بشكل حلو
وشموع واشياء هواي وياها..
استغربت شنو المناسبة..

بعدها من طلع وياي من الغرفة وكال سويتلج حفلة
بسيطة حتى تغير نفسيتج
وانطاني بوكس مغلف..فتحته بي ورد وسوار نفس
الجابه الي الاول على شكل سبحة
بس هالمرة ذهب وياهم دبدوب كبير..

واهلي اباوعلهم فرحانين وسوو سفرة اكل هواي..
سالت ماما..
هوايه هذا الاكل المن ماما؟
هسه يجون بيت جدج اليوم سوينا عزيمة مال سلامتج..
لعد مااجت يمامة من مساع حتى يسور يتونس
بنفاخات مو بس رضيو يبط بيها..
هههه هو منو يكدر عليه رضيو مجمع وكاحتكم كلكم...

وفعلا ورا شوية بدو يجون اهلنا..وبابا حجي لحد هسه
مااجه..
بس من وصلو بيت خالو سلام واحنا كاعدين برا بالطارمة..
دخل بابا حجي وساندة علاء وفقار من الجهتين؟
بس شفتهم كمت اله ركض..
هو يرجف وبس شافني فلت من ايدهم راد يطيح
وسندو وانة وياهم واحاجي..
شبيك بابا سلامتك...

كعد ع الكرسي ويرجف ..رفع ايده ع كيف وجرني لحضنة
وبقى ينحب..
يابعد جدج وطوايفه كلهم يابعد روحي انة وكل ولدي فدوة
الج نروح..
ويبجي ويهتز من البجي..
وخرت من صدره ومسحت دموعه..
اسم الله عليك شبيك ليش تعبان ..صح زعلانة منك مااجيت
شفتني
بس ضامتها بقلبي حتى ماعاتبت كلت براحته..

طلع جفيته ومسح وجهه ..انة كتلهم لا تكلولها مابيها حيل
هبطات..
يمه شبيك يعني انت مريض..
اي بعد جدج من يوم عمليتج وانة طكتني جلطة
وخذوني لايران
وسوولي عملية وهالرجعت شوي اشوة من كبل...
لطمت خدي بقهر..
جر ايدي وباسها..لا تطكين خدج بعد عمري
ماكدرت اتحمل يصير بيج شي يابويه..
واليوم من كالو طلع الزرع والنتيجة
نظيفةومابيج شي
يلا اجيت وشفتج..
لو بالتحاليل طالع عدج شي اروح اكله دكتور
شك راسي واخذ التريده
المهم ترجع راس بنيتي سالم...

يازرع بابا...اباوعلهم ذولا شي تبجي شي صافنة شي
تتلفت..
وحر مرتجي ع الشجرة وصافن بقلق..
جاوبني بابا حجي ..
بوية الورمة البراسج خذوها وزرعوها حتى يتاكدون
وطلعت زينة مو خبيثة
والحمدلله بعد ماترجع ولا تعن بيج..
ادري محد حجالج بس انة بشرتج يابعد ابوج..
شبكته حيل وبقيت ابوس بي..
واخذته وياي الولد ساعدوني
دخلناه جوا كعد..

حر كال انة راح اروح ..شكد بابا لح عليه بس هو ماقبل
اعرفه يتحسس ويستحي..
علاء كله جاي وياك خل نطلع نغير جو..
وطلعو هو وعلاء..واحنا بقينا لحد ماتعشينا ونسولف
وانة افكر شكد ربي لطف بيه
من طلعت الورم حميد الف الحمدلله..
هسه عرفت ليش حر جان طول الوقت خايف ومحتار
حتى بعد العملية
جان يفكر بالنتيجة
وحال امي التغير والكل متخوف لهذا السبب...
بس الحمدلله مر الوقت وتحسنت اكثر..

اليوم اجه حر وجمعت كل اغراضي حتى ارجع
للبيت..
الولد وحر اخذو الاغراض للسيارة وانة شابكة بابا
وماما
اخر شي اجه عابد شالني من خصري..روحي لرجلج
فكينا
نريد نعرس نريد نرتاح كاعدة على كلوبنا وماخذه عقل عيسى وسهير...
ونزلني بالكاع وانة اضحك..
اممم عشتو امبين حاط عينك وغمزتله..
حاط عيني وخشمي وحتى ذيلي بس انطينا مجال حتى نخطب..
لا صدك يمتى؟
هههه هالفترة انشالله مدام تحسنتي وهم اريدج واسطة
جاي تشوفين ابوي شلون جاي يخزر
ترى مستحي منك حر صدكني
لو انت ماموجود جان ذبلي قنبلة من هاي التعجبك..

ضحك حر وتسالم وياه كله تستاهل كل خير وانة حاضر
بكل شي تحتاجه..
وتوادعنه وياهم وطلعنا...

طول الطريق لازم ايدي..تقبلت هالشي وحبيت لمساته
شلت ايده وبستها..
بقى يسوق حيل..التفتت عليه بتحذير..
اذا تزيد سرعة مابوس ها..
ههه اريد اوصل بسرعة...
لاحكين حبيبي..

وصلنا للبيت واهله استقبلوني استقبال حلو
ومحضرين عشا مرتب
بقيت وياهم تعشينا وساعدت امه
وبعدها ترخصنا ورحنا لغرفتنا..
لكيتها تجنن نظيفة وريحتها معطر والاجواء مرتبة
اول مافتت ذبيت الحجاب ورحت للكنتور..
طلعت برمودا مخططة رصاصي وابيض وبدي رصاصي..
التفتت حر جاي يخلي فونه ع الشحن وينزع بساعته..

لزمت ملابسي بيدي وكتله..
حبيبي اريد ابدل ممكن تطلع..
رفع حاجب وفتح الدكم..وين اطلع؟اكو وحدة ماتبدل كدام زوجها؟
بعدني ماتعودت..
فتح كل دكم القميص وذبه ع السرير بقى
بالفانيلة الجوا..
وتقرب صار كدامي..حجه بتركيز على كل حرف ينطقه..
وطن رحميني لو حجر هم ماتحمل هلكد...
بقيت ابلع ريك وادفع بي..
عفية حر شوية ..
لزم وجهي بايديه..صارت عيوني بعيونه ..باس شفتي وغمض
اريد ادفعه ماتركني
جر شفتي اكثر وطول بالبوسة وانة ادفع ..
ابتعد...

رجع شعره بيده بحركة عصبية وانزعاج..
ليش هلكد خايفة؟؟؟؟؟
كعدت ع السرير وذبيت الملابس من ايدي..
ماريد هالشي يصير بسرعة يعني شوية شوية...
حجه بصيغة استفهام وعصبية..
بنظرج صار بسرعة؟؟؟
لعلمج البوسة بالخطوبة اذا ماصارت بالعلاقة طبعا..

دنكت راسي وحجيت..
والورا البوسة ..
اي وليش خايفة من الورا البوسة؟؟شبي حلو وممتع..
من اريد اشرحلج تتهربين وتكولين كلشي اعرف
ومن اريد اطبق تكولين مو هسه..
اي لان هسه نفسيتي ماتتقبله اريد بالتدريج..
اكلج انت مجربته حتى ماتتقبلي؟
حطيت ايدي ع عيوني وبجيت..
اي ..تقريباً
جربته...

للحكاية بقية
بقلم شقراء(قمر كانون)