رواية على صراط امي الفصل الثامن والعشرون 28 - بقلم Shaqraa

مساء الورد

على صراط امي
الجزء السادس والعشرون

باوعلي باستغراب..شنو المجربته؟؟
غطيت وجهي بايدي وبقيت ابجي حيل...
ذاك الحقير اذاني حر اذاني ماريد ينعاد الصار...

تقرب ووخر ايدي من وجهي ..كافي بجي وخليني
افتهم شنو الصار قبل..
خليت ايدي ع عيوني ماريد اشوف وجهه استحي..
وحجيت..
تقربلي وكرهت هالشي تقززت وتاذيت هواي..
استغفر الله يرادلج صبر مايخلص..هسه انة كتلج وصفيلي
ليش تطلعيني من طوري..
شسوا اخذج ؟؟؟
شكد استحيت من كال هيج..بس جاوبته لا
بس تقربلي هم وتاذيت..

كام من مكانه ورفس الكنتور حيل..كاافي تعيديها
فهمت هذا هو..
انت مخبلة جاي توصفيلي شعورج..
كلشي صار قبل انتهى خلاص وماينفتح هذا الموضوع بعد
انة طالع اخذي راحتج...

طلع وركع الباب..خفت لا يطلع ويصير بي شي
بس لا هو بلا قميص شلون يطلع
يا بس لا ياخذ قميص من اخو
خفت عليه لا يطلع يسوق وهو متعصب كلش
اول مرة اشوفه هيج..

فتحت الباب ع كيف وباوعت محد بالصالة
هدوء..
كشيت للمطبخ هم ماكو..
فتحت الباب باوعت بالطارمة هم محد ..
دخلن خابرت سبأ متجاوب..
دكيت ع يمامة..

ها وطون هلو
هلو بيج اكلج سبا وين ادك ماكو..
مادري بغوفتهم شتردين انة اكلها..
ولج تلاغيت وي حر وطلع وحتى قميص ملابس
هسه اباوع بالطارمة
ماكو فدوة خفت عليه..
خلي علاء يخابره لو يشوفه خاف برا...

اوف منج وانة كلت خابرت تبشرني
تالي مطفشة الرجال الله يساعده..
هسه اشوف سبأ واخابرج..
فدوة انتظرج...

بقيت الوب والفون بيدي معقولة طلع لا مايسويها
ويعوفني من اول يوم حتى لو ضايج
عزا العزاني هذا فونه ع الشحن ماماخذه
شسوي هسه ياربي شسوي..

خابرت يمامة جاوبتها بسرعة..ها طمنيني شصار؟
شطمنج عوبة سبأ بغرفتهم واخابرها متجاوب يمكن ملتهية..
يعني علاء يمها؟
لا بابا حجي يمها طبعا علاء ..
راح اخابره..
انجبي شتكليله رجلي اختفى اطلع دور عليه عيب ولج..
مدام مالابس قميص تلكي بالبيت او يجوز بالباب
مادري مادري احس روحي فرت
يااا عشتو هم تفورين انت وج الفاهية
شمسوية للرجال وطالع من طوره...

حجيتله عن الصار وي خالد..
يا مصكوعة يامكموعة اكول طلع الرجال مايندل دربه
هو هيجي تحجين كبل من اول خلوة بينكم
يلا ماعليج عتب هسه انت مثل رياض المنفلوطي
من شالو عقله
بعده عقلج رطب ماتعرفين شسوين..

اووو انت ليش بس ترزلين ..
لان هسه فورتيني وكون ادورلج اكطعج تكطع
ضبي رجلج وانطي وفرحي
دكافي جنج حكومتنا
بيدها المحصول كله ومجوعتنا...

عفية يمامة مو قصدي ولج ماردت اضم شي عنه..
اكول اكلي تبن امج وفخري شبعو محاضن و...
وماجفصتها كدام ابوج مثلج
ماتشوفي يباوعلها مثل النجمة
لا تكلي يحبها ويموت عليها ندري بهالشي طبعا
بس لو راضيته مايرضيها ويرضى عنها
هي هذا حجيها مو حجيي ترى
وانة حجيت نيابة عنها لان لو خابرتيها
راح تكلج نفس الشي..

كومي سبحي وتعطري ولبسيله شي حلو وانتظري
مو يرجع يلكاج جنج كولجي
برمودتج لو بجامتج وتدفرين بي هج الزلمة هج..
ها انة هيج صرت مو؟
حجيتها وانفتح الباب..باوعتله دخل بس وجهه ضايج
اخذ الخاولي وطلع..

يمامة تصيح الو ولج وينج ها اجه؟
من طلع كتلها اجه يلا رايحة..
اي ومثل ماوصيتج عوبة..
اي يصير خير باي...

هسه شسوي هو صح صبر عليه هواي وعذرني
بس اخاف ماريد اتوجع واتقزز
لازم اشرحله ويفهمني بس هو وين يقبل اشرح
افف شسوي هسه مادري مادري ..
بقيت بمكاني كاعدة ..دخل هو لاف الخاولي ع خصره
بعدت نظري عنه
وهو راح فتح الكنتور
بقيت مدنكة مادري بي شيسوي..

شفت رجلي صارت يمي رفعت راسي ورجعت دنكت..
مد ايده لزم حنكي وماخلاني ادنك...
باوعيلي ليش مستحية؟؟
غمضت عيوني وهزيت راسي..
تقرب عليه كلش وانة متوترة وصوت انفاسي ينسمع..
اخذ ايدي فزيت..
لزمها وخلاها ع جسمه مشاها ع كيف ..
عجبج؟
بقيت ساكته..
السكوت علامة الرضا!
تنفست قوي..

جرني عليه وكعد بصفي..
فتحي عيونج وطن..حجاها بنبرة تخوف..
فتحت وانة نظراتي خجلانة ومتوترة واحساس مخربط..
خلينا نتفاهم خو مانبقى هيج؟
اممم...
انت تضوجين من المسج؟يعني ماتحبين هالشي لو تخافين؟
ما ما شسمه ما هذا..
اهدي واحجي عدل شنو رافع عليج سلاح شبيج اهدي وفهميني..

يعني قبل جنت اضوج شوية بس هسه لا
ما هذا مااضوج
بس انة احبك انت ..حجيتها وبرطمت..
وانة احبج اكثر بعد..بس الحب مو حجي الحب تسعديني واسعدج..
وطن اكلج شي من هسه حتى مانتعب ثنينا
صح احبج واموت عليج ومستعد اصبر وياج لحد
ماتستعدين لهذا الشي
بس عرفي كلش زين ..انة انسان اقدس الحياة الزوجية
وغرفة النوم..
جاي تشوفين هذا الباب من ينسد علينا تلكيني بطبعي الحقيقي
برا انة شخصية تختلف عن الغرفة..

عاشرتيني وكل العاشرني يعرفني هادىء متزن وثكيل
وصح انة هيج وهذا طبعي
بس مو كل طبعي اظهره للناس
طبعي هذا وياج بس تعرفي لان انت مرتي
انة انسان احب الكيف والمزاج احب ارتاح
واصريت اتزوج عن حب حتى ارتاح من صدك
وطن انة احس محظوظ وحتى بالحلم مامتوقع احصل وحدة
مثلج
فقيرة وشريفة وبريئة لحد الفهاوة وفوك هذا كله جميلة
والبيض يتسابقون عليها وهي فضلتني عليهم
وحبتني
افتخر هواي بهالشي واحمد ربي بكل لحظة..

بس اريدج تعرفين هذا كله مايشفع لو مافهمتيني
من اول علاقتنا احنا متفاهمين
وتعرفين شنو احس
بس ذاك الكلام غير
هسه اريد تفهميني بالامور الدقيقة والحساسة..
وطن لا تجيبين كدامي سيرة الماضي باي شكل
من الاشكال ولا حتى زلة لسان..
الصار حاولت اتناساه ومر ماينجرع بس جرعته..
ولو مااحترم سمعتج وسمعة اهلج اروح ارجعه
لبطن امه هذا المسكط
بس اعرف ورا هالتصرف هواي مشاكل وحجي عليج...

اريدج تبدين وياي انة وتفتحين عقلج وي كل حركة ولمسة
مني
تحسيها مني مو من غيري ..
انة مزاجي كله وراحتي بهالشي
اعترفلج واعرف راح تكولين غريزي وغيرها
بس انة تملكيني من تفهمين رغبتي
يعني صدك مثل مايكولون لو ردت ومارتاحيت اطنكر
يعني تحمليني من هالناحية
ماريد شي رغم عنج او مو بارداتج او انت ماراغبة
بس صدكيني راح اخليج ترغبين كلشي...

وهسه رفعي عيونج وباوعيلي زين يمكن جسمي
مااعجبج!
لا شلون ..حجيتها بلا وعي..ولزمت حلكي حيل عزا انة شحجيت..
ضحك وحط ايده ع رجلي فزيت..
نتفق اتفاق زين؟
هزيت راسي..اي..
اذا لمستج وحسيتي انزعجتي..
حر مو انزعج منك انة ..
خلاص يعني تعدينا مرحلة العقدة النفسية..شنو يعني تخافين تتاذين؟
اي..
ماشي اذا حسيتي بوجع فهميني ولا تصديني او تكسرين واهسي
وساعتها افهمج واخليج براحتج..
اي..رح اروح للحمام هسه اجي...
انتظرج انة..

طفرت بسرعة اخذتلي ملابس ورحت للحمام
غسلت بس جسمي شعري رفعته..
اسبح ويبوو الافكار بعقلي متزاحمة وماعرف شفكر
هذا حر طلع يخوف يعني مايتفاهم
مادري انة خبلة ومافهمت حجيه زين
مدري هو صدك هذا قصده..

خلصت ولبست شورت حفر ابيض وبالاطراف كركش
احمر وويا بدلة قصيرة
ومن فوك تعاليك
والصدر بي ثلث وردات حمرة ..
يبوو هذا يخزي شكد عيب بلة جنت ببيتنا البس كلشي
بسمايصير عندي هذا الشعور
هسه احس طالعه بالشارع هيجي..
لبست الروب الطويل ولفيت نفسي وشبعت نفسي
دفعات يلا طلعت ..

فتت للغرفة الضوا مطفي وضوا خفيف وهو متمدد ع السرير
يبوو حر بعدك مالبست ملابس شنو ناذر..
حط ايده ورا راسه ونظراته تلاحكني..
يم الميز وعثرت..
ضحك وكال..مدام عثرتي بيها الخير ..
انة لزمتني ضحكة ع روحي انوب هسه يكول تخبلت ساعة
خايفة ساعة تضحك..

وطفت ع مرايه خليت مرطب وحمرة مادري شسوي
بس امشي وقت..
فززني صوته..شعرج ليش شايلته نزلي
ولتخلين دهن لجسمج تعاي هيج احلى ..
يبووو وين اشرد وين اروح شلون سالفة..نزلت شعري
وعدلته بالمشط
واستسلمت واجيت يم السرير..
كعد لحيله وفتحلي ايديه يعني تعاي ..

تقربت يمه واطكطك سن بسن..
مد ايده كمزت ابتسم وفتح خيط الروب لزمت ايده..
رفع راسه باوعلي بنظرات يعني اهدي..
انفتح الروب بقى صافن ويلعب بسكسوكته..
يباوع من جوا لفوك وبحركة خطف ذب الروب بالارض..
حضنت نفسي حيل وهو جرني لحضنه
وانة واكفة وجهه يم بطني ويبوس بيها..

صح ماكشيت منه ولا انزعجت واستسلامي بين باستجابة
جسمي
حضني حيل وطحت فوكه وقلبني وصار فوكي..
مايقبل اغمض عيوني ويريدني اردد اسمه كل ماستمتع
بحركاته..
خطوة خطوة نسيت نفسي ونسيت كلشييي
بس باخر لحظات حاولت افهمه يتوقف بس مايستمعلي
بقيت احاجيه وهو يهدي بيه بس الالم خلاني ارجع
لذاك الشعور
صح مو نفسه بس نفسياً تذكرته ..

رجع حضني ويهمس باذني وماكدرت ارجع اندمج..
بعد لحظات يأس ..
خربت المزاج بس استوعبني..جرني لحظنه وصار ظهري
ع صدره..
بقيت مغمضة وهو يمسح ع زندي ويمشي ايده لكل جسمي
حاول بكل المحاولات وماقبلت..
الى ان غفيت بحضنه..

فزيت ع لمساته على جسمي..تمطيت وجرني لحضنه
نثر بوساته بكل بقعة بيه
وهم من وصلت ساعتها ماقبلت وبقيت ابجي
وهم كال تولي ميخالف وغير وقت..
بقيت ساكته بحضنه بس مقهورة جاي اعذبه
مااجاني نوم بعد باوعت للساعة سبعة الا ثلث..

حبيبي راح اروح للحمام اسبح..
يلا انة اجي وياج..
عزا وين تجي عيب لا ..
براحتج..
جريت المخدة غطيت روحي على ماوصلت للروب لبسته
ولفيت نفسي طلعت..
ركضت بسرعة خفت احد يشوفني..
سبحت واحس جسمي ارتاح
غمضت عيوني واتذكر حركاته
ماجنت متوقعه انسجم هيج بس لو ما الالم..

خلصت وطلعت صار بوجهي عمو فخري..
ابتسملي وكال صباح المبارك بنيتي..
دنكت وكتله صباح الخير
هو ابتسم كال اخذ راحتج..
ركضت للغرفة دخلت..حر مو بفراشه يا وين راح!
طلعت ملابسي لبست وكعدت امشط..
دخل حر لابس والخاولي ع ركبته..
ها نعيما وطونتي..
ههه نعيما وين سبحت..
صعدت فوك ماكدرت انتظرج ..
اي حتى انة ماكدرت الا اسبح..
يلا خلصي وتعاي نتريك ..
اي جاية..

بعدها طلعنا تريكنا وياهم ابوه راح للشغل واخوه
هو ماخذ اجازة هالاسبوع
خلص ريوك وطلع بالصالة كعد
انة سالت امه عن ادوات التنظيف حتى انظف
بالاول ماقبلت تالي دلتني عليهن ورحت نظفت..
خلصت تنظيف وكعدت يمه وجبت فوني
ماما مخابرتني
خابرتها وسولفت وياها شوية..
سالتني عن البارحة كتلها بعدنا ..
ويمامة خابرتني رزلتني وكالت العصر مري اذا تكدرين
كلت لحر كال يجون قريبنا وخالاتي العصر
كتلها اجيج باجر..

ومر اليوم واجو اقاربه تباركولي وطبيعتهم حلوة
ومثقفين
خالته كلش مامرتاحتلي وكلامها كله بز رغم اسلوبي حلو
وياهم
وضاجت اكثر من مدحوني ويسولفون شلون الكل متعجب
ويكول مرت حر جنها ملاك هادئة وتخبل
هي جاوبت اي بس البيضة تصير فاهية مدري شلونها احسها
احنا الرجال الياخدنا مايطيح وضحكت ضحكة طويلة..
باوعت ببلاهة لليمي وعبرت الموضوع..
وللمغرب يلا راحو..

ورا ماتعشينا خابرني بابا والولد هم حاجيتهم
سديت الفون واخذتلي ثوب خفيف اسود لبسته
وعدلت شعري ورجعت للفراش
حر جان يم علاء بالطارمة
سديت الضوا وتمددت اسولف وي البنات ..
شوية ودخل باوعلي وابتسم..
حجيت وي روحي بصوت ناصي
بس يحط رجله بباب الغرفة يذب ملابسه
عبالك يريد يسوي اشعه ..

ذب نفسه يمي ع الفراش ويتفحص بنظرات تخجل..
غمزلي يلا كومي سويلي اشعة..
غمضت عيوني بخجل ياا سمعت ..
سمعي قوي دربالج..
حجاها وتقرب يهمس برقبتي ..مشتاق لهذا الكطن
يبوس وايده تتسلل لانحاء جسمي
وذبت وياه لاخر نقطة ..من وصل وزاد الوجع عندي
حاول يضغط علي ماتحملت بجيت حيل

ابتعد شفت قطرة دم ع رجلي
رجفت وبقيت ابجي
وهو يحاول يهدأني ويبوس براسي وانة خايفة
بصفه تشيرته جره ومسح رجلي ..
وحضني وبقى يمشي ايده ع ظهري
شوي هديت
كال روحي سبحي ارتاحي..
كمت للحمام ارجف صح وجع خفيف بس الخوف غلب عليه..
سبحت وطلعت هو كاعد ينتظرني برا
بس طلعت اخذني للغرفة..
بدلت ومشطت ونيمني بحضنه..

كعدت الصبح ساعة تسعة ونص هو ماموجود يمي
كمت غيرت ملابسي وطلعت
امه متمددة ع القنفة صبحت عليها ماجاوبت كالت
بعد وكت دنيا ظهر..
استغربت يا شبيها حتى ماجاوبت..
سكتت ورحت غسلت ورجعت للغرفة
انوب حر مادري وينه..
باوعت فونه موجود ..

خابرت ماما لان مراسلتني وهم سولفتلها
وحاجتني مرت مرتجى هم
وخلصت سديته وتمددت بغرفتي استحي اطلع وامه فشلتني
وجوعانة بطني وجعتني ..
كمت طلعت جبس اكلت وهو دخل..
ها صباحو حبيبي وين جنت ..
صباحج عسل رحت للسوك الحجية محتاجة مسواك
ليش تاكلين جبس غير تتريكين ؟
ماشتهي ..بس اريد اروح لبيت خالو عفية..
العصر اوديج مو هسه ..

وبقيت بالغرفة ماطلعت حتى غدا كعدت يمهم اكلت لكمة
وتكترت
بس ساعدتها بالمواعين وماتقبل قافلة عليه رغم امس
زينة مابيها شي
انقهرت وانة بسرعة ابجي..
رجعت للغرفة وبدلت حتى اروح لبيت خالو..
وهو اخذني ورحنا ..
بقيت يمهم شوية سبا ويمامة ومرت خالو يسولفون وياي
وسالوني كتلهم بعدني
وكومة نصايح وكومة ارشادات واكلهم اي سويت هيج ومافاد
وسويت كذا ومافاد..
وحجيتلهم عن امه كالو من خالاته السبب هي فطيرة
بس هن يوزنها لان مااخذ منهم..
كلت يو طلعت هالسالفة بكل مكان...
بس يلا لخاطر حر خطية اسكت..

طلعنا منهم وكتله اخذني لاهلي مستاقتلهم وانت وعدتني يومية..
اي يومية ورا شهر العسل هسه لا..
ياا ليش؟
لان هسه اريدج تتعودين ع فراقهم
اذا شفتيهم هسه راح ترجعين تبجين عليهم وماتتحملين ..
لا عفية حر بالباب بس..
لا وطونتي لصالحج انة ..للكورنيش غيري جو ونتعشى ونجي...
وصدك رحنا للكورنيش تونسنا هواي
بين اكل وسالوف وكل شوي ناكل شغلة..
رجعنا للبيت هم كاعدين..
سلمنا وعمو سولف ويانا واخو هم بس امه كامت لغرفتها
هو انتبه وسكت..

من رحتا للغرفة سالني شصاير بينا..
حجيتله الصار كال ميخالف سكتي وعبري لخاطري
ترى هي تحبج واصلا مو حقودة..
سكتت ماجاوبته بعد شي..
بس بدلت ورحت تمددت لان تعبانة صار فترة ماطالعة بس طلعت نعست..
حسيته حضني من ظهري ويبوس بكتفي
ماردت اكعد وتهربت..
الى ان غفيت كلش...

ونص الليل فزيت ع لمساته..فتحت عيني بانزعاج..
اوف اريد انام عفية..
ايده تمشي ع بطني ويحجي..انة شفهمتج ؟
امممم غمضت عيوني والتفيت عليه..
وهو بدا يطبع بوساته وهمساته باحلى كلمات الي..
وكالعادة رفضت وتوجعت وابتعد..
كام للحمام وانة رجعت نمت خفت تطير نومتي..

ومر اكثر من ثلث اسابيع احنا ع هذا الوضع..
بيوم كاعدين وكتله
عندي اقتراح..
شنو؟
اشرب منوم ومااحس بشي مو احسن..
عقد حواجبه..شنو يعني ماعاجبج تحسين؟؟
بالعكس حبيبي بس جاي تشوف رحت للدكتورة
وانطتني حلول وهم مافادت
وكلشي ماجاي يصلح
عاد انام بس هالمرة والوراها مو يكولون ماكو وجع..

نفخ حيل وكام..لا اريدج تحسين احسن لازم
تواجهين هالشي
ماكدر حر اتاذى ماكدر..
وشنو الحل الفاليوم؟
اي عفية..
انسي السالفة نهائي..

ضاج وطلع بس انة مقهورة واريده يتمم الزواج لان بدا ينزعج
وهو شرحلي الوضع من اول..
مااخذت بكلامه ورحت اخذتلي ثنين منوم
وبدلت ونمت قبل لا يجي ..

للحكاية بقية
بقلم شقراء(قمر كانون)