علمني كيف الحب يداوي الفصل التاسع 9 - بقلم Chrakirkuki

#علمني_كيف_الحب_يداوي 9

لمحات من الماضي 8

أمل : دخلت معهد تمريض برغبتي تعاركت ويا امي ورضا مجانو يقبلون يوميا عركة تصير من ورا هالموضوع رضا غاسل مخ أمي تماما مرات أجاوبهم ومرات اغلس أحبس نفسي بغرفتي أمي تريدني اتزوج وتخلص مني ورضا ميقبل حتى ابقى كدام عينه

أم أمل : اليوم عجنت اهواية تعالي ساعديني بالخبز كلش تعبانة ظهري يوجعني

أمل : رجعنا لنفس الموال مو صارلج فترة متشتغلين علمود رضا أفندي ميقبل صار عنده فلسين يتباهى بنفسه

أم امل : مادري هذا الرجال شمسوي بيج غير أهتم بيج ورعاج وكبرج بس طالعة على أبوج بذاته ناكرة معروف منين أكو فلوس ياحسرة الشغل صاير قليل

أمل : هو انتي عشتي ويا ابويه حتى تعرفين طبعه ليش ماكو شغل مثلا صديقاته راحو للحج وصارو شريفات لو شنو شفتها شايلة العصا ركضت واني احجي على رضا وهي تحجي عليه اخذت التليفون لغرفتي وسديت الباب خابرت دعاء نروح للسوك ويا شامل

نزار : ماما هاي وينج نجحت وطلعت الاول ياربي اشكد فرحان واني أركص من الفرحة

مدينة :ها حبيبي بشر نجحت ألف الحمدالله والشكر يارب وحامد أخوك

نزار : ماما خلص تخرج بس راح ويا أصدقائه يحتفلون لايظل بالج عليه كعدي احجيلج شي مو كلتلج أكو بنية أني معجبة بيها طلعت هي نفس الشي اليوم حجيت وياها كلش حبابة اتمنى تشوفيها وتتعرفين عليها

مدينة : نخزني قلبي من هالبنية حتى مشايفتها جاريته بالحجي وهو بحضني يحجيلي عن مشاعره تجاهها كبر حبيبي وصار رجال واني بعدني أحسبه طفل مانام لحد ماينام هو وأغطي بيدي والاكل ميطب بحلكي اذا نزار مو ويايه ومن يتمرض أني أبقى يمه بالغرفة واعوف كلشي

نزار : ماما مو وياج احجي وين رحتي ترى اكو شي نسيت اكلج عليها هي مرحلة اخيرة وتخرجت

مدينة : كأنما شخص ضربني راشدي على وجهي وصحاني من عالمي شنو نزار أكبر منك تحجي صدك كوم وحاجيني عدل اني عمري قصرت وياك بأي شي حبي عاطفتي ودلالي عزيتك أكثر من أولاد بطني هاي جزاتي

نزار : أشبيج حبيبتي عادي أشجاب موضوع حبج اليه لموضوعي لايكون تغارين عليه احجي عادي لاتخجلين

مدينة : كوم مخبل تدري شنو معناته تحب وحدة أكبر منك يعني تحس بنقص حنان الام مو حب أفتهمت لاتحاجيني لحد ماتعقل لاحب ولاهم يحزنون أنتبه لدروسك وبس خليني اشوف فرح محتاجة شي لو لا

نزار : عفرا شبيها الوالدة شكلت قابل مو وياج شبيج ساكته

عفرا : والله مو تكولي دايما لاتدخلين بيناتنا هسة شكو صدك تحب وحدة عجوزة مخبل مو بيدك هههههه كام ضربني على راسي ومشى تذكرت الضابط أخو هنا صديقتي من يجي وراها يباوع عليه دايما وأني مرات اباوع من جوا لجوا كلش مبين لطيف وشخصيته حلوة .

شامل : بابا ليش مكلف على نفسك شنو تشتري شقة بالتقسيط انت ممقصر ابد ويانه وبعدين حتى لو تزوجت ابقى وياكم مستحيل اعيش بعيد عنكم

أبو شامل : هاي من دخلت للكلية أشتريته ألك بس كملت نص اقساطه من تشتغل كمل الباقي منو عندي غيركم الحمدالله الرزق موجود

دعاء : بعدين بلكي تتزوج وحدة مترضى تعيش ويانه مو هذا الموديل الجديد يريدون بيت وحدهم

شامل : واني غبي اسمع كلامها والله أكص لسانها اذا كالت هيجي لو مقبلت ارجعها لبيت ابوها .

ام شامل : اشبيك على كيفك عيني داخل حامي هاي زواج مو حرب وعيب هيجي تكول لازم تحترم بنت الناس حتى الناس تحترم خواتك

دعاء : اي عفية ماما ذكريه خاف تطلع حوبة المسكينة بينا

ابو شامل : دعاء فكرتي بموضوع ابن خالج عيب من الناس نخليهم ينتظرون اجابتج بأي او لا متأثر بشي اريدج تختارين بنفسج ماعليج لامن أمج ولا من خالتج علاقتهم متتخرب اذا متزوجتيه وأتذكري راح تعيشين وياه بغير قارة بعيدة عن أهلج

دعاء : خجلني بابا بسؤاله كدام شامل وهو يضحك عليه صح أحنا نحجي كلشي علني بس حبيت يكون عندي خصوصية بهالموضوع لاول مرة حسيت بخجل جاوبته بهدوء كيفك بابا عن اذنكم

شامل : تعالي عفريته والله موافقة مبين من عيونها ماما لحكي بشري أختج خلي تفرح أبنها يوميا يخابرني ينتظر الجواب عباله اني دعاء

أم شامل : فدوة لبنيتي الخجلانة شبيك عليها يوم اللي أفرح بيك انشالله دايما ادعي اشوف هاليوم واشوف جهالك مالين عليه البيت

فرح : مأساتي بدت بعد وفاة أمي والعبء زاد عليه ماكدر اختلي بمكان لوحدي ماكو خصوصية ماكو طلعة وتربية بنات بعمر مرمر وميرا أصعب شي وجبار ولسانه السم

جبار : راح تجلطني يوم أعرف هذا امنيتج تتخلصين مني سمعيني زين هسة ام فاتح تجي تطبخ وتنظف البيت وتروح حجي زايد ناقص وياها ماكو الله ياخذج لو ميته مو احسن

فرح : جاوبته ودموعي بعيوني حاضر بابا كتبتله الغراض الناقصة ام فاتح تجي بين يومين تنظف وتطبخ الأكل تكفينا لأيام واني اطلع أحميه خالة مدينة ممقصرة بس بابا ميخليها تدخل بحياتنا يريدني أعتمد على نفسي ناسي أني نفسي محتاجة للرعاية

جبار : تعالي حيوانة هاي شمسوية بالحديقة الله ياخذج انشالله لو جان أبوج عايش وانتي ميته مو أحسن

مرمر : باوعت عليه جاوبته أني مو حيوانة عيب عليك انت اكبر مني وبعدين نظفت الحديقة ردت اتركه واعوفه ضربني راشدي

جبار : ترادديني ياعار اكص لسانج ياحقيرة تفو عليج

فرح : مستحيل يمر يوم اذا مرمر متتعارك ويا ابويه وتجاوبه هي الوحيدة توكف بوجه ومتخاف منه أما ميرا تخاف تركض تخبي نفسها
مرات أضحك على جبار جان يريد يخلص مني الله عاقبه يربى 3 بنات ايتام وحده أشتاق لأمي واكلها وريحتها من تكوم الصبح ترتب نفسها وتسوي فطور والضحكة المرسومة على شفايفها من تكعدنا من النوم رغم هي بأقسى حالتها متخلي يأثر على سعادتها من تشوفنا الله على ريحتج أمي

مدينة : انتي اهنا فرح واني أدور عليج شتسوين بهالغراض

فرح : هاي غراض ماما كلش مشتاقتلها خبيتها أهنا بالمخزن حتى لاياخذها أبويه تعبت خالة كلش تعبت ياريتني رايحة وياهم ولا عايشة بهالمذلة

مدينة : أصبري حبيبتي شتسوين بعد كافي موتي نفسج من البجي الحياة كدامج والله من اشوفج هيجي انقهر أكثر لو ترضين تجين يمي وتعيشين ويانا والله اخليج بعيوني انتي والبنات

فرح : مكدرت اكوللها ابويه مانعني ادخل لبيتكم أستحيت منها 24 ساعة تهتم بينا ومتقصر واكوللها هيجي خالة ةنتي منقصرة ويانا لو اموت ماأنسى شنو سويتيلنا أفضالج يوم عن يوم تزيد لو لاج مجنت اكدر اوكف على حيلي واهتم بالبنات

مدينة : وينهم مااشوفهم بعدهم بالمدرسة ابوج شلون صار عمج كالي جان تعبان

فرح : اي هسة راح يجون اي جان تعبان تعرفين بعد موت طلعت انهد حيله بس هو ميحب يبقى بالبيت وبالفراش يروح للمكتب

حامد: طلعت من الجامعة واني اشوف البنية اللي حبيتها من اول مرحلة ومتجرءت اتقدملها لحد مااتخرج واخطبها بس نظرات بيناتنا هي هم تحس بيا جماعتي يعرفون نيتي وياها باركتلها على التخرج وهي النفس الشي تمنيت تصير من نصيبي اعرف ابوها اشوفه بالجامع يوم الجمعة أكيد اهلي مراح يعترضون عليهم.

جبار : هديتي حيلي الله ياخذج شلون مصيبة انتي ولج متستحين اركض وراج من شارع لشارع اكسر رجلج اذا شفتج تلعبين برا تعالي فرح أخذي هالمصيبة لغرفتها

مرمر: ليش تحجي عليه وتعصب من حقي العب بالشارع وين مااريد بعدني صغيرة راد يكمل جاوبته لاتكمل حفظته ياريتنه ميتين ولا طلعت اتمنى اروح يم ابويه واخلص منك ومن غير ماتاخذني فرح اني اروح لغرفتي وحتى اكلكم ماريده

جبار : فرح حسبي حسابج باجر عازم جماعة على الفطور لاتقصرين بشي واللي تحتاجيه خلي ام فاتح تجيبلج زين وهاي الحيوانة اني الها مرة ثانية اشوفها بالشارع اموتها

ميرا : اخذت عشا لمرمر جانت نايمة مسحت على شعرها واني ابوسها كومي مرمر جبار نام تعشي

مرمر : عبالج نايمة ههههههه سويت هيجي حتى تبوسيني اشم بيج ريحة ماما مسحت دموعي بسرعة ماريد ابجي اني قوية

ميرا : مكروهه كعدنا ناكل ونسولف ونضحك سوالفها كلش حلوة مغامراتها متخلص حتى بالمدرسة رغم ماعندي ام واب احس هي كلشي سندي وقوتي اني عكسها خجولة وساكتة اغلب الوقت

حامد:كعدت بيني وبين نفسي افكر بيها واتخيل احنا متزوجين وعايشين بيت وحدنا تدلل عليه لو تزعل واصالحها جنت ابتسم على تخيلاتي لحد ماحسيت شي وكع على صدري هذا نزار ياكل الفواكه ويذب القشور عليه ولايستحي يضحك متونس يحب وحدة بكدي وهي زميلتي يوميا يحب وحدة باوعتله بغضب ولاكأنه وياه علمود أمي واكفة بصفه

نزار : عبدالحليم صحيت من النوم لو بعدك فوق الشجرة اليوم حجيت ويا ماما احتمال اخطب البنية

حامد : تاخذ وحدة اكبر منك حرام تضيع مستقبلك بعدك باول خطوة لاتتهور بعدين تندم انت من دخلت للكلية انعجبت بكل بنية تشوفها

نزار : شسوي قلبي كبير يستوعب ولاتنسى اني محبوب من كل البنات همه يصادقوني ويركضون ورايه علمود جمالي واخلاقي وذكائي مقهور مني يكولون عليك معقد يحب وحدة ويستحي يعترفلها لو اني مكانها اموت سنوات النظر والاهتمام وماكو اي تقدم

حامد : هانت اتعين وارتب وضعي واتزوجها ليش أنطيها وعد وبعدين اعوفها بنات الناس مو لعبة واني أحبها من كل كلبي واتمناها بالحلال.

ميرا : عمه اني اغسل المواعين روحي ارتاحي باجر عيد لازم تكومين من وكت

فرح : هاي كم سنة مرت نعيد بدون الاحباب مسحت على شعرها كبرتي وصرتي تخافين عليه وتريدين راحتي يابعد روحي يمكن انتو الاثنين سبب وجودي بالحياة من بعدهم راح احضر غرفة الضيوف علمود ضيوف ابويه بالعيد بيتنا تنترس بالاهل والاقارب التعب كله عليه سمعت صوت مرمر ويا ابويه يتعاركون صار ضحكتي على سوالفهم تريد تطلع بالعيد وهو ميقبل

مرمر : فلوس ماريد امسح بيه الحايط شسوي بيه اريد اطلع مثل صديقاتي اتونس حرام عليك كرهتني بالعيد لو ابويه مو ميت جان يخليني اطلع واتونس براحتي بس اني يتيمة وانت متصدك تستفرد بيه

جبار : لاحول ولا قوة الا بالله مو اختج وعمتج ساكتين وميحجون اني ممقصر بشي فلوس وانطيكم اللبس يوصللكم لباب البيت اي اكلة تردوها من يا مطعم توصللكم بعد شتريدين لو ابوج عايش مجنتي تكدرين تحجين هيجي كدامي عديمه التربية امشي ولي

مرمر : انطيتك علم باجر طالعة شمايصير لو خلي حامد ونزار يطلعونه ويا عفرا شكو بيها

فرح : كافي مرمر عيب عليج كبرتي شنو تطلعين ويا اولاد عمج ميصير بابا يريد مصلحتج حتى انهي النقاش ومتنضرب بهالعيد وتنكسر فرحتها سكتتها واني اصلا مو مقتنعة بكلام ابويه بس هذا الموجود وهذا حياتنا .

أمل :اكيد تخبلت شلون تجيبلي عجوز اضربها ابرة تريد تسويلي مصيبة

رضا : لعد مو ممرضة وهاي شغلتج لو تروحين لغير مكان وتكذبين علينا

أمل : اي أروح ملهى صبحي سامع بيه لو اختصاصك ليلي انت مخبل لو بيك شي بعدني ممكملة وماعندي اجازة ميصير افتهم ياجاهل

ام امل : ولج غبية هم تحصلين فلوس وهم يصير عندج ممارسة بوسي أيد عمج يجيبلج زباين من تتخرجين تصيرين مشهورة بالمنطقة وتفتحين عيادة.

رضا : ليش خايفة حتى لو صار شي شامل هو راح يطلعج منها مو صار محامي وانتي عزيزة على كلبه .

امل : لو أذبحك هسة منو يلومني سمعي ماما اني رايحة يم دعاء باقية اسبوع عطلتي ماريد اسوي جريمة بهالبيت مع السلامة .