علمني كيف الحب يداوي الفصل العاشر 10 - بقلم Chrakirkuki

#علمني_كيف_الحب_يداوي 10

لمحات من الماضي 9

شامل :شنو تتعين مو اتفقنا نمارس المحاماة سوية مو هاي أحلامنا ليش غيرت كلشي هسة أنتي احجي وياه ترى راح يخبلني

أمجد: شامل حبيبي لاتصعبها عليه عبالك بأختياري انت اكثر واحد يعرف بطموحي واحلامي اللي رسمنا سوية بس الظروف ضدي

شامل : أني وياك راح نتجاوزها أساندك الشغل راح اسويها بدالك بس نكون سويه كافي عليه وجودك دعم اليه

امل : أمجد لازم عندك ظروف تكدر تقنع شامل بيها ليش تتخلى عن أحلامك وطموحاتك اني من أشوفكم هيجي أتعب اكثر وأخاف أرجع لنقطة البداية 😝😝😝

أمجد : شامل ابويه سافر وراح المحل صار اليه ومسؤولية خواتي وأمي الوظيفة اني أخليه ضمان بس تعرف مصاريف اللي عليه لازم ألزم المحل واسافر اجيب البضاعة بنفسي كومة ألتزامات ماكدر ادبرها أفهمني وبعدين راح نكون سوية دايما حتى هالقردة تعودت عليها

أمل : أحلى منك أحبكم أثنيناتكم الله يخليكم أليه كومو نكمل صبغ الشقة كافي حجي زايد الله يوفقك أمجد المكروه

شامل : خربت مزاجي كملو انتو اروح اجيب صبغ اضافي وغدا ولو متستاهلون شغلكم مو حلو حرام أنطيكم أكل عليه هههههه أستلمت شقتي وهسة نصبغه على ذوقنا باقي أختار أثاث راح أشتري من ابدي أشتغل وأحصل فلوس رحت أجيب أكل من المطعم شفت بنات أثنين ويا أمهم وحدة منهم باوعتلي وتقربت استغربت منو هي مشايفها قبل

منار : صارلي أشكد مشايفة شامل من بعد مادخلت امل معهد تمريض اشكد صاير حلو يخبل ماما هذا شامل أخو أمل أروح اسلم عليه وكفت كدامه حجيت وياه شوية وانفجر مبين ناسيني وميعرفني

شامل : والله اسف من زمان وصلتكم نسيت مو مهم شلونج

منار : بخير بكلبي من شفتك طبعا أمل وينها ضيعت رقمها كلش مشتاقتلها ياريت تجيبها يمنا وتزورنا هي صديقتي الوحيدة بس الظاهر نستني

شامل : امل لاعدهم تليفون ولاشي وصديقات ماعدها بس محبيت أفشلها كتلها زين وانطيتها رقم بيتنا ردت اروح هي باقية ياربي شلون اصرفها هو اني بلا شي ضايج اذا تحبون خلي اوصلكم

منار : اي خلي أصيح ماما واختي ونجيك وين سيارتك مو مصدكة ياريت من زمان طالعة ويا اهلي ابد ماطلع 24 اقرا وهاي غسق أختي يوميا مدبرتلها طلعة ويا أمي متكعد بالبيت ماما شامل راح يوصلنا

غسق : لعد السايق اللي جبنا شيسوي مخبلة نروح ويا واحد منعرفه

منار : روحي أصرفيه اريد اعرف اخبار صديقتي يالله ماما خلي نصعد وانتي تعالي بسرعة

شامل : صعدت هي وامها رحبت بيهم جتي وحدة ثانية بعدهم بشوية سلمت وجانت تضحك كوة لازمة نفسها بس لفتت انتباهي باوعت عليها حسيت بأحساس غريب اول مرة احسه امهم تحجي ويايه واني بالي يم هاي ردت تحجي واسمعها بس ساكته وتبتسم كلش حلو ابتسامتها

أم منار : أي عرفت انت منو أمك تصير قريبتي من زمان مشايفتها رحنا لغير منطقة وارقام التليفون تغيرت هسة شلونها ابوك خواتك وين صاير بيتكم كلش مشتاقتلها وردة مال الله امك

شامل : هم زين طلعنا اقارب جان ودي الطريق يطول عرفت اسمها غسق انطيتهم رقم بيتنا وعنوانا خاله اي وقت حبيتي تزورينا خابري البيت واجي وراكم اخذكم بنفسي

منار : امنيتي تحققت شامل صار بيدي وطلعنا اقارب مهمتي صارت سهلة لازم ارجع صداقتي ويا أمل وبقوة هاي فرصتي

غسق : نحن هنا يا اختي من جينا وأنتي بغير عالم شبيج احجيلي ولو سوالفج كلها كيميا فيزيا بس مجبورة اتحملج

منار : شفتي شامل هذا اخو امل اللي زمان حجيتلج سالفتها كلش محترم وهسة صار محامي

غسق : شفت وياريتني مشفته يموت جان بودي أحجي ويا طول الطريق مخليتوني أنتي وامي افتح حلكي كاعدين تستجوبون الولد قهرني خطية تعب هلكد يجاوبكم اشكد محظوظة امل تصبح بوجه هالحلو مو مثل حظي أصبح بوجه مديرنا يشبه علي بابا

منار : أستحيت أكوللها اني من زمان معجبة بيه بقيت أضحك على سوالفها واني احلم بشامل واشوفه الوحيد اللي يناسب شخصيتي .

جبار : فرح انتي كبرتي ولازم تشوفين قسمتج اني ماكدر بعد اوكف بطريقج حرام علمود تخدمينا

فرح : هذا اللي مجنت حاسبه حسابه شلون اتزوج واني عمري لا اختلطت برجال ولا ويا ناس اغراب واني اصلا ماحب الرجال متعقدة منهم من ورا أبويه بابا اني ماكدر اعوفك واعوف البنات بعدهم صغار يحتاجوني واني بعدني على الزواج

جبار : ماعليج من البنات اني اربيهم ومدينة ممقصرة وهمه لازم يعتمدون على نفسهم عليج بنفسج ابن صديقي شاب ملتزم ومتدين ابوه طلبج مني واني وافقت حضري نفسج هالايام راح يجون يشوفوج اهله

فرح : ماكدرت ارفض لو اكوله ماريد غير يذبحني ويفتكر عندي شي شيفهمه هذا يارب استرني ياربي اني يتيمة ومكسورة حن كلب ابويه عليه يارب ماتزوج

مرمر : عمه راح تتزوجين ونسوي عرس مو مو مصدكة يصير عدنا عرس واعزم صديقاتي

فرح : انتي متوبين دايما تتسمعين والله اذا لكفج يموتج ابويه ماكو عرس مثل ماسمعتي ملتزم يعني للبيت سكيتي فلا تحلمين زايد ادعيلي ميصير وانتهي من هالكابوس راح اموت اذا ابتعدت عنكم

ميرا : بجيت وياها ماتخيل حياتي بدون عمتي اخاف تتزوج واحد ميخلينه نشوفها حضنتها يارب متتزوجين شسوي اذا رحتي من صدك راح اصير يتيمة مو كافي امي وابويه انحرم منج همينه راح احجي ويا جدي

فرح : حبيباتي انتو لاتبجون هاي قسمتي مو بيدي شي ديربالكم تحجون شي لبابا راح يضربكم مراح اتخلى عنكم مهما يصير

مرمر : اذا علمودج خلي يضربنا عادي هو احنا متعودين من غير شي ضرب واهانات تدرون اشكد احسد صديقاتي من يحجون على اهلهم اللي تطلع سفرات ونسات واللي تروح مطاعم واحنا حسرة علينا كلشي

فرح :أحنا الحمدالله احسن من غيرنا ناكل ونلبس بيتنا حلو حتى لو منطلع ابويه ممقصر بشي اكو ناس تتحسر على اللكمه ياربي اللي بيها خير يصير

ميرا : مرمر هاي صديقتج الجديدة من وين جاية نقل حركاتها ولبسها محلو عبالك اكبر منه

مرمر : نسيت احجيلج عنها واي اشكد حلوة سوالفها وتونس كلشي تعرف بالعكس هي حبابة واصلا محجبة لو تسمعين حجيها ويا اهلها واقاربهم تحجيلي من يطلعون ويروحون زيارات كلش حبيتها

فرح : انشالله دايما تفرحون وتنسعدون بحياتكم ديربالكم من دروسكم رفعو راس اخويه

ميرا : ياخوفي جدي ميخليني أكمل المتوسطة ويبطلني حلمي اصير صيدلانية حتى اللي ماعدهم فلوس اساعدهم وانطيهم دوا ببلاش
ويدعون لأبويه وامي بالخير

مدينة : دخلت على سوالفهم دمعت عيني بستهم وحدة وحدة كعدت وياهم حجينا بمواضيع اهواية من حجتلي فرح على الخطابة كلش انقهرت عليها خطية الله يعلم شلون ناس لازم اتأكد بنفسي منهم لو مو زينين اوكف بوجه جبار ماخلي فرح تروح لجحيم ثاني

عفرا : جبتلكم الاكل ماما تروحين للبيت لو تبقين تتغدين ويانا واني اريد ابقى وحدي ويا فرح احجيلها عن حسن

مدينة : انتو اكلو براحتكم مرمر من تكملين تعالي اخذي الكيك اللي سويتها الج نسيت اجيبلج ترخصت منهم رجعت حجيت ويا ابو حامد

ابو حامد : يوميا جايين خطابة عليها بس هذا لان ملتزم أهواية جبار انعجب بيه ماعرفه من قريب بس ابوه خوش رجال راح اسال عليه علمود هاليتيمة ولا جبار اصلا ميسمع مني

أمل : دعاء ماصدك ايام وتعوفيني لعد المن احجي وافضفض همومي حبكت الافندي يدرس بكندا ماكو جامعات عدنا لو على حظي تفو عليج تضحكين متونسة توصلين يمه مو واني محروك كلبي عليج

دعاء : متحسين مسترجلة هذا مايسمونه العشق من الطفولة لو بأخر الدنيا اروحله واني مغمضة

أمل : عابت لاتستحي ولا شي اشكد مكارة تبجين كدام اهلج ومن نصير سويه تبينين على حقيقتج خلي العشق يفيدج اني طموحاتي غير راح اجمع فلوس واشتري بيت واتخلص من الحشرة رضا واعيش بسعادة وحدي بدون عنصر رجالي حقير

دعاء : اذا متجربين متحسين تدرين اشكد حلو هالاحساس بس انتي وين صنم مو بشر ماكو خالية من هالشي جربي وادعيلي راح تصيرين فوك السحاب تنسيج همومج والالامج راح يصير دوا لجروحج بس فتحي كلبج

امل : الحمدالله والشكر جنتي بنص عقل من انخطبتي طارت النص وهسة بلا عقل انتي شايفة ظروفي الصخام مال عشق وحبيات اصلا اللي يعيش ويا اهلي يكرهه الحب وسوالفه انشالله تتهنين وتعيشين بسعادة اختي

شامل : مجتمعين من دوني خيانة وتاكلون ولاتعزموني اوف اشكد تعبت اليوم

دعاء : هاي امل طابخة طعم الاكل عجيب ولو هي ميلوكلها تطبخ وتصير ربة بيت بس نفسها بالاكل ماكو منه

امل : معرفناج تمدحين لو تذمين من الصبح اطبخ وتبلعين ولا سمعت كلمة حلوة تطلع من حلكج الاعوج حبيبي هسة اصبلك ولا يهمك احجيلي شلونها شغلك

شامل : حلو ومتعب بنفس الوقت اكول صديقتج مخابرتج هاي منار

أمل : منار لو غسق حدد لان اني منار ماابلعها خير شر شايفه نفسها اما غسق حبابة وخبلة بس تصنف وتضحك

دعاء : ها شامل بدينا نحب ونسأل على ناس اشبيج خبلة هو يسأل على غسق مسميها سمراء حبيبتي

شامل : واحد ميكدر يسألكم على شي اكلتوني وشربتوني وانتي دعاء خاتون متستحين تفتشين بين كتبي المهم امل خابريها واعزميهم يجون لبيتنا تعرفو عليهم خوش بنات وخصوصا غسق تحتاجون واحد يضحككم شوية لان وجهكم يجيب المرض هههههه

امل ودعاء😲😲😲😲

امجد : خير شكو صوتكم واصل لراس الشارع

ام امجد : منين يجي الخير وخواتك كل وحدة عدها هم لاحول ولا قوة لو عدهم ظهر ميصير بيهم هيجي ياربي موتني وارتاح من هالعيشة لا أب مثل العالم ولا أخ حاير يدورله عروسة ويريد يتزوج ميفكر غير بنفسه

أمجد : أني أفكر بنفسي تسلمين ماما حقج شبيها المحروسة

ام امجد : غير تريد بيت وترتاح تعيش بيه موتوها قهر الله لاينطيهم ناس همج اختك صايرة خدامة الهم هسة رحت لمكتب عقار لكيتلها خوش بيت نروح باجر اني وياك حتى تنطي الفلوس ونعقد

أمجد : ليش هيجي تتصرفين من كيفج من وين اجيبلكم فلوس بيت متعرفين حالي هسة حرام عليكم مصار شهرين غيرتي سيارة بنتج الثانية اصيرلكم حرامي لو قاتل

ام امجد : مو ابوك مسويلك وكالة بيع بيته واشتري بيها بيت لأختك والباقي نضمه للمستقبل

امجد : مستحيل اسوي هذا الشي وانتي اشرت لأختي تحملي اهل زوجج مو ذبحتي نفسج عليه اريده اموت نفسي اذا ما زوجتوني مو كلتلج ميشتغل وناس تعبانة تحملي نتيجة افعالج

ام امجد : منك لله لو هاي مرتك هيجي تسوي وياها لو أحنا ماعدنا حول ولا قوة تستقوي علينا يمه كلبي روحي جيبلي دوا راح اموت

امجد : هاي مأساتي ويا امي من تريد شي تموت نفسها وتنام بالمستشفى لحد ماتجبرني اسويها اللي تريده

شامل : من سمعت غسق وامها راح يزورونا مصدكت غيرت لبسي اكثر من مرة عبالك مراهق جنت اروح واجي بغرفتي يمتى اطلع واسلم عليهم اكعد وياهم لو اسلم واروح لحد ماصاحتني امي مثل مافهمتها الموضوع اني معجب بغسق رحت سلمت وكعدت باوعت عليها خلت عينها بعيني وابتسمت

أم شامل : من كالي شامل مصدكت اشوفج دادا من جديد الله يرحم ايام زمان اشكد جنا نتونس من تزورينا انتي والاولاد ويا امج انشالله نرجع مثل قبل الله عليج بعد لاتقاطعونا

ام منار : والله فرحتي بيكم اكثر من عرفت شامل الله يحفظه أبنج مصدكت ارجع واشوفكم من جديد وبعد هو صار ولدنا

ام شامل : فهمت من تلميحاتها معجبة بشامل وتريده لبناتها باوعت على غسق حلوة بس شامل احلى منها اخاف اعجاب مؤقت وتنتهي بعد الزواج لازم اكعد وياه وافهم منه اكثر

غسق : لو ما عيب جنت ابوس شامل ويا خواته اشكد حلو وهادئ عكسي يحجي برصانة ورجولة واني فاتحة حلكي وابتسم مثل المخبلة احب الفرح وكلشي بيها فرحة سمعت يسألني على شغلي اني معلمة روضة

شامل : فرق عن منار طبية وانتي معلمة روضة شلون تتفاهمون

غسق : ماكو تفاهم اصلا هي بس تقرا وكاعدة وحدها اني لا غير ماحب ابقى وحدي لو بجو حزن اختاريت ألروضة ويا الاطفال احسهم احلى شي بالدنيا كلشي بيهم حلو

دعاء : باوعت على امل ساكتة مو من عوايدها هاي تختلف طبعها عن شامل ولو سوالفها حلو بس الثانية صدك مثل ماكالت عليها امل شايفة نفسها فد شي .