علمني كيف الحب يداوي الفصل الثامن 8 - بقلم Chrakirkuki

#علمني_كيف_الحب_يداوي 8

لمحات من الماضي 7

نورجان : صحتي يوم عن يوم تسوء أقل كلمة تبجيني صرت مااتحمل شي وعلاقتي بجبار عادية بعد سالفة فرح واللي سواه بيها ساكت وهي اللي كاسرة ظهري انام أفز على صوت امي وابويه يريدوني اروحلهم أكعد ابجي وأصلي لحد مايطلع الصبح وأسوي شغلي لو اروح يم مدينة نشرب جاي لو كهوة اليوم راح أروح للمكان اللي أنولدت بيه بعد سنين مو مصدكة أشوف وأشم ريحة أهلي وجوارينه والطريق اللي جنت امشي بيه يمكن أشوف طريق مدرستي ألعنها هو السبب بعيشتي شفت فرح لازكتلي تريد تجي ويايه واني ماريد جبار يدري بالسالفة مااخذها

فرح : ماما ليش مااروح وياكم غير اريد اتعرف على صديقاتج واشوف اهلج بلكي تلكينهم ونروح يمهم نرتاح من جبار

نورجان : ههههه بعدج تتخيلين مكان نروح بيه مكان بعيد عن جبار اهتمي بميرا ومرمر زين خالتج مدينة راح تاخذكم لبيتهم لعبي وتونسي ويا عفرا مو تحبين هالشي أنتي كبرتي وتحملي المسؤولية زين خلي اشوف تربيتي بيج

فرح : أميرة خاتون تروح وتتونس وياكم وتعوفولي هالقرودة والله راح يطلعون عيني بطلباتهم طلعت عفية كول لماما خلي ترضى اجي وياكم .

طلعت : حبيبتي حتى اميرة ناخذها علمود بابا ميشك بالموضوع ولو مو زين عليها حامل بس لخاطر امي هي تريد تجي مو تحبيني وتسمعين كلامي وعد مني بس ارجع من العمرة راح أسفركم كلكم لمكان حلو بس اليوم اهتمي بهالحلوات امانة عندج واني اعرفج متقصرين حبيبة اخوها بست بناتي وفرح اكثر من مرة امي كلش فرحانة اليوم من زمان مشايفتها هيجي الحمدالله كدرت افرحها بشي بسيط

نورجان : مدينة اختي ديربالج على فرح والبنات لحد ماأرجع ادعيلي ارتاح وانتهي من عذاب ضميري واحصل شي عن أهلي بست مدينة ورجعت بست فرح وميرا ومرمر أكثر من مرة باوعت على البيت اللي عشت بيه وتنهدت صعدنا بالسيارة طول الطريق طلعت مشغل قرأن واميرة نايمة وأني مركزة على الطريق انتظر نهايته .

أم شامل : الله يساعدك ابو شامل اشوفك هالأيام طلعاتك كثرانة قبل كله ويايه الصبح هسة صبح وعصر برا خير اشم ريحة خيانة

أبو شامل : واني من بعد غلاتج اكدر أخون

أم شامل : طبعا لا عمري أعرفك أكثر من نفسي بس احس شي مشغلك لو ناوي على شي

ابو شامل : بعت القطعة اللي عندي وخليت فلوسي اللي بالبنك عليها واشتريت قطعة ثانية بعد فترة راح يرتفع سعرها ونستفاد من الربح الجهال كبرو ولازم نضمن مستقبلهم شامل راح يتخرج ويتزوج ونحتاج مصاريف كلت من هسة اجمعلي حتى منحتار ولا نتداين من احد ولا نخليهم يحسون بنقص هسة اني احجيلج ليش تبجين

ام شامل : من فرحتي بيك وين اكو مثلك مرات احسد نفسي عليك يااعظم زوج واب وكلشي بحياتي ياتاج راسي من هسة تفكر بشي باقيله اهواية هنيالهم جهالي انت ابوهم وهنيالي بيك 😢

أمجد : هسة عزمتك على لفة ليش جبت القردة وياك لزكة خو مالزكة وتالي وياك يعني اهرب من امي تطلعلي ست امل ولازم اسكت ومااحجي لان حضرة جنابك متقبل كلمة عليها يارب منو داعي عليه لو بس أعرف

شامل : تنجب وترحب بأختي مثل ماتليق بيها أختي ست البنات وعلى راسك منو يحصله أمل الكمر تاكل كباله هاي أمك داعيتلك

امل : شنو هالمكان اشكد بخيل عازمنه على لفة المفروض مطعم راقي بس وجهك مو مال مكان راقي 😜

أمجد : ها شامل منو البدا اول شي لاتعاتبني بعدين اكول يا قردة مو عاجبج واكلتي 3 لو عاجبج جان اكلتيني وياه😠😠😠

امل : اووع لعبت نفسي اكلته حتى ماافشلك وتكول عليه شي هاي أني اتحملك لخاطر اخوية الورد لوما شامل جنت ماباوع على جهرتك عابت لسان طويل ومغرور

شامل : 😒😒 بعد عدكم شي لو خلصتو متخلون الواحد يكعد بمكان بدون حركاتكم هالمرة ماجاوبكم ولا انطيكم وجه اشرب عصيري واحسب نفسي كاعد وحدي وانتو كملو المسرحية وأرجع وحدي دبرو نفسكم منو يوصلكم غيري واني جايبكم بسيارتي

أمل : اكول شامل صدك رضا هالايام صاير هادي وميحجي شي ويايه مو قبل اسبوع جان غير شخص يحجي عليه ويضربني والله كلشي بكفة ومن يحجي على ابوية وهو مستمتع بخيره بكفة ثانية كلش أنقهر

أمجد : باوعت على شامل مسوي نفسه عادي متأكد هو ورا الموضوع ميعوف رضا لحد مايتورط وياه بعده ميعرف رضا ويا ياناس حثالة يتعامل جاوبت امل لأن شامل ساكت بعده أمل اي شي تحتاجين لايردج الا لسانج والله ازعل منج اذا خبيتي شي عليه بعيني اللي ترديه

أمل : اعرف متقصر أمجد انت وشامل احلى نعمة بحياتي يمكن انتو الملاك اللي يوصيهم ابويه المرحوم عليه مو حرام أني بنت واحد شهيد دافع عن وطنه أعيش ويا واحد مثل رضا وفوكاه هو المو راضي بكلبي جريت حسرة ينتظر فرصة ويعتدي عليه

شامل : أمل اني كلتلج وعدتج للموت وياج ميحتاج كل دقيقة اكررها ورضا قبل ايام انطيته المقسوم لايخوفكم بلسانه ترى والله العظيم بس أمد ايدي عليه يتوسل ويبوس ايدي مثل النسوان بس مو اي نسوان العار اللي يعرفهم

أمل : كافي لاتوسخ ايدك بيه لاتخاف عليه أختك سباعية طالعة عليك هههههه

عفرا : ماما فرح متنزل تاكل ويانه يمكن تستحي من اخواني حاولت متقبل

مدينة : هسة اني أجيبلكم الغدا فدوة للحلوات واني اشوف مرمر وميرا يلعبون حواليه وحدة أحلى من الثانية الله يحفظهم مادري ليش من راحو حسيت كلبي مقبوض من الصبح أستغفر وأتعوذ من الشيطان شفت نزار جاي من برا وجايب خبز

نزار : همزين ماعدنا جهال اليوم ماما ناسيتني لاشفت عصير ولا فواكه مثل كل يوم باوعت على البنات اشكد حلوين تعالو جبتلكم نساتل وبسكت ماما وينها فرح مااشوفها من جتي لهنا

عفرا : يعني متعرف طبعها متحب تختلط بيكم كوة جبناها لبيتنا وراسا راحت على غرفتي

نزار : ليش أحنا شبينا ناكل بشر لو شنو ماما سويلي لفة جوعان ماكدر انتظر بابا وحامد يرجعون عندي امتحان

مدينة : زين حبيبي اكعد اصبلك وهم اصب لفرح وعفرا وهالحلوات يمكن جوعانين ابوكم وحامد نتأخرو يارب سترك روح نزار شوف بيت عمك جاي لو بعده حتى تاخذله أكل

نزار : والله ماما أعفيني ماريد انغث وباجر عندي امتحان خلي عفرا تاخذه اريد أجيب ميه وافرح كلبج

مدينة : حبيبي وجودك بحياتي هو المفرحني من اسأل عليك بالمدرسة واسمع المدح بيك تسوى عندي الدنيا ومابيها الله لايحرمني منك بس اليوم الغيرة صاعدة عندك من هذولة

عفرا : هذا نزار الغيور متعرفينه تربيتج ماكل حقنا كلنا بهالبيت والله لو بيده يطلعهم برا بس يستحي

نزار : روحي هاي أمي اليه لوحدي واني ماحب الشركاء مو كافي انتي وحامد النوب هذولة

مدينة : هههههه كبرت عيب ابني سمعت صوت الباب شفته حامد وجه ميطمن تقربت منه وسديت الباب اخذته للصالة بدون ميحجي شي حسيت أكو مصيبة ومردت الجهال يعرفون تركتهم بالمطبخ بدون مقدمات سألته شكو حامد

حامد : مصيبة ماما مصيبة وبديت ابجي مو مصدك اللي سمعنا حادث صاير بطريق اللي راح بيها طلعت وماكو شي يطمنه عليهم ابوية وعمي راحو للمكان بعد ماسمعنا من الناس عن الحادثة أضطريت أحجي ألهم همه رايحين أهناك

مدينة : رجليه مشالتني وكعت بالكاع واني أتذكر تفاصيل وجه نورجان من اول يوم شفتها لحد هالصبح لا لا اكيد مو همه حامد كوم غسل وجهك واكعد بين اخوانك طبيعي ياربي منو يطمنه هسة

حامد : ماريد اكعد ماما كلبي نار على طلعت لو صاير بيه شي اموت من القهر بعده شاب وصغير وهذولة الاثنين شيسوون ومرته حامل بولد لو خالة نورجان وحلمها تسافر للعمرة وتشوف أهلها
ياريتني رايح وياهم واطمن شيصبرني لحد مايرجعون لو أروح ويا جوارينه يشتغل سايق خط

مدينة : متروح لمكان لحد مايرجع أبوك وبلكي مو همه اني متأكدة هسة نورجان ترجع وتحضن وتبوس مرمر اول وحدة واني احجي عليها اكوللها لاتفرقين اي هذا اللي يصير واميرة راح تجيب الولد ونسويلها الحفلة الجبيرة اللي جبار وعدها يسوي ونورجان تروح للعمرة وتجيبلي غراض مثل ماتجيب لنفسها ماعرف اواسي نفسي لو حامد لو نزار اللي دخل بالموضوع

نزار : ماما اني اروح خلي حامد يبقى بالبيت وياكم

جبار : راح تعبي راح سنين عمري بلحظة يعني لاريحتيني نورجان بحياتج ومن عفتيني ورحتي أخذتي كلبي وياج ولج ليش أخذتي فرحتي مني ليش اخذتي طلعت شلون اعيش بعده أدك على راسي مو مستوعب ابني جثة كدامي ومرته نفس الشي حتى مخليتني اتهنى بحفيدي كل هذا علمود أهلج شنو استفاديت من ورا عنادج خسرتي نفسج وخليتني بحسرة على ابني ولا وصلتي للي تردينه الله لايسامحج الله لايسامحج

ابو حامد : واني أبجي من هول المصيبة اللي وكعت على راسنا راح طلعت بلمح البصر حادث سيارة مو هو السبب بيها اول مرة اشوف جبار هيجي مكسور ماكو اي كلمة تجبر بخاطره اللي راحو مو واحد ولا اثنين اربعة التمو الاهل والاقارب جبار وكع واخذنا للمستشفى ويا الجثث ماعرف هو يرجع ويانه لو يروح وياهم

مدينة : بقينا لحد المغرب بين نارين راسي شوية وينفجر من البجي والتوتر عفرا عرفت وتخربطت كلش تحب أميرة ونورجان أهواية حاولت وياها متبين شي كدام فرح

فرح : من الصبح حابسة نفسي بغرفة عفرا اخاف أطلع واشوف حامد ونزار ويحجون ويايه بعدين اتورط ويا جبار وميرا ومرمر صاعدين نازلين للغرفة ماكدر اسيطر عليهم اشوف كتب ودفاتر عفرا كوة لازمة نفسي كل سنة جنت أطلع الاولى بس هو حرمني من دراستي بحجة كبرت ومااستحي حسيت بعد الظهر عفرا متغيرة وباجية ومن اسألها متجاوبني عافتني ونزلت وكت المغرب تأخرت لبست حجابي وردت انزل سمعو صوت خالة وهي تحجي بدون شعور ركضت عليها اللي سمعته صحيح لا جذب مو جاوبيني الله عليج خالة

مدينة : يمكن جنت أنتظر فرح حتى أنهار كدامها وألطم بديت اشك صاير بيهم شي علمود هاي تأخرو ومرجعو كومي حبيبتي انشالله ماكو عدهم غير العافية

حامد : فرح حبابة لاتبجين خوفتي البنات يباوعولج مصدومين

فرح : باوعت عليهم دخلت بنوبة بجي مو طبيعي يحجون ويايه ماجاوبهم عقلي ميستوعب حادث لا طلعت امي اميرة يصير بيهم شي يتأذون ويتألمون لا ماريد وطفلهم اللي جاي بالطريق الولد اللي انتظرناه

أبو حامد : رجعت للبيت وأني شايل هموم الدنيا على كتافي جبار بالمستشفى بين الحيا والموت بقو يمه اخواني وكرايبنا جان لازم ارجع علمود أحضر الجنازة والفاتحة اول مادخلت مرمر واختها كبالي يلعبون بجيت متحملت منظرهم شلون راح يعيشون بدون اهلهم رفعت نظري فرح هاي مصيبة ثانية شلون راح تعيش وهي عدها رهبة وخوف من كلشي

فرح : رحت على عمي مبين من شكله صاير مصيبة أمي زينه مو الحادث مو همه وطلعت هسة يرجع ياخذني للبيت وعدني راح يسفرني حتى لو بابا مقبل بهالشي

مدينة : تعالي فوتي حبيبة ارتاحي هسة عمج يحجيلنا ولو مبين اكو مصيبة عفرا ودي البنات لغرفتج ولاتطلعون منها

فرح : انتظرت عمي يطمني باوعت على نزار وحامد منطيني ظهرهم وخالة مدينة متكدر شلون تلزم نفسها واني حايرة شسمع منه

ابو حامد : تعالي فرح حبيبتي كعدي نحجي اني وانتي انتي متثقين بيه وتحبيني واني هم احبج مثل عفرا ابوج تعبان شوية الليلة راح تبقين يمنا تنامين ويا عفرا

فرح : ماما وين طلعت ماكدر ابقى اهنا اريد اروح لبيتنا هسة يرجعون ميصير ابقى ببيتكم بابا ميقبل

ابو حامد : لا يقبل اني طلبت منه وهو وافق أنتي كبرتي وراح تكونين على كد المسؤولية اني متأكد راح تريحين امج وابوج اريدج قوية ومتنهارين تحبين أمج وطلعت وتتمنيلهم الراحة الله أخذهم لعنده

مدينة : كافي لاتكمل الله اكبر حضنت فرح وهي متتحرك صارت كتلة باردة جاوبيني فرح الله يخليج أحجي أو ابجي طلعي اللي بكلبج

فرح : تذكرت طلعت وامي يوصوني على ميرا ومرمر وينهم صحت خالة وين بنات طلعت لازم احميهم أخويه وصاني لازم اهتم بيهم محد راح يحبهم كدي ماريد اسمع شنو صاير واللي يصير الحياة انتهت عندي .