علمني كيف الحب يداوي الفصل التاسع عشر 19 - بقلم Chrakirkuki

#علمني_كيف_الحب_يداوي 19

سمر :نزار حبي كوم تأخرت على الدوام اني اروح احضرلك الفطور طلعت من الغرفة مرمر صارت بوجهي بقت تباوعلي يمكن انصدمت على لبسي هي متعودة تشوف عمتها بحجابها ومدينة نفس الشي ضحكت بوجهها ها حبيبتي جاهزة تروحين للمدرسة

مرمر : باوعت عليها نزلت راسي بسرعة شنو هاي شلابسة بديت اتعود على حياتي اهنا احس سمر تمثل مرات زينة ومرات لا وخصوصا بالليل تتخبل اذا تشوفني كاعدة وياهم كل دقيقة تكومني روحي نامي من اروح لغرفتي يبدي قناة غنوة وسوالف الكبار تشتغل بالبداية مجنت اعرف شنو الموضوع بعدين بديت افتهم جاوبتها اي انتظر عمو ياخذني

سمر : لا اني اخذج هسة ابدل نزار يتاخر لحد مايغسل ويبدل وهم نحجي سوية بالطريق من جتي مرمر لخبطت حياتي بس استفاديت منها نزار ميكدر يسافر اهواية يم أهله وحتى همه ميجون لان مرمر متقبل تشوفهم وتسوي مشاكل وتهدد تموت نفسها اذا شافتهم يعني ارتاحيت منهم بس وجودها بيناتنا مقيدة تصرفاتنا منكدر ناخذ راحتنا أضطر اخذها بنفسي للدوام حتى ماانطيهم مجال يكونون سوية ويانزار اباوع عليها بعدها صغيرة بس مااشوفها مكسورة لو ضايجة بالعكس لسانها طويل ومتستحي تجاوب بس لازم أكسرها حتى لاتتمادى .

دعاء : ساعة ادك الجرس يالله تفتح تليفونك مغلق من البارحة امي ميته من القلق متجاوب

شامل : استغفرالله اني شورطني وكعدت قريب عليكم كل يوم مسويتلي مداهمة ماعرف اصلا تليفوني وين دوري لحد مااسويلي جاي

دعاء : شنو هالمزبالة اللي عايش بيها ريحة المشروب والجكاير كمت انظف الصالة وهو بالمطبخ وصلت غرفة النوم شفت الهوسة الملابس بجهة لحظة هاي شنو وحدة بالسرير نايمة تفو عليج سديت الباب شامل منو نايمة يمك هاي اخرتك شرب وبنات ليل

شامل : لاتدخلين بحياتي ماعليج بيه اذا مو راضية على عيشتي مو مجبورة تزوريني وتنطيني محاظرات اريد اعيش حياتي مثل مااريدها افتهمتي وهسة روحي

دعاء : غصبا ماعليك تسمعني ولك شامل هاي مو انت ولا اخلاقك انت حتى مجنت تباوع على بنات تكول عيب وحرام وهسة يوميه ويا وحدة عبالك راح تنسى بهالشكل انت تنتقم من نفسك مو شامل روح تعالج انت مريض

شامل :انطيتها الكوب احجي ويايه بأدب بدون صياح اخذي الجاي وروحي للصالة اروح للحمام كومت البنية وكتلها تبدل وتروح غسلت وطلعت انشف شعري واسمع دعاء تحجي بالتليفون عرفت امي جريتها منها واني اسمعها توصيها عليه وهي تبجي رجعتها الها وحضرتلي كاس اشرب ليش يخافون عليه ليش يردون يحموني واني غير الخذلان والالام مشوفتهم اخذت جاكيتي وطلعت برا عفت دعاء ورايه تصيح امشي بالشوارع اشوف كل الناس بس وجه غسق مااشوفها بيه مااشوفج بأي مكان شهور واني محسيت بطعم السعادة حتى من سافرت ملكيت مخرج لجرحي .

ميرا : البيت صاير كابوس جدي مريض واني وحدي مرمر عافتني حتى مو راضية تحجي ويايه بالتليفون اشكد اخابر واحجي ويا سمر ومن اطلبها بس تسمع صوتي تفشلني متنطيني مجال احجي بالكوة خلاني جدي ارجع للمدرسة بديت اخاف من كل الناس اروح واجي وحدي اشوف البنات مجتمعات اللي يضحكون واللي يلعبون واني لو مااطلع من الصف لو اوكف بزاوية بعيدة مرات اشوف البنية اللي دمرت مرمر عايشة حياتها ولا يمها ارجع للبيت اشوف جدي لاحول ولاقوة انقهر اكثر شفت عمتي سلمت عليها واخذت الجهال منها ابوسهم والعب وياهم وهي تروح على جدي تنظفه وتنطيله اكل ميقبل غير منها ومن حامد بس يشوفني يدير وجهه

فرح :كالعادة اجي يوميا انظف وارتب فراش ابوية وابدل ملابسه وانطيله اكل كلش تقربنا من بعض حسيت بحنانه متأخر ينتظرني كل صبح على نار مياكل اذا مو ويايه ويحب جهالي ويموت عليهم كلش مقصرة وياحامد هو ميحجي ولا يعاتب بالعكس يداريني ويساعدني صرت احجي وياه واطلب واناقش بدون خوف صار عندي شخصية ثانية

جبار : فرح ديربالج من ميرا هي باقيتلنا لاتسوي سواة اختها ماتحمل بعد ايام واودعكم اريد من اروح اكون مرتاح

فرح : لاتكول هيجي بابا اني بعدني محتاجتك وميرا عاقلة واني عيني عليها بس انت الله يرضى عليك كلش قاسي وياها خطية الله يعينها شنو شافت من هالدنيا لو تعزني بابا حاول وياها تحجي وتسولف وتطلب منها تاكل وياك ميصير هي تبقى وحدها وانت وحدك اعتبرها طلعت

جبار : اوف اوف يمتى الله يجمعني بيه كلش مشتاق لأخوج ادعيلي اروح يمه وارتاح وهاي العوبة ميرا ماكدر انطيها وجه مو بيدي تذكرني بأمج

فرح ؛ههههه بابا انت تحب امي والله وتموت عليها بس معرفت تعبر غيرت شخصيتك وياها خفت تروح منك كسرتها وحتى ظلمتني وياها هاي يسموها الخوف من الحب

جبار : والله طلعلج لسان يافرح هذا حامد معلمج هالسوالف الله يخليج ويحفظلج جهالج انشالله كل حياتج افراح مثل اسمج اني معرفت قيمتج تأخرت مقدرتج اهواية ظلمتج حلليني بنتي كلش ندمان أمج كلش حبيتها من حبي هيجي سويت وياها خفت تروح مني لو جنا متزوجين مثل العالم والناس يمكن جان حياتنا يختلف بس احنا غلطنا والله عاقبنا لااني كدرت اسعدها ولا هي ارتاحت مني .

أم امل : تعالي أمل احجي وياج كلمتين بغرفتي

أمل : رجعت تعبانة من الدوام جان عندي خفارة شفتهم كاعدين ياكلون اخواني كبرو وتغيرو كوة يحجون ويايه بس من يريدون فلوس يعبروني غير هاي ميحسبولي حساب شفت امي شكلها مو تمام رحت وياها بالي الاسطوانة القديمة تريد فلوس لرضا خير ماما اكو شي

ام امل : اخوانج مو راضيين عليج لو تتزوجين لو متداومين الناس اكلت وجوهنا منكدر نرفع راسنا كدامهم يرضيج هالشي بنتي

أمل : ضحكت على كلامها شنو ناس وشنو اخواني هذولة الكاعدين برا اني اصرف عليهم ماما كبرتهم بايدي شنو شفتو مني باوعيلي ماما اني اشبه بنات يمتى شفتيني لابسة مثل البنات ولا متمكيجة وطالعة يمتى اني حسيت نفسي بنية وعندي احاسيس حتى اخواني يخافون انزل راسهم وبعدين يازواج منو يتزوجني ناسية سمعت زوجج المطيرجي ابو المشاكل كم مرة حبسوه بتهمة تحرش وتعدي على الجوارين نفسي مرة توكفين ويايه حتى غرفة ماعندي مثل العالم سويته عيادة حتى استرزق منها وانام بالمخزن وعادي عندي والفلوس اللي جمعتها رتبت البيت واشتريتلكم غراض حتى أخواني المزعومين ميحسون بالنقص

أم امل : والله عيب عليج كل دقيقة وثانية تكولين اعيشكم وانطيكم فلوس هسة ماعلينا اخوج يريد يتزوج دوريله وحدة وياج تكون حالتهم زينة خطية كبر

امل : شنو يريد دكتورة لو صيدلانية صدك جذب ماعنده شهادة غير سادس ابتدائي تدورون على شهادات وفلوس خلي يشتغل مثل العالم والناس بعدين يحجي بسالفة زواج لو هاي هم عليه والاخ يظل طول الليل سهران على التليفون وبالنهار نايم بدلت هدومي لشوكت اني اتحمل مو كافي امل عيشي لنفسج حتى شامل اللي جان اعز الناس عندج راح وعافج منو الج بعد سمعت صياح اخوية ويا امي طلعت وكفت بوجهه راد يضربني لزمت ايده اياك تسويها افتهمت

ولج انتي منو تحجين عليه مو زين منا لفيناج ببيتنا وحدة ساقطة عافج شامل وهسة ويا امجد عبالج اني ماعرف سوالفج ياحقيرة غصبا ماعليج تصرفين على البيت وراح اتزوج وانت تدفعين لو لا امج من زمان ذابحج

رضا : عفية ابني سبع طالع عليه شوفها المرجلة سنين واني متحملها هي ومكسراتها نزلت راسنا بالارض كل هذا علمود يتيمة وهي ولا بعينها جانت تهددني وتخلي الجلب مالتها يضربني وهسة شبع منها وشمرها على صديقه حتى من اتزوج مفكر بيها لان شبعان ومشتريله شقة يودوها اثنيناتهم يلعبون بيها

امل : تفو عليك ياناقص اني شريفة غصبا ماعليك ياحقير هذا ابوك اللي مفتخر بيه سنين ويحاول يغتصبني لو رجال صدك حاسب ابوك وبعدين تعال حاسبني وشامل يارضا الجلب اشرف من عشيرتك وامجد تاج على راسك وانت ياللي اسمك اخوية ياريت تصيرعندك ربع رجولة واخلاق أمجد جنت اسعد انسانة اني والشقة اللي تحجي بيها اطهر من بيتكم

رضا : لاتطولين لسانج شامل ماكو بعد بح تردين تتهميني وتنزليني من عين اولادي مو تدارين سوالفج اذا مخليتج متسوين فلس فلا اني رضا وخلي شامل الحقير يفيدج .

ام امل : روحي لغرفتج حسبي الله عليج من بنية صبرت عليج سنين يصير براسج خير ماكو تعقلين وتمشين عدل اهلا وسهلا متعقلين اربيج من جديد .

امل : اريد ابجي واطلع نار اللي بصدري ماكو دموع اني ليش مابجي وصلت لهالمرحلة أحساسي خلص اكرهك شامل عفتني انذل بيد هذولة اكره انانيتك كسرتني ليش هيجي ياربي.

شامل : تعبت من المشي كعدت بالحديقة اللي اجي مرات اركض بيها طلعت باكيت الجكاير شفت هادي واكف يباوعلي ويهز براسه عرفت دعاء ورا جيته سلمت عليه كعدنا نحجي بهواية أمور منتظر الزبدة هو دكتور نفساني يعرف شلون يجيبه

هادي : شامل تدري من واحنا صغار جنت احب اقلد ابوك اهواية ودايما اكول لابوية عمو ابو شامل طبعه كلش حلو صير مثله وهو يزعل مني يكولي بشنو مقصر وياكم مجان يفهمني عجبني حكمته وصبره وهدوئه من يحل مشكلة تتذكر من جتي امي لبيتكم تريد تتطلق من ابويه وصار الرجوع بيناتهم مستحيل لحد الان اتذكر ابويه جان جاي معصب ويحجي ميدري بروحه حتى غلط على أبوك بس طلع وياه وراحو بعد ساعتين شفت نفسي راجع وياامي لبيتنا ومناك قررنا نسافر وجينا اهنا ابويه صار واحد ثاني مو هو جان بنفسي شنو حجه وياه وخلاه يتبدل بس ملحكت اشبع منه الموت اخذه مني واني عندي 14 سنة وعايشين ويا امي بغربة ومنعرف أحد
رغم هاي بديت ويا امي نشتغل ونعتمد على نفسنا صرت دكتور واني اغسل مواعين بالمطاعم ومفتخر بنفسي تخرجت وجنت من الاوائل رفضت أمي نرجع لأن ابويه مدفون اهنا جنت كلما اشتاق لابويه اقرا واجتهد اكثر حبيت أجازي ابويه وهو بقبره حتى لو ميحس بيه بس روحه ويايه

شامل : هادي أعرف اللي مريت بيه اني مو مثلك انت مجنت السبب بموت ابوك بس اني جنت السبب بموت غسق اعرف لا انت ولا دعاء ولا اهلي راضيين عليه المشكلة اني ماعرف شريد وشسوي بنفسي أحساسي بالذنب يزيد يوم عن يوم اتمنى ارتاح

هادي : شامل انت اختاريت طريق غلط المفروض توكف على رجلك متعبت من حياتك صارلك سنة بعيد عن أهلك انت تكدر تطلع من حالتك بس متريد اشتغل طور نفسك اقرا حب من جديد تزوج مو كاضيها شرب ونسوان شوف صحتك يوم عن يوم تسوء

شامل : أتزوج مستحيل يازواج انتظر سنين وتروح مني بلحظة محد يحس بناري وشغلي هي السبب بموتها اقرا شنو هو اني ظل عقل براسي والحب لغير غسق ماكو

هادي : انت كذاب اللي يحب ميخون وانت يوميا تخون حبيبتك بحجة النسيان مدام تكدر تخون تكدر تتزوج احلى احساس من تخلي طفلك بحضنك حتى لو كنت بقمة التعب من ارجع اشوف دعاء وجهالنا انسى كلشي

شامل : مراح تفهموني ودعاء اني زعلان منها اصلا ياريت تكوللها لاتتمادى ويايه مهما يكون اني اكبر منها وهي معتبرتني طفل تتدخل بكلشي يوميا صبح تهجم عليه وتسويلي مشكلة راح أروح لغيرمكان من وراها

هادي : المفروض انت تكون سند لدعاء اشكد جانت فرحانة من عرفت راح تجي بمنا بس من شافت وضعك انهارت دايما جانت تحجيلي عنك وعلاقتك بأهلك وشلون جنتو اصدقاء وامل وامجد اللي انت ناسي اسمهم همينه شوف اللي حواليك ترى مو كل الناس عايشة بمثالية وكمال كل واحد بينا عنده قصة جرح رغم هاي راضيين وعايشين لو كل واحد يسوي سواتك جانت الدنيا خربانة .

أمجد : طلعت من الدوام مردت ارجع للبيت ضايج من حياتي وتصرفات أمي تنتقم مني علمود ابويه عافها بس اجيب سيرة زواج تموت نفسها لو تروح تطلع الف عيب بالبنية بس تكولي اريد فلوس خواتك ماعدهم اشتاقيت لشامل وحياتنا وأمل اشوفها قليل مو مثل قبل قررت ازورها بالمستشفى سلمت عليها كالعادة منار وياها رغم امل متحبها ماعرف شلون متصادقين

أمل : ردت روحي من شفت امجد كعدنا نحجي اشوف العلة منار كاعدة متتحرك عرفت مهموم ويريد يفضفض اخذت غراضي وطلعنا نكعد بكافتريا لو مطعم صدك لزكة اوف

امجد : ليش حبابة خطية تدرين افكر اخطبها

امل : رجعت المي بحلكي شوية اموت شنو

امجد : حيلج شبيج دكيت على ظهرها اتزوجها لا اخطفها ولا اغتصبها

امل : غير السالفة ماريد احجي بيها خلي افجر راسك بمشاكلي انسيك الزواج

امجد : حمارة مابيج خير بدل ماانتي ترتبين اليه وحدة هيجي تسوين وياي لا جديات احس هي مناسبة وامي مراح تكدر تعارض دكتورة ومن عائلة محترمة بعد شتريد

أمل : مجنت اريد احجي واكسر بيها بس واحد مثلك ميفيد وياه تحب واحد ماريد اذكر اسمه انت تعرفه بعد لاتسالني شي لا اكوم اكسر راسك وافضحك بالمطعم ونسيت محفظتي بالبيت يعني العزومة على حسابك 😆😆😆

أمجد : لايكون تحب شامل صدك سالفتها سالفة اذا هيجي الله عليج مو مشتاقتله دايما يسألني عليج وانتي متستاهلين اما محفظتج هاي الاسطوانة حافظها ميخالف سم على كلبج

أمل : سديت نفسي خلص كوم نتمشى ماريد تذكره كدامي تدري اخويه المتعوس يريد يتزوج بقينا اني وامجد واحد يشكي للاخ كلما اكوله لاتجيب اسم شامل على لسانك السوالف بالاخير ترجع عليه .