علمني كيف الحب يداوي الفصل الثامن عشر 18 - بقلم Chrakirkuki

#علمني_كيف_الحب_يداوي 18

لمحات من الماضي 17 والأخير

مرمر : رجعت لغرفتي اول ليلة مكدرت انام من الالم مرتين عمو نزار ضربني ابرة بالبداية متقبلت وجوده يمي لان أخو حامد بس شفته يختلف عنهم وهو يبتسم بوجهي ويحجي ويايه يعتبرني بشر وعندي احساس قفلت باب غرفتي مقبلت احجي ويا أحد بالليل انزل اخذ اكل وفواكه واصعد لغرفتي مرات ميرا توكف يم بابا غرفتي تريد تحجي ويايه اتفل عليها واقفل الباب بوجهها

ميرا : ليش تعاقبيني منو اليه غيرج ارجوج مرمر فتحي الباب عمتي هسة راح تجي يمنا نزلي زين علمودها اليوم طلعت من المستشفى وجايبة اطفالها كلش حلوين مثلنا بس همه ولد ردت احجي وياها بموضوع الجهال بلكي كلبها يحن وتفتح الباب مجاوبتني كالعادة نزلت ورحت انتظر عمتي شفت الصالة كلها مزينة وکلهم فرحانين حتى عفرا لابسة فستان غامق مو اسود
ينتظرون وصول عمتي وجهالها .

عفرا : نزعت الاسود اليوم بعد ماتوفى حسن أول مرة البس غير الاسود امي كالتلي مو زين تستقبلين جهال اخوج بيهم توسلت بيه بس انزعها اليوم علمود فرح وحامد أسوي نفسي فرحانة ومابيه شي وياهم بس اصعد لغرفتي الطم وابجي واني بيديه صورة حسن مرات ابقى من الليل لحد ثاني يوم العصر ابقى وحدي استرجع ذكرياتي اهلي تعودو على طبعي من شفت نزار دخل بيده طفل والثاني بيد حامد وهو ساند فرح ركضت مثل الطفلة واخذته منه بسته وخليته بحظني اباوع عليه لو حسن مجان متوفي هسة اني هم بحضني طفل اوف على الدنيا اشكد غدارة أضحك وامسح دموعي هاي اني عفرا دموع وضحك بنفس الوقت

سمر : متت من القهر بجيت اهواية طلبت من نزار يبقى يم اهله اسبوع ثاني كلش كرهت روحي حسيت بالنقص لو اني هم يصير عندي طفل شيصير ليش فرح صار عدها اثنين واني اظل طول عمري انحرم من واحد بشنو هي احسن مني ياربي بقيت بيت اهلي بس ابجي وامي تواسيني خايفة يجي يوم ونزار يمل مني ويحن على طفل وخصوصا صار كدامه هسة اثنين مو واحد

ميرا : أخذنا صور كومة ويا الاطفال مرتين عمتي طلبت مني اصيح مرمر غلست وسويت نفسي مااسمعها شكوللها تكرهج علمود زوجج وعمة مدينة جانت مشتريتلي كلادة ذهب اليه ولمرمر من فرحتها بأحفادها حسيت احنا مو عالة عليهم مثل ماتكول مرمر بالعكس يحبونا

جبار : شلت جهال فرح بحضني تأثرت كلش بستها من راسها وباركتلها انطيتها أوراق بيتي اللي ساكن بيها خليتها بأسمها مستحيل اخلي شي لبنات طلعت يكفيهم ورث ابوهم متحملت ابقى وياهم رجعت للبيت واني اعيد ذكرياتي من جاني طلعت اشكد جنت فرحان بيه ورافع راسي ومفتخر كدام اهلي واشكد موتك كسرني وتعبني باوعت على صورته عمره بالعشرين متهنى اخذتها مني باوعت على صورة نورجان اخذتج من اهلج انتقمتي مني واخذتي روحي وياج الله لايرحمج حركتي كلبي سنين رجعت لفراشي المكان اللي صفيت بيه لا نفعني فلوس ولا شي وحيد على فراش الموت .

حامد : اباوع على فرح شلون تأثرت من ابوها باسها على راسها وحضنها يمكن اول مرة يسويها جبار مثل ماتسميه فرح محبيت تصرفه ينطي ورث لفرح ويحرم بنات طلعت بكيفه مهما يكون هذولة من لحمه ودمه اباوع على نزار وعفرا كل واحد بيهم شايل طفل ويلعبون وياه ويضحكون وبداخلهم الف موتة وموته .

شامل : وصلت لبيتنا وشايل هم أدخل البيت واشوف المكان اللي المفروض بيتي اني وغسق حتى مكدرت ارفع راسي واشوف الطابق الثاني تلكتني امي بصياح وبجي تلوم بيه لعد اني ألمن الوم بستها من ايدها وراسها وحضنت ابويه متحملت بجيت بحضنه مثل الطفل ساعدني بابا ماتحمل حياتي دخلني لغرفتهم وهو يمسح على ظهري ويسمعني أحن الكلمات والمواساة نمت وهو يغطيني وامي تمسح على راسي وتبجي مرة تبوس راسي مرة ايدي مو مصدكة رجعتلهم

أمجد : من خابرني ابو شامل جنت بالدوام اخذت اجازة ورحت على بيتهم مو مصدك عبالي جنت ضايع وبرجوع شامل لكيت نفسي دخلت سلمت امه وامل مخبوصين بالمطبخ ونور تجي وتروح تاكل وتخلي كدامي كتلها كافي اريد جاي كعدت ويا عمي ابو شامل منتظرين يكوم من النوم

أمل : سم انشالله كل دقيقة جاي لو كهوة شنو متحس بينا عدنا شغل تعبانين

ابو شامل : على كيفج بنتي شكو بيها خلي يشرب اللي يريده لاحول ولا قوة الا بالله والله أشوفكم مثل توم وجيري ابد ماتكبرون سوالفكم نفسها

امجد : والله هي دايما تبدي اصلا اني كلبي طيب مو مثلها بس هي كلبها اسود ومتروس حقد وخصوصا عليه اكفر من اطلبها شي وهي تأمرني 24 ساعة حتى بنص الليل تخابرني وديني للمستشفى رجعني للبيت واني كله زين وحاضر وتدللين وهي أستكان جاي تكولي بالسم

امل : يمه منك ومن لسانك مسوي نفسك مسكين كدام بابا بس ميخالف اليوم راح اسكتلك من فرحتي برجوع شامل ماما مااتحمل بعد اروح اصحيه

أم شامل : روحي عمري كومي نور حضري السفرة اصب غدا ابو شامل عيوني خابر بيت ام منار طمنهم برجوع شامل عيب منهم يوميا يسألون عليه

شامل : أحس نفسي دهر منايم سمعت صوت امجد وامل وهمه يكمزون على السرير شوية واوكع عبالك جهال اريد اضحك ماكدر حضنتهم وسلمت عليهم كمت غسلت وجهي باوعت على المرايا منو هذا أني هاي بأسابيع هيجي صرت من تمر سنة شيصير بيه كعدت اكل جسمي وياهم عقلي بغير مكان صحيت على صوت امجد

امجد : مو شامل هذا غير شخص ماعرفه وين لهفته وضحكته من يشوفنا اني وامل بقينا نباوع عليه مصدومين صاير مثل الشبح عبالك كبر 10 سنين وجه تعبان نحجي مو يمنا عطت بيه شامل مو احجي وياك

شامل : اعتذر مسمعت اريد احجي وياكم مادام كلنا ملتمين اني قررت اسافر بس ماعرف وين رجاءا لاتحاولون تمنعوني اريد ارتاح ماتحمل ابقى

امل : ليش شامل واحنا مفكرت بينا كمت من مكاني متحملت فكرة اخسر شامل اخذت غراضي وطلعت من بيتهم وسط اعتراض اهله طول ماأمشي افكر ليش يعوفنا واحنا كلنا بحاجته والله لو يموت مراح اودعه امسح دموعي وابجي واكول هسة يجوني هو وأمجد مثل كل مرة ويصالحوني وصلت لبيتنا انداريت لا اكو شامل ولا امجد

شامل : أمجد أنت اكثر واحد لازم توكف ويايه وتصير قوي اهلي وامل بحاجتك ماما اتوسل بيج لاتبجين صدكيني اني اعاني اذا بقيت اهنا راح احرك روحي

ام شامل : مراح اخليك تموت ولك اختك راحت ويا كل لمة ووجبة اكعد بيها نار فراقها بصدري رغم اعرف هي عايشة احسن منا بس اني ام تريد تموتني واني حية

شامل : اباوع على ابويه صافن ميحجي شي يمكن يفكر بالموضوع أمجد راح أصفي غراضي وعندي اوراق وقضايا ناس انطيها لغير محامي
انت كملي اجراءات السفر وياريت بأسرع وقت حتى لو دفعت فلوس اكثر وسيارتي بيعها وانطي فلوسها لأبويه بابا اني اروح للشقة الليلة ابات اهناك لان اوراقي موجودة لازم اصفيها

ابو شامل : براحتك ابني رغم كسرني بقرار السفر بس لزمت نفسي ابني مجروح ميصير اربطه خلي يجرب يعيش حياة ثانية بلكي ينسى والله كريم رحت لغرفتي حجيت ويا ام شامل لا تهدء ولا تقبل بقرار شامل بس تبجي فكرت أخليه يروح يم دعاء زوجها دكتور نفساني راح يساعدوه بدون ميحس قررت احجي ويا امجد لوحدنا واخلي يسويله فيزا لهالدولة راح نعرف اخباره من دعاء احسن من يروح لمكان ثاني ومنعرف عنه شي .

نزار : ها مرمر شلون صرتي لا اليوم وجهج صاير احسن قررت اخذج ويايه وتعيشين يمي شتكولين

مرمر : اي اني زينة بس ماكدر اجي وياك زوجتك مراح تقبل وجبار وحامد محد بيهم يقبل

لا يقبلون محد يكدر يمنعج اني اوكف بوجههم

بصفتك شنو أبويه لو اخويه ضحكتني

أعتبريني أبوج لو أخوج

هو اني شفت أب لو اخ حتى اعتبرك واحد منهم روح وعوفني اني هاي حياتي ومجبورة أكملها سجينة جبار

كلماتها قهرتني أكثر شنو من الظلم اللي عاشتها حتى تحس بأحساس اكبر منها جاوبتها أعتبريني صديقج المدرسة اللي قريبة على بيتي كلش حلوة وراح تعجبج واني وسمر راح ندللج شتريدين بعد.

ميرا : عمتي كولي لجدي يرجعني للدوام راح يفصلوني من المدرسة الله يخليلج جهالج فدوة

فرح : خلي احجي ويا حامد كسرتو ظهري لاتسمعون كلامي ولا شي ومن تغلطون تتوسلون بيه شفتي الملعونة اختج صارلي أشكد تعبانة مجتي تباركلي بس ميخالف اليوم اني اروحلها بنفسي تدرين ميرا من شفت جهالي تذكرتكم من جابتكم امي للبيت جنت صغيرة بس حبيتكم اهواية لان جنت وحيدة اشكد جنتو حلوين امي الله يرحمها اهواية جانت تحب مرمر كبرتو واني كبرت ومحسيت بطفولتي .

عفرا : رحت للمقبرة لوحدي اول مرة اطلع من البيت بعد مامات حسن نظفت قبره وجبت ورود جديدة رشيت مي عليها واني أحجيله معناتي وابجي اشكد اكره روحي من اشوف نفسي اتنفس واعيش وانت جوا التراب ميت متستاهل اباوع على المكان اللي بيه ملايين من الشباب مثل حسن ياترى كل اللي عايفينهم حالتهم مثلي لو عايشين وشايفين حياتهم أمسح اسمه وابوسه يارتني طاوعتك حسن وخليتك تاخذني يمكن جنت احمل منك وتعوفلي بذرة حبنا يصبرني مماتك ودعته واني امسح دموعي وامشي ارجع لغرفتي اللي متروسة بذكرياتنا من ورق رسائل للعطور والهدايا والملابس وألخ .

مرمر : جنت بالمطبخ جبار مموجود شفت عمتي اشكد جنت احبها كرهتها من ورا زوجها

فرح : ليش تباوعيلي من بعيد متريدين تسلمين عليه وتباركيلي لو شنو

مرمر : اباركلج على اولاد حامد لو ابارك لنفسي عمتي تخلت عني علمود زوجها

فرح : عفية عليج جنت مراهقة وانتي وياهاي اشرت لميرا بعدكم صغار تركتكم امكم وراحت ويا ابوكم جنت أحير شلون أربيكم وانظفكم واهتم بيكم طول الليل من تمرضون لو أحضركم وتروحون للدوام واني اللي انحرمت منه اتحسر اشوف اللي بكدي رايحين للمدرسة وجنطتهم على ظهرهم واني حايرة اكنس لو اطبخ لو انظف لو ادرسكم كبرتو وحمدت ربي على وجودكم ولا يوم شكيت من شي جنت راضية بتعبي تزوجت وانظلمت زوجوني مرة ثانية وشفت نفسي تدرين هذا زوجي اللي تحجين عليه اشكد يهمه مصلحتكم ويهتم بيكم اكثر مني بس ميفيد وياج اذا مو بعينج تعب عمتج يهمج زوجها اشكرج يابنت اخويه كفيتي وفيتي أني مو راضية تسافرين ويا نزار بس سمعت حضرتج محضرة نفسج ومو مصدكة يمتى تخلصين من عدنا .

ميرا : عمتي كافي لاتنقهرين مرمر متقصد اكيد هي تحبج اهواية وكلبها طيب بس مقهورة وماتقصد تجرحج

مرمر : لا اقصد وخصوصا زوجج عمري مراح اسامحه ولا اسامحج المفروض تعوفينه وترجعين تعيشين ويانا من شفتي شلون يعاملني مثل حيوانة بس انتي مضحيتي بيه ضحيتي بيه واني راح اروح ويا عمو نزار وماريد اشوفكم بحياتي راح اتبرى منكم وخصوصا جبار

نزار : خابرت سمر وحجيت وياها فهمتها سالفة مرمر وانه تعيش بحالة نفسية مو زينة اجيبها يمنا تغير جو بالبداية مقبلت اكيد من غيرتها وتتقيد حريتنا كتلها بعدها طفلة وهم نكسب بيها ثواب لان يتيمة كدرت اقنعها اليوم راح أخذها ويايه والله يعني عليهم سمر وغيرتها وهاي ام راس يابس ولسانها اللي اكبر من طولها .

شامل :امي مو مقتنعة اسافر بقيت شهر احاول وياها مو راضية واني ماحب ازعلها مني متفهم اني اموت كلما ادخل البيت اكثر وقتي اقضيه بالشقة حتى اخذ راحتي واشرب وادخن امل مااشوفها وامجد يحاول اعوف الشرب واني ولا يمي شي اهل غسق بين يومين واشوفهم ببيتنا اكثر وحدة تفهمني منار يمكن لان غسق أختها هي تشجعني اغير جو فترة وارجع اليوم لاول مرة صعدت للطابق الثاني معزول عن الطابق الاول حسب مارادت غسق فتحت الباب حسيت ريحتها بكل مكان وهي تركض تضحك تغير بالاثاث اللي كلها من ذوقها رغم اختلافنا عليها تحب الالوان الصاخبة واني احب البيضة والهادية والاشياء الحديثة بس محبيت أتدخل بشي الطباخ اللي اخذته رغما عني شنو مسوي بحياتي حتى أسلم لأسوء مصير متحملت كسرت كلشي اعبر بيها عن غضبي برحيلها فتحت الغاز وحركت كلشي وقفلت الباب على نفسي اريد أروحلها ماريد اعيش بنص انسان أحس حتى النار اللي تلتهم الاثاث والشقة تبتعد عني متريد تقترب مني

ابو شامل : شميت ريحة حرق طلعت برا اشوف الجوارين بخير سمعت صياح وهوسة يم بابنا الخلفي باوعت النار تطلع من بيتنا صعدت ويا رجال المنطقة واحنا نحاول ندخل ونعرف مصدر النار اني متأكد مقفول ومحد يدخل بيه لحد ماسمعت صوت ابن جيرانه يكولي عمو شفت شامل دخل قبل ساعة اني من الهبطة كعدت مستحيل يكون عايش رفعت وجهي لله يارب نجي ابني ماعندي غيره عرفت هو مسوي هالشي ابني يريد يموت مو مقتنع بموت غسق والقضاء والقدر ابني ماعنده ايمان بربه مع الاسف الجوارين مقصرو نزلوني ودخلو وكلهم منتظرين يطلعون جثته بس اني ايماني بربي وثقتي ورجائي بيه عمري مخيبني شفتهم وهمه يجرون شامل وينزلونه وسط انداهش الكل مصاير بيه شي بس فاقد الوعي من غير مااعاينه سجدت شكر لله انداريت على صياح ام شامل وبنتي نور وهمه راجعين من السوك .

أمل : جنت كاعدة ويامنار اشرب جاي اليوم عندي مناوبة وهي تداوم جديد وكالعادة ميعجبها تحجي ويا احد تنجبر تكعد وتحجي ويايه واكثر سوالفها عن شامل واهلها كمت اطلع شفت داخلين ناس من بينهم عمي ابو شامل ركضت عليه واني خايفة شفت شامل متمدد على السرير يمه لطمت نسيت نفسي وظيفتي ولا عليه من العالم راح الغالي شامل شبيك بابا اخويه مات

أمجد : شفت الخبلة امل وهي تصيح وتلطم والعالم تباوع عليها هي وصدريتها شكلها كارثة ردت اضحك عليها بس الموقف صعب جريتها وسكتتها ولج عيب فضحتي نفسج مابيه شي فاقد وعي

شامل : بس فتحت عيني شفت نفسي بغرفة بيضة واهلي واكفين على راسي وامي تسبني من جهة وامل من جهة واني مافهم شنو السالفة يعني اني مو ميت مرحت يم غسق لعد الحريق شنو جان حلم اريد اكوم امجد ضربني ونيمني مرة ثانية شكو

ام شامل : وعندك عين تسأل شكو هاي سواية تسويها متخاف من الله تريد تموت كافر هاي تربيتي الله ياخذني على هالتربية زين كل هاي علمود تسافر هسة احرك الجواز على راسك انت ميت ميت

أبو شامل : باوعت عليه بعتب متصورت توصل لدرجة تقتل روحك ليش هيجي شامل سافر ابني اذا هذا الشي يريحك كومي نروح ام شامل وانتي نور خلي امجد يبقى ويا.

أمل : ليش شامل تسوي هيجي بينا مو حرام ابوك وامك كل يوم طالعلهم بسالفة اشرت لامجد بعد لو يموت لاتصيحني افتهمت كله منك شفت منار بوجهي باوعتلها تريد تسال روحي شوفي بنفسج عن اذنج كرهتها لان أختها السبب باللي يصير .

شامل : طلعت من المستشفى بعدها بأيام سافرت أمي أقتنعت الوحيدة اللي مقبلت تودعني أمل صعدت بالطيارة واني مو ناوي ارجع أبد حركت ذكرياتي كلها البيت وراح السيارة وبعتها الشقة مبقيت بيها شي حتى لبس مأخذت ويايه ماعدا جوازي ومحفظتي واللبس اللي عليه .