علمني كيف الحب يداوي الفصل العشرون 20 - بقلم Chrakirkuki

#علمني_كيف_الحب_يداوي 20

شامل : الفلوس اللي عندي بدت تقل حاير ارجع لو ابقى اهنا وأهلي من احجي وياهم دموع أمي وتنهيدات أبويه من يسألني يمتى ترجع واجاوبه مادري يكولي براحتك ابني يقهرني لا أكو مخرج ولا حل لحالتي سمعت صوت الباب واني البس قميصي أكيد دعاء كعادتها تسوي حملة تفتيشية صباحية كرهتني بالنسوان تبت ماجيب بنات للشقة من وراها فتحت الباب شفت رجال غريب مبين مو اجنبي بدون مااسأل هو منو

مرحبا شامل وياك أبو تمارا ابن بلدك ممكن ادخل

اي تفضل اباوع عليه مشايفه بحياتي كومة اسئلة كعد وهو بدى يحجي بثقة

اكيد تسأل نفسك منو اني وشلون عرفتك من زمان احنا مراقبينك ونعرف تحركاتك وعجبتنا وخصوصا الزعيم متشوق يشوفك

لحظة شنو زعيم شنو مراقبة منو انت

أني طلعت هويتي شوفته تابع لمنظمة أمنية نشتغل ونساعد الحكومة بس اللي يوجهنا شخص مدني ماعنده علاقة لا بالسياسة ولا بالاحزاب واعضائنا أصحاب كفأة عالية ومتدربين أحسن تدريب

واني شنو دخلني بموضوعكم

أنت مطلوب شامل أي شخص عنده قدرات وعايش بالظلمة احنا نجيبه يمنا يعني بالمختصر اخترناك تنظم ألنا وصدكني مراح تخسر لأن اللي مثلك ومثلي عايشين بس داخلهم ميت أحنا راح نساعد الناس نتخلص من العصابات ونقبض عليهم شغلنا صعب وبي مخاوف بس من تشوف نفسك تحرر روح انسان بين ايدين عصابة لو متخلي يتاجرون بالمخدرات حتى يدمرون شباب بلدك لو يعتدون على النسوان وغيرها من الجرائم اللي يسووها المسؤولين والجماعات الاسلامية والاحزاب من تحت الطاولة راح ترجع تعيش

اول مرة اسمع هيجي شي دخت أني وين جنت عايش صح اكو اهواية اشياء تصير بس معرفت بيكم

شامل احنا منظمة سرية محد يعرف بأشخاصها هسة اني رجال حر اجي واروح محد يعرف شسوي مااسوي لان عندي وظيفة تسد على السالفة اني معلم بالقرى وبنفس الوقت امارس شغلي

بعدني مو مستوعب واصلا اني ماافيدكم عمري ملزمت سلاح بيدي ومنو يكول كلامك صح مو عكس انتو العصابة وتقتلون لو تخطفون الأبرياء

عبالك أنضمامك سهل بمجرد ماتوافق تروح تشتغل انت بمجرد دخولك راح تنسى نفسك وشخصيتك من التدريبات والمحاظرات اللي تشوفها احتمال تنجح بسنة احتمال سنتين من تجتاز اختباراتك تبدي تشترك بالعمليات هذا رقمي أذا حبيت تشاركنا ترى كلنا حالنا حالك فاقدين أعزازنا وكلبنا محروك عليهم مع السلامة شامل .

بقيت افتر بالشقة بدون هدف اباوع على الرقم بسيط وعادي وبدون اسم شنو هالسالفة اللي متدخل العقل يارب اطلع من مصيبة واتورط بغيرها شسوي ردت اشرب صبيت وذبيت الكاس طلعت على بيت دعاء اريد التهي وماافكر بشي وصلت كمت العب ويا جهالها واضحك ويا دعاء هي مستغربة مني تجي تبوسني وتشمني

دعاء : شامل متاكد مو شارب شي عزة لايكون تجرب حبوب طمني اليوم بيك شي غريب

صوجي اعبرج اروح انام بغرفة الجهال لحد مايجي هادي ويخلصني من اسئلتج صدعتي راسي رحت خابرت منار حجيت وياها شوية سألتها على أمل وعلى اهلها دكيت على أمجد عرفت أخو امل يريد يتزوج بس ميشتغل متأكد راح يأذون أمل امجد أخذ فلوس سيارتي يم أبويه اشتري بيه تكسي خلي هو يشتغل عليه بس ديربالك تكوله مني كوله مال أمك لان امل متكدر تروحلها وتسالها

مرمر : أخذتني سمر وياها للسوك ذوقها حلو كلش اول مرة البس هيجي تنانير قصيرة وكابوي وقمصان تلزك بالجسم وكومة غراض بناتية حبيت روحي بيها والاكسسوارات انواع واشكال كلما اكوللها كافي تكول حتى ترمين اللي عندج اباوع على روحي لو يشوفني جبار ينجلط ويموت

سمر : اباوع عليها بعدها مراهقة وشايلة هالجمال لو تكبر شتصير شلون اتحمل هاي تكون كدام نزار شبيج سمر تخبلتي ماعندج ثقة بحبيبج حاسبها طفلة ويشفق عليها تعرفين اخلاقه شايلة همها اخذتها لبيت أبوية ويايه راحت ويا اختي اكبر منها حجيت ويا امي دبريني ماما شسوي والله مااكرهها بس مادري احسها كابسة على نفسي

ام سمر : مو تكولين نزار ميشوفها من يرجع هي بغرفتها بعد شكو شبيج ماكلة روحج زوجج استاذ بالجامعة كومة طالبات وياه ميباوع عليهم عينه على هاي اكيد تخبلتي

سمر : ناوية انطيها غرفة الاستقبال بيها تواليت ومغسلة حتى متطلع بالليل تتحجج بيها ومو مهم اجيبلها اثاث جديد ماريد استقبال يكيفني الصالة جبيرة شتكولين مو راح اموت من التوتر

اخو سمر : منو هالحلوى اللي وياج اول مرة اشوفها لايكون هاي الطفلة اللي تحجون عليها

سمر : عيب عليك شنو حلوى وانت شكو تروح تباوع عليها لو يعرف نزار يزعل اني من وراك ماكدر اجيبها ويايه

اخو سمر : والله شلون بخت عليه نزار يوميا يصبح بهيجي شي اوف تموت تملخ

سمر : اني فقدت من كلامه شنو هالحجي هاي مثل بنته عصبت طلعت من بيتهم طول الطريق افكر بكلامه واباوع عليها يعني الرجال من يكبرون عينهم على البنات المراهقات يتأثرون بيهم لا هو كذاب وسرسري شسوي ياربي وصلنا نزار موجود.

نزار : هاي وينكم حبي تأخرتو طلبتلكم عشا وانتي مرمر طلبتلج بيتزا مثل ماتحبين ماشالله متغيرة طالعة بنوتة حلوة روحي بدلي واني عندي حجي مع سمر رحنا لغرفتنا شبيج عمري دمعتج بعينج صار شي

سمر : متحملت كلامه ويا مرمر بجيت الله عليك نزار لاتخوني اذا سويتها قبلها اذبحني اهون عليه والله العظيم احبك لا اعبدك

نزار : عمري ماكو مرة بالدنيا تساوي ظفرج عندي هذا الشي طلعي من بالج تحبين نطلع برا تغيرين جو واني بحضني القمر مالي بالنجوم

سمر : ومرمر ناخذها ويانا مو ردت اتأكد اهتمامه بيها عادي لو غير شي

نزار : لا تبقى بالبيت هسة يوصل عشاها اني وانتي نروح نسهر براحتنا هي عدها مدرسة

مرمر : اوف مصدكت رجعت للبيت اشكد مكروه وغثيث أخوها اصلا عائلتها كلهم مكروهين وشايفين نفسهم كعدت اكل بعد ماعافوني شغلت التلفزيون واني ماخذة راحتي اغير من محطة لمحطة اباوع على مسلسلات واغاني اللي جنا محرومين منها حطيتها على قناة رقص حبيت اجرب كمت اسوي حركات واحس بشي حلو علمود هاي سمر متونسة من تركص حقها بس نزار هم يتونس وياها ماعرف ليش شعليه بيهم تعبت غيرت المحطة طلع شغلات اول مرة اشوفها عيني طلعت من مكانها شنو هاي من الخوف سديت التلفزيون ورحت نمت .

عفرا : رحت على بيت حسن بين اسبوعين اروح ابات يمهم ناويين يسافرون امه وابوه حبيت اودعهم وابقى يمهم كلش يتونسون بيه دخلت بالليل لغرفة حسن حتى الحايط مشتاقتله أريد اشم عطرك بكل مكان فتحت الدولاب طلعت علبة العطر باقي بيه قليل رشيت على السرير ونمت عليه واني ألمس المكان وابوسه وابجي
ليش مااشفي من حبك هذا مرض مو حب حتى اهلك تعودو على غيابك ليش اني مااتعود لو ترجعلي لو اشفيني منك حللني تعبني غيابك هاي محادثاتي الليلية ويا حسن.

حامد : بست فرح جانت نايمة واولادي نزلت اصلي الفجر كملت رحت اعاين على عمي واساعده يصلي شفت ميرا نايمة يم رجله باوعت على عمي وجهه اصفر تقربت ماكو نبض عمي متوفي لاحول ولاقوة الا بالله كومت ميرا فزت

ميرا : نزلت اخذ مي بالليل سمعت صوت جدي رحت جان يباوعلي ميكدر يحجي جنت احجي وياه ميجاوب عينه على صورة بابا ولازم ايدي خفت ماعرف شسوي نسيت اروح على بيت عمي لو اخابرهم جبت دوا الريو انطيته مفاد غمض عينه واني احجي واهز بيه ميجاوب بقيت يم رجله كاعدة انتظره يكوم عبالي نايم من البجي نمت ومحسيت بنفسي لحد ما صحاني عمو حامد وداني للصالة وكالي لاتطلعين وسد الباب شنو يصير ماعرف بقيت انتظره

فرح : عرفت بموت ابوية ملخت نفسي مو مستوعبة يعوفني بعد ماحسيت بحنانه وعطفه تعودت عليه راح اشكد حاولت خالتي مدينة وعفرا مااضرب نفسي والطم مجنت اجاوبهم وميرا نفس الشي مادري انقهر على روحي ولا عليها حامد جيبلي مرمر فدوة اروحلك

مرمر : سمعت صوت التليفون يدك بالصالة اكثر من مرة وهذولة نايمين العطلة ميكومون الا وقت العصر بالليل منايمين ولا خلوني انام من صوتهم سويت لنفسي عصير ولفة ودخلت غرفتي اليوم عندي حضر تجول نزار موجود وسمر تجيبلي اكلي بغرفتي بحجة ادرس لو نايمة وهمه يطلعون يسهرون ضجت رفعته سمعت صوت ميرا تريدني اروحلهم جبار ميت مستوعبت جاوبتها متاكدة مات وخلصنا منه الحمدالله وانتي ليش تبجين وضايجة فرحي اليوم عيدنا قفلته بوجهي بطرانة عبالها ابجي لو انقهر شفت نزار طلع من الغرفة لابس شورت بس خجلت كلش

نزار : صباح الخير مرمر منو جان على التليفون

هاي ميرا تكول جبار مات

شنو عمي توفى وانتي ليش هيجي تكوليها كأنه عادي عندج متستحين من نفسج روحي حضري نفسج حتى نسافر

شنو ولا اسافر ولا شي مستحيل اروحلهم مناسية شنو سوو بيه

لاتصيرين حقودة بعدج مشايفة شي من الدنيا كلبج لايصير اسود روحي قبل لا اعصب

شنو تهددني فتح عينه على الأخير وتقرب مني لزكني بالحايط والله لو تجبرني اروح اكول لسمر كلشي وراح تشوف شيصير بس هذا باقي اروح اعزي حامد لو فرح اللي باعتني

سمر : طلعت من الغرفة انصدمت صحت شنو هذا شبيكم نزار ليش ملابس ياربي شنو يحجون هذولة بصوت ناصي وحاشرها بزاوية

نزار : متوقعت مرمر تكون بهالحقارة ردت اموتها على أسلوبها بس سمر خربت علينه أخر عمري زعطوطة تهددني عفتها ودخلت لغرفتي وسمر تسأل كافي صدعتيني عمي مات مو رايح اتونس تجين اهلا وسهلا متجين طلعي برا وخليني احضر نفسي

سمر : اول مرة يعصب عليه ووهاي شنسوي بيها مو راضية تجي نعوفها

نزار : خلي تولي وين ماتريد لو ابقي يمها مع السلامة .

سمر : ودعته لاحضني ولاباسني أحجيلي شنو صار بينكم شنو جنتو تكولون

مرمر : شيخلصني منها هالمريضة ماكو شي يريدني اروح وياه مقبلت عن اذنج

سمر : جريتها من شعرها وضربتها كلشي اتحملت منج بس تخلين عينج على زوجي اموتج اذبحج بيدي افتهمتي حقيرة اعاملج احسن معاملة واهتم بيج هاي نهايتها بت الشوارع

مرمر : مكدرت اكوللها شي من الصدمة صح هي مو مجبورة تتحملني بس كتلها نزار عمي ومثل ابويه مو غير شي مقتنعت ضلت تحجي وتسبني طول ماهو مسافر

ميرا : مرت شهر على وفاة جدي عمتي تنام يمي لان جان عدنا ضيوف راحو صفينا اني وياها سألتها عمة شيصير بيه بعد لا اب لا ام لا اخت ماتحمل افكر شلون اعيش وحدي

فرح : مسحت على شعرها راح اخذج ويايه لاتخافين راح تبقين بغرفة عفرا لحد ماارتبلج غرفة خاصة بيج تعبت كلش هالفترة بارحة حللت طلعت حامل رغم جنت ممتوقعة احمل من جديد بس ماكو شي صعب على رب العالمين لمينا البيت ونظفنا استغرب انتي واختج شلون توم انتي كتلة من الحنان والمشاعر هي بالعكس مراح اسامحها أبد تمنيت على الاقل تجي وتكون وياج حتى مكلفت على نفسها تخابرني ماهتميت اني خابرتها سدته بوجهي مادري على منو طالعة

حامد : كافي بجي عمري مو زين عليج خطية كلش جان تعبان بأخر ايامه ارتاح ادعيله بس شوفي الجهال شلون يباوعون عليج خايفين من شكلج

فرح : باوعت عليهم حضنتهم وبستهم الله لايحرمني منك حبيبي لو لا وجودك بحياتي هسة اني ضايعة واشكرك اهواية على الغرفة اللي مشتري لميرا مجان اكو داعي جنت أجيب غرفتها لهنا

حامد : اشش ماريد اسمع شي هي بنتي انتي ماعليج خليها تفرح شوية اني مسويت شي اني المفروض اشكرج اشكد تتعبين علمودي وعلمود اهلي ولا يوم سمعتج تشتكين واحترمتي قراري ابقى بيت اهلي ومنسكن ببيت اهلج رغم غرفتنا صغيرة وعدنا جهال اثنين والثالث بالطريق بس انتي تدرين اهلي بحاجتي وماعدهم غيري احبج يااحلى واعز مخلوقة عندي بالدنيا .