علمني كيف الحب يداوي الفصل الحادي عشر 11 - بقلم Chrakirkuki

#علمني_كيف_الحب_يداوي 11

لمحات من الماضي 10

فرح : اليوم عرسي بعد اسبوع من خطوبة صارت لحد الان مشفت الولد بس اهله امه وخواته حتى الغراض والذهب همه جابوها على ذوقهم طلبات الولد البس نقاب عادي عندي اصلا ماتصور اطلع وبيت وحدي غير هذا ماعرف عنه شي

عفرا : ماشالله فروحة اشكد حلوة طالعة تخبلين وين جنتي ضامة هالجمال ادعيلي يوم اليه كرصيني بكل مكان وكولي انشالله عفرا تصير من نصيب حسن

فرح : انشالله حبيبتي تصيرين من قسمته ماريد اعيد عليج ميرا ومرمر بأمانتج كل خوفي على مرمر اهواية تتلاسن ويا ابويه وهو يضربها واني مو موجودة خاف تصير بيها شي

مدينة : لاتهتمين حبيبتي ديربالج على حالج وبس واي شي تردينه خابريني واجيلج طيارة اعتبريني امج لاتستحين ومثل ماوصيتج البارحة زين بنتي دمعت عيني وينج نورجان بنتج مكملت 18 سنة زوجها اللي ميخاف ربه

فرح : دخلت لبيت زوجي اول مرة ادخل بيت غير بيتنا وبيت عمي سمعت صوته بعدني مشايفة شي سحبت النقاب باوعلي ونزل راسه اصلا مكدرت اشوف شكله كلش خجلت بس ادعي ربي يعدي هالليلة على خير

هاي غرفتج واي شي تحتاجينه كولي لاتستحين ياريت اي شي يصير بيناتنا محد يعرف بيه خلي الله بين عيونج وصوني حرمة بيتج

فرح : معرفت شنو يقصد اصلا جاوبته انشالله بدلت لبسي وانتظرته تأخر نمت بمكاني حتى متعشيت صبح كمت هو ماكو يمي والفراش مثل ماهو والاكل باقي بمكانه سمعت صوت الباب لحظات ودخل للغرفة مثل الطيارة شايل فراش فتح الكنتور ورتبه على السريع وخرب الشراشف على السرير الغرفة صارت حلبة مصارعة راح بقيت بمكاني حتى دخلت امه تهلل جايبة فطور واني بيناتهم واكفة مثل الاطرش بالزفة

حامد : صارلي فترة أتعينت واداوم حبيبتي أسمها طلعت بنفس القسم اللي اداوم بيه لو بيدي ابقى بالدوام وماارجع للبيت حتى تبقى كدام عيني ردت احجي ويا اهلي بهالموضوع بس زواج فرح خرب الموضوع أهلي مقهورين عليها اهواية .

أمل : رجعت لبيتي بعد ماودعت دعاء سافرت وراحت بقيت يومين ابجي وراها هاي اختي وكاتمة اسراري الله يعلم يمتى راح أشوفها مرة ثانية البيت هوسة و غراضي بالصالة دخلت غرفتي صاير غير شي كرسي وميز وسرير كراسي داير مداير الغرفة وكراتين صيحت على رضا شنو هذا وين مودي غراضي

رضا : ها دكتورتنا رجعتي على الخير شوفي المفاجاة اللي سويناها اني وامج هاي عيادتج الخاصة وحتى جبتلج ابر وادوية وراح اعلك لوحة كدام الباب حتى الناس تعرفج اكثر

أمل : ياربي شنو الصدمات اللي تصير بحياتي مسوي غرفتي عيادة شكول شحجي ماكو فايدة ماما تدرين اني شنو نهايتي داخلة السجن لامحال يا اما قتل بدون عمد اضرب ابرة بالغلط يااما قتل بعمد باوعت على رضا

ام امل : تعالي احجيلي شلون جانت الحفلة وشنو جبتيلنا وياج بعدين نحجي بموضوع عيادتج عندي الج خوش فكرة

امل : بعد عندج مصيبة ثانية صدميني بيها عادي استقبلها الليلة كلها اخذي راحتج

أم امل : فكرت احجي ويا شامل بلكي يشوفلج عريس من اللي يشتغلون وياه لو اللي يعرفهم هم تتسترين هم الناس مراح تجيب سيرتج من تطلعين ويا شامل وامجد

امل : يااما اتزوج حتى اسكت الناس واتستر يااما ابقى عانس وانفضح مو هذا حجي جديد رضا افندي بعد شنو باقي تسمم راس أمي بيها
مو كافي راح اعوفلج البيت واروح اهج خلي صدك تنفضحون

رضا : لا دخيلج والعيادة اللي سويتها الج والناس اللي انطيتهم خبر تضربين ابر وتفحصين الضغط والسكري والادوية اللي جبته الج منو يصرفه لاتتزوجين ولا شي ابقي وهيتي براحتج ويا أمجد ويا شامل شعلينا بيج ارتاحي باللي يعجبج
جسمج وانتي حرة بيه

شامل : طلبت ايد غسق من اهلها صار معرفتي بيها وروحتنا وجياتنا اهواية كلش عاجبتني انتظر الرد منهم حتى اخطبها رسمي شغلي زين كل فترة اشتري قطعة اثاث بالاسبوع مرة نجتمع بيها اني وامل وامجد .

فرح : مرت الايام وعلاقتنا غريبة ميقبل ادخل بحياته حتى لبسه ميقبل اغسله ينام وحده محيجي شي دايما ساكت لو يصلي مرات اسمع صوته بالليل ماعرف يحجي بالتليفون لو ويا نفسه اني اقفل الباب عليه هو طلب هالشي مني حتى لو اكسر الباب متفتحي ايام مياكل حابس نفسه بغرفته واهله مشفتهم من بعد الاسبوعية امه اخذت الذهب والهدايا والفلوس اللي جتني وراحت من ناحيته هو مرتاحة بس ميقبل اطلع لو ازور ابويه ولا همه اجوني غير اول اسبوع لازم اسكت وانتظر نهايتي ويا هذا الشخص الغريب .

عفرا : طلعنا من المعهد شفت سيارة حسن كلبي يدك ماكدر اكمل المشي خطواتي صارت بطيئة هو يتقدم اني يصير بيه شلل

هنا : امشي مو وياج احجي هذا حسن نزل اكيد جان ينتظرنا هسة غير يموتني الله يستر ولج شبيج وكفتي اني احجي وهي ولا كأنه

حسن : شفت عفرا صارلي أشكد اعرفها هي صديقة اختي هنا تحجيلي سوالفها واعرف اخبارها صرت مدمن اسم عفرا من حجي اختي عليها نزلت اليوم حتى اعرض اوصلها ويانه دايما متقبل اليوم لازم ابدي اتجرء سلمت حجيت وياهم خطية صارت حمرة من الخجل عجبتني عيونها أهواية

عفرا : هو يحجي اني ساكته متصورت راح أشوفه بهالقرب دايما هو بالسيارة يسلم من بعيد مرات اخابر هنا هو يشيله واني أظل ساكته وهو هم واحد يسمع نفس اللاخ لحد مااسده من نفسي وترجع هنا تخابرني

هنا : راح اموت من البرد تعالي نوصلج ليش معاندة هسة حضرة الضابط عرض عليج بنفسه بعد شتريدين

حسن : يالله عفرا لاتعاندين مااكل بشر اني وبعدين بيتكم بعيد لحد ماتوصلين للمواصلات يصير بيج شي من البرد 😉😍

عفرا : اخاف زحمة لان بيتكم بغير طريق خجلني حسن بأسلوبه هنا دايما تركب ويايه من يجون نزار لو حامد عادي عدها بس اني اول مرة اركب ويا حسن حتى سيارته وريحة عطره مميزة عندي صدمني من وصلني كال باجر راح نجيكم خطار تستقبلونه لو لا مجاوبته سلمت ونزلت على السريع دخلت للبيت واني افكر بكلامه شنو جان يقصد وليش يجون لبيتنا فعلا خلال اسبوع انخطبت لحب حياتي حسن

ميرا : كعدت اسوي فطور سمعت صوت جدي يكح بقوة خفت ركضت عليه لونه متغير بابا الله يخليك جاوبني ميكدر يرد رحت دكيت باب بيت عمي طلع حامد الله يخليك الحكني جدي يموت

مرمر : نزلت على صياح ميرا شفت جدي مهما يكرهنا ويأذينه ماعدنا غيره ركضت عليه انطيته جهاز الربو ميرا من الخوف نست يمكن لحظات وبيت عمي كلهم جانو يمنا حالته تسوء

ابو حامد : ابني روح حضر السيارة وانت نزار شيل عمك ناخذه للمستشفى الله يستر ام حامد خابري فرح خلي تجي يم البنات بس لاتخوفوها

شامل : كطعنا مهر اليوم حفلة خطوبتنا علاقتنا تطورت مخابرات ومرات اروح يمها للروضة اشوفها سمعت صوت امي تهلل وتبجي هسة معرفت فرحانة لو ضايجة حيرتيني وياج

ام شامل : فرحانة ياحبيبي دموع الفرح الله يتمم على الخير واشوف جهالك بعد سنة بحضني

ابو شامل : هو ناوي يتزوجها بعد سنة منين يجيبلج الجهال كولي بعد سنتين يالله أني وامك نروح بسيارتي وانت امجد ينتظرك يكول ازفه بيدي ومسويلك مفاجاة

شامل : نزلت جايب فرقة استعراضية ومزاعيق كدام الباب متصورت هيجي يسوي يجرني اركص وياهم فرحان اكثر مني

امجد : شوف البخت سنين اكول اتزوج وماصار قسمة وحضرتك جنت تكول بعدني صغير وسبقتني مو المفروض نتزوج سويه

شامل : اني لكيت حبيبتي وماعليه بيك بعد ههههه امجد اليوم اني اسعد انسان وصلنا لبيت غسق حبيبتي طالعة كلش حلوة ومتغيرة

منار : فرحتي تحطمت من طلب شامل ايد غسق أختي جانت الصدمة كلش جبيرة عليه بس مخليتهم يحسون بشي مردت ابين اني احبه مردت اكسر فرحة أختي شفت شامل شلون يباوعلها بكل حب ونظرات عشق متت بمكاني ويا كل اغنية يركصون عليها اني انزف أكثر

أمل: أني بجيت أكثر يمكن من أم شامل نفسها بعدني أتذكر شامل وهو مراهق يدافع عني واني طفلة ضعيفة ومكسورة انشالله يتهنى بس غسق نظراتها غريبة اليه أحسها ضايجة ومو مرتاحة مني بس علمود شامل غلست اباوع على امجد خطية من زمان يريد يتزوج ويصير عنده عائلة بس قسمته متصير أريد الحفلة تخلص وارجع لبيتنا حبيت شغلي الجديد والمضحك رضا مسوي نفسه المساعد مالتي ويصيحني كدام المرضى دكتورتنا .

فرح : سمعت صوت بالليل اريد اعرف ويا منو يحجي التليفون بالصالة ومااتصور احد وياه لعد فتحت الباب أنصدمت نايم وملابس شي يحجي ويضحك يباوع على الحايط وفرحان باوعت ماكو أحد شافني كمز اني ركضت لغرفتي وأرجف اريد اقفل الباب من الخوف ايدي ماتحكم بيها

ليش هيجي سويتي فرح مو كلتلج لاتقتربين مني زين زعلتيها راح تأذيج وانتي تستاهلين فضولج راح يوديج بمصيبة

فرح : شنو اللي شفته ومنو هي احجيلي تعبت من حياتي كعدت ابجي دخل عليه ضربني موتني من الضرب أحس ايده حديد مو ايد طبيعي

ارتاحيتي هسة زوجتي زعلت وهي ضربتج هذا اقل شي لان توسلت بيها متأذيج اكثر لاتتدخلين بيناتنا

فرح : منو زوجتك اني مااشوف وحدة وياك فهمني شنو بيك واني امسح الدم على شفايفي

اني متزوج وحدة من الجن اذا كلتي او حجيتي لأحد محد يصدكج وزوجتي راح تذبحج بعد كيفج

فرح : اطلع من غرفتي راح اتخبل صدك جذب شنو متزوج من الجن الليلة مجانت تخلص عندي صرت اخاف كملت سنتي الثانية وياه على نفس الحال صار يحجي كدامي ويضحك ميقبل حتى اطبخله بالشهر مرة ياخذني يم ابويه بعد تهديدات منه ويكعد ويايه نص ساعة ويرجعني يخاف احجي لأحد على سالفته اقل كلمة يضربني عليها البس شي يحجي يكول نزعي زوجتي تغار واذا مسمعت كلامه يضربني لحد مافد يوم جاب امه وياه بالليل لان هددته احجي لابويه

تعالي وحدة سافلة جبناج من الشارع تهددين ابني بمنو ها ناقصة نسيتي امج منو هجت ويا ابوج عبالج منعرف سوالفكم التعبانة

فرح : عيب هالحجي خالة شنو شفتي مني سنتين يمكم مشفتج بيها الا اول ايام زواجنا بيتكم ماعرف وين صاير ساكته وتجين تحجين على امي واهلي مااقبلها واني مجيت من الشارع كتلتني كتل هي وابنها وغير الاتهامات بشرفي واني لحد الان بنية طلعوني من البيت بنص الليل واني بملابس البيت حتى حجاب ماكو توسلت بيها تنطيني مقبلت اول مرة اطلع وشعري يبين وماعرف الجوارين منو وشنو خفت ادك باب طلع شاب من جوارينه باوعلي

محتاجة شي اختي ليش طالعة بهالليل من وين انتي

فرح : اشرتله على بيتي واني ماكدر احجي شي لحظات وشفت حجية اتقربت مني

تعالي بنتي شنو صاير بيج ابني سمع صوت صياح فوتي يمنا

فرح : اشكرج بس اريد شي اخلي على راسي ممكن اخابر اهلي يجون عليه ماعرف شلون خطرت على بالي اخابر بيت عمي ميصير اسكت بعد اللي صار كلشي ممكن اتحمل الا شرفي خابرت وطلعت كعدت بالحديقة مالتهم مقبلت اشرب مي همينه من خوفي والحجية تحجي وتسالني واني اجاوبها اي او لا

ابو حامد : حامد كوم بسرعة نروح نجيب فرح

حامد : بابا من وين نجيبها مو هي بيتها الساعة 2 شيودينا يمها

ابو حامد : كوم احجيلك بالطريق

حامد : وصلنا للفرع مالتهم واني مو مستوعب شي وكفنا يم بيت طلعلنا واحد شاب شفت فرح كاعدة وياهه مرة عجوز وجهها متورم وبي اثار دم وبملابس البيت تخبلت رحت عليها شمطلعج بهالليل شنو صاير لحد ماعرفنا السالفة من جيرانهم سامعين ومنها همينة رحت على بيتها ماكو احد الظاهر الافندي طالع

فرح : رحت لبيت عمي واني عبالي بحلم وكابوس شلون انفضحت بهالليل الله لايوفقهم من شافتني خالتي مدينة ضربت على وجهها

مدينة : يمه فرح هاي شمسوين بيج الله ينتقم منهم ليش محجيت من قبل ليش سكتي وهاي تاليها

فرح : همي الاكبر شلون ارجع لبيت ابويه وشلون افهمه بدون شي هو مصدك يخلص مني جنت عار من اني بنية يمه وهسة مطلقة فعلا اصعب شي جان هو مو متقبل وجودي واني مطلقة بعد مامرمطوني بالمحاكم ودفعنا كومة فلوس لحد ماتخلصت منهم .