علمني كيف الحب يداوي الفصل الثاني عشر 12 - بقلم Chrakirkuki

#علمني_كيف_الحب_يداوي 12

لمحات من الماضي 11

غسق : حبي يمتى ناوي تاخذني للشقة متشوقة اشوفها هلكد ماتحجيلي عليها

شامل : شتريدين من الشقة وصاحبها كدامج امل وامجد ماخذين المفتاح مني ميريدوني اروح محضريلي مفاجأة

غسق : من زمان احب احجي وياك بهالموضوع خفت تفهمني غلط معاجبني تدخل امل وامجد بحياتك وتعلقك بيهم المفروض الاولوية تكون اليه ياريت تعوفهم لو تفهمهم انه متريدهم بعد

شامل : متصورت انحط بهيجي موقف اتخلى عن أعز احبابي أمل وامجد على حساب كلبي جاوبتها بهدوء عمري كلشي مسموح الج تدخلين بيه يخصني ماعدا امل وامجد خط أحمر اتصور الجواب وصلج غيري الموضوع ماحب اسمعه مرة ثانية

غسق : ميصير شامل هذا شلون حب تحبني لازم اعيش ويا اهلك من نتزوج ومادخل بعلاقاتك شنو بقى

شامل : انتي معقدة الموضوع تعيشين طابق كامل خاص بيج مو مشترك كلتلج بداية علاقتنا اني وحيد اهلي ماكدر اعيش بعيد عنهم وانتي رضيتي بهالشي ماحب هالشي منج غسق لاتخليني اخذ غير فكرة عنج اني اختاريتج من بين كومة بنات حبيت برائتج وطيبتج ويا الاطفال لاتصدميني بوجه ثاني

غسق : مع الاسف شامل تقصد اني بوجهين مو اشكرك على شعورك الحلو خلي نرجع للبيت احسن كافي اللي سمعته .بكلبي كله منها الحقيرة امل اني الج اذا مخيلتج تندمين على يوم ولادتج فلا اني غسق.

عفرا : خطبني حسن اتفقنا زواجنا يكون بعد سنة لحد ما يترقى بعمله بطلب من ابوه كلش احبه احس الهوا اللي اتنفسه اليوم عازمني اطلع وياه نتعشى برا اكثر من مرة بدلت لبسي وميعجبني شي فرح جبتج تساعديني لو تصفنين على الحايط

مرمر : الله كل ملابسج حلوة وتعجبني بس اكبر واتزوج راح اشتري مثله واسوي كل اللي نفسي بيه

فرح : شنو هالحجي ست مرمر كومي روحي ساعدي خالة وانتي عفرا خاتون لاتحجين حبياتج كدام هالمراهقات ترى هي بدون شي عقلها ضارب مو ناقصني تعيش جو الحب وتاليتها طابوكة على راسها من ايد جبار

عفرا : هههههه شسوي ماكدر الزم لساني يمه الحب الله اشكد حلو الحب وحسن اروحله فدوة يارب اشوفج يوم يافرح بنت نورجان تحبين وتصيرين مخبلة من ورا وتصيحين كدام العالم هذا حبيبي مثلي

فرح : هاي بيا حلم من اني بنية ومافكر بالحب بعد ماصرت مطلقة عندي عين افكر بهيجي شي خليت الحب الج تتهنين بي اني جربت قسمتي طلعت خايسة كافي عليه جبار ميحجي ويايه كل مايمر من يمي لو يشوفني يشمرلي جم كلمة يسم البدن .

نزار : تخرجت من الجامعة وجنت الاول على دفعتي تعرفت على بنية جانت جاية ويا صديقتها اسمها سمر صار بيناتنا علاقة اريد اتزوجها بس انتظر اخ حامد يحن عيب اتزوج قبله بس ماتحمل حجيت ويا امي هي ماعدها مانع بشرط اعيش وياهم تبنيلي مشتمل بالحديقة كلش فرحت قررت اتقدم واخطبها بس شرطهم جان بيت وحدنا حسيت اهلي مو راضيين بس علمودي ساكتين واني صرت بين نار حبي ونار اهلي .

أمل : اشترينا دولاب صغير وحطينا بيها طباخ رتبنا المطبخ بشقة شامل اني وامجد جبنا قنفة صغيرة وكراسي اشياء بسيطة لحد مايكمله هو حتى من نروح اهناك نكدر نطبخ لو نحمي الاكل وبدل مانكعد بالكاع نكعد على كرسي طبعا كلها بلون ابيض لان لون شامل المفضل طبخت وسويت حلويات بالبيت اليوم راح نروح نجتمع أهناك ونسوي مفاجاة لشامل وكتله يعزم غسق ويجيبها وياه

امجد : الله ريحة الاكل يدوخ والله ماصدك انتي يطلع منج هالاشياء شكلج مال ابرة وديتول غير شي لا

امل : ولي حيوان اكولك شامل تاخر اخاف يبرد الاكل شغل الاضاءة كلها واني اراقب من البلكونة اذا شفته حتى احضر السفرة

غسق : شامل مو مصدكة راح اشوف مكانك المفضل اخيرا

شامل : حبي لاتتخيلين اهواية اصلا بس حايط وكاع بعدني ممشتري الاثاث لان صارت شغلتنه من يكمل بيتنا يالله ابدي بالشقة

غسق : اني اكول نعيش اهنا ونوفر مصاريف زايدة مو احسن بس راسك يابس متسمع كلامي دخلنا شفت المكروهين اهناك شوية وانفجر مستحيل ماشوفهم باي مكان بيه شامل خليت ايدي بايد شامل باوعت على امل سلمت عليها من ورا خشمي

شامل : شنو هالمفاجأة كلش حلوة صايرة اول مرة تسوون شغلة براسها خير الله عليكم جم مرة تعاركتو

أمل : كلش جنت فرحانة عجبه شامل اللي سويناه بس هاي تصرفاتها محلوة ابد اريد اغلس ماكدر بعد حتى نحجي وياها متجاوبنه لو تسوي نفسها متسمعنا وخصوصا من شامل حضني وباسني من راسي بقت تخزر بيه

امجد : أمولتي متعاركنا هالمرة صح يعني شامل هو السبب اني وانتي عقال هو راس المصايب

شامل : حمار شنو امولتي اخوها واكف كدامك اموتك هسة

امل : ميقصد حبيبي عادي هو هم مثلك اخوية ماكو فرق أمولتي احسن من قردة اللي يكولها

امجد : واني اخوج من الحليب الصناعي صار سنوات واني اشوفج تحضنين شامل وتبوسيه واني بس تحجين عليه وتضربيني الله ياخذلي حقي منج

غسق : كلش ضجت الاخ ناسيني وياهم كاعدين حجي وسوالف سخيفة بقينا ساعتين شامل راح يجيب عصاير ويا امجد بقيت ويا الحقيرة وحدنا شفتها تدخل للمطبخ رحت وراها اكول امل مو نظفتي وطبختي المفروض شغلج انتهى تكدرين تروحين

امل : شبيج غسق ويايه ملاحظة حركاتج من فترة ساكتة علمود شامل عندج شي

غسق : اي مليت وتعبت منج كافي مصارت اخته وشنو يعني استحي على روحج شوية اني ادري بيج تموتين على شامل وتسوين هالحركات بوس واحضان وانتي بالج غير شي

امل : وكع مني الماعون من الصدمة استغفرالله جاوبتها مع الاسف شامل مو بس اخويه ابويه اللي مالحكت اشم ريحته همينة يامريضة تفو عليج انتي مو من مستوى شامل

غسق : هاي كوليها لنفسج عوفي شامل اذا هو يصرف عليج اني انطيج دبل بس اختفي موتي انتهي من حياتنا ترى افضحج بالمنطقة فضيحة مصايرة وهسة طلعي من الشقة ماريد اشوف وجهج اذا صدك معتبرة شامل اخوج ويهمج سعادته مو غير شي

أمل : حسبي الله ونعم الوكيل ذبيت الصدرية وشلت غراضي وطلعت مو دمعة وحدة لا دموع تنزل مني ماكدر حتى اسيطر عليها هاي نهايتي ويا اخويه انحرم منه بسبب هالاشكال يعني راح شامل حزام ظهري وسندي بهالحياة بعد المن اشكي احس الناس كلها تباوع عليه حتى نسيت نفسي وين رايحة

شامل : رجعنا امل ماكو سألت غسق كالت رايحة عدها شغل بالبيت امجد استاذن راح همينه بقينا وحدنا اني وغسق

امجد : طلعت بسيارتي ادور أمل بالفروع القريبة يم البنايات ماكو دورت لحد ماشفت وحدة كاعدة على الرصيف ومدنكة راسها جسمها يهتز وكفت يمها

امل : ذلتني واهانتني استاهل هيجي شي امجد اني صدك مو خوش بنية الله عليك انت شلون تشوفني

امجد : تاكدت صاير شي بينها وبين غسق ياحيوان كلج هيجي وبعدين اني مااشوفج بنية شلون اشوفج وحدة مو زينة انتي بمية رجال رفعي راسج ياريت كل البنات مثلج مسترجلة

امل : حمار متصيرلك جارة كعدنا اني وامجد بالشارع ساعات نحجي ونصنف ونسولف نسيت جزء من اللي صار قررت ابتعد عن شامل واهتم بشغلي .

حسن : عفرا هاي مو حالة شكو بيها يصير شي بيناتنا ماتحمل انتظر بعد

عفرا : حبيبي اني هم اتمنى اكون يمك اليوم قبل باجر بس ميصير شلون اسوي هالشي اني صح اهلي منطيني حرية اطلع وياك بس ابويه من اول يوم كلي لاتتعدين حدودج

حسن : راح يصير هالشي بيناتنا محد يعرف واني زوجج مطلبت شي منج بالحرام قدري ظروفي بالشهر مرتين اشوفج من ارجع للدوام اموت من الشوق اريد هالمرة من ارجع واني مرتاح بالي

عفرا : لو تحبني حسن لاتطلب مني هالشي لان صدك تاذيني وانت اصلا ممقصر بوسات واحضان خلي حدود بيناتنا لاتزعل مني بعدين ليش متحجي ويا ابوك اني راضية بغرفتك نتزوج ونعيش ماريد بيت وحدي او نعزل عن اهلك ولا اريد غراض متهنمي هالسوالف كل اللي يهمني انت حسن اعيش وياك

حسن : مو راضي تعبني شسوي وياه يكول تترقى ويا المنصب الجديد اسويلك حفلتين واني ماريد ازعل ابويه مني هو كلش يحبني وتعب علمودي فضلني على اخويه

عفرا : صدك اني اول مرة اسمع عن اخوك حتى هنا مجانت تحجي عليه وين هو

حسن : هاجر ومنعرف وينه تقريبا متبرين منه لان جان انسان طايش ويسوي مشاكل وميحترم ابويه ياريت منحجي بهالسالفة ولا تسألين اهلي عليه اتفقنا نرجع لموضوعنا حني عليه يابنت الحلال خلينا نعيش الحب .

ام حامد : ابني حبيبي شبيك كاعد ضايج متزاعل ويا سمر لو شنو

نزار : بصراحة اكو شي بس خايف اكولج لاتصير بيج شي

ام حامد : من يمتى تخبي عليه ها كول ناقصك شي تريد فلوس

نزار : ماما سمر تريد نعيش يم اهلها متكدر تعيش اهنا واني ماعرف شسوي حاير

أم حامد : صار اللي خفت منه ليش ياربي هيجي وانت تريد تروح يمهم وتبتعد عني نزار اذا ساعة تتاخر برا كلبي يوجعني لعد شسوي من تبتعد وتروح تعيش بغير مدينة تبعد عني 3 ساعات يمكن اموت

نزار : اسم الله عليج شفتي علمود هاي محجيت عرفت هاي جوابج ماما وين رايحة مو نحجي

حامد : شبيها ماما ضايجة وراحت حتى سلمت مجاوبتني

نزار : غير حضي المصخم حجيتلها المشكلة وزعلت راح اموت اذا سمر عافتني

حامد : عيب عليك رجال طول بعرض شنو تموت علمود وحدة

نزار : اي متعرف شي عن مشاعر بارد صدك حجيت وبا البنية لو بعدك بس تباوع مو كلت راح افاتحها بالموضوع

حامد : خبرك عتيك حجيت وياها بس تريد نتعرف فترة وبعدين اتقدملها بس احس تصرفاتها تتغير غير عن الاعدادية والكلية بارحة صدمتني نازعة حجابها ومغيرة ستايلها محبيت احجي شي مو من حقي بصفتي شنو امنعها بس حتى اللي ويانا انصدمو

نزار : الحجاب مو مقياس الاخلاق هذا ايمان وهي حرة من تتزوجها صير ذيب ولفلفها براحتك دبرني هسة قنع ماما اريد اتزوج هالشهر ترى
قدمت على الجامعة وقبلوني اصير معيد بيها يعني هالمكان راح يكون فاتحة خير عليه

حامد : مكمل كلشي يعني باقي تاخذ موافقة ماما روح كمل غراضك ومعليك بيها اني اقنعها حتى لو اضطريت اجيبها تعيش وياك

نزار : ياريت والله يعز عليه فراقها بس القسمة والنصيب واخوك واكع بشدة بالحب .مرت الايام وتزوجت نقلت لغير مدينة جان صعب بالبداية تعودت شوية شوية وكل اسبوع انزل يم اهلي اما سمر زوجتي علاقتنا سمن على عسل انسانة رائعة وتحبني تموت عليه ممقصر بشي غير غيرتها الزايدة كاتله نفسها بهالشي.

مدينة : فرح منو هالحجية اللي طلعت من بيتكم مكدرت اجي من وكت حتى اسلم عليها

فرح : هاي جوارينه اللي ساعدوني ليلة الحادثة جاية تريد شي بس مكدرت انطيها اعتذرت منها

مدينة : شنو هالشي اذا فلوس اني انطيها واساعدها شكو بيها

فرح : رددت بخجل خاله جاية تخطيني لابنها هاي ثالث مرة اكوللها ماتزوج تكولي فكري بعدج صغيرة

مدينة : فكرت بيني وبين نفسي صح فرح ماكو مثلها وتستاهل كل خير لازم ماخليها تتزوج اي واحد .

سمر : نزار حبيبي خلي منروح هالاسبوع يم اهلك نروح نتونس بغير مكان مو شرط كل عطلة نروح مو يوميا تخابرهم بعد شكو

نزار : راح اموت واشوف امي صدك جذب طول هالاسبوع انتظر العطلة وتريدني ماروح أخذج لبيت اهلج واروح وحدي

سمر : لا لا اجي وياك شنو تروح وحدك والطريق طويل امري لله بكلبي يمتى اخلص منهم لو امك الحقيقية ميخالف همينه 24 ساعة تخابر تتطمن عليه عبالها نزار طفل لو تجي يمنه بوسط الاسبوع مراح ارتاح منها

نزار : حبي اني بدون امي ماكدر لاتضوجين اوعدج من نرجع يمهم أطلعج بغير مكان ونتونس انتي متريدين راحتي

سمر : اي حبيبي وانت تشك بهالشي اني مو بس احبك اعبدك نزار راح اتخبل من حبي وعشقي ألك .