علمني كيف الحب يداوي الفصل السابع 7 - بقلم Chrakirkuki

#علمني_كيف_الحب_يداوي 7
لمحات من الماضي 6
شامل : جنت راجع من محل امجد بطريقي حسيت سيارة تمشي ورايه ومشغلة ضوا كلش قوي وكفت السيارة ونزلت منها ردت اعرف منو هو شفت 4 مراهقين مبين من شكلهم مو تمام نزلي واحد بيهم

ها ولك شنو شايف نفسك منو انت تضرب رضا تاج راسك

شامل : سمعت اسم رضا عرفت هو ورا الموضوع لان قبل يومين ضربته هاي يمكن سابع مرة ولايتوب جاوبته روح بدربك ماريد اضربك مبين عليكم صغار تسهلو والله وياكم

ها تخاف منا شوف شنسوي نزلو شباب عرفو الاخ احنا شنو الظاهر مستهين بينا عباله هو الوحيد رجال

شامل : هجمو عليه محبيت اتعارك وياهم بس الظاهر مو ناويين يعوفوني بعد مضاربات بيناتنا وكفت سيارات ودخل ناس بيناتنا كبرت العركة لحد ماوصلنا للمركز وهاي اول مرة ادخل بيه الضابط طالع ماكو احد ودونا للزنزانة لحد مايرجع واسمع انواع الغلط والفشار من الحراس اباوع على الموجودين عبالك جايين من غير كوكب يمكن بالافلام شكلهم ارحم بدل مااكون محامي واجي ادافع صرت مجرم ومحبوس ظليت ساعتين لحد ماشرف الضابط ونفسه بخشمه اول ماشافني

الضابط من ورا اشكالك منرتاح أحنا

ردت احجي وياه وافهمه قافل اخر شي كتله بس اخابر اهلي حتى ميضل بالهم يمي كلمة مني وكلمة منه عاند اكثر أضطريت أسكت وانتظر الصبح.

فرح : جنت بالمدرسة حسيت بشي عبالي مسويتها على روحي البنية اللي تكعد بصفي انتبهت اني مو تمام بطني تأذيني الوجع يزيد ظهري ومن بطني

بيج شي فرح وجهج صاير اصفر

ماعرف ماكدر اكوم عفية ساعديني اروح للحمام كمت اوكف شفت الكرسي عليه دم خفت منين طلع هالدم

فرح يمكن جتج من يمتى يجيج مو بعد وكت يمكن انتي من النوع اللي تجيهم بسرعة هاج لبسي جاكيتي طويل تعالي نروح للأدارة يم المشرفة التربوية

لالا مابيه شي بس انطيني جاكيت مسمعت كلامي جرتني للأدارة احس بالم مو طبيعي المرشدة شافتني وطمنتني ماخاف وحجت ويايه شوية عرفت شنو يصير بيه وكتبت رسالة لأمي اخذت اجازة ورجعت للبيت طول الطريق ادعي مااشوف احد لحد مااوصل عبالك مسوية جريمة .

أم شامل : عفية روح على امجد بالبيت بلكي نايم يمهم

أبو شامل : ياعزيزتي خلي تطلع الصبح واني اروح سديت التليفون الحرارة مقطوعة وشامل لحد الان مراجع للبيت وحتى اذا يبات يم امجد يخابر ويكول كلبي مو مرتاح بس مردت اخوف امه كمت اتوضى وأصلي يارب سترك

شامل :صارت الدنيا صبح الضابط تغير شفت اللي اجه بمكانه اعرفه صديق ابويه أستحيت من نفسي ياريته مو هو هسة شيكول عليه خوش محامي بعده ممتخرج صار خريج حبوس

فرح : وصلت للبيت والورقة بيدي على حضي جبار كاعد سألته وين ماما باوعلي بغضب

ببيت عمج هسة تجي هاي شنو بيدج أشوف

فرح : أستحيت يقرا المكتوب جاوبته مو شي من المدرسة دازيها على امي ردت اروح لزمني دك كتل

ولج عار عليه منو منطيج هالورقة هاي دروب امج الناقصة ولج ليش هيجي

والله من المدرسة هاك شوف اعرفه ميقرا امي

نورجان : اخذت ماعون حلويات لبيت مدينة رجعت اشوف فرح مثل الورقة بيد جبار لاعب بيها طوبة واميرة متكدر تفكها منه روحي صيحي طلعت خير جبار شمسوية فرح

عندج عين تسالين مرافقتلها واحد وبيدها هالورقة اكيد منه وانتي عندج علم بالموضوع عادي عندج راح اموتها وكعتها وضربتها على بطنها وهي تبجي وتصيح شفت دم ينزل منها اتخبلت زايد منين هالدم شمصخمه

نورجان : وخر شبيك تخبلت هاي اخرتها تشك بهالطفلة يمه اسم الله شبيج فرح منين هالدم رجع ضربها من جديد واني ماكدر عليه وحدي وهاي لازمة الورقة بيدها

طلعت: جنت كاعد العب ويا بناتي أحمدك يارب على ها النعمة دخلت اميرة وهي كوة تتنفس

الحك ابوك قتل فرح

ماعرف شلون نزلت امي تبجي وابويه واكف يدك على راسه وفرح مدماية

جبار : راح شرفي ضاع صار اللي خفت منه بنتي جابتلي العار مثل امها

طلعت : شلت فرح ويا امي وديناها للمستشفى بعد فحوصات عرفنا فرح بلغت واللي صار من هالشي بس الدكتورة قنعتنا نسويلها تحاليل و
فحوصات اكثر تكول شاكة بشي خفنا على فرح لا صدك تطلع عدها مرض بقينا فترة واني رجعت للبيت اميرة منظفة الصالة وانطتني الورقة قريتها المرشدة تريدنا نهتم ونراعي مشاعر فرح ونعاملها مثل وحدة كبيرة وأبويه كالعادة افتهم السالفة غلط رحتله للغرفة وهو يصلي انتظرته يكمل

جبار : تصيح على أبوك وتكولي كافي ظلم هاي تربيتي وتعبي بيك انطيتك روحي

طلعت : بابا ضربت فرح من غير سبب شوف الورقة من المدرسة مو مثل ماجنت تتوقع البنت كبرت لازم نراعيها واني اسف صيحت عليك تعرفني أخلاقي وتربيتي ميسمحولي اتجاوز عليك انت وامي بس دايما تظلم فرح بسبب امي مو كافي سنين وأمي متحملة اهانات وضرب وسكتت اما هالطفلة لا اني اوكف بوجه كأئن مايكون أختي لا عار ولا رخيصة أدعي لبنتك تكوم بالسلامة حالتها مطمن.

شامل : طلعت من المخفر على بيتنا امي شافتني قميصي مشكك ودم عليه جنت تعبان وهاي تبجي وابويه مصدوم

ام شامل : شوف تكول موسوسة والولد مابيه شي شمسوين بيك هيجي راح انجلط من البارحة اروح وأجي كلبي جان نار عليك متت من القلق وين جنت

ابو شامل : على كيفج ياعيني روح غسل أبني وارتاح من تكعد أحجيلنا اللي صاير بيك عرفت متعارك وياجماعة صديقي بالمخفر خابرني وكلي على سالفته محبيت اروح ويشوفني ردته يواجه اللي صار بنفسه واحسسه هو كبر ويتحمل مسؤوليته

شامل : الله يحفظكم اليه لاتخافون ماكو شي سوء تفاهم وانحلت ماما لاتبجين لخاطري اروح اغسل واجي أفطر وياكم كلش جوعان باوعت بأمتنان لأبوية رجال بقمة الصبر والتفهم

أم شامل : يابرود اعصابك ياابو شامل مادري منين جايب هالقدرة على التحمل واني كلبي شوية ويوكف من شفت منظر ابنك وانت تحجي وياه بهدوء عادي كانه مصاير شي

أبو شامل : حبيبتي الولد كبر لازم نحسسه بهالشي ومندخل بخصوصياته اكثر من اللازم احب يعتمد على نفسه ويشتكيلي من هو يريد ماريد اغصبه ويضوج لو يظطر يكذب عليه هاي تكتيكات عسكرية اني اسوي الجاي وانتي حضري الباقي هو بس ينزل راح يحجيلنا كلشي .

أمجد : رجعت للبيت هلكان من التعب الصبح بالكلية وراها اروح للمحل لأن ابوية بس يجيب بضاعة وعايف المحل اني اديره وغير مشاوير امي وخواتي ماعدهم اوقات معينة وغير العزايم اللي تكسر الظهر لبيت أهلها واقاربها عبالك تنتقم مني مو من ابويه وغير مطاليب خواتي صرت اصرف عليهم وعلى ازواجهم همينه شفت أمي كاعدة ومبين على وجهها السالفة متبشر بالخير الله يساعدج ماما أشوفج مو نايمه لحد هالوكت

أم امجد : واني منين يجيني نوم وابني يطعن بظهري هاي تالية تعبي بيك ها أمجد افندي تروح توكف ويا ابوك من مرته جابت سحلية لو رايحلها يومية وتنفذ طلباتها ليش هيجي تسوي بيه تكسرني بعد ماسوها ابوك ودمرني وحطم كلشي حلو بيناتنا واتزوج وحدة بكد بنته وهسة فرحان صاير عنده طفله

أمجد : أخ لو بس أعرف منو يجيبلج الاخبار ماما ألف مرة حجينا بهالموضوع تزوج وخلص مقصر بشي عافلنا البيت والسيارة وحتى المحل كله بيدي وأنتو عايشين أحسن من زوجته ومن اروح أزورها لأن ابويه مو موجود مسافر يجيب ذهب للمحل وأختي اني مسؤول عليها مثل البقية

أم امجد : الله ياخذك وتكوللها اختي وتعترف بيها همينة ياربي منين تجيني المصايب ابني الوحيد هيجي يسوي بيه باقي تروح وتكوللها ماما مو ساحرتك مثل ابوك بنت الفكر روح انخمد ياريتني محاجيه وياك رفعت ضغطي راح أموت من وراك

أمجد : هاي الاسطوانة بين يوم ويوم أسمعها متأكد هاي خالتي تنقللها الأخبار وتضيفلها البهارات من عدها لأن بيتها قريب على بيت ابويه الثاني رحت انام واني كلي هموم .

رضا : فرحان كسرت خشم شامل بعد لو رجال يخلي عينه بعيني تعالي حبيبتي شوفي شنو جبتلكم صيحي الجهال خلي يجون يتغدون

أم أمل : الله يساعدك شنو كل هالاكلات وجايب كيك وحلويات الله لايحرمنا منك والله جنت محتارة شنو اطبخ للجهال غدا

رضا : بعد يومية أشبعكم من هالأكلات مو كلتلج خلي أشتري سيارة جديدة شوفي الرزق اللي اجاني من وراها مو مثل الخردة اللي جنت اركبها مالت المرحوم

أم امل : هسة شعلينا منه روح ولك صيح أختك تجي تاكل اكول رضا هم ينطوك فلوس لو بس أكل

رضا : طبعا بيها فلوس بس حاليا قليل بعد ماريدج تطبخين شوفي الاولاد مشايفين شلون يبلعون وها شامل بارحة قمت وياه بالواجب بعد ميكدر يتقرب من عدنا ولا من أمل

أم أمل : صدك جذب اسكت لاتسمعك البنية وتتخبل علينا متعرفها اشكد متعلقة بيه الحمدالله تخلصنا منه

أمل : ليش هيجي ها ماما ترى سمعت كلشي وانت اشرت على رضا شلون هيجي تسوي متستحي طلعت ركض من بيتنا واني لابسة بيجاما أريد اشوف شامل ماصدك رضا مسوي بيه شي

ام امل : ولج تعالي ماعندج عقل شلون تطلعين هيجي مو وياج احجي تعالي هسة شنسوي رضا شفتها شلون راحت يمهم ومتسمع كلامي

رضا : عوفيها هسة ترجع من تروح يمهم ويطلعوها برا بعد اللي صار

الدكتور : ممكن نروح على مكتبي أريد احجي وياكم بموضوع فرح

نورجان : من البارحة لانايمة ولا كاعدة من خوفي على فرح ومن طلب نحجي الدكتور بغرفته باوعت على طلعت وهو هم مثلي صار بعيونه خوف خير دكتور طمني بنتي شلونها

الدكتور : جنت أحب أطمنج أم فرح بس الضرب اللي صاير على ظهر وبطن فرح وهي بهالحالة مأثرة عليها احتمال من تتزوج متصير عدها طفل

طلعت : دكتور يعني شنو أختي راح تصير عقيم ماعدها علاج حرام هي بعدها صغيرة

الدكتور : الله كريم خلي ايمانك بربك انشالله تكبر وتتعالج

نورجان : مكدرت انطق بشي كل اللي حولي صار بحالة صمت طلعت من غرفة الدكتور واني بعالم ثاني باوعت على فرح متستاهل اللي صار واللي تصير بيها كل هذا بسببي هاي حوبت أهلي تطلع بهالضعيفة.

شامل : هسة متشوفيني مابيه شي مو كافي ليش تبجين اسكت امي ودعاء لو اسكت بيج كافي أمل

أمل : أني السبب مو ياريتني ميته ولا اشوف هاليوم ياريت .

طلعت : مرت سنوات وبناتي صارن عمرهن 5 سنوات ومرتي حامل أشوف امي تذبل يوم عن يوم وفرح منزوية بغرفتها ابوية حرمها من المدرسة نزلت الصبح شفت امي كاعدة على سجادتها وتبجي ماما صاير شي ليش تبجين مو بعد يومين نسافر للعمرة المفروض تفرحين

نورجان : مشتاقة لأهلي كلش شلون أروح لبيت الله وأهلي الله يعلم وينهم أوف اوف أبني الحمل كلما يجي يثقل عليه منا أختك ومنا وضعي وياأبوك

طلعت : شنو رأيج أخذج للمنطقة ونسأل عليهم من جديد بلكي نحصل عنوانهم اي شي وترتاحين

نورجان :صدك أبني خلي نروح اليوم بلكي ارتاح وأحصل عنوانهم وأروح يمهم

طلعت : حضري نفسج بس أخذ اميرة للتلقيح وأرجع أخذج ونروح والباقي على الله .

حسن : طبيت لغرفتنا شفت ملابس عامر ماكو بالخزانة وعايف ورقة بس لامسويها وسافر مستحيل ميعوفني بابا ماما ألحكوني عامر عاف البيت وسافر .