رواية عندما يعصف الحب الفصل الحادي عشر 11 - بقلم زينب العبيدي(زينبيه)

سلاموووون عليكم عيد حب سعيد متابعيني

طبعا بما ان اكو سناكل مساكين محد هدالهم بعيد الحب قررت اتبرع واهديلهم بارت كتبته بسرعه
قراءه ممتعه سناكل

#عندما_يعصف_الحب

#بقلم_الكاتبه_مولاتي_زينب

#البارت١٠

ام رضا هاي زميلت رضا و..و هو حيل متعلق بيها جان ..لان جانت صديقه واخت وكلشي بالنسبه اله حتى اقرب مني اله ..بس ترا كل علاقتهم ماتتعده الاخوه لان احنه نعرفها زين بس خذاها الموت وتركت فراغ بكلب رضا لدرجه هو من ذاك اليوم الهذا اليوم بس يصليلها ويدعيلها وماشال صورتها من غرفته احترام للعشره والصداقه بينهم

ورود (حجت بااسف وضوجه وهل شي طبيعي لان رضا صار زوجها) الله يرحمها ويصبر رضا ويكدرني انسي همه وحزنه عليها فكد الاصدقاء مو شي سهل

ام رضا والله انج فاهمه وعقلج يوزن بلد ياماما الله يحفضج الشبابج حبيبتي وهسه اتركج لان راح يزفون رضا اتعاملي وياه بكبر عقلج وتحمليه هذا صار زوجج وابو جهالج بالمستقبل

هزت راسها ورود بخجل وكالت بصوت رفيع انشاء الله

نزلت ام رضا ورا اقل من خمس دقائق سمعت ورود صوت اهازيج وهوسات واصوات الزلم الي ممتزجه باصوات النسوان
رجفت من الخجل وضلت تفرك بايديها حست الباب انفتح مارفعت عيونها وكتفت بنضراتها الايديها الي يرجفن وهي تفرك بيهن مامتعوده علي لان كلشي صار بسرعه وهم هل فتره ابد ماكعدوا سوه او سولفوا لذالك جانت كلش متوتره وخايفه وخجل السكوت طول مما خلاها ترفع اعيونها حتى تعرف السبب التفتت يمنه يسره ماكو التفتت وراها شافته كاعد من الجه الثانيه للجربايه وداير ضهره عليها سترته على الجربايه و مدنك راسه الضاهر جاي يكلب بتلفونه
استغربت من حركته  وجانت تحاجي نفسها بسرها ابد ماكو هيج رجال زين ليالي مو كالت  هو فرحان ومامصدك ان هو راح يتزوجها وهي افتهمت من سعاد الي فهمتها ان الرجال اول مايدخل على زوجته الغرفه يجي يكعد يمها ويبوسها بكصتها او ايدها واذا ماسوه هذا كله فيكعد يمها ع الاقل ويسولفون او يسمعها حجايه حلوه بس الي جاي يصير هسه ابد ماسمعته
وهل شي هو التجاهل بعينه وبده هل شي يبث الحزن بكلبها وترجع الفكره ان هو مغصوب عليها وهي فد شي رخيص لازكه نفسها بي بالكوه وكفت الدمعه بين ارموشها بس الي منعها من ان اتطيح دكت الباب مسحت الدمعه بسرعه بينما رضا كام وهو يخلي تلفونه على ميز التواليت ويتجه للباب ويفتحه

جانت امها المربيتها وامها الحقيقيه وياهن ام رضا الي شايله صينيه بيها عشه كباب شوي وتكه ومقبلات وببسي

دخلن وام رضا خلت الصينيه بالكاع والتفتت على رضا ماما رضا اطلع شوي خل نسولف شوي

بعدها مامكمله جملتها وطلع رضا كأنما جان يتاني الفرصه هاي حتى يشرد من يمها

ام عزام مبروك يا احلى ورده ((وباستها وجانت بعينها دمعه وبادلتها ورود البوسه على راسها وطاحن ادموعها جنها رادت الحجه حته تطيح ))

ام رضا لالا ياورود لا ياامي عليش الدموع لاتخربين المكياج يايمه وليلتكم بعدها باولها(ومسحت دموعها)

ام وداد (امها الحقيقيه) مبروك يمه عسى الله يكتبلج بكل دقيقه وكل ثانيه من حياتج سعاده ماتخلص

ام رضا اميين

ورود شكرا يمه

ام وداد يمه كلشي الي راح يصير وياج اليوم شي طبيعي (وبضحكه)كل احنه مرينه بي لايموت ولاينقص من عمرج اهم شي تكونين هاديه وسمعي حجي زوجج بالحرف

هزت راسها ورود بخجل بمعنى اي

ام عزام يمه ما اوصيج برجلج سمعي احجايته ولاتعاندينه وتعصينه واتحمليه ومو من اول زعل تنسين روحج ويطلع السانج ولاتطلعين زعلكم الاي طرف ثالث حتى لو انه يايمه ترا اليطب بينكم ماراح يعرفكم اكثر من ماانتم اتعرفون بعض واذا اتدخلو اهله او اهلج راح يصير انحياديه موبيدينه بيد عواطفنه يايمه سامعتني ورده يمه

هزت راسه ورود وكالت صار يمه

ام عزام ها ونسيت ما اوصيج بعمج وعمتج هذوله خليهم بمقام امج وابوج وشلون تعاملينه عامليهم واكيد هم يحبونج مثل بتهم

ام رضا مشكوره ياام عزام الله شاهد ورود مثل ابنتي وراح انخليها على راسنه وندللها مثل ماجانت ابيتكم

ام عزام سالم راسج ياام رضا اصلا هاي رجوتي بيكم ونعم والله منج ومن ابو رضا

اشوي واجت. ليالي وبيدها كامره  وكالت
بما ان رضا وورود مالحكو يصورون اليوم بسبب الضروف وهسه الساعه راح اتصير بالعشرة يعني مااتصور اكو تصوير فاتح الهسه وحتى لو اكو يكون الكادر النسائي ماكو لان وكت تاخر فا كلت اجيب كامرتي واصورهم اني

ام وداد اي عفيه يابنيتي حلوه الصور تضل تذكار

ليالي ماما صيحي الرضا وهمست الامها بس لاتكليله صور وهاي السوالف خل يجي وينحرج من نسوان عمامي ويصور غصبا عنه

راحت ام رضا تصيح الابنها وجانت ليالي اتصور  ورود وي امهاتها وصور فرديه الها شوي. ودخل رضا هو امه
ليالي يله رضاوي تعالو صورو

بما انكم مالحكتو تصورون
رضا الي شتعل غضب هو ماصدك تفوت هاي الفقره مال تصوير وماتجمعه بورود اي ذكره منين طلعتله هاي بهذا الاقترح السخيف ضل ساكت لا اي ولا لا

ام وداد اي يمه تعال هاي الصور بعدين تنسيكم همكم وهي مكيوله لوضاج خلكك اتذكر ايام عرسك وانتم راح تتذكرونها بالصور

وضلت ليالي اطكلهم الصور بعد مالبست رضا سترته وانجبر يحضن ورود لان جانت اتحرجه ليالي كدام نسوان عمامه

اما ورود جانت كلها ترجف خجل وخوف وحده من اللقطات بطلب من ليالي باسها بخدها اما هي فصار كلبها طبل ومن توترها غرست اضافرها بجف ايده سحب ايده بسرعه وخزرها اما هي ضلت تبلع بريكها من الفشله والخجل

ام رضا يله ماما اخذو راحتكم وتعشو زين

ام عزام (قبل ما تطلع التفتت على رضا وكالت)يمه رضاوي ابنيتي امامنه عندك ديربالك عليها وصونها

رضا (بابتسامه بلكوه صنعهاومن ورا كلبه) لاتفكرين عمه بنتج ابطن عيني

طلعوا ورجع نزع سترته وهو يكلب بجف ايده الي صار بي  اجروح خفيفه

ورود( بخجل وصوت ناصي) اسفه مو قصدي

واخيرا رفع عيونه بوجها تاملها شوي وبعدها حجه
شوفي انه عندي قوانين بحياتي وخل اكلج اياهن من هسه حتى يطبقن من باجر اريد المره تكعد قبلي والكه الحمام جاهز ملابسي تنغسل تنكوي وتتعطر وما اكول اريد ملابس الكاهن جاهزه وبعدني مامخلص اشوف الريوك كدامي غرفتي تنكنس وتنمسح وتتعطر مااريد اي شكوه تجيني عنج لان ساعته ما اضمنلج العواقب امي لاتخلينها تجيس شي بالبيت ولو صار وشفتها تشتغل وانتي موجوده ماتلومين اله نفسج وما احب شغل اليل يعني كون ارجع الكاج مخلصه كلشي عشاي دائما خفايف وكلاص عصير طبيعي مجرد ان ارجع ملابسي ينغسلن وينكون ويتعلكن مكانهن احذيتي كليوم يتلمعن حتى لو ما البسهن وعطريهن بعدها تجين تمرخيلي جسمي خوش وها لغوه زايده ما احب اتجاوبيني على كد سوالي وتسكتين لاتشتكين من احد ولامن تعب حتى لو مريضه لان ديني يكمز من هيج مره وبالج على بالج اتنقليلي سوالف البيت امك هيج اختك هيج حسبي الله ماخلقج حتى لوهن غلط وديري بالج اتنامين وانه بعدني ما جاي عسى ما تانيني للفجر خوش ولاتعارضيني بشي ابد سمعي ونفذي من  حلك ساكت وسالفه اروح الاهلي مشتاقتلهم لاتكولينها يمته ما احس انه انج تستحقين تروحين اوديج اي شي بيتنه ما ينقل لهلج حتى لو زغير ديري بالج لان ساعتها راح اتفنن بتعذيبج هذا كلشي اليوم ومن اتذكر شي اكلج عليه

هذا كله ورود ادموعها متحجره بطرف عينه حست نفسه خدامه وابد مو زوجه شهل ضلم معقوله هي هاي السوالف الكالت عليها سعاد الي يسولفونها العرسان باول ليله الهم ياربي بس هذا ضلم
كالتله

بس  هيج....

قاطعها بصوت عالي ونتر انه شكلت مو كلت بلا اعتراض

ورود الي خانتها عيونها وتسربت دموعها بس دارت وجها حتى لايشوفها جان هو يغير ملابسه وبعدها كعد ياكل

ورود وهي تحجي بنفسها وقهرها زاد هذا شبي صاحي لا ابد مو صاحي ماكو هيج واحد يحجي من أول ليله بينه وبين زوجته هو حتى ماكلي تعاي اتعشي واني ميته من الجوع يمااه ماريده ليش هيج وين وديتوني يمه مو ع اساس اني المدلله جذابين وماتحبوني مو هو هذا الي تكولون احسن من الغريب  ضلت اتراقبه تعشه وكام اخذ تلفونه وتمدد على الجربايه وضل يطكطك على نقاله

ورود الي تحاجي نفسها هذا صدك يحجي شبي زين اني شلون لابدلت ولا اكلت ولا اكدر اسوي اي شي ولكم احد يكله خلي يحس على نفسه اقلها يطلع بس عما ابدل ياربي ليش متجاهلني كانما ماموجوده كباله يارب لا لازم احاجي خل اشوف ليش يسوي هيج حتى اذا مايريدني يطلكني لان مستحيل اضل وي بشر هيج يعاملني ((حجت بصوت خفيف وبي خجل وخوف ))ااا رضا

رفع عيونه من التلفون وباوعلها بدون ماينطق ولاكلمه

كملت بتوتر وبدت تحرك بيديها بطريقه عشوائيه كالعاده
انت ليش تزوجتني اكيد انت مغصوب علي ليش ضلمتني وياك اني مااكدر اعيش وي واحد مايريدني وانت تصرفاتك كلها تكول مغصوب ليش ماكتلي انت ماتريدني

رضا قاطعها ولنفرض كتلج شجنتي راح تسوين

ورود الي تشعر بصدمه حجت بغصه جنت راح افسخ الخطوبه

رضا وبيا عذر تفسخينها

ورود مايحتاج عذر انت ماتريدني هل شي كافي

رضا انسي وانه مامجبور عليج واخذتج برضاتي وحجيج هذا الماصخ كله  من خيالج سمعتي((وحجه بنفسه اكيد ماراح اكلج ماريدج واذب اللوم براسي راح اخليج انتي تصرخين ما اريده وتطفرين وانتي البايعه وترتاحين مني وارتاح منج))

ورود بس انت هستوك تفترض وتحجي انك لوكايلي يعني انت ماحجيت هيج اله ان انت مغصوب وجاي ..

قاطعها رضا بلا حجي زايد انتي كلتي جاي افترض يعني ماخذج على كد اخبالج وتعودي علي انه هذا اسلوبي وهسه بلا حجي زايد

ورود بعد صمت دام ثواني كالت
زين هسه اريد اغير هاي البدله

رضا وعيونه بالتلفون حجه بلا مبالات بدلي

ورود بس انت كاعد اهنا وين ابدل

سحب البطانيه وتغطه وغطه حتى وجها والنقال وكنما يكللها انه ماميت على نضره الج

ورود ميلت حلكها وكامت اخذت روب النوم الي جان قصير من الستان وفوكاه روب طويل من التول هم ابيض وستغله الفرصه بما ان هو مايشوفها كالت الروحه خل اكل لكمتين وبدت تاكل وكلساع تباوعله اذا شال
الغطه او لا لان جانت خجلانه تاكل كدامه وبنفس الوكت ميته من الجوع من عشه امس الحد هسه التهت بالاكل ونسته ورا شوي تذكرت لكته يباوع بطرف عينه

رضا شوي شوي منو راكض وراج

ورود الي حست اللكمه تحجرت بحلكها من الخجله والفشل لاتكدر تطلعها ولاتبلعها واخير بلعته بدون ماتلوكها وضلت اتكح وتضرب على صدرها لان اللكمه وكفته بصدرها يمه شهل فشله وشربت فوكاها ماي باوعت على رضا الي دار وجها من الجهه الثانيه ونام

غمته بيدها

ضلت كاعده فكره تجيبها وثانيه توديها لحد مانعست وتستحي اتنام على نفس الجربايه لحد ماعيونها ضلن يغمضن من كيفهن كامت وهي دكول بنفسها خل يولي شنو وين انام جا امدااك ودارت ضهرها من الجهه الثانيه ونامت

عزام الي كاعدبسيارته  كبال بيت عمه ويباوع ويحجي وي الفراغ ها ورود شنو شخبارج لاتكليلي نايمه بحضنه لاتكليلي يشم بوردايتي وحاضنها شنو حجيتيله ياكلمت حب كلتيله ياسينفونيه غزل عزفتيله وياشعر كلج وشغنالج ياأمنيتي

ولج شلون اتحمل و
انه الجنت اغار عليج من نفسي ومن نضرات عيوني ولج جنت اغار من شقاج وي علاء الي يحسبج مثل اخته كليلي شلون اتحمل وانتي بحضن واحد غريب والبينكم كلشي مشروع وتحكمه علاقه زواج ااااخ ولج رايد حل انزع حبج من كلبي الي  الصار شغلي الشاغل ماجنت حاسب احساب المثل هيج يوم جنت راضي وقابل اعيش اليومي ماطول اشوفج كبالي جنت قانع بكلشي وما حسبت احساب غبي واعترف بغبائي لان ماخليت احتماليه الكلشي

الساعه ٨:٠٠الصبح

رضا بعصبيه هييي لج انه امس شحجيت لوحجي اليل يمحي النهار

فزت ورود مفزوعه وهي تتلفت هذا الصوت من وين باوعت ع الكاع شافت رضا نايم بالكاع الظاهر امس عايف مكانه ع الجربايه وفارش بالكاع كالت بسرع

شنوو شبيك

رضا لا وتسألين انه ما احب اعيد الحجي مرتين بس هم راح اعيد هل مره امس مو كتلج اتكعدين قبلي واكعد الكه الحمام جاهز والملابس والريوك وكل حجي امس يتطبق بالحرف

ورود بنرفزه ترى انت مو صاحي واني وين ادري يمته تكعد والله يالله

كام من الفراش هي كومه وهي طفره للجربايه لزم شعرها حيل وقرب وجها عليه وهو فاتح عيونه ويحجي بعصبيه

شنووو ولج عليمن عليتي صوتج ونترتي ستوه علييمن (وهو يهز براسها من شعره يمنه ويسره)
شوفي ماراح امد ايدي هسه بس احذرج لاتختبريني تره اشيبج اعدمج الحياة

ورود (وهي تبج وايدها فوك ايده الي لازم بيها شعرها تحاول تفك ايده بس بلاجدوه حجت بصياح ودموع) ليش تزوجتني حتى تذلني شمسويتلك اشعندك وياي هاا عمري ما عرفتك كل الاعرفه عنك ابن عمي رضا وبس شعندك وياي هااااا

(وطررراخ فر وجها براشدي وحجه بعصبيه اكبر) قسما بذات الله حرف زايد وحسبي الله ماخلقج...كل احجايه انحجت امس تتنفذ بحذافيرها سامعتني ساااامعتنيي

ورود( بخوف ودموع وجع من حراره الراشدي وشعرها الي حست انشلع من كد ماجر بي)
هزت راسه وحجت اي اي

رضا وهسه يله كومي

كامت لبست دشداشه وهي تبجي وشدت شعرها وراحت على الحمام حضرته وحضرت ملابسه ونزلت

جانو جوه خالات رضا ٢وبناتهن وام رضا وام عزام الي باتت يمها (عاده عراقيه ام العروسه تبات اول ليله بيت العريس)
استقبلوها بلهلاهل ابتسمت ورود بالكوه

كعدت شوي وتذكرت الريوك كالت بسرعه

ورود عمه (وتقصد ام رضا) اريد اسوي الرضا ريوك

ام رضا لاياماما انتي عروسه ولاتشتغلين شي هسه اكوم اسويله اني

ورود وهي تحجي بنفسها هاي من كل عقله تريده يذبحني هو امس مهددني امه ماتشتغل واني كاعده
كالت بسرعه لالا عمه اني حابه اسويله الريوك بس كوليلي شسوي

ام رضا ياماما شتكول علينه الناس شغلوا جنتهم من صباحيتها

ام عزام خليها يا ام رضا خلي تسوي الرجلها ريوك هذا من زود حبها اله

ورود ابتسمت بالكوه وحجت بهمس مالت عليه وعلى حبه

ام رضا ماما الثلاجه متروسه سويله اي شي

راحت ورود للمطبخ سوت بيض وجبن قصصته ومربه وجاي وبهل اثناء سمعت هلاهل كالت بسرعه يمه نزل مصيبه بعدني ما مخلصه طلعت الصمون بسرعه من المايكرويف وخلته وراحت بسرعه خلت الصينيه كباله

ام رضا ماما اتدني اتريكي وي زوجج

هزت راسه ورود وتقربت بالكوه تاكل وهو ابد ما رفع عينه الها كمل وكام

رضا في امان الله

ام رضا بصدمه ياااء ماما وين رايح

رضا للشغل

ام رضا بس انت عريس ولازم تاخذ اجازه وتضل يم زوجتك

رضا يمه ماانطوني اجازه شسوي بعد قابل اخذ اجازه غصبن عليهم حتى يفصلوني(رضا يشتغل موضف بالكهرباء)

ام رضا اذا هيج جا مابيدنه شي الله وياك حبيبي
وتبعته للباب وحجت ببتسامه
اكول ماما شلون شفت ورود

يتبع......