رواية عندما يكون العشق صوفيا الفصل الخامس والثلاثون 35 - بقلم ruqaya H algurtani

دايما لحظات الهدوء والسكينة لازم يداخل بيها شي مجنت محسبة حسابة من زمان اضوج من لحظات الهدوء الغير الطبيعي.. يمكن لان حياتي بعمرها مجانت هادية..
بعد ماركزت حياتي وحسيت بالهدوء والراحة..
اجة دكة الباب المحملة بتحديثات مشاكل جديدة واني عفتلهم كل شي واجيت اريد ارتاح..

واحنا كاعدين اندكت الباب..
بالنادر يندك بابنا..
شهد: عمار.. ماما.. كوم افتح الباب..

معدكم غيري صخرو.. مو هذا همام.. لو المدلل.. ماتسخري..

شهد: منخلص من طولة لسانك.. هو منو يدك بابنا غير جماعتك..
هسة يطلع واحد من اصدقائك..
كومي ماما زينة فتحي الباب.
عمار: وين زينة.. دزيهة.. كعدي.. مطلعين..
زينة؛ يمة فدواتك اخوية الحامي..
شهد: اعرف ميقبل زينة تطلع.. يغار عليها..

عمار؛ ماما.. هذا خالو  رافت..
شهد؛ رأفت شذكرة بية النوب..
تفضل خالو.. تفضل..

شهد: هلو رافت.. شونك.. خيرك شبيك..
جان رافت جاي وي علا وابنة محمد مربي لحية وصاير متدين مثل ابو..
محمد: هلاو.. عمة شونج.. واجة حضني وباسني وسلم ع همام وعمار..
وعينة اكلت زينة جانت ملابسة ربطة وبالبجامة..
هلو زينة شونج..
حسيتهة ضاجت وخافت..
مثل احساسي تمام اثاري هاي الاشياء تنطبع بالذاكرة متنسي..
شهد: زيونة حبيبتي سلمي ع خالج وخالتج وصعدي اقري امتحانج..
علا: هلا بزينة.. ماشاءالله كبرانة ومحلوة..
زينة؛ هلو خالو شونك..
علا: حبيبتي عمج هذا مو خالج..
شهد: اكيد ع ذبة اخوتها.. حاسبة رافت خالها بعدين ماكو فرق لاتنسين الخال والي لو متريدين زوجج يتولى احد..
يلا ماما صعدي دراستج..
علا: دخليها شثبرتيها بالدراسة..
شهد : الانسان ماعندة غير شهادتة.. صدك محمد شخلص ماخلص..

علا؛ عيني شلا بالدراسة ابو عينة ويا عالوقف والحمدلله امورة توب والفلوس يلعب بيها لعب.. وسيارة اخر موديل..

شهد: هم شتعين.. الحرامية هم عدهم فلوس وراكبين سيارات اخر موديل بس يبقون حرامية..

علا: بالحماية ويا ابو..
شهد: fbsيعني..
علا؛ لا مسوول حماية..
شهد؛ ليش رافت شعندة ديحطولة حماية هو رجل دين..

علا : الوضع مو امان.. واحد لازم ياخذ حذرة..
اكول هاي السيارة الي ببابكم مالمن

عمار؛ مال امي..
علا؛ والله وكت كمتي تسوقين سيارة..
فادتج جيتج لبغداد.. والله..
شهد: ظلت تباوع من فوك لجوا.. وابنهة عينة ع الدرج.. وصلت حدهة..
هااارأفت.. خيركم.. شنو سبب الزيارة المفاجئة..
علا: هاي طردةصدك.. هيج تحجين بيت اختة وجاي يزورة..
شهد: يووو.. هسة ذكر عندة اخت..
رافت؛ خوية شهد كلها يومين نبقى يمج ونرجع لبيتنا تعرفين هناك ماكو مستشفيات تخصصية..
علا: كللها لااختك عندك سرطان..
شهد: شنووووو..
من شوكت..
خوية من سنتين..
علا؛ مخلينا مكان ماودينا خلص فلوسة وفلوسنا عاد لو بفايدة.. الا بس صرف فلوس..

شهد: سلامتك رأفت.. ماعدك غير العافية.. مجنت اعرف.. والله..

معذورة شهد مااعتب اني اني المقصر والله..

شهد :وهسة شون.. شنو الحل..
علا:  دياخذ جرعات والله كريم..
عفية مين حمامكم.. اريد اغسل يومين بالفندق خسنا والله..
هناك بداخل المطبخ...
علا؛ شنو هذا بيت لو قوطية...
شهد: بدينا العنطزة مال علا والنفخة الكذابة..
رأفت : رح نزاحمج خوية..
شهد؛ سلامتك رأفت.. شدتحجي..
الله يكومك بالسلامة.. وترجع لبيتك..
رأفت؛ ماضني والله ياشهد..
سامحيني.. ابريني الذمة.. ماجنتلج عون..
شهد: ملحوكة خوية ترجع ويصير خير..
هسة اسويلك غدا لايك الحلكك.. ويرجغلك صحتك..
كعدت اسوي غدا وعلا تحجيلي عن تركيا ولبنان والهند.. من غير دبي.. هاي سفرات سافرتهم..
شهد :بالعافية.. علا..بصاية اخوية
الله يكوم  بالسلامة  يفررج وين ماتردين..
والله ياشهد من يوم تمرض مطالعة من البيت.. الا للمستشفي ولعبان نفس..

صدك نسيت اكلج.. شفت علي  بالمستشفى  هو  والخاتونة مالتة مطلعة الكذلة الميشة وطك بعلجها وصبغ اظافرها ونعال ابو الاصبع..

شهد؛ شنو انتي مركزة وياها..
علا؛ تذكرين قبل شون جان يحاسبج عاللبس.. والطلعة والطبة شو فد مرة مخرف وين جان وين صار..
الله يهدي..
سكتي وخليهة صيام وصلاة. ومرتة ماكو..
دينة بس لنفسة...
الله يصلح احوالة..
شو انتي مدري شونج مو مرة متغارين.. مضجتي..
ليش.. اضوج..
ضوجي رجلج طلكج.. جان يحاسبج ومسيب هاي الثانيه.. ضوجي عايف جهالة وحاير بحمل مرتة..
هو دا اكلج شفتة بالمستشفى وسالمنا.. سالتة شسوي هنا..
دغتة المدام..
كال دا اسوي تحليل سكر..
وكع الماعون بالكاع..
صمالله.. صمالله اخذ الشر وراح..
والله ميستاهل علي اكيد انقهرتي لمن عرفتي علي بي سكر..
شهد؛ وين جان وين صار..
اروح اغسل وجهي...
روووحي...

صعب.. اوصف حالتي اني مو حابتة لعلي.. بس مااتحمل يصير بي شي..
حيل انقهر.. لمن اشوفة امورة مو تمام..
ومااعرف شيسموهة هاي..
يمكن اني اشعر بالامتنان الة،
انا كنت لاشى قبلة وهو انتشلني من نص الضياع..
وهسة كل حياتة انقلبت...
كان ملاك نازل من السما معقول الي عرفة علية خلا يتغير.. ممكن..
غسلت وجهي وتظاهرت بعدم الاهتمام.. بان اعرف علا كل لفتهة عمود تضوجني متعرف لازواج ولاحياة علي تهَمني تهمني حياة اولادي بسرعة من اليوم الاول.. محمد بين نيتة السيئة وهو يتقصد يتقرب من زينة  عمار عينة عليهم.. وهمام هم..
ثاني يوم راح رافت وعلا وياهم ابنهم للمستشفى تاجلت الجرعة لان رافت صحتة تعبانة ومناعتة هم..
وعلا بدت تتافف لان باقية تريد ترجع..

وزينة محبوسة طول الوقت مضايقة، من نظرات محمد وملاحقتة الهة..

زينة: رجعت للبيت.. ولازمة كلبي لايكون هذا الحيوان محمد موجود.. بحجة خالو رأفت..
فتت للبيت الكل طالع، غسلت وجهي.. دا اكل لكمة واصعد انام، صار بوجهي محمد..
سلمت ودا اطلع.. وكف كدامي..

زينة.. محلوة وكبرانة..
شكرا، من ذوقك من رخصتك..
محمد؛ من شفتج مصدكت عندي هيج بنت عم حلوة.. جكد.. تمنيت..
زينة؛ محمد.. وخر من دربي لااكول لاخوتي عليك..
اخوة ايش  ياام اخوة.. ذولة ميكدرون يخلصوج اذا ردت اخذج اني ابن عمج..
هم ولد عمتج..
زينة؛ وخر عني.. لااذبحك والله لاعبالك استحي لان ابن خالي...
شثبرتيني باابن خالي..
انري بنت عمي اكدر اخذج وامشي.. محد يكدر يخلصج..

عمار؛ محمد..
هلو عمار.. شونك حبيبي.. احوالك..
اني زين.. بس انت شرجعك.. مو ابوك بالمستشفى...

شغلتة طويلة كلت ارجع ارتاح، وابات يم ابوية اذا احتاج..

شفت زينة مو ع بعضها كلت خاف متخربطة اوديها للطبيب..
ركضت زينة ورا ظهر عمار..

عمار؛ اكول حير باامك وابوك اول.. ولو عندك غيرة متعوف امك وحدهة..
عمار: تعالي زينة حمينة الاكل خ نتغدا..

زينة: حمدالله اجيت عمار.. حضنتة..
عمار: هاي شبيج زينة..
زينة؛ عمار لاتطلع ابقى بالبيت لما تجي امي..
عمار؛ شعندج ويا هذا الحيوان..
ماعندي.. هو واحد ملوك.. ومضوجني..

هسة اطلعة برة.. واكول لاامي متنطي مفتاح لااحد غيرنا..

زينة: اي احسن شوكت يروحون ونخلص..
يروحون.. يروحون.. انتي خليج بالغرفة لما تجي امي..
وهذا محمد اذا مااحترم نفسة اني اعلمة..
زينة؛ الله يخليك الي عموري..
عمار؛ انتي هم ستري ع روحج.. لبسي ملابس بيهة خير..

زينة: حاضر...

يلة هاج اخذي غداج وصعدي ولو يموت احد لاتنزلين..

ماشي.. ضربني ع ظهري بشقة وانطاني صينيتي..
الحمدلله اجة عمار.. بالوقت المناسب..
صعدت، اتغديت وغسلت وقفلت الغرفة لما جتي امي..
محجيتلهة الصار بالضبط بس بينتلهة ممرتاحة ومماخذة   راحتي...

شهد: اكلج علا.. اذا تريدين ارجعي واني اخذ اجازة من الشغل واظل ريا رافت..

علا: لاعيني الناس تاكل وجهي يكولون عافت رجلهة وجاية.. بعدين رجلي صار بي شي... هو متعلم علية وعلى مداراتي وابنة حوالي..
شهد؛ اي خطية اهم شي ابنة.. حيل مقهور..
وميقبل يفاركة نهد حيلة..

اكلج علا صدك.. المفتاح الي انطيتجيا اريدة ضاع المفتاح مالي..

علا؛ ولدج ماعدهم نسخ..
عدهم بس الكل يجي قبل ماترجعون..
لهذا ع شنو باقي يمج..

علا: كولي الزمو الباب احسن..
شهد؛ باوعي علا.. اني مااحب الف وادور.
ولو مو اخوية مريض وحالتة متسمح تحلمين افتحلج هالباب لاانتي ولاابنج..
بس ميخالف.. اتحمل لما يكوم رافت بالسلامة،

علا: ليش شمسوين عيني ست شهد، بس ليكون مكعدتني بفندق خمس نجوم لو فارشتلي بساط السلطان...
شمسويلج..
شهد؛ لافندق ولا بساط، اني عفت الدنيا كلها وجيت وحصرت روحي بقوطية مثل ماتكولين عمود اخلص من المشاكل.. ودوخة الراس مال عائلتنا..

ومرتاحة ومااريد اخرب نظامي...
لهذا كليلة لاابنج يحترم نفسة لااطردة بليلة سودة.. ولا احسب لااحد حساب..

علا؛ انتي ششادة ويا محمد شسوالج طفل وغلط وعرف ذنبة.. يظل طول العمر..

شهد؛ ابنج.. مدا يفك ياخة من زينة واني كلة ولابنتي علا فاهمة للي يطخة بريشة اطخة بنار..

علا: اذا هي بنتج فهي بنت عمة لمحمد وتعرفين قانون عائلتنا..
بنت عمة ورايدهة ع سنة الله، واذا رايدة ولدج لا تدخلين..
بس يكوم رأفت يخابر فؤاد وزينة الة هو رايدهة من جانت صغيرة..

شهد؛ عصبتني.. لو يموت فاهمة لو يموت مصير الة..
كافي  هجيت ولحكتوني اني وجهالي..
مر يومين بدا رافت تسوء حالتة، علا تطلع تسوك لجهال بنتهة، والي قهرني اي احد يخابرة تكله موات دنحضرلة الجفن..
واني اشوف اخوية باايامه الاخيرة مااعرف ليش حسيت بالخوف وانو سند من مساند حياتي بدا يوادعني، مثل الزرعة الي تزرعيهة وتنسيهة وتذكرين لمن تكون اوراقها نشفت وتريدين تتلاحكين لاتموت.. جنت هيج ويا رأفت جنت ادعي رب العالمين ينجي معجزة ترجع اله صحتة، اداري واوكلة اغسلة وبدا يصير عندة تقرحات مال فراش..
لان اهمال بالنظافة، ومحد يحركة،
محمد؛ شوي الولد واكفين بعينة وزينة متحامية بااخوتها..
لحد ماقرر علي يتحول لبغداد بالحاح من زوجتة،
وطلب من الولد يساعدو، راحو لكربلاء واني دفعت محمد بالكوة يروح وياهم وعمود علا تروح شوف بنتها لان ع وجه ولادة..

شهد؛ واخيرا.. بقينا وحدنا..
زينة؛ ماما.. رح اشغل موسيقى واركص
شهد؛ لا عيب.. خالج موجود.. استحي..
احط هيتفون بااذني..
قررنا ننظف الصالة ونحط سرير لرافت بدل القنفات حشكناهم بالغرف وجبنا فراش طبي..
غسلت لرافت وساعدتني زينة.. عقمنا التقرحات.. وحرصنا ماتتبلل ارتاح حيل..
ونام نومة.. مرتاحة..
وكعد وجه المغرب عبالك صحتة ردتلة..

وكعدنا سولفنا لما كلنا بس....
ارتاحينة يوَمين ورجعت هوسة علا وابنهة وهناك عمار ومحمد متعاركين عركة قوية عمود زينة...
رجع متحلف الا ياخذ زينة بنت عمة خصوصا ان فؤاد وافق وانطا الاوكي ولان برة وصولات الامانة متاكل ولاتشرب..
انشدت اعصابنا كلش وزينة حتة دراستها هملتهة وبالليل اسمعها تبجي من غير  الكوابيس الي تحاوطني وبيوم قاطع عليها الطريق وراد يخطفهة وعمار متلكي ومشبعة كتل....
وشغلة صارت جبيرة تعبت نفسيتي حتة بالشغل اخاف لااكون كدام الامر الواقع..
تصرفات زينة تغيرت اخاف لا تكون  ضامة علية شي معدت اشوف الخوف بعينها..
بدت تطول بالحمام... مرات تتحجج تنزل تقرا جوا، خفت لايكون رفضها لمحمد لان تحب واحد ثاني مرة اجة محمد عد وصف بالباب ع زينة وعدهة واحد، رجع عمار تعارك ويا زينة..
عمار: طلعي.. طلعي ولج التلفون الضامتة..
زينة؛ عمار.. صدكت حجية تعرفة شنو هذا راد يتحرش بية ومن ماااخذ شي كام يطلع حجي علية..
شهد؛ كل عقلك شك بااختك.. من ورا هذا.. اني واثقة من تربية اختك..
رحت رأفت كتلة.. يشوف جارة لاابنة..
واخذ ع نفسة وراد يطلع ورا حجي كومة اقتنع يبقي وكال لعلا لاتوصل بيتنا لاهي ولاابنهة...
وبقة يمنا..
صح هدت شكوك عمار بس شكوكي تاكدت وظليت اراقب زينة، واشوف اذا ضامة شي..
امنت.. من جهتي بس ظل خطر محمد قائم.. لحد مايوم.. شفت زينة سحبت.. وفاتت للحمام فتحت المي..
وخليت اذني بالباب..
واسمعها تبجي وتكلة مااكدر، مااكدر اسوي هيج باامي واخواني شون تريدني اهرب واتركهم..
اهنا صعدت النار براسي وحسيت تعبي كلة هيج راح وحركان دمي، وهي عايشة بالعسل.. ممصدكة بنتي يطلع منها كل هذا..
دكيت الباب..
زينة؛ هاي امي.. رح اسد التلفون..
شهد: جانت عيني حمر دم..
طلعي..
زينة : شنو.. ماما...
شهد؛ ضربتها راجدي..
وسديت باب الحمام..
اذا مطلعتي هسة اخابر محمد باجر يجي يعقد عليج.. فهمتي..

زينة؛ ماما.. والله..
اششس.. مااسمع حسج.. لايسمعون اخوتج خ اشوف منو هذا الي امة داعية علي ومارايدي اهلة..
انطيني.. يلا صعدي كدامي..
فتنا للغرفة.. رجعت دكيت اخر رقم ماكو غيرة...
زينة؛ ماما.. بس افهمج..
دك التلفون..
واشرتلهة.. اشششس...
رفع التلفون..
الووو.. هاااا.. زينة.. منو جان ديدك عليج الباب...
شهد؛ انفتحت عيني من هول الصدمة مصدكت.. الي جان ع التلفون هو؟

للقصة بقية.....

🌸🌸🌸🌸🌸🌸🌸🌸
حابة اسمع ارائكم منو تعتقدون المتصل وشنو قصدة من تهريب زينة.. اكيد رح تعرفون بالبارت الجاي..
لاتنسون التصويت عالبارت اذا اعجبكم