رواية عندما يكون العشق صوفيا الفصل الرابع والثلاثون 34 - بقلم ruqaya H algurtani

صورتك ساكنة في عيني واسمك لا يفارق شفتي وذكراك في أعماق روحي ، فلمن سأكتب إذن ، وأنت تتجول في كل هذه الأماكن ؟ كُسر القلم ومُزّق الورق.
          جلال الدين الرومي

بديت الملم غراضي عمود اتحول لبغداد..
اخذت همام وعمار.. قررت ابيع المشتمل
ويا الفلوس عندي اشتري مشتمل صغير بغداد..
طبعا بعد مشاكل كومة وهوسة من علي بس عمي ومرتضى وكفو وياي.. والمشتمل صفى لمرتضى..

وبالاخير علي وافق.. بعد ماكتلة بيتي مفتوح الة.. عمود اولادنا وبعد جية يحيى، علي اتمسك بية وراد يرجع بس طلع من عيني كل حبي الة جنت احس الة مكانة رغم كل السوا بقة داخلي هو صاحب الفضل علية..

عمري ماانسة كلامة ولانظراتة الي باخر كعدة النا..

شهد: ممكن تفهمني شنو الي لازم تتقبلة وزمن شلها علاقة بكل هالدوخة..

علي: انتي ضميتي علية اشياء هواية..
شهد: شضميت عليك اني ع ايدك ربيت..
علي: اني هم جنت اعتقد هيج بس..

شهد؛ تعتقد.. يعني مصدك اني كذبت عليك.
علي: ليش مكتيلي ع فواد جاان..
نزل راسة وسكت.. وكفت منتفضة.. مستحية.. سكتت.. راسا عيني غوركت..
يعني هذا السبب خلاك تبتعد عني.. انت..

علي: كل مااريد اتقربلج.. مااتحمل مااتخيل اكو احد....
شهد: كااافي.. كافي تحسسني جكد اكره روحي يوم حسيت انت حاميني تحبني..
انت متفرق عن فؤاد.. بشي.. لاانت ولا زمن..
واني رغم كل العرفتة عنك.. جنت انت الوحيد الي افكر بي عمري ماحاكمتك.. انت حتة مواجهتني خليتني عايشة بتانيب الضمير.. حاسة بالنقص..
ليش الصار قليل جان المفروض تكوليلي..
ماكو احد يتقبل... انو شريكتة جانت..

كافي.. انت انطيتني مجال حتة اكلك بيومة قررت تتزوجني.. حتة مفكرت.. تسالني شبيج ليش رافضتني جنت تعاقبني.. عمرك ماحسيت بية..

كل العشتة وياك موكف بعينك ولا حتة اولادنا..
جان حجية ببرود بس هزني هز.. وهو يريد يحسسني انو ناقصة مو نظيفة..
ظليت صافنة بوجهة وهو يوصف حالتة وهو يتخيلني باابشع مظهر..
بجيت ساعتها.. ع كل لحظة كنت افكر هالزواج رح يستمر لازم.. عادي ماكو انسان معصوم من الغلط..
شهد: تعرف جكد أشياء جان لازم احاسبك عليها..
وماحاسبتك...

علي:ماحاسبتي.. بس لان غلطانة.. متحجين..
شهد: ضحكت بسري.. جكد انسان اناني..

وكفت..
لا.. اني مو غلطانة.. ابد.. اذا غلطت فد يوم فاانت رح تكون اكبر اخطائي..
خسارة بيك عمري الضاع.. بيوم جنت صغيرة ومتهورة.. وكلتلك انت مو رجال..
علي: شهههد..
هااا.. شنو تضربني.. انت مو رجال لان الرجال هو الي يحامي مرتة حبيبتة مو كلت.. حبيبتك.. ماحاميتني.. ولااخذتني بحضنك وكلت مااعوفج مادام راسي يشم هوا..
هياتك عايش ومابيك شي..
انت بس حجي..
والصاحب الي بس يحجي بدون مينفذ..
هذا مو رجال.. ولاعمري افكر ارجعلك ولااضيع يوم من عمري وياك..
عفتة وطلعت..

علي: ولااني اريدج.. مااكدر اتقبلج.. انتي..
شهد: لاتكمل.. وفر.. ع روحك الحجي..
مااسمعك بعد..
انت مريض.. بدليل محضيتلك ع وحدة نظيفة ونمت وياها دايما عينك جوا...

داخلي يمكن انقهرت.. بس معاد داخلي ولانقطة دمع اوحزن اوحب.... كله راح..
اصلا مكان موجود.. اني جنت صغيرة كل العشتة كان كوة حاشر بدماغي..

كل المزعلني بالموضوع اسرار كلتها لزمن.. ومااعرف ليش سوت بية هيج..
تركتها.. والتهيت الم بالغراض واصفي الباقي..
وبنص الهوسة جتي زمن..
زمن: هاي شوشايتي.. شو هذا الخبر صدك رح تتحولين شو مكلتي محجيتي..
والله عتبانة عليج واني الي اكول كل شي يمي.. تالي اسمع من العالم رح تنقلين..

شهد: واني سالت روحي نفس السوال معقولة.. وين العشرة.. بينا.. بس اني ماعتبت عليج عاتبت روحي.. لان وثقت بيج واني اقرب الناس غدرو بية بس ليش انتي..

زمن؛ شنو قصدج... شهد شبيج شسامعة..
شسامعة.. سامعة اقرب صديقاتي الي وثقت بيها عديتها اخت.. والله تروح تكول سري لزوجي..
بس سمعت مني انصدمت كعدت..

زمن؛ شهد.. بس اسمعيني والله مكتلة لعلي والله..
شهد: لاتحلفين.. هالسر محد يعرف بي بس انتي..
زمن: (جانت تبجي) شهد والله قصي حلف علية اذا مكتلة..
شهد: شتكوليلة..
رادني اكلة وين جنا نروح سوا لمن تجين بغداد..
وبعدين جان كتيلة اي مكان..
مو شافنا..
شافنا.. جان ممكن تتحجيلة بااي حجة ليش كتيلة هالسالفة..
زمن:والله غصب.. كتلة..
شهد؛ شنو رايج لو يعرف قصي اشياء كلتيهة الي..
زمن: لادخيلج.. شهد بيتي ينهجم.. بناتي..

شهد؛ خفتي ع بيتج واني سنين اكلج علي متغير.. علي مو ع بعضة ميتقربلي.. وانتي تعرفين وعفتيني اموت مية موتة..
شهد: روحي.. روحي الله يخليج.. روحي..
ظلت تبجي..
شهد.. والله مو قصدي.. والله خفت.. خت لااخسرج..
تخسريني.. جان ماخسرتيني لو كايلة بوكتها.. سنتين.. سنتين يازمن.. متعذبة..
وانتي تشوفيني وساكتة.. ليش ابقى مذلولة اريد اصالحة واني مااعرف ع شنو زعلان..
خلص.. خلص.. عايفة كل شي الكم..
.......................................................

هااا.. همام.. انطيتة المفتاح لعمك...
اي ماما.. انطيتة..
عمار: ماسلمتي ع جدي وجديتي..

وخالة زمن وعمو قصي..

شهد: عمار بكل شي مشتغلي رقيب..
مااريد اسلم مو عاجبني..
عمار: اخ.. ياعمار كلمتك سم ع الكل.. شحجيت ياامي دا اسالج..

زينة: عمار.. عوف امي بحالهة..
همام: امي متتحمل وداع.. لهذا مودعت احد..
كنت.. بس رايدة اودع هالمكان اودع كل ذكرياتي.. الي تصدح براسي ليل نهار هاي ثاني مرة انتقل لمكان جديد.. وارمي ذكرياتي  ورايا..
مثل اول مرة تركت الموصل وتحولت لبيت خالتي.. لحد الان اذكر من اجة علي.. وانتشلني من ذاك المكان مراهقة وحاملة وياي طفولة تعيسة.. جكد ماهربت لاحقني الماضي.. وهدم حياتي..
ياترى نقلتي هاي شنو رح تحمل وياها خير شر.. سعادة... تعاسة..
حب او الم... مااعرف..
المهم انتقل.. وابدي ويا اولادي حياة جديدة بعيد عن كل هذا الحزن.. يارب اكتبها بداية سعيدة..
حطيت راسي ع الكشن مال سيارة..
ونعست.. نمت.. وكعدت ع صوت زينة..

ماما.. خلص وصلنا..
مرت هالاشهر بسرعة.. المكان صغير غرفتين نوم وصالة ومطبخ..
ماشي حالنا..
واني لكيت شغل بمحكمة الاستئناف القريبة والتهيت بالشغل...

ماكو اخبار من يحيى نساني، علي مااثر ع حياتة.. زوج.. وبدا حياتة ويا وحدة تشبهة ممخليتلة رجلين بالكاع..
معجزتة من الطلبات..
وهو متفاهم وياها.. واذا اجة عمود يشوف جهالة معناتة عندة كم شغلة لزوجتة يشتريهة.. الظاهر اني غلط مكان يجي بالي ودايما الولد يتعاجزون اكللهم ابوكم عيب..

كل فكري بالذكريات الجمعتني لساعات ويا يحيى هروبنا والطلقات فوك راسنا..
وجودة وياي بكل دقيقة.. مراعاتة المشاعري..
مرت سنة.. سنة سريعة اخذت عمي وامي وخالتي لدار حقهم..
هيج احنا اذا مات احد لازم يجر واحد اثنين ويا..
علياء انفصلت عن زوجها...
وحسبن كلش تقربلي ودز جماعة بس اني كتلة لا.. مستحيل اقبل اخذ شي كان ملك لبنت عمي..
وفتنا بسنة جديدة كبرو الجهال وكبرت مشاكلهم.. صح بطلو يتناكرون بس طلباتهم متخلص..
زمن هواي توسلت اسامحهة.. بس قررت  ماكو سماح والي راح.. راح..
هيج احسن.. اني حياتي خربت.. حتى لو خربانة اني وعلي معاذ نكدر نباوع بوجه 2...
كل شي روتين.. محد يصدك مرة متزوجة وولدي بطولي..
هواي الحياة هنا تختلف..
الناس يحبون يدخلون ليش وشمعنى ومحد يز وركم  مين انتو.. زينة اكثر شي جنت اخاف عليها.. كبرت وهي حلوة من كاعها.. ومملتزمة بحجاب.. وداىما عراك ويا عمار..
حصلت شغل بمكتب محاماة..
وصاحب الشغل رجال جبير دائما نتبادل اطراف الحديث.. وهواي سهلي معاملات النقل والتحويل..
ملكيةالبيت القديم والجديد وفرلي شغل.. ويقدر ظرووف البيت ومرض هماام الي مشكلي كابوس.. مو كادرة اخلص منة..

جانت زينة وياي بغرفة وعمار وهمام بغرفة..
بيوم من الايام واني راجعة لكيت بت جيرانة تكول جاكم خطار..
استغربت منو هذا الخطار...
صادف يوم الجمعة كاعدين واسمع صوت الباب  يندك..
واذا برافت اخوية بالباب هو وزوجتة وابنة..
بس شفتهم انقبض صدري..
للقصة بقية...
تحياتي
نازك الملائكة