رواية عندما يكون العشق صوفيا الفصل الرابع عشر 14 - بقلم ruqaya H algurtani

‏أنتَ في كُل الأشياء حولي ، في كُل رؤية ، في كُل صوت ، لكنني لَم ازل أذوب حنيناً إليك.
جلال الدين الرومي
كعدت الصبح نايمة عالسرير.. فزيت ماكو احد..
بهاي الفترة كنت يومية اكعد الصبح فازة ويخيلي اني جنت عايشة كابوس..
وماكو شي من الصار حقيقي..
بس اتفاجا بملابسي مصفطة بالكنتور حلقتي الي تحولت للجهة اليسرى من ايدي...
كنت شخص هادئ، هذا طبعي العام..
بس حضور علي بالبيت.. يولد داخلي هاي الطفلة المشاكسة المثيرة للمشاكل..

بدلت ملابسي.. بعد نزاع عنيف بالليل بيني وبين علي.. عمود البس ملابسي..
واخرها هددني ينزل ويعوفني.. ويبقيني للظلام الي اخاف منه..
بدلت وصليت كدامة ابين انو مااريد اصلي واشلع كلبة..
بس بيني وبين نفسي اني محتاجة الك يارب.. محتاجة تساعدني واني داخلي كله محطم.. اكو ظلمة داخلي..
خايفة يجي يوم تحيطني بجدار من المخاوف.. لا اصالح علي ويطلب مني علاقة زوجية.. واني كارهتهة..
لذا ظليت بهذا الحاجز عمود لايقتربلي..
حاولت اطلعه عن طورة اضوجة.. وهو دائما الاستغفار ع لسانة..
مرات افوت للحمام واظل ابجي.. لان مو كادرة اعيش طبيعي..
مرت 3ايام..علي حاولت بكل الطرق.. ازعجة.. البس ملابس اجذبة وبعدين امنعة.. اعترف  اني تعبتك.. تعبتك هواي..
بس يعلم رب العالمين ماكو احد احبة غيرك..
انت وحدك عالمي.. بس توكف ذيج الليلة بعيني واذكر توسلي بيك.. ومخليت لاايد ولارجل مابستهة بس مارحمتني احساس الوجع كانو بكل لحظة وياي..
بهاي السنة بيت عمي اشترو تلفون.. خط ارضي..
عمود اذا احتاجو علي يخابرونة..
رجعت للدراسة علي راد ينقلنة اني وعلياء..
بس جانت السنة بدت تخلص وعطلنا العطلة القبل الامتحانات..
علي؛ ينتظرني اكمل دراسة وهو يلتهي بقرايتة..
مرات اتمنى يخطف بنظرة اتجاهي..
يجي يجرني يحظني.. بس هو ابد ماوصل هالخطوة... مرات اتقصد اعوف الحمام مفتوح بلكي يجي.. بس اذا حسيتة وصل يمي.. قفلت الباب..
حاسة روحي متوترة.. ومكتئبة.. وتعبانة..
بس مااعرف شنو المتعبني..

شهد؛ علي اني كملت قراية تكدر تطفي الضوة.. استبدل الضوء بضوء خافت عمود لااخاف...

علي: شايفج اليوم نمتي عالجرباية..
شهد؛ دامي يومية انام والكي روحي عالجرباية..
لذا اوفر عليك.. وانام هنا.. بدل ماتشيلني..

ومنو كالج اشيلج..
شنو قصدك..

مجنت اعرف انتي تمشين وانتي نايمة..
شهد: لا.. مو صحيح..

علي؛ يومية.. تجين بالليل تنامين بصفي...
وقبل كم يوم شفتج تمشين وانتي نايمة..
علي: اكو أشياء هواي دا اكتشفها بيج..
وطول الليل تهلوسين.. بكلام ممفهوم..

شهد؛ كذب.. مااسويهة..
علي: بكيفج..
لا تقتنعين..
شهد: شفت بوجهة ابتسامة..
وحسيت يريد يستفزني..
وكفت لحظات اطياف.. الماضي تحضرني.. ضحكات فؤاد.. علية واستهزاءة..
لحظات.. اخذت صفنة..
فتت للحمام غسلت وجهي..
بسرعة الشيطان من يوسوس للانسان..
ويحضرلة فكرة..
طلعت.. لكيتة نايم عالقنفة..
ترددت احجي..
واجة صوت علي.. لمس ايدي.. شهد..
هاا..شتريدين..

شهد؛ وديني لااهلي...
شننووو..
اريد اروح بيتنا هسة..
علي: شهد.. لج ياصخام دنيا ليل روحي نامي الصبح اوديج قبل لاالتحق..

شهد: حجة ودفعني.. باايدة.. ورجع حط ايدة ع عينة..
دينام..

شهد: حاسة روح مهزوزة.. تعبانة..
انت تزوجتني عمود هيج..
علمود تذلني.. ولمن تريد تخلص مني تكول علية مخبلة..
علي :بعدت عيني  وكلي.. اندهاش هاي البنية لو تريد تخبلني.. لو هي مخبلة رسمي..
شهههد؛ هي شدتحجين.. بطلي سوالفج.. باجر وراية دوام.. وطيحان حظ.. رحمة لاابوج نامي.. وخليني بحالي..
شهد: نام بالليل.. واني اشوف شون اروووح..
علي: لج.. شهد.. كافي خبالات ترة والله زهكت.. تعبت ساعة الغبرة زوجتج بيها..
لج بابا اهمدي.. ريحيني من خبالج شوية...

شهد :حقك.. وين لاكي هيج ورطة تورطت بيهة..
بس باجر اروح ماارجع.. كااافي.. كلمن يروح لااهلة...
علي؛ شهد.. الجني مالتج نومي.. كليلة مو وكتك علي.. مصموط ابو ابو.. ارحميني..
صاااح علية اخر جملتين..
وسكتني.. بس خلاني ابجي..
وابجي وداخلي غصة...
علي خلة مخدة ع راسة.. عمود لايسمع..
وكعد يستغفر..
مشيت خطوات ردت اطلع من المكان..
عمود لاازعجة.. واخلص من الخنكة داخلي..
صاحني علي...
شههههد..
وين رايحة..
شهد: راح اطلع اشتم هوااا...
علي: تعالي لاتفضحينة بتوالي الليل..
تعاي خل افتهم شبيج..
جرني من ايدي.. واني كطفلة مطيعة مشيت وراااا..
تعااالي .. يلا.. مددي.. تعالي.. بحضني...
اشش.. يلا اهدي.. شبيج ... ليش هيج.. تبجين.. مو متريديني اجي يمج..
شهد: علي.. لاتحجي.. بس خليني بحضنك وبس....
علي: ماااشي.. بس لازم تكليلي.. شنو مضايقج.. عمود اساعدج..
شهد: علي.. بس احضني.. لاتعوفني...
ماشي.. مااشي حبيبتي.. اهدي يلا.. اجيبلج ماي شربين..
شهد؛ لااا، علي.. ابقة يمي وبس..
علي؛ ع فكرة اني يومية اشوفج واكعة بالكاع.. واعرف تتحسين بالليل نايم لو لا...
يعني ماامشي واني نايمة..
هههنن. هاي انتي لان حجيت هالكلمتين.. زعلتي..
لج شون بيج.. شهد.. جننتيني..
علي: اني اسفة.. لان.. حجيت عليك...
اشجان ظلت تضغط.. علية لما انفجرت..

علي؛ شهد.. انتي لازم تكون عندج ثقة بية، جكد حجيت وكلت..
انسي الكل.. اني الج.. كلي ملكج.. لا تسمعين غير مني..

شهد: علي.. دير بالك تعوفني.. مااتحمل..
علي: ولج.. مخبل.. اني اعوفج..
جكد جان عندي فراغ بالبيت يسموني دجاجة.. بفضلج ماشاء الله..
كمت لانوم ولاكعدة... خلصتي علية للتالي...
شهد؛ اني اسفة علي..
علي: لاتتاسفين اني اسف.. سويت بيج هيج.. اكيد بسببة انتي هيج خايفة ومتاذية.. بس والله مجان بالي ااذيج.
بس.. غلطة عمري.. مااكررهة..
شهد:علي.. خايفة..
من شنو خاييييفة..
صارحيني.. حبيبتي.. اني زوجج.. وحبيبج وبيتج وكل شي..
لاظمين علية.. شحاسة..
شهد: ظليت بس ابجي...
علي انتظري.. بس اوعديني متخافين..
شهد: شنووو..
رح اطفي الضوة..
شهد؛ شبثت بية خايفة..
بس.. ثواني انتظري..
شهد؛ ها علي وينك..
هياتني حبيبتي.. هياتني.. تعالي رجعي..
يلا هسة ظلمة.. وتكدرين تحجين براحتج.. شنو ضوجج...
شهد؛ علي.. مااكدر احجي..
جتي تقوقعت وتقربت حيل لحظني كاني تكلي افتح كلبك خليني بي..
هااا شهد.. وين تريدين ترووحين..
اريد ارضيك.. علي...
ترضيني.. اخاف عليج...
لا.. علي.. ارضيك..
شههههند..
مجرد ماهمس بااذني ومشة شفايفة جسمي..
داخلي كلة انتفض..
كل جزء بجسمي تعذب.. لدقايق.. ردت ارضي.. ع حساب راحتي..
بس اول مخلصنا.. لفيت روحي.. وتكورت وكاني والشرشف جزء واحد..
كمل علي وفات  غسل... واني كعدت ابجي..
تعبانة حيل.. واحس كل شي داخلي محطم اول ماحسيت طكة الزقفالة مال باب مسحت دموعي .. وسويت روحي نايمة...
اجة تقرب مني وكلة جسمي يرجف وخايف فز ع لمسة ايدة ع جسمي..
انتفضت بصوت عالي وكعدت..
هااا، علي شتريد.. عيوني كلها توسل لاتكرر سويتة كافي ليوم..
علي؛ حبيبتي.. كومي غسلي..
ميصير تنامين ع جنابة..
شهد؛ مدرت.. وجهي..
جاوبتة.. واني ضامة وجهي لا يكتشف..
هسة علي.. فوت نام عمود اكوم..
علي؛ شبيج.. تعبتي.. اساعدج اني..
شهد : صحتتت لاااا..
سحب ايدة والدهشة بوجهة..
شبيج.. شهد..
مابية علاوي.. هسة اكوم..
روح نام انت..
علي؛ رح اصلي صلاة الليل مبقة شي للفجر..
شهد؛ هسة اكوم.. بس اطيني ملابسي..
علي؛ تستحين مني...
شهد: لا.. علي..
علي: اني احبج هيج.. الحياء شعبة من شعب الايمان..
شهد: ابتسمت.. لشخص زوجي الي ميفارق الذكر لسانة...
فتت للحمام.. من زوجت ممباوعة ع روحي بمراية اول مباوعت.. بسرعة استفرغت..
وبجيت شوي.. غسلت وبدلت ملابسي..
وطلعت اريد ارسم بوجهي ابتسامة مزيفة اني فرحانة..
جان علي يقرا قران وبصوت عالي..
ولامست روحي كلمات الذكر الي كاني اول مرة اسمعها..
شهد: علييي..
علي: صدق الله العظيم..
ها، حبيبتي..
ممكن تجي عالجرباية.. خليني بحضنك.. واقرالي قران..

علي: تدللين.. بس تعالي.. نصلي صلاة الزواج.. ماصليناها اول ليلة..
اول مامسك ايدي حسيت براحة وسلام.. اني مخايفة وكل الحزن اختفة بلمسة ملائكية من زوجي الصوفي..
شهد؛ اروح اجيب حجابي..
علي يلا..
صلينا  ركعتين.. ودعى علي بصوت.. وصدى فرحان..
اول مااباوع بعيونة احس بالفرح والامان شايفة بي ابوية واهلي وكل ناسي..
اللهم بارك لي في اهلي وبارك لهم في..
اللهم جنبنا الشيطان وجنب الشيطان فيما رزقتنا..
كملنا.. اخذ علي القران.. وكعد يقرالي.. لحد مغفيت..
ظليت اشم بريحتة وحاس بااشتياق حتى  وهو بحضني.. مشتاقتلة...
ثاني يوم التحق لوحدتة.. وشعرت جكد وحيدة رغم هو مخلا شي مجابلي.. عمود من اقرا مااجوع...
اول ليلة الي.. وحدي كملت دراسة واختفى النوم من عيني..
قررت اغوص بعالم علي.. وابدي اقرا...
لمست كتابة المفضل وابتديت اقرا بكتاب قواعد العشق الاربعين.. واستوقفتني قاعدة من القواعد.. يقول: “حياتك حافلة، مليئة، كاملة، أو هكذا يخيل إليك، حتى يظهر فيها شخص يجعلك تدرك ما كنت تفتقده طوال هذا الوقت. مثل مرآة تعكس الغائب لا الحاضر، تريك الفراغ فى روحك، الفراغ الذى كنت تقاوم رؤيته.”
صح هو هذا احساسي.. داخلي فراغات اجة علي وملاهة...
ولاتلوموني.. اني دائمة البكاء ومااعرف شوكت تنشف دموعي.. بس اشتاقيت لروحي اشتاقيت لعلي..

للقصة بقية...
بارت مفاجي لعيونكم..
لاتنسون تصوتون عالبارت اذا اعجبكم