رواية عروس البيت الاسود الفصل الخامس عشر 15 - بقلم لارا سالم

......................................

الرعب اكلني صرت ارجف وصوت عياطهم فوك ماسكت

نزل مهدي ركض يلبس بقميصه شلون مجان

شاهين نزل يركض وراه يرزله يصيح مهدي مايسمع

رغد وكفت كدامه تريد تهدي دفعها حيل وكعت بالكاع

رحت نطيتها ايدي كومتها اجيك راسها عبالي راسها تأذه

طلعو هو وشاهين منعرف وين راحو

ساعه ساعتين ضل بالنا رغد تفتر بالبيت تدك عليهم محد يرد

ماحسينا الا باب المطبخ نركعت دخل مهدي يسحل بوداد

جارها من شعرها سحل

نص شعرها تكطع بيده من الجر

رغد ركضت تحاول تجرها من ايده ماكدرت عصبيه مهدي جانت فوك كل كلام ممكن ينكال بهاللحظه

بحياتي ماشفته منهار يصيح و يصرخ و يضرب لزمت جسمي الرعب اكلني تذكرت ايام الضرب و الكتل ويه شاهين و شكد عانيت
من انسحل و ارفس و محد يلحكني لو يوخره

ماتحملت ركضت عليه اضرب بايده و اصيح بوجهه لحد ماخلصتها من ايده

ضل يصيح و يكسر شكو شي يجي بايده
وكلما يوصل يمنا بالكاع يرفسها ببطنها

بهالاثناء دخل شاهين هو وابوهم

جرو طلعو بره رغد ع صفحه تبجي ماكلها الخوف

صحت بيها : شصفنتي عليه ساعديني نصعدها فوك

احنه ونشيلها دخل شاهين شافها بهالوضع كال لسيارتي بسرعه اوديها مستشفى

وداد فقدت من الضرب كوه فاتحه عينها وحلكها وخشمها
ماينشافون من الدمايه

صعدناها بالسياره ركضت جبت عبايتي و طرنا للمستشفى

الدكتور يصيح جيبولي هيج جيبولي هيج يداويها ويصيح علينا
عباله احنه ضاربيها

شاهين كله دكتور ذليتنا مشكله بينها و بين زوجها

هيه تتلوى بايد الدكتور نقلها غرفه كعدت يمها

شاهين بره طلع يخابرهم اسمعه يرزل بمهدي

شويه ودخل كلي بصوت ناصي : اني راجع للبيت هذا تخبل مكسر غرفته تكسير
و شاك ايده بجامه الشباك اليوم حنبات بالمستشفيات

- روح الحك عليه بسرعه

- انتي باقيه هنا ؟

- طبعا لعد اعوفها بهالحاله استعجل ارجع لاخوك خليك وياه

باوع ع وداد هز ايده وطلع

بقيت يمها هيه شبه نايمه شبه كاعده تون من الالم

كعدت وره كم ساعه عطشانه شربتها مي

صارت تبجي و تحسبن ع مهدي تكلي
-  يصبر عليه اليوم اطيح حظه اني انضرب وانهان اني ؟ والله لا اخيسه بالحبوس
المرايه نطيني المرايييه

- كل الهامج شكلج ماخايفه من نرجع شحيسوي بيج ؟

- طبه عرج صوجي اخذت هالهمجي تقدملي الطيار و المهندس رفضتهم
دا اخذ مال الفكر هذا

- مهدي مو فكر الي سويتي انتي مو شويه

- انتي جايه تكملين عليه ناكصتج اني هسه بعدين شمعرفج السبب
لو لان حماج وطابك وياج دائما تدافعين عليه

- مالها علاقه بس اعرف

- شتعرفين بله

- شفت المحادثه

بلعت ريكها : اي محادثه

- الي جنتي تحجين وياه ونطيتي موعد

- تتبلين عليه انتي تره ....

- انتي مو بوضع تهددين رجلج كالب الدنيا بالبيت شاهين خابرني يكلي لترجعيها ضلو بالمستشفى

سكتت كامت تبجي وتشهك

غمضت عيني مسحت كصتي : من شوكت انتي وياه ؟

- من زمان

- كبل ماتاخذين مهدي؟

- اي

- و ضليتي وياه وره الزواج!

- اي

- صار بينكم شي لو علاقه طياريه ؟

- صار كلشي

- و جنتي بايته يمه الايام الفاتت؟

حطيت ايديناتي ع وجهي

- احبه ماكدرت اعوفه

- ليش ماتزوجتي ليش كسرتي ضهر هالمسكين ؟ لا وتردين تحبسي

- لازم عجبج الي سواه بيه

- والي سويتي انتي شنوو ؟

- داكلج احبه احبه ماكدرر اعوفه اموت

- جان حاولتي تحبين مهدي و مشت حياتج

- هو ماحاول يحبني الف مره تقربت منه تعوذت الشيطان وعفت حبيبي علموده بس ماغزر بعينه كلما اتقربله يبتعد
شهور هاجر فراشي يبات بالمحل
يراسل وحده كدامي من احاول اعرف يكلي صديقي ويسد الموبايل
و من واجهته بمسجاته وياها يكلي شي قديم وماكدرت انساها
هسه صرت ملامه ولازم انسى ؟ وهو ليش ما نسى ماتذكر عنده مره جاوبيني اذا حقانيه

صفنت بوجهه ماعرفت اجاوبها
اخ مهدي وين وصلت نفسك
شنو الخلاك تهدم زواجك

بقيت ساكته تحجي تحجي ماعرفت اجاوبها

مسحت وجهي كتلها : و شصار اليوم شلون لكاج

- رجعت لاهلي الصبح لكيته كاعد وياهم هو وشاهين
بعدني مافاكه حلكي جرني سحل لبيتكم
لو ناطيني مجال احجي جان تحججت بصديقتي او شي
بس هو رجال طبعا لازم يطلع عضلاته كدام اهلي واهله

- وشحتسوين هسه؟

- حكول جنت بايته يم صديقتي اريح اعصابي
هيه ارمله عايشه ويه ابنها و بناتها يعني عادي
وانتي حتساعديني بالموضوع
لتجيبين سيره علي شفتي
الله يخليج حور لتهدمين بيتي
اذا عرف يذبحني و يشيل خطيتي ترضيها ؟
لخاطر ابويه وامي ناس كبار بالعمر مو حمل هيج مصيبه
فكري بيهم و بمهدي
ستري عليه الله يستر ع عبده انتي ماتسترين ساعديني

بقت تبجي وتتوسل تترجاني اسكت
دخل الدكتور كالها ماكو شي صعب يبقيج بالمستشفى بس اكتبلج مسكنات احتمال تحسين ب ألم بليل شربيها وعندج العافيه و طبعا تكدرين تشتكين اسويلج تقرير طبي يودي تسعه باسود بيه

- ان شاء الله دكتور
خنزرت عليها حجيت بنتره : ميحتاج نحلها ودي احسن

شافتني حجيت هيج سكتت
خابرت شاهين كتله مر علينا رجعنا

اجه اخذنا رجعنا للبيت رغد طلعت ركض للكراج جتي تساعدني نمشيها دخلنا للبيت

طبت كعدت بالهول ابوهم جان موجود يعرف حنرجع

كالها حلكج ماتفتحي شيسوي ضلي ساكته

نزل مهدي يركض دخل ياشر عليها : شجابها

رغد : كول يا الله اخويه

مهدي عاط : يعني تردون اجرم بيها اليوم

ضلو يتصايحون اني وياها كاعدين عالقنفه احاول اكفه بايدي عنها اني وكاعده

بدت تبررله انو يم صديقتها باتت و مارادت تبقه عد اهلها علمود مايضغطون عليها بالكلام و يرجعوها اله غصب عنها

هو بقه يصيح يريد يهجم عليها كل شويه شاهين وابوه يلزمو يرجعو ليوره كل شويه

لحد ماكالت : مامصدكين سئلو حور دزيتلها مسج ع موبايلها

كلها باوعت عليه شاهين يخنزر و مهدي يخنزر عليه

تبلعمت كلت لشاهين: تعرف سيم كارتي احترك كبل فتره ونسيت اكولها

مهدي يفرك براسه ضل يفتر منا ومنا يلوب ويه روحه

تمنيت الكاع تنشك و تبلعني ع هالموقف
حضي الاعوج كل مره يحطني بموقف وياه ابشع من الي كبله
بس ماردت تشتكي عليه راسها ناشف و عدها جرئه جانت ناويه تحبسه
والموضوع من يمها علمود تضل ويه حبيبها ماردتها ترجعله ع حساب مهدي
ماردته يتظرر منها اكثر من هلكد

شاهين بليل كعد يمي : صديقتها مو

- مو كالت كدامكم وين تروح قابل

- و شنو سالفه المسج الدزته الج ؟

- مادري شمدريني

- تحاولين تجذبين بس ماتدبريها

- شعلينا بيناتهم يحلوها احنه شنو

- تعاي وين كايمه

- شنوو اكعد مو وكتها

كعدني ع رجله وايدي ع شعره العب بي

- شنو شبيج

- ماتشبع انت

- صاير اشتاقلج وانتي يمي لتختفين بعد

- جنت بالمستشفى يا الاناني

- اخذيني وياج مره ثانيه او عوفيهم ينكبرون و خليج يمي

- ههههه

باسني بوسه طويله نسيت بيها تعب النهار

نمنا بس عقلنا مو يمنا

بقى يسئل و يدقق ع سالفه وداد ونبره صوتي مادخلت بعقله السالفه
كتله بكل الاحوال لازم نهدي الموضوع احسن ماتشتكي عليه الدكتور جان ناوي يسويلها تقرير طبي شجاك

اكوم اسوي عشه ما تاكلون اليوم؟

طلعت من الغرفه باوعت غرفتهم بابها مفتوح الغراض كلها مفلشه
جام مكسر بكل مكان
هدومها و جنطها و احذيتها كلها مشمره بره الغرفه بالممر

نزلت جبت مكناسه ووصل مسح و علاليك

صعدت الم بالجام و الغراض المكسوره مسحت الغرفه

حطيت فراش جديد طببت غراضها رتبتها

رحت لغرفه رغد كومت وداد رجعتها لغرفتها نومتها بفراشها
كالت : ومهدي ؟

- مايرجع اليوم وره الي صار يبات بره نامي هسه ويصير خير

نزلت سويت العشه صحتهم محد اكل بس شاهين نزل ابو بطن

ثاني يوم رادت تروح لاهلها خايفه من مهدي اذا رجع

شاهين وداها لاهلها بقت يمهم اسبوع

مهدي من يومها مارجع للبيت

رغد علاقتي بيها صارت اقوه تكلي ماعرف شسوي لو ما انتي هنا

كتلها يمعوده كل واحد همه شكل نمشيها و شلون ماتجي تجي

سئلتها عن رجلها : ماناويه تكليلي ليش عايفه رجلج

- هو العافني

- شلون

- سالفه طويله تتعب الكلب

- بس احسج ماراضيه بالوضع

- ماراضيه بلي سواه ولا راضيه علي اهلي سوو و مشتاقتله مشاعري متناقضه حور

- غير اعرف شسوه

- ضربني و كتل ابني ببطني

- تشاقين

- والله

- ليش و شلون

- جان يشتغل ويه اهلي يشتري عقارات بكردستان من العرب استثمار
و الربح بالنص هو وابويه و شاهين
جتي ايام خسر بيهن و رأس المال جان من ابويه
تعصبو عليه كلوله سوي شغل خاص بيك
نفسيته تعبت و صار يتعارك ويايه بالصعده والنزله يكلي اهلج يعيروني بفلوسهم
زادت مشاكلنا تعاركت وياه عركه جبيره لزمني كتلني
والضرب نصه اجه ببطني بنفس اليوم نزل الحمل و سقطت
اهلي من عرفو راحو كتلو حطو السلاح ع راسه
نهاريت و ترجيتهم يعوفو اخذوني رجعوني لهنا
حاول يرجعني بالبدايه جنت زعلانه منه ماقبلت ارجعله
لما عافني من صدك صار مايدور اخباري مايخابرني
خطب وحده وياه بدوامه رحتله تعاركت وياه طردني من البيت
كلي خلي اهلج يفيدوج و خطيبتي احبها واريدها
ندمت كلش من عفته و خليت اهلي يتحكمون بيه
سويت المستحيل حته نرجع ماقبل

- اذا تحبي هلكد جان ضليتي تحاولين وياه ليش خليتي يعوفج

- اخر مره حاول يرجعني هنا ابويه كاله اذا وصلت هلمره اقتلك
واني جنت واكفه ساكته ماحجيت شي جنت بعدني مقهوره ع حملي الي راح
هذا الموقف خلاهم لاهلي ينهارون من مات امير ابن شاهين الله يرحمه
مانسو الي سواه زوجي بيه وانوبه خسرو حفيدهم الثاني

- بس هاي حياتج مو حياتهم رغد

- قصدج انهزم وياه ابويه حلف مارجعله بعد
اني هالطفل جان حلمي حملت بي بعد عذاب سنين
ماجان يصير عندي حمل تأخرت 8 سنين يله صار هالحمل
راح مني بغمضه عين
لتلومين اهلي علي صار بيج بعدج ماتعرفين شنو طفل تتعلقين بي وتخسري الموت اهون من هيج شعور
امير جان ضحكه هالبيت ابويه جان ناويه يكتبله كرفه عقارات من فرحته بي
وشاهين بقه بلا زواج سنين طويله علمود مايجيبله مرت اب تقسي عليه
بس انتي جوارينا و يعرفج من زمان اخذج لان ضامنج
مات ابنه فقد ثقته بكلشي
اساسا استغربت شلون رجع طبيعي وياج بالفتره الاخيره
بس دام كدر يتخطه الموضوع و يبدي من جديد وياج يعني يحبج
اخويه يحبج حور لتخسري
لتغلطين غلطتي
لو انتي بمكانه يمكن مجان كدرتي تسامحيه
اني بعدني مامسامحه زوجي بس احبه بعدني ادوره واريده
ضعت بين حسرتي ع ابني و حبي اله
لتصيرين مثلي

سكتت دموعي نزلت اني واسمعها

- فرحت كدرتي تكسرين الحاجز البينكم و تخلي يتعلق بيج تستاهلين كل خير واخويه يستاهلج

- متتخيلين شكد جنت اضوج منه لوما موت امير جان احنه منفصلين هسه
بس سبحان الله القدر حطني بهاللعبه دا اتعلق بي
المكتوب عالجبين لازم تشوفه العين
عوفج مني هسه انتي شلون تبقين هيج ؟

- شكدر اسوي ؟

- حاجي اهلج مره وثنين و تلاثه لما تقنعيهم

- صعب مستحيل يقتنعون جربت ومافاد

- دام بعدج تحبي ضلي حاولي ماكو شي مستحيل

بقيت احجي وياها بس اليأس مسيطر عليها

شاهين جابلي هدوم حمل هدومي بدت تضيق عليه
بس الجابهن طلعن ضيقات همين
رحت وياه شتريت هدوم جديده
تعشينا بره
احنه وناكل لزم بطني كلي : اكلي خلي يتغذه ابني

- واذا طلعت بنيه شلون

- كلشي منج حلو

- رح تحبه كدي

- انتي مرتي وهو قطعه مني مرح احب احد كدكم

- الله ليحرمنا منك ماعرف ليش اتوتر من نحجي بهالموضوع

- ليش

- مادري اضل افكر بلموضوع يوميه خايفه اخسرك لو اخسر ابني
ماحابه اخسر الفرحه الي حاستها هسه
فرحانه حيل شاهين

- ماتخسريها واني يمج

- حنبقى سوه طول العمر

- طول العمر

نحجي هو و لازم بطني تمنيت مايوخر ايده ومايشيل عينه
ردت احضنه لو ما الناس بالمطعم
كلامه يريحني يطمني بس تضل غصه بداخلي ماتروح ماعرف ليش

حجيت ويه شاهين بموضوع رغد و زوجها رفض الموضوع راسا
يكلي اذا شفته اعجنه ليطلع بوجهي احسنله

وره مده رجعت وداد للبيت من نفسها
مهدي بقه مايحجي وياها ولا ويايه حسيته ماخذ موقف مني لان طبكت وياها

شاهين كالي منتظر امي ترجع ويطلكها بس وره ما الناس تجي تتحمد لامي بالسلامه
يريد ينهي الموضوع بهدء بلا محد يعرف

باوعني اني نايمه ع ايده باس راسي كال :  احارب الدنيا وانتي يمي

- احارب وياك

- وين انتي اذا الزم ايدج تطك بايدي

- ياما طكيتها نسيت

- نكسرت ايدي ان شاء الله

- اسم الله عليك حبيبي

حصرني مره بالمطبخ اني و اصب الجاي لافني عليه يشم ويبوس ركبتي
مادري شجاني تجاوبت وياه لفيت ايدي ع ركبته

ماحسيت غير مهدي دخل عبالي نايم بغرفته فوك طلع جان بالحمام

جفلت درت وجهي راسا عالجهه الثانيه اعدل البدي

شاهين يحك راسه فتح وياه موضوع شلون مجان

مهدي كوه يجاوب عليه

حطيت الاستكانات بالصينيه شلتها و طلعت طياره من المطبخ

رجعت عمتي من العمره حارو الولد شسوو برجعتها طارو بيها

من عرفت بيه حامل كلبت وجهه بس سكتت لان حيصير عدها حفيد

بس ماغيرت موقفها مني عكس وداد تاخذها بالاحضان يوميه

مهدي يدير وجهه من يشوفها تعاملها زين

شاهين هم يسكت يكلبون وجههم

الخطار كامو يجون صبح و ليل ضهرنا نكسر من الشغل

بس تونست بكعداتهم البيت شهور اضلم و هدوء مليت

شتاقيت للحياه والناس و السوالف هالشي عيالي ماعدهم ابد الا بالمناسبات

النسوان تشوفني تباركلي عالحمل يسئلون وداد تكلهم بعدني

يتهامسون بيناتهم ويعوجون حلكهم

عمتي تكلهم عن قريب ان شاء الله هاي جنتي المدلله

وداد سوت المستحيل علمود تكسب مهدي صرت ما افهم موقفها تريده لو ماتريده اندعيت الله يهدي سرهم لخاطر مهدي مايستاهل يعاني
كلبه طيب و هادء تحسه شايل هموم فوك طاقته

مرتين تجي تسئلني ع بوادر الحمل تكلي صار عندي هيج حاله و صارت هيج حاله

اكلها لا هيج يصير و هيج يصير

من شفتها تريد تحمل عرفتها رجعت لمهدي و تريده هالمره من صدك

مرو شهرين ماصار عدها و الي فهمته منها انو مامتقربلها غير مرتين بهالفتره و مو برومنسيه على كد الراحه

اشوفها مرات تدخن بالمطبخ تصفن هوايه
تخابر امها تشكيلها
تعاركت وياه كذا مره علمود هالموضوع  يعوفها ويطلع يبات بره البيت

فد يوم طبيت لغرفتي شاهين جان توه طالع من الحمام دينشف شعره بالخاولي رحتله حضنته من وره بعدين اخذت المنشفه انشفله جسمه
حجيت فجاه : البيت صاير كئيب تحسهم تعبانين مالهم نفس يحجون

- مهدي اخويه واعرفه من يحط شي براسه يسوي

- وشنو الي براسه

- يريد يطلك

بلعت ريكي : بس وداد صارت زينه ليش ماحجيت وياه

- يكلي ماكدر يحبها ديحاول بس مايشوفها المره الي تناسبه عبالي حاب وحده بس لو اكو هيج شي جان حجالي

ارتبكت كلش بهاللحضه : ش ش شلون عرفت يحب وحده وليش مازوجها

- هذا الخلاني ماصدك بالفكره لو اكو وحده بباله جان اخذها ليش يضل ويه وداد حته فراشها هاجره

- وين اكو رجال يكدر مايتقرب لمرته

قربني عليه : مو كلها نازكه مثلج و توكع الطير من السما

- عابتلك هههه لا صدك حبي ليش مامتقربلها تسئلني عالحمل دائما

- يا حمل هذا هاي معوله تصير حامل من الهوا
من رجعت للبيت وهو مامتقربلها

- شلون عرفت

حط راسه بركبتي و حضني همس : هممم هو كالي

تجاوبت وياه واني عقلي يم تصرفات مهدي
هذا مناوي يجيبها البر

صدق الي كال البيوت اسرار الي يشوفنا من بره
يكول عليه ماخذيني ثار و بينا عداوات ازليه و مستحيل احب زوجي ويحبني
و عيالي يكرهوني
محد يعرف الي صار بهالبيت
كم سر موجود بي
و كم حقيقه محد شايفها
و كم شخص جان موجوع بهالبيت
اوجاع اترممت و اوجاع ضلت حسره بالكلب
وداد رجعت لمهدي هيه ومتخيله حتكدر تصلح الي فات
بس مانتبهت اكو امور اذا نكسرت ماتتصلح
و ماتدري هو وين باله
هيه خانته بجسمها
وهو خانها بكلبه و خياله
و خان اخو الي مايكدر بلياه
اني متاكده لو جنت بغير مكان و مو مرت اخو ماجان انتبهلي
بس كل ممنوع مرغوب
او حب طريقه حبي لشاهين
من بجيت ع جتفه حس هالدموع من حبي لشاهين
من جان يشوفني احجي عن شاهين بسبب وبدون سبب
فهم الي بداخلي حب مو كره كالي هالشي بوقتها بس ماصدكته عبالي يداهرني
شاف الشي الي اني ماجنت شايفته و لا منتبهتله
تعلق بيه بدون مايدري
هاي قناعتي بمهدي ماكدرت افسرها بغير طريقه

وره شهرين مهدي فتح سيره ويه امه ع الطلاك بس ما حجالها الي صار
كامت تنوح وتبجي علموده ماقبلت توسلت بي ينطيها مجال لما يصير عدهم طفل هو رح يحسن علاقتهم

شاهين هم حجه وياه هو ابوه كدرو يقنعو يصبر عليها

هيه صارت تكشخ اكثر تحاول تكسبه مثل الاول
سوت عيد ميلاده مفاجاه جابتله كيكه جبيره و هديه ساعه ذهب

بس دخل تفاجه مافتهم شديصير
ركضت هيه عليه حضنته باسته من خده
شاهين و البقيه يعيدو هيه ضلت حاضنته صفح تبين للبقيه انو حياتهم رجعت طبيعيه
بس ماشفت هالشي بعين مهدي يجاوبها ع كد الحجايه
يتبسم ابتسامات بسيطه

نطته الساعه الهديه لبسها شلون مجان كدامنا بابتسامه صغيره كالها شكرا

حاولنا نلطف الجو رحت شغلت اغاني بالتلفزيون رغد ركضت تجيب البيبسي و المعجنات من الثلاجه
احتفلنا بيهم نغني و نسولف ويه الاغاني
هيه لازكه بي لازمه ايده و تضحك بصوت عالي
شاهين يباوعني مامقتنع بتمثيلها
دكرته بعكس ايدي هش لاحد ينتبه
بليل هيه و كايده ايده صعدو لغرفتهم

شاهين كلي : ماتصعدين لو عجبتج الكعده اصعدلج القنفه اذا تردين

ضحك عليه رغد عابتله

مشت الايام ع هالمنوال

امي صارت تجهز بغراض الطفل من درت بيه حامل
مرات تحوكله كل ماتجمع كم قطعه تجيبهن الي
عمتي نترت بيها : ابنه احنه نجهزه مامحتاجين مساعدات من احد

- عمه هاي امي و اني بتها ياريت تحترمون هالشي عد

- بعد رادديني مدي لسانج اذا ابني صاير ملعوبه بيدج باجر عكبه تاخذين البيت و تشمريني بالشارع

امي ماجاوبتها نطتني الغراض من الباب وطلعت

نقهرت ماكدر استقبل احد من اهلي ببيتي حته امي

بس طنشت حبيت اضل فرحانه بابني و زوجي و حياتي

مشاكلها و تعبها اتحملها علمودهم

شاهين طاير بيه وتعدل ويايه شريد اكثر بعد خليها تكرهني شكد متريد

اكثر من مرضه تتمرض يصعد ضغطها اروح لغرفتها اوديلها الدوه عالكومدي اليم فراشها هيه و نايمه اعوفلهيا بلا ماتحس اكول مهما يكون تبقى مره بكد امي
المشاكل شي والمرض شي

شاهين كل مره يكلي انتي هديه الله دزها الي من السما
ادري بيج تدارين امي واختي
شلتي مشاكل مرت مهدي
تحملتيني بكل حالاتي
الله عوضني بيج احبج يا احلى شي صار بحياتي

كلماته جانت مثل حبات الثلج تنزل ع صدري التعبان
صرت احبه بكل حالاته حته بعصبيته
اخذ قوتي منه
صرت ادعي وره كل صلاه الله يحميه و يحفظه اليه ومايفرقنا ابد

بس بقه كلبي مامرتاح اخاف من كل يوم يمر
مرات اكول من فرحتي اخاف اخسر هالفرحه
لازم اتفائل بالخير واتوقع الزين كبل الشين
كل متوقع اتي

شاهين جتي فتره يصفن ماياكل و عصبي ع اهله
ينام من وكت اسئله يكلي لود شغل تعبان كلش
مره دخلت وياه للحمام كلت اريحه شويه
ماحسيته مجاوب ويايه غسلتله تحاضنت وياه جوه المي
تجاوب ويايه شويه و عافني كال : اريد انام ميخالف حبيبي
بدل هدومه وطلع
نزعت باقي هدومي غسلت اني و مقهوره مافاهمه شبي

كرايبهم جوي من البصره ضلو اسبوع يمنا عدهم معامله يكملوها ببغداد ويه ابو شاهين

رادو يفترون ببغداد يوم مهدي يفرهم يوم شاهين
صار يطلع يتأخر وياهم لليل يرجع متأخر
دورت بموبايله خفت يكون رجع لطليقته مالكيت شي
سئلت كرايبهم كالو اي هو شاهين يرجعنا بليل منو ديفرنا يوميه بعد

عرفت ماعنده شي من ورايه بس شبييي

رادو يطلعون سفره اتفقو فجاه بليل
مهدي راح يجيب اكل مسلفن من بره
رحت للمطبخ شفت شاهين يغسل بسيارته بالطرمه ديحضرها لثاني يوم
باوعتله يغسل ويجلف بعصبيه
شال لاستيكه من لاستيكات السياره ركعها بالكاع بعصبيه
اني وصافنه عليه جفلت ع صوت رغد ورايه

- ها ولج ليكون تغارين ع زوجج من السياره بعد

- م م مو هيج رغد بس صار مده مدا افهمه

- شبي

- متغير مو مثل كبل

- يمعوده شايفه شغل العقارات شكد يتعب الاعصاب
ابويه نفس الشي تجي فترات يتعصب مايطيق روحه يمكن عدهم بيعه صعبه او خسرانين فلوس

- جان حجالي ماعرف مامرتاحه

-  هسه اسئله وتتاكدين

طلعت يمه اني ضليت اباوع من المطبخ وره البرده حجت وياه هو ساكت بعدين جاوبها شلون مجان رجعت للمطبخ

- شفتي ؟ شغل ضايج من جماعه المكتب مو اكثر

هزيت راسي بس مامقتنعه

ثاني يوم رحنا السفره افترينا بالسياره نص بغداد
اهل عمي ابو شاهين عدهم بستان جبير يخبل
اول مره اشوفه اول مانزلت من السياره ردتلي روحي
الهوا المنعش الشمس و دفوها
ريحه البستان هو و مبلل جانو توهم راشي بالمي
ضلينا نسفط بالغراض نرتب الكعده سوينا سفره طويله تجنن
اسولف واضحك ويه رغد و البنيه كرايبهم
انتبهت شاهين كاعد يم الزلم بالكاع ليغاد يباوعني صافن
بس شافني دار وجهه سوه نفسه منسجم بالحجي وياهم يهز راسه

تغدينا و خدرنا الجاي الرياجيل لعبو طاولي
صارت العصريه منظر الغروب يجنن
جنت كاعده يم شاهين لزمت ايده بلا ماينتبهون
جان لابس دشداشه بيضه و غتره مال اهل الجنوب
لزمت ايده بالجانب باوعني صفح كتله : ياريت نعيش بهيج مكان
بعيد عن الهوسه والدوخه والشغل
ومحد ياخذ تفكيرك غيري

ضل يباوعني نضرته مال مهموم
اشرتله ع بيت صغير كلش هوغرفه خوص بنهايه البستان يكعد بيها الفلاحين بس عبالك بيت

كتله : نعيش هنا تسويليا جنه مو

ابتسم بطرف شفته : طبعا

- وابنه ويانه

- قصدج بتنا

- كلشي منك حلو

- جملتي هاي لتقلديني

- ههههههه

- هههه

ضليت اسولف وياه اضحك وياه حاولت ادخل عقله اعرف شبي ماكدرت
كلت مو مشكله يجي يوم يحجيلي و كلشي ينحل

عبالي كلشي يتصلح و ينحل بهالحياه بس طلع لا مو كلشي

اكو امور اذا نكسرت تهدم جبال ع روسنا

فد يوم رجع شاهين كالعاده ضايج
كعدت اتغده وياه سئلته حاولت افهم منه هم ماحجالي

صار يوميه يرجع ع هالحاله
اوكله افركله اضحك وياه انومه انام وياه
مافاد يصفن صفنات بعيده طويله ماكدرت احزر سببها

سئلت رغد تكول : شلون شسوي
خاف وداد مسويه شي جديد ؟

- جان كالي شاهين ليش يضم عليه

اسبوع شاهين ع هالوضع نزلت وراه الصبح اريكه

كال ماجوعان بعدين

اخذ سويج سيارته وطلع بقيت صافنه ياربي شديصير

من يومها بات بره البيت يومين

بهاليومين دكت ام وداد ع عمتي تسولف وياها

سمعت صوتها لعمتي صار عالي نزلت عليها للهول كامت تصيح : شهالحجي ام وداد ابني مثل الورد مابي شي ....
وداد كلتلج هيج ؟ اكو غلط اكيد ابني مامسوي تحليل
خلي تسوي هيه بالاول نشوف ...
لا حشه ماقصد بيها الشين بس كلشي وارد نتاكد مهدي مارافض فكره الجهال بس يريد وقت

سدت وياها الموبايل بعصبيه سئلتها شصاير تجنبتني
صاحت ع رغد تكلها سمعتي امها العكربه شتكلي ؟ عود ابني مايخلف لهذا ديأجل موضوع الخلفه ويريد يطلك

رغد : جنتج هاي ماتجوز الا يذبحها يعني ؟ من حطت رجلها بهالبيت وهيه تسوي مشاكل كافي كم مره نكفه عنها يعني

عمتي : ليش شمسويه بعد

رغد : ها لا هيج قصدي مشاكلهم العاديه يعني

عمتي : هسه شلون شكول لمهدي هاي موصله فكره لاهلها انو مايخلف

رغد : شتسوين بعد كافي نركعلها
تحل مشاكلها بنفسها بعد خاف ناكصين احنه نحير بروحنا وبغيرنا كطيعه لعبت نفسي

مهدي من رجع عمتي حجت وياه بهدوء كلتله كلام ام وداد
هو ضل ساكت مايحجي

صاحوها جتي كعدت تناقشهم اني ضليت فوك حسيت وجودي بنصهم ماله داعي رغد بعدين حجتلي شصار

مهدي بقه واكف كدامهم مرجع ايده ليوره يباوعلها باشمئزاز ماحجه شي

ربع ساعه و اندكت الباب راح فتحلهم دخلت امها واختها الدمعه بعينهم
هيه بس شافتهم ركضت حضنتهم تبجي وتحجي هيه وحاضنه امها

مهدي كال لاختها : صعدي وياها ساعديها تلم غراضها من اليوم ماتصيرلي مره ماريد اشوف خلقتها بعد

امها حاولت توكفه وخر ايده منها كالها : ايددج بنتج متحرمه عليه ليوم الدين اخذوها وطلعو يله

هنا البيت انكلب صراخ وبجي مديت راسي من فوك شفت وداد
ركضت وراه : اسفه مهدي والله اسفه حجايه وطلعت مني مو قصدي اطلع عليك حجي ردتك تهتم بالموضوع و نسوي جهال ماقصد اشوه صورتك والله ماقاصده لتعوفني اني احبك والله

- سمعتي شكلت ماريد اشوفج بعد انتي طالك

جر ايده منها دفعها من جتفها وطلع

كعدت بالكاع تضرب ع وجهه وتبجي امها واختها ركضو عليها يهدوها

عمتي تبجي بمكانها رغد واكفه يمهم جوه تباوع ع وداد و الدمعه بعينها

عيني ضلت ع مهدي لما طلع وسد الباب
القهر كله بوجهه ملامحه كبرت من وكت عبالك
بالوقت الي كلها متأثره بلطم وداد و تبجي ع حالها
اني عيني دمعت ع حالته هو
وحدي اعرف شبي و من شنو ديعاني

الي صار خلاني احلم بكوابيس هوايه
شاهين مارجع للبيت كم يوم روحي لايبه عليه
ماعرف انقهر ع مهدي لو ع شاهين
الوب بالبيت افتر بدت اعراض الحمل تزيد بشهر السابع
تقلصات ببطني تموتني خاصه بنومه الليل
صارت كومتي وكعدتي صعبه
جسمي ثكيل بالوزن و الهموم
امشي و اندعي الله يريح كلبي يارب تكون هرمونات حمل مو غير شي
ماكو شي ماكو شي
صرت اقنع نفسي حياتي طبيعيه و عاديه
غمضت عيني اتخيل نفسي ببيت و و حديقه جبيره ابني بحضني
و شاهين داخل علينه وره الشغل يركض يشيل ابنه بحضنه
ويبوس راسي بحنيه
عالميز ناكل و نضحك ويه ابنه
تندك الباب يجونا اهلي و اهله نلتم بفرحه الكل تسولف وتضحك
مهدي ويه مرته و جهاله
رغد ويه زوجها و جهالها
عمتي و امي يشربن جاي و يضحكن ويه احفادهن
اشوف الفرحه بعين الكل و الحياه ماشيه طبيعيه

فتحت عيني بلحضه وحسيت كل هذا بعيد
شبه مستحيل

اني واتخيل و اتأمل ماحسيت الا غفيت ع روحي
اغلب اوقات حملي كضيتها نوم فجاه انعس و اغفى ع روحي

كعدت ع صوت ركعه الباب فزيت  شاهين دخل سريع

- بسرعه كومي

- شوكت رجعت وين جنت

- مو وكت حجي لبسي دنطلع

- وين نروح

- بسرعه لتناقشين

- مو كبل ماتفهمني

وخر البطانيه من فوكايه كومني حيل

- ايدييي شاهين دتأذيني شبيك لتخرعني

- بسرعه كلللت

- شاهين شنو هاي

جاب العبايه لبسنياها شلون مجان اني واتعارك وياه

جرني من ايدي يمشي سريع لزمت الباب عاندت

- هدي

- ماروح كبل متكلي وين وشبيك متغير ماروح

- عوفي الباب عوفي رح اكسرها وخري اصابيعج

- مارييد كافي دتخوفني شجاك

جرني حيل نزلنا نركض اصيح رغد رغد محد بالبيت مدري وين جانو او يمكن موجودين وتقصدو مايتدخلون

صعدني للسياره وطلعنا

احجي وياه طول الطريق وجهه احمر و يدخن ميجاوبني

ترجيت و توسلت مايسمعني خفت يرجع شاهين القديم تغير بلمح البصر

وصلنا لبيت صغير بس المنطقه ماعرفها

اعرف اسامي مناطق بغداد بس ماشايفتها كلها ماعرفت وين احنه

اسئله مايرد نزلني بعصبيه من السياره يحاول يخفف ضغطه عليه علمود الحمل بس فهمت مرح يعوفني لما نوصل للمكان الي يريده

دخلت وياه للبيت قفل الباب وطب اشرلي فوتي

رحت عليه بعصبيه : اكدر اعرف شبيك خسه لو حتضربني و المن هذا البيت ليش جايبني هنا

يدخن ميجاوب

- لتعوفني بناري شاهين حرام عليك اني حامل نفسيتي تعبانه لتعبني اكثر

ضليت احجي احجي ماحسيت الا شال شي ركعه صار ميت وصله خنزر عليه

رجعت ليوره حجيت بخوف : شاهيين !!

قطع كلامي بعيطه رجفتني رجف : ابوج رجع ! حابه تسمعين الباقي ؟

[ينبغي أن يكون هناك GIF أو فيديو هنا. قم بتحديث التطبيق الآن لتشاهد المحتوى.]

يتبع .....

اليوم كلت لصاحبه القصه اسمحيلي اتعاطف ويه شاهين بهالبارت كبل ما اعرف نهايته
من حجيها وصلني وجعه
والفيديو خليته تعبير للصراع الي بداخله

انتضروني باجر بالبارت الاخير 🌷