رواية عروس البيت الاسود الفصل الرابع عشر 14 - بقلم لارا سالم

...........................

كمنا نفتهم شكو امي صاحت وين حور اوكفي نفتهم منو

احنه ونحجي نركعت باب الشارع

دخلت طليقه شاهين : وينها ام السحوره وينها القاتله بت القتله
مدي راسج حاجينييي

امي حاولت توكفني وخرتها طلعت امشي سريع : خير وين مدربنه

- ليش بيوت امثالج الها حرمه واحترام ؟
اخذتي الرجال ماحجينا
قتلتو ابني كلولي حيرجع حقج وانخرست
بس ترجعين تلعبين بعقل شاهين و تبقين ع ذمته هنا اوكفلج و اكطع خبرج هم بس لو ماحاسبه حساب لوكفه امج

- لا بالله ؟ زين خلينا نعتبر امي ماواكفه و شوفيني شرح تسوين

- بعد بعد الج عين تحجين
صدق من كال عينه اوقح من عين الجلب
ع شنو مبقيج شاهين

- اعتقد انتي اخر من يتكلم ع الوقاحه و الجساره
فتي اخذتي رجلي من بيتي كدام عيني
يبات يمج شهور مانكسرت عينج وكلتي رجال مزوج
عالاقل اني انخطبتله بعد طلاكه
بس انتي الحيه الي تبخ سمها وتسوي نفسها فقيره
وكعتي شاهين بسمج سممتي افكاره

- اي اي اخذتي وره طلاكنا وقتلتي ابنه علمود تستفردين بي

- هههههه

- تضحكين !

-  لان شي يضحك والله تكذبون الكذبه و تصدكوها
اكتله ببيتي و بمطبخي شفتيني بهالغباء كدامج؟
بس من لوبه روحكم ردتو كبش فداء و طلعت بيه

- زين تعرفين مكانتج عد شاهين

حكيت خدي : هالشي جان زمان
الوضع تغير هسه
اني هسه مرته و حبيبته اذا عندج اعتراض اكو يمي حايطين
و ورايه باب المطبخ اركعي خلقتج بالاتجاه اليعجبج

- عبالج اعوفه الج ؟ دتسمعين حجي بنتج حجيه شاهدين ع صلافتها

- هههه والله مادري منو الصلف بهاللحظه اني مرته لو طليقته الي هاده عليه

- اني مرته واضل مرته ازوجته من جنتي تلبسين صدريه و تكودين امج بالسوك

- هسه شتردين

- اريد تنتهي هالمهزله

- هو دزج ؟

- بدون مايدزني اعرف انو ....

- معناها كلامج وياه مو ويايه
اذا تحبين دزي عليه يقرر كدامج بلكي يستوعب دماغج المجيم ونفضها

امي ورايه : حور ع كيفج

- لا كيفي ولا مو كيفي اليوكف ببيتي يحترمني و يحترم المكان الواكف بيه
اساسا مشكلتها مو ويايه لو حابها مجان ضل مجلب بيه كل هالسنين
بس الخانم مصدكه دينتقم مني و عجبها تبقى مصدكه

بهالاثناء دخل شاهين يمكن مهدي كاله من سمعو صوت صياحنا

- ها شنو شنو خير شجابج هنا

طليقته : اسمع هالغبره شتحجي تكول ....

لزم زند ايدها عصره :  صوتج لا اكلب خلقتج

- ايدي وخر عني اضاهر مثلها انت كتال ابنك

جرها من شعرها :  تكبرين بالحجي ادوسج بالقندره بت النعال هسه تذكرتي ابنج

يجر بشعرها ويحجي ركض مهدي من الشارع دخل جر شاهين بالكوه فاكك بيناتهم

ضلت تصيح وتبجي انهارت
مهدي يكف شاهين و عاط بيها : طلعي منا خلصينا

طلعو بقه شاهين يفرك وجهه كال : شتنتضرين

كتله : جايه وراك

طلع اني باوعت امي واخواني ورايه

زهراء هزت ايدها : هيه هاي الحياه الاختاريتيها

طبيت اخذت غراضي و طلعت بست راس امي هيه تحضني تبجي و تبوسني

عفتها ورجعت لبيتي صعدت شاهين بالغرفه يدخن المكان صاير مدخنه

عرفته غادي نار رحت عليه كعدت يمه احاجي ميجاوب يدخن
عروك وجهه تريد تنط من العصبيه

بعدني ماحاجيه : تالي وكت العالم تعيرني بدم ابني
يشوفوني بعينهم ماعرف اخذ حقي
تعيرني بت الكلببببب

حجاها و ضرب الطبله الجام الكدامه

جفلت من حركته رجعت ليوره بكعدتي مغمضه عيني

باوعته ضل كاعد يمي متجي عكوس ايده ع رجله ويفرك وجهه

مديت ايدي ع جتافه افركله احاول اهدي

ربع ساعه يله هدء اني وجهي ع جتافه اليمنى

لاف راسه جانب كال : ليش مرجعتي من وكت

- جنت مشتاقه لاهلي

- مشتاقتلهم لو استلموج اطلكي و اطلكي

- سمعت كلشي منهم

- وانتي شنو رايج

حسيت بعينه بيها خوف من جوابي

- مايهمني شيكولون مكاني يمك

اختفت عصبيته بلمح البصر لاف ايده حضني صار راسي ع صدره
اني هم حضنته وغمضت

جانت لحضاتنا حلوه بس مليانه خوف
خوف من الجاي خوف من الاهل و الكلام و الاعراف
خوفنا نخسر بعض

بنفس اليوم مهدي تعارك ويه مرته بليل
تريد تسافر ويه صديقتها لتركيا
مهدي ماوافق يكلها احنه ولد عشاير تنزلين راسي انتي علمود دياحتج
هيه ماسمعته نزلت نامت بالهول

شاهين الصبح نزل تفاجا بيها نايمه بالهول

رغد عالريوك كلتلي جاوبتها : نعم !

رغد : لج مو طبيعيه حتخبلني عبالك اجنبيه مو عراقيه ماتعرف شي عن عاداتنا مزوجه واحد من البصره ماتفتهم اكو اصول و عيب و حرام

- شبيها هاي وين كاعدين نست عدها حمه بالبيت

رغد : صايرين نغار ها

- اكيد اغار مو زوجي

رغد : اني مافاهمه انتو رجعتو هسه
البارحه ماصدكت الي سواه بيها عبالي ضوجته بشي طلع علمودج

- مو بس علمودي ضلت تحجي انو تقشمر بيه ونسى حق ابنه

رغد : خبله هاي علساس ماتعرف شاهين اذا حط شي براسه مايعوفه

باوعتلها بعتب

رغد : اسفه ماقصد والله

- عادي مو مشكله كومي يله اصبغلج شعرج وصيت شاهين جابلي من العصاره الكتلج عليها رح تعجبج

رغد : اي فدوه لعينج مدالحك عالبيت لو ع نفسي صايره مالحك احك راسي نسيت شكل الصالون

- هههه ميحتاج اني اسويلج كومي

صبغنالها شعرها طارت من الفرح
جتي وداد شافتنا نصبغ كالت كل عقلجن تصبغن هيج
لازم اولبلكس ويه الصبغ يحمي الشعر

- منين نجيبه هسه مو زين شاهين جابلي درجه الصبغ الاريدها

وداد : اني اجيبها عندي امبوله منها ثواني
عافت الموبايل عالكومدي ليغاد مني وصعدت

اني امشط بشعر رغد اقسمه حته ابدي اصبغ

رحت اجيب الجفوف من فوك الكومدي لمحت اجه اشعار لموبايل وداد مكتوب

- اوف لو يمي هسه ماشبعت منه المره الفاتت

جسمي صار مايتحرك دمي مايمشي نصعقت من المسج والاسم نبيل

رجعت ليوره بلا ما اندار اريد الوف ماكدر

رغد : ع كيفج حتوكعين عليه شجاج

- اسفه اسفه مادري

رغد : شجاج سطرج العباس

- م مادري ا ا اذكرت معلومه عالصبغ لازم لازم الشعر مامغسول
علمود ما يأذي فرو فروه الراس

رغد : شلون اعفن ؟ يوميه اغسل اني

-  خلص نصبغه شلون ميطلع يطلع

بديت اصبغ نزلت وداد : يمعوده اوكفي جبت الماده

بدت تحطها تخبطها كعدت ع صفحه اباوع عليها مامستوعبه

هاي تخون مهدي ! هالولد ليش ماعنده حظ بالدنيا ياربي ليش هيج يصير وياه

مستحيل اكيد الشفته غلط او مشتبهه مو موبايلها خاف

بس هو الايفون 8 و هاللون مالتها حته الكفر هو

صرت احجي واكذب بروحي اريد ادور اعذار مبررات

بليل رجع مهدي جايب عشه وياه كال ننتظر شاهين دقيقتين ويوصل

صرنا نحط الاكل بالمواعين مهدي يسولف ويه وداده و رغد

بقيت اباوعله حصرت دمعتي بعيني كوه

مهدي انتبه عليه  : بيج شي حور ؟

وداد باوعتلي هم اني وصافنه جاوبته : سلامتك لمحت شي يمشي ع الحايط توهمت

اجه شاهين تعشينا كمت سويت الجاي رغد طلعت الكيك تقطع و تحط بالمواعين

وداد يمنا واكفه منتجيه عالكاونتر تكلب بموبايلها و تتبسم

سويت نفسي ماشفت

ريتني ماشفت ولا عرفت
اضاهر مكتوب عليه اضل شايله ذنب مهدي

وره يومين جوي كرايبهم من البصره عبالهم عمتي موجوده

شاهين ومهدي استقبلوهم كلولهم بالعمره الحجيه و من هالكلام

اني دا ادخل للهول اسلم لمحت وحده منهم كاعده يم شاهين تتبسم
تباوع ع حلكه تنتظر الكلمه منه
تنرفزت خنزرت عليه لما لمحني سويت نفسي مامهتمه صعدت فوك

وره نص ساعه اجاني مسج منه

- ليش ماسلمتي

ردت استفزه : مثل ماجنت تتجاهلني من تكعد ويه ضيوفك

- ها بعدج ادورين ثارات ؟
حروح للمطبخ ثواني الكيج كدامي و ماقبل غير ببوسه

- ههههه بوستيش و العالم جوه

- مشكلتج هاي رح اطلع

ذبيت الموبايل ونزلت جوه يم الدرج لمحته بالمطبخ يشرب مي

ردت اروح عليه اشرلي براسه فوتي سلمي

دخلت للهول سلمت عليهم بوست البنات حسيت نضراتهم تباوعني من فوك ليجوه

اني ضليت كاعده رجل ع رجل كتلهم بعد اذنكم اكوم اشوف شاهين وين صار

رحت للمطبخ شفته يسولف ويه رغد ع الغده يكلها اجيب بعد لو كافي

كلتله لالا كافي 3 كيلوات كباب وين اودي الباقي

رحت يمهم اعاونهم

تغدينا صبينا جايات بعدين جبنا فاكهه و العصر الحلويات شاهين ومهدي تكفلو بكل الاكل جابو من بره

بقو الخطار للعصر و راحو

بليل شاهين ضل يسولفلي عنهم عن طفولته وياهم

اني يمه اكشر تفاح و انطي

يحجي يحجي اخير شي انتبه عليه باوعني من فوك ليجوه

اني بالاتك كتله : شنو

- اكل تفاح و يمي تفاح شون

- هههه

جرني من ايدي مددني ع فخذه كلي : اني اريد تفاحتي

- اني تفاحه

- تفاحه و فراوله و عرموط علوه المخضر كلها انتي

ابتسمتله هو و يدنج يبوس شفتي لزمت خده اني هم اتباوس وياه

ليلتها نمنا متأخر كلش كعدنا الصبح ع صوت موبايل شاهين

ماكدرت افتح عيني من النعس بس اسمع صوت يلبس هدومه طلع وسد الباب

الصبح كعدت ع صوت وداد تحجي بصوت عالي يم رغد بالممر يم غرفتي

بنفس اللحظه اندكت الباب : كاعده حور

باوعت ع نفسي : عزه لحضه لحضه

كمت سريع لبست هدومي و الروب فتحت الباب

كبل ما اسمعهن رجعت للفراش اني وافرك عيني

رغد : احجي وياها اني خلص صبري

- خير يا طير من الصبح

وداد : هاي عايشه بغير دنيا كلشي و كلتلي جذب جذب مامستعده تصدك شي ع اخوانها

- ليش شكو

وداد : اكلها مهدي عنده وحده تكلي ماكو هيج شي
كعدي بغرفتي راقبي تصرفاته تتاكدين من كلامي

رغد : شيسوي غير يرجع تعبان لو تردي ببغاء يضل يحجي

وداد : بس يعرف يلزم موبايله يكتب مسجات للعينتين

رغد : كبل سوتها عينتين ليش مو صديقه مثلا شفتي شي بعينج

وداد : ي شفت محد يسمي صديقه ( ح )

اني و افرك وجهي فتحت عيني

رغد : بابا واذا كاتب حاء ضروري بنيه يجوز صديقه

وداد : خرب بعدها تكلي صديقه

بقن يتجادلن كدامي اني كاعده عالفراش افكر

كتلهم نزلو انتضروني جوه ارتب الغرفه وانزل نتريك

طلعو من الغرفه ركضت ع موبايلي لكيت داز مسجات هوايه الي بليلتها

نصها حجي عني اني وشاهين سامعنا احنه ونايمين سوه بليل

غرفنا فوك بنفس الممر غرفه كبال غرفه

نهاريت دزيتله مسجات توسلت يسد السيره و ينساني

مرتك دتشك لاكفه حرفي بموبايلك شدسوي انت اترجاك كافي كافي

ما انتضرت يرد قفلت الموبايل

طلعت السيم كارت كسرته بعدين كلت اني شسويت شحكول لشاهين

من رجع وعرف كتله طلعت البطاريه اضيف الرام جوه ووكع السيم كارت
ومالكيته بعد

حسيته ماقتنع بس يعرفني ماسوي شي غلط  ف مادقق ويايه

وره يومين وداد سمعتها تكول لرغد رقم ح اختفى من موبايل مهدي
و دورت اسمها بموبايله مابيها حروف ولا ارقام بنات شعجب اختفت بهالسرعه

رغد كلتلها حته تعرفين اخويه مايخون واذا صارت ف نزوه وعبرت كبري عقلج

فد يوم دتروح لاهلها كلتلي امشو ويايه تغيرون جو

رغد كالت ماكدر روحو انتو اني هم كتلها ماكدر شاهين مو بالبيت ماكدر اكوله

كالت خابري كليله فد معضله كتلها موبايلي نكسر و بعده ماجابلي واحد جديد

كالت اشوفكم بليل لعد راحت شو من رجعت بليل لثاني يوم تخزر بيه تصفن بوجهي من احجي مافهمت تعابيرها

للصبح جتي يمي انتجت عالكاونتر كالت : مكتيلنا شكسر موبايلج

بلعت ريكي : وكع بالمي تلف ليش تسئلين

- اعرفج تعتنين بغراضج

- الواحد ينثول مرات مو شرط

- اي مو شرط

حسيتها مو طبيعيه تحاول تلمح ماصدكت فلتت من يمها

عزه هاي وين تريد توصل وداد ذكيه معقول حست ؟ زين شلون مهدي شمجفص خلاها تشك بيه

مشت الايام ماضل شي ع رجعه عمتي من العمره

بدينا نحضر و نرتب البيت اكيد حيبدون يجون ناس يباركون و يتحمدولها بالسلامه

اني واشتغل كلبت معدتي ركضت ذبيت من راسي بالحمام
وتكرر هالشي بليل من دنقلي عالطباخ حسيته شي خنك ركبتي خنك
هم ذبيت من راسي

رغد كلتلي حللي باسرع وقت اني اعرف بهالسوالف

كتلها شلون تعرفين سكتت مجاوبتني

المهم حللت توقعت نفس المره الفاتت حمل كاذب

بس صار العكس و طلعت حامل !!

شاهين من عرف الا شويه يبجي من فرحته

كوه لازم نفسه اخذته الصفنه يباوع ع بطني

رغد باركتلي و راحت حضنت شاهين تبجي : الله عوضك خويه كرت عينك حبيبي الله عوضك

مهدي باوعني بنضره كلها عتب كصتني كص

بس فرحتي بالحمل اكبر من اي شي بهاللحضه

اول مره احس بنفسي يصير عندي طفل من شاهين

وداد تتبسم ابتسامات بسيطه باركتلي شلون مجان : مبروك

- يبارك بعمرج يوم لالكم

مجاوبتني ستغربت تصرفها عبالي بعدها شاكه بيه

شاهين ثاني يوم العصر اخذني وياه كالي اريد اشوفج شي
طلع ديشتريلي قطعه ذهب علمود سالفه حملي
اختاريت محبس و عجبني حجل ناعم هم اخذليا
احنه و بالسياره برجعتنا سئلته

- انت فرحان بالطفل لو بيه ؟

- فرحان لان الله ديعوضني و الاهم هالطفل منج

- احبك

رفع ايدي باسها ع كيفه

بقينا نفتر بالسياره و جبنا عشه ويانه

بليل سمعنا وداد تتعارك ويه مهدي

تصيح : ليش ليششش مو من حقي اصير ام

مهدي : مو وكتها كتلج مو وكتها سدي حلكج عد

وداد : مو بكيفك اخذتني وعدتني الف وعد شنفذت منهن ليهسه
حياتي وياك بس فراش فراش لا تحس لا تفهمني شبيك منو فاره عقلك ليش اخذتني اذا ماتريدني جنت معززه مكرمه عد اهلي الف من يتمناني ليش كسرت ركبتي

بقو يتعاركون بغرفتهم لحد مطلعت تمشي سريع بيدها جنطتها

خليت شاهين يلحكها يوصلها ساعه 11 بليل طالعه وحدها ميصير

مهدي يعرف شاهين حيوديها ف ماطلع من غرفته

الصبح  كعدو وياه شاهين ورغد يقنعو يصالحها وانو امهم ع جيه ليكسر فرحتها بالعمره و ميصير

طبعا ابوهم موجود بس يرجع بليل متاخر و يطلع الصبح من وكت
وجوده وعدمه واحد بالبيت ف شاهين و رغد تكفلو بالموضوع

ضلو يقنعون مهدي يقنعو اني بالمطبخ اسوي الريوك اسمعهم يتجادلون وياه لما اقتنع

لزم موبايله دك عليها ماجاوبت رجع دك مرتين وتلاثه ماردت

رغد كلتله اني اخابر ع اهلها اصبر دكت ع امها فتحت السبيكر ردت امها

رغد : صباح الخير خاله

ام وداد : صباح النور ياهلا برغد وين مختفيه مكطوعه اخباركم

رغد : والله ياخاله من راحت امي اني ماشايفه الشارع اركض منا ومنا
انتي شلونج عمو شلونه يارب بخير

ام وداد : ينطيج عمر و عافيه بنيتي

رغد : وداد يمج خاله نطينياها الله يخليج

ام وداد : وداد !!!!! مو عدكم هيه ؟

رغد بلعت لسانها تباوع ع مهدي متعرف شترد : م مادري مو يمكم اليوم هيه ؟

ام وداد : صار 5 ايام ماشايفتها من شوكت طلعت ؟

اني بالمطبخ واكفه اباوع عليهم بالهول ضربت ع صدري

مهدي وجهه و تعابيره صارت ماتنشاف من العصبيه

بعدها رغد ماساده الموبايل طفر مهدي صار يصعد سريع ليفوك

شاهين لحكه يركض وراه صارو فوك يتعاركون عياطهم هرج البيت

رغد ركضت يمي تضرب ع وجهه
تكلي دبريني امها ماتعرف شي عنها وين راحت تعزينا و تصخمنا

الرعب اكلني صرت ارجف وصوت عياطهم فوك ماسكت

نزل مهدي ركض يلبس بقميصه شلون مجان

شاهين نزل يركض وراه يرزله يصيح مهدي مايسمع

رغد وكفت تريد تهدي دفعها حيل وكعت بالكاع

.....

يتبع ...