رواية عروس البيت الاسود الفصل الثالث عشر 13 - بقلم لارا سالم

وهذا بارت ثاني تعويض ع تاخيري اليومين الفاتو
عيوني راحت من الكتابه😢🤧 بس فدوه الكم
لتنسون تصويتكم و تعليقاتكم تهمني
بس بدون تجاوز ❤️
.................

تقرب مني يباوعني عيونه تحجي بلا مينطق شي
مد ايده فتح القراصه من شعري يباوعني بتمعن ع وجهي و ركبتي و صدري
غمضت خفت كلش منه و من هاللحظه
جر نفس طويل و ديتقرب ع ركبتي

- اريددج

ديكمل لزمت بعدته عني : مو ثوبك هذا ولا ثوبي

- اخويه سواها وحبيتيه

- انت كلتها اخوك ! وانت بغرفته هسه
الي تفكر بي مستحيل يصير حته لو كتله ع طلعتي
تاذيت بحياتي هوايه مامستعده اشيل هم جديد

كلامي ضوجه مسح وجهه سكت وكال : قدري اضاهر هذا
تبقين كبالي اتحصر عليج لا كادر اتقرب ولا ابتعد
بس احلامج ويه شاهين حتتبخر يجي يوم اذكرج بيها

- ماعندي شعور ويه شاهين ولا حيكونلي شعور وياك بالمستقبل مايصير مايصير افتهم الدتسوي كارثه حرام علينا

- لتكليلي حرام لتكليلي مرت اخويه الوضعيه كلها مامفهومه لاحد
انتي نفسج ماتعرفين شاهين يريدج لو لا
ليش تردين تضمين حملج عنه ؟ وليش تلمع عينج من تشوفي ؟
ليش تصديني وليش صرتي بحضني كبل شويه
تبقين لو ترحيين
منو الي بحياتج اني لو اخويةةةةة
شتردين انتيييييييي ؟
كافي تضحكين ع نفسج و علينا حددي موقفج ويامن انتي
كافي مو جهال احنه

عافني و طلع رحت قفلت الباب
بجاني صياحه و كلامه اني صدك ماعرف شريد
ضيعت روحي بينهم كد ماتخبطت
ليش ديصير بحياتي هيج
كل البنات عايشه حياه طبيعيه اليسمعني هم مايصدكني
المن احجي منو يسمعني منو يفهمني و ينصحني

لزمت السجاده صليت ركعتين لوجه الله
قريت قرأن اندعيت الله يسامحني اذا صار ذنب بدون قصد
والله العظيم اني مو هيج مو هاي نيتي
كل الي تمنيته رجال و اربع حياطين تلمني
وين صرت هسه

كل يوم يمر عليه بهالبيت انحط بالف وضع وموقف صعب

عمتي يوميه تحجي كدامهم تلمح كدامي ع رجعه شاهين لطليقته ماعرف تحجي صدك لو تحاول تشككني بي

بده الوضع يضغط عليه تعبت اغلس تعبت من العيون النضرات والمشاكل

تعبت من حب مهدي تعبت اشوفه تعبان بسبب هالوضع

خفت يتقربلي مره ثانيه يشيلني ذنب اني مو كده طول حياتي

تعبت من كلبي اليوجعني كل ليله تعبت انتضر ابويه

تعبت من هالقصه المدا تخلص تعبت من كلشي

صار لازم احط حد

قررت اكعد ويه شاهين

رجع من شغله بدل هدومه كتله احضرلك الحمام كال ياريت

بين مايغسل جهزت الغده صعدته للغرفه اجه كعد كال ماتغديتي ؟

كتله بعدني اشرلي كعدي

كعدت وياه ياكل بعدين كال عندج حجي سولفي

خرطتله كل الي بداخلي و معاناتي ويه اهله
ذكرته بكل الي صار و سواه بيه
مابقيت كلمه اوصف بيها الحاسته
و الاهانات الشفتها من ازوجنا ليهسه
ترجيته ينهي هالمهزله
وعدته اذا ارجع لاهلي احاول اقنع ابويه يرجع و التردو يجرالكم
توسلت بيه و دموعي تنزل

ضل ساكت من سكتت كال : خلصتي ؟

باوعتله بقهره كال : ابوج رجع للعراق

فتحت حلكي من الصدمه : شنو شلون وين منو لكاه

- مو مهم المهم صار قريب

- شاهين ابويه بخير ؟ الله يخليك احجي الصدك

- مثل القرد العار ماعليه شي

- مرح تسوي شي مو

مجاوبني

- رد عليه الله يخليك لتعوفني تايهه

- طيب الاكل دايمه ان شاء الله

كام راح ديطلع من الغرفه كمت وراه امشي واحجي

- ماتكدر تحبسني عمر شاهين حقك من منو دتاخذه بالضبط
ماكدر اتحمل هالوضع اكثر حقك متعرف شديصير متعرف اني معاناتي هنا شنو

- ولا تعرفين الجوايه شنو

- لعد نطلك صدكني شاهين هالوضع ماينحمل جربنا و ماتعودنا

- برضاج تتعودين حفظي هالكلام زين

- حجينا حجينا كبل وماتفاهمنا مو رجعت لطليقتك؟ شتريد مني لعد
اهلك اكلو راسي لان مدا تبقى بالبيت

اندار عليه هو ويفتح الباب حجه بهدوء : اذا اغير الوضع ف يصير اسوء
تعودي احسن

- يعني شنو

- يعني كعدي بغرفتج
و اي حركه منج ابوج يدفع ثمنها

طلع سد الباب

جانت كرفه هدوم مغسوله ناشفه عالكرسي شلتها شمرتها عالميز تواليت وكعت كل الغراض منه

شلع كلبي استفزازه بحياتي مرح افهمه

بليل عمتي راحت لجوارينا تسلم عليهم كبل ميرحون للحج
اني و رغد واكفين نسوي عشه

وداد كاعده عالميز تدخن وتكلب بموبايلها تسمع لسوالفنا

رغد : انكسر الشر اخذي مني عطور اذا ردتي

- تسلمين عندي ثنين بعد

رغد : تحملي شاهين من يتعصب مايشوف كدامه بعد

- ماله علاقه شاهين اني الكسرت الغراض

رغد : ياا اني شفته عندج عبالي تعاركتو من سمعت صوت التكسر
هم موضوع الطلاك ؟

- اي نفسه ليش عدنا غير موضوع نحجي بي اخوج ناوي يجلطني يله يعوفني لو يموت ابويه و يحصرني عليه

وداد : هههههههههه ثوله هالبنيه تره

- ليش

وداد : تصرفاته مو مال واحد ديلوي ايد واحد ببنته
يكدر يفتحلج مجال طلعه وطبه يراقبج لما توصلين لابوج او تتخابرين وياه
هو اذا حابسج يخاف ترحين ماترجعين خايف يخسرج
يحبج يا اذكى خواتج

- شاهين ميعرف يحب

وداد : ماكو رجال ينسى او يتناسى ثار ابنه الا عنده سبب وسبب قوي هم
من جيت لهلبيت واني اسمع ناوي يرجع ياخذ طليقته ليش مارجعها لحد هسه ؟

- لان ماعايفها هو يوميه يمها

وداد : بس بالسر هيه وانتي بالعلن
لو يحبها من طلبت منه يطلكج ليش ماطلك ؟
شغلي عقلج اذا تحبي تكدرين تكسرين الحاجز البينكم
هو يضل يكابر و يمكن يبقى ع هالحال طول حياته
كرامته ماتسمحله هو اليتقربلج
الا اذا حسستي انتي خطيتي الخطوه و حسستي انتي حابته هنا مايكدر يفلت بعد

رغد : اني هم هذا رايي بس لحد يسمع امي
حلوها بيناتكم شاهين ساعتها يلكي صيغه حل ويه امي لا تحجين لا لامي ولا لاي احد ثاني

- احد مثل منو

رغد : ها ... مادري يعني قصدي بشكل عام

كلامهن ضل يرن بدماغي بس بداخلي اعرف صعب

صار من يجي البيت اصفن عليه اتخيل حياتي لو طبيعيه وياه
احط احتمالات واشيل احتمالات
ساعه اشوفه حبيبي ساعه اشوفه اذيتي

نتيجه تحليلي للدم طلعت سلبيه مو حامل
من بلغت امي حضنتني طارت من الفرح
الا اني بداخلي ليش مفرحانه
اكول لنفسي مو هذا الجنتي رايدته شبيج

التحاليل مهدي راح جابها فرح انو مو حامل بس فرحته بشماته عبالك

دخلت عمتي للبيت ارتبكنا مهدي لفها وبقت يمه

وداد وره يومين سوت عزيمه لاهلها ببيتنا

حطينا وسوينا حرنا بيهم لليل من ديرحون راحت وياهم مهدي ماعارضها
ثاني يوم من رجعت لمحتها بباب الحمام تحجي وياه شويه وجرته
باب الحمام جان مضلل من بعيد اكدر المح شديصير
جرته حضن وبوس فاتو جوه الحمام اسمع بس صوت بوساتها اله
من طلعو صعد نام
هيه لبست ونزلت يمنا مددت عالقنفه تدندن ويه نفسها مرتاحه مجان اكو احد بالبيت بس احنه البنات

بقيت اباوعلها تحصرت ع زواجي و ايامه الي ضاعت بالقهر و البجي

تذكرت تعنيفه الي حته فراشنا جان غصب
ليش ماحاولت احس بي رجال و محتاج
زين واني ؟ اني هم محتاجته ليش انكر
المزوجه بس تحس بشعوري سن ونص زواج ماجربت شعور الراحه ويه زوجي جانت كلها بالضرب و الكتل
المفروض اقدر اله حقوق و ما انكر حقي وياه هم
مو بس المشاكل تعبتني
البرود الي بيني وبين شاهين تعبني

وداد كلما تطلع ترجع شايله و محمله مرتين انطتني قمصان نوم
اضمها بالكنتور

رحت طلعتها لبستها اتفرج ع نفسي بالمرايه
فردت شعري تعطرت
بحياتي ماشفت نفسي حلوه هلكد
ايام الدراسه ملابسي خنكه و مقفل
بعد الزواج عيالي قفلو عليه اكثر نسيت نفسي هوايه

كمت اطلع من الكنتور البس واوكف كدام المرايه
شعري ساعه اسوي جانب ساعه كيرلي ساعه سرح
ارفعه شويه انزل خصل منا و منا

مددت عالفراش اطكطك صور لنفسي بالموبايل
نسيت نفسي و حياتي من المشاكل الله يسامح الدنيا خلتني ادفن نفسي دفن

صرت انزل يم عيالي بتراكات حلوه دشاديش كصيره
الكل لاحضو عليه التغيير

شاهين كضاها نظرات من انتبهله يوخر عينه

مهدي نظراته زادت صارت تضوجني كلش
مرته من تشوفه ساكت تكعد يمه تحط راسها ع جتفه
تشوفنا ماكو تتقرب تبوسه حسيتها حاره تريده صبح وليل
تتعارك وياه لان مامتفاعل وياها
تطلع مايقبل يطلع وياها يصعد لغرفته او يروح للورشه

فد يوم دا انضف البنكه و الثريات صاعده ليفوك
انداريت ادنج اخذ وصله ثانيه لكيته واكف يباوع ايده بجيوبه

جفلت حطيت ايدي ع كلبي : جفلتني

مجاوبني

دا انزل عالكاع مدلي ايده لزمتها نزلت دا اروح بقه لازم ايدي جرني منها

كال : متغيره بس جنتي وتضلين حلوه مشتاقلج كد عمري كله حور

- لتوكفني هالوكفه رح ينتبهون علينا الله يخليك كافي

- لكيت شقه رح ااجر ماكاعد اكدر ابقى هنا وانتي كبالي
كلما اصير وياها اتخيلج انتي بس ماجبرج ع شي لما يجي يوم تكليلي اريدك

اخذت الغراض عالميز طلعت بسرعه من الهول

طبيت اغسل بالحمام اختنكت من الي كاعده اسمعه منه
احس روحي قذره مامسويه شي بس وضعي بهالبيت صار ماينطاق
مهدي يوم بعد يوم يحاول يتقرب مني اكثر

لازم احط حد كبل مايصير شي اكبر يخليني اندم عمر
البشر خطاء و ضعيف ساعدني يارب

عمتي وره كم شهر راحت عمره

دنيا شتا و الجو ثلج شاهين طالع مدري وين

سمعت صوت جوه مهدي يحجي بصوت عالي يصيح رغد تساعده

مديت راسي عالدرج شفته متجي شاهين ع جتفه يحاول يصعده الدرج

صعدو ليفوك صحت : شبي ليش هيج حالته

مهدي : ساعديني بالاول

حاولت اسنده وياه كوه وصلناه غرفته

هدومه مبلله تبلل بديت افتحله الدكم انزعه قميصه اني واحجي ويه مهدي : شبي فهمني

مهدي : سهران ويه جماعته يشربون و مطرت عليهم
فقد ماكدر يسوق خابروني جماعته رحت جبته

شاهين بعالم ثاني بين النايم و بين الي يهلوس ويه روحه

ركضت جبتله منشفه نزعته انشفه

مهدي نزل يسوي شي يشربهيا حته يصحصح

اني ضليت يمه لبسته بجامه جديده

لنص الليل حرارته صعدت صخن كلش

ركضت جوه جبت كاسه جبيره مي بارد و خاولي

صعدت يمه كعدت انكع و احط الخاولي ع كل وجهه

حرارته فول خفت عليه

كمت جبت خاولي ثاني انكع و اخلي ع رجله و ايديناته

اذكرت مره قريت انو الشارب اذا متخربط لازم يستفزع يله يستعدل

كومته ويايه صحت رغد تساعدنا نزلنا عالمغسله هيه ضلت بالباب خايفه عليه

اني يمه احاول اخلي يستفزع هو شارب يعاند و يريد يوخرني و يشمر بايده
ضربته ضربه قويه ببطنه هو عاط هو طلع كل الي ببطنه استفرغ

غسلتله حطيت راسه جوه المغسله صحصح شويه

صعدناه مره ثانيه للغرفه حط راسه نام راسا ماحس بشي

غطيته رحت شغلت الصوبه النفطيه جبتها دفيت الغرفه

بره المطر قوي ماوكف و كراكيع متت خوف بس ماكدرت انام ضليت كاعده يمه عالكرسي للصبح
اغفه ع نفسي من التعب

الصبح حسيت عليه هو و كاعد عالفراش ينزع هدومه

رفعت راسي : كعدت ؟

-  هدومي مبلله سبحت بيها شنو

- لتتحرك اجيبلك بجامه ثانيه

ركضت عالكنتور طلعتله وحده لخ

رجعت البسه حسيته بعده مصخن كوه فاتح عينه

مددته : ابقى بالفراش لتتحرك اترس الصوبه نفط و اجيبلك شي تشربه

- ماكدر عندي شغل

- الدنيا ثلج و المطر بعده خليك وين تروح

نزلت مليت الصوبه و سويتله ريوك صعدتلهيا

هو امدد يباوع عالشباك كتله : يله كوم اتريك

هز راسه بابتسامه كمت ارتب الغرفه حطيت كلاص مي يم راسه
غطيته بغطه ثاني دا اروح لزم ايدي باوعتله

- خليج

- مانايم زين انت لازم ...

- اريدج يمي بس هاليوم محتاجج من صدك

سكتت مجاوبته

- تعبان من كلشي حور ساعديني

اول مره اشوفه يحجي بتعب هيج معقول هذا شاهين

مسحت ع شعره : انت متعب نفسك فكر وشوف شتريد وقرر لا تبقى متخبط تضيع نفسك اكثر ماتعرف شتريد

- اريدج انتي

تذكرت حجايه مهدي من كلي اريدج وحددي موقفج

شاهين ضل يحجي يقنعني اني اسمع وافكر بكل الديصير

كلامه حرك مشاعري الدافنتها جوايه صدك صار لازم ينحط حد
الدمعه صارت بعيني
هو و لازم ايدي سحبني ع كيفه
وكعني فوكاه باول لحضه جفلت كلبي صار يدك بسرعه
وجهي بوجهه و جسمي فوكاه كله لف ايده ع ضهري صرت ماكدر اتحرك
ولا اني اريد اتحرك ماكدر بعد
باوعت لايده لعيونه لحنيته

لزمته من خدوده الاثنين دفنت شفتي بشفته
بستها بوسه طويله هو صار يضغط ع ضهري اكثر و يمص بشفتي حيل
نفسي انخلط بنفسه نتباوس حيل ماذكر طولنا كم دقيقه ع هالوضع
ماحسيت نفسي تعبت ولا هو تعب بقينا ع هالوضعيه مثل المجانين
حته ما حسيت عليه من دينزعني هدومي
لحد ما لافني و صار هو فوكايه
ما اذكر شي اكثر جنت مغمضه بغير عالم بس متجاوبه وياه من كلبي
نمنا سوه بلهفه مصايره لهفه ماتخيلتها تصير بيني وبينه
مشتاقتله موت و محاسه بنفسي
احله شعور حسيته بحياتي كلها جنت محتاجته حيل
وهو هم كانو مانايم ويه وحده صارله عمر
ماتخيلت رح اعيش وياه هيج يوم ابد
وره 3 ساعات حسينا ع صوت الباب يندك
رغد تكول مهدي اجه من ساعه فضوها حيبرد الاكل
اني نايمه ع بطني وع صدره فارده ايديناتي ع صدره
جفلت على دكه الباب باوعته هو يمسح وجهه

- شتعل ابو شاهين

- هههه هشش لتسمعك

-  مو مهم المهم احنه سوه

باس شفتي كتله

- علساس اول مره

- مو اول مره بس احلى مره
عطشان جنت ميت واضوكج مثل كبل

- ليش ابتعدت لعد

- انتي طلبتي هالشي بس كلت لا مو ع مزاجها

- ههههه

صفنت بوجهه وبعيونه اني و امدده ع صدري و متجيه حنجي فوك ايدي

- تحبني

- اووف

- ليش تتحسر

- لان ضليتي حسره بكلبي حسره ماتنحجي

- وهسه  ؟

- مكانج يمي

- اوعدني ماتتخلى عني

- اتخليت عنج؟؟
رغم كلشي صار ماعفتج
قسيت من حركه كلبي بس كلما ااذيج جان شي يذبح بصدري ذبح

- احبك

- اموت بيج عنعون

- ههه شو عنعون

- هلكداتج لان

- ههههههه

- ههههههه

باس راسي بقينا امددين نص ساعه نسولف

المطر ماوكف بره و كراكيع والسما مغيمه جان جو كئيب بس ما انساه و عندي احلى يوم

لو الدنيا كلها تصير سوده مارح تهتمين طول ما انتي بحظن الي تحبي و غركانه بحنانه

شويه وكتله اسبقني انت كام لبس هدومه نزل كبلي

بقيت ممدده بالفراش مكسره جسمي مهدود حيله
جريت موبايلي راسلت ساره حجيتلها
كامت تطك اصبعتين من الفرحه

كمت لبست دشداشه حلوه مطرزه ذهبي عدلت شعري و نزلت
للمطبخ سلمت وكعدت وياهم مهدي و رغد يباوعون

حجت رغد ببسامير : طولتي مرت اخويه !

اني واصب اكل جاوبتها  : اي ا ا  اخذتني النومه شويه

رغد : ساعه 1 الضهر مو وكت نوم

خنزرتها : غيم و مطر واهس ماكو كلت اكسرها بنومه شويه

رغد بابتسامه : اهااااا حقج

شاهين ياكل و يتبسم ويه ماعونه

اني هم كوه لازمه ضحكتي خدودي صارت حمر

عيني جتي ع مهدي لكيته صاير نار الا شويه يكلب الميز

حسيت ع نفسي كلت بسرعه : وداد وين لعد ماشفتها اليوم

رغد : راحت لبيت اهلها تبات يمهم اليوم

مهدي ماجاوبني ضلينا ناكل سوينا جاي و كليجه كملنا

مهدي كال راجع للشغل

شاهين التعب ماكله بس ماكدر يكعد يوم بلا شغل راح لشغله

مناك كتبلي يكلي : شتاقيتلج شلون

- وشسويلك هسه

- لو تجيني لو اجيج

- للمكتب اجيك ؟

- اي

- والي وياك بالمكتب شلون

- افرغه وانعل والديهم

- هههه بليل ترجع تلكيني

- كل يوم مو بس بالليل اريد وعد

- وعد حبيبي

- يروحلج فدوه حبيبج .. اعشقج حور

مسجاته جانت مثل قطرات المطر التوكع بصحراء جافه
يروي كلبي بكل كلمه اسمعها منه
اكتب وياه واني بغير دنيا
تمنيت الدقايق ماتخلص
تمنيته كدامي ماشبعت منه
تمنيت انام بحضنه عمر
ماتخيلت حابته هلكد
احيانا الضروف وتعب الحياه ينسينا كلبنا مشاعرنا ينسينا نفسنا
بس كلشي باوانه ووقته
هالانسان الي جنت اعيب عليه و اخلق المشاكل وياه بالخطوبه و بعد الزواج
صار عشقي و نبض كلبي
كبريائي و كرامتي بعدتني عنه وماستفاديت شي
اذا اريده ليش اضل بعيده شتسوه الدنيا هاي
خره بالمشاكل و الثار وحكم العشاير اليخليني حاطه حاجز بيني وبين الاحبه
بدل ماكسبه شمرته بحضن وحده غيري
مرات الانسان يغلط سنين طويله ويتعب و الندم ياكله
يراد يتنازل شويه حته يعيش اسعد

اني واتراسل وياه قاطعني مسج من مهدي :
- مبروك ... لعد حددتي طريقج مو ؟

صفنت عالمسج اووف مهدي شسوي وياك بيا طريقه افهمك البداخلي

- انت هم حدد طريقك مرتك تريدك و واضح هالشي
انطي فرصه لنفسك تحبها

ماكتبلي بعد نص ساعه لكيته فايت للبيت رغد فوك تحجي ويه عمتي تطمن عليها

لكيت مهدي داخل سريع للهول يباوع منا و منا شاف ماكو احد رد الباب
ونتر بيه

-  هسه زواجج الغصب من شاهين صار عسل ع كلبج ؟

- مهدي

عاط : خرب بمهدي

فزيت من عيطته رجعت ليوره

- اختاريتي شاهين عناد بيه تبعديني عنج لو تحبي ؟

- نصي صوتك حيسمعونا

- اريد جواب هسه

- واذا جوابي مرح يفرحك

- ما افرحلج انتي و دتغركين نفسج شاهين اخويه واعرفه عدل

- انت ليش تفكر بنفسك وبس ليش متفرحلي

- لان ميستاهلج وره كلشي سواه بيج ميستاهلللج
كم مره بجيتي ع جتفي
كم مره مسحت دموعج بسببه
كم مره الزم ايدج الكيها رايده رجال يحس بيها
بالوقت الي عاف مسؤوليتج عليه و تعلقت بيج
وين جان هو وييين ؟ بفراش طليقته

غمضت عيني الدمعه وكفت بيها : لتضربني بكرامتي مهدي

- انتي جبتي لنفسج
ذبحتيني من نزلتي تتبسميله عيونج ماشلتيها من عليه
من الصبح للضهر ماطلعتو من الغرفه عرفته اكل دماغج
وين وصلتي نفسج

- وصلت انو اريده
احببه تفتهم شنو احببه ماريد غيره

- جذابه لو ما رجعتيله جان مده وغيرتي رايج بيه

- كافي

- نكري كولي جذب ؟

تقرب يهمس بوجهي : يوم الوكفتج بباب الحمام ترجف عينج بعيني
انتي وعاصره هدومج خفتي لا اتقربلج وتضعفين

بجيت : اي اي ايي جنت هيج
ولو متقربلي جان هسه خاينه شاهين اي ارتاحيت هسه ؟
بس مجان حبيتك جنت محتاجه مثل اي مره كدامها رجال واحد
كلبي مو يمك من زمان اني اتعذب من شاهين
من راح ويه طليقته كدام عيني
بجيت ع جتفك لان احبه
من وكفتلي بباب الحمام نفسي رادت بس مو كلبي مو كلبي
حته يوم الحللت علمود الحمل بداخلي تمنيت يكون صدك
تحملت كل هذا علمود ابويه و علمود شاهين ضل عندي امل تتصافه النفوس و ترجع حياتنا طبيعيه
تأخرت لما حسيت بكل هذا بس المهم فهمت و حابه اصلح من زواجي

- مرح يصير اخويه واعرفه من يحط شي بعقله ياخذه ياخذه
حطج بباله واخذج و حاط ابوج بباله و حياخذ روحه بعدين
يجي يوم تشوفين الفرق و تعرفين منو الحبج ومنو يستاهلج اكثر

دا اجاوبه نزلت رغد سريع عالدرج
طبت الهول : ماما تسلم عليكم تكول .....
شو تبجين شبيج حور ؟

بهالاثناء لفت راسي جانب مسحت دموعي باوعتلها : ماكو شي

رغد : شنو ماكو باجيه هياتج شكو

مهدي يحك راسه : متعاركه ويه وداد جيت اسئلها شمسويتلها

رغد : تلكي مرتك استفزتها كالعاده اكلك شوفلها حل تره لعبت نفسي
مصدكه نفسها هيفا وهبي

عفتهم صعدت لغرفتي بجيت بجيت
مهدي احس بامان وياه مو طبيعي الانسان الوحيد الما اذاني
الوكف ويايه بكل دقيقه
سمعني بوقت مجان احد طايقني بي
كتم اسراري
حبني حبني من صدك
شعور مو بوقته و زمانه
بواقعنا لازم يدفن شعوره ينسى حته الصداقه القديمه البيناتنا
ماريد ااذي اكثر
ماتمنيت اخسره حيشيل مكانه جبيره اله بداخلي ويعوفها فارغه
نبره صوته من يعاتبني ماراحت من بالي
كلامه مثل السيف ينجخ بكلبي
سامحني

بقيت بغرفتي فاتحه الشباك اشتم ريحه المطر اسمع صوته
المطر يغسل الكلب يبرد الروح ينسيها عذابها

[ينبغي أن يكون هناك GIF أو فيديو هنا. قم بتحديث التطبيق الآن لتشاهد المحتوى.]

بليل رجع شاهين اول مدخل للغرفه
رحت  سريع حضنته الدمعه بعيني غمضت اني و حاضنته خفت تنزل دموعي
هو عباله من فرحتي حاضنته هلكد
شالني وداني عالفراش كعدني وكعد يمي باس راسي يسولف ويايه

اني اهز راسي ايدي ترجف من القهره الي اكلتها

كال : شنو باجيه ؟ شبيها عينج

- مابيه حبي

- شلون مابيج عيونج حمر وايدج بارده ثلج

- جنت فاتحه الشباك اضاهر استبردت او اخذت منك البارحه

مسح كصتي حضني :  بيه ولا بيج حبيبي

تمنيت استمرابجي واحجيله
دفنت راسي بصدره دمعتي نزلت ماكدرت اضمها

كومني مددني وغطاني كال لتتحركين اليوم ارتاحي

- وكت عشه رغد شايله البيت كله ع راسها ميصير

- اجيب من بره مالج علاقه

طلع موبايله

- منو يجي بهالمطر

- مهدي بالورشه يجيب رجعته

انعصر كلبي من ذكر اسمه غطيت نفسي بالبطانيه لحد راسي

بليل حسيت الفجر عليه كاعد يمي يكلب بموبايله

همست : ويامن تحجي

فر الموبايل عليه شوفني طليقته

- بعدك وياها

- تهددني تكلي اجي اسويلك سالفه

- ليش

- جيف عفتها

- شوكت

- البارحه بباب الشارع

- جتي لهنا؟

- اي عبالها اروح وياها

- شكتلها

- كتلها هذا حدي يابنت الناس
الي عندي فوك احبها و مكتفي بيها

- يعني ماتخوني بعد ؟

سد الموبايل مد ايده : تعالي

ادنيت عليه حضنته : كون افتح صدري و اضمج يم كلبي
باس شفتي صار يكلي احبج وره كل بوسه

هديت رخت اعصابي جنت ميته قهر بالنهار من كلام مهدي
دفنت راسي بصدر شاهين و غفيت

الصبح من كعدنا هو ويلبس رحت البسه هدومه كتله اريد اروح ابات يم اهلي اليوم

رفع تك حاجب : بدينا

-  مشايفتهم من مده حبيبي لخاطري

رفع راسه غمض : ااخ شجبت دوخه راس لنفسي

- ههههه بداعتي بداعتي

- الصبح انتي هنا ؟

- حاضر

طلع من جيبه : خلي هالفلوس يمج خاف تحتاجون شي

فرحت فكر باهلي هزيت راسي : الله يخليك الي

باس راسي وطلع

رحت بدلت نزلت جوه كلت لرغد رايحه للسوك اجيب كم شغله

رغد : سوك ؟ شهالانطلاق هذا خاف مصخنه اجيبلج بنادول

- هههه فضيها تجين لو لا

رغد : وداد مارجعت بعدها عد اهلها منو يطبخ داده روحي انتي

- ليش وداد جانت تطبخ بهالبيت ؟

- لا

- ههههههه

- هههههه

- لتحسبين حسابي لعد اليوم بايته يم اهلي

رغد : لج و شاهين شكوله

-  هو سمحلي اروح

رغد ضلت فاتحه عينها سلمت عليها وطلعت بسرعه

رحت تسوكت لاخواني و جبت غده ويايه رحت لاهلي

بس شافوني كمزو حضنوني بوستهم حضنتهم من كل كلبي

جنه اختي دموعها نزلت ركضت حضنتها ابوس راسها

امي من شافتني فقدت متعرف تبجي لو تضحك ويايه

سبحان الله كل هالاشتياق و البجي واحنه بيناتنا حايط واحد

شوفتهم الغراض الجبتلهميا والاكل حطيته بالبلم وزعت المواعين و المقبلات صبيت بيبسي بالكلاصات كعدنا نتغده
وره ماكملنا

رحت شغلت الصوبه  الكهرباء طافيه ماعدهم يشتركون بالموبده
الجو انجماد بره التمينا داير مداير الصوبه بالكاع نسولف

امي سئلتني مينلج فلوس وجبتي هالغراض ؟ كتلها مو مهم المهم شفتكم

حسيتها استغربتني ضلينا نسولف و نضحك نتفرج تلفزيون

كمت سويتلهم حلاوه شعريه و عشه اعرف اخواني يحبون يتعشون من وكت

صارت ب 6 العصر دخلت زهراء تصيحهم هيه وماشيه تفاجئت من شافتني

ركضت حضنتني كتلها شبيكم والله زينه مابيه شي

كعدنا نسولف اني وياها بغرفتها سئلتها عن حياتها تكلي

- بين الشغل والبيت ضهري نكسر من المسؤوليه الزايده كله ع ضهري
وامي تنوح عليج صبح وليل صرت اكره كعده البيت

- ابويه مادز فلوس ابد؟

- ولا مره اصلا من مده ما خابرنا ولا نعرف شي عنه
بس اخر مره حجه يكول ارجع واخذ بنتي منهم

- ههههه بعد وكت

- ليش

- هيج ماكو شي ... كومي تغدي و سويت حلاوه ضميتلج ماعون ع صفحه

- فدوه لايدج ميته جوع

- كومي لعد

بقينا لليل نسولف بالهول و نضحك

شاهين كتبلي كذا مسج اخويه جان امدد بحضني مانتبهت عالموبايل

اخر شي اتصل رديت عليه بهمس امي ليغاد تتفرج تلفزيون باوعتني بخنزره

سديت وياه بسرعه رجعت احجي ويه اخويه سويت نفسي مامنتبهه

كبل مانام بليل كاعده ويه زهراء بغرفتنا متغطين نسولف

جتي امي كعدت:  تعدلي خلي نحجي

كعدت : يالطيف يا ستار شكو امي ماتجوزين تفتحين مواضيع مهمه بنص الليل و توكعين كلبنا

- اذا ما عندي غير كم ساعه اكعد بيها ويه بنتي شوكت افتح المواضيع

- غير ارجع بيتي

- شوكت صار بيت الحيايه بيتج ست حور
لو امهم العكربه هم صارت امج و نسيتي اهلج

- احد ينسه اهله يا امي يا حبيبتي ليش حجيج هيج صاير

- مو رح انجن صرت مخبله من وراكم
اختج عنست وانتي صارلج سنتين عاصيه
من شوكت ذاك بيتج ؟
والمغرب خابرج تتشاورين وياه شنو معناها هاي

- ماما اذا تعوفين كل الخلافات ع صفحه هذا يضل زوجي

- موو زوجججج حور مو زوجج عمره ما يصيرلج رجال
تكبريني يله تشوفين هاليوم

- اسم الله عليج ياماما باعي .....

- اسمعيني زين باجر تتفقين وياه عالطلاك غير هالكلام ما اسمع
ماكافي العشتي وياه اخذج غصب عيشج بحرمان ذلج ويه اهله
اعتده عليج شهور تخابرين تبجين لاختج

باوعت ع زهراء بعتب يعني ليش حجيتيلها
هيه هزت راسها بمعنى امج ضلت ورايه لما عرفت

كملت امي : هذا العندي سوي غير الكلته وشوفي
تشترين غضبي بالدنيا و بالاخيره

- ماكدر

زهراء : ليش يمه متكدرين بله عدديلنا الاسباب

- احبه

زهراء وامي : هاااااااا

- مثل مسمعتو و هو هم يحبني

زهراء : الهمجي هذا يعرف يحب

- احجي عنه بطريقه احسن من هيج زهراء عيب

زهراء : رجلج مايعرف العيب جان يوكف يذلنا من نسئل عليج
انتي المن حابه فهميني

امي : تخبلت اختج من الضرب الاكلته طبكت

- هسه شتردون هذا العندي

زهراء : لا مو هذا العندج مو تسحلينا وراج و تشمرين سمعتنا بالكاع الرايح والجاي يدوس عليها وتكولين هذا العندي
شاهين مو اكثر من كواد و مغتصب اي اي لتباوعيني هيج ياما تخابريني تبجين من اغتصابه و تعنيفه الج هسه صار حبيب ؟
شوه صورتج و فضحنا بالمنطقه شمنتظره من هيج واحد
احنه النقرر شسوين مو انتي كافي لعب جهال

كمت عطت بيها : ليش يا يوم اني قررت شي يخصني
كلشي جان بيدكم لبسي اكلي شربي حته الهوا الاتنفسه بمواعيد
منو خطبني لشاهين غيركم اشرتولي عليه كلتو هذا المناسب كتلكم امين
الف مره بالخطوبه جيت وكلتلكم اريد افصخ كتولي عيب و استحي و هم كلت امين
سنتين تحجون ويه ابويه واني اتعذب بالبيت اليمكم ماعرفتو تقنعو يرجع يخلصني من عذابي
ابويه الي طول عمري اسمي مثلي الاعلى و افتخر بي
سنين اني حاميته منهم اخذوني بداله فديه وينه هسه ؟
فلت شاف حياته و عاف بنته
جايين هسه تكلولي لتحبين و لتسوين و لتعملين
شوكت اعيش شوكت يفرح كلبي بالكبور؟

امي : ابوج مايدري الي صار بيج يعرف اخذوج غصب بس ميعرف شسوو بيج و شوهو سمعتج لو يدري يدفنهم وهمه احياء

- اللله هو يدفنهم و همه يدفنو واني بالنص
اعيش طول عمري كدام الناس ياشرون عليه
ويكولون هاي الي  زوجها وابوها ناس ذبحت ناس؟؟
بعدين تردين تقنعيني ابويه مايعرف شصاير بيه ؟ ماخطر بعقله شنو ممكن يسوون بيه ببيتهم ؟
فكرو بيه مره وحده بحياتكم كافي انانيةةة
حربكم الازليه هاي طلعوني منها مالي علاقه بهالصراعات
الي اعرفه الي بيت و زوج احبه ويحبني
من حقي اعيش هالحياه ماطالبه شي مستحيل
عوفوني اعيششش
واذا ما رح تخلوني انام اخذ هدومي وارجعله بهاليل شكلتوو ؟

طبيت فراشي تغطيت بالبطانيه ونمت

الصبح كعدت مسوين ريوك كلولي زين كعدتي تعالي تريكي

كتلهم مالي نفس امي كالت هيه هاي الشويه و ترحين كعدي نتريك بنتي

كعدنا ناكل زهراء ماتحاجيني

اسولف ويه امي و اخوني احنه وكاعدين سمعت ادردم بباب الشارع وعيطه قويه

كمنا نفتهم شكو امي صاحت وين حور اوكفي نفتهم منو 

احنه ونحجي نركعت باب الشارع

....

يتبع .....