رواية عروس البيت الاسود الفصل السادس 6 - بقلم لارا سالم

تفاعلكم حبايب لتنسون

...........................

ضلت تهدي بيه شويه وصعدنا غيرت جرجف فراشي رتبت المكان مددتني بالفراش غطتني اول ماطفت الضوه غفيت ماحسيت ابد

الصبح كعدت ع صوت قوي عبالك انفجار صوت زرف اذاناتي زرف

كمت عايطه

فتحت عيني مفزوعه باوعت داير مدايري ماكو شي
كابوس حلمانه واكعه من مكان عالي كلش ونهايه الوكعه صوت قوي يزرف الاذن

غمضت عيني تعوذت ابليس ضليت بمكاني كاعده رفعت ركباتي ثنينهم  تجيت ايدي عليهن اني و افرك عيني احاول اتناسى بشاعه شاهين

سمعت بره صوت بيانو هادء الصوت شدني كلش كمت ع كيفي لبست الروب شديته وطلعت بره اسمع الصوت جاي من غرفه مهدي بس مهدي مو بالبيت

مشيت لغرفته الباب مردوده مامسدوده دفعتها ع كيفي
نفتحت شفت ملعوبه صغيره من هاي الي نكوكها تكوم تفتر وتطلع موسيقى مهدي حاطها ع الكومدي يم فراش

وكفت اباوع عليها حطيت اصبعي ع راس الملعوبه هيه و تفتر صوت عزف بيانو يجنن نازك و هادء

اني واتفرج عليها نفتحت الباب بسرعه مال واحد مستعجل

كبل ما اندار سديت الروب قوي بايديناتي الاثنين من جهه الصدر وقرصت عليه حيل هو صح مسدود بس فتحه الصدر تبين

انداريت شفت مهدي ورايه مستغربني باوع عالكومدي و بعصبيه عكد حاجبه كال ( شضميتي )

شجاوبه حقه شجابني لغرفته

اني وافكر بالجواب اجه سريع : شو ايدج

- وخر شنو هاي

- فتحي ايدج داكول

اني واحاول اوخره فلتت ايدي لزمها فتحها مالكه شي

ديجر الثانيه لمح ركبتي من الجانب كدمات حمر و زرك

انصدم من المنظر عكده حاجبه بين المصدوم و الفشلان

جريت ايدي منه سديت الروب بيها اشرت عاللعابه بصوت مبحوح : سمعت صوتها وعجبني اشوفها اني مو حراميه مثل ما مفهميك

عفته ورحت لغرفتي حزت بنفسي عباله دابوكه

بعدين كلت بكلبي صوجي شوداني غرفته شلي علاقه بكل هالبيت من الاساس

بيومها اني التعب جان مأكل جسمي ماكدرت اطلع من غرفتي
ولا اكوم من الفراش حته عالغده مانزلت
سمعت عمتي جوه تدردم عليه جوه بس ماهتميت
من الوجع والتكسر الي جنت بي

عالعصر تقريبا دخلت رغد عليه تستفقدني
صح ماذابه ويايه ميانه ولا متقبلتني بشكل كامل بس مارضت بلي ديصير

- شسالفه بعدج نايمه من البارحه ؟

- كعدت ونمت

- احسن مو ؟

- الحمدلله

- حاولي تتحركين كعده الفراش تمرضج بالزايد

- وين اروح و المن خليني هنا احسن

- الله كريم لازم الها نهايه ... جوعانه مو

هزيت راسي اي

- تكدرين تكومين

- اي اكدر

حاولت تساعدني بالكومه كتلها اني امشي لتخافين
بس ماريد انزل

- ليش امي وشاهين مو هنا

-  مو عليهم بس .... هنا مرتاحه

- ماشي انتظريني اجيبلج العشه

- تاكلين ويايه ؟

- الله كريم

طلعت سدت الباب اني رجعت كعدت عالكرسي سمعت صوتها يم الباب كالت : جنت يمها نايمه من البارحه بلا اكل

وهو يكلها : بيها شي مريضه ؟ كالتله لا تعب عادي

عبالي شاهين ستغربت من اسئلته بس ركزت شويه طلع مهدي

متت من فشلتي ضل يحجي وياها بس نصو صوتهم مافهمت شي

وره ربع ساعه جتي جايبه صينيه جبيره تمن باكله و دجاج و مقبلات و بيبسي

حطتها بالكاع كالت تعالي عالكاع احسن

ستغربتها : حبابه اكلي ويايه

- امري لله

فرحت راسا نزلت عالكاع بكلبي مستغربه اول مره تسويها جانت تساعدني بلا متباوع بوجهي

اكلنا سولفنا شويه سئلتها عن زوجها ماجاوبتني شي سكتت

لحد هسه ماشفته ولا اعرف شكله

ضلت يمي ع كد الاكل اكلنا و راحت

ضليت لليل كاعده يم الشباك احاول اسمع صوت من بيت اهلي اخوتي

جنه اووف جنه امنيتي اشوفها شتاقيتلها

جنت امشيها بالكرسي العبها والعب وياها ارجع طفله مثلها يوم الي نلعب سوه

ثاني يوم الصبح عمتي صاحتني من جوه عبالي دترزلني كالعاده

بس ضلت تصيح بنبره عاديه : حور حور حور

نزلت هيه كاعده بالهول حاطين جايات يتفرجون تلفزيون و مهدي يمها

بلعت ريكي : نعم

- سلامتج !

حجتها هيه و عاوجه حلكها كملت : رغد كلتلي مو زينه عد حامل لو دلع نسوان ؟

كلامها مال وحده تعرف الي صار بيه دتلمحلي عود انتي ماماليه عينه و انو تأخر لما دخل عليه

لفت راسي مجاوبتها الدمعه بعيني حصرتها

حطت ستكان الجاي عالطبله : بدلي هدومج مهدي حيوديج يشوفج طبيب الله لا يشفي العدو

انداريت بعصبيه دا ارد عليها

مهدي وراها هو ويشرب الجاي رفع حواجبه بسرعه يعني لترفضين

اني بلعت الحجي معرفت شسوي تلعثمت بالكلام : ا م م مادري

عمتي : فضيها الولد وراه شغل و حطي شال ع راسج ماعدنا بنات تطلع مشلحه

صعدت لغرفتي بسرعه هذا شعنده حجي منو كاله اني بعازه طبيب

اخير شي كلت بدلي و روحي شوفي تاليتها شنو مخسرانه شي

لبست عبايه شعري مالحكت اقرصه حطيت شال رجعته ليوره منا و منا نزلت مهدي جان بالسياره بره

طلعت شفته صافن عالستيرن رحت فتحت باب الشارع طلع السياره وصعدت مشت السياره ماحجينا ولا حرف طول الطريق

يفتر ماعرف وين 

- مرح تسئلين وين رايحين؟
- ماتفرق

احنه و ماشين ثكل و طبك السياره يم رصيف باوعني

- شبي صوتج  ؟

لزمت دمعتي كوه

- مابيه شي

- احجي

- شعليك

- منو ضاربج

- ماتعرف منو ضاربني ؟

- لو ما تراددين كلمه بكلمه مايضربج

- اذا هيج ليش مطلعني هالطلعه من وره اهلك ؟

سكت كال : احس اكو تكمله للي داسمعه

- شنو كالولك همه ؟

- مرته و اخذها

- بس ؟

- و ورقه ضغط ع ابوج شنو بعد ؟

- شحجيلك اي شي ينكال حتكولون مزوجين و شي يخصكم هذا لو اصيح بعلو حسي محد يفهمني

- اني اريد اسمع

- علاقتنا عباره عن ضرب و اهانات مديتقبل فكره ابنه مات ببيتنا

- ليش ؟

- صايره خلافات جبيره بينهم و بين ابويه بايعين بيعه جبيره و ماكلين حقه شاهين متاكد ابويه قتل ابنه ديرد عليهم و محملني مسؤوليه الي هم يكلي الي صار اهمال منج لابني وانو جان واثق بينا من يعوفه يمنا
مانعني عن اهلي من شهور ... دراستي خسرتها
حته هدومي ماخلاني اجيبها يشمرلي دشاديش بالكنتور مدري منين
مصرف مايصرف عليه
حجاب هياته ع راسي حجبوني بمزاجهم مذله كدام الناس ذلوني
يعذبون بيه كل هالمده تصبيره الهم لما يرجع ابويه

ضل يسمعني ساكت

كال : حاجاتج زايده ناكصه مين تجيبيها ؟

- اخذ من رغد

سكت بعدين حجه بهدوء : شسويتي بغرفتي اليوم؟

- سمعت صوت الملعوبه جيت اسمعه جنت مضايقه و صوتها ريحني

- و ...

قاطعته : الزراك الي بجسمي !
اخوك تفنن بضربي و تعذيبي البارحه

- السبب

دنجت راسي ودموعي تنزل

- ها

-  ماراضيه جنت كتلني واخذ .....

- ليش بهالطريقه

صوتي كوه يطلع من البجي والفشله : البارحه اول مره يدخل عليه

تنهد اندار يباوع عالشارع فرك عيونه رجع باوعني يتفحصني بنضراته ميعرف شيجاوبني

- تعبانه يوجعج شي هسه ؟

هزيت راسي لا

- ليش ضميتي ع امي ؟

- لان تعرف

- مستحيل امي صايمه و مصليه ماتقبلها ع بنات الناس

- كدامك لمحتلي عالسالفه انت مافهمتها

- ابوج شوكت يرجع

- ماعرف

- اذا مارجع ؟

مسحت دموعي : مستحيل .. لو يعرف بلي صاير بيه يجي يكلب الدنيا يرجع اكيد بس اني ماريده يرجع

- و تضحين بنفسج ؟

- اسوي اي شي علمود اهلي ابويه ماقتله مايسويها

- بس اليشتغل بالعقارات ماينحزر تفكيره

- شلون

- يسوي كلشي علمود الفلوس

- ماقتله داكلك ماقتله ابويه واعرفه مهدي مايسويها امير جان مثل ابنه متربي بنصنا شلون نقتله ليش محد يصدكني

سكتنا دقيقتين نباوع عالشارع كال :  اسف علي صار اليوم و اخويه الي حجي ثاني وياه

- دير بالك تواجهه هسه يكول شلون عرف اترجاك لا تحجيله شي

طلع من جيبه كلينسه نطاني امسح دموعي كال : خلص لتبجين الي يريحج اسوي

اول لحضه ارتاح بيها من مده طويله
فرحت انو احد سمعني وصدكني هدت نفسيتي شويه

كال : كافي ماضل كلينس بجيبي المره الجايه احسب حسابي اجيب جمله

- هههه

ابتسم هو و همين شغل السياره طلعنا وصلني للبيت نزلت من السياره طبيت بعدني بباب المطبخ شاهين طلع من الخطار هجم عليه لزمني من شعري : وين جنتي

رغد طلعت وراه صارت بالنص تريد توخره

مهدي بالشارع بعده مامحرك السياره سمع صوتنا نزل سريع

فتح الباب : ها ها خبال شيل ايدك

شاهين ماسمع احد جرني من شعري ليجوه سريع

رغد و مهدي ورانه يصيحون ماجاوبهم

وصلنا يم الدرج من شعري شمرني ع اول درجه

مهدي لزم ايده صرخ بوجهه شاهين جاوبه : منو سمحلك تطلعها شعليك انت

مهدي باوعني : اصعدي فوك

امهم بباب الهول تكوله : لتدخل ابني رجال و مرته بيناتهم

مهدي : مراجله عالنسوان المدلل مالج

شاهين عاط : مهدددي لتدخلللل

رغد : صوتكم صوتكم فضحتونا

شاهين : انجبي انتي الخ معرفتو تلزموها اصكطها يله ترتاحون

مهدي عاط بيه بعلو حسه : كتلج صعدي فوووك

ستغربت رده فعله ضد اهله

كمت سريع صعدت فوك همه صياحهم مستمر شاهين كلب الدنيا بصوته

شاهين: لتدخلللل

مهدي : من تهتم بيها كول لتدخلون

شاهين : احبسها احركها مالللكم دخل

اني وصلت لغرفتي واسمع حوارهم فوك شويه وصعد شاهين يدبج عالدرج

طب للغرفه ركع الباب حيل وصل يمي بلمح البصر ركعني راشدي قوي

دا اعيط من الالم لزم فجي بايده : صوت ماسمع من هسه اكلج كلمه وخليها ترجيه باذنج باب الغرفه ماتعتبي دون اذني تردين تعيشين بسلام تنفذين وانتي وساكته
لا اخويه ولا عشره مثله يفكوني منج اذا عصيتي كلامي سمعتييي

جرني من فجي شمرني عالفراش كل ذره بجسمي ارتعدت من الخوف اني وشايفته عينه نار وصاك ع سنونه

بلحضه عطت : انت شبيك رحت للطبيب و مهدي اخذني

- منو سمحلج اني شكايل تخليني اجرم بيج انتي واخويه هسه

- امك سمحتلي روح عيط عليها

فتح ايده يريد يكرف وجهي غمضت حيل حطيت ايدي ع وجهي

صك ع سنونه كال : بس خل يرجع ابوج يشهد الله و رسوله لا انفيكم انتي واهلج

طلع ركع الباب حيل بقيت بمكاني اريد اوكف احس رجلي ماتشيلني

مهدي ضل يصيح جوه هو و عمتي تعاركو بيناتهم

البيت كله صياح و مشاكل و خوف و غضب شاهين تمنيت اموت بهاللحظه من كل كلبي تمنيت هالامنيه

شعور بشع تطلب من رب العالمين ينهي حياتك وانت بعمر الورد ماشفت شي من دنيتك

ضليت ابجي ع حالي تمنيت شاهين يرجع يوكف كدامي يمكن جان خنكته

ثاني يوم الصبح كعدت مهضومه من القهر محتاجه اشوف اهلي باي طريقه

كلت لرغد ماقبلت تساعدني تكلي لتوكعيني بلسان شاهين كتلها

انتبهت الباب مفتوحه حطيت شال ع جتفي شلون مجان وطلعت اخر همي شيريد يسوي خل يسوي

رحت فتحت باب بيت اهلي الطرمه تراب و ورق اشجار من شهور مامغسوله البيت مابي روحيه ابد مهجور عبالك

جبت الطرمه ركض طبيت عالمطبخ ماكو احد كمت اصيح ع امي و زهراء و جنه و محمد وعلي

بلحضه التمو كلهم عليه ابوس بيهم منا و منا مثل المخبله

جنه بالكرسي فاتحه عينها تريدني اروح عليها

عفتهم ركضت عليها كنبصت بالكاع حضنتها هيه وبالكرسي دمعتها نزلت

مسحتلهيا كتلها : لا حبيبتي ماريد اشوف دموعج ابد هياتي كدامج مابيه شي

زهراء ورايه : شلون جيتي شلون خلوج منو ....

-  بلا ميدرون طلعت امي وين

- بغرفتها حتموت من قهرها عليج

ركضت ع امي للغرفه بس شافتني بجت بصوت عالي

حضنتها ابجي و تبجي ويايه مجنت رايده اخواني يشوفوني بهالحاله بس حضن امي فقدني السيطره بجيت غسلت همومي بحضنها

كعدت يمها عالفراش التمو البقيه يمنا

يسئلوني بالدقيقه الف سؤال زهراء انتبهت ايدي من الجانب زركه
كلتلي : حور شنو هاي

باوعت غطيتها بالشال : وكعت عالدرج كبل يومين

زهراء باوعتني بنضره يعني دتجذبين

وخرت عيني عنها كلت لامي : بابا وين يوم

- يكول ارجع بس ماعرف شوكت

- ليرجع هسه شاهين حالف يموته مدا يبرد كلبه

زهراء : متكليلي شنو هذا شيطان نتوسل بس كلمانشوفه نريد نطمن عليج كلمتين مايحجي يعوفنا ويفوت

- لتحاجو بعد و تنطو زفره خل يولي

امي : شلون اطمن عليج لعد يابنتي انطيني طريقه لتعوفينا هيج

-  خلوها ع الله

دك موبايل زهراء بره راحت تحجي دقيقه و رجعت يمنا

مدتلي موبايلها باوعت باستغراب : شنو

- رجلج عالموبايل

بلعت ريكي غمضت يارب انطيني الصبر

اخذت الموبايل منها طلعت بره الغرفه جاوبته

- الله ينتقم منك و يدمرك مثل مادمرتني اني واهلي

- اذا كملتي لغوه اني بالباب طلعي

- دقيقتين و اجي

- ليش تخليني افوت اسحلج كدامهم

- قسم بالله احط طلقه براسي و اخلص منك دقيقتين كتلك

- بسرعه

بعدني ممجاوبه سده بوجهي
عصرت الموبايل بايدي الله ياخذك

رحت لغرفتي جريت جنطتي الم بيها هدومي منا ومنا

جهازي الي ماتهنيت بي مصفط و شمحلاته
صرت اعبي بالجنطه نثر منا ومنا

جتي زهراء سدت الباب : شدسوين ؟

- شوفه عينج الم غراض جنازتي

- كل عقلج راجعتله ؟

- عندج حل ثاني ؟

- ماكو شي غصب حور ماكو غصب ابقي الشارع مليان زلم مايكدر يمد ايده ع حرمه

- طلع اكو غصب اختي الدنيا مليانه غصب و اجبار و حقد رياجيل الشارع حاولو يحجون وياه ماكدرو يسوون شي كلمن يكول يا روحي
الي تشوفيه بمسلسلاتج طلع كله موجود واحنه ماندري
والزلم التحجين عنهم وكفو يتفرجون اني و دا انسحل من شاهين

- والي بايدج شنو و متاكده لو فتشت بجسمج رح الكي اثار بعد امشي نشتكي عليه نهجم بيته

- لاروح ولا اجي القانون وياه حيكلي انتي زوجته
واهله وياه و الغريب والقريب يتفرجون لان ابنهم راح عدنا
اتحمل لما يرجع ابويه منا لوكتها يمكن السالفه تبرد و تنسي

- اقلها اخذي موبايلج طمنينا عليج مكالمه رساله اي شي امي مدا تنام الليل من القهر عليج

- نطينيا

- اوكفي

ركضت عالمجر جابتلي موبايلي لزمته حطيته بالجنطه
بوستها حضنتها اول مره احس زهراء هلكد تحبني رادت تخلع جتفي هيه وحاضنتني

نزلت سلمت من بعيد عليهم كتلهم يادوب اطلع ليسوي حركه من حركاته

طلعت بالشارع شفته واكف يم سيارته يورث جكاره

رحت يمه اشرتله ع الجنطه كتله : جبت هدومي لو الهدوم هم حرام عليه ببيتك ؟

مجاوبني طب للبيت اني وراه اجر بجنطتي

صعد كبلي واني وراه

طب للغرفه كبلي حجه بصوت ناصي سدي الباب وراج

سديت الباب واني اقره الفاتحه ع روحي

يتبع ...

[ينبغي أن يكون هناك GIF أو فيديو هنا. قم بتحديث التطبيق الآن لتشاهد المحتوى.]