رواية عروس البيت الاسود الفصل الثامن 8 - بقلم لارا سالم

.........................

ركضت عالحمام شاهين جان ديغسل وجهه

دكيت الباب فتح : شنو

- رح اروح لاهلي عياطهم واصل للشارع

- دصعدي لغرفتج صعدي

- اكلك ببيتنا عياط خايفه ع امي

- اشش لدوخيني طلعه ماكو

انداريت اروح لزم ايدي بعصبيه

صرخت بوجهه راسا : احرك روحي والله العظيم وخرر

صعدت ركض مهدي طالع من غرفته كال : شبيج ليش تركضين

ماجاوبته لبست عبايتي شلون مجان

اني و نازله لحكني : بس احجي شبيج

- مادري عياط ببيتنا

صرت اركض مثل المخبله

دخلت لبيتنا اصيح عليهم سمعت صوتهم جاي من غرفه امي

ركضت عالغرفه لكيتها واكعه بالكاع نازل نص وزنها
وجهه اصفر من قله الاكل و النوم متخربطه

ركضت عليها بالكاع شلت راسها ابجي و احضن بيها
ماعرف شسوي من خوفي الخرعه اكلتني ع امي

عطت باخواني : شكاعدين تتفرجون عليه ركضو صيحو اي بشر يساعدنا بسرعه

اني حاضنتها وابجي سمعت مهدي صار ورايه وخرني منها

كلي : ساعديني نكومها

شلناها نركض بيها صعدها بسيارته و طرنا بيها عالمستشفى

سوينالها فحوصات و هالسوالف ضغطها والسكر ماباقي شي ماصاير وياها الدكتور كلي : جسمها فيتاميناته صفر غير تنتبهين ع امج ؟
مبين ماحاطه شي بحلكها من مده وين جنتو عنها

اني و مهدي واحد يباوع الخ كتله : اعرف دكتور مقصرين وياها بس ماعوفها بعد اطمن

كعدت وره ساعه شاديلها مغذي بايدها

ضليت يمها لازمه ايدها ابوسها ابجي و تبجي ويايه

مهدي بباب الغرفه منتجي عالباب مجتف ايده يباوع علينا ساكت ميحجي

وره كم ساعه رجعنا دخلناها للبيت حضرتلها كم اكله سريعه طبخت جدريتين و كليت بتيته و بيتنجان سويت جاي عشيتهم هيه نامت ماحست بشي بعد اطمنت عليهم و رجعنا للبيت

حمدت الله انو صخرلي مهدي بهاليوم جان راحت امي من ايدي لا فلوس ويايه لا احد يوديني
زهراء اختي تشتغل و بدوامها جانت امي الله سترها

ثاني يوم مهدي ضل نايم للضهر حسيت عليه نزل ب 3 ونص يفتر بالمطبخ

نزلت وراه كتله : حاير بزمانك شو .. جوعان ؟

- كلش والله

- اكعد هسه احميلك الغده

صبيتله و حطيت سلطه و خضره هو يحب ياكل خضره ويه الغده دائما
طركت لبن و الخبزه الحاره سويت ميز مرتب

- شدعوه صابتلي هلكد فيل كدامج

- هههه عافيات

- الله يعافيج

- تغديتي مو ؟

- بعدني التهيت فوك

- جيبي ماعونج لعد

صبيت كعدت يمه نتغده ماحجينا شي طول الكعده بس فرحانه بوكفته ويايه كبل بيوم ماعرف شحجي

طلعت مني الكلمه فجاه : مشكور علي سويته ويايه البارحه

باوعني

رجعت كملت : ماعرف بدونك جان شسويت
يمكن جان امي راحت بيها
من كل كلبي شكرا

- ماسويت شي اي احد بمكاني جان ركض بيها

- لا مو اي احد راد يمنعني اروح اشوف شصاير بيهم

- شنو شعورج اتجاهه ؟

ستغربت سؤاله!

راد يثول السؤال : قصدي احسج صايره تكرهي

- الي اعرفه اريد اخلص من هالزواج باي طريقه ماكدر اعوف اهلي بهالوضع و يوم التنتهي هالمسئله يكون ابويه رجع و حياتنا رجعت طبيعيه

رجع ياكل ساكت بعدين كال : لتشيلين هم اني موجود

حسيت حجايته راحه نفسيه ع كلبي
حجاها بطريقه طمنتني

مهدي يوم عن يوم يوكف ويايه اكثر معاملته الي بحنيه
تجي لحضات ما افهمه
يسكت يصفن الكلام يوكف بحلكه

فد يوم جايين زلم يمهم بالبيت اني من تعب الشغل متحملت طبيت اغسل الحمام بالكليدور صاير مقابيل الهول بشويه

طلعت اني والف الخاولي ع راسي صار بوجهي مهدي

ارتعد جسمي من الخوف مامتوقعه اشوفه بالباب

- ف ف فززتني

دخلني شويه للحمام حته الي بالهول مايشوفوني
دخلنا هو يتقرب اني رجعت ليوره

- شلون تطلعين بهالمنظر

سكتت مجاوبته كمل : دشداشتج مبلله و الخاولي ع راسج

فشلت من نفسي : اسفه

دنجت من فشلتي ضل واكف رفعت راسي عينه تلمع بعيني
جان قريب مني يحجي بهمس بس ماشال عينه

كلبي كام يدك بسرعه من التوتر

حس عليه راد يثول الموقف فرك وجهه كال : طلعي

ركضت اني واصعد الدرج من فوك لمحته حاط ايديناته ع وجهه بعدين فرك راسه مثل الدايخ

دخلت لغرفتي قفلت الباب اني ولازمه كلبي شصار بيه من الفشله

ضليت لليل كل شويه اتذكر نضراته و حركاته هدوئه

اسولف ويه نفسي شبي هذا يمكن لان يحس نفسه مسؤول عني بهالبيت
اي عادي خطار بالبيت و ماراد يشوفوني عادي طبيعي

ثاني يوم وره الريوك دنحضر للغده دخل للبيت شايل علاليك شافني سلم

رديت السلام شلون مجان مباوعت بوجهه فشلانه

راح بدل هدومه رجع نزل للمطبخ طلع مي من المطبخ يشرب

كال : منو طابخ بيجن مالي نيه انام بطواريء الكندي

باوعتله مبتسم ابتسمت وياه كتله : تاكل و تشوف

غديته سولفنا عن شغله ضحكنا ع سالفه اجه شاهين مناك

حجه وياه ماباوع عليه ابد اني هم ماهتميت هو صاعد

كلي : صعديلي صينيه فوك

مهدي خفف اكل تضايق من حجايته اني هم محجيت
كمت سويتله السم الهاري صعدتلهيا اكل و نام

القاهرني انو مجبوره ع عيشته
مو مثل باقي النسوان باقيات بالضيم بمزاجهن
اني مجبوره حته لو نهزمت المن ووين انطي وجهي
اهلي بصف بيتهم شستفاد غير الهوسات والفضايح بالشارع

مجان احد مهون عليه العيشه بهالبيت الاسود الا مهدي

كلامه ويايه بحنيه و هدوء ولطف
الطلب يطلبه باسلوب او يكلي ممكن ؟
نضراته و غيرته هو و يحاسبني بباب الحمام ماراحت من بالي
عصبي بس بحنيه

عكس شاهين كلشي بامر و حساب و اذا تعصب يذلني لما اسويه اليريده

مايسئلني شمحتاجه شرايده ذاب احتياجاتي ع رغد و اخوه

بين يوم و يوم مهدي يسئلني كتبيلي شمحتاجه بورقه اجيبلج

وصيته يطمن ع اهلي كل مايكدر يشوف صحه امي كال صار بس فكي وجهج لتضلين معبسه

ابتسمت وراح
محد يضحكني غيره
بعدين كلت شداسوي اني شبيه فرحانه ع الهنى الي اني بي

فد يوم ب 4 العصر كعدت سمعت صوت جوه هله عيني هله بام الغالي وصوت تبوس و فرحانين بيها

كلت منو اجه عدلت نفسي نزلت الوف من يم الدرج اروح اغسل وجهي بالحمام

هيه لمحتني اشرت لرغد عليه تشاورو بيناتهم اشو هاي عاطت : منوووووو

رغد : حور مرت شاهين و سكتي لتسويلج سالفه

- لالا عيدو مرته منوو

رغد : نصي صوتج شجاج

- شنصي من شوكت هاي صارت مرته

اني غسلت وجهي وافكر احاول اخمن منو هاي
جمدت كلبي رحت للمطبخ

- مساء الخير

عينها نفتحت تباوعني من فوك ليجوه
جتي تاشر يمي تأشر وتحجي بعياط :

- تراكات و الوجه مرتاح و تكعد ب 4 العصر المسعده
مو هاي اخذت عزيز كلبكم مو هيه الكتلت ابنييي

فتحت عيني عرفتها طليقه شاهين

لابسه فستان اسود قصير عود حزنانه وهو نص جسمها بارز

عمتي : مو هيج السالفه

رانيه طليقته : اي سالفه اي ضراط صدك تحجون كتاله ابني عايشه بهالبيت

بهاللحظه نزل مهدي من فوك يم الدرج باوع صاح : شاهين شاهين

نزل شاهين من فوك ماعباله طليقته جايه شافها ارتبك

كام يمشي ع كيفه لما وصل للمطبخ يفرك بعينه : شوكت جيتي

رانيه تحاول تلزم دموعها اشرت عليه بعصبيه ترجف : شنو هاي شاهين رد عليه منو هاااااي

شاهين : شبيج دنحجي

رانيه : ماريد احجي منو هاااي كلتو تجيبوها يومين تشوهون سمعتها تاخذون حق المرحوم و تشمروها ع اهلها ليش بعدها هنا ؟
ماسمعت احد جاب سيرتها ليهسه بالمنطقه
مايعرفون اخذت عذريتها و حتشمرها ؟
شاهين باوعني ليش ساكت
اخذتها و خلص دورها ليش ماعفتها ؟

شاهين : بعدين

رانيه : ماكو بعدين هسه تفهمني ليش مأخر الموضوع ازوجتها مو مزوجها ؟؟؟ جاوبني رد عليه

صارت تعيط مثل المخبله الكل ساكت شاهين جاوب : مزوجها بس

رانيه : بس شنو بس شنو
شلون طايق تنام ببيت بي وحده كتلت ابنك اني شنو ذنبي دمرتني واخذت ابني حرمتني منه اريد ابني هسه هسسه تجيبولي ابني شنو انت الله ياخذك الله ياخذك

مشاعري تناقضت بلحضتها ماعرف انقهر ع وصفها اليه و التجاوزات السمعتها منها لو انقهر ع حالتها و قهرها ع ابنها
لو افرح لان شاهين غير الخطه بدماغه وماراد فضيحتي

ضلت تحجي انهارت صارت تبجي و تعيط : املخ روحي
اللطم بهالليل ابني شنو ذنبه بنزواتك بسبب اهمالك ابني رجع جثه
تالي تزوجها و تقدرها الله ياخذك و ياخذها

رغد تكولها عاقد عليها كبل مايموت ابنه

شاهين رفع اصبعه صوتج !

رانيه كامت تدفع بي وتبجي حيل
اخذها طلعو بره بالحديقه

اسمعها تبجي و تنوح تتوسل : ليش هيج
حركت كلبي مرتين مره ع ابني و مره عليك ليش شاهين حرام عليك ليش

اسمع صوتها صار ناصي رحت عالشباك وخرت شويه من البرده
شفته حاضنها ايده ع راسها وراسها ع صدره يهدي بيها هيه تبجي و خانكه بجيتها وحلكها بتيشيرته

هو ساكت عايفها تحجي التريده ماشفت شاهين فد يوم طول خلك ويه احد عصبي وياها ضل ساكت وحاضنها

حسيته بعده يكنلها مشاعر او الي صار لابنهم رجع القديم بينهم

لا اراديا نزلت دمعتي ماعرف انقهر ع روحي لو احتقرها علي خلتني احسه

ماطولو دقيقتين مشه وياها صعدها للسياره و صعد وراها شغل و طلعو

انداريت ارجع اصعد لغرفتي فتت يم مهدي ضل يباوعني عفته صعدت ابجي

صار الليل لساعه 2 بليل شاهين مارجع

ماكدرت انام كلبي مقبوض عبالك دا استعد لموت احد

فتحت الباب باوعت البيت اضلم الكل نايمه مفرفح كلبي وين اروح

طبيت لغرفتي لفيت روحي بلفاف شتوي و صعدت للسطح

فتحت الباب بسرعه مثل مسجون طالع من سجنه

طلعت بمشيه سريعه اتنفس سريع بجيت بصوت مسموع

حاولت اكتمها ماكدرت تمنيت ابجي عمر محد يسكتني

مرت ساعه تجمدت من البرد بس تحملت ماريد ارجع للغرفه

سمعت صوت باب السطح نفتحت باوعت مهدي شبك ايده بسرعه بردان

- شصعدج هنا

رجعت لفت راسي اباوع عالشارع مسحت دموعي

اجه يمي كال : تتمرضين ليش كاعده بهالبرد

هم مجاوبته اجه وكف يمي يتفرج عالشارع دقيقتين كال : تحبي

نزلت دمعتي ويه حجايته

رجع كال : زعجج روحته وياها ؟

- مزعلانه ع شي كد مزعلانه ع نفسي
محترك كلبي علي صار بيه
دخلت لهلبيت المفروض عروس
طلعت بعين الناس الضحيه المستكعديها و عايشه بالحرام
انضربت انهانيت انحبست جعت عطشت انغصبت
اخوك شايفني ثار و جسم

مهدي يسمعني لاف راسه عالجهه الثانيه

- ينتقم بيه كلما تذكر ابنه عن اي حب تحجي ؟
و ختمها اليوم رجعلها كدامي
مضل شي بداخلي يشفعله
هاني لاخر لحظه مص كرامتي لاخر قطره !
احتقر نفسي لان بعدني وياه
متت الف موته بهالبيت دا اختنك مهدي

ماعرف شلون لزمني حضني
و من قهري ماوخرت جنت محتاجه جتف ابجي عليه من كلبي

ماحجه شي غير حضني اني هم ماردت اسمع كلام بهيج وقت ماكو كلمه تهون عليه الحاسته

ضليت ابجي واشهك اخر شي وخرته ونزلت لغرفتي

نهضمت بالزايد اخو حس ونقهر وذاك حجار كلبه عليه

نمت ب 6 الصبح من تعب البجي

كعدت ب 5 العصر الدنيا دتضلم نزلت جوعانه بس معدتي كالبه ماكدرت احط لكمه بحلكي

صرت الهي روحي بالشغل نظفت البيت شغلت الغساله جلفت الطباخ

دا انضفه سمعو صوت سياره تدخل للكراج رغد كالت اجه شاهين

دخل سلم ماجاوبت ولا نداريت كملت الطباخ شلون مجان

طلعت عالطرمه اغسلها

باب السيم مال مطبخ مفتوحه نص الحجي يوصل بره

اسمعهم بالمطبخ يضحكون وياه هو و ياكل تفاحه
يكلهم شهالاسئله مو تعرفون جنت يمها

عمتي جاوبته بهمس : مايصير ابني نفسك بيها رجعها ع ذمتك مو بالحرام

هو ياكل ميجاوب ضل يسمع نصايح من امه واخته

مهدي كام من يمهم سلم وطلع عبرني و اندار عليه كال : محتاجه شي ؟

جاوبته : سلامتك

باوع عالمطبخ نضره سريعه رجع باوعني كال : ارجع الكيج تضحكين ماتبجين بعد

هزيت راسي بابتسامه

وره يومين تفاجئت جايبلي موبايل باوعت منا ومنا خايفه

كال : شاهين يعرف

- شلون قنعته

حاجيته من باب الحنيه و لازم يستعمل حنيته علمود يلين كلبج

اخر حجايتين حجاها بنبره مو مقنعه ويباوعني

من فرحتي لزمت ايده : ماعرف بدونك شسوي

ابتسم باوعني كال

- لزمي و نزلي برامج عليه تواصلي ويه صديقاتج لتبقين بالكأبه
واني وياج خطوه بخطوه

- ماضيفهم كبل ماضيفك

نزلت برامج تواصل سويت فيس بديت اتصفح
شتاقيت لحياتي الطبيعيه الي نسلبت مني

بنفس اليوم وصلني مسج من مهدي : خزنتي رقمي

- ماجنت اعرفه

- صار عندج هسه خزني

- اوك

- مكتيلي محتاجه شي

- سلامتك

- غير سلامتي شتردين

- اريد اشوف اهلي

- شوفيلي شي اسهل

- هههه ماكو

- يصير خير

فد يوم بالمطبخ نسولف اني و رغد جابت سيره وحده : فلانه تعرفيها

- لا

رغد : بلي اكيد شايفتها جوارينا بالشوارع الي ورانه شابه تسوق سياره حمره مهدي جان حاط باله يمها مره جبنا سيرتها بالهول

- علاقه بيناتهم يعني لو جان معجب بيها؟

رغد : يكول ماكو شي بس جان يطلع يحجي بالطرمه هوايه بالموبايل و بذيج الفتره هيه جانت بباله احنه خمنا تكون هيه
هذا هو اخويه سكوتي مانعرف جوعان شبعان عزابي مرتبط

- ممم و هسه ؟ يعني حاجيلكم شي عن وحده معينه

رغد : امي رايدتله وحده من عرفنا بالبصره كبل فتره دنشوف وين توصل

هزيت راسي جريتها صفنه الي اعرفه مهدي صريح اذا يحبها ليش ماصارح اهله و ازوج لعد

وره الغده كمنا نشيل المواعين وباقي السفره للمطبخ

اني و رايحه شاهين صار وجهي بوجهه فزيت رجعت ليوره نفسي صار يصعد وينزل سريع انتبه عليه راد يحجي ماخليته لفت من يمه رحت للمطبخ سريع

بليل صعد سويت نفسي نايمه حسيت عنده حجي و متردد واني كطعت الطرق عليه فد مره

بمرور الايام خفت عصبيته صار من يشوفني يسكت
مره هو يجنبني مره اني اجنبه

مجنت حابه اسمع تبرير منه رغم حسيته يريد يبرر
ماريد اسامحه
ماريد عيني تجي بعينه
خايفه من شي بودي مايصير
خايفه ذاك الشي يكوم يدك بداخلي فد يوم
لا ماريده اكرهه اني اكرهه مرح يتغير شي
مستحيل يتغير

وره كم يوم رجعت عمتي عصبيه تصيح بعياط : غراب البين حور حوررر تعالي بت الدلاله سمعي امج شتكلي تعالي بت الحسب و النسب

....

يتبع ...

[ينبغي أن يكون هناك GIF أو فيديو هنا. قم بتحديث التطبيق الآن لتشاهد المحتوى.]