رواية عشگ أهل الجنوب الفصل الحادي عشر 11 - بقلم أسيل

بقيت صافنه عليه لأول مره بكل حياتي اشوف بهل شكل وهل عصبيه دمارات ركبته كلها بارزه وصاح واني من يمي كمزت

نواف : انتن ما تستحن نبيل تعال شوف مرتك انتي بخير يوجعج شي

زينب : لا لا والله وكعة خفيفه ايدي بس وجعتني ما بيه شي شيخ

مشيت ردت بس اصعد ولزمني من ايدي وسحبني صرت يم صدره قريبه كلش منه اذاني كلش وهو لازم بيه فقد كل اعصابه وصاح بيه كبالهم كلهم

نواف : انتي لج صايره ما تحترمين احد بهل بيت هل بنيه ضيفه عدنه ضيفه ابيت الشيخ وتخلين قندرتها فوك راسج مو تالي عمري يجي احد يعيرني بسبب مرة طردت ضيفه وماكرمناها فهمتي وجهج هذا بعد ما اريد اشوفه كدامي اني الي نطيتج عين يله

رسميه : يمه شجاك هد ايد البنيه راح تكسرها

نواف : واكسر راسها هم اذا ماتحترم الي اكبر منها هنا

_اسفه زينب اسفه نوره مو قصدي

زينب : انتي مالج دخل نوره الي دفعتني

_بسببي صار هل شي

جاسم : شيخ اترك ايدها

نواف :لا تتدخل هاي يراد الها تربيه من جديد

جاسم : حاسبها بينك وبينها بغرفتكم مو هنا عيب

نواف : ومنو انت الي تعلمني العيب

جاسم : نواف انا اكلك عيف ايد البنيه

نواف ما اعرف شصار بيه كمت ارجف اريده بس يعوفني ولزم جاسم ايد نواف بديت اشهك اول مره احس بكل هل ذلة دفعني وكعت بالكاع بقة يباوع عليه بنضرات ما اعرف اول مره اشوفها بعينه ولزمه جاسم طلعو من البيت هند حاولت تساعدني بس سحبت ايدي وصعدت للغرفه بجيت وما حسيت على روحي نمت فزيت الفجر ما لكيت نواف كمت توضيت وجهي مورم وشفتي مجروحه بديت اصلي وفات للغرفه ماحجه شي تمدد على الكرويته خلصت صلاه بقيت كاعده على السجاده فتحت الربطه وما حسيت غير ايده جوه حنجي ورفع راسي بسرعه وخرت منه بقه صافن عليه كمت لميت السجاده و طفيت الضوه تمددت على الجربايه ما حجيت ولا هو حجى شي ما نمت لحد ما طلع الضوه غمضت عيني بالكوه كعدت الساعه 2 الضهر اجتي علياء كعدتني كعدت بالكوه احس جسمي كله مكسر من التعب وباوعت بوجهي وكالت

علياء : عليج الله لا تزعلين منه تره والله ابو قلب حنينه

_اني مزعلانه بس تعبانه اريد ارتاح شويه

علياء : يله كومي غسلي وجهج وخلي ننزل ناكل

_ مجوعانه

علياء : من البارحه تراج مماكله شي والشيخ نواف هم مماكل شي

_والله مالي خلك انزل احس نفسي تعبانه كلش

علياء : نزلي وكسري عينها لا تخليج هنا ضعيفه حابسه روحج وهي تفتر بالبيت مثل الجني كومي

_ زينب هم ..زينب زعلانه مني

علياء : اصلا من البارحه تبجي عليج وانطيج بشاره تخربطت البارحه من القهرة

_شنو شنو زين وين البشاره ولج شبيها كله من ورايه والله اوووف

علياء : لا اسم الله البشاره مو تخرطبت لا البشاره طلعت حامل بولد

_عليج الله

علياء : والقران وصحته زينه ومابيه اي شي ونبيل الكاع ما لامته بس هي مقهورة وكلساع تعاتب نواف يله نزلي كومي غسلي وجهج وخلي شويه مكياج لا تهملين نفسج البيت كله ضايج لان انتي مو ويانه

_عاشت ايدج حبيبتي خلي اسبح وانزل

علياء : ها اريدج مثل الكمر تنزلين

_تدللين ميخالف يقلبي

علياء :يله كومي كدامي

كمت سبحت نشفت شعري بسرعه وشلته شويونه من وجهي ولبست ثوب ازرك بلون البحر ردانه كله تطريز فضي وشمرت الشال على راسي وشعري جان كله مبين على طوله خليت ميك اب خفيف مكدرت اخفي الجرح الي بشفتي المهم نزلت ب الكوه اتصنع الضحكه سلمت وكامت رسميه حضنتني وباستني وبست ايد عمي وكعدت يمها تسولف ويايه ونور تفوت وتطلع وتتمضحك ولابسه ثوب احمر ضيك على جسمها ميبسه جنها عود ومطلعه نص صدرها وتتعمد توكع الشال وذهب وحاطه كيلو مكياج عبالك عرس جان تكول

نوره : البارحه عاشت ايدك على الشوي مال سمج يخبل

نواف :عافيه

كعدت على اعصابي و العب بحلقتي ويحجي بالكوه وياهم حته ما رفعت راسي وباوعت عليه وكالت

رسميه : يمه اشوفج ملابسه ذهيباتج

_والله يا ماما كعدت شويه مالي خلك بس البسه ب الليل علمودج تدللين شعندي غيرج

رسميه : يمه لسانها ينكل اكل ينكط عسل

_ماما خلي اكوم اساعدهم شويه

رسميه: لا خليج كاعده هنا

_لا والله ماما خليني شويه اترحك الحركه بركه

رسميه: يمه احلى جنايني كلهن والله

كمت وابتسمت بوجها عدلت حجابي لان وكع مريت من جاسم وكام واول مصاح اسمي جاسم كمزت واجه وجهي بوجه نواف ونزل راسه ولم السبحه بيده واستغفر الله وطلعت فكال

جاسم : خيتي تعالي رايدج شويه بموضوع بالباب

_تأمر

مشيت اني وياه وكفنه شويه بعيد من الباب بنص الحديقه وكف يمي وكال

جاسم :بعدج زعلانه

_ الغالي اذا احجي راح ابجي ف خليها الغصه بقلبي احسن خليها بقلبي

جاسم : يحبج وليشهد الله

_فدوه اروح الك لا تحجي ما اريد ابجي واحس بالذله زايد

جاسم : والله ما عاش الي يذلج ساره تراه رجلج تحمليه

_بس والله مضلومه والله

جاسم :شنو الصار احجيلي انا احل المشكله

_ما اريد احجي خلي اروح اساعدهم والله كريم الله يحلها ويوكف ويه الحق

جاسم :براحتج خيتي مراح احجي وياج هسه بس لا تزعلين منه هو عصبي هيج لا تضوجين منه

_لا ما اضوج لتخاف

ضحك وخله ايده على ضهري ومشينه للبيت ودخلت المطبخ بست زينب اول ما شفتها واعتذرت منها واني ممسويه شي باركت الها علمود الولد صدك فرحت الها بديت اساعدهم وخلينه الأكل بالكاع ونوره جانت مموجوده كعد نواف وجان المكان فارغ الي بصفه وكعدت اني يم زينب حته ما باوع لو كلف نفسه اكلت شويه ومسحت حلكي الجرح طلع دم همزين محد انتبه ف كمت اكلت لكمتين وكمت وكالت

رسميه: ها يمه

_ماما سفره دايمه ان شاء الله خلي احضر استكانات الجاي

رسميه :شني هاي شكلتي يمه زعلانه منه لنواف بعدج خليج كاعده هسه

_ماما ماكو وحده تزعل من رجلها تره هذا شيخ نواف تاج راسي مزعلانه منه ولا الي حق ازعل منه

بالكوه مسيطره على نفسي ما ابجي بس صوتي مخنوك عاف الخاشوكه نواف وكعدت اخذ نفس وزفره ونوره خلت اله اكل بالماعون كمت فتت للمطبخ وبسرعه مسحت دموعي دخل ورايه وسويت نفسي مشغوله احضر المواعين غسل ايده بالسنك وهو ما يغسل ابد بس هل مره تعمد وكال

نواف : اريد استكان جايي بره

وطلع حته ما سمع شنو ردي بعد دقايق اجتي نور اخذت الجاي اله هل مرة صدك قلبي محروك معدتي لعبت صعدت لغرفتي تقيأت الأكل مبقه شي بمعدتي كولش نغثيت غسلت ونزلت كملت تنظيف وياهم مقبلو بس اني ردت انسى شويه ف بالليل نزلت هم صار العشى سبحت وتعطرت لبست ثوب ماروني وكتها اخذته من زارا كولش احب هل ماركه ردانه طويله والثوب مو كولش طويل وبيه جاكات من الجانب ودلعته مربعه ولبسن كلاده وسوارتي الذهب وحجل صبغت اضافيري ماروني وشويه مكياج وخليت حجاب بيجي على راسي ونزلت والبنات كلهم جانو مبدلات ولابسات حلو فاتت رسميه وكالت

رسميه : اللهم صل على محمد وال محمد امهات الوصخ عود مبدلات وهي مبدله

تعرف خاطري مكسور هل تضحكني ضحكن البنات وباسنها يموتن عليها وعلى سوالفها فاتت نور لابسه ابيض باعت زينب الها بطرف عينها وكالت الي

زينب : هاج يا نبعه الريحان روحي فرشي السفره

_تدللين قلبي بس موكتلج لا تعبين نفسج

زينب :لا تعب شنو هو اليوم الأكل كله شوي تعب شنو تبعنه الزلم

_ربي يحفظهم ويخليهم على روسنا

علياء: ويبعد عنهم بنات الحرام

هند : امييين يا رب شهل جمال ولج جنج تركيه

ضحكت ورحت سلمت واول ما فتت عدل نواف كعدته ونزلت راسي مباوعت عليه وفرشت السفره كام سيف وعدل السفره ويايه وكال

سيف : جنها امي قصفتهم

_منو يخلص من لسان ماما

حيدر: عمي هل جمال كلها ناقصج بعذ ذهيبات بنتي

_لا لا عمو دخيلك لابسه هذني مخنوكه منهم ثكيلات وبعد عندي كومه

رسميه : ايي ي عيني الثكل ما يرهم اله على جنايني

نوره : شبيج عمه كل شويه احسنج تبسمرين بيه

رسميه : انا خالتج مو عمتج يمه ليش ابسمر بيج قابل اريده اخذنج لواحد من وليداتي مخبله قابل واخذج لواحد بيهم

وضحكو كل الكاعدين رحت اساعدهم وفتت اريد اخلي الأكل وطلع نواف بوجهي رجعت ليوره بقه واكف واحسه يباوع عليه بس اذا باوعت ادري بيه راح يخزرني لو ابجي مشه ودخلت وبعد شويه كعدو الكل وتعمدت اني اتاخر حته ما اكعد بصفه كعدت يم عمه رسميه وزينب وبدينه نصب اكل وكله لحم مشوي وكباب ومعلاك وافخاذ عجل ولبن وخضره وخبز حار جنت جوعانه بس معدتي مدتقبل اكل هاي كل ما انغث ما اتقبل اكل شربت لبن واكلت شويه معلاك احبه وكمت

حيدر: شني هاي بنتي تره هذا مو اكل حالج ما عاجبني

_عمو شنو قابل استحي بس والله مكاعد اكدر اكل اكثر

حيدر : مريضه اخذج للمستوصف

_لا والله عمو مابيه شي لتخاف هسه من اجوع اكل هذا خير الله هواي بالبيت واكل

حيدر :ما مقتنع بأحوالج

_عمو ها تريد ارجع اكعد ما عندي مانع والله بس صدكني اكلت

حيدر : ارتاحي بنتي ارتاحي يله جاي من ايدج الحلوه

_تدلل من عيوني عمو

نوره: هاك اكل شو ما اكلت شي نواف تذكر جنت صغيره وتوكلني اطلع اللحم من الشيش تخاف احترك وتكلي تراج تبقين زعطوطه

نبيل : قصده تبقين زريكه

وضحكو ونواف هم طلعت بقيت كاعده بالمطبخ جنت مخليه ايدي على خدي واحرك بالستكان وفات نواف كعدت عدل غسل ايده و طلع بقيت كاعده وحدي لحد ماخلصو اكل وشالو المواعين جنت اغسلهم وياها وكفت نوره يم الطباخ والجاي على النار واني وعلياء جنه نسولف ونضحك وخلينه هند تطرد زينب وكالت

هند : يمه من عنادها

_لج عيني ما تقبل تكعد موتتني و صدك ملك شوكت ترجع

علياء: والله ما اعرف ماترضى ترجع هنا تعلمت على العيشه هناك

_ شكد احب اروح هناك خلي نروح بيوم هناك

اجتي نوره وحسيتها مو راحه وكفتها يم الطباخ بتعدت شويه منها وما احس غير القوري والكيتلي وكعو وصاحت علياء هي وهند

نوره : يمه يمه غير تنتبهين شبيج ثوله

ما اعرف شصار بقيت صافنه بوجوهم ولكيت نواف واكف يم الباب احس بالوجع بس مدا افهم شنو الي صار خفت اول ما شفت نواف ونوره تصيح عليه وهند تمسح بثوبي اجه نواف وبسرعه كتله

_ ما مسويه شي والله

بجيت ورجعت ليوره مخليه ايدي على وجهي راح يضربني اعرف بيه بس بقيت اكول اسفه خفت منه هواي نزلت ايدي بقه نواف صافن عليه رجع ليوره بسرعه واسمعه يكول لجاسم

نواف : جاسم اخذها للمستشفى بسرعه

🖤🖤🖤🖤🖤🖤🖤🖤🖤🖤🖤🖤🖤🖤🖤🖤🖤

هلوووووووووووووووووووووو حبايب شونكم ان شاء الله تمام 🙏

باركولي اليوم دزيت بحث تخرجي وخلصت منه صح بيه اغلاط بس المهم دزيته وخلصت منه 🤣

ان شاء الله يعجبكم هل بارت لحد يكلي قصير تره 1635 كلمه 😞😞

شكرا الكم لكل كلمه حلوه والله العضيم احسكم صرتو شي مهم بحياتي متعرفون شكد افرح من اشوف منكم كلمه حلوة لو تعليق من صدك احس بشي ما اكدر اوصفه شكرا الكم لان انتو بكل هل لطافه والجمال احبكم والله 🌻🌻
💓🌻🌻🌿