رواية عشگ أهل الجنوب الفصل الثاني عشر 12 - بقلم أسيل

#نواف

من ضربتها لحد هسه ما اكدر اباوع بوجها فقدت اعصابي وياها ما اعرف شجاني و من حجي نوره من ضغط الشغل لو مشاكل العشيره ومشاكلنه ويه الناس من شفت ساره بدت تتمادى ما اعرف شجاها تخبلت من نوره ما اطيقها نوره صح حركه بس ما مسويه شي وعيب اطردها شنو اني و ادخل بسوالف النسوان تالي عمري احل مشاكل النسوان كامت متاكل ولا تشرب اكلها قل كلش وهي متنحسه ما مرتاح بالي من حركاتها وتصرفاتها وخايف عليها ائذيها من عصبيتي بهل فتره نزلت لابسه كلبيه دهر اصابها لونها يلج عليها وجانت تضحك تجامل الكل انا اعرفها كلش زين كامت من الأكل ما اكلت انا هم انسدت نفسي بس كامت راسي وجعني كتلهم اريد جاي اسمع سوالفهم بالمطبخ وضحكم وما اسمع بس صايح هند ونوره وعلياء على ساره وفتت للمطبخ لكيت القوري على رجلها واكع وهند تمسح بالثوب مالتها وهي تباوع بوجهنا وعيونها نملت دمع بسرعه مشيت الها جفلت ورجعت ليوره وخلت ايدها على وجهها وكامت بس تكول اسف جسمي كله رجف من شفتها هيج خايفه مني بسرعه رجعت وكلت لجاسم ياخذها للمستشفى وطلعت من المطبخ والله وجعني قلبي حسيت بغصه عمري وحياتي ما حاسها من قبل جانت تنام بحضني وتكلي اني الي احسسها بالأمان هيج خايفه مني رجعت للأستقبال وكعدت راسي راح ينفجر من الوجع وبعد مده دخلت امي وابوي وبقيه الولد وجاسم باوعت عليه

_ها جاسم وينها

جاسم: صعدت لغرفتها

_وليش ما اخذتها

رسميه : يمه ما قبلت بقت تبجي ورادت تصعد لغرفتها بس مدر شمالها لهل بنيه خايفه

_استغفر الله صبرك يا الله صبرني صبر ايوب وياها

كمت عصبي بسرعه لزمني جاسم وسيف وكال جاسم بعصبيه

جاسم :تراها البنت خايفه منك هاي مو بنت البدو وتقسى عليها افهم ولا هي واحد من اخوانك وتقسى عليهم هيج لا ترعبها وتكرها بيك

بقيت ساكت ما كدرت احجي رجعت لمكاني استغفرت ربي كلامه صح بقيت اشرب جاي واجت زينب وكعدت والبنات هم ونوره ما طلعت من غرفتها قلبي لعبني من هل نوره وكالت

علياء : شون وكع القوري بتعدت عنه ومجانت يمه

هند : نوره تكول شعرها جلب

زينب: لو شعرها جلب بهل قوري جان شعرها حترك من النار مو رجلها

حيدر : تقصدن بنت حميد الي حركت جنتي

زينب :لا لا عمو مو مو قصدي

علياء: لا عمي مو هي ماقصدنه

هند :ما نشيل غيبتها ما شفنه شي بعينا

كلهن كامن بقت بس زينب وبالي كله يمها وشسوي بالغرفه كاعده بوحدها وكالت

زينب : انطيتها دهن حروك بس تره حركها موهين يترك اثر القوري يفور جان وحركه الرجل صح مو مثل حركه القلب توجع اكثر

_شكلج تبسمرين بيه ام موسى

زينب: محشوم يا شيخ الزلم انا ابسمر امداني ومدامك سميتني ام موسى والله ما اسمي ابني غير موسى وبرضات ابوه ان شاء الله

نبيل : دامه كال موسى ما نكول غير موسى

_اكوم اشوفها لهل بلوه وان شاء الله يجي لهل دنيا بسلام ويتربى بعزكم

رسميه: يمه خف عليها

_ يمه والله ما مسوي الها شي بس تأمرين

صعدت للغرفه فتحته وفتت غطت رجلها اول ما فتت مسحت دموعها لابسه كلبيه سوده كصيره تمددت ونامت انطتني ضهرها سديت الباب مشيت وكعدت على الجربايه وابتعدت عني وكلت لها

_شونها رجلج

ساره :زينه

_اخذج للطبيب

ساره: لا

_اوف اوف يا ساره خلصي هل زعل تره ما يسوه كومي خل اخذج اعرف رجلج مو زينه

وخرت الغطه رجلها كلها حمره وبسرعه غطت رجلها لزمت ايدها وكعدتها قريبه مني جانت شفايفها حمر وعيونها حمره من البجي وكالت

ساره : ما اريد باجر اصير زينه اريد انام بس

_الليل كلها تبقه توجعج ادري زعلانه مني تنكسر ان شاء الله ايدي اذا امدها ثاني مره عليج

شهكت ساره وكامت تبجي وغطت وجهة بأيدها وكلت الها

_كافي فدوه لهل وجه كومي يله لخاطري كافي تبجين كومي انا اعتذر بنتي لا تعاندين

ساره :ع عوفني

_تكومين لو لا لا تشلعين كلبي واذا بالليل بجيتي لو سمعت حسج اطردج بره الغرفه فهمتي

عصبت عليها بسرعه خلت راسها بصدري وكامت ترجف وتبجي بدون صوت حظنتها شويه وبس حسيتها هدئت عفتها ترتاح وكمت وكعدت على الكرويته ضوه الحمام جان بس الي مضوي الغرفه واشوف رجفتها جوه البطانيه واسمع بس شهكاتها بقيت صافن اني شبيه تخبلت على هل بنيه كامت بسرعه من الفراش ومشت تعرج للحمام وسدت الباب واسمعها تكح وذبت الأكل الي بطنها كمت فتحت الضوه طلعت الها عبايتها وخليت محفضتي والتليفوني والسويج بجيبي فتحت باب الحمام وباوعت الي وجهة اصفر وعيونها حمر وجسمها كله يرجف وكالت

ساره : وين مطلعني ما طلعت صوت والله بعد ما اطلع بداعه حسين لتطردني

لزمت ايدها جفلت باوعت زندها صاير ازرك من لزمتي ولبستها العبايه ما ادري شجاني بقيت اباوع عليها وهي يم صدري هل واكفه وكلت الها

_اخذج للمستشفى حالتج ماعاجبتني

ساره : لا لا اني زينه والله هاي لان نغثيت شويه

_حبيبتي ساره فدوه لا تعانديني وامشي وياي

خليت وجهة بين اديه ورفعت راسها نزلت الدموع من عينها وشهكت وكالت

ساره : اني مو حبيبتك

_الي يعجبج بس كافي تسوين بنفسج هيج راح اخذج للمستشفى واذا تردين بعد حته للغرفه ما اطب الها بس كافي تسوين هيج بنفسج امشي اروحلج فدوه امشي بنيتي

فتحت الباب وطلعت وهي جانت تمشي على كيف وتعرج ساعدتها بس نزلت الدرج وشلتها جفلت بقت صافنه عليه تكشفت زرورها وبسرعه غطتها وخلت ايدها على جتفي ولزمت بيه بسرعه شافنه جاسم وكال

جاسم : خيرها شصاير

_لا تخاف مابيها غير العافيه بس معاجبتني حالتها راح اخذها للمستشفى

جاسم :اجي وياكم

_لا خليك بالبيت راجعين ما نتأخر واانا اتصل بيك اذا حتاجيت شي

جانت مخليه راسها على صدري ومغمضه عينها انطيت المفتاح لجاسم وفتح لي باب السياره وكال

جاسم : طمني عليها ماعليج غير العافيه خيتي

_لا تخاف ماكو شي بس لا تخليهم برعب

صعدت شغلت السياره وبديت اسوق المستشفى شويه بعيده من البيت الدنيا ضلمه انطيتها بطل مي فتحته وشربت شويه جانت تباوع بره الجامه خليت ايدي على كصتها جانت حاره باوعت عليه وجانت تبجي مثل الطفله وتشهك وكتلها

_خاطر الله كافي والله ما امد ايدي عليج اني اسف اعتذر يا بنت الناس اعتذر حقج على راسي من فوك والي تريديه راح يجرالج بس لا تأذين روحج هيج

هاي كل ما احجي وياها تبجي انوب تبجي بحركه تغطي وجها بيدها وصلنه للمستشفى والطريق كلها تبجي صديقي هناك تلكاني واخذها ومرته وياه خله مرته الي تكشف عليها واني وياه كاعدين بمكتبه دخلت زوجته سمر سلمت عليه وكالت

سمر: هاي زوجتك

_اي زوجتي

سمر: ماشاء الله كمر تستاهلها شيخ بس حالتها مو عاجبتني

_وكعت القوري على رجلها وما قبلت تجي جبتها غصب عاندت بس ما عجبني ابقيها بالبيت

سمر : زين جبتها لان لو مجايبها احتمال يصير عدها حاله تسمم تره حركها من الدرجه الثانيه نضفته الها و انطيتها دوه يخفف الوجع ايبوبروفين وراح اوصف الها كريم مضاد حيوي الحرك مالتها راح يطيب اذا اعتنت بيه زين خلال اسبوعين لو اكثر شويه اما الأثر ان شاء الله ميدوم فحصت زوجتك مو حامل هامله صحتها بدايه فقر دم وتره جفاف قوي بيها

احمد : ولج يا فقر دم كعدت اسبوع يم الشيخ سواني هايشه زدت يمه 3 كيلوات

سمر : لا احمد هاي الي تاكله كاعد تتقيئه ما يبقه بمعدتها وما تاكل زين شكلك مزعلها

_ما اجذب اي والله مزعلها ما اجذب واكول لا

سمر : اي اعرف لان جانت تبجي و كالت لا تخليه يروح ويعوفني

_عمت عيني اذا عفتها لو فكرت اعوفها وينها هل طفله

سمر : انطيتها مغذي ومن تخلصه تكدر اطلعها لا تخاف عليها شويه مصخنه غفت بالغرفه الي بصفنه تلكاها

_رحم الله والديج دكتورة عن اذنكم

🌿 🌿🌿🌿🌿🌿🌿🌿🌿🌿🌿🌿🌿🌿🌿 🌿🌿

هلوووووووووووووووووووووووووووووووووو 🖤

بارت قصير اعرف والله وحقكم بس والله مصدعه صارت اربع ايام على هاي الحاله واليوم بلشت اكتب وجنت بواهسي 😔😞

بس انطو درجات السعي مالتنه وكلش جنت مقهورة من درجتي ب الأنكليزي ف سويت الهم حفله بالكروب وطلعت ضوجتي بيهم وكلت خلي يوصلون للدكتورة يعني انقهر اني تعبانه و يجي واحد ياخذ درجه اعلى مني وهو رجل على رجل 😒😒

بس ان شاء الله اعوضكم احبكم هواي انتو احلى شي صار الي بهل سنه 😁😁✋

شكرا لكل تعليق حلو منكم بس ممكن طلب صغير لكل شخص يقراء ممكن فويت حته اعرف ان اكو احد مهتم بالقصه واكملها الكم 👌👍

ان شاء الله كم يوم وانزل الكم قصه 🌻🖤