رواية عشگ أهل الجنوب الفصل الثامن والعشرون 28 - بقلم أسيل

#ساره

ما كدرت أسامحه ولا كدرت ادعي عليه بس والله والله لاخلي شوفتي بعينه حلم واذا قلبي حن عليه اله ادوس برجلي عليه كل واحد بطريق بعد وحته ضله بهل مكان ما اضل بعد بس المصيبه ما اذكر الباب مال غرفه مسدود لو مفتوح سعد جان على الجربايه وما يتحرك اكيد محد يحس بالي احس بيه اني هسه ضليت صافنه على نفسي شكد عيني قويه بحيث ما ادري ليش ما بجيت لا مو قويه بس ما تنزل دموعي ما ترضه تنزل جمعت اغراضي من الكاع وكفت ومشيت لباب البيت البره همزين جانت تكسي فايته وكفتها الدنيا ليل جانت بس هاي مرتين يفضل نسوان عليه ومرتين يطردني وهل مره ما ارجع اله مشيت والجنطه على صدري التفت للباب للمره الاخيره شفته طلع صارت عيني بعينه مشه بسرعه وصاح

نواف :ردي لا تعيفيني بوحدي

وابتسمت مشه اسرع وصعدت بسياره تكسي شمرت تليفوني بره الجامه شاله نواف والتفت مكدرت اباوع بعد وانطيته للرجال عنوان بيت هاجر وكتله يبقه واكف طلعت الي هاجر مبتسمه سلمت عليه وتبجي اجتني من مات سعد بس ما حجيت وياها وكتها وضليت بس صافنه بوجهة كتلها

_خلي اشوف ولد حسين محب فدوه طلعي اشوفه وجهة

هاجر :فدوه فوتي ليش بالباب اذا ابالج اخوي مو بالبيت والله

_لا والله اريد اشوف وجهة

طلعته بسرعه الي حضنته على صدري وشميت عطره بوسته ضحك ودفعني ضحكت بوجهة ورجعته لهاجر هو يباوع عليه ويضحك وكتلها

_امانه بركبتج وليد حسين ما اوصيج بعد

هاجر:ساره تعرفين قطعه من جبدي حبيبه قلبي شبيج

محجيت شي سلمت عليها وبوستها وصعدت بالسياره ودليته على بيت حسين نزلت واخذت مبلغ حسين جان عايفه الي ب البيت ورجعت ويه الرجال جان جبير ومتدين كلش ما عرف شنو قصتي بس خطيه كال ما اعوفج اني اوصلج لبغداد و صدك الطريق كله يكلي محتاجه شي بنيتي واني اتشكر منه وصلت لبغداد وانطيته فلوس ما قبل بس توسلت بيه وانطاني رقمه اذا احتاج شي خليته يمي فتت للبيت مال امي اول مره من بعد روحتي ويه حسين ما اجيت ولا شفته هنا محد يدري بمكانه يعرفون عد امي بيت ببغداد بس محد يدري وين المكان ب الضبط بقيت واكفه كبال الباب اشتاقيت بهل لحظه لبابا وماما وحسين تمنيت اني وياهم ولا هل ذله الي عايشتها فتحت القفل مال باب قديم الباب ومزنجر بس بعده حلو فتت للحديقه همزين الدنيا صبح جانت الحديقه عباره عن غابه جانت شجره الرارنج محمله كومه شفت الرمانة كبالي وجبيره كلش جانت ضحكت من شفت الرمانه تذكرت قصه علياء وجاسم كالت الي نواف يحب الرمان وانا ادري بيه جنت افرط اني الرمان اله وكل ما يشوفني يجي يبوس اديناتي وهي متروسه مي الرمان ويكلي مثل العسل درت وجهي جانت العنبايه ماكله الحديقه من كبرها صلاه النبي يمكن الجوارين يفتحون مي الها والمرجوحه بعدها هنا حسين جان يكعدني ويهزني ويكلي راح تنكطع بيج واضل ابجي وهو يضحك فتحت الباب البيت كله تراب و وصخ جان والجام مكسر فتحت الابواب والشبابيك حته يتغير الجو خليت اغراضي بغرفه نوم ماما وغيرت لبسي وطلعت والجنطه بيدي عندي بس ٥٠٠ الف جوه ايدي بديت اتمشى بغداد ما اعرف احد هنا بديت افوت للمحلات بلكي احد يحتاج شغل كلهم يكولون لا منحتاج منريد وكفت كبال مقهى جان طابع فرنسي بس بغداد حسيت بفرحه صغيره من شفت هل مكان متغير وحلو صاير فتت المكان هسه جان مفتح كعدت واجه ولد انطاني القائمه كعدت اتفرج شموجود جنت جوعان وبردانه وطلب ككو حار و كيكه بالكهوة بقيت صافنه عليهم من جابهم جان سمعت بس واحد يكول

الرجال:راح تضلين صافنه متاخذين صوره الهم وتنشريها وتسوين دعايه النه

التفت اله جان تقريبا بعمر نواف لو جاسم بس مرتب طويل ابيض واشكر ابتسمت ونزلت راسي شربت الككو دافي جان وفاتت بنيه وكالت وهي تنكت ملابسها لان جان تمطر بره وكالت

البنيه:ليش عفتني ورحت صدك تحجي

الرجال:اذا انتي مثل التنبل بس نايمه شبيج يحظي

البنيه:تره البارحه الشغل كله عليه صار مال محل عسى مرتك حبله قبل لا تزوجها

الرجال:سمره لج صوتتتج

التفت عليه ونزلت راسي سويت نفسي ملتهية بالكيكه وبقيت كاعده لحد ميوكف المطر شويه وبقيت صافنه بره الشباك خليت راسي على الميز ومحسيت بس البنيه مخليه ايدها على راسي فزيت بقيت اباوع عليها والرجال كاعد وره القاطع وخلت حليب دافي على الميز وقطع بسكت وكالت

البنيه:بيج شي محتاجه طبيب

_ل.لا لا اسفه نمت ما ادري بس هسه جايه من الجنوب وطلعت بوجهي ادور شغل قريب من البيت ما حسيت على نفسي اعتذر

البنيه:مو من بغداد انتي

_لا من الجنوب بس اني عايشه طول عمري بغداد وقبل فتره اضطريت ارجع للجنوب وهسه رجعت هنا

البنيه:ليش

ما حجيت شي ونزلت راسي سحبت الكرسي وكعدت كبالي جانت طويله وشعرها اسود مي وشفايف منفوخه وخشم صغير وسمره كلش حلو شكلها وخلت الكوب كبالي والبسكت هم وكالت

البنيه:اني سمره وهذاك اخويه عمر شوفي احنه جنه عايشين بدبي بس قررنه نرجع نأسس وكاله قهوة هنا خاصه بينه وبديناها بغداد وان شاء الله توصل لكل العالم ابويه وامي عايشين بدبي بعدهم بس اني وعمر اجينه هنا وشالع قلبي بس عايف الخدمه عليه ما متزوج اخوي واني مخطوبه وانتي شنو وليش رحتي اذا حبيتي تحجين بس راح تحجين لان رشيتج بخلطتي الذهبيه حليب بالكراميل

_جنت عايشه بالجنوب اني وبابا وماما وأخويه حسين جنت كلش صغيره ماما من بغداد اجيت لبغداد بس توفه ابويه بقيت هنا اني وماما كبرت بغداد واخويه حسين ضل هناك عايش جانت هاي رغبته يجي بين فتره يحب يزورنه وما مقصر ويانه باي شي و وره ما تمرضت امي وماتت اجه حسين اخويه واخذني يمه بالجنوب رحنه كعدنه تزوج حسوني الي صار ابويه وامي مرته اسمها هاجر و صارت حامل احلى ايام عشنه بيها فزيت على وفاه اخويه قبل لا يشوف ابنه الي جان بعده ابطن امه وراها تزوجت بواحد غريب حبيته حبيته حب مو طبيعي حبيته من كل قلبي عوضني على كل الحنان الي جان ناقصني واهلة اهله عيشوني بأحلى عيشه ما قصرو وياي بشي دللوني دلال ويحبوني كلهم ما شفت منهم اي شينه

سمره:يروحي انتي فدوه شكلج حبابه تستاهلين هل شي

_لا ما استاهل و اجاني ولد سميته سعد وسعد كبر صار سنه واربع اشهر سعد خلاني احس بكل معاني الامومه سعد ترس حياتي سعاده سعد خلاني اسعد انسانه بهل دنيه خلي اشوفج صورته

ايدي ترجف طلعت صورته من جزداني بحضني شافته وضحك وكالت

سمره:صلاه النبي عليه الله يحفظه ويطول بعمره لج شون عيون شون جمال هذا كزكزت والله شوفه عمر ينوكل اكل

عمر :صلي على النبي شبيج راح تحسدين الطفل

_تشبه عيون ابوه شايل جمال وعصبيه ابوه تخيلي المفروض الاسبوع الجاي نطهره لهل وكيح بس ما اتذكر سديت الباب لو بقه مفتوح وكع من الدرج ومات قبل اربع ايام

وكع عمر السراحيه من ايده وجانو ورانه اكو بنات كاعدات بصفي صغار شكلهم شايلين ملازم وكتب وحده منهم تمسح دموعها ومنزله راسها سمره لزمت ايدي كل قوتها ومصدومه ابتسمت وكلت الها

_ما كدرت ابقه بهذاك المكان رجعت لبغداد هنا ابدي حياه جديده وحدي احسن

سمره:و زوجج

_ ماتو كل الي احبهم و راح يموتون غَيرهم وراح ينحرك قلبي اكثر، واني راح اموت عن قريب أو بعيد، فعلى شنو ازيد مِن عذابي و وجع قلبي خلي اموت بوحدي احسن شي اني مغناطيس للموت كل الناس الي حبيتهم بحياتي ماتو

سمره:ليش تحجين هيج انتي ماعندج ايمان برب العالمين؟

_ عندي بس شسوي عادي يعني هذا الي صار جنت احتاج احجي لشخص شكرا لان سمعتي الي

عمر:تشتغلين ويانه ؟

_استاذ ما يحتاج تشفق عليه بس جنت اريد احجي وهذا هو حجيت وخلص

سمره :لا صدك عوفيج من كل قصتج محتاجين احد ويانه الصبح وحدي وكلش اتائذه وانتي مبينه شاطره ونعلمج على المكونات بسرعه مو صعبه وصفاتنه والله شوفي ب الايام الي مابيها شغل ابد ننطيج ١٥ ب اليوم و اذا اكو شغل ٢٥ الف ب اليوم واذا شغل هواي ٣٥ لو ٥٠ ب اليوم والله صدكيني مراح نقصر وياج شوفي كتلج مشروعنه جديد والله راح ترتاحين ويانه واذا لا اذا تعرفين احد يشتغل انطينه خبر

البنيه :واذا بديتي اداومين راح اجيب كل صديقاتي هنا كل ما نطلع من المحاظرات نجي ومنعوف المكان شوفي اني سمعت قصتج والله والله هسه الله يعوضج لا تصورين ممكن الله بيوم من الايام راح يخذلج كل هذا اختبار من عنده صح اني غريبه بس والله اني احجيها الج جنت ما عندي ايمان برب العالمين استغفر الله صار عندي مرض خبيث وكتها وردت اموت بس معجزه صارت والله رجعني بعافيتي وتعالجت من المرض وشوفيني هياتني ومن يومها عرفت رب العالمين ما يخذل احد بس انتي خلي ثقتج بالله جبيره

_ونعم بالله شكرا الج حبيبتي وربي ينطيج الصحه ويوفقج بحياتج ان شاء الله الله يعوضني يعني ابلش شغل من باجر؟

عمر: اي

سمره:ايييي ب ٩ ونص نفتح المحل

_ب التسعه ونص اني راح اكون موجوده

تشكرت منهم هواي وكمت دفعت الحساب ما قبلو بس اصريت من حجيت تصورت راح يرتاح قلبي بس حسيت بوجع مو طبيعي بصدري حسيت نار شابه بصدري تسوكت منظفات ونواقص البيت لكيت ابو جام وره ما سئلت عنه اتفقت وياه العصر يجي للبيت و وياه ابو لحيم كال اني ادبر الج ابني ابو لحيم واخذت جهاز تليفون يسمونه صرصره حته بس ادبر حالتي بيه واخذت رقمهم ورجعت للبيت بديت انظف بالبيت ولميت الفاكهة الي بالحديقة كلها الله رزقني بأكل برتقال ورمان وليمون وعنب جمعتهم وغسلتهم ما حسيت بس الساعه ٥ العصر والرجال عمو جلال اسمه اتصل بيه وفتحت اله الباب رجال جبير وبده يصلح الي الجام المكسور وكلت ل ابنه يخلي الي حدايد على كل الشبابيك الصراحه خفت احد يفوت لو شي بس حته ارتاح سديت فتحات الشبابيك الجبيره وسوالي القفل مال ابواب وتشكرت منهم رجعت انظف حسبت الفلوس بقه عندي بس ١٠٠ الف جوه ايدي فرغت غرفه امي ونظفتها وغسلت كلشي من بردات وزوالي وشريتها وعزلتها وتمددت شويه فزيت حلم مو حلو ما ادري بس ليش صوت بجي سعد باذني طلعت بطانتيه بعده عطره بيه.....

هاي مرت تلث اشهر واني اشتغل بالمحل وشغل بالبيت بالمحل ارتاحيت كلش ويه سمر والأستاذ عمر ناس قمه بالأخلاق ويعاملوني احسن معامله واني ما مقصره بالشغل عمر يسولف ويايه اغلب الوقت واني جنت كلش رسميه وياه بالنهايه اني بعدني على ذمه نواف والناس حبو المكان وبده ينرزق يوم بعد يوم اما البيت عدلت الحديقه وزرعت بيها ورد وليمونة وبرتقالة نوب شافني فلاحنه القديم كاكا وائل يابه شكد فرح من شافني كال صايره نسخه من امي سوه الحديقه الي كتله كل شهر مره يجي يهتم بالحديقه مثل قبل صبغت الباب مال بيتنه البره رصاصي ونظفت كل الغرف مال بيت بعت كل الاغراض الزايده الي بالبيت و اشتريت ثلاجه جديده صغيره بالفلوس الي بعت الاغراض بيها يعني فرغت البيت بقيت ذكريات اهلي المهمه بيه وكم قطعه اثاث اشتريت بردات جديده بيضه شيفون احب يبقه البيت مضوي الصبح ما دريت اي ش عن نواف ولا وصل الي ولا اني حاولت اتواصل ويه احد اختفيت كلش من حياته خلي مرتاح شون ما يريد اني معليه بعد بيه خلي ينسعد ويه غيري جانت هل أشهر كلشي بيها متعب بس حته لا افكر اشتغل ب البيت كل يوميه كل يوميه اغسل البيت من فوك ليجوه لحد ما انهلك تعب بس اتمدد بالفراش ما احس على نفسي واكعد ب ٨ الصبح اروح للمحل انظفه مع ان الشغل بس اسوي حلويات بس اني هل شي يريح قلبي الشهر الي فات بديت اعاني من صداع مو طبيعي وبين فتره وفتره يزيد وصعوبه بالاتزان بحيث مرات بالكوه امشي واسيطر على جسمي جنت اسوي كهوة عزلنه المحل بس سمره كالت خلي نشرب كهوة شربت كهوة لعبت نفسي ركظت للحمام وتقيئت مكدرت اتحمل فعمر جانت عينه عليه وكال

عمر:حامل

_لا مستحيل هل شي بس احتمال مستبرده عن اذنكم

عمر :خلي اوصلج

_لا شكرا باي سمره

سمره :خلي اجي وياج حالتج مو تمام

_لا شكرا اني اطمنج عني

وطلعت من المحل واتجهت للمستشفى الطريق كله افكر شنو بيه ليش هيج مستحيل حامل مستبعده هل شي استبعاد تام وصلت استقبلني دكتور ايفان دكتور مسيحي اول مره شافني ابتسم وكال

ايفان:وجهج جميل يستحق الابتسامه

ابتسمت بلطف اله لان جان كلش طيب من شكله بده يسألني شنو اعراضي وكتله

_راسي يوجعني بشكل مو طبيعي تلعب نفسي ودوخه و احس بخدر ب اطراف جسمي صعوبه بالاتزان

كام الدكتور وفحص عيوني وتنفسي وجسمي وسألني اذا متزوجه وشرحت اله اني وزوجي على وشك انفصال وكال الي اروح اخذ اشعه لكامل جسمي وسونر وتحاليل دم نزلت للطابق الاول وديت الورقه لواحد انطاها لدكتور الاشعه دخلت دكتوره وغيرت لبسي و رخيت الحجاب وتاكدت ما لابسه اي شي حديد او اكسسوارات اول مره انزع الكلاده الي يحبها سعد مردت اعوفها بس هاي الاجرأت اخذولي اشعه وره نص ساعه انطوني اياها كملت بقيه التحاليل وصعدت لدكتور ايفان ودكيت الباب وفتت جانت يمه بنيه بس التفت جانت سمر ضحكت وكامت حظنتني واني هم ابتسمت وكالت

سمر:مرت الشيخ نواف شونج اخبارج

_بخير الحمد لله هاي على الله انتي شونج اخبارج

سمر:سمعت بالي صار اني واحمد اسفه والله جنت بره اعذريني على الي صار وما اجيت

_لا ابد لا تهتمين

سمر:هسه الله يعوضج صدك شعندج هنا شنو الدكتور ايفان شنو القصه

ايفان :هسه نشوف

اخذ الملف مني وبقت تسألني شوني وليش هنا وشوكت ارجع ونواف شونه كتلها انفصلنه تخبلت وتريد تعرف السبب وكتلها رأسا ما اريد اعرف شي عنه ولا اريد يعرف عني شي التفتت علي الدكتور الي ملامحه جانت ما تفسر رفع رأسه....

إيفان :انتي لازم تتواصلين ويه رجلج

طلعت من المستشفى مفصوله عن الواقع كلشي هدوء الدكتور شرح الي الموضوع ورحت للبيت كملت تنظيف واني هادئه ما اكلت شي وغفيت من الوجع الي بصدري على الجربايه وما حسيت بعد بنفسي ....

🦋🦋🦋🦋🦋🦋🦋🦋🦋🦋🦋🦋🦋🦋🦋🦋🦋

هلاااااا هلااااااا ان شاء الله يعجيكم البارت وحد تكول نص بارت ولا صغير ولا قصير ولا شوكت تنزلين بارت

انزل بارت كل ما يصير التصويت فوك ال ٢٠٠ وكل يومين او بين يوم ويوم

والي تكول لا تزوجين والي تكول موتي والي تكول لا تموتين تره بالقران القصه كاتبتها ومخلصتها بس مرات اعدل بعض الاحداث او الاخطاء الي عندي ف ما اكدر اتلاعب ب القصه واخرب واجفص ب الاحداث يعني اقرو واستمتعو ب البارت  وشكرا جزيلا 😂😂🦋