رواية عشگ أهل الجنوب الفصل السابع والعشرون 27 - بقلم أسيل

ابتسمت واشرت الي من عيونها وغطتها نجوى حسيت بيها غارت ما ارتاحيت الها رادت تاخذ سعد من حضن ابوي وسمعت ملاك تكول لأمها على كيف

ملاك :ماما متقبل ساره هسه تتخبل وهي مريضه

كامت علياء بسرعه وأخذته جان نايم وكالت بنوع من الجفاف لنجوى وسعد بحضنها نايم

علياء :ما يحتاج تعبين نفسج هذا ولدنا اليوم اخلي يمي شيخ مشتاقين اله انا وجاسم وانت ارتاح محتاجين شي

ابتسمت وتشكرت منها كامو وره شويه كل واحد لغرفته وطفو الضوه بقيت كاعد جسمي تشنج بس والله ما اوخرها واخليها تفز مشتاق الها ضليت العب بشعرها مخبله والله ماتدري بيه شكد احبها واحسها قطعه من قلبي خليت اصبعي يم شفتها حركت راسها منزعجه فزت بسرعه وفتحت عينها لازمه بدشداشتي كل قوتها نفخت علي يسرتها تلث مرات وكالت

ساره :أعوذ بكلمات الله التامات من غضبه وعقابه ومن همزات الشياطين وان يحضرون أعوذ بالله من الشيطان الرجيم أعوذ بالله من الشيطان الرجيم أعوذ بالله من الشيطان الرجيم

اخذت نفس بالكوه خليت ايدي على كصتها مصخنه باوعت علي عيونها كلها دموع وكعدت بسرعه وكالت

ساره :سعد وينه عدها

_عند علياء

رادت تكوم لزمت ايدها وباوعت علي بنضرات عتب مو طبيعيه ايدها ترجف وكلت الها

_عند علياء والله كالت خلي ترتاح ساره والساعه 3 بالليل مو مال تكعديهم بهل وكت

هزت براسها ايدها ترجف صبيت كلاص مي لزمته هو وايدي شربته كله وتغطت عدل جان تخلي راسها على يده الكرويته لفلفت نفسها وضلت تباوع عليه واني هم مكدرت اشيل عيني منها نمنه على الكرويته وهاي طلع الصبح وساره خلصت اليوم هي تشتغل وتعتني بسعد وهامله نفسها وانا اليوم ما طلعت من الشغل جان سعد فوك وهي تغسل الرضاعات جوه فتت للمطبخ وكعدت سويت حجتي اريد جاي خلت ايدها على رأسها ودنكت فاتت هند وخلت ايدها على ضهر ساره وكالت

هند :يا حبيبيه قلبي خلي اني اساعدج بشي لج وجهج كركم صاير

التفت وشافتني جان نسمع صيحه امي وطبه بقويه ركضت واشوفها تضرب على صدرها بلعت ريكي بالكوة حسيت نشف دمي وانا اشوف سعد بالكاع مكتوم حسه طلعت ساره بس شافت سعد لزمت بتي شيرتي من ظهري بكل قوتها الكل جامدين ركض جاسم وكع بالكاع يمه وشاله بين ايده الولد تايخ وحسه مكتوم وصاح بعلو صوته

جاسم :لكم جيبو السياره شمنتضرين السياره بسرعه

صيح جاسم بعلو صوته ركض سيف وطلع جاسم وراه وبيده سعد صاح عليه امشي بس جنت مو بوعيي وشه بأذني مو طبيعيه سحبني نبيل ساره لازمتني كل قوتها التفت عليها فاتحه عينها بصدمه وتباوع على مكان سعد جسمها يرجف فك نبيل ايدها وسحبني صعدني بالسياره وجاسم الي كاعد بصفي وبحضنه سعد جان يضغط على صدره ويصيح على سيف يسوق بسرعه وصلنه اخذوه الأطباء من ايد جاسم نشف ريكي لزمني جاسم من جتفي باوع عليه ابتسم بوجهي يريد يطمني التليفونات مالتنه ما سكتت طلع الطبيب وكال

الطبيب :الله يعظم اجركم واحسن الله عزاكم الله يصبر قلبكم البقاء لله الولد جاي مكسوره ركبته الله يصبر قلب ابوه وأمه

جاسم :لا لا لا تشاقه لا شوفله جاره شنو شنو مات انت تسمع شتكول

سيف :ابوس ايدك كول غيرها نبيل احجي وياه مو صديقك

دنك نبيل راسه من بجه وباوعت على جاسم الي ركع راسه بالحايط كل قوته ضحكت وكلت وكمت ما اشوف بعيوني

_الله اختبرني بولدي اثنينهم يعني ماكو سعد بعد بحياتي يعني ريحته منو يضحك بوجهي ربي بعده وجع وليدي ذاك بقلبي ما طاب جاسم شون أكلها لساره راح سعد يعني لا ابو سعد ولا ابو حازم صرت جاسم خويه قلبي يوجعني شسوي

كعدت بالكاع ما كدرت اضل واكف نزع غترته من ركبته وغطه راسي بيها بقيت بالساعه كاعد وبصفي جاسم بجيت احترك قلبي والله خلص حيلي ورحت دفنت وليدي بثنين اديه كال جاسم هذا احسن لكل لبيت محد جاوب على التليفون سدو كل التليفونات سيف يبجي ماكدر يصبر قلبه يتعارك نبيل وياه ويسكت يرجع يبجي نبيل ويمسح بعيونه جاسم الطريق كله دموعه ما وكفت (تره اني اكتب وابجي هم) جاسم كل شويه يهون عليه ووكال

جاسم:خويه المبتلين من المسلمين الهم اجر ومكانه عند رب العالمين وكالها النبي محمد صلى الله عليه وعلى آله وصحبه أجمعين وسلم تسليما بالحديث عن البلاء من سألوه عن الابتلاء

قال الأنبياء ثم الأمثل فالأمثل يُبتلى الرجل حسب دينه فإن كان دينه صلبًا اشتد بلاؤه

وهذا الحديث الشريف يحجي عن بموضوعين أساسيين ، الأولى أن أشد الناس بلاءًا هم الأنبياء ثم أمثالهم ويُقصد بذلك أهل الابتلاء من المسلمين

أما الموضوع الثانية أن الصبر على الابتلاء جزاؤه مسح خطايا العبد.وماكو ابتلاء أصعب من فقد الولد، وماكو أي شيء يمكن أن يعوض المرء في الدنيا على خساره ولده وهو ابتلاء عظيم إذا صبر عليه العبد أجزاه الله عنه في الدنيا والآخرة.

_خويه انا مو نبي والله يبتليني بولدي اثنينهم جاسم شسويت انا عند الله

جاسم :نواف خويه استغفر ربك

_يوجعني جاسم قلبي يوجعني

ركن سيف السياره ونزل يبجي فتحت الباب وكعدت بالكاع بجيت ما كدرت اصبر نفسي احس الهوة الي كاعد أجره يخنكني ساعدني جاسم غسلت وجهي وصعدت بالسياره وغطيت وجهي الطريق حسيت بضعف حسيت بوجع انا شراح اكول لساره انا ليش هيج حظي الطريق كله مغطي وجهي وصلنه للبيت فتحت الباب عاينت على جاسم واشرت اله مشه قبلي طلعن البنات وابوي وامي جاسم فوتهم وكالت امي بعصبيه

رسميه :كواويد جلاب ما تجاوبون تريدون تموتوني تريدون تجلطوني البنيه ما تحركت من مكانها ما تكوم من الدرج من رحتو ما فاتحه حلكها بكلمه

حيدر :بويه وين الفريخ

علياء :بقه بالمستشفى شبيه سوده عليه بس لا عمليه احتاج لو شي

هند :احجو شي

زينب :لا تشتاقون ويانه تره

جاسم :الله يصبر قلبج خيتي الولد ندفن يم اخوه بالنجف والله يعوضج ويعوضك خويه

باوعت على ساره بقت صافنه بوجهي منتضره مني احجي شي تباوع بصدمه رجعت تباوع على الولد جاسم عيوني غوركت بالدموع امي صاحت وعلياء لطمت على خدها وزينب على صدرها هند مشت ما مصدكه مخليه ايدها على حلكها وكفت يم سيف وتكله

هند :بداعه دعاء احجي الصدك لا توجع قلبي

بجه ودنك راسه وابوي استغفر الله وشفته يمسح بدموعه وكعت الرضاعه من ايد ساره وكالت وهي تصعد الدرج

ساره :رايحه فوك اعزل الأغراض ما جوعانه اكلو انتو قبلي

بقيت كاعد على الدرج وامي ما سكتت بجي وتنعي البنات يصعدون وينزلون اجه جاسم وكال

جاسم :اصعد يم مريتك علياء تكلي كاعده ما اطلع صوت ولا تسوي شي نوب لا تسوي شي بروحها

صعدت ثكيله الخطوات صارت علي بيا وجه اواسيها لو اواسي نفسي انا الي نحرمت من ولدي الاثنين وصارت نجوى كبالي وهي تخلي ايدها على جتفي

نجوى :الله يصبر قلبك

وخرت ايدها وفتت بدون ما احجي وياها وسديت الباب وجانت ساره كاعده بغرفه سعد لازمه ملابسه وتعاين على جربايته الغرفه ضلمه ما كدرت احجي وياها شي .... مرت اربع ايام ساره ما تنزل البنات يصعدن الاكل الها مرحبا ما تاكل شي قليل وتصلي وتستغفر ربها صوتها ما ينسمع البنات يحجون وياها امي ماكو ردت احجي وياها بس ما تعاين بعيوني وصوتها ما ينسمع فتت مخنوك وشفتها تلم أغراضها بجنطه صغيره كلت الها

_وين رايحه

مجاوبت نزعت كل الذهب بس بقت كلاده بيدها والحلقه وخلت هويتها بالجنطه وسحبت ايدها بعصبيه وكتلها

_كتلج وين رايحه

ساره :راح الي جان جامعنه

صوتها مبحوح وجانت مبتسمه وجهة اصفر دمعه وحده من عينها ما نزلت من وفاة سعد لهل يوم ولزمت جنطتها وسحبتها من الغرفه ونزلتها وصاح سيف باسمي وعلياء تكلي اهداء فتحت الباب ودفعتها وشمرت جنطتها وصحت بعصبيه

_بعد ما الج دوسه رجل بهل بيت لا اريدج ولا أريد شوفه وجهج بسببج بسببج مات سعد وكع من الدرج لان ما تذكرين الباب عفتيه مفتوح لو مسدود و وكع وليدي هسه لا انتي ام ولا انا اب وانتي كلتي الي جمعنه راح الله أخذه وعسى الله شون ما أخذه ياخذج وياخذني وياكم روحي ولا ترجعين مره ثانيه

ساره : اتمناك الشخص الوحيد الي ما تلوحك مغفره وتضل طول عمرك مقهور قلبك علينه انا وسعد

طبكت الباب كل قوتي كمت ما أكدر اخذ نفس ابوي وامي طلعو من البيت لأن ابوي كلش تعب ونقهر كلهم يباوعون عليه راد جاسم يطلع وصحت بعلو صوتي

_والتراب الي نامو بيه ولدي حازم و سعد إذا أحد اشوفه حاجي ويه ساره بدون موافقتي اله اتبره منه ليوم الدين وحق لا اله الا الله اذا احس لو اعرف واحد فاتح حلكه بحرف وياها لو رايح الها للموت ما ارضى ولا احجي وياه ومن اليوم ساره بطريق وانا بطريق....

🍀🍀🍀🍀🍀🍀🍀🍀🍀🍀🍀🍀🍀🍀🍀🍀

🙂

ما احجي شي لان اخاف منكم وما اضمن راح تبقون تحبوني وره هل بارت 🙁 بس صدك جنت وكتها اكتب البارت وابجي لان ب الضبط نفس الاحداث الي صارت ب انسانه جدا قريبه مني طريقه موتت ابنها بهل طريقه ☹️