رواية عشگ أهل الجنوب الفصل الخامس 5 - بقلم أسيل

رسميه : يا جلاب يا كوواويد تضمون عليه وانت انت الشيخ ما تكل للي خلفتك وتعبت عليك تضم عليها ولك انا الي شربتك حليب من ديسي سنتين اضم عليه

سيف : وج يمه يمنه ضيفه يمه فضحتينه لا تغيرينه كل مره مشربته حليب مشربتنه حليب لو ندري جان شربنه حليب من الهايشه ولا هل ذله

رسميه : انعل شرفك يا كواد انت انت النغل

نبيل : والله يمه انتي ادرى اذا هو نغل

ابوي يضحك واني هم من تجي الحجيه تترس البيت الله يخليها النه جان تخلي ايدهاعلى صدري وتمسح بيه وتبوس بيه حضنتها وبست راسها وكالتلي

رسميه : يمه يمه وليدي مابيك شي

_ يمه منو خبرج بهل شي

رسميه : الوادم كلهم يدرون ولك ليش ما كتلي يمه بعد قلبي بيك شي يوجعك شي

تبوس بيه وتحضن بيه شما اكبر بعدني بعينها نواف الصغير واول فرحه الها يمه بعد قلبي والله مشتاق الها شما اكبر احن الها واحن لكل شي بيها صوتها الصبح طبخها ضحكها اصلا شوفتها كاعده بالبيت تكفي

_مفتقدج والله يا يمه وشوفيني مثل الأسد كبالج مابيه شي بس ها جناينج كلهن يتمطرحن بغيبتج لعبن لعب بينه

رسميه : امهات الوصخ انا الجن يمه من هاي الكيمر تعالي بعد قلبي منو انتي بويه يمه ولك حيدر تزوجت عليه شهل حوريه مين منزله من الجنه انتي

رسميه:اعرف ما تلوكين الا لنواف وليدي تخبلين

_ وج يمه يمه هاي ضيفه لا تتزوج ابويه ولا تزوجني

جاسم : هو ابويه بيه حيل يتزوج عليج

رسميه : انطم انت ولا جلمه ابو صماخ جا مني انتي

ساره فاتت بنص هدومها تستحي تضحك وتستحي تحجي شي تباوع بوجوهنا ومشت امي نزعتها الحجاب تجر بشعرها وتكول مو بوستيجه جنه حرير يا بويه وفتحته حلكها وجعصت خدودها وانا بسرعه

_ يمه هدي البنيه بس خلي نفهمج

رسميه : متزوجه يمه انتي

ساره : لا عمه ما متزوجه

رسميه : يمه فديت العمه بحلكج سنونج جذابيه يا يمه

ساره : لا والله

وفتحت حلك البنيه ضحكو وبسرعه مشيت وسحبتها وقبل لا اسحبها جعصت صدرها وهل جفلت البنيه وصارت حمره جنها طماطه استغفرالله ضحكن كل الجناين وسويت نفسي ما شفت شي هل ضحكو كل الزلم وكالت

رسميه : ناخذها للخير مرت الخير هاي

_ وج يمه هاي اخت حسين بس اكعدي

رسميه : يا بعد قلبي يمه هلا بيج تعالي احبنج

مشت سارة وباست ايد امي وامي باستها من خدوها وكالت

رسميه : انتي بنيه حوريه سبحان الله جنج امج يبعد قلبي الج طول العمر وين حسوني قلبي ماهو هني ادري بي يحب السياح من ايدي امهات الوصخ كومن كومن جيبلي طحين التمن خلني اسوي اله وشون دهن حر جبتله خابره نواف خلي يجي يمه ها شمالج تبجين

باوعت عليها والدموع يصبن على وجهها ومسحت وجهي بيدها

رسميه : شبيها يمه يمه تره انا ما قصدي شي من جستج اخذتي بخاطرج

ساره : لا لا عمه مو مو هذا

تغص بكلامها وبالكوه تحجي و واكفه محد كدر بينه يكول شي جان يجاوبها ابويه

حيدر : ام نواف حسين نطاج عمره

ضربت على صدرها امي لزمت ايدها مو زين على قلبها ونزعت شيلتها اختنكت واحتاريت بين امي وبين ساره بدت تشهك وفاتن البنات لزمنها وكعدنها وصبت ساره كلاص مي ل امي وايدها ترجف ولزمتها امي وحضنتها وبدت تنعي طلعت بره ما اتحمل امي ولا اتحمل اشوف دموعها ودموع هل بنيه واسمع بس صوتها طلع جاسم وكف بصفي وطلع جكارته ما يشرب كدامي ابد الا اذا جان مخنوك اخذت الجكاره من ايده واخذت نفس

جاسم : حسين موش اي صاحب

#ساره

عمه تناعي مخليتني بين ادينها وراسي على صدرها ريحتها تجنن تذكرني بعطر ماما تبجي طلعت روحي بنعاويها وصوتها الي يبجي الحجر الجناين كلهن كعدن يم رجليها يبجن وسيف ونبيل وابو نواف كاعدين

رسميه : يمه يمه صابك علي يلصوبيته جيته غفل لو خبريته

هلالي هلالي

جهبت الدار بس محد هلالي

اعتبت بس غاب كلتلي هلالي

شينفع بعد لو دمعي هلالي

وانه ادري فراكك مطول علينه

فركتك تكلف عليه وتنهش بحيلي نهش

هيج محد لجم كلبي صاحي مابيه هرش

تقصر اسنيني من اذكرك ومنجل فراكك بالمخضر يحش

سالفه سوانه فقدك منها حته الكلبه ميت ينخدش

مثل طبعك وين نحصل يمه ابو روح الحنينه تارسه عيونك معزتي وداك اسمي هناه نقش

مو وفي ولك يمه منو بينه وفي وليهسه عايش كون هسه ولدي احذاك نايمين وانا الي واشم عطرك وانتعش

حيدر : استغفري ربج ام نواف امر الله

رسميه : حرك قلبي حرك قلبي اسكت هذا العزيز ابن العزيزه ولك هذا حسين الي يركض يحب اديه من يشوفني امانه حوريه ولك اروح فدوه لاسمك يا الله ابجو ابجو ابجن ولك

عازه لك بيه شكبرها عازة مضيف امجهوب وضال بعازة فرش

موتو موت ولك نواف يا يمه شون ما تكلي

يالتفجد صديجك شنهي ضلتك من وراه

راح عمرك عكبه يخلص آه وتباريها بآآآه

آنا فاكد عيني يمه احس واحد من ولدي فاكدتهم اخ يا حركت قلبج يا رسميه نهجم بيتج يا يمه وين جتاله اريد اشرب من دمه

حكي كون من اجهش بالبكاء

ونوا ونوا ياولدي عندي ابن للحياة انطه كفاه

عيوني بهجرك ولن وديلي من هدومك خيط

*⭐ *ملاحضه هاي الكلمات نعي ل (مرتضى حرب ) اسمها (هلالي) كل مااسمعها لا اراديا ابجي تحجي عن صديقه الي توفه اول مره سمعت كلماتها بيبي كالتها كل متفوت لبيتنه لان والدي متوفي الله يرحمه ف دائما تنعي من تشوف مكانه خالي بيبي ام امي طبعا لان تحبه كولش الي يحب خلي يسمعها ويفهم قصدي هواي حجيت هههه 🖤

_ قلبي وجعني وانا اسمع ام نواف وزينب تسكت بيها

زينب : عليج الله بروح ابيج سكتي يمه البنيه راح تموت فدوه ام نويف فدوه رحت الج اسكتي لخاطر هل بنيه وو قلبج مو زين على قلبج ساره فدوه والله نخاف عليها ساره سكتي انتي هم بروح الغالي حسين

وخرت شويه شفت وجها انكلب اصفر خطيه والله محروك قلبها اكثر مني وبقيت ابوس بيها اريدها بس تسكت اتوسل بيها وبقت تتحسب وصاحت على نواف دخل نواف اباوع على جاسم عيونه مليانه دموع سيف ونبيل بجو والله ما جنت اعرف هلكد حسين عزيز عليهم ونواف ساكت مثل الجبل بس انا اعرف الي يسكت حزنه اكثر يأذي من الي يطلعه وكال

نواف :ها يمه

رسميه : يمه منو كتالين وليدي حسين اخذت الثار لو لا شون يكلولي حادث

نواف : لا يمه مو حادث سالفه الكاع الي باعوها ورديناها لليتامى انا وحسين جانو متكصديني وحسين حماني وخله ساره بأمانتي

رسميه : وشنهي وصيته راد شي قبل موته

نواف : يمه طلب ساره تكون بأمانتي ومرته هاجر و وليده علي

رسميه : سوده عليه

جاسم : اي كمل وشطلب منك

رسميه : شنهي شطلب

نواف : يمه مو وكته انا افهمج بعدين

_ شنو راد حسين منك ليش اكو شي ثاني ليش ما اعرف شراد اخويه

زينب : امشي خلي نصب اكل الج ما مخليه لكمه بحلكج من الصبح كومي خيتي

_ لا لا لا اريد اعرف شيخ فدوه شراد منك

نواف : ما طلب شي و بعدج صغيره انا اكلج بعدين

_ بروح حسين ما اخليك تروح اذا ما تكلي

رسميه : ما يصح يمه امنك على وصيته انت ما منفذها خلي يرتاح بكبره شني هي

جاسم : كله اخذ ساره حرمه الك

صفنت عليه وهو حرك السبحه ما اعرف شسوي باوع الي ونزل عينه وكال

نواف : مع السلامه عندي كم شغله اكملها وارد للبيت واذا نكصتو شي اتصلو بيه

حيدر: تعال نواف

نواف : بويه مع السلامه

طلع وانا جسمي كله يرجف صعدت بسرعه لغرفتي وما طلعت منها اجتي عمه رسميه فدوه اروح الها تنوكل اكل عود ليش كل النسوان بهل عمر سوالفهن ما تنمل ما رضيت تصعد الي وهي بهل عمر وتتعب رزلتني تكلي انا بعدني صغيره متت على حجيها وسوالفها لبست اسود بس ما رضيت والله ما ارضى تلبس اسود وكلنه نزعناه وكتلها

_ عمه فدوه رحت الج ولهل عيون الحلوة لا تلبسين الأسود اختنك منه حسين جان يكلي اختنك منه وليهسة حزه بكلبي لان ما نزعته من طلب مني هذا فدوه خليج لابسه الوان تخبل عليج

رسميه : لا لا ما انزعه

_ تكسرين بخاطري واني اول مره اطلب منج طلب

رسميه : ما عاش الي يكسر خاطر بنيتي انتي كومي كومي جيبيلي المشيط خليني اظفرلج هل شعر الحلو

كمت وانطيتها المشط وبدت تمشط بيه على كيف وكلت الها

_عمه انا راح اثكل عليكم

رسميه : صيحي الي يمه تره انا بعدال امج حوريه وما ا طلعين من هذا البيت

_ عمه قصدي يمه والله ما اريد اترك هل لمه و من روحه المرحوم ما تركوني والله وكفولي وكفه اهل

رسميه : و وصيه حسين تره نواف لا تشوفيه هيج ماكو اطيب من كلبه جبير بكبر الديره

_ لا والله ما شفت منه الا الخير هل شيخ بس عمه انا ما اجبر نواف على زواجي وانا اعرف بعد المرحومه ما اخذ اله حرمه و نوره راح تزوجه وتحبه وتريده

رسميه : ما يرفض لي طلب وناخذج ناخذج

اندك الباب واني مخليه راسي على رجل رسميه وهي تمشطه الي وتحرك ايدها بشعر راسي مثل ما ماما جانت تسوي الي هل شي

رسميه : ياهو فوت

انفتح الباب ودخل نواف باوع علي وبسرعه كعدت غطيت رجلي جانت متكشفه والله عبالي زينب ونزل راسه وكال

نواف : يمه انا كتلج لا تصعدين الدرج

_ اني والله كتلها وما رضيت بهل شي اني انزل الج ثاني مره

نواف : اعرف بس هي تعاند وما تسوي بس الي براسها

رسميه : راسي يابس تغصد ها ولك ابن الجلحه

_ يمه شنو جلحه

رسميه : ولج ما تعرفين الجلحه

نواف : يمه تراها بنت بغداد

رسميه : وانا اشوفها ترفه يبعد جبدي ما تلوك الا لخيرهم

نواف : يمه تراج توج راجعه كومي ارتاحي ويصير خير يله يمه خلي اعينج وانزلج

_ اني راح اساعدها اخذ راحتك شيخ

نواف : لا ريحي انتي ما تكصرين

# نواف

طلعت من البيت وره ما كال الها على وصيه حسين اباوع على ايدها ترجف رجف وهي لازمه بعباه امي وعيونها مثل الدم قلبي اذاني على هل طفله مدري شني الي سوته بهل الدنيا استغفر الله ما اريد اضلمها ويايه وانا بهل كبر وهي طفله وبأول عمرها والف زلمه وشاب يتمناها الطريق كله افكر بيها رحت كعدت بالديوان وحدي فات جاسم وكعد بصفي هل جاسم بعد فتره كام صب كهوة وكعد كال

جاسم : ما اشوفك بخير ما مرتاح لهذا سكوتك طلع الي بكلبك ولا تضم تراني مو غريب خيك احجيلي الي خانكك والله والله وانا جاهز لكل شي تكوله

باوعت عليه هذا جاسم الي اصغر مني من بسنه من غير ام ضره امي ولدته وماتت وامنته عند امي ما يوم احتاجيته ورفضلي طلب ابن ابوه وكلت اله

_ اوف اوف يا جاسم احس خنكه بصدري المفروض انا الي اموت موهو ولا اضل محتار ما اعرف شسوي

جاسم : استغفر ربك نواف شهل حجي هذا

_ والله يا جاسم احس مقبوض صدري وماني عارف شسوي بهل بنيه ما اضلمها وياي وانا بهذا العمر

جاسم : وين تلكه احسن منك وليش تضلمها شناقصك اشو بعدك بصحتك وعافيتك ليش تكول هيج ومتعب روحك وشغله لخ تروح يم غريب وما ندري شيسوي بيها وانت ترضه بهل شي

_ من كل عقلك انت تحجي هيج وياي شبيك تخبلت تراني اكبر منها ب 16 سنه تعرف شنو يعني ولا ما ارضى اي واحد تصير اله وما تصير لواحد غريب

جاسم : تره خلصت عمرك بروحك خليها وياك وشني اكبر منها ب 16 تراها هي الي ربحانه بيك شيخ ابن شيخ والوادم كلها تعرف بيك وبأصلك وكلها متفقه ولا واحد يكول غير شي انك زلمه واذا ما راضيه بيك الباب يوسع جمل

_ ولك البنيه ما حاجيه شي اكلك انا الصوج مني بعدها صغير

جاسم : خذها هذا موش عذر

_ اسكت اسكت كوم كوم صب كهوة

ضحك جاسم واعرفه يداهرني وصبلي كهوة وما ادري رجف كل جسمي من فكرت تصير لواحد ثاني وما كدرت افكر يمسها اباوع على ايد ترجف وحدها رجعنه البيت وجان يطبخن العشى فتت وتلكتني هند وعلياء

هند : دكول تاخذها حرمه لك

_ سكتي لا اهفج على وجهج

علياء : انا كتلج نويره الي ياخذها

_ كومي كومي انتي اللخ لا والكفل زينب اخليه يطكج بضره كومي

ضحك جاسم وكعدنه يم ابويه بست راسه وردت اراضيه ماخذ بخاطره مني لان عفته وما حجيت وياه وكتله

_ بويه تراني ما قصدي اطلع بدون ما احاجيك

حيدر : ولي كوم كوم من هنا ما تحترم جلمه الجبير هنا

_ بويه تنكص ركبتي اذا ما احترمك

حيدر: اسم الله الي يحرسك لا اداهرك اعرف بيك ختنكت وهل رحت تريح نفسك

سيف : وينج ولج هنيده جيبي الي مي اشرب

_ وين الغاليه ماكو بس لا زعلت عليه

زينب : لا فوك البنيه ما ترضى تاكل من الصبح ما حطت لكمه بحلكها تنزل شويه يم الحجيه وتصعد وهل صعدت الها

_ ليش صعدت انا شكايل الها

هند : الشاهد الله ما رضت البنيه على صعدة امك وهل عاتبتها

قدمت جاي الي علياء وماخذه بخاطرها وتباوع عليه ضحكت وكلت الها

_ لا تخافين ما اخليه يطكج بمره ما مقصره وياه بشي انتي

علياء : جيب احب ايدك ربي يخليك و يسعدك الغالي شمعه البيت

_ استغفر الله روحي خيه روحي خلي اصعد اغسل واشوف الحجيه

حيدر: بويه قنعها تنزل تاكل البنيه ما نريد نضغط عليها بس تراها ما تتحمل الجوع كل امهات بغداد ما يتحملن الجوع

_ اي بويه اي يله خلن الأكل وانا صاعد ما اتأخر

نبيل : الشيخ الغالي فدوه لهل طول شمعه البيت

_ كول شرايد

نبيل : شريد تراني اتغزل بيك

حيدر : يريد يروح لبغداد وياخذ زينب وياه

نبيل : لا ما اخذها منو كال اريدن اروحن بوحدي

_ انا ما تطلع ولا تجيس بغداد برجلك اذا مو زينب وياك

مشت زينب ورادت تبوس ايدي بس ما رضيت ما ارضى احد يبوس ايدي استغفرت الله يبوسوها لان يحترموني صعدت فوك وزينب تلاشي بيه وتضحك دكيت الباب وكالت امي افوت فتت واشوف هل بنيه راح تجلطني نايمه ع رجل امي وشعرها محلول وامي تمشط بيه وزرور البنت متكشفه والله مو رجلين جنها قطع كطن من البياض استغفرت الله وبسرعه عدلت ثوبها وكعدت عدل وكلت ل امي تنزل ساعدت امي ونزلت بوحدها ما رضت احد يساعدها انداريت على ساره وكلت الها

_ ساره تره منتضريج على العشى

ساره : والله مجوعانه احس بثكل بمعدتي

_ اوديج لطبيب تحسين بوجع اخذج هسه

ساره : لا والله بس مالي نفس اكل شي

_ الخاطري يا بنت الناس ولو اكلج الخاطر ابوي وامي اذا مجان الي خاطر عندج

ساره : لا لا لا والله هياتني كايمه

بس كامت وكعت بالكاع وبسرعه لزمتها كل جسمي رجف وهي يم صدري وكعدتها على الكرويته لازمه بيدي بكل قوتها ومنزله راسها رفعت راسها بيدي وبعدت شعرها من وجها ما جايس وحده بالحرام والشاهد الله بس هل بنيه شكلي راح اموت على ايدها ومن جستها اليشهد الله مو بسوء بس خفت عليها وقلبي وجعني وكتلها بسرعه

_ شوفي يا بنت الناس لا تعاندين تراني اعرف مماكله شي من الصبح اذا ازعل عليج زعلي ثكيل

ساره : لا تمشي بحجي حسين ما لك اي دين ولا مجبور تنفذ وصيته

_ كومي لا تحجين هسه ونأجل الحجي بغير وكت وخلي اساعدج بالمشي

ساره : لا فدوه هسه شويه وانزل بس ابدل

_ انتضرج قصدي ننتضرج لا تتأخرين ياكلوج على العشى من الجوع

ضحكت و وخرت ايدي من وجها وهي هم بسرعه عافت ايدي انتبهت على نفسها باوعت عليها وكتلها

_ لا توخرين هل ضحكه من وجهج عندج العافيه بنيتي

طلعت فتت لغرفتي سبحت وخلصت ونزلت سمعت ضحك بالمطبخ وساره تكول لا والله هل اكل عشى لو اكو عزومه

هند : ولج يا عزومه هذا العشى

رسميه : ولجن امهات الكمل مخلياتها تشتغل لهل ترفه تعالي بنيتي تعالي لا تصير بيج ريحه اكل ما تمسين العود بهل بيت

ساره : يمه والله ما مسويه شي متونسه فدوه عوفيني بس انضف الخضره وهاي هياتي كاعده شوفي

رسميه : ولجن يمه شنو هياتني هاي بس لا تفشر عليه

ساره : يمه لا والله ينكص لساني بس اقصد شوفيني هاي اني كاعده

رسميه : ها يمه عبالي علمنج على الغلط بنات ابو اللبلبي

بقن يضحكن امي تموت على جناينها واداهرهن بحجيها متعلمات على سوالفهن لا ترضى بالباطل ابد وحته لو ولدها تكلهم النبي وصى بالبنات الرفق بالقوارير سلمت وفتت ابويه جان يضحك ويه جاسم اجتي امي لأزمه ساره من ايدها وكعدتها بصفها

🦋🦋🦋🦋🦋🦋🦋🦋🦋🦋🦋🦋🦋🦋🦋🦋🦋

هلوووووووووووووووووووووووووووووو 🤗

ان شاء الله بخير 🙏

وما قصرت هل مره كتبت الكم 2505 كلمه 🙂

وانتضروني الأسبوع الجاي وحبيتو هل جزء لو لا😁

طبعا اسفه اذا جان اكو كلمات غلط وفشار بس تعرفون العجايز وسوالفهم اني كولش احب اكعد يمهم واسمع قصصهم شكد بيبي الله يطول بعمرها تحجيلي قصص عن ايامهم كولولي انتو هم تحبون هل شي لو اروح اتعالج ههههه😂😂