رواية عشگ أهل الجنوب الفصل السادس 6 - بقلم أسيل

# ساره

ما ترضى تخليني اشتغل بس شنو تنكرط والله شكد تمنيت تصيرعندي بيبيه مثلها وكعدتني بصفها وكالت الي

رسميه: يمه من فدوه جا شمالكم جايبيلي جناين جنهن عوادين شخاط دشوفو هل جمال والترافة

علياء : عمه ترانه نغار بعدين لا ادلليها اكثر منه

رسميه : والله ادللها وغصبن عليجن وهاي انا ..وشوفن محد تخليها تمس العود الي بالكاع ما نخرب هل ادين يمه شبيج وجهج اصفر تعبانه مريضه

_ لا والله يمه شويه دخت وراسي وجعني

نواف : تراها داخت بالغرفه ما ماكله شي من الصبح

زينب : لا تخافي يمه هسه نخليها تاكل ونسمنها

رسميه :نحش بيها لحد ما تسمن

حيدر: ولجن دعوفن البنت لا تسونها بقره عوفنها جنها شطب ريحان يرهم الها الضعف صلاه النبي عليها

فرشو السفره وترسوها اكل اول مره بحياتي اشوف هيج عشى شما حب قلبي واشتهى سمج وبرياني ودجاج وفخاذ لحم فوك كل صينيه و خضره وخيار وبصل وطماطه كلها من مزارعهم والله كل سمجه جنها حوت تبارك الله على النعمه الي موجوده كدامي وخبز حار وكلت

_اللهم صل على محمد وال محمد على هل نعمه تشبع بس من الشوفه

رسميه : تعلمن تعلمن الحجي منها يمه بنيتي الحليوه تعالي يمي زيح غاد

نواف : ها يمه تراني اضوج مو بس جناينج الي يضوجن شو زيحتيني طول عمري ما مغير مكاني والحين زيحتيني

رسميه : وحك الله هل غاليه اغلى من كل الفروخ لموجودين هنا تعالي يرويحه الغاليه

ضحك كمت وكعدت بصفها استحيت منه جان قريب مني كولش وادنى شويه بعيد عني نواف وكتله

_ اني اسفه اخذت مكانك مو بقصدي

وجانت رسميه تحجي ويه حيدر الي متربع السفره وكال وهو يباوع بوجهي مكدرت انزل وجهي استحيت كلت اخاف إنزل وجهي وعباله ضايجه منه وبقيت على اعصابي اباوع عليه وخجلانه

نواف :اشاقه لا تضنين المكان يهم المهم انتي مرتاحه وامي هم تفضلو اكلو سمو بسم الله

بديت اكل وكل شويه رسميه تكول ناوشوني فخذ وتخلي بالماعون كدامي كل شويه شي فكالت

رسميه : يمه اشوفج ما اكلتي سمج ولج تره هذا صيد نواف الي يجيب هل سمج ما تالكين من صيد الخيير

_والله يمه ما اعرف اكله مو قصدي شي بالعكس شكله يشهي

رسميه : شنو شينراد اله ما تعرفين تاكلينه اخذي وخلي بحلكج خلنه بخبزه ولفيها

ضخك نواف والبقيه و اني هم ضحكت والله الخجل كتلني من صدك جنت ما اعرف اكل سمج وحته ماما الله يرحمها جانت هي تفلس الي وكال

نواف : ولج يمه قصدها ما تعرف تفلس السمج

رسميه : يمه وما كتيلي شمالج يمه تخبتلي وما اكلتي هسه اسويلج

_ والله شبعت بعد ما اكدر ابد

رسميه : والله ماتكومين اذا متاكلين هل سمجه وبعدين وليدي تعبان بهل صيد

نواف : يمه تعرفين من يضيك خلكي اروح اصيد هل سمج تعبيش

وكامت تفلس الي وتخلي بالماعون ساعه بخبزه احس نفسي راح انفجر وسوت لكمه الي وخلتها بخبزه ترستها سمج ختنكت من الأكل عبالك طفله وتوكلها

_ يمه والله ما اكدر شبعت بعد ما اتحمل اكل هيج شي فدوه كافي

رسميه : ابد والله ماترجعين ايد امج

_ يمه والكعبه بعد ما اكدر ما ارجعها بس بعد ماكو مكان بمعدتي

رسميه : اكلج اكل عصفور فتحي حلكج فتحي

_ ولج يمه والله ما اكدرلحكيني زينب

ضحكت رسميه واني هم واني لازمه ايدها ورجعت شويه نضربت بجتف بنواف وبسرعه اعدلت نفسي بس ما باوعت كل جسمي رجف مستحيه منه ما ادري ليش واكلت من ايدها وبعد شويه لمينه السفره وغسلنه المواعين صبينه جاي ورجعنه نسولف واسمع حجيهم وقصصهم تموت ضحك حجولي على الهور يخبل من حجيهم عمري مشايفته وجان نواف الي يحجي على الهور وكلت اله

_اريد اشوفه قريب من هنا

نواف : لا مو قريب بس اذا رحنه ناخذج ويانه تدللين

هند : اي فدوه نروح نتونس هنا ومنها نشوف لميعه والله اشتاقينه لسوالفها

نواف : ميخالف تأمرون بس يرد نبيل وزينب من بغداد نروح سوه

_ رايحين لبغداد صدك

نبيل : اي تريدين تجين ويانه

زينب : اي علواه خلي نروح كلنه هناك

_ لا لا ما اريد اروح بس اوصيكم على كم شغله مناك فدوه اذا مراح اتعبكم وياي

زينب : شبيج تدللين صدك جذب

مرت ساعات تأخر الوكت حجينه وضحكنه سوالفهم توخر الهم من اكبر واحد كلمن راح اني بقيت شويه اشرب جاي متعوده على الكهوة بس ما اعرف وين مخليها بالمطبخ غسلت الستكان ردت اصعد وكالت

هند: ساره قلبي الشيخ نواف واكف بره رايدج بشغله

_ ها خوما صاير شي

هند : لا حبيبتي هو يريد يحجي وياج شوي سوالف لا تخافين

_ خوش هسه اطلع بس فدوه انطيني شالج اخليه على راسي استحي اوكف يمه بدون شال

هند : هاي بعد قلبي

جان لونه كريمي خليته على راسي نشفت ايدي الشال كل شويه يوكع بالكوه لفيته وطلعت مشيت واكف جان منطي ضهره للباب صلاه النبي طوله وعرض جتافه يخبلن معتني بجسمه وعطره اني امشي واكدر اشتمه بالهوة وكتله بس وصلت يمه

_شيخ نواف

نواف : هلا مشينه غاد نحجي شوي

_اوكي شيخ

#نواف

باوعت عليها ابتسمت ونزلت راسي والسبحه بيدي سبحان الله من يخلق ويبدع بخلقه مشينه شويه الجو برد بالليل شفتها ترجف كتلها

_مشينه نكعد بالديوان شويه

ساره : لا على راحتك مو بارده تره

_ما كتلج اني بارده بس انتي شكلج بردانه خلينا تكعد نوسلف السالفه شويه طويله

تمشينه للديون فتحنه الباب وشفنه نبيل وسيف يتعاركون هل نبيل خانك سيف جوة رجله وسيف يضرب رجل نبيل بقيت واكف وساره واكفه صافنه عليهم وباوعت علي كالت

ساره : يشاقون مو

_ والله ما مربين يا طايحين الحظ الي يشوفكم يكول عمركم عشر سنين وكل واحد مثل البغل اوكفو ولكم

ولزمت العصى يم الباب وبسرعه مشيت وضربتهم بيها وهم يصارخون وطلعو يضحكون من الديوان ضحكت ساره وصحت بيهم

_ يا ولاد الك.... استغفر الله والله ما متربين هل مزعطه فوتي فوتي الجو برد هاي ما يكبرون على سوالفهم

سدت الباب مشت وكعدت كبال منقلة الفحم جان المكان دافي وفتحت الكهوه وشمت ريحتها و وجها ضحك كعدت كدامها وكتلها

_تشربين

ساره: اي علواه جنت ادور بالمطبخ وما لكيت خليني اني اصب

_حاره لا تحركين نفسج

ساره : لا تخاف علي اعرف اصب كهوه تره

صبت الي كهوة عبالك عايشين ب اوربا من تصب اخذت الفنجان من ايدها وما رجعته ما تعرف باصول الكهوة عاذرها فكلت الها خليني انا اصب الج الكهوة اخذت الدله ولزمت الفنجان وهي تباوع عليه وصبيت الها الفنجان وضربت الدله بالفنجان وما ترتسته ل اخره وكتلها

_ تره احنه هيج نصب الكهوة ومن تصبين مره ثانيه بهل طريقه

ساره : زين ليش ضربت الدله بالفنجان

_حته اذا جان الضيف صافن او بالة بغير مكان ينتبه واذا احد رفض الكهوة معنها ما يريد قربج ولا يحترمج

اخذت الكهوة من ايدي وحسيت بأطراف اصابعها الي تلمست اصابعي بارده جانت وكلت الها وانا شرب الكهوة

_هذا وضعج ما يصير تبقين هنا

ساره : اروح باجر اروح اني طولت عليكم اعرف اسفه والله بس الليله وباجر ارجع

_ ولج يا بت الناس خليني اكمل شبيج اكلتيني وشربتيني هذا بيتج شوكت ما يعجبج تبقين هنا انتي بنتنا ومن اهلنا بس الناس تفكر غير شي بعدج بنيه والكل راغبه بيج وبقيتج هنا راح تخلي الناس تحجي عليج بالموزين وانا ما ارضى بهل شي انا ما اكلج روحي باجر ولا عكبه ولا بعد شهر ابقيج لحد ما اتاكد من راحتج والمكان الي يناسبج ترحين تعيشين ابيت هاجر ام علي

ساره : لا

_ خير ولج خوما صاير بينكم شي انتي وام علي تره ازعل عليج تراضيها هاجر خوش بنيه

ساره : اي اي اعرف واحبها هواي بس

_ بس شنو كولي والله مايصير الج شي صار شي

ساره : فاضل هو

_ كملي كولي تره بديت افور شبيه فاضل

ساره : فاضل حاول يتقرب الي اكثر من مره تحرش بيه وهو يجيب هاجر ورايدني وانا مااريده

_ ابن الكلب والله الأ اكسر ايده

ساره: لا فدوه لا فدوه لا تفضحني لا تسوي شي

_ افضحج شنو هل حيوان ينراد اربي

ساره : بعد ما اكلك شي والله ماطول هيج راح تتصرف ما اكول الك

_ والله لاكسر راسج اذا ما اجيتي وحجيتي الي اول واحد شرايد منج

ساره : والله مرايد بس رايد ياخذني على مرته وانا ما ارضى اصير لا ثانيه ولا ثالثه

_ هذه هو بيت هاجر ما توصليه انسيه وبيوم الي تجي هاجر ادز واحد من الولد يجيبها

ساره : لا تسوي شي دخليك

_ ما اسوي سدي الموضوع

ساره : كول والله

_ وغلات عيونج ما اسوي شي بس والله بيت هاجر ما توصلينه وحدج ولا فاضل يفوت الج لو يوصل قربج

ساره: اوكي ميخالف تدلل

_ شوفي ما اجذب عليج حاولت اتواصل ويه كرايبج محد هل رد عليه ولا اكدر اخليج عند اي احد من هل كرايب ولا اكدر ارجعج وحدج بهل بيت ولا ارسلج لبغداد انتي شتريدن يجرالج شنو الي تشوفيه يريحج كولي واني انفذه الج

ساره :ارجع للبيت هذا احسن شي

_ يا بنت الناس رجعتج وحدج بالبيت مستحيله ما تكدرين تبقين وحدج يردون يخطفونج اهل الديره الثانيه وانا ما اخلي امانه تنوخذ من ايدي

ساره : يخطفوني شنو

_الكل يحجي بجمالج ونص الديره هنا عينها عليج وتقدمولج طلبوج مني

ساره: ههههه تره الف وحده هنا احلى مني شتكول انت فدوه لا تشاقه

_ والله ما اشاقه ساره انتي تشوفين غير الناس الي تشوفه بنت الولايه وبنت حضريه والأكثر من هذا بنت حوريه وكاظم عندج حلال يغطي عين الشمس ويمي هل حلال والكل رايدتج واذا تيهتج راح ياخذوج وما اندل بعد دربج وين ولا اكدر احميج وانتي بعيده عني بغداد و وحيده وبعدج طفله اخليلج حرس بالباب مال بيت بس ما اثق بالناس والله

رفعت راسي واشوف دموعها تصب على خدها الشال واكع على جتفها وشعرها يغطي نص وجها مسحت دموعها بيدها وخلت الفنجان بالكاع وكالت

ساره : اي اني يتيمه ومالي احد حسين جان جان كل هلي اني وين اروح هسه لا راح اخلص اذا عشت بوحدي ولا راح اخلص اذا بقيت هنا ولا راح اخلص اذا عشت ابيت هاجر خلي خلي اخذ فا فاضل

_ على كص ركبتي تاخذين هل حيوان الي تقرب الج بالحرام

ساره : ولا راح اقبل بيك لان نوره راغبتك وانت عاشكها ما اصير بالنص بينكم تره ادري بيك تحبها وتحبك

كامت وطلعت من الديوان منو كال اني عاشك هل نويره طلعت ولا انطت الي مجال اكول كلمه الها بس اسمع شهكاتها ورجفه جسمها

#ساره

صعدت لغرفتي بجيت لحد ما تعبت ونمت كعدت والوكت متأخر محد كعدني غسلت ولبست ثوب رصاصي نص ردن كصير والله ما عندي غير لبس واكيد هسه الكل طالعين ادري بيهم كلهم طالعين بهيج وكت عفت شعري ونزلت وشفت ملك جانت يم ببيتها وهسه يله رجعت جانت بنت جاسم وعلياء تشبه علياء كلش تخبل واجتي كالت الي

ملك : والله تخبلين انتي مثل ما كالت امي

_ والله انتي الحلوه وجمالج نفس جمال امج

ملك : اتمنى اصير مثلج

_اسم الله فال الله ولا فالج عسى الله يصير فالح نفس فال الاميرات

رسميه : وشبيه فالج اللهم صل على محمد وال محمد ولج يمه لا تنحسدين وينج نويره نويره الجراده

نوره: ها عمه شبيج خبصتيني

رسميه : بنت الجلبه روحي فوتي جيبي الي الجيس مال ذهب

نوره: وشتسوين بيه

رسميه: وانوب تحاسب بنت الجلبه روحي جيبي ولا تمرمرين حوصلتي

ملك: راح اروح ادرس لان عندي امتحانات نسولف بعدين

_ عفيه بالشاطره واذا تريدين اني اساعدج بشي تره اعرف

زينب : اللهم صل على محمد وال محمد ولج لا يشوفج احد هيج والله ينهبونج منه

رسميه : تف عليج اسم الله

اجتي نوره وكعدنه يم رسميه اني ونوره وفتحت الجيس مال قماش طلعت كل ذهبها وطلعت كلاده تجنن زنجيها يجنن وبيها شذره زركه وكالت تعالي كمت وكعدت يمها اشو لبستني الكلاده وطلعت شعري وكالت

رسميه : عليج بالهنه

_ لا يمه فدوه ما اريدها

رسميه : ها ولج ترفضين هديه

_ اني لا والله يمه مو هيج بس هاي ذهب وشكلها غالي فدوه لا تورطيني

رسميه : وروح الغاليه حوريه اذا رديتيها ما اسامحج وازعل منج وها تره زعلي ثكيل يمه مايلوك الذهب الا على الذهب كومي شوفي والله راهم لهل مرمره ركبتج

ضحكت مدري ليش افرح من تحجي ويايه بهل طريقه الصراحه حبيته وكمت اريد اشوفه و اني اباوع على على رسميه وكتلها

_ والله هسه يكرهني البنات اذا يشوفوج هي ادلليني

رسميه : كرهتنن هدومهن

_لا اسم الله عليهم اشوفه واجي

درت وجهي نضربت بصدره والله من ريحته عرفته نواف رفعت راسي ورجعت بسرعه ليوره جفلت وبسرعه لزم ايدي من زندي وسحبني حته لا اوكع قريبه صرت عليه كلش صافن بوجهي واني هم ما نزلت راسي بس شو قلبي يريد يطلع من مكانه وهو لازم بعده بزندي

رسميه : يمه اسم الله والله عين وصابتها انا كتلج راح تنصابين بعين

نواف : انتبهي لا توكعين وهاي شلابس روحي غيري لبسج لا يشوفج احد هيج ما ارضى احد يشوفج هيج يله بسرعه زينب صعدي لبسيها شي

رسميه : عوفها وانت شمالك هيج معصب هي حره شتلبس تراها هاي مو من هنا مو مثل امهات الوصخ امهات ريحه البصل خليج بنيتي هيج جنج حمامه

نواف : كتلج صعدي غيري لبسج يله كدامي

# نواف

جنت عصبي وياها ايدي ما ترضى تفك زندها انوب صدرها باين من دلعه الدشداشه وشعرها هادته احس قلبي يريد يطلع من مكانه انوب ثوبها ضيك وكصير والله هاي اذا شافها غريب يفوت يكتلنه كلنه وينهب بيها صعدت زينب وانطتها دشداشه ونزلت واجتي يمي وكالت

زينب : زعلتها والله زوركت ايدها شبيك تره هاي ترفه مبينه ما تعرف شي

_شفتيها شلابسه

زينب: وانت غرت عليها

_وليش اغار شنو منو هي بس عيب حرام كدام

زينب: لعد وراس ابوي انت غرت عليها اصعد وراضيها تره زعلت

_ تره ازوج نبيل يله فوتي كملي شغلج

زينب : ما كلت شي ها هاي فايته اشتغل

مرت مده حجيت ويه ابوي وكملت شغلي كعدنه على الغده والكل يتغده وساره لابسه عبايه فوك ملابسها وكالت

ساره : عمي بعد اذنكم اني ناويه ارجع للبيت

رسميه : يا بيت

ساره : بيت حسن ماما ما اطول الكعده يمكم واثكل

عفت الأكل وكمت مدري ليش قلبي قبضني كمت اغسل ايدي ما اكلت لكمتين ومن سمعت حجيها نسد نفسي وكامت نوره ورايه غسلت وجهي وكالت

نوره: اشوفك ضجت

_ مالي خلكج روحي منا كملي اكلج

نوره : مثل متشوف حبيبي

_ حبيبي بعينج احترمي من تحجين لا اكسرلج سنونج

نوره : شني شمالك تره تاليتك تزوجني هلي رايديك و ما رايدين غيرك معرس الي

_ شيلي هل فكره من راسج لو مو اهلج اني رافضج ما ازوجج ما اشوفج غير خيتي الصغيره ولا عبالج تره اعرف جياتج ليش كثرانات هنا ما تقنعين امي لان تعرف انا مو يمج ولا الج

_ طلعت من البيت حسيت البيت بكبره ما واسعني شغلت سيارتي وطلعت

🖤🖤🖤🖤🖤🖤🖤🖤🖤🖤🖤🖤🖤🖤🖤🖤🖤

هاااااا ✌️ اني كولش كولش اسفه لان تأخرت هل مره بس وعد بعد يومين لو 3 انشر بارت جديد

اعذروني😢😔 لان والله اليوم خلصت تقارير كل يوم التعليم العالي مطلع النه قرار جديد 😭

اتمنى يعجبكم هل بارت 🌸💕🖤

2222 كلمه ان شاء الله ما قصرت 😁✌️