رواية عشگ أهل الجنوب الفصل الرابع 4 - بقلم أسيل

_زينب فدوه ما اعرف شسوي ما الي غيركم ما اعرف المن اروح فدوه اكو تلث ولد يردون يفوتون للبيت

زينب:ولج يمه يمه قفلي الباب لا اطلعين ابد هسه جاينج

# زينب

دك التيلفون كام نبيل على حيله يعاين عليه وعلى الساعه وكال وجان عصبي ويرجف

نبيل: وج من يتصل بيج بهل وكت

_والله تراها ساره منو يتصل بيه قابل

نبيل: شمالها جاوبي يروح بيها شي هل مكروده

جاوبتها بسرعه لساره ترجف وتبجي وصوتها كوه يطلع وتكلي تلث ولد يردون يفوتون لدارها ضربت على صدري وكتله

_نبيل الحك يردون ينهبون ساره تلث زلم

كام على حيله نبيل بسرعه وانا وراه وبسرعه صاح بالبيت على جاسم ونواف وسيف وصوته هز البيت يمه يبعد جبدي ربي يحفظه الي احبنه اموت بيه

نبيل : يردون ينهبون البنيه وهي جوة حمايه الشيخ

وطلع سيف وجاسم والنسوان ودخل نواف البيت وصاح وكف البيت كله نواف الجبير كلنه نرجف رجوف منه بس والله ابو قلب طيب هو الي مخلي هل ديره بخير وسلامه وكلة

نواف : شهل صايح بتالي الليل ولك ما تستحي مكعد الكل وتعرف ابوي مريض وكتلك مشاكلك

نبيل : ولك يا الجبير يردون ينهبون ساره

وما اشوفلك غير نواف تغيرت كل ملامح وجهة صارت ترعب بعد خيته طلع سلاحه وركضو وراه زلم البيت

# نواف

اول ما سمعت اسمها رجف قلبي ركضنه كلنه للسيارات واشريت الهم يسكتون وما يطلعون صوت نستر هل بنيه لا يطلع عليها كلام وهي مالها ذنب بشي انا الي سقت وسوينه الطريق ثواني واول ما وكفت السياره صاح واحد منهم اجه اجه وركضو كلهم بره البيت وكلت الهم ما يطلقون اي طلقة وركضو وراهم دخلت البيت وما الها اثر صحت

_يلحرمه وينج الشيخ نواف انا

ومااسمع غير صوت قفل مفتاح الباب ينفتح جانت قافتله للباب وركضت وبسرعه وهي تنزل من الدرج سوته خطوتين وتبجي جت لزمت بيدي تكول وهي ترجف

ساره :ابوس ايدك ابوس ايدك لا تعوفني هنا وحدي

_استغفر الله ماني عايفج والله خلينا ناخذج ويانا اليوم اهدي ماكو شي

ساره :وين وين اروح ما عندي احد هنا وين حروح

_ لج لعد وبيتنه واحنه شنو ماعندج احد هنا كلنا بضهرج

دخل سيف وبقه يعاين وهي كامشه ايدي وضحك وهو يحرك بحاجبه هل تافه وصحت بيه جفلت وعافت ايدي جسمها كله يرجف من الخوف

_احترم ادبسسز اطلع من البيت لا اكسرلك ضلوعك

سيف : والقران ما قاصد شي كمشنه جلب واحد منهم

_لمي اغراضج وخلي شي على راسج وراح اجي اخذج

مشيت ولزمت دشداشتي من ضهري بثنين اديها وبسرعه وسحبتني وكالت

ساره : بروح حسين لا تسويها لا تعوفني

هل بنيه كل مره تكول شي لو اشوفها ترجف قلبي بنيه طفله صغيره لعبت بحالي لعب عاينت عليها

_والله العظيم ماني تاركج يابنت الحلال رايح اجيب السياره واشوف هل جلب شنو غايته منج

ساره : عليك النبي خذني وياك لا تبقيني هنا لا تعوفني هنا

سيف : اني رايح اجيب السياره واخلي نبيل وجاسم ياخذونه غاد خلي ناخذها للبيت نخليها عدهم ترتاح شوي شوفها عظامها اطكطك جنها دجاجه منتوف ريشها

_زين تسوي يله جيبها وانتي روحي اخذي كم غرض الج مهمات وراح ناخذج لبيتنه

عافت دشداشتي وانا بالكوة لازم نفسي اريد اضمها لضلوعي واشم عطرها هل بنيه راح تصير حرمتي تصير

#ساره

لميت غراضي بسرعه شون مجان ما اعرف حتى شخليت واخذت تليفوني وجم كتاب وخليتهم بالجنطه وطلعت بسرعه واكف بالباب وسلاح بيده طوله وعرض جتافه ماشاء الله يسد الباب باوعلي وكلي وهو ياشر بيده

نواف :ها ها وين طالعه هيج يا بت الناس مالنه بغداد خلي شي على راسج

لكيت شال على الكرويته وبسرعه خليته على راسي ومشيت اخذ الجنطه من ايدي ومشه صعدت بالسياره ليوره وسيف ليكدام ونواف يسوق اباوع على ايده وهو يطكطك بالسبحه وكال

نواف : ما لمسج احد منهم

_لا والله وداعه حسين قفلت الباب وختلت بالكنتور وبس سمعت صوتك طلعت

سيف : زين منو هذولي هم شايفتهم قبل

_ لا بس صار فتره يوكفون بالباب واكثر من مره شفتهم بالسوك بس اليوم فاتو للبيت

نواف : خليج يمنه جم يوم والله كريم

_ اني اسفه راح اسبب الكم ازعاج و ارجع لبغداد احسن

نواف :لا تعتذرين تره اخوج دينه بركبتي لاخر يوم بعمري ما انسى دمه ضحى بحياته علمودي وانتي امانه عندي وروحه لبغداد وحدج ماكو

حسيته حجه بعصبيه واول ما وصلنه للبيت بسرعه طلعو البنات ونزلت اريد انزل الجنطه واشر الي نواف افوت للبيت حضنتني زينب وعلياء وهند وفتنه للبيت وكعدت يسئلن وزينب تكلب بيدي وشعري اخاف بيه شي ضحكت اجتي هند وخلت صينيه الأكل كدامي فات نواف وشأف الأكل وكال

نواف : شهل اكل احنه فكور ولجن هيج تخلين كومن كومن كرمن الضيف عدل لا والي خلقجن انعنع ضلوعجن

زينب :شيخ هاي ما تاكل مثلنه ما تتعشى لحم وتمن بنص الليل تحب هل سوالف تكولن معدتي توجعني اذا تاكل اكل دهين

_لاوالله هذا خير من الله اشكركم والله على هذا الفضل شيخ والله هذا كافي وزايد هم اني هيج اكل ما اكثر بالأكل

نواف : الي يعجبج بنتي انا داخل غرفتي لاتكصرون وياها بشي ما يحتاج اعلمجن

هند :لا بعد خويه بعيونه نخليها فوت استريح

فاتت بنيه وكفت كبال نواف وضحكت وهو يسولف وياها جان مدنك راسه ويحرك بسبحته وكالت

علياء :عينج عيني هاي راح تصير حرمه الشيخ

_لا لا مو قصدي بس بس حلوه

هند: يا حلوه هل جربوعه

_شنو جربوع

كامت تضحك زينب وتخلي خبز كدامي واجت البنيه وكعدت رجل على رجل شايله خشمها طاخ بالسكف وكالت

هند :هاي بنت عم نواف نوره

نوره : وانتي لازم الحضريه جم عمرج

_20 سنه

زينب: فدوه ل الله بعدج صغييره يله اكلي وجهج مصوفر

هند : علياء بس نويره مو زوجه الشيخ ومراح تصير

نوره : وانتي شدعواج هيج ضامنه نواف

هند : انا اعرفه من ماتت ام حازم وحازم الله يرحمهم برحمته الواسعه ما دخلت حرمه داره ولا راح تدخل وحده وتاخذ قلبه لو محلها جان يحبها وكلجن تعرفن هل شي

زينب : ممنوع نجيب سيرتها كدامه بس اي جانت ام كرم بنت اصول جنها نخلة بطولها وحسنها

_شون ماتت

نوره: ماتت انكلبت بيهم السياره جانت رايحه زياره لبغداد وماتت هي والوليد موحلوه وين تكولن حلوة

استغفرن الله مايجوز نحجي على الموتى بسوء اكلت وخلصت وردت اشيل وعلياء حلفت ما تشيل الاكل اله هي والله عيب

نوره : وهي شبيها مكرمه ما تشيله

زينب : انلصمي نوره وانتي عاد كومي اخذج لغرفتج ترتاحين بيها تره اكلج من هسه حته لا تسمعين من غيري هاي جانت غرفه فاطمه

_منو فاطمه

زينب : قصدي ام حازم زوجه الشيخ الله يرحمها ومحد نام بيها غيرها وغير الشيخ ردت احضر الج غيرغرفه بس كال خليها تنام بيها لا تخافين تنكط ورد وكل يوم انظفها وبخرتها الج

_لا زنوبه فدوه والله انام باي مكان مو شرط انام بهل غرفه عيب من الشيخ خليني اي غرفه فدوه راضيه

نواف :زينب انا كتلج لا تكولين غرفته ام حازم

زينب : مو قصدي وداعتك انت والله موقصدي

نواف : لا تخافين مابيها شي فوتي وارتاحي

_ اني لا مو قصدي بيها شي والله عمو قصدي شيخ اعرف بيها عزيزه عليك وما تريد احد يفوت الها

نواف : مو اعز منج فوتي بنيتي وانتي صمي حلكج لا اخلي نبيل ياخذ عليج ضره اذا ما سكتي

زينب : ولا والله والكعبه هاي اخر مره باجر انا اغسل السياره بيدي اخليها تلج لج

ضحك نواف وباوع علي اني جنت صافنه عليه ريحته تجنن تارسه المكان شخصيته قويه بس والله مبين طيب مدري يسوي الي هيج لان يحس بالذنب لان حسين حماه دخلت اني وزينب وجهزت الي كل شي فدوه تعبتها زينب حبابه وحليوه شويه تعرج كل مره اريد اسئلها بس استحي المهم طلعت ما اطفي ضوه الغرفه ابد اخاف من اني طفله ابد ما انام والغرفه ضلمها الغرفه تجنن شكبرها وبيضه واثاثها حلو غفيت وما حسيت على روحي من التعب

# نواف

الليل كله افكر بيها ضحكت على روحي اذا هل طفله لعبت هيج ابالي والشاهد الله ما فاركت بالي من شفت حسين جابها من بغداد ونزلت بهل بتنوره العريضه الكصيره والبدي والشعر محلول عبالك جايه من فرنسا بنت الأوادم طلع ضوه الفجر وانا ما نايم كمت توضيت ونزلت اصلي ولكيت ابوي كاعد يقرا قرأن بست راسه وكعدت يمه وكال

حيدر : ها يلغالي اشوفك مو على بعضك

_لا والله بويه ما نايم الليل رحت شفت هل الناقص شيريد من البنيه يكلي والله يريد ياخذها ابن فواض ويريدها اله

حيدر : وانا كلت كدامه وكدام الزلم كلها هل حرمه تصير الك

_بويه انا بعمر ابوها وين اخذها

حيدر: بويه شمالك جنك حصان شني ما تاخذها لا تاخذها ورجلك فوك راسك غير جنها كطعه جبن

_بويه والله ما اشوفها مرتي

حيدر: والله انا اشوفها مرتك مو مرت غيرك

_ بويه عوفنه من هل سالفه انا الحين شون اكدر احمي هل بنيه وما احد يتعرض الها كاعده وحدها بالبيت ولا اكدر اخليها تبقى وحدها ولا اوديها لبغداد منو الها وهذيج المدينه جبيره والناس ما تعرف رحمه اذا عفتها بوحدها واذا عرفو ما الها احد وعايشه بوحدها والله لياكلونها اكل

حيدر: اخذها حرمه الك لو ناوي تبقه طول العمر بطرك روحك لا وليد ولا حرمه تعينك بكبرك

_ بويه انا ما اجبرها و اخذها غصب وهي بعدها طفله عمرها 20 سنه بويه عوفنه فدوه من هل سالفه واني جاي بشورك شسوي بهل بنيه

حيدر: والله بويه احجي وياها انت بس تكعد من النوم والله العالم شنو قرارها كوم بويه كوم العن الشيطان وكوم صلي

صلينه والصبح طلع وكعدن النسوان وكلهن بدن يحضرن الريوك هاي الي خبزت وهاي الي راحت تجيب البيض من كَل الدجاج صاح ابويه عليهن

حيدر: ولجن متت جوع شهل الفهاة وكعدن الجبنه النايمه خلي تتريك ويانه

جاسم :ها بويه تراها غريبه وتجلس بينه تستحي البنيه

حيدر: انجب انت مالها غريبه راح تصير من حريمنه

نبيل :ها بويه راح تزوجني

حيدر: انجب انت الثاني زينب ولج زلمتج ناوي يتزوج عليه

ركضت زينب والسجينه بيدها وتتراجف انا اضحك واسبح بالسبحه

زينب : والقران يا بويه ادير على رويحتي نفط الهب روحي وافضحك فضيحه بين السلف كلها

ضحكنه وراحت تباوع عليه اني محذر نبيل ما يفكر بهل شي زينب بنت اصل ما مقصره بشي من اول يوم دخلت البيت والبركه دخلت كلها وياها صعدت علياء لساره ونزلت ساره وعلياء وساره تضحك ولابسه هل بنطرون وبدي يبين كل زنودها شافتني زينب اباوع عليها وأشرت الها وفهمتني شقاصد وجرت ساره لغرفتها وطلعت بعد شويه لابسه كلبيه لو باقيه على لبستها القديمه جان احسن لبستها كلبيه حمره طلعت تلج لج وخلت شال على راسها وكل ساع يوكع على جتفها ما تعرف تلبسه فاتت للأستقبال

ساره : السلام عليكم

رد الكل السلام و دفعتها زينب حته تبوس ايد ابوي وبسرعه مشت ولزمت ايد ابويه وباست ايده وكع الشال من على جتفها وشعرها ما ينلم جنه حرير استغفرت الله ودرت وجهي وبسرعه حطت الشال على راسها ما اعاين عليها وتفكيري كله يمها

سيف : شونج ان شاء الله محد مقصر وياج بشي

ساره : لا والله اهل كرم فدوه رحت الكم

حيدر: بويه حته الفدوه حلوة من حلكج يمه لوتجي ام نواف لتاكلج اكل

ساره : ليش تاكلني

جاسم : ولج ما تاكل قصده تحبج تحبج شراح يخصلنه من لسانها

ساره : وين هي ليش

جاسم : بالهور تكضي شهور هناك وتنسانه هاي كل ما تمرض تروح للهور ما كلنه الها حتى بمصيبه نواف وحسين الله يرحمه

نبيل : والله لو تعرف شصار بحسين لا تشك زيجها بنص الوادم

نزلت راسها ساره عرفت بيها نقهرت اشرت لنبيل يسكت وكعد عدل موقصده لسانه يفلت جان تدخل رسميه امي وبسرعه كال

نبيل : اشرد

كلنه كمنه ورادو يطلعون وجان تلزم بيدي وصاحت

🦋🦋🦋🦋🦋🦋🦋🦋🦋🦋🦋🦋🦋🦋🦋🦋🦋

هاااااي طبعا كولش اسفه والله المفروض انزل البارحه بس صارت عندي شغل كولش اعتذر 🙏

ان شاء الله يعجبكم هل بارت ☝️🙏

وحبابين فويت او كومنت اي شي منكم قابله بيه 🤗🤗

واتمنى ربي يحفظكم وانتبو هواي على نفسكم ولا تنسون تعقمون ايدكم دائما 😁😇🙏

باي اشوفكم بعد اسبوع 💓💓💓