رواية عشگ أهل الجنوب الفصل الخامس عشر 15 - بقلم أسيل

#ساره

بسرعه لزم سيف من ياخة دشداشته و جاسم فك ايد نواف بصعوبه رجف كل جسمي من الخوف عصبيته تخوف وجان صاح جاسم بعصبية

جاسم : ايدك .... ايدك يا نواف احنه نحجي لجلك خايفين عليك

نواف: ايدك وخرها لا اكسرها الك

جاسم : ما اوخرها نواف والي تسوي سوي ماني خايف منك

نواف : تعصي كلامي وبوجهي تكولها جاسم

جاسم: لمصلحتك اي اعصي كلامك

نبيل : ترانه كلنه نعرف هددوك بينه وانت ناوي تصير وياهم

نواف :ولكم انتو تشتغلون من ورايه تعالو مكاني تعالو انا اروح واخذو مكاني اذا تشوفوني غلط ومو خوش انسان

حيدر: شهل صايح

جاسم : ماكو شي

_لا عمو اكو وصاير شي

نواف :اسكتي لا اكسر سنونج ولا حرف

صاح بيه راد يلزمني وكف جاسم كدامي واني ختلت وراه اجتي ماما رسميه وكالت

رسميه : يمه شكو شصاير شنهي هل صايح

نواف : يمه ماكو شي شويه مشاكل بينه

سيف : يمه مهددين نواف يصير ويه السياسي *********** والكتله السياسيه مالته لو يحركون قلبه بواحد بينه والكل يعرف هل كتله فاسده

حيدر : من يمته هل حجي

_عمو قبل... قبل لا نروح للهور

يباوعلي بعصبيه بالكوة واكفه من الخوف صاح ب اسمي وبسرعه لزمت بدشداشه جاسم وراد يسحبني وكال

جاسم : تراها واكفه ورايه خايفه منك وخايفه عليك تمد ايدك وتسحبها وهي وره خيك وهي متحاميه بخيك منك؟؟

ضرب نواف المرايه الي يم الباب ردت اروح سحبني جاسم من ايدي ودفعني ليوره والبنات واكفات يم الباب وصاح

نواف : شتردوني اسوي شتردوني اي رايح اصير وياهم وما اشوف واحد من اهلي بيهم شي

حيدر: اني ما ربيت ابني وشيخ القبيله هيج يسوي واذا تريد تسوي سوايتك واطلع من العشيره مو تالي عمرنا أوصخ إسم العشيره ويه هل سياسين

نواف : ولا اني مضطر اتحمل اشوفكم مو بحياتي شون فاطمه وحازم بسبب غبائي صار بيهم هل شي بويه انا ما اكدر اتحمل اشوف بيكم شي ومابيدي شي

رسميه : يمه كلنه ندري هذا قضاء الله توك جاي تعترض على ربك شهل كفر نواف

نواف : لو اني وصلتهم وما رحت للناصريه جان هسه هم بخير

سيف : لاتفكر هيج وما تصير وياهم لو على كص ركابنه

نواف : انتو لا تفكرون بمشاعركم فكرو بعقلكم جاسم تريد ترمل علياء لو تيتم بنيتك لو واحد منهم يصير بيه شي لا سامح الله لو انت سيف لو ابويه لو أمي لو انت نبيل الي بعدك ما مخلي ابنك بحضن لو شام عطره انا لو متت اخلي ساره يمكم امانه عدكم واموت َوانا مرتاح هي يمكم

كعدت على الكرويته وبقيت صافنه كل جسمي ارتخى باوعت إله ضحكت كلهم باوعو عليه وكتله

_انت مسترخصني لهل درجه

نواف: لا

_انت لو تحبني صدك لو عندك ذره مشاعر وصدك تهتم بيه وبأهلك ما جان صرت هيج اناني وتفكر بنفسك وتكول اني الي اطوع انكتل واموت والي يصير خلي يصير طبها مرض ساره تبقه ارمله طول عمرها وابقه اتحسر اني كل ما اشوف وحده هي ورجلها لو هي وابنها واني وحدي باقيه هيج هذا قرارك الحكيم شيخ نواف

كمت على حيلي وكفت كبال نواف سحبني جاسم بس ما رضيت وخرت ايده

رسميه: يمه تعوذو من الشيطان

حيدر : خلي نفهم الي صاير

_عمو الي صاير كلك اياه نبيل الشيخ نواف متهدد وما رضه يكول لاحد وناوي هو يكون الضحيه ولا احد من عائلته ينصاب ما شارك احد بيكم الرأي لان هو دائما رأيه الصح والأهم وحق الي خلق هل السماوات وروح امي وحسين وغلاه كل هل بيت والي بيه وغلاتك انت افهم هل شي وخليه بأذنك انت يصير بيك شي منا لو تموت وتعوفني انا منا انتحر لو اسوي بروحي شي واموت واني حلفت بعد اروح جهنم اي ارضى وما ابقه لحظه وحدي

نواف: انتي تخلين راسي براسج

_اي اخلي راسك براسي

نواف : ها هيج تكولين زين يابنت الحلال انت طالك

بقيت صافنه وصاح حيدر بأسم نواف ضحكت ونملت عيوني بالدموع خليت ايدي على قلبي وجعني من صدك

حيدر :وحق الي خلقك اتبرى منك طول عمري وما اعاين بوجهك

_طلكني كمل حجيك وطلكني يله سويها انت ترتاح مني كمل يله

نواف : استغفر الله

_تره ما مجبور تضل وياي وانت مو اول واحد يطلك ولا اخر واحد وانت بايع واكيد الكه الي يشتري

نواف : ايا ساقطه لعد والله والله والله تنكص ايدي اذا بعد تقربت ومسيتج تحرميني علي شون ما يحرمن علي خوات وهذا خشمج اله اكسره بمره ثانيه وانتي حرمه َوانا شيخ ونشوف

جاسم : نواف

نواف : لا تدخل هل حجي بيني وبين مرتي لحد يدخل بيني وبين مرتي

_ههه تمام عيني الله ومحمد وعلي وياك الله يرزقك بنت الحلال واذا يعجبك اني اروح اخطبها الك بس خلي هل شي ابالك دقيقه ما اضل بهل بيت

نواف : هذا بيت اخوج ورجعيله

_راجعتله لا تخاف دقيقه ما اضل بس جيبها وانت معليك شوف ياهي يا ساقطه داخله براسك ورايدها

ضربني راشدي صحاني على زماني وكعت بالكاع خشمي طك دم ما دريت بنفسي شحجيت من حركه قلبي وبسرعه ركضت علياء وهند كومني زينب ما تحركت من مكانها

#نواف

اني فقدت اعصابي وهي تسمعني هل حجي الي سم بدني فلتت ايدي مني وكومتها بالكاع كدام اهلي خشمها طك دم ردت اتحرك بس جسمي كله متشنج كامت تبجي كوموها البنات وكعدت و امي راحت يمها اشر الها ابوي تطلع بقينه نحجي وفهمتهم السالفه وكال

جاسم : دزينه كوامه

يعني (تجي عشيره المعتدي عليه الى عشيره المعتدي حتى يخلوهم يقبلون بالتفاوض المفروض بهاي الحاله شيخ نواف هو والناس الرياجيل الكبار يرحون للعايله الي هددو الشيخ بس جاسم خلاهم كبال الأمر الواقع ويفضحهم اذا صار بالشيخ شي يعني يصير دم ب الشوارع)

ل عشيره ال ***** واذا محمد الي تكول عنه بالدوله والدوله ما تخاف من عشايرها تراهم ما متحارشين بواحد ما عنده اصل وفصل تراك الشيخ نواف حيدر فاضل شيخ عشيره ******* وباجر هم الجايين النه مو احنه وعندي التصاوير وعندي كل شي صار وياك

_شمدريك بيهم ويا مكان تشاوفنه يا تصاوير عندك

سيف: تره اخوانك حزام ضهرك واخوانكم عدهم معارف حته يم جدك السابع عشر

نبيل :احنه تصرفنه حسب الأصول لا تخاف وتضنه سوينه شي يضرك

_ورب العرش ما خايف على نفسي بس خايف عليكم وحق نعمه الله انا خايف يصيبكم شي وحته هل بيت بعد ما افوت اله

نبيل :ما يصير ان شاء الله ماشين عدل وماشين حسب الأصول

حل الصبح وديت هند تنزل ملابسي ما اريد اشوف وجه ساره ولا احجي وياها كلمه هي غلطت بحقي وانا هم غلطت وعصبت واخاف هم تحجي لو انا افلت لساني بحجي وما يصير خير نزلت هند ملابسي بدلت ورحت للديوان وكعدت اجو زلم من عشيره محمد ووياهم محمد بنفسه ما سلمت حته عليه سلمت على الكل وهو لا بقه كاعد يم شيخ العشيره الي طلع هو عمه الحاج طلال شيخ عشيره بني ******* فات جاسم كعد يمي وكتله

_وين جنت ليش تأخرت ما كعدت مرتك

جاسم : لا بس وصلت ساره على بيتهم

_شنو يا بيت منو كال الها تطلع من البيت

جاسم :اني كلت الها هل شي كتلها لمي هدومج وراح اخذج لبيت اخوج وانت البارحه طردتها لو نسيت

_ليش هيج سويت منو كال الك وشون تطلع بدون شوري

جاسم : محد كال الي بس ساره انتهت تعرف شنو انتهت عيونها ما وكفت من البجي من البارحه وما نايمه كسرت قلبها انت خليها ترتاح واني كتلها بعد اسبوع اجيج خليت الها كاظم حارس يم البيت وكتله يسوك الها كل شي تريده

_طبها مرض عساها ما ردت

جاسم :استغفر الله تعوذ من الشيطان

إسم الله بيه المرض ولا بيها اعصابي نار تفور نار وجسمي كله يرجف اذا اشوفها كدامي يمكن اكتلها خلاص ما اعرف ليش هل حركه الي بيه وتشتعل بقلبي ضيفو العشيره واني بقيت صافن فكال

طلال : الله بالخير

_حياك الله شيخ طلال

وبقينه نسولف ونحجي بكل الي صار اعتذر محمد وعلى تصرفه احنه ما محجينه شي بس ابوي كال اله

حيدر : هذا ابني يفوت ويطلع وكلشي مابيه بيوم الي واحد يتعرض ل وليدي والشيخ نواف وعرفناه من طرفكم اول الي نسويه راح ننشر كل التسجيلات وثاني شي تصير دم للرجاب و تريدون تخطفونه ما تخطفونه حته تاخذون الي عدنه لو التسجيلات هذا هو كدامكم ويكللكم شسوه

_الي سويته اذا صار بيه شي او واحد من اهل بيتي شي اسم عشيرتكم ما يضل اله وجود بالعراق انا بلغت وكل لكل العشاير الي هنا ان اني مهدد واذا صار شي تصاويركم وكل شي راح توصل الهم وهم الي يتكفلون بيكم

طلال :شيخ كلنه الك حكك على راسنه والي رايده يصير الك

_ما اريد شي بس خليكم بعيد عنا ونرجع بس السلام بينه

حجينه كل الي صار واتفقو وكل واحد راح بطريقه راضين متراضين ومر شهر وساره ما ادري عنها اي شي ما انام على الجربايه من راحت والغرفه والبيت كله فارغ ضاك عليه ما يوسعني اختنك من نكعد على الاكل وهي ماكو وحذرت اي واحد يجيب سيرتها كدامي كل وكتي بره البيت... اجه جاسم دك الباب عليه وفات وكال

جاسم :انطيني البشاره

:شتريد اخذ

جاسم :اخذ الي بجيبك

_اخذه وكول البشاره

مد ايده بجيبي واخذ السويج مال سياره بقه صافن عليه وضحك فكال

جاسم : تره ما ارجعها والله

_وغلاه ابويه صارت السياره حلالك

جاسم : تشاقه تره ما صار مشتريها من شهر تره هاي لاندكروز تويوتا

_اي صارت الك وانا حلفت

باس راسي وضحك اني اصلا جايبها الها ردت اعتذر عن الي صار من قبل اعرف نفسه بوحده من زمان وما اشتره لأن المصاريف مخليها لعائلته وكال

جاسم : موسى اجه للدنيا قبل شويه بخير وسلامه وام موسى صحتها تمام نبيل بجى ما سكتن عيونه حته صورته

َ_الله يبشرك بالخير انا خفت يصير شي صحتها مو زينه بس هل بشاره تستاهل عليها هل سياره وتره هي الك حته اذا ما اجيت كلت هل شي سامحني خويه

جاسم :كتلك انا مسامح وانت مو بس اخوي انت ابوي شويه لاخ راح اروح الهم

_خلي ابدل وانزل اخذني وياك

جاسم :غالي وطلبك رخيص صدك السياره الي

_غالي ابن ابوي

وحضنته وضحكت بدلت ولبست دشداشه بقيت واكف كبال المرايه جن لحيتي طولانه خليت عطر وتذكرت ساره تحبه راح اغيره بس ارجع وخليت منه ولبست الساعه والحلقه هاي حلقه ساره يله من ارجع انزعها وما البسها بعد شلت السبحه ونزلت وتليفوني ومحفضتي بجيبي رحنه للمستشفى فتت لغرفه زينب بعد ما دكيت الباب ولكيت الكل هناك وشفت ساره يا يأبه قلبي طلع من مكانه وحاضنه الطفل صايره اسمن واحلى لابسه ثوب ازرك بلون البحر وعبايه سوده بيها تطريز ابيض وتاركه شعرها مفتوح وشامره الشال ومكياج جنها العافيه درت وجهي منها وهي هم نزلت راسها وباست الطفل مخليته على صدرها غرت منه والشاهد الله هذا مكاني كل ما اختنكت هي تسحب راسي وتخلي على صدرها مشت وخلته بحضن ابوه

🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿

هلووووو شونكم اخباركم أن شاء الله تمام 😁
تأخرت هواي مو اي اعرف واعترف بهل شي 😊😊😊

يله بقه القليل وتخلصون مني 🤣
بس احب اكوللكم شكرا لكل شخص ترك تعليق حلو فرحتوني من صدك واحلى متابعين عرفتهم حته الي سوه فويت شكرا الك 🌿🌿