رواية عشگ أهل الجنوب الفصل الرابع عشر 14 - بقلم أسيل

اجن نسوان يهلهلون والرياجيل يهوسون لان الشيخ نواف وعمو حيدر اجوي ركضت ملاك النه تضحك ويسلمون علينه الناس وركص ذبو لحم واني خربانه ضحك واباوع على نواف رجعت الضحكه بوجهة وعرفني على مره جبيره اخت ماما رسميه اسمها ديرم طبعا سئلت عن معنى اسمها نواف وكال معنى اسمها ( قطعه خشب الجوز ومدري شنو المريه تخليها بحلكها وتكعد تعلج بيها مو تصير الخشبه رطبه تفرزه ماده لونها احمر وتتلون شفتها واللثه بلون احمر لان الديرم حار شويه ومرات تفرك بيه السنون واللثه حتى تصير بيضه وحمايتها من التسوس) شنو من تحشيش لا لا مخلي ماما رسميه على صفحى ما مخليه واحد ما ناصبه عليه حته نواف ما خلص منها تخبل فدوه تنوكل اكل بيضه وسمينه واكو مثل الوشم يم حنجها كالت اسمه (دك) الي هو النقش على الجسم من الرماد (الصخام)وخاله رسميه اكو يم ايدها وكلت الها

_خاله اريد مثل هل وشم

ديرم: خلخاله الي تخلج لا عبالج تره بعدني صغيره صيحيلي يمه

ضحكت ونواف هم وكالي وهو يباوع عليه

نواف: اكسر اديج اذا سويتي ما اريد اي شي بجسمج

_ليششش هو صغير مايبين

نواف :كتلج لا اول شي يئذي واخاف يروح يلتهب

ديرم: يمه تردين اني اسويه الج تردين اسويلج الركاعيات (الدك الي يم الأفخاذ) لو الغرنوك (الي يصير يم الرقبه)

نواف: ولج يا حبوبه لا تسوين الها شي عيفيها تراها مخبله وتكعد الليل كله تتباجى

وبده يضحكون واني اطخ بيه حته يسكت وهو ماكو جان تكول

ديرم: ها زنوبه جن سمنانه هواي

زينب : والله يا يمه انا حامل بوليد

ديرم: اللهم صل على محمد وال محمد جا ما تكولين خايفه احسدنج تراني ام 7 ولد و4 بنات عندي 11 فريخ

_ها هاي كلها جهالها عزه شون تحملت

ادنى نواف وكال يم اذني وشفته اطخ باذني كل جسمي كزبر

نواف: ان شاء الله الله يرزقنه ب 12 حته نجي نغورها

_شنو لا لا

وضحك واني بقيت صافنه بوجهة يضحك عليه وبقينه نحجي وما نشوف غير السفره الي نمدت على طول البيت طبعا البيوت مالتهم مال قصب بارده عبالك عايشه حلم وما بقه شي ما خلوه من خير الله سمج الله شاهد يمكن 15 لو 16 سمجه من هاي الجبيره اللحم والأفخاذ مال 3 خرفان والخبز والخضره واكل المسموطه مدري شنو اسمها كعدو الزلم كلهم والنسوان هم الكل يسولف ويضحك جنت كاعده يم نواف ف فلس الي سمج وخلى كبالي باوعت اله وكال

نواف: ادري بيج متعرفين اطلعين العضام

_وانت شمعرفك بهل شي

نواف: اول مره كعدنه ناكل سوه كلتي هل شي ل امي

_واثاريك منتبه

نواف: تردين الصدك

_اي اريده الصدك

نواف: انا خليتج براسي من زفه حسين الله يرحمه

ديرم: يمه جنك ماشابع من مريتك هل تتبسبسون

ضحك وباوع عليها وكال الها

نواف: والله يا يمه لو اعيش العمر كله وياها ما اشبع منها

حسيت نار اشتعلت بيه من الخجل بقينه نسولف ونضحك الليل كله وكل شويه كهوة وجاي وفاكهة طلع جاسم بره ف اني ترخصت وكمت وره جاسم الي جان يدخن ف كتله

_ابو ملك

جاسم:، كولي مرت الغالي

مشيت يمه وطفى الجكاره بسرعه وكفت يمه منزل راسه يعني فد اخلاق وغيره ووشرف عدهم مو طبيعي وكلت اله

_اني ما اكدر اسكت والله اعرف الي راح اكوله غلط بس اني اعرف انت اقرب شخص لنواف

جاسم: تراج وكفتي قلبي كولي شبيج بيج شي نواف بيه شي

_احلف ما تكول لأحد

جاسم: دكولي يابنت الناس شصاير

_مهددين نواف

جاسم : شنو

_مهددين نواف دازين اله رساله يردونه ينضم ل جهة سياسيه و وياها طلقه اذا ما سوه هل شي راح يكتلونه او يكتلون احد من عائلته

جاسم: انتي تعرفين شتكولين لو ما فاهمه حجيج

_وداعه نواف وداعه حسين هذا الي كاله الي من سألته شبيه هل جم يوم

جاسم: منو يتجرأ يحجي ويهدد الشيخ والله لارجعه لبطن امه ما يضم نواف هل شي اله اذا جان خايف من شغله تصير وجبيره

_خايف على العائله

جاسم: ما يضم هل شي هم

_الله عليك خليك وياه

جاسم: اطمئني ويا بنت الأصل وزين كلتي هل شي تراه ناوي يومين ويروح لبغداد

_وين يروح كال هو باقي هنا

جاسم : هو كالي ابقه هنا وياكم وما اشيل عيني منكم بس اطمئني انا راح ارتب هل موضوع وما اعوفه اطمئني

_ما انسى الك هل شي

جاسم: هااا تر اخويه قبل لا يصير زوجج

ضحكت ومشيت لكيت نواف واكف بالباب كمزت وباوعت عليه وكال

نواف: شكو اشوفكم تحجون بره

_م... ماك ماكو شي بس... بس جنت اريد احجي

جاسم: انا وصيتها على شغله لاجل علياء

مكدرت اجذب ورحت جوه فتت بقينه نسولف ونضحك وفات نواف وره فتره شفته يباوع علي جنه شاك بيه درت وجهي ونمت يم البنات الليل كله نسولف وكعدنه الصبح اخذوني للمي وهناك الزرع واشوف البقرات يا الله والطيور والجهال الي يلعبون لبسوني دشداشه مشجره لون احمر وبيها ورد اسود وازرق وعصابه على راسي طلعت اموت ضحك شافني وضحك وكال

نواف: علياء وهند وزينب اذا مرتي صار الها شي وحسدوها راح اكتلجن بالخيزرانه

ضحكنه وكاعد امشي لزم ايدي وسحبني لبيت الخيزران وفتنه وسمعتهم بره يضحكون باوعت اله وكال

نواف: شو جنج ارتاحيتي وانتي منايمه يمي

_لا لا والله بس بس هم كلهم اجتمعو وكالو خليج

نواف : بس اشتاقيت الج

_ اني هم

حضني خله راسه يمركبتي واخذ نفس وأني تنفست عطره ورفعت راسي وبسته وركضت بسرعه والبنات جانو منتضريني علموني كل شي ونسه مو طبيعيه جمال المكان ولا اريد اعوفه

#نواف

على اساس اروح لبغداد بس جاسم كال من نرجع للبيت اروح لبغداد بقيت وياهم جم يوم اشتاقيت لهل حقيره عايفتني ولازكه بالنسوان رجعنه وره خمس ايام تعبت زينب هل رجعنه من وكت اخذها نبيل للطبيب والحمد لله ما عليها غير العافيه انطوها ادويه وكالو الها ترتاح وما تتحرك ساره انوب لزكت بزينب صعدت للغرفه وجنت ضايج الصراحه لاول مره هيج تهملني ف كالت

ساره: اجيبلك جاي فاكهة

_لا

ساره: شكو

_مابيه شي راسي يوجعني

ساره: لا مو راسك صاير شي

_كتلج مابيه شي كملي شغلج

الصراحه حجيت وياها بعصبيه طلعت ملابسها وفاتت للحمام سبحت وطلعت عطرها ترس الغرفه نشفت شعرها ومشطته باوعت الها بطرف عيني لابسه ثوب نوم ازرك درت وجهي اول مباوعت الي سمنانه الحقيره صايره تخبل كملت اكلب بالتلفزيون اباوع هل اخبار وما احس بس حاضنتني من وره وكالت

ساره : زعلان مني لان هاملتك هل فتره

_لا عادي عندج شغل

ساره: ها يعني اروح اكمل

وخرت ايدها وسحبتها وكعت على الجربايه وخليت جوه راسها مخده وكالت

ساره : اني اسفه والله

_انتي تخليني اشتاك الج متعمده

ساره: لا والله انت تعرف زينب شويه تعبانه خطيه البنات حتى ملك تعبانه وعايفه دراستها

بقينه نسولف ونضحك الليل كله نمنه سوه وما احس غير جاسم داك الباب وكعدني كمت فزت ساره تباوع عليه فتحت الباب وطلعت وكالي

جاسم: غير لبسك وانزل جوه

_شكو شصاير

جاسم: ابوي رايدك ومرتك هم

_صاير شي

جاسم: لا والله ماكو اي شي

_نازل ان شاء الله ما اتأخر

فتت لكيت ساره توها طالعه من الحمام ولابسه كلبيه مغيره لبسها وكالت

ساره : شصاير

_ابويه يريدني جوه

ساره: يله الحمام جاهز فوت وانا انطيك الملابس

فتت غسلت وطلعت بدلت ونزلنه ما لكيت ابويه بس جاسم ونبيل وسيف كعدنه وكلت

_شصاير احد صار اله شي من العائله

جاسم: لا لحد هسه محد صاير اله شي وانا عرفت الي هددوك منو

_شقاصد منو يهددون

جاسم: انا اعرف كل الشغله شيخ نواف مو احنه الي يهددون شيخنه ونسكت الهم يحسبون ما النه ضهر لو ما الك ضهر

باوعت على ساره جانت منزله راسها وتحرك بأصبعها وكلت الها

_اني كتلج

ساره: ما كدرت اسكت ويصير بيك شي اموت وراك والله

_اش ولا كلمه اسمع منج.... جاسم هل موضوع يخصني

سيف: اذا يخصك الك يخصنه النه هم

نبيل: والجهة الي هددتك دزينه الهم واحد يفهمهم القصه وباجر هم بالديوان اليوم تلكينه الخبر

ماسيطرت على اعصابي وصحت وجسمي كله رجف

_محد يدخل انا ما كلت الكم لا تدخلون بشي يخص الشيخ نواف

جاسم: شيخ على راسنه بس ترى الموضوع يخص العائله كلها يهددونها

_وانا كلت محد يدخل انا الي اتصرف

سيف: وشون تتصرف تاخذ جهة معينه وتصير تابع الهم

_ولك عليمن تحجي هيج انا اتبع ساقطين

سيف: اي انت تتبع واني سمعتك تحجي ويه اهل بغداد اذا نجبرت راح تصير تابع

🌻🌻🌻🌻🌻🌻🌻🌻🌻🌻🌻🌻🌻🌻🌻🌻🌻

هاي حلوياتي شونكم ان شاء الله يا رب بخير
كل عام وانتم بالف خير وصحة وسلامة يارب يتحقق كل الي تريدوه واتمنى ربي يحفظكم الي

اسفه لأن تأخرت ب البارت بس الشاهد الله نضربت اللابتوب مالتي 😞 ومكاعد تشتغل إله يمسحون كل شي بيها واني ما اقبل لأن بيها ذكريات اربع سنوات فوك كل هذا بيها اكثر من ١٥٠ قصه الي كاتبتها 😞😞 ميته قهر والله بحيث حته هاي القصه كعدت بالكوه اتذكر شنو الي يصير
هواي طولت ب الحجي بس ادعولي بقه امل واحد بلكي ينفع.... ويرجعون جهالي الي هم قصصي 😞😞