رواية عشگ أهل الجنوب الفصل السادس عشر 16 - بقلم أسيل

ساره : يتربى بعزك يالغالي والحمد لله على السلامه زنوبه حبيبي اجيج اني ان شاء الله فدشويه بس عندي شغله وراجعه

زينب: وين مو كلتي بايته يمج

ساره : وعيونج بايته بس عندي شغله وراجعتلج... ماما قلبي ما محتاجه اجيب الج شي

رسميه : سلامة قلبج يروحي

حتى ما سلمت عليه ولا خلت عينها بعيني حركه بصدري حسيت من شفتها.. وابوي بقه صافن علي وشلت الطفل من ادين نبيل وهي واكفه يمي عطرها تارس الغرفه الي احبه ولون الثوب الي احبه عليها بست موسى واذنت بأذانه صغير ناعم وابيض وكلت

_ما يشبه ابوه الأزرك طالع على عمه حلو حبيب عمك اللهم صل على محمد وال

جاسم : اي طالع عليه حليو

_ هووو وانت منين ابيض انت هم ازرك

سيف : طالع علي انا انا الحلو بينكم

ضحكنه وعيني عليها وهي تحجي ويه هند وطلعت بقينه نسولف شويه وراحو ضل بس جاسم وعلياء سلمت عليهم ساره ورجعت طلعت ما تحملت ابقه شبيها تلوب صاير الها شي وما تحجي طلعت وراها وشفتها طلعت من غرفه سمر استغربت شعدها شغل هناك وجان تمسح بعيونها باجيه باوعت عليه وبسرعه دارت وجها ومشت بعيده مرتبكه ومو على بعضها عرفت بيها مريضه تلكاها جاسم وكاللها

جاسم : ها شبيج شصاير

ساره : ولا لا شي شويه شويه تعبت وجنت يم سمر مالي خلك

جاسم:يا خيرج يالترفه اصيح الج الدكتوره

ساره: لا شكلي شويه تأثرت بالجو اخذ نفس بحديقه المستشفى وارجع

جاسم :اطلع وياج

ساره:لا لا فدوه لقلبك هسه اني ارتاح وارجع

وطلعت... وانا رجعت للغرفه سلمت على زينب وطلعت بقيت واكف بعيد اتفرج عليها وهي كاعده بوحدها بالحديقه الجو برد وره ساعة فاتت للمستشفى.. زين انا بقيت كاعد انتضرها تفوت.. انا الي اذيتها وانا الي طردتها وما رجعتها ولا سئلت عليها ليش كاعد انتضرها تفوت وخايف عليها من البرد... فتت للغرفه وره فتره دكيت الباب لكيت ساره نايمه على الكرويته وملفلفه نفسها وزينب الطفل بحضنها ونايمه ونبيل كاعد واشرلي هذا ابنه ضحكت ولزمت غطه جان على الكرسي وخليته فوك ساره اعرف بيها تبرد بالليل وطلعت ورايه نبيل وكال

نبيل: ليش ما ترجعها

_انا ما جابرها تبقى ولا تروح الي يعجبها تسوي

جاسم: انت الي طلكتها وهنتها كدام الكل وضربتها مره ثانيه

_بالخير نبيل انتبه عليهم انا راجع للبيت باجر الصبح انا اجي واجيب الكم ريوك وياي

نبيل: يسلمك الله

جاسم : اذا تحتاج شي اتصل لا تتردد

نبيل : ان شاء الله ما تقصرون

وصعدت ويه جاسم وهو يسوق وانا بصفه وكال

جاسم :جانت تفحص يم سمر

_شبيها

جاسم : كالت مابيه شي بس جانت شويه تعبانه ومريضه

_ان شاء الله عليها الصحه

وصلنه للبيت لكيت امي كاعده ما نايمه اشرت الي واجيت بست ايدها وراسها كعدت يمها بقينه نسولف وما حسيت اله نايم على رجلها بالكاع و كعدتني الصبح علياء وكالت

علياء : ليش غالي نايم هنا بهل برد

_ما اعرف ما حسيت على نفسي تعبان شويه هاي امي غطتني

هند: لا موهي مابيك غير العافيه

_ سالمه منو لعد

هند: والله ما نعرف لكيناك متغطي هني وهي كعدنها لكيناها متغطيه هم وغافيه يمك

وفات نبيل وكعدت وابنه بحضنه وكتله

_ها ولك اشوفك هنا وزينب

نبيل : والله هل جبرتني ارجع كارهة المستفى وتريد ترد لغرفتها

_وليش رجعت وما كلت الي انا اجي اخذك

جنت اريد اشوفها مره لخ طك قلبي عليها.. كعدنه كلنه بس زينب جانت نايمه بغرفتها رجع الطفل لأمه ما ينزله من حضنه ما مصدك بيه حقه الضنه غالي البنات يسون ريكو بالمطبخ واحنه كلنه كاعدين نسولف ويضحكون وامي كاعده بصفي فرشن السفره وفاتت ساره لازمه صينيه الستكاين وكالت

ساره: السلام عليكم

وردو السلام وخلت المواعين وبدو يخلون الأكل وكعدت تتريك ويانه كل جسمي رجف من شفتها فاتت جنها كمر بس عيونها تحجي الف موضوع وقصه.. ما حجيت شي ولا هي جان الجو شويه مو تمام حته افتح حلكي واحجي وكالت

رسميه : هسه نور البيت بيج وبأم موسى وموسى

ساره : البيت منوره بوجودج انتي وعمو

حيدر :ان شاء الله ارتاحيتي

ساره: الحمد لله عمو اني بخير.

اكلت وطلعت بشغل ورجعت العصر لكيت ساره يم زينب ومخليه الطفل بحضنها مشيت واخذته منها لزمت ايدها بقت لازمته واني هم رفعت راسها باوعت بوجهي و بسرعه سحبتها لأيدها وكالت

ساره : زنوبه قلبي اني هم شويه لاخ واجي

زينب : ولج لا روحي ارتاحي والله ما محتاجه شي

ساره: تمام قلبي

خلت ايدها على راس موسى وطلعت وفات نبيل واخذه مني ما مصدك بيه رجع من الشغل من وكت حته يشوفه وكالت.

زينب : ولك عيب شجاك اخذته

_حقه خليه خليه يشبع منه

مشيت وانطيت ورق ل زينب وكلت الها

َ_هاي هدية ابنج وهديتج لان اول طفل

زينب: شنو هذا

_ارض بأسمج شيعجبج سوي بيها

لزمت ايدي ورادت تبوسها وسحبتها ما قبلت فرحت الحمد لله

َ_استغفر الله

زينب : ربي يحفظك ويرزقك بالذريه الصالحه اشكرك يا غالي

نبيل: مشكور اخوي ما تكصر بس ليش والله احنه ما محتاجين

_اول شي هاي هديه موسى انت شعليك بيها هديه من عمه

سلمت عليهم وصعدت فوك للغرفه دكيت الباب وفتت اعرف بيها بالغرفه وفتت جانت تعلك بالدشاديش مالتي غاسلتهم وكاويتهم اخذت ملابس وفتت اسبح وطلعت ولكيتها نايمه على الكرويته ما حجيت شي تمددت ونمت على الجربايه جنت تعبان... وهاي مرت ايام واني ولا حاجي وياها اطلع الشغل وارد للبيت ما نام اني وياها على نفس المكان كل واحد بمكان بديت ادخن صار فتره الجكاره ما تنزل من حلكي... هاي فتت لغرفتي سمعتها اترجع الي ابطنها وطلعت من الحمام مسحت وجها ومشت صبت الها كلاص عصير وشربته لابسه ثوب سمائي كطن كصير وعايفه شعرها مفتوح وجها اصفر شويه وفتت للحمام وطلعت لكيتها كاعده يم التلفزيون وتكلب بالقنوات وخلت الريمونت على الطبله وتأكل فاكهة وجبس وشاميه مسويه الها حفله وتباوع على فلم رعب هي طول عمرها تكره الأفلام الرعب وتخاف الليل كله ما تنامه مشيت و لزمت الريموت وكلبت القناة على غير قناة كامت رجعت القناة وردتها اني من الله وكعدت اكل فاكهة على الكرويته كامت من يمي رجعت القناة وخلت كوشه كبال الستلايت ورجعت كعدت بصفي وشربت دوه وكتلها

_شنو هذا

ساره: دوه

_لا صدك معقوله هذا دوه عبالي فستق اول مره اشوف دوه

باوعت عليها ودارت وجها لزمت الدوه وسحبته من ايدها بسرعه وجان لزمت الدوه بكل قوتها وسحبتها عليه وصارت قريبه مني ونزلت دموعها وشهكت عضت شفتها كل قوتها وكلت الها

_كافي عناد وياي

ساره : عوف ايدي

_كافي كاعد اكلج لا تقاوميني عوفيه

ساره: كتلك اترك ايدي لا افضحك هسه والله

_يله صيحي واشوف رجال الي يفوت لغرفتي

ساره : نواف الشيخ نواف عوفني لو سمحت

_ما عاجبني اعوفج

ساره: اني مو تسلايه شوكت ميعجبك تجيني روح مو ردت تتزوج روح مو مو طلكتني كمل الي ردت تسويه وريح قلبك دامني عالة على قلبك الله ياخذني وترتاح

وكامت تبجي عفتها غثني كلامها و قهرني وكامت تمسح بدموعها كمت وردت الزمها كالت

ساره: ديربالك تتقرب مني

_حجيج جان مو حلو ويايه كدام اهلي اعرف اني غلطان

ساره: انت طلكتني يعني تعرف شنو تخليت عني بكل سهولة ولا عبالك اذا متحبني ماخذني شفقه ليش ليش هيج سويت بيه

_اني احبج والشاهد الله بس ماكو رجال يتحمل كلامج وياه بهل طريقه واعرف شما اكول ما تسامحيني بس لا تعيدين هل حجي غيري ياخذج شنو

ساره : بس تعرف انت لو كملت طلاكي اني اصير لغيرك يجي الي ياخذني

_ترحين لغيري وحق الي خلقج ادفنج ومحد يمس شعره من راسج وانتي هيج راح ترحين بهل سهولة وتوافقين مو

وجنت احجي بعصبيه وسحبتها من ايدها وكفت على حيلي وصاحت وهي تبجي وترجف

سارة :لا لا ما اكدر ولا أوافق ما اكدر... ما اكدر انت مرخصني ما وجعتني الضربه بكد ما سمعتك وشفتك عايفني لك كلبك شون ينطيك

سحبتها بحضني ضربت صدري اكثر من مره تريدني اوخر بس ما اكدر مشتاق الها قلبي فرفح عليها حضنتها كل قوتي اريد افوتها بصدري حته ارتاح والله احس خنكتها بهل حضن لزمت دشداشتي وكالت

ساره : ليش تريد تعوفني حلفت... ما تعوفني لو تاخذ غيري

_ما اريد اعوفج والله يا ساره بس كلامج اذاني وانا عصبي تعرفيني ما اتحمل اسكت

ساره: انت حتى حلفت مراح تلمسني هيج... هيج كرهتني كسرتلي قلبي

_هدي والله ساعه عصبيه وداعتج وداعه امي وابوي عصبيه والشيطان شاطر ورحت كفرت عن حلفي ولحضه عصبيه حقج على راسي

ساره :ما اثق بيك انت تتخلى عني بسهولة

_حقج شراح تكولين حقج

رخيت ايدي بس هي جلبت اكثر ب دشداشتي ما تريدني اعوفها رجعت حضنتها وكلت الها

_اخذج لبغداد بأجر تتونسين والي يعجبج تسويه واسويلج جواز سفر وراح اسفرج لاي بلد رايدته والي ترديه هسه يصير الج

ساره: انا ما اريد شي

_ما اعوفج وهل كلمه اذا نعادت مال طلاك كون الله ياخذ عمري قبل ما اكولها

ساره: اسم الله اسم الله

بعد مده جانت نايمه على الجربايه وانا نزلت اتعشى هي ما قبلت تاكل لان مجوعانه وبقت نايمه... وفتت للغرفه ولكيتها هم بالحمام ترجع الي بطنها وكلت الها

_شبيج اوضاعج معاجبتني امشي نروح لطبيب

ساره :لا لا بس ماخذه برد شويه ما اريد طبيب ولأن شويه مغثوثه جنت

_ماعاش الي يغثج بنتي

اشو هاي كمزت بس كلت الها طبيب لزمتها من ايدها وسحبتها خليت ايدي على كصتها شويه حراره عدها وتمددت يمها خلت راسها يم رقبتي وأخذت نفس حالتها مخوفتني هاي مرن سبع ايام ساره جانت نزلاتها قليلا متتحرك هواي دائما نايمه لو متمدده على الجربايه وجها اصفر شي شاغلها متحجي هواي اله انا احجي يله هي تحجي فتت للغرفه لكيتها كاعده تاكل بطيخ مخليه ماعون بحظنها اني كلت لهند تصعد الها لأن مماكله شي وهي تحب البطيخ وتباوع فلم كعدت بصفها باوعت عليه وخلت الماعون على الطبله وتمددت خلت راسها على رجلي بقيت العب بشعرها لزمت ايدي وباست جف ايدي من البطن وخلت ايدي على ركبتها جانت لازمه ايدي بقوة وكلت الها

🌿🌻🌿🌻🌿🌻🌿🌻🌿🌻🌿🌻🌿🌻

ما اكوللكم شكال 😂😂😂

فرحاااانه بيكم هواي والله لدرجه المفروض هذا يكون البارت الاخير من القصه بس طولته حته تبقون ويايه 😔 لأن كلامكم يفرح قلبي كلش احبكم

و البارت الجاي راح يكون الاخير ☹️💔
وكذالك خلصت امتحان حاليا اعتبر خريجه إله شهاده هههههه