رواية عشگ أهل الجنوب الفصل الثالث والعشرون 23 - بقلم أسيل

نواف :ساره بنيتي

بس هل مره ما التفت اله انطيته ضهري ومشيت احس روحي بدت تطلع مني طلعت من الديوان ومشيت للبيت امشي واحسها ثكلت عليه خطواتي صار جاسم كبالي والولد والبنات كلهم يم الباب يضحكون ويأشرون الي وكال

جاسم :شبيهم تخبلو علي شبيه الديوان

صار بوجهي وأحس بحركه بصدري وكلت لجاسم واني اخلي ايدي على صدري اختنكت

_اريد حسين يمي اريد اصير يم حسين

#نواف

كاعد بالديوان افكر شون حجيت ويه جاسم اخوي بهل طريقه عمري وحياتي ما سمعته يصيح الي بس باخوي والشيخ من جنه صغار كله يكول اخوي اخوي ومن كبرنه الشيخ بس من صاح الي بيومها نواف حسيته يهيني حسيته يسبني حرك قلبي لا أكدر انام ولا أكدر اكل عدل أنام على الكرويته وهي على الفراش ما فتحت حلكي وياها ولا حرف غلطت بتقليل ادبها ويه البنيه بهل طريقه حته اذا كارهتها كمت ما تحملت انا غلطت غلطه جبيره ويه جاسم وكبال الكل واذا سكتت بعد راح تكبر المسافه بينه فاتت نجوى ثوب احمر ودلع والحجاب على رأسها نفس عطر ساره الي احبه جنت واكف وهي يم الباب وبدت تسولف ويايه وره ثواني مشت وحظنتنني صدرها على صدري وكالت الي احبك اريد ابعدها بس افهم شنو الي صار حته ذبت روحها عليه شهل حجي تعرف بيه احب ساره باستني دفعتها وهي ابتعدت بسرعه التفت واشوف ساره كبالي مبتسمه خلت الكهوة بالكاع وصصحت بأسمها مشت ولا التفت علي طلعت بره الديوان جاسم يمشي صوبنه وهي انطتني ضهرها لزمها جاسم من جتفها واغمى عليه سندها جاسم ركضت الها خشمها طاك دم شلتها بسرعه ومشيت للبيت جاسم يحجي وياي مجاوبته من خليتها بالجربايه وطلعت البنات بقو يمها وكال

جاسم :مديت ايدك عليها شبيها

_ لا والله

جاسم :شصاير تعاركت

بجى سعد فتت للغرفه وشلته وبقه يلوب بين ايدي ما هداء اجتي علياء اخذته مني بقيت كاعد بالغرفه فات جاسم من يم الباب وباوع الي بطرف عينه ومشه دك باب غرفه النوم الي بيها ساره وفات كمت اني الصراحه من شفت البنات كلهن طلعن تقربت للباب وسمعت حجيهم

جاسم :قواج الله خيتي

_تسلم ابو ملاك

جاسم:ما اتعبج اكثر و شنكايه نايم منزعجه للأفندي

_يروحلك فدوه غير عمه

جاسم:اسم الله يحفظه الرحمن برحمته ويتربى بعزكم نواف مد ايدى عليج

ساره: لا والله ابو ملك وغلاه سعد ابد ما مد ايده علي

جاسم :متأكده اخاف خايفه لان كتله اتبرى منك

ساره:وراس وليدي سعد ابد ولا مد ايده

جاسم:شصار لعد لا تكليلي ماكو شي

ساره:جانت نجوى وهو بالغرفه سويه وهي باسته وبين حظنه

جاسم:ش..شنو؟ شنو

ساره:باسته من شفايفه وبين حظنه

جاسم:ساره شوفي صح زعلان من نواف انا بس هذا اخوي فدوه من تحجين لا تجيبين سيرته بالباطل ما يسوي شي غلط لو على كص ركبته صح عصبي بس لا تجذبين

مكدرت اتحمل دفاع جاسم علي وهي ما مجذبه صار الي صار بس والله مو خاينها فتت وصار بوجهي وسوه نفسه عصبي وكال

جاسم :بس حبيت اطمئن عليج خيتي اخذي راحتج بعدين نسولف

_هي الي باستني تعرفين انا ما افكر بهل شي وانتي على ذمتي

ساره :ان شاء الله ابو ملك

بقه جاسم صافن عليه وضحك بأستهزاء مشه وصار قريب كلش مني وعينه بعيني وكال وهو يهمس يم اذني

جاسم:بس شوف الوجع بعيونها وراح تعرف شخسرت انت من انسانه جانت تعبدك بعد الله بوحده آجتي من الشوارع ما معروف اصلها وفصلها عفيه عليك يا نواف

عافني وطلع مشيت وكعدت كبالها وجهة اصفر ما اعرف شسوي جنت متعود عليها بهيج شي لو موقف يقهرها تبجي وتعصب مني بس كاعده كبالي تباوع على الجامه مديت ايدي اريد الزمها ابتعدت مني بطريقه وضحت الي هي مشمئزه مني وكالت بنبره صوت ونظرات خذلان اول مره بحياتي اشوفها هيج بعيونها عتب

ساره: اذا باقيه هنا بهل مكان وبهل بيت وبهل غرفه بسبب سعد علموده باقيه واله ولا سبب ولا قوه تكدر تجبرني اصبر ثانيه كبال وجهك الي بينه سعد بس

ما بررت الها اخليها تهدا و وكتها كلشي اله حل ولو شنو الي ابرره وانا الغلطان وانا الي رخيت الها لهل دخيله وشون راح تصدك بواحد جانت بين ايده مره ثانيه غيرها مشيت وطلعت من البيت .....

#ساره

مرت اربع على حجيي ويه نواف وبعدها ابد ما حجيت وياه انام بغرفه سعد وطلبت من جاسم ميحجي ابد بالموضوع كبال اي احد وحته البنات من سألني كتله ما اريد احد يشوفه بالعين الصغيره ضحك ودمعت عينه يومها من اجه يلزم ايدي ويريد يبرر الي سحبت ايدي وكتله اني باقيه علمود سعد دنك وطلع من الغرفه كمت توضيت سعد نايم على الجربايه بقيت على السجاده كاعده خليت ايدي على قلبي وكلت لرب العالمين ((يارب احس بنار هنا مشتعله بنص صدري يارب اجعلها بردا و سلامًا يارب أستر وجعي يا الله عيني تفضحني واني اكره هل شي)) طبعا اكل واشرب وحدي بالغرفه والبنات جوه واعتني بسعد ومرات يصعدن للغرفه يمي ياكلن لو يصعدن الجاي والكهوة ما يضغطن علي ابد بالحجي اليوم الولد راح يتاخرون بالشغل هذا الي عرفته من هند ردت انيم سعد بغرفته ما قبل فتت غسلت وغيرت ملابسي وكعدت على الجربايه وفاتن البنات وسعد جان فاتح عينه ويضحك ميقبل ينام عنده طاقه جانت هند وعلياء وزينب وملوكه وموسى ودعاء كلهم جايين فرشت بالكاع حته نكعد ورادت تخلي دعاء بالكاع ما قبلت شلتها وشبعتها بوس وخليتهم بصف سعد وكعدت ملاك يمهم على الفراش. وعلياء فرشت بالكاع وبدو يخلون الكهوة والجاي والفواكه والكرزات كعدت حبايب سوو الي وكالت

هند:اليوم ناوين نزعجج

_جعل الله محد غيركم يزعجني

رديت الباب و فتحت الثلاجه وطلعت فواكه وحلويات و ومي وسحبت المخدات وانتجيت وكعدنه هاي الي تريد جاي وهاي الي تصب كهوة وهاي الي تخلي كبالي فاكهة وابتسمت التفت لملاك وبس شافتني دنكت راسها وكلت الها

_ملوكه حبيبي شون تجاوبين بالامتحانات

علياء:كل مره مطلعه حجه حته تغيب

_هاي شنو والطبيه والحلم مالتج ؟؟

ملاك:لا راجعه راجعه ما اتخلى عن حلمي

_فدوه شوفيها تسمع كلام

بقت هند تسولف على المول الي فتح وراحت هي وسيف عليه وشون بيه ملابس واغراض صدك هي انيقه بلبسها من نوع هي متوسطه الطول متروسه بس مو بشكلٍ محلو بالعكس جسمها مرتب حنطاويه عيون عسليه وشعر جوزي كيرلي احب شعرها وسيف يكول الها ماخذج علمود عطوبج يموتني ضحك من يعصب عليها لان هي لسان بلسان وياه بس ما تجاوز ب العكس تحترمه هواي ومن تعصبه ينزل عصبي لعمه رسميه ويكول وهو يصيح وماد راسه للدرج حته يسمعها هاي الكلمات المفضله مالته كل ما يتعاركون (يمههههه ام العطوب راح تجلط ابنج يمه راح انهزم من البيت لو احرك رويحتي واخلص منها ومن عطوبها) بس تتعارك هي وياه علمود البنات الي يتصلن بيه لو يعلقن اله على البرنامج وهي تكب خبالتها عليه وتنزل مخليه اغراضها بالجنطه وتعالو ودوني لاهلي وعمه لو عمو يكولون الها كل مره حجه شكل حته ترجع مره راح ياخذ راحته بالحجي ويه البنات لو مره اخاف بس يعرفن هي عايفته يزحفن اله طبعا سيف كولش مرتب وانيق نفس هند ومن صدك هو ما عنده شي والحلقه ما ينزعها من ايده ابد بس هم البنات وكحات وخاصا حيل هل وكت اني الي اعرف بيه سيف جان يعرفها بالكليه هي قسم لغه انجليزي طبعا سيف عمره 28 سنه وهنوده ٢٤ سنه ...

جنت منتجيه على الجربايه والمخده وره ضهري باوعت على زنوبه الي جانت تقره الفنجان مال علياء زنوبه بيضه متوسطه الطول رشيقه وشعرها عسليات وعيونها خضر بس جانت تعرج ما مخلصه دراسه سادس وتاركه تحب نبيل حب مو طبيعي اول ما يجي تفوت الغرفه وياه ملابسه وعطره وما مقصره ابد وياه وهو دائما اشوفه سرحان بيها لو مرات من تكوم وتتعثر يفز عليها ويبقه يباوع بقهرة عليها طبعا عمرها ٢٥ سنه و نبيل عمره ٢٧ كلش هادئين هو وياها و بحيث كل مره يصيح الها بشي مره ماي عيني مره فرحه قلبي مره عصفورتي....

اما علياء الثكيله والحكيمه الي بينه الي بكل مشكله وكلشي نروح الها ركض نسولف الها وتنصحنه طبعا اكبرنه هي واول جنه للبيت بحيث عمه تصيح الها ام الخير علياء طويله ورشيقه شعرها اسود بمستوى صدرها جسمها مرتب من نوع لبسها يا فساتين يا تنانير متحب الجينزات ابد تكولها عايفتها للمسترجلات الي مثلنه ونموت ضحك عليها لبسها مرات احسه ينطي شبه المحجبات التركيات ماشاء الله عليها عيونها كبار وحواجبها طوال وثخينات عيونها لوزيه وخشمها صغير ورفيع لونها بين البياض والسمار كلش علاقتها حلوة بجاسم متزوجين من عمرها جان 19 سنه عدها تلث خوات متزوجات ومسافرات بره طبعا هي وجاسم كبالنه رسميات بس مرات من أمر من يم الغرفه لو شي اسمع ضحكهم ومتعاونين وكلش انسانه قنوعه وعلاقتهم بملاك تخبل منطيها ثقه مو طبيعيه كل ما يحجي جاسم يكول هاي بنيتي الي ترفع راسي ومن تكله اصير طبيبه يكلها افتحلج عشرين مستشفى وهي تضحك طبعا جاسم من غير ام عمره 33 سنه وعلياء 30 سنه وام جاسم اسمها شميسه تصير بنت عم عمو حيدر وماما رسميه تصير بنت خاله لعمو عشكها واخذها ومن صارت مشاكل أخذها لشمسيه بس جان كل وحده بيت وحدها ومن صارت حامل تعبت كلش لشمسيه مرحبا الي هي أم جاسم وماما رسميه بقت تعتني بيها من كل قلبها وامنت جاسم يمها ومن جابته لجاسم قلبها وكف ما تحملت الطلوكه وتوفت الله يرحمها وكل سنه تسوي الها ثواب يحجون كل الديره بيه طبعا راح تسائلون ليش اكول الها ماما وهاي تعتبر لواكه هو محد ياخذ مكان ومعزه ماما وبصوره عامه محد ياخذ مكان الأم اني فقدت ماما من فتره مو طويله بس لان اغلبيه الوقت جانت بالمستشفى جنت افتقدها بحياتي ومن توفت ماما فراغ كلش جبير وراها حسين سوده عليه راح بقيت بوحدي محد الي بس ماما رسميه تعاملني بحنيه وبحب مو طبيعي بحيث مرات مو اكعد يمها وتكشر برتقاله تشيفها الي وتوكلني بيدها وشعري من تشوفه مفتوح تظفره الي لو من نكعد ناكل وهي تكعد تخلي كبالي الاكل بحيث من اكوللها والله استحي لا تعامليني احسن من البنات هن يضحكن ويعتنن بيه بالزايد طختني علياء لان زنوبه ماده ايدها الي وبيها كهوة اخذتها وابتسمت سرحت هواي واني اباوع عليهم ابتسمت وكلت الهم

_تعرفون اني ما اعرف شون تزوجتو وهم جانت اكو بطولات بحياتكم او عن حب هنوده نعرف بيها تزوجت عن حب بس احجولي اريد اسمعها منكم اني ما اعرف ولا سئلت احد كلت اخاف ادخل بخصوصياتكم

زينب :خلي تبدي هنيده ام العمايل قصتها احلى قصه بينه

هند :اخ اخ من قصه عشقي

جانت تحجي بدرامه ابتسمت ضربتها علياء وكالت الها

علياء:لا تستخفين تحجي عدل ام العطوب

هند :تره ما احجي

زينب :علياء بربج عوفيها تغرد النه قصتها

🍀🍀🍀🍀🍀🍀🍀🍀🍀🍀🍀🍀🍀🍀🍀🍀🍀

ان شاء الله يارب يعجبكم هل بارت الخفيف الي مابيه نجوى 🌝

ولا تكولون قصير تره ١٧٠٠ كلمه 🌝🌝

وشكرا اكل بنيه علقت و صوتت الي وفرحت قلبي شكرا لان انتو جزء مهم بحياتي 🌞