رواية عشگ أهل الجنوب الفصل الرابع والعشرون 24 - بقلم أسيل

هند :هاي لعيون ام سعد طبعا اني وسيوفي تدرين بينه بنفس الكليه انا وياه و اول سنه الي جانت اخر سنه اله يومها جنت بالكافتريا نسيت تليفوني رجعت لكيت بنيه ماخذته فكلت الها هذا تلفوني هي نكرت الموضوع وطلعت وركضت وراها تليفوني جديد وبيه صوري واغراضي اشو هاي تمشي بيه بسرعه صحت عليها بديت ابجي وهي لسانها طويل ولمت عليه الكليه وكالت تريد تبوك تليفوني هاي الحراميه قاصدتني جانت ب الحراميه الكل يباوعون عليه وكتها مشه حبيب قلبي طبعا ما احجيلكم بنات الكليه ساحلات نفسهم وهو يضحك وسبورت وشخصيه قويه واني مبتعده منه لان ما اريد اصير من ضمن عشيقاته لان بنات الكليه داير مدايره فهو جان يمشي بالسنتر مال كليه وكال يومها

سيف :حته نعرف منو الي تريد تبوك التليفون فتحي وخلي نشوف منو صاحبه التليفون احسن ما تدخل الامنيه بهل موضوع وتتجرجرون للعماده وتنفضحون

وكتها كالت طافي التليفون جان يسحب سيف جنطتها وطشر الأغراض وكع تليفوني ودنك ياخذه نكسرت الشاشه وبس شغله طلعت صوره الي واني لابسه بجامه مال انمي ناروتو (الي ما يعرف شنو انمي هي رسوم متحركه يابانيه مو كارتون تصنيفها يختلف عن الكارتون) وشعري مكفوش ضحك وكال للبواكه وهو يأشر عليه

سيف :ما اعتقد عندج علاقه وتحبينها لدرجه مخليه صورتها خلفيه لتليفونج

سحبت تليفوني ودمعت عيني نفطرت الشاشه صار اسبوع من اشتريته وجان يكلي كبال الكل

سيف :ام العطوب تباوعين انمي بهل عمر

عزه يومها تخبلت منه ضربته على رجله كل قوتي وعفته وطبعا مده سنه كامله اني افوت من يمه يسلم عليه واني أدير وجهي وهو يضحك بس الصراحه شي بقلبي كلش كبر اتجاهة يوم بعد يوم اغار عليه وهو يتعمد كل ما يشوفني يفوت من يمي يسمعني كلام اني اعصب بس بيني وبين نفسي اطير من الفرح يومها طردني استاذ معيد من القسم لان اخذت قلم من زميلي وهو اصلا عينه عليه واني ما منطيته مجال فالحقير حسبي الله ونعم الوكيل حقد عليه عليه لحد هسه توجع قلبي رزالته بجيت شبعت بجي واني امشي بالممر بحيث شنو من رزاله وصوت عالي واني وحيده اهلي ومدلله وبابا ما يكولي لا على كلشي أريده فصار بوجهي واحد مرحله اخيره جان سرسري معروف ابو بنات وسكير وكلي

الولد :شمالها حلوة الكليه تبجي تعالي ابوسن هل عوينات ودموعها

وكتله بعصبيه وانا ارجف (شوف لك واصله مرحله امسح بوجهك ممر الكليه انقلع من جدامي لا أفرج امه محمد عليك)

صح جنت عصبيه وارجف أصدقائه ضحكو اشو هذا طول ايده عليه وضربني راشدي بقيت صافنه صح المكان فارغ جان ومابيه احد بس صوت الضربه ترس المكان محد ماد ايده عليه من قبل حسيت جسمي رجف وارتخى ردت اوكع وما حسيت بس بواحد سندني وكعدني على المسطبه اغراضي بالكاع اطشرت وجان سيف رفع وجهي لزمت ايده وشهكت نزلت راسي جنت خايفه وما أريده يباوع عليه وما أريده يعوفني التفت على الولد و جانو أصدقائه رائد و وسام وناصر وياه كام سيف ومشه لزم سيف الولد ولطخ راسه بالحايط بحيث شك راسه وسحبه هو والولد صارو بعيدين عني ركعت اجمع الأغراض رجعلي سيف راد يكومني فزيت وكعدت بالكاع من خوفي أشر للولد يرحون وجمع الأغراض ويايه مدنك راسه اول مره اشوفه يحجي وياي بكل هل جديه والحنيه وكال

سيف :كافي

هو كلي كافي لو انا نزرفن تانكيات دموعي و زدت بالبجي كل جسمي يرجف وطلع الاستاذ يضحك ومشى من يمي وسمعني حجي وكال

الاستاذ :ما صدكتي تنطردين حته ترحين لاقرب زلمه تجي عينج عليه

سيف :استاذ باسم بعدها قضيه التحرش موجوده بالقسم مال شرطه مالتك موجوده مو تره محد ناسيها

باسم :ها.. ها شنوو

سيف :اذا تقربت ثاني مره منها لو صارت عينك عليها من والي خلقك وخلاك بهل ديره اله اطلع مو زلمه وابن الشيخ حيدر اذا ما اخليك مدفون ومحد يندل كبرك وين ما وين وشتعتبره اعتبره

مشه بسرعه باسم وبقيت كاعده بالكاع جنت صافنه بوجهة وكتله (تره والله ماعندي علاقات وداعه ابويه وبابا معروف تره ف ما اسوي شي ينزل راسه وداعه امي)

سيف :مراقبج واعرف كلشي يخصج كومي كومي غسلي وجهج صار طماطه الكواد اله اخلي يبطل من الكليه

ساعدني اوكف والاغراض بيده مشيت للحمام وغسلت وجهي وطلعت بس جسمي يرجف وشفته بعده واكف قريب من الحمام فطلعت ومشينه لبره الكليه للكراج ما حجه شي ولا اني كل الي أبالي يريد ياجرلي تكسي لان ابو الخط ما يجي الي بوحدي وردنه نفوت للكراج

كتله باستغراب :وين شسوي راح اخذ تكسي منا

سيف :راح نروح نكعد بمكان ناكل لو نشرب شي وراها بس تهدين نفسج ارجعج لمكان قريب على بيتج

كتله بعصبيه شكيت بيه يضن اني مو خوش بنيه واصعد وانزل بكيفي ويه الولد وطلعت الدلاله الي بداخلي (شوووف لا عبالك صرت بطل وساعدتني بمعنى انطيك كلشي لاااا اهلي معروفين ابويه وعمامي اخذلي تكسي لا افضحك فضيحه هسه)

عاد هو عيونه براسه صارت لزمني من زندي كل قوته وكال بعصبيه وجان قريب مني

سيف :شوفي لججج لا عبالج لسانج طويل وتعلين صوتج زين رضيتها على روحي وصعدتج ويه رجال ما تعرفين عنه شي لا هو خطج ولا ويه بنات صاعده زين انتي بوحدج وياه ما تخافين منه تخافين مني وما تخافين منه اذبحج والله اذا تصعدين ويه غريب ما تفكرين بالطريق شيكدر يسوي وياج وانتي بكد الحمصه يمردج مرد ويسوي الي بنفسه ما عايشن بفرنسا يله كبالي وتره اعرف لا عم ولا خال الج هنا وابوج متبري من اهلة

عاد من هددني هيج انا معت رخيت كلش رخيت (يا وسفه 😂) سحبني وصعدني بالسياره وره ما سواني فرجه لأمه محمد كلها صعد وبده يسوق يومها حاره جانت بس اني اتراجف رجعت ابجي وهو كال

سيف :ما ائذيج ولا اخلي بعد احد يمس شعره من راسج قصدي من عطوباتج

ضحكت يحشش عليه وهو عصبي انطاني بطل مي شربت وخليته على وجهي احس بحراره مال ضربه وكتله (اسفه والله بس يعني)

سيف :خليج نفس ما انتي خليج لبوه جدام الكل بس يمي اريدج غزال

(شنووو شوف سيييف انا كتلك)

سيف:انا حابج من اول يوم شفتج بيه بس تخلص هل سنه انا جاي متقدم الج انا اعرف ابوج طيار متقاعد وانتي البنيه الوحيده وابوج انسان خير ان شاء الله راقبتج سنه كامله ما شفت منج شينه مسويه حدود ويه اصدقائج وزملائج وهذاك الكواد باسم اذا مسج بشي اله اشرگه بالنص والكفل زينب اي واحد يتكرب صوبج اكتله وادخل السجن بيه

يومها من صدك حسيته سند بعد بابا ورجال يعتمد عليه ويغار عليه ومرت سنتين هذا الحجي تقدم الي وبابا رفض طبعا مو لان شي بس يريدني اخلص يله تقدم مرتين والثالثه تقريبا قبل جيتج للديره بخمس أشهر لو أقل اجتي رساله منه نهى سيف كلشي برساله وانا عصبت عليه اسبوع ما احجي سويت بلوك اله ويومها رساله اجتني من رقم غريب تكلي سيف رايحين مشايه لوحده من بنات عمه انا ما اكلج شصار اجرت تكسي بالبجامه والبلوز الدنيا تمطر وبارررده وحافيه تسودنت نهزمت من البيت وأهلي يصيحون عليه تقربنه من البيت جنت مريضه وجبت الطريق بجي فتحت باب السياره وانطيت فلوس للرجال وركضت لباب بيت سيف بقيت ادك عليه كل قوتي ونفتح الباب جان واكف الشيخ ورجفت وصحت واني ابجي وكتله اني اعرفه من الصور مشوفني كل اهلة سيف وصحت واني ارجف (شوووف شيخ اخوك بعد ما قشمر عليه وابنه ابطني يريد يعوفني ورايحين مشايه اله احروك روحي والله وانتو تبتلون بيه)

نواف :لك سييييف سييييف

صاح سيف علو صوته نزل سيف بالبجامه وبس شافني ركض بسرعه فوتني للبيت جنت ارجف يومها علياء الله يسعد قلبها ركضت جابت غطه الي اخذه سيف ولفه عليه وكال

نواف :لك سيف شتحجي هل مسودنه شمسوي مكسوره ويه هل بنيه

سيف :شمسوي شكو شجابج هنا

نواف:لك احجي سيييف لا تسودني

ولزمه من ياخته وسحبه عليه وسلم وهو ما يدري شكو واني ابجي وكال الشيخ بعصبيه

نواف :البنيه حامل بابنك لك زاني عليمن تصلي بعد وانت كواد وتلعب بعرض الناس

سيف :لج ام عطوب شحاجيه مخبله والله مخبله والقرآن وداعه امي هي بوسه ردت منها رادت تكسر سنوني لج مخبله شبيج شتحجين انتي

_تريد تعوفني وتزوج

سيف :انعل ابو عطوبج الي ماخذت كل عقلج لج رائد ناصب عليج هو والولد ودازين الرساله واتصلت بيج مسويه بلوك الي اتصل بمنو وانا بس رقم ابوج عندي اتصل بابوج يعني والله يحرمني منج طول عمري

_
(صدك تحجي)

سيف :وداعه امي وابويه

(لعد جذب مو حامل بس ردت اخليكم تكتلونه قبل لا يتزوج وحده غيري اكيد انت الشيخ دائما يحجي عليك ويكول عليك تغار من جماله)

حجيت وانا اضحك والكل فاير دمهم مني ومن سيف جان يضربه نواف على راسه يومها اجه ابويه رزلني رزاله هو وماما غسل ولبس ويكول فضحتينه بس احبنه مو بيدي ردت اموت من عرفت الخبر وطبعا من عرف بيه جايه بتكسي يابه كميه الرزايل والسوالف الي صارت لا مستحيل ويومها بابا وماما وعمه رسميه و الشيخ والولد والبنات كلهم موجودين وقرو الفاتحه و وافق بابا وكال مجان رافض الفكره بالعكس لان سمعه بيت الشيخ حيدر والشيخ نواف سابع ديره يشهدون على هل شي والحمد للله الله سهل وره شهرين تزوجته وصار الي صار انا اول بنيه تنقري فاتحتها ببجامه سبونج بوب .....

(ساره الي تحجي هنا حته لا تخربطون)

طبعا القصه كلها تحجي وتعيب وتصنف موتتني ضحك بحيث نسيت الوجع كله الي بقلبي طبعا هند فكاهيه وكبرر بعيني سيف اكثر مما هوى جبير حضنتها وهي هم ضحكت ملاك وكالت

ملاك : بس افوت للكليه ما اسوي مثلج اخلص دراسه واسافر وما اخلي واحد يتزوجني واتقشمر حته ابقه بالبيت

علياء :واذا نفس مواصفات عمج نواف جنتي تكومين وتكعدين تكولين اريد واحد نفس صفات نواف يالجذابه

بقت تضحك واحنه هم واني بقيت ساكته بغصتي من نذكر اسمه وكالت

زينب:يله علياء انتي

علياء:لا بلشي انتي انا اخر وحده بيكم

(قصه زينب)

زينب :خوش نبيل الله يحفظه جان عاشك وحده غيري جانت محافظات بس تدرس هني واهلها وياها وهي بنت أكابر غنيه وأبوها اله سمعته وهيبته فهو نبيل جان يتردد إلهم عائلتهم منفتحه يعني بصيغه وياه بالجامعه وزميلها ومعجب بيها ويحبها جان ما مقصر وياها بشي يطلعها ويفوتها بحيث كلش ما مقصر وياها ومن يشوفون دلاله البنات إلها يتحسدوهم يخاف عليها بس فجأة تغيرت كامت متحجي وياه تقدم الها استاذ عايش بكندا و وافقت بيه وكتها كلش نهضم نبيل والصراحه اتضحت هي ادور فلوس وحريه زايده وادور واحد عنده كرون كلشي تلبسه وتسوي هو يكون راضي بس سافرت نزعت الحجاب وكله صارت صلوخ وصدرها طالع اما نبيل جان ما يعجبه وحده تلبس كصير يحب الي لبسها مرتب وأنيق جان يعاني وياها المهم انتهت قصتهم راح تسألوني شون جنت اعرف بهل شي ؟ انا جنت اشتغل طباخه بيت البنيه استبرق الي جان يحبها نبيل فجنت اعرفه واعرفها وره فتره من تزوجت وراحت انتقلو اهلها لتركيا واني بقيت من مكان لمكان اروح اشتغل حته اعيش خالتي ما استقبلتني طردتني وعمامي اصلا ما معترفين بيه يومها جنت راجعه من بيت خالتي اريد مكان اكعد بيه وارتاح ومجان عندي فلوس بس على كد الآكل والشرب الصراحه محد يعرف بهل شي غير نبيل جنت ناويه انتحر صعدت بهل بنايه المهجورة بنهايه الديره اذا تعرفون الي يكولون عنها مسكونه عاد جانت الدنيا بعد بيها خيط ضوه لا خفت من جني ولا أحد صعدت صعدت ما اسمع غير صوت نبيل وهو يكلي

نبيل:اذا تردين تنتحرين اصعدي بعد جم طابق هني اذا زديتي روحج ما تموتين احتمال تتعوقين

جان كاعد يدخن بالزاويه رجعت ليوره باوع عليه وفز من شافني وكال بعصبيه

نبيل :زنيبه ولج تسودنتي

كام الصراحه ردت ازت نفسي وصاح بيه وهو يسحبني من ايدي بكل قوته صرت قريبه منه لحيته عاليه جانت ومخربط اعرف بيه مو هين عليه كل هل حب وتاليتها صارت لغيره بجيت وكال بعصبيه

نبيل:اذا زديتي روحج راح يكولون اغتصبها نبيل وهل شمرت نفسها لو انا خلصت منج حاجتي وكتلتج وانا مسوددن منا ويكولون تلبسه جني 🧞‍♂️ فتسكتين وتكعدين عاقله لو ادفعج منا

(اكتلني)

ضحك وسحبني كعدت بالكاع وكعد بصفي وانطاني بطل مي وكلي اغسل وجهي انا جنت صغيره وكتها توني صرت ١٩ الي يشوفني يكول ١٦ لان ناعمه وكلي

نبيل:منو الي عافج

(م..محد)

نبيل:مسويه عمله وهل ناويه تكتلين نفسج

(لاااااا لا عزه مستحيل لا وروح ابوي وامي تره مو هيج الموضوع أصلي واصوم ومحافظه على نفسي بس والله تعبت)

نبيل:تصلين وتصومين وناويه تنتحرين وين ايمانج برب العالمين لعد ؟

(لا تحجي شي انت متعرفه لا تبقه تحجي شي ومتعرف شنو امر بيه)

نبيل:وشنو الي تمرين بيه اهلج وبيت و شغل وانتي بعدج صغيره يعني ومدرستج شتردين بعد

(عمري ١٩ سنه تاركه الدراسه وانا يتيمه الام والاب ماعندي لا اخوان ولا خوات عمامي ما يريدوني كلهم مسافرين لو بغداد من رحت الهم وره وفاه ابوي طردوني وكتلوني وشبعوني مهانه وذله ورجعت لخالتي خالتي طردتني من البيت تكلي يادوب اوكل فروخي ورجلها سكير وما تضمنه وطردتني وماعندي غرفه انام بيها صار اسبوع من انام ببيت استبرق الفارغ بس هسه اجروه وصار يومين لكمه ما مخليه بحلكي ورجلي توجعني من المشي وعيوني تحركني لان منايمه وراسي يوجعني ومحد يقبل يشغلني لان صغيره ويخافون يتورطون بيه وفوك كل قهر قلبي هذاك الجلب ابن الجلب فايز وجماعته يتحرشون بيه وهسه يلحكون ورايه وبالكوه نهزمت شوف شايله بجنطتي السجينه اذا احد يتقرب الي لو اكتل نفسي لو اكتله تعبت وضعف ايماني برب العالمين اول مره احجيها بصوت عالي وكبال الناس وحسيت الله عافني بوحدي وانت الي حظرتك عايش تعاستك ويه الجن بهل خرابه تبجي على وحده ما مهتمه بيك عافتك اصحى على روحك عندك اهل وبيت وسكف يسترك متخرج وتشتغل وبنات الديره كلهن يردنك ما احجي على استبرق الله يسعدها على الاقل اهلها جانو خوش ناس وما انكر هل شي بس هي ما تستاهلك وهسه جاي يحجي بالإيمان وانت ما عندك ثقه برب العالمين)

يومها جان لا اني ولا هو عدنه ايمان استغفر الله جنه بحاله يأس مو طبيعي بس يومها هو نقذ حياتي وانا صحيته على نفسه وجنت أنزل الدرج وهو ورايه وكال بعصبيه الي

نبيل:وييين رايحه

وكلت اله بعصبيه(لجهنم الحمره شعليك)

نبيل :جاي لعد وياج

ضحكت والتفت عليه ولكيته مبتسم الي دنكت راسي مستحيه وكال

نبيل:عدنه مزارع تعرفين وحلال هواي انا ادبر الج سكن وشغل بمكان محترم

(جذاب كول والله)

نبيل:بس هاااا

(كولي شنو والله مستعده اخدمك انت واهلك طول العمر ما أنسى هل معروف
نبيل:تسويلي كل اسبوع جدر دولمه)

(جنك على اكل والله الي ابالك احب ايدك)

ردت ابوس ايده مقبل ورحت وياه لبيتهم جنت اول مره أشوف عمه رسميه وعلياء وملك جانت هاكدودتها ضربت عمه رسميه على صدرها وعمو حيدر بقه صافن وجان يكول يومها تذكرين علياء

علياء:يبوووو ولا اكدر أنسه هل موقف

زينب يومها كال وهو يخلي ايده على ضهري فزيت وكال

نبيل:فوتي فوتي هل بيت بيتج يمه ابوي هاي مرتي زنيبه

((ساره الي تحجي هنا)) (طبعا اني جنت اشرب مي و سعد بحضني غصيت بالمي وبس اضحك اضحك على عمله نبيل البنات بقو بس يضحكون عزززه مخبل هذا نبيل وكملت زينب)

زينب:طبعا شنو كلنه على نفس الصيحه (شنووووو) واني ضربته بخاصرته وهو يضحك وعمه لطمت على خدها وصاح

نبيل:يمه اشاقه اشاقه هاي زينب جانت تطبخ يم بيت اهل استبرق وهل من راحو ما ضل الها احد بهل ديره يتيمه ماعدها لا ام ولا اب وانا كلت اجيبها تعينج بالطبخ وبالمزرعة تطبخ للعمال

رسميه:فوتي يمه فوتي ارتاحي اليوم ونحل ان شاء الله موضوعج باجر وانت الجلب انا الك

مرت ايام كعدت بيت صغير بالمزرعه جنت اطبخ للعمال والله عمري وحياتي ما تصورت هيج الله راح يفتحها بوجهي بيت وراتب وشغل واحلى عيشه وعمه رسميه يوميه تودي عليه حته اذا ماكو شي تكلي اريدج كبال عيني جانت علياء تعبانه اجتها فتره تعبت بيها

علياء :اي اي وره ملاك ردنه جهال بس الله ما قسم النه كل ما احبل يوكع الطفل بثاني اسبوع اربع مرات وراها بديت اشرب دوه تفهمون قصدي

ملاك:مانع حمل

علياء:ولجججحح شفهمج بهل سوالف ادبسزز منو علمج

ملاك:يمه شبيج تره السنه الجايه ادخل الكليه شون ما افهم بهل سوالف مو طفله

(ساره) لزمت ايدها وكتلها عوفيها بربج خلي عينها تطلع وتواجه هل مجتمع لا تكسرين جناحاتها من هسه

علياء:نفس حجي جاسم عوفيها وعوفيها المهم جنت اتعب هواي بهذيج الفتره بس الله رزقنه بيها جانت تساعد ب البيت ما اقبل تفوت لو تنظف غرفتي بس هي متقبل

زينب:الله رزقني باهل وهي ما قصرت بحقي ابد كل مره تكلي مو بوحدج انا اختج ولا تخافين ما نعوفج المهم مرت ايام طويله واشهر طويله جان نبيل كل مره يجي يطمئن عليه ويشوف البيت اذا منقص شي لو انا محتاجه شي فدشي بداخلي كبر اتجاهة بس جنت اضم هل شي يعني منو يرضى بوحده مثلي

(ساره) لا تحجين هل شي ليش شبيج

زينب:اصبري جايتج ب الكلام المهم ذاك اليوم اجاني وكلي يريد يحجي وياي بموضوع جنت واكفه اباب البيت ميقبل ابد يفوت للبيت لو اموت جان جايب اغراض بأيده وكال الي

نبيل:هاي جم شغله الغاليه دزتها الج

زينب:طبعا جذب جان هو كل مره يتسوك الي هو اعترف بهل شي وره الخطوبه فاخذت الاغراض وفوتتها للبيت وطلعت وكال

نبيل:اكو ولد حجه وياي بموضوعج شايفج وحاب يتقدم الج وكلت اكول الج

عاد قبل لا يكمل صرت عصبيه عليه وكتله واني بالكوه مسيطره على دموعي (انا كايله الك اريدن اتزوج)

نبيل:لا بس ما كدرت ارفض

(منا وغاد ارفض وما اخذ اي واحد)

نبيل:ليش جنج عاشكه واحد

(هل شي خاص بيه أستاذ نبيل وما موافقه)

نبيل:ها هيج الحجي عود من يريد يجيج كليلي حته اوافق بيه

وصحتله بعصبيه (ان شاء الله اخويه) كتله عصبيه حته انرفزه بس ما تصورت هيج رده فعله

نبيل:لا تصحيني اخوج مو اخوج انا فهمتي

فتت وسديت الباب كل قوتي وبجيت من صدك نقهرت وكام مايجيني لأيام وايام ودت عليه عمتي رسميه ومن رحت كالت الي اتجهز راح نروح نخطب لنبيل بقيت صافنه وحسيت بنغزه بقلبي مو طبيعيه ابتسمت وباركت لعمتي وهي جانت فرحانه بديت اعزل بالمطبخ واخذتني علياء من ايدي وصعدتني لغرفتها علياء احجي انتي الي لبستيه الي

علياء :ابد هاي قصتج انتي احجيها احبها لقصتج كلش هواي

زينب:ماشي طبعا علياء جانت مشتريه الي صايه لون سمائي وجواها ثوب ابيض وحجاب ابيض و حذاء كعب وجنطه لون فضي الصراحه ما جنت ناويه اروح واشوف يخطبون لنبيل جدامي مغثوثه جنت بس من شفت الملابس نجبرت اروح طبعا ما منقصه علي اي شي تعرفين علياء لحد هسه ما اكدر اتخلى عنهم هلكد ما حبيتهم حته العطر الي جبتيه الي ما استغنيت عنه ابد ومن عطوري الي احبها الكاردينيا طبعا رجعت للبيت وبدلت وتجهزت وكالت عمتي راح تودي احد يجيبني رجعت للبيت بجيت هواي واخر شي تجهزت بس احس كل جسمي متكسر هذا الحجي طبعا نبيل ما شايفته من تعاركنه بدلت ومكيجت ولبست الملابس فت على قياسي وطلعت مثل الاميره ندك الباب وصحت اي اجيت خليت عطر وشلت الجنطه وفتحت الباب واني اكول اسفه اسفه تاخرت ومن رفعت راسي صار وجهي بوجه نبيل

علياء :على فكره انا وديته يجيبيج كتله راح تجي بوحدها

زينب:واني اكول تخبل عليه يومها جان لابس قاط رصاصي وقميص ابيض رباط اسود وهو طويل وجسمه مرتب اروح فدوه إله جنت اباوع عليه عيونه نكلبت دم وسحبني من زندي ومسح شفتي بردان قميصه وكال بعصبيه

نبيل:لا تخلين شي بشفايج ما مسموح الج و جنتي ويه منو ناويه تجين يله كبالي راح نتاخر

جان مستعجل ضجت ومشيت وفتحت الباب وسديته بقوة وبده يسوق وكل شويه يأفف واخر شي كال

نبيل: من راح يشوفونج هيج وبهل شكلٍ والمكياج راح يتقدمون الج اكثر

وكتله واني افتح الباب ونزلت من وصلنه للبيت (اي وافق اذا خوش عريس) حته بس انرفزه

نبيل:وحبيب القلب

وكتله وعيوني كلها ادموع (اصلا مشايفني كباله وحده مثل سندريلا جنت اشتغل خادمه بالبيوت وماعندي بيت ولا أهل ومحد من كرايبي رايدني تتصور راح يشوفني كدامه لو يفكر بيه لا تهتم بيه اهتم بالي راح تأخذها) مشيت جان يصيح بعصبيه

نبيل :لان ابن كلب هل ما شايفج كباله

وكفت ردت احجي بس كملت مشي لان راح يحس و رحنه الها للبنيه وطول الوقت نبيل يباوع على اردان قميصه و يحرك باصبعه عليه بحيث الكل انتبه هو ما راضي ولا باوع بوجه البنيه جانت مخلصه دراسه وحلوه شكره وبيضه وجسمها يخبل بس جانت كل شويه تحجي بنعوصه ودلع اول ما طلعنه من البيت صعدنه وياه بالسياره وكال

نبيل :ما موافق

رسميه :شني يمه شمالك حلوه بس

نبيل :اي بس ما اريدها لان كلتي بس

رسميه:حسيتها تتنعوص

نبيل :وما عجبني لبسها اول مره جاي ومطلعه الي كل سوالفها

رسميه :اي ديوسها صغار ولابسه ستيان ابو السفنجه

نبيل :يمهههههه شوكت لحكتي تعرفين

رسميه :فعصتهن طلعن جذابيات

نبيل :لا حول ولا قوه الا بالله العلي العظيم

زينب :طبعا اني بالكوة مسيطره ما اضحك جنت ألم ب ضحكتي من شفته يباوعلي بطرف عينه ب المرايه وساق وكالت

رسميه :يمه انساها

نبيل : ياهي يمه

رسميه :ام السل استبرق

نبيل :يمه والله وداعتج مو أبالي ولا افكر بيها وداعه عيونج

من كال وداعه عيونج جان يباوع عليه درت وجهي جسمي كله رجف معقوله حس بيه وصلنه للبيت ردت انزل حته اتمشى للبيت قريب مو بعيد عن بيت بس كال

نبيل :انتظري دقايق اغير لبسي وانا اوصلج

وكتله (مايحتاج انا اروح مشكور عمه خوما تحتاجين شي قبل لا اروح)

رسميه :مشتهيه طرشانه من ايدج باجر اوديلج مكوناتها

_لا عمه حبيبتي عندي كامل المكونات تحبيها بدون لحم مو لو اخلي الج شويه

رسميه :فدوه للعمه الي تكوليها والله لو تصيرين جنتي مو اي والله خوش اقتراح

طبعا رجفت من حجت هيج وكلت الها (هسه هسه اروح اني فوتي لا تعبين نفسج باجر اجيبها الج

رسميه : بدون لحم

نبيل :الدنيا ليل والوكت متأخر لا تعبيني وياج خمس دقايق ونازل انتظريني بالسياره

وشمر السويج الي سلمو عليه وعلياء رمقتني ب إبتسامه ومن يومها حسيت هي تعرف احس بشي اتجاه نبيل صعدت وكعدت انتظره الدنيا مغيمه ما تعشيت احس بجوع وبقيت كاعده وفتح الباب وهو يسلم على أهل البيت تأخر شويه بس مهتميت وصعد يدور على السويج وانطيته اله خله التليفون وشكل الواير وباوع عليه وكال

نبيل :خوما تضوجين من الأغاني

جان مستفز مبتسم وهو يحجي ويايه وكتله (لا مو معقده وما اسمع اغاني) ضحك وساق عبرنه البيت مالتي وكتله

(نبيل البيت منا)

نبيل :اووو نسيت يله خلي نتعشى ونرجع

وكتله وكل جسمي يرجف وخايفه (شيحجون اهلك لا رجعني وروح بوحدك الناس من تشوفنه شتكول رجعني نبيل فدوه)

نبيل :شبيييج منو يحجي عليج وانتي وياي والله ادفنه وثانيا انا كلت لأمي واخوي نواف راح اخذ الج عشى وارجع للبيت

حسيت بنار بصدري وكتله بعصبيه (شكد عيب والله فشله استغفر الله)

نبيل :ذنوبج كثار استغفري ربج شتاكلين

زينب :علف

نبيل :ليش هويشه نكلبتي

حجيت بعصبيه حسيت على نفسي وخليت ايدي على حلكي وضحك وكال

نبيل : عادي راح نبقه نفتر لحد ما تكوليلي شتاكلين

جاوبته اي شي عادي هذا بقه صدك يفتر وكتله بسرعه اريد( كص) (منتبهين كل قصصي الاكله المفضله الكص هلكد ما احبه) ابتسم وكال

نبيل :دجاج لو لحم

جنت مستحيه منه وبالكوه احجي وهو دار وجهه من كتله بكيفك استفزني وكال لعد راح اكمل فرفرتي

(دجاج)

نبيل :ببسي سفن ميرندا ديو

(لبن)

نبيل :حلويات زنود الست بقلاوه داطلي

(موطه)

نبيل :بيا طعم لو مشكل

(ككو)

نبيل :راح اخذج لاطيب ابووكص ب الديره

وراح جاب الي اكلنه بالسياره جاب الي 4 بقيت صافنه عليه وضحكت واني وحده تشبعني نزل وره شويه وره الاكل جاب موطه وهم بدينه ناكل بالسياره جان يسوق وفات بطسه ولطخ خشمه وحلكه وسب الحكومه ضحكت ودرت وجهي وذب الموطه بالجيس مال زبل واني هم خلصتها بقه يدور على كلنس ضحكت وهو باوع عليه واعتذرت منه بس مكدرت اكتم ضحكتي وكف السياره وكال

نبيل :ها مشمته بيه مووو انطيني كلنس شي حجابج امسح بيه عادي

🍀🍀🍀🍀🍀🍀🍀🍀🍀🍀🍀🍀🍀🍀🍀🍀🍀

هاااااي حبيباتي اول شي الصوره الي فوك عطوب هند و اللبس مال زينب

ثاني شي الاغنيه الي شغلها نبيل ب السياره اسمعوها اسمها ليله لو باقي ليله بصوت اسماعيل الفروجي

وثالث شي هل بارت كله لطافه ما بيه مغثه 😂😂😂 وكلش طويل تره هل مره ٣٧٢٧ كلمه 😂😂😂