رواية عشگ أهل الجنوب الفصل الحادي وثلاثون 31 - بقلم أسيل

نواف:لا ما بيه شي ذبحه صدريه بسبب انسداد بالشريان التاجي محتاج عمليه ما اطول ساعتين ومنع الطبيب الجكاير مني ولا اتقرب منها واسوي العملية بسرعه قبل لا تتفاقم اوضاعي

_وليش متسويها ليش تعاند والجكاير خطره عليك شنو يعني ليش تشربها

نهاريت من صدك من سمعت هل شي وهو مبتسم كام من الاكل وما حجه شي وبديت اغسل مواعين طفيت الجاي هذا صدك يريد يسوي هيج بيه يريد يعاقبني يعني لو يستفزني شنو ناوي يموت هذا مخبل سديت المي ومشيت اله واكف يم الشباك والجكاره بحلكه وكتله بعصبيه وجسمي يرجف

_متخاف على اهلك ما تخاف يصير بيهم شي وراك

نواف:كلهم عدهم ناس اله انا من ترحين منو يضل الي جاسم عنده علياء وبنته وسيف عنده هند ونبيل عنده زينب امي ابوي الها و ولدها و أحفادها إله انا مرتي تريد تموت وتعوفني بوحدي ليش اعيش وبنيتي مو يمي

_نواااف لا تخبلني لا تئذيني زايد

نواف:شتردين شتردين مني ما اسوي لا العملية ولا اعوف الجكاير وطبني مرض الله ياخذني كبلج ولا اشوف اخر قطعه بقلبي يصير بيها شي عبالج فرحان من اشوفج هيج عبالج فرحان من اشوف وليدي مو على صدرج والي يضحك من يشوفني لج تشب نار بصدري من اذكر ولدي مات بسببي لان دافعت لان خليت دخيله لا اصل ولا فصل تضحك علي لأن جنت غشيم ومهتم بالعادات والتقاليد اكثر مما مهتم بعائلتي وهل الله عاقبني عوفيني اموت قبلج وارتاح والله لان تعبت فردنوب

جان يحجي بعصبيه ودمارات ركبته نطت وعيونه صارت دم شغل الجكاره واخذ نفس لزمتها بيدي وطفيتها حركت جف ايدي وفتح ايدي بسرعه و مسحها بيده الجمره حركت ايدي لازمها بقوه وصاح بوجهي

نواف:هاي شبيج تسودنتي لج ليش ليش هيج

_ما احبها ما احب ريحتها

نواف:كولي ما اريدك هنا ليش سوين هيج

خليت ايدي على ركبته ورفعت رجلي وخليت شفتي على شفته وبسته من شفته وحسيت بدموعي نزلت بس غمضت عيني وعمق البوسه سحبني اكثر لصدره ايده وحده على خاصرتي حاضنها والثانيه على ضهري

#نواف

بتعدت عنها راسها يم ركبتي شهكت وانا احس قلبي راح ينفجر مشتاق الها وكالت وهي تبجي

ساره:احبه عطرك احبه لا تعوفني بوحدي نواف لا تحرك قلبي

_لا تحركين قلبي

ساره:سوي العمليه وعوف الجكاير

_سويه الزرع والعمليه واخذي العلاج

ساره:سويها انت واني وراك اسويها والله

_راح اعوف الجكاير وانتي سوي الزرع وانا اعتني بيج اسفرج بره للعمليه وراها بس تتعافين انا والله اسويها بوراج حالتي مو خطره مثلج انتي موضوعج يتفاقم انا بس علي اعوف الجكاير وابتعد عن الاكل الدهين

خلت راسها على صدري حضنتها كل قوتي وبقت مجلبه ببلوزي من ضهري

_ساره بنيتي بويه الله ياخذني ما ادري شسوي بويه سامحيني

ساره:خليني خليني بحضنك لا تهدني

بقيت حاضنها ترجف بين ايدي اي ما اجذب مشتاق الها وطاك قلبي عليها وما تصورت بيوم راح تسامحني هي لحد هسه ما كايله مسامحتني بس انطتني امل ممكن تتصلح علاقتنه هي خايفه عليه وانا خايف عليها هي ما تريدني اموت وانا ما اريدها تموت بعد عمر طويل ان شاء الله والله والله اذا الله نطاها عمر جديد وترجع الي بعافيه والله ما ازعلها ولا اخلي شي بنفسها نذر عليه عسى ما تطلب روحي ما تغلى عليها ما اخليها تطلب الشي مرتين بس الصراحه ما اعرف شون راح اعترف الها انا جذبت عليها ومابيه ذبحه ولا بيه شي اعرف راح تزعل مني بس والله بمرور الوقت راح اعترف الها بهل شي بس اريدها توافق على العمليه اريدها ترد مثل قبل والله اعوضها بأيام طول عمرها ما تنساها جنه كاعدين على القنفه راسها على صدري لزمت ايدها وفتحتها جانت حمره بست ايدها وكلت الها

_توجعج

ساره:ايده خدرانه ما احس باي شي بيها لا هي ولا رجلي مشتاقه للبيت مشتاقه لماما رسميه وعمو ورزاله علياء وحنيه زنوبه وتحشيش هنوده مشتاقه لعركات نبيل وسيف بس كلي صالحت جاسم ما زعلانين

_راح تردين وياي البيت بدونج ما يسوه والله حته لكمتنه نغص بيها وانتي ماكو وجاسم هو الي جابني لباب بيتج

ساره: ونجوى تزوجتها

_الله ياخذ عمري اذا فكرت بوحده غيرج لج والله ماكو وحده تكدر تاخذ مكانج ونجوى والله حياله هل باستني كبالج كلت الها انا احبج واليشهد الله عليه بس ما ادري شصار

ساره:شحتسوي بيها

_وداعتج فاتت السجن طول عمرها ما راح اخليها تتهنى

ساره:لا تخليني اشوف وجهة

_عيوني الج

مرت اربع ايام حالتها نفس ما هي ادوخ وتوكع وتخدر اطرافها يا ما تكدر تتحرك حجيت ويه دكتورها و وصف ادويه الها علمود يحظرها للفحص طلب منها تصوم قبل يوم من الفحص الدنيا فجر جنت كاعد اصلي ضليت اقره قرأن وادعي الله يبرد قلبي كمت ورتبت السجادة وكالت

ساره:تقبل الله ان شاء الله

_منا و منكم صالح الأعمال ليش منايمه

ساره:انت ليش منايم

_ما اجذب عليج بس ما اكدر اغمض عيني مو هينه علي والله

ساره:لا ترعبني اني هم خايفة

_تعاي يبعد عافيتي

سحبتها من ايدها وخليتها تتمدد على الجربايه وانا بصفها وجهي بوجها وكلتلها

_وعد رجال طول عمري مراح ارفض طلب الج بس الله يفرحني بخبر عنج وترجعين إلي بالسلامه

ساره:حته او هل طلب جان تعوفني بحالي

_اذا هل شي يريحج ويسعد قلبج وراس امي وابوي اعوفج وما تشوفين وجهي بس يعني ما اعوفج واتخلى عنج لا اعوفج لأن مرتاحه وسعيده بدوني

ساره:اكرهك

خلت راسها يم ركبتي ولازمه بيه بقوتها باجر حدد ايفان موعد الخزعه حته يحددون شنو نوع الورم ساره خايفه لان امها ماتت بهل مرض نايمه بين اديني وكلت الها

_جان اول يوم الج ب الديره من شفتج نازله من سياره حسين المرحوم الف رحمه على روحه جنتي لابسه كصير وشعرج محلول ولابسه اسود جنتي تعاينين بالشارع وعلى البيوت وحسين اجه يحجي وياي يومها بس خطفتي قلبي بنضره من عيونج حاولت اطلعج من راسي ما كدرت ضليت افكر بيج صبح وليل نوب انا تخبلت أفكر بيج لو بروحي انا أكبر منج وانتي بعدج صغيره نوب تقدمو الج اكثر من واحد بهذاك اليوم من شافوج ويجيني حسين يكلي هيج وهيج وانا اعصب واطلع اي عذر قبيح حته يرفض لحد ما اجه واحد رفيكي ومثل اخوي واثق بيه وحجه بيج ويه حسين كبالي انا ما كدرت احجي شي لان ضامنه واعرف اهلة واعرفه من صغري حسيت الدنيا خنكتني بس رفض حسين بنفس الوكت وكال اله بعدها صغيره ما يريد يزوجج هسه وثاني مره شفتج بالسوك انتي وهاجر وانتي لابسه ثوب اسود نص ردن وكصير ظافره شعرج وجهج يلمع جان وجسمج يلج لج والناس كلها فاكين حلكهم عليج اتصلت بحسين شايطه روحي وتعاركت وياه وخليته يعوف الشغل ويرجعكم للبيت لان خفت يصير بيج شي... ساره هواي مواقف خلتني أفكر بيج واتمناج الي ما اجذب دعيت الله تصيرين الي ومن صرتي اذيتج هواي وما حافظت على امانه حسين والله عاقبني بنيتي عذريني راح اخليج تنسين كل هل ايام والله بس اصبري علي وانطيني اخر فرصه والله وغلاتج انتي وداعه ولدي الاثنين الي صارو جوه التراب اذا صار شي وكسرت قلبج الج حق تهجريني وما تخليني اشوف وجهج مره ثانيه والله مو هينه علي ترحين من ايدي وما اكدر اسوي شي

جانت تباوع علي وتبجي خلت ايدها على خدي وخلت رأسها بركبتي شهكت وكالت بصوت يرجف

ساره: ما اكدر اشيل من راسي منضرك وانت مدنك راسك بغرفه سعد لازم دشداشته وشميت عطره حسيت يومها انا الي حرمتك من كل شي بقيت الوم نفسي وتمنيت اموت على الي سويته بيك ردت اكرهك من طردتني بس احس استاهل هل شي بسببي جان المفروض ما اعوفه بوحده

_انا الي فوتتها لبيتنه انا الي وكفت بصفها انا الي حرمتج من ابنج وما استاهل اصير اب

ساره:لا تحجي هيج لا تحرك قلبي تعرف زين انت راح تصير احسن اب بهل دنيه

مرت ساعات فتحت عيني الساعه ب٩ ونص موعد الطبيب ساعه ١٢ الضهر سحبت نفسي على كيف من الفراش ما اذكر شون نمت جنه نسولف سويت كهوة اتصلت بجاسم ما جاوبني دزيت رساله اله ((خويه انا بعازتك اليوم عمليه بنيتي ادعي الي قلبي واجعني وانا بوحدي احس بغربه يا خوي )) صدك جنت بعازته باوعت على كروب اخواني بالواتس كلهم يسألون على ساره ويدعون الها اجتني رساله من جاسم ((شيخنه حقك علي تمنيت يمك انا واسندك بس تعرف شغل الديره)) وكتله ((معذور اخوي))

خليت التليفون على الشحن ندك الباب وطلعت ساره من الحمام تنشف بوجهة مشيت بست راسها ورجع ندك الباب وكالت

ساره:موصي شي

_لا بس اخاف سمره لو هذاك الي مايتسمه اخوها

ساره عمر اي يجوز

خلت حجاب على راسها مشيت هذا شيريد يريد ادفنه بمكانه لو شنو فتحت الباب وشفت جاسم بوجهي ومبتسم وابوي وامي سيف و هند وعلياء وملاك و زينب ونبيل وموسى ضحكت بس شفتهم وكال

جاسم:لو بالكبر وتحتاج الي اطلع الك ما اعيفك والله

حضنته وسمعت ساره تكول منو وبس فتحت الباب على حيله وشافت اهلي لزمت ببلوزي ونزلت راسها بسرعه وبدت ترجف عرفت بيها تبجي وكالت امي والدموع ترست وجهة

رسميه :ما اشتاقيتي لأمج ولج ما حنيتي علي ما كلتي اطمئن عليها ليش ولج ليش كطعتي بيه

شهكت ساره وهي منزله راسها ما تكدر تحجي خلت راسها على ضهري تضم بوجهة وكالت امي

رسميه :ها يلترفه ما تريدين تبوسيني وتحضنين امج هيج صرتي

مشت بسرعه وحضنت امي باست ايدها وراسها وبقت تبجي وتشهك مثل الطفله بين ادين امي وامي هم مرت ساعه جانت كاعده وسلمت على الكل وفاتت للغرفه والبنات وياها كمت وره شويه اشوفها دكيت الباب وفتت بس ما انتبهن البنات عليه وجانن يضحكن وامي شدت علك بيد ساره اخضر وساره جانت حاطه رأسها على رجل امي وكالت

ساره:والله والله والله جنت مو بس ميته على هل لمه ملاك تعالي ليش كاعده بعيده

ملاك:مسامحتني

ساره:ليش شصار حته اسامحج

ملاك:ما كال الج عمي

_كلت الها بابا كلت الها كل الي صار

ملاك:اي اريد اسمع منكم مسامحيني حته الله يوفقني بحياتي والله ما اكدر انام هلكد ما خايفه وشايله هم مرعوبه

ضحكت ساره واشرت الها تقترب مشت ملاك سحبتها ساره وحضنتها كل قوتها وضربتها على ضهرها وكالت

ساره:والله اكدر اشم عطره بيج هلكد ما ساعدتيني بيه واهتميتي بيه وحبيتيه جنه قطعه من روحج لا عبالج الومج لو الوم احد والله لو جان إيماني ضعيف جان هسه كاعده الوم كل الدنيا بجيت وتوجعت اي واريد حته اموت بس راضيه بقدر الله وأعرف راح يعوضني انتو سامحوني و ادعولي اكوم بالسلام

رسميه :يمه وألله نمرد قلبنه عليج بس لا تخافين تردين بالسلامة النه اخذت خيره الج لج كافي اريدج تردين النه بالسلامه

_الله يسمع منج يمه يله بنيتي بعد ساعه الفحص كومي بدلي وحضري جنطج

بوسوها البنات وطلعو ما تحركت ساره وطلعت امي وهي تدعي الها والدموع تصب على وجهة سديت الباب ومشيت وكلت الها

_يله بنيتي كومي

ساره :م.. ما أكدر اتحرك

مشيت بسررعه ردت اساعدها وكعت بحضني خشمها نزف دم مسحت بسرعه خشمها بيدي كمت غسلت إيدي ونكعت الخاولي مشيت فاتت علياء وفزت بس شافت ساره أشرت الها تسكت ومسحت بسرعه وجهة وكلت

_اشششش سدي الباب فدوه اريدج تحضرين جنطتها

فتحت علياء الكنتور وطلعت الجنطه وكمت اساعدها اندل ملابسها فجنت اطلع الها ملابس و جان تي شيرتي الزيتوني موجود بين ملابسها الي اتهمت جاسم بايكه مني بقيت لازمه وعلياء تباوع عليه جان مرتب وضمن ملابسها بلعت ريكي بالكوه وابتسمت رجعته وكلت الها تاخذ الها ملابس داخليه وكالت بخجل ساره

ساره :اني هسه راح آه

توجعت ودنكت وخليت الحجاب على رأسها فتحت علياء الباب وكالت

علياء :جاسم شغل السياره هند طفي الكهربائيات وسدي الباب وراج

رسميه :يمه شمالها البنيه

_مابيها شي بس الطبيب يمه طالب منها تصوم وداخت

طلعنه و وصلنه للمستشفى والعشيره كلها ويانه فاتت لغرفتها وبدو يجهزون بيها طلعت الممرضه وكالت

الممرضه :العفو منو بيكم نواف

_انا كولي خيتي

الممرضه :المريضه الجوه تريدك يمها خايفه والطبيب إيفان كال عادي يدخل يمها لحين موعد العمليه

فتت بسررعه وبس شافتني مدت ايدها ولزمت ايدها كعدت يمها ترجف جانت والممرضه تحظر بيها لابسه ثوب العمليه بست ايدها طلعت الممرضه وخليت راسي يم صدرها جانت كاعده حضنتني وكالت

ساره :هاي مجرد خزعه وهيج ارجف وخايفه لعد العمليه شون

_والله اترس الكاظم سلام الله عليه شمع اذا كالو الورم حميد واروح زياره لشريفه بنت الحسن واوزع نذر هناك وثواب لوجه الله وتعالى بس يكولون الي حميد

ساره :تاخذني وياك

_من تخلصين العمليه حته لمكه وبيت الله ازورج بس صيري زينه

ساره :واذا

_اشششششش حسج ما اسمعه

ساره :خايفه

إيفان :شونها مريضتي الجميله

_دكتور خايفه بنيتي

إيفان :شويه بابا تفائل اريدج قويه الاهل الحلوين كلهم بره و واحد منهم رشاني رشوه مغريه الصراحه كال اذا السالفه تعدي على خير راح يجيب الي هديه كتله عاد انا اريد باجه اكو مريه عجوز وجهة يرد العافيه كالت اجي لبيتكم اسبوع وماكو شي ما تخلي بنفسي من أكل وعاد انا من سنين متغرب بألمانيا ومشتهي اكل عراقي جنوبي أصيل

_هاي العزيزه امي واحجيلك اياها دكتور بإذن الله من ترجع مريتي بخير وعافيه والله اخذك ويانه مده سبع ايام مو اكثر واشوفك الكرم الأصلي لأهل الجنوب

إيفان :والنعم منكم هسه اريد احجي وياكم بموضوع وان شاء الله وراها نبلش بالخزعه اول شي استاذ نواف و ساره الورم الصراحه كبر شويه بس شي بسيط مكانه حرج بس ان شاء الله نسيطر على الموضوع الورم ضاغط على جذع الدماغ وهو الي يسبب الج اضطراب الحركه وصعوبه بالبلع والتركيز يقل عندج واضطراب اتزان الجسم وتفقدين الحركه كل هل اعراض بينت عليج اخر فتره راح تفوتين لغرفه العمليات اول شي نحدد المكان بالضبط والاحداثيات مال ورم وراها نبلش بالعمليه يعني تفاصيل ممله وهواي شغل راح يفوتون ويايه دكاتره اني واثق بيهم المشكله اني ما احجي هل تفاصيل لأي مريض بشأن اختيار الدكاتره بس اريدج تكونين مطمئنه وكذلك راح تكونين تحت تخدير موضوعي يعني راح تحسين بينه وياج تشوفينه وتسمعينه بس لتخافين ما تحسين بوجع اريدج خلال العمليه تحركين ايدج ورجلج حته اطمئن مابيج شي وكذلك بعد ما نخلص العمليه اريد من عندج تهتمين بنظافه الجرح والمكان وما اتعبين نفسج يعني تبقين مرتاحه تكدرين تطلعين بنفس اليوم بس انا اريدج تبقين جوه عيني مده 24 ساعه وراح نحدد مكان الورم وراها راح ازين مكان الشعر اسف لان راح يخرب جزء من شعرج بس راح احاول اخلي مكان صغير مستعده

باوعت على ساره اني من يمي قلبي راد يوكف باوعت على وجهة وابتسمت وهي هزت براسها وكال إيفان دقايق وراح ينقلوها لغرفه الاشعه طلع ابتسمت بوجهي بست كصتها وادينها ولعبت بشعرها وبست عينها وكالت

ساره :حصير بشعه

_انتي؟ لج انتي لو تزينين كرعه تضلين حلوة بعيني وبنيتي وكل دنيتي خلي هل شي حلقه باذنج انا ما اعوفج بعد لو اعرف هل شي يموتني فهمتي كوليلي فهمتي اعرف كل مره اكلج هل شي وانتي تصدكين بيه وانا اكسرلج قلبج بس هل مره لا وداعه عيونج الله ياخذني إذا بعد اذيتج بشي

ساره :احبك

_الله يرجعج الي بخير وعافيه باقي يمج زين بنيتي

هزت راسها اجتي الممرضه وكعدنها على كرسي متحرك وطلعت من الغرفه كل اهلي موجودين يحاولون يواسونها بس من بجت وكالت خايفه بجت الكل حته ابوي ركعت يمها كبالها ولزمت اديناتها ابوس بيهن وكلت الها وبالكوة مسيطر على صوتي وعيوني

_احبج خلي هل شي براسج واذا صار الج شي ما أكدر على فراكج وانتي راح ترحين وترجعين الي وهل عمليه بسيطه لا تخافين ضلج قويه احبج بكد صبر أيوب وراح ابقه منتظرج يم الباب حته اول ما تطلعين ابوكج من المستشفى واخذج لمكان حلو بغداد وين تردين وين تحبين تكونين بس تطلعين من العمليه كوليلي وداعتج لو للصين هم اخذج بس كليلي حته احضر الج المكان

ساره :م.. من اطلع اريد انام على صدرك وتضل يمي

ابتسمت وبست ادينها واخذوها لغرفه العمليات بس نسد الباب وكعت من طولي ضليت كاعد بالكاع ركضو اخوتي سندوني جاسم يحاول يقويني ضليت صافن بوجهة وكتله

🖤🖤🖤🖤🖤🖤🖤🖤🖤🖤🖤🖤🖤🖤🖤🖤🖤

ان شاء الله تحبون هل بارت

وكذلك اسفه بنوتات ما اكدر اجاوب خاص اشوف رسائلكم بس ما اكدر اجاوب مدري ليش 😩😩 بس هذا حسابي اذا تحبون اتابعوني