رواية عشگ أهل الجنوب الفصل الثالث 3 - بقلم أسيل

زينب : اوووي يمه بعد قلبي سوده  عليه  روح استريح بأمانتي وراس امي ما اتركها تأذي روحها لا تخاف

_سيف باقي هنا يم الباب واي شي يصير تصيحين عليه وفاتحة حسين راح تصير كبال البيت

باوعت على ساره الي جسدها متكشف وهي تصرخ  طلعت الزلم و انصب الجادر اباب البيت ومرت ساعات جابو تابوت المرحوم خليناه بالبيت واشوف ساره الي فرفح قلبها جنها طير مذبوح هل تشيل بروحها وتشمرها على التابوت  وزينب تحاول تستر بيها خليت الزلم يطلعون بره لجل لا يعاينوها وملابسها مشككه عليها هي وهاجر المسكينه الى رايحه بعالم ثاني وكفت انطيتهم ضهري سارت هند  وكالت

هند : احلفك برب السمه شيلوه هل بنيه فرفح قلبها يصير بيها شي

_استروهن انا داخل اشيله سلمو عليه وابروه الذمه

هند: انت تأمر

دخلنه شلناه وقبلناه على القبله وساره ما رضت تبقى بالبيت تريد تجي النجف  ويانه طلعنه من الديره وصحبانه كلهم ورانه صعدت زينب وياي هي وساره و وجان نبيل الي يسوق رحنه وردينه وساره ما سكت نوب من دفناه البنيه مردت قلبي مرد تشاهك الطريق كله زينب تواسي بيها انطيتها مي  وما ترضى تشرب وصاحت زينب بيها

زينب : ولج هذا امر الله تعصين امره ولج كافي يبعد قلبي وجعتي قلبج

ساره :ع .....عافن ......عافني.... وحد ....وحدي

جانت تشاهك وما تكدر تحجي اباوع عليها بالمرايه صارت مثل الطماطه وكالت

زينب : والله ما نعوفج كلنه يمج كفيلج الله  منتركج يمه يمه الحك الحك نواف هل بنيه ساحت روحها يمه

وكف نبيل السياره وبسرعه نزل نبيل وانا فتحنه الباب غسلت زينب وجه ساره بالماي وخرت العبايه من صدرها من كثر الضرب صار بلون الدم وشربتها مي شوي

نبيل : استغفر الله  منو لحال هل بنيه

زينب : والله ما نتركها

صعدت بالسياره ونبيل هم كمل الطريق وساره هدت شويه وصلنه ومر يوم كامل جنه كلنه بالفاتحه كاعدين وما نحس اله صريخ نسوان ردت اطلع من الجادر وفاتت ساره وصارت بوجهي نقبض قلبي من شفتها بهل حاله ومشت وكفت بنص الجادر والزلم كلها تباوع عليها وكلت الها وجسمي يتراجف عليها

_يا بنت الاصل رجعي لبيتج

تخبلت  هاي سجين بيدها معقوله تريد تسوي شي بروحها شمرت الشيله بالكاع وكالت

ساره : اني اريد ثار اخوي بيكم واحد رجال الي يأخذ بثار اخوي

ورادت تكص شعرها بنص الزلم وكامو كل الزلم معناها مابينه خير هل تكص حرمه شعرها وتشمر شيلتها  بين الزلم وبنص الجادر وبسرعه مشيت ولزمت ايدها باوعت علي ورخت ايدها انطيت السجين لجاسم  وكال ابوي

حيدر:  وحك ذاك الجفل زينب ثار حسين ناخذ الج ناخذه ولنجيب الكتال حدر نعالج وهل بنيه مرت ولدي نواف و الي يكترب صوبها  ينكتل وهل عكال ما ينلبس ومابينه خير اذا ما جبنه كتال ولدي حسين  الج وانت استر حرمتك يا نواف

نزعت عباتي وسترتها  وخذيتها للبيت وركضت صوبي علياء صدك هل حجي ابوك حلف هي تكون مرتك هاي الحضريه

_مالي خلكج علياء زينب تعالي خذيها غسليها وانا كتلج لا تفاركينها

#ساره

مرت  ايام وحسين راح  بدون رجعه تركني وراح  خله بقلبي حسره ريت الله ياخذني ويخلصني من هل دنيا مرات افكر انتحر واخلص بس اتعوذ من الشيطان انا ما سويت شي طول عمري يغضب رب العالمين صح البس قصير وشعر بس عمري ما سويت شي حرام اخاف الله بكل شي تعودت على زينب وهند اما علياء احس بيها نوع من الغيره او العصبيه يعني احسها شايله خشمها بس ما سوت شي يأذيني ابد واما الحجي حيدر ما عافني كل يوم يطمئن عليه ويروح مرات اروح لهاجر اواسي بيها لاجل ابنها علي طلعت حامل بولد تكضي الليل والصبح بجي وكل ما تشوفني ما تسكت بجي  وحته قللت روحاتي الها حبست نفسي بالبيت وهاي مرت خمس اشهر انا بس اتمنى الموت كل يوم ...سمعت الباب يندك رحت فتحت الباب واشوف هاجر و طفل بحضنها واول ما شفته شهكت واشوف هاجر لابسه الوان كتلها فوتي هي وام هاجر حضنتهم وخليت الطفل بحضني وكالتلي هذا علي عرفته والله ما بجيت دمعت عيني بس ما ردت اقهرها بقيت ابوس بيه واحضنه ريحته تجنن يخبل يشبه حسين هواي وما حجيت شي لان لابسه هاجر الوان صح حز بقلبي بس اعرف حسين جان يكره الأسود يموت منه من البسه حضنت علاوي واحس فرحه بقلبي نملت وكالت

هاجر: وفيت بنذري ونزعت الأسود يم كبر حسين

_ ربي يسعدج ويسعد هل ولد يمه يشبهة وعسى الله لا يجعل عمره مثل عمر ابوه ويخليه مثل عمر الحاج حيدر يا رب

هاجر : كضو كتالي حسين

_عليج الله

هاجر :وحق القران

هلهلت ام هاجر واني الدموع تنزل من عيني جسمي يرجف وحركه بقلبي وكلت

_وهل انتي نزعتي الأسود

ضحكت وهزت راسها ندك الباب وردت اكوم بس سبقتني ام هاجر وفتحت الباب ودخلت زينب وعلياء و هند وكلهن فرحانت واول مشافو علي حطته زينب بحضنها  وتبوس بيه وكالت

زينب: يتربى بعزكم ادعنلي كون اول ذريتي ولد

هاجر: عساج بولد  يرفع راسج ويارب بكامل صحته وعافيته

هند : سمعتي يا ساره كضو كتالين اخوج وراح يأخذون بثارهم

هزيت راسي وسمعت صوت نواف وهو يدك الباب

نواف : يا اهل الدار

كعدن كل النسوان  عدل وخلن الحجاب على راسهن  كلهن نزلو راسهم ما اعرف يخافون منه لو يحترمنه الأ اني  جنت رافعه راسي وما خليت حجاب على راسي واباوع بنص عينه و كالت اله

علياء : فوت بعد خيتك

فات ونزل راسه وكال وهو يباوع على ايده الي بيها سبحه وميباوع علينا

نواف : ساره

وكفت على طولي ورجع باوع عليه لاول مره قلبي يرجف من اسمع اسمي واجتي عيني بعينه  واحس الهوة قل بريتي وكال

نواف : راح اجيبهم يم نعال رجلج بس مطلوب منج طلبين

_اي شي تريده يصير الك بس خليني اشوفهم بعيني

نواف : الأسود تنزعيه وما يطخ جسمج بعد هل لون

_ هسه انزعه موافقه والطلب الثاني

نواف:  مو وكته الحين زينب لبسيها وطلعيها بين الوادم خلي تشوف اكو زلم بعد بهل ديره

زينب : تدلل اخو الغالي

# نواف

و صعدت زينب وساره وره مده جنت واكف يم الزلم بره ومجتفين هل مخنثين والمشكله مشكله ثار قديم بيني وبينهم وبين حسين عرضولنه كاعهم وما اخذنها وهنتهم انا وحسين  بين الوادم مال يتامى ماخذينه ويردون نشتريه منهم هل فضحناهم بين السلف طلعت ساره لابسه هل دشداشه زركه بلون الحبر وشعرها محلول ومخليه شال على راسها شامرته شمر قلبي كل ما اشوفها احسها راح يفضحني وبديت اسمع حجي زلم ويعاينون عليها حسيت بغير وانا ما الي اي دخل بيها ومشت وهل مخانيث يباعون عليها ضربتهم على روسهم بأيدي كل قوتي اربعتهم وخليتهم ينزلون راسهم

# ساره

فات نواف وكلي ان هو جابهم بس شرط انزع الأسود صعدت لبست اول ثوب لكيته شويه طويل ومستور عندي اخاف من خزرات نواف الي وذبيت الشال على راسي وطلعت بره واشوف الناس كلها بره واكفين و اربع اشخاص مجتفين وما اشوف غير نواف يضربهم على راسهم باوعت على نواف  صافن عليه وخزرني واشر على صدره نزلت راسي واشوف صدري مبين غطيته بالحجاب بسرعه مدري شون انتبه طالع شويه 

نواف طويل بشرته قمحيه جسمه خشن عيونه عسليه وشعره اسود ولحيته بمستوى واحد وسوده وبيها شيب لابس دشداشه وغتره وسبحه بيده شكله كولش حلو بس يخوف شويه يعني من خزرني راسا عدلت الربطه مشيت يمهم ويبجون مثل النسوان واجه ابو نواف الحجي حيدر وكال

حيدر : هسه اكدر اجي ومخلي عكالي على راسي 

اجه باس راسي يخبل اموت عليه ما كطع بيه هسه عرفت ليس حسين يحب هل مكان وما عافه  حسيته شون بابا نفسه اتذكره هيج جان حنين ويحبني ويخاف عليه من الهوة وكلي

حيدر : هذولي حدر نعالج بنتي تريدين ناخذ الثار وهسه  نسويها دم بدم وجوه رجلج نذبحهم مثل الخرفان الشيخ نواف الي ما فات البيت ولا نام يوم بيه الا جابهم  وارتاح وهسه الي تأمرين بيه بنيتي يصير الج

واني بس قلبي محروك اباوع عليهم الدم مراح يرجع الي حسين وراح ادخل خطيتهم كمت ابجي وجعني قلبي من شفتهم وما اشوف غير هاجر تضرب بيهم بالنعال وبسرعه وخرتها  وامها سحبتها وشكلتهم الذمه ليوم الدين ودفعتها ليوره وكلت لنواف

_سوي بيهم  الي تردوه سلموهم للشرطه كتلوهم بعيد عني الي تشوفونه سوه الهم  واني ما باريتهم الذمه ليوم الدين ودم اخويه ذمه بركبتهم وما اسامحهم لو بينهم وبين الجنه سماحي الله لا يسامحهم  لان خلوني احس اني يتيمه للمره الثالثه وبوحدي هل ضليت

نواف : الي تريديه يجرالج يا بنت الأصل وتراج مو بوحدج انا بسدرج وابوي وجاسم وسيف ونبيل اهلج كلنه احنه

مرت اسابيع واني وحدي بالبيت مرات تمر علي هاجر ما اصبر روحي من اشوف علي راسا ابجي احبه هواي تكلي تعالي كعدي ويانه بس اني ما ارضى هي عدها اخوان واني بأي حق اروح اسكن اصلا هم غربه عليه صح خوش ناس بس مو يعني اكدر اخذ راحتي زينب ابد ما تكطع بيه تموت عليها والله اني هم احبها هي وهند وحتى علياء صح مرات شايله خشمها بس حبابه المهم جعت اني حيل الثلاجه شبه فارغه صار هواي ما طلعت اتسوك والله كل ما اطلع الناس يردون ياكلون حتى حجاب البس وما اخلي مكياج ابد بس الناس تخوف صار اسبوع شباب يفترون يم البيت و بيتنه شويه بعيد عن بقيه البيوت حسين المرحوم اروحله فدوه اخذ هل بيت بعيد يحب الهدوء سوده عليه جنت دائما اكله بيك جني تاخذ بيت بعيد عن الناس ويضحك  نزلت جوه توضيت كلت مادام  كاعده وحدي خلي اصلي ركعتين بلكي الله يبرد قلبي سمعت طكطكه مديت راسي وشفت تلث ولد واكفين يم باب البيت وما حسيت بروحي اله ركضت وقفلت الباب على روحي الوقت متأخر يا الله اتصل بمنو منو هسه يروحون ياربي الله يفرجها ياربي استر عليه ياربي وسمعت الباب يندفع يا الله يردون يفوتون اتصلت بزينب جسمي كله يرجف جاوبت زينب

زينب : كولي بنيتي شبيج خوما تعبانه نجي نوديج للمستشفى

👑👑👑👑👑👑👑👑👑👑👑👑👑👑👑👑👑

هااااااااي سوري ع التأخير ان شاء الله يعجبكم هل بارت واسفه اذا اكو اغلاط املائيه نبهوني عليها اذا جان اكو اي غلط 💙🖤🌻

وبليززززز لا تنسون التصويت 🖤