رواية عشگ أهل الجنوب الفصل السابع 7 - بقلم أسيل

# ساره

شفته طلع من البيت ضايج ومو على بعضه وفاتت نوره تضحك وكعدت ما اله حق يتصرف وياي هيج و ما تقبل رسميه اروح للبيت بقيت انجبرت ابقه يمهم ونوره ما تفارك نواف ولازكه بيه وتتمضحك واني كل ما اعرف هو بالببيت ابقه بغرفتي حته ما اشوفه واخلي يعصب مني بدون قصد مني اذا اني كل شي اسوي هو يعصب مرت ايام وبيوم جانت الدنيا ضلمه والوقت متأخر كمت من الفراش عطشانه وما تعشيت جوعانه فتحت الباب على كيف نزلت بهل بجامه و التي شيرت مستحيل هسه احد يكعد بهل وكت فتت المطبخ فارغ طلعت تفاحه وبطل مي كشرت التفاحه وكصكصتها خليتها بالماعون واسمع صوت نواف وجاسم يم الباب ونفتح الباب واني بسرعه ختلت وره الثلاجه جانت اكو زاويه ميكدرون يشوفوني بيها وسمعت جاسم يكله

جاسم : يله نشوف الخير ان شاء والله يرزقك بالذريه الصالحه

نواف : ويرزقك ان شاء الله يله اصعد يم حرمتك والصبح الله كل شي يحله

جاسم : وانت

نواف : شويه كاعد هنا واصعد لغرفتي

جاسم : محتاج شي

نواف : سلامتك ما تقصر

صعد جاسم وفات هو للمطبخ بقيت جامده بمكاني وجان يحمي الجاي وكعد على الميز والستكان كباله وشرب منه وكال

نواف : راح تبقين خاتله وره الثلاجه تعالي كملي اكلج

مخليه ايدي على حلكي شون شافني وحس بيه ما اعرف طلعت من وره الثلاجه وراسي بالكاع واني اجر بالبدي وكال وهو يباوع على الستكان مال جاي

نواف : تعالي كملي اكلج

_ ما اريد اريد اصعد لغرفتي

نواف : كتلج تعالي كملي اكلج

يحجي ويايه بعصبيه مشيت وكعدت وبديت اكل التفاحه احسه راح يموتوني بنظراته وكال

نواف : اكعد وحده تسويلج لكمه ما تعشيتي

_لا لا شكرا هاي كافي مبروك

نواف : على شنو

_ لان راح تخطب نوره تستاهلون

نواف : الله يبارك بيج يوم الج ان شاء الله ونفرح بيج وتعالي صدك ليش خاتله وره الثلاجه

_ لان ملابسه حجاب والله ما جنت ادري احد بره بهل وكت وكلت اخذت تفاحه ومي واصعد لغرفتي بس انتو رأسا فتو للبيت

نواف : شوفيني تره مو قاسي لهل درجه بس ما اريد احد يمسج بكلمه لو يغثج وهذا لبسج بس لرجلج تلبسيه وانا اخاف عليج لا احد يخلي عينه عليج ويأذيج لو يقشمر عليج بكلمتين وياخذج مني اقصد منا

_ اشكرك

نواف : متاخذين بخاطرج مني ولا تبقين جوعانه بسببي

_ لا لا مراح ابقه جوعانه

ما باوعت عليه ابد بس جنت اباوع على التفاحه كام وعاف الستكان بمكانه ما اعرف شبيه وشديصير بيه من اشوفه لو اكعد بماكن هو متواجد بيه وقبل لا يطلع كال

نواف : تره نوره باجر راده لهلها ما اشوفها غير اخت الي يعني بس حبيت اكلج اذا احد حاط براسج غير كلام فهمي هذا مني ما اشوفها غير اخت تصبحين على خير

وصعد الدرج قلبي دك بسرعه خليت ايدي على صدري وكمت بسرعه غسلت الستكان ورجعت لغرفتي وهل مرت ايام واني بعدني يمهم راح يصير شهر على كعدتي يمهم نوره رجعت ل أهلها اشتاقيت لحسين صار يومين احلم بيه كل ما اغمض عيني وكل مره يكلي مشتاقلج فزيت من النوم قلبي يوجعني عليه وكمت الفجريه جانت صليت روحي لايبه عليه اريد اشوفه دكيت الباب على غرفه نواف على كيف وفتح الباب وجنت اعرف بيه كاعد بهل وكت جنت منزله راسي ولازمه بالجاكيت محسيت بس مد ايده على وجهي ورفع راسي وكال

نواف : شبيج شمكعدج بهل وكت بيج شي

_ فزيت ما كدرت انام صليت ركعتين وطارت نومه عيني

نواف : وليش باجيه ساره صار يومين موعلى بعضج كولي شبيج محتاجه شي فلوس غرض تردين ترحين لمكان

_ اريد حسين اريد اروحله واسولف وياه شويه

نواف : خلي يطلع الصبح ونروح اله وناخذ امي

_ لا راح تبجي هواي وتأذي نفسها وهي قلبها تعبان صار يومين يجيني مشتاق الي بالحلم خلي اشوفه حته اذا من بعيد

نواف :استغفر الله هدي وما يكون خاطرج اله طيب هسه اكول لزينب اخليها تجي ويانا ونطلع لا تبجين كافي

_ اسفه اسفه لان تعبتك ويايه بس قلبي واجعني عليه

نواف : اسم الله على كلبج بنيتي

# نواف

خبرت زينب طارت من الفرح وكلت لنبيل يكمل الشغل بمكاني واخذت زينب و ساره وطلعنه كعدت زينب ليوره كالت تريد تتمدد جسمها يوجعها وكعدت ساره بصفي تباوع على الشارع ما حجينه شي طول الطريق وصلنه يم مطعم ونزلنه يعرفوني اهل المطعم وحجزو جناح كامل فوك الي صعدن فوك وكعدنه شربت ساره بس جاي احوالها متخربطه فدنوب الف هم شايلة وكتلها

_ شبيج ساره ليش متاكلين اطلب الج شي ثاني معجبج المكان الأكل مو طيب

ساره : لا والله لا والله كلشي تمام بس مراضي حسين عليه

_ استغفر الله شهل حجي ليش هيج تكولين ساره بنيتي تره حسين من يومه راضي عليج

ساره : شفته والله مراضي عليه

زينب : ليش هيج تكولين

ساره : قلبي واجعني مخنوكه هواي

كامت زينب بسرعه وفتحت ربطه ساره ومسحت وجهها بالمي شويه وفات واحد من الزلم وخزرته وصحت بيه وجان صافن على ساره

_ انزل جوه من احتاج انا الي اصيح الك يله

نزل بسرعه جان راسها على صدر زينب ومغمضه عينها شويه هدت وجهها اصفر جبرناها تاكل لكمتين وكملنه غمضعت عينها وحسيتها نامت جا نت ليوره نايمه خلت زينب عباتي عليها وباوعت عليها وكالت

زينب : الغالي ليش هيج تكول ليش مراضي عليها استغفر الله والله ما شفت منها شي شين خلي ناخذها اله ونشوف الله يريح قلبها تريد ترجع لبيتها احسها مخنوكه من كعدتها ويانه

_ زينب اخاف

زينب : تخاف من شنو شيخ خيرك

_ اتركها بوحدها ويصير شي الها وما اسامح نفسي

زينب : خليها جم يوم ترتاح ونرجعها يمنه بعدين اثاريك عاشكها

_اسكتي لا انزلج واعوفج هنا

سكتت زينب بس مكالت شي غلط بس ما اريد يبا ن عليه هل شي مرت ساعات وديتها وكعدت يم حسين بجت هواي بقيت كاعد بالسياره واباوع عليها قلبها فرفح ردت انزل و اسكتها بس زينب ما قبلت كالت خلي تفرغ الي بقلبها قرت قرأن اله بقت تحجي يم كبره وزينب كومتها اخر شي وصعدتها بالسياره اجرت غرفتين بفندق يم الضريح ورحنه ارتاحينه بالفندق شويه بس بالي ما هداء بس افكر بيها سبحت افكر بحالة ساره مراضي بيها ابد كملنه زياره رجعنه نمنه بالفندق ومن الفجر كعدنه تريكنه ورجعنه لديرتنه ساره كاعد يمي ليكدام احس حالتها صارت اسواء وباوعت الي وكالت

ساره : فدوه رجعني لبيتنه

_ هاي شبيج انتي بس كليلي احد مضايقج بشي مسمعيج كلام انا مضايقج اطلع من البيت

ساره : والله محد بس اني ثكلت عليكم واريد ارجع للبيت

_ والله راح اشمرج من السياره مسودنه انتي

زينب : لج ساره والله انتي ما مضايقتنه شوفي ام نواف الكاع ما لامتها وتحبج اكثر منه ومن وليداتها

ساره : اعرف والله بس مخنوكه اريد اكعد شويه هناك فدوه والله ارجع الكم شوكت ما اضوج اجيكم كل مره

_ الي يعجبج يا بنت الناس بس هذا الشي راح يزعل امي

ساره : اني اراضيها ان شاء الله بس ارتاح شويه لا تزعلون مني

زينب :ما نزعل منج بس حبيت ابشرك يا شيخ

_ شكو ان شاء الله خير

زينب : راح تصير عم

_ ايا ملعونه دكولي والله

زينب : والله

ساره : يقلبي شهل بشاره والله فرحتي قلبي

زينب : الله يفرح قلبج خيتي

ساره: والله لو ادري ما اجيبج ويانه

زينب : ها ولج ليش شمسويه انا

ساره : ولج لاااا قصدي الطفل والطريق اخاف عليكم والله

زينب : لا تخافين الحافظ الله و الله انطاه الي والله يحفظه

_ يتربى بعزكم ان شاء الله وشكال نبيل

زينب : والله عاد اني ما كتله انت اول واحد الي بشرته

_ الله يبشرج بالخير ان شاء الله وتفرحون بيه

# ساره

فرحت هواي لزينب تستاهل والله ..... مرت مده وصلني للبيت وانطاني خبر راح يترك حرس يم الباب واتصل بيه اذا احتاج اي شي راح وادري خاله راح تزعل مني بس والله مستحيه كعدتي هناك احس نفسي حمل عليهم وعصبيه نواف كل مره عليه اني غبيه انسى بسرعه وكل مره اسوي شي غلط صح محد حسسني اني حمل لو ضيفه بالعكس البيت بيتي جان بس اني المشكله بيه اني .. ارتاحيت شويه وكمت نضفت البيت كله وندك الباب وره شويه كمزت منو يجي الي بهل وكت وباوعت من الشباك ولكيته نبيل
فتحت الباب بسرعه والشال على راسي وضحك نبيل وكال

نبيل : ها يا ملعونه رحتي تره امي دزت الج هل اكل وتكلج كل يوم اكلج يوصل لحدر بابج وهي زعلانه منج

_ سوده عليه امانه تبوس راسها واني اسفه والله اجيها وماكو ام تبقه زعلانه من بتها

نبيل: ما محتاجه شي

_ لا والله سلامتك ومبروك يتربى بعزك ان شاء الله الفرحه ان شاء تملي بيتكم

نبيل : والله الكاع ما لمتني وجهج خير يا بنت خير

_ لا والله هي الله رزقها لان تستاهل انت وهي

نبيل : غاليه اشكرج مع السلامه خليج مرتاحه محد راح يتركج

_ فدوه لقلبك تسلم

راح بقيت كم يوم وحدي احس بتعب جسمي كولش خامل من يوم رحت لحسين ورجعت وما انام الليل مدري شبيه احس بخنكه اريد ارجع لبيت الشيخ مشتاقه الهم بس والله احس بحمل واني يمهم وهم االله شاهد ما مقصرين ويموتون عليه واني هم احبهم .... خلصت البيت والهدوم نضفت غرفه حسين البيت فارغ كولش ... نمت وما حسيت بروحي الا اني بالمستشفى وزينب يمي

# نواف

مرت عشر ايام على روحتها مارحت شفتها ولا حجيت وياها ولا زرتها ولا حاولت حته اوصل يمها هاي رغبتها وما اريد اجبرها بشي البيت هادئ والله حته محد يرضى يضحك ويسولف امي تكعد هل تصلي وتاكل ما تضحك .. جن والله اني الي جابرها تروح اجت زينب

زينب : والله اني قلبي لاعب خذني الها

_هسه يجي نبيل وياخذج

زينب: فدوه ما تجاوب من الصبح ادك عليها وما تجاوب بروح الغالي كوم وديني

_ لبسي وخليني اوديج يمها لا تخبرين احد حته لا يجن ويعوفن البيت فارغ واريدج تكعدين وياها وحدج وتشوفيلي شني علتها

زينب : اليوم ما اعوفها اذا ما ارجعها وياي

_ ورحنه الها زينب ساعه ادك الباب وهي ماكو سئلت الحرس وكالو ما طلعت اجتي زينب

زينب: بس لا سوت بروحها شي

دكيت الباب اكثر من مره ما فتحت الباب بسرعه كسرته وكلت لزينب

_ فوتي شوفيها وينها

بقيت افور معقولة سوت شي بروحها لا استغفر الله تخاف الله وره دقايق طلعت بسرعه من الغرفه تصيح

زينب : ولك الحك ما تكعد ما تكعد

ما احس بروحي اله فتت لغرفتها مدثره روحها بالغطه ونايمه وخرت الغطه منها واشوفها بثوب اسود كصير وشعرها مفتوح وجها مصوفر خليت ايدي على وجهها تجوي جوي من الحراره ردت اكعدها شمرت بوجها مي ماكو منها اي حس لفيت الغطه عليها وشلتها مثل الريش بين ايدي باوعت بوجها كلش قريبه على صدري جانت ملامح وجها تجنن شفايفها جنها عنب خشمها كلشي بيها حلو يم صدرها شامه استغفرت الله لعبت بالي هل طفلة اخذتها للمستشفى وخبرت نبيل يجي يلاكينه هناك و ما يكول لأحد ووصلت واجه اخذها الطبيب مني فات هو وممرضات للغرفه بقيت واكف انا وزينب كعدتها لا يصير بيها شي انطيتها مي طلع الطبيب وكال

الطبيب : شيخ شتعود الك هل مره

_ ها هي ما تعود شي

الطبيب : شنو لكيتها بالشارع

زينب : لا لا هي خيتي

الطبيب : شني ماعدكم اكل بالبيت

زينب : ليش والله عدنه ولك بيت الشيخ نواف ما بيه اكل

الطبيب : الشيخ تاج راسي ما عرفتك بس هل بنيه حالتها خطره تره مناعتها ضعيفه عدها فقر دم حاد ومنايمه وجسمها بيه جفاف تعبان كلش هامله صحتها جنها شهر مماكله

_ استغفر الله دكتور طمني شون صارت هسه

الطبيب : خليت الها مغذي بس يخلص انطيها علاج يخفض الحراره وان شاء الله بخير تكوم بس لازم تغذيه وفيتامينات الها وتكدرون تطلعوها بس بمسؤوليتكم اذا صار بيها شي

_ ما يصير عليها شي ان شاء الله وهسه هي كعدت

الطبيب : اي

تشكرت من الطبيب و فتت اني وزينب كعدت وزينب لازمه بيدها عباتي دائما اخلي بالسياره عباتي لبستها الها وكعدتها بس اباوع عليها وهي هم ما عرفت شكلها لو اعاتبها بس شكلها تعبان حيل وكلت الها

_ليش هيح تسوين بروحج ساره

ساره : والله ما مسويه اني بس

وما احس غير امي وبقيه النسوان فايتات بقيت اباوع على نبيل بعصبيه اشرت وكلت لزينب

_ والله اذا طلع الوليد على ابوه اذبحه شنو الي ما فهمة من لا تكول لاحد ساره بالمستشفى

اشوف امي تبوس بيها وتحضن وهند تبجي وعلياء تعاتب بيها طلعت من الغرفه كعدت بالصالة وطلعن النسوان وديت كل وحده ويه رجلها اجه ابوي وجاسم وكف ابوي كبالي كمت بس كعدني وكال واول مره اشوفه يحجي وياي بهل نبره وهل هيبه

حيدر: والله ما انت ابني ولا اعرفنك ولا ارضى عليك اذا ما اخذتها حرمه الك لهل بنت وصيه ميت وتتنفذ لا وحق الي نزل القران ما اسامحك ليوم الدين وحته على كبري ما اريدك توكف هاي كدام جويسم

_ الي تأمره يا بوي يجرالك انا احجي وياها بس تصير زينه

كمت وفتت لكيت امي كاعده وكفت على حيلها وكالت وهي عصبيه على البنيه

رسميه : وحق هل مي الي يغسل حي وميت اذا ما صرتي حرمة ابني واذا انت ما خذيتها متبريه منكم ليوم الدين شوفي لج انتي بنت حوريه لا عبالج بنت بغداد وتكابرين علة وليدي هذا خشمج اكسره الج ترضين بيه غصب ترى ما ارضى عليج ليوم الدين ولا اشوفج وحته بموتي ما اخليج تحضرين جنازتي

ساره :يمه اسم الله والله

رسميه : اش انجبي ولا كلمه شوفي راح ترجعين ويه نواف لحوشنه وانطيج تلث ايام تفكرين بيها اذا طلعتي مالج رجعه ولا اعرفج ولا تعرفيني وشوفي تراها وصيه ميت هل اخوج مراضي علي لا عبالج ما دري شصار من زرتي كبره وانت يا مضروب الجلوه تخلص من المستشفى تاخذها من ايدها غصب وترجعها النه والك تلث ايام اذا ما تزوجتو لا تراوني وجوهكم وانت كوم الأزرك رجعني للبيت وانت هم شعندك ابو نواف هني تتفرج على النسوان الطابات والطالعات

راحو اخذت ابوي وجاسم وعافوني بوحدي يمها ما رفعت راسها ولا باوعت علي كعدت انتضر المغذي يخلص وبعدشوي تمددت وانطتني ضهرها وتغطت وكالت

ساره : ما اجبرك على شي الي تشوفه يريحك سويه

_وانتي شنو الي يريحج

ساره : ما اريد ابقه وحدي محد الي

_لا تسمعين حجي امي تراها ما تقصد شي لحضه عصبيه امج وجبيره

ساره : اعرفها بس اني تعبت ابقه وحدي ما اعرف شسوي البيت فارغ هذا البيت احسه سجن عليه

_ انا اكبر منج ب 16 سنه ما اضلمج وياي وبعدج صغيره

ساره : ولا انا اضلمك وياي ادري بيك ما ترضى بهل زواج لان كلبك ما هوى وحده غير ام حازم

_ الله يرحمها بس ام حازم شلها دخل

ساره : ادرري بيك تحبها

_ اي احبها شون ما احبها بس الله يرحمها تراها ماتت من 10 سنين بس انا اكلج ما اريد اضلمج بعدج صغيره والف واحد الي يتمناج يا بنت الناس

ساره : انا ماعندي اعتراض

_ لا حول ولا قوه الا بالله تره امي مو قصدها

ساره : اذا انت ما تريدني واهلك جبروك عليه كول لعمه هل شي وهي تلكه العريس الي ياخذني وارتاح لو انت وفض الموضوع واذا متريدون اتعبكم فاضل موجود خلي ياخذ روحي طبني مرض

عصبت وكعدت بسرعه توجعت ايدها ترجف ولزمت ايدها وباوعت عليه جان وجها كلش عصبي اول مره اشوفها هيج كمت على حيلي مشيت وكفت يمها دنكت يم اذنها تقربت منها وشاورتها عطرها يجنن

_انتي صرتي حلالي وحرمتي والي يخلي عينه عليج افكسهم اله وما تصيرين لغيري واذا صرت اكتلج واكتله خلاص فهمتي

خليت شفتي على كصتها وبستها لزمت العبايه كل قوتها وجها صار وجهي بوجها استغفر الله بسرعه دنكت وبتعدت من يمها صارت حمره اشوف ايدها ترجف ضحكت ودرت وجهي وطلعت .... رجعنه للبيت و هي ويايه والطريق كله ما فتحت حلكها بكلمه وحده تباوع بره الشباج وصلنه استقبلنها البنات كلهن وكلت ل امي

_ يمه ابشرج جبتلج جنه جديده للبيت

وما اسمع غير الهلاهل ساره منزله راسها اشوف امي ردت روحها وتضحك والبنات هم

💚🖤💚🖤💚🖤💚🖤💚🖤💚🖤💚🖤

هلوووووووووووووووووووووووو هاي مثل ما وعدتكم اعوضكم والله من ال 11 ب الليل خلصت البارت وجان اللابتوب مالتي تسوي تحديث وبقيت انتضرها ورجعت عدت وكتبت البارت مره ثانيه 😭

ان شاء الله يعجبكم شويه خفيف على المعدة 2466 كلمه ✌️☺️

نشوفكم الجمعه الجايه ب بارت جديد وبليز تصويت او اي شي كومنت بكيفكم يله هواي لغيت باي 🤣✌️