رواية عشگ أهل الجنوب الفصل التاسع 9 - بقلم أسيل

#نواف

خلت راسها على صدري واديها على ضهري واخذت نفس من صدري جانت مبتسمه ما ادري احسها تحبني لو هي هيج تتصرف وكالت

ساره : ادري بيك فاهمني اكثر من روحي بس اخاف

_اي ادري من شنو خايفه

ساره : بيوم تروح وتخليني بوحدي

_يا بنت الناس اول شي هذا حق وكلنا بيوم من الأيام نرجع يم ربنه بس ليش اتركج وانتي مريحتني ومامعاندتني بشي

ساره : اسم الله عمرك طويل ان شاء الله لا تكول هيج ..بس ما اعرف طبعك شون اتصرف

_والله يا بنت الناس راح تفهميني وافهمج اكثر ولا تخافين خليها على الله ويله غيري لبسج خلي ننزل سوه

ساره :اوكي

ابتسمت وجها صار وردي وباوعت الها واخذت نفس من يم صدري ...مشت بعيد عني وانا غسلت ولبست الدشداشه هي اخذت ملابسها وفاتت للحمام طلعت بعد شويه جنت واكف اخلي عطر وفتحت الكنتور ادور على شي كتلها

_شرايده

ساره : الحجاب بعدني ما اعرف وين اغراضي مرتبيها

فتحت الها الكنتور وطلعت الحجاب خلته على راسها كعدت اباوع عليها وهي تخلي هل سوالف بوجها وكفت مدري ميحتاج تخلي اي شي بوجها هي اصلا جنها العافيه وكلت الهاا

_لبسي ذهب

ساره :ما احب البس

_ ولج لبسي هسه عبالهم الناس ما مخلين الج ذهب وماعندج وهل يكولون الشيخ نواف باخل على حرمته

_لا لا حشاك هياتني شوف حلبس الك

ضحكت انا واشوفها بدت اطلع بهل ذهبات وتلبسهن .... نزلت انا وياها و اول ما شافتني الحجيه هلهلت وطلعت زينب وعلياء وهند يباعن علينه وهلهلن التمن النسوان وامي تغني وتركص مشه ابويه وصاح الها وباست ايده اشر لسيف وطلع فلوس رشها فوك راسها واشر لنبيل واخذ منه ضبه فلوس وخله بيدها وكال

حيدر: هذا بياض اشتري الي يعجبج

ساره : لا عم .... عمو ميحتاج ما مقصرت والله نواف قصدي الشيخ ما مقصر

_اخذي يا حرمه لا ترفضين هديه ابوي

ساره : شكرا شكرا الله يديمك عمو

رسميه : ولجن دسمعن العمو مالتها غير تخبل من حلكها يله يله خلينا ننصب سفر الأكل راح يجون الناس

ساره : اساعدكم خلوني فدوه

رسميه : شني لا يمه لا انتي عروسه بعدج ما تلزمين شي وايدج بعدها محنايه

ابويه كال نروح نكعد بالديوان وكل اخواني راحو وردت اطلع وصاحت الي ساره باوعت الها

ساره : شيخ جنك نسيت شي

_ لا ما ناسي محتاجه شي كولي

ساره : لا لا بس نسيت سبحتك

اخذتها من ايدها وبقيت لازم ايدها و وكعت الربطه على جتفها وكلت الها

_ والله لاول مره انساها ما تفارك ايدي جانت شكلج بس والله بس هي من اولها وخليتيني انساها

ساره :اني ...اني معليه بس اي اعرف ما تفاركك دايما اشوفها بيدك

_ها والله طلعتي منتبهة علي

ساره : لا مو ... مو هيج

ضحكت عليها شون مرتبكه وبقت تباوع يمنه ويسره ادري بيه خجلتها بست راسها وكتلها

_اذا احتاجيتي شي كولي للبنات واذا ما نفذوه الج كوليلهم اخلي نواف يزوجهم لأخوانه عليكم

ساره : لا والله ما مقصرات وياي ديربالك على نفسك

_من عيوني لا تعبين نفسج وخليج مرتاحه ولا تنسين تقرين المعوذات من يجن النسوان ليحسدن حلالي

رسميه : ها يمه جنك ما شبعت منها انا كتله يعوفك وهل خبصنه عيب ما عيب والزلم جايين علمودك

_ يمه انا رايح

رحت وعفتها تستجوب ساره ... بالي كله يمها رحت وكل الزلم هناك كاعدين سلمت وفتت كعدت يباركون الي عمامي ماخذين بخاطرهم لان اخذت غريبه وحضريه ما اخذت وحده من بناتهم

#ساره

ماما رسيمه ما خلتني اسوي شي وبس كاعده ب الأستقبال والنسوان يفوتون يهلهلن ويبوسن بيه ويطلعن ونصهم يمدحون بجمالي ونصهم اسمعهم يكولون ل ماما رسيمه هاي ما تجيب ولد ...جسمها ضعيف ...بعدها صغير.... والنص الي يكول .... خلفتها بس بنات شون امي يمكن الف مريه باستني واريد بس افوت اسبح احس نفسي دبكت من البوس وما يبوسن عادي لا يشفطون الخدود شفط ....تأخر الوكت الدنيا صارت ضلمه وكلهن راحن ورسميه نامت خطيه من التعب بقو هند وعلياء وزينب ينضفون اني كمت ساعدتهم صح ما قبلو بس والله عيب كل الشغل عليهم وما كملت الشغل وطردوني اصعد لغرفتي ويكولولي رجلي هسه راح يجي صعدت لغرفتي يمه فتت سبحت ميته تعب اريد بس ارتاح شويه طلعت من الحمام ولكيت نواف كاعد على الجربايه ينشف شعره باوعت عليه وهو هم حسيت قلبي طار من شفته بالكوه سيطرت على نفسي هيج بس اريد اركض واحضنه بس استحيت اشتاقيت اله وكتله

_هلو

نواف : سبحة الهنة يبعد هلي

_ شكرا وين سبحت اسفه تأخرت بالحمام

نواف : ولج على شنو فتت الغرفه وعرفت بيج تسبحين سبحت جوه تعالي

اشر الي ومشيت يمه .. لزم ايدي وسحبني بحضنه كعدت بحضنه وحضني واشتم ركبتي يمه حسيت كل جسمي رجف بين ايده باس ركبتي عطر يجنن وكال

نواف : ريحه هلي

خليت ايدي وره راسه حضنته لان صدك فتقدته من هو ماكو يمي حضنه دافي جنت نايمه بحضنه ومخليه راسي يم صدره وهو يحرك ايده بشعري رفعت راسي بقيت صافنه بوجهة وهم هم ضحك وكال

نواف : احجي شبيج احسج مو على بعضج

_لا لا بس هيج حبيت اشوف وجهك

نواف : اعرفج احجي شبيج بنيتي

رجعت راسي على صدره وبقيت احرك ايدي على صدره يم قلبه وكتله

_ مممممم نواف اني اذا ما اخلف لو اخلف بس بنات تعوفني

نواف : استغفر الله يا روحي مين سمعتي هل حجي

_لا ما سمعته

نواف : اروحلج فدوه لا تجذبين حته ما تعرفين اتجذبين عليه احجي شسمعتي

_ اني ما اخلف وخلفتي نفس امي بس بنات مراح اجيب الك ولد

اختنكت وحسيت دموعي راح تنزل كعد وسحبني وكعدت كدامه فكال وحسيته عصبي وجان لازم ايدي

نواف : اول شي حجي الناس طلعي من راسج ولا تسمعين حجيهم

_اعرف اني ما سامعه حجيهم

نواف : قلبي شوفي خلي افهمج سالفه اذا الله رزقنه بالمستقبل بطفل ميهمني ولد لو بنيه الي يهم هو بصحه وعافيه والي يهم اكثر الطفل هورزق من الله اذا اجينه للموضوع من الجهة العلميه تره الطفل يحدده اذا كان ذكر او انثى هو الرجل يعني انتي ما خصج اي شي لا تبقين تفكرين بحجي الناس لان حجيهم هواي ومايخلص وانتي تعبتي اليوم ارتاحي شويه فدوه لهل خشم

_انت دائما هيج يعني اول مره اشوف شخص مثلك شكد حسين الله يرحمه جان حنين عليه بس ابد مو مثلك يعني ما اعرف تره انت تورطت بيه واعرف بيك مجنت ناوي تتزوج اي وحده بعد ام حازم الله يرحمها بس اني اجيت وتحملتني اعرف ما مجبور تتحملني بس لان

وبعدني ما كملت ارتبكت بالحجي لان صافن بوجهي وقريب مني ما احس غير بايسني من شفتي وايده جانت على راسي وسحبني كل قوته بالكوه كدرت أتنفس من ربكتي وخر احس شفتي ورمت حضني مخلاني حتى اكمل حجيي طلع الصبح واني نايمه بحضنه ولا اريد اكوم ما سوينه شي بس حاضني وطول الليل يسولف ويايه ويشاقه ضحكني هواي على سوالف اخوانه وحسين من جانو صغار كعدت الصبح حضرت ملابسه اشتميت عطر الدشداشه مالته تجنن عطره بعده بيها غسلتها بس العطر ابد ما وخر وعلكتها اله مشطت شعري الصراحه فكرت اكصه لان هواي متعبني خليت عطر يم ركبتي هاي سولتي من اني صغيره احب اخلي عطر يم ركبتي جنت اشوف ماما هيج تسوي وانا بديت اقلدها بعدين اتضح ان العطر من يتخلى قريب من النبض يبقى لوقت اطول بالجسم وجان سمعت نواف يكول

نواف : تعالي خليني اشم عطرج

_ص .. صباح الخير فززتك

نواف : لا جنت كاعد شفتج تشمين دشداشتي وتتبسمين

_مو مو هيج

شكد عيب فشلني وكعد اشرلي اتقرب منه مشيت اله سحبني وتممدت على الجربايه وخله راسه يم ركبتي واخذ نفس وزفره يم ركبتي بسرعه خليت ايدي على صدره كل جسمي رجف من هاي حركته كال

نواف : مثل المسك

_ن... نواف

نواف: عيون نواف كولي

_انت متاخذ عليه مره مو؟

نواف : يمي مره مثل الهيلة ترديني اخذ بثل ليش ولج مخبل

#نواف

ضحكت احبها هواي قلبي يفرفح عليها من اشوفها مو يمي لو يمي وما اكدر اطخها تخليني ارجع شباب وياها وادور سوالف المراهقيين خلت ايدها على لحيتي وتحرك بيدها وكالت

ساره :تعرف ملامح وجهك ترهم تصير مودل

_ لا هسه تخبلتي انا شيخ عشيره **** اصير مودل واعرض بجسمي للناس والبس هل بناطير المشككه الي جن جلب لاحك وراي وماكلهن

ضحكت بصوت عالي جنها طفله اختنكت بالضحكه وانا ضحكت عليها بست جف ايدها وكتلها

_ خلي اكوم ابدل وننزل

ساره : ذكرتني اريد منك فد طلب

_ تأمريني انتي امر

ساره : ما يأمر عليك ضالم يقلبي

وسكتت صارت طماطه باوعت ونزلت راسها بسرعه ورادت تكوم لزمت ايدها كتلها

_ عيدي شكلتي

ساره :خلي بس اجيب

_عيدي شكلتي

ساره: ما ماكلت ...ماكلت شي

_اخر مره احذرج عيدي شكلتي

ساره : ما يأمر عليك ظالم

_اي وبعد

ساره: بس ..بس

دغدغت بطنها اشو هاي ماتت ضحك بين ايدي خلت راسها بصدري وتريدني بس اوكف الفطيره وكامت تحلفني بس اعوفها وما عفتها وصاحت

ساره : قلبي والله قلبي انت

عفتها وكعدت تمسح دموعها وتتنفس بالكوه من الضحك دخلت الحمام وغسلت وجهي وطلعت اجتي هي وكفت كبالي جنت اعدل بشعري ولحيتي لزمت الريحه وبدت هي تخليلي خلت يم ركبتي رفعت رجلها حته توصل الي واشتمت العطر وكالتلي

ساره : ربي يحفظك الي ابوي انت

ساره مشت وخلت العطر على الميز وفتحت المجر وطلعت ضبه فلوس وخلتها بيدي وكلت الها

_شنو هل فلوس

ساره : الفلوس الي ابوك قصدي عمو انطاها الي البارحه الصبح

_ولج بابا كتلج ميصير ترجعين الهديه

ساره :لا... لا مو ارجعها

_لعد شتريدين بيها

ساره : اريدك تشوف جم عائله محتاجه وتوديها الها ثوب لحسين وماما

رجعتها بيدها وكلت الها

_قلبي اليوم اني بيدي اروح اشوف جم عائله واتسوك الهم وانطيها فلوس هاي الفلوس خليها الج اشتري الي يعجبج والي رايدته واني وداعه عيونج اتريك واطلع اوزع ثواب على روحهم

ساره :لا نواف بداعتي النبي عليك شوف هاي مو الي الفلوس اني اريد اثوبهم وداعه امي وداعتها اذا ردت لو عجبني شي وماعندي فلوس اجي اكولك اريدها بس اني اريد هل فلوس تنصرف على الناس المحتاجين

_كتلج خليهن اني راح اسوي الي تريديه

ساره : هاي او اول مره اطلب منك وترفضلي تمام شكرا مصار شي

حزت بخاطرها حسيت والله ونقهرت نزلنه جوه وسلمت على الكل صح مبتسمه بس احس مو من كل قلبها وفهمت ابويه الموضوع وكالي فلوسها وهي حره بيها فهمته اني الي راح اصرف ومقبل كلي لا تفشلها من اول طلب انت تعوضها واشتريلها شي خلت الجاي وكلت الها

ساره : قبل لا اطلع اريد تجيبن الفلوس الي عندج

ساره : جذاب

فرحت رجع الدم بوجها وكالت امي وهي تضربها على ايدها وتضحك ساره

رسميه : ولج لسانج كضيه

ساره :لا.... لا... مو قصدي ماما بس بس ما مصدكه اني ادري بيه ما يجذب بس فرحت

رسميه : يا فلوس ولك

_ يمه الفلوس الي انطاها ابويه الها تريد نوزع بيها ثواب على روح حسين وحوريه الله يرحمها ما قبلت هل زعلت مني كلت الها انا الي اوزع الها بس ما رضت رادت من فلوسها

رسميه : يمه من فدوه يمه هي فلوسها وحره بيها تريد تشتري بيها ذهيبات بكيفها تريد تصرف بيها مالنه دخل

ساره : ماما يا ذهب هو انتي والشيخ نواف خليتو ذهب ما جبتوه الي

_انا كلت الذهب ما يلوك اله على الذهب والترفات مثلج

زينب : احم احم جا شمالنه احنه

رسميه : زركات شمالجن تقارنن نفسجن بهل حوريه

ساره :والله يا يمه يخبلن واحلى مني هم

بدت يضحكن وصبت جاي ساره طلعت وامي انطتها مي ترش ورانه هاي كل طلعه هيج تسوي حته نرد بالسلامه للبيت

#ساره

هاي مرت ايام هل بيت روحي صارت بيه ان شاء دايمه هل فرحه بيه ... انتضر نواف من يطلع بفارغ الصبر وما يروح من بالي ما تعلمت افاركه ابد ما انام اذا ما اشوفه بس الصدك اني بديت اعشقه مو بس احبه ما مقصر علي بشي وحنيته يا الله مداريني مثل المي الي بالصينيه يغار يخاف عليه يرجف رجف اذا كلت اه لو وجعني شي يتخبل والله عبالك مدري شكو .... كل مره يسئلوني البنات وماما رسميه ها ما صرتي حامل يله نريد طفل ميدروني هو ما ماسني ولا متقرب الي بهل طريقه .... سافر ل بغداد سبوع ويرجع هاي مرن 3 ايام عبالك 3 سنوات ما انزل حته اكل وياهم ما متعلمه على هيج بعد عنه اضوج من اشوف مكانه فارغ بالبيت تعشينه وصعدت لغرفتي عيب من ماما رسميه لان هي طلبت اكل وياهم اكلت لكمتين وصعدت اشوفهن كلهن فرحانات ويضحكن ولا عبالك كلهم مسافرين اعرف متعودين بس اني ما اكدر مكاعد اتعلم جنت كاعد بالغرفه ماكو قناة ما كلبتها وشفت شبادي عليها انوب الوكت ما يمشي راسي يوجعني من القرايه اخر فتره هواي تعبت عيوني وصار عندي ملل جنت كاعده ولابس ثوب وردي قطن شويه محتره بله ردن وكصير عايفه شعري منفوش مالي خلك ارتبه اصلا مالي خلك ل اي شي بدون نواف نفتح الباب اكيد زينب ها كل متضوج تكعد يمي وتونسني اني زينب متقاربين ب الأعمار ف كولش احبها وهي هم انوب كرشها كبران شويه كولش فرحانه تتمنى يجيها ولد تكلي نبيل يريد اي شي بس هي متأكده ولد راح يفرح بيه ومن نكعد ضحكنه يوصل لسابع جار ويجن هند وعلياء ونكعد هل ناكل ونقشب علياء بالبدايه جانت ما متوالمه ويايه هواي واحسها تضوج مني بعدين تعودت على طبعها وهي هم وكل متنام تجيب الي ماعون فاكهة هي مكشرتها بيدها وتكلي اني اذكرها ب اختها الصغيره باوعت للباب وما اشوف الا نواف فايت للغرفه وسد الباب بقيت صافنه عليه ما مصدكه بس هذا كال اسبوع ويجي لا مستحيل كمزت من مكاني بس ضحك ونزع العبايه ركضت وحضنته

🌻🌻🌻🌻🌻🌻🌻🌻🌻🌻🌻🌻🌻🌻🌻🌻🌻

هااااااااااااااااااااااااااااااااااااااي شونكم ان شاء الله بخير 🙏

طبعا جان المفروض البارحه انزل الكم بارت القصه بس كل يوم عذر اعرف بس الله شاهد البارحه نفسيتي هواي جانت تعبانه لان استاذي توفى بهل فايروس حته مكدرت اعدل على القصه بقيت متكئبه واكل بس واتفرج انمي هسه تضحكون وين اكو وحده عمرها 27 سنه تتفرج انمي اي اني 😌

الصراحه بديت اكتب قصه جديده بس هل مره فدشي جديد وهم باللهجه مالتنه اشو عجبني الوضع 😁

على فكره اسفه لان هواي اكتب بس احب اشاركم كل شي واحب اعرف عنكم اشياء اكثر مثلا خلي اسئلكم شنو الاغنيه الي مجلبه براسكم هل فتره كتبو اسمها خلي اسمعها واني اكتب البارت الجديد الي راح انزله الكم بعد يومين ان شاء الله لو 3 ايام ميهم اي لغه انكليزي عراقيه خليجيه اي شي اني اسمع كل شي اكثر شي اسمع انكليزي بس هم اسمع عراقي وقديم كلشي 😍💓

اسفه على التقصير واشوفكم عما قريب 🙏🙏